ពិធីជួបសំណេះសំណាល Archives - Kampuchea Thmey Daily

ក្រុមការងារចុះមូលដ្ឋានសង្កាត់ត្រពាំងក្រសាំង នាំយកអំណោយជូនគ្រួសារវីរកងទ័ព និងពលរដ្ឋខ្វះខាតជាង ៧០គ្រួសារ

Ken Malis — Mon, 09 Feb 2026 03:01:17 +0000

ក្រុមការងាររាជរដ្ឋាភិបាលចុះជួយសង្កាត់ត្រពាំងក្រសាំង ដែលមានលោក ងុយ រិទ្ធ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ជាប្រធាន បានអញ្ជើញជួបសំណេះសំណាល និងនាំយកអំណោយជូនដល់គ្រួសារវីរកងទ័ពជួរមុខ និងគ្រួសារមានជីវភាពខ្វះខាតចំនួន ៧៨គ្រួសារ។ ពិធីនេះធ្វើឡើងកាលពីថ្ងៃទី៧ ខែកុម្ភៈ ឆ្នាំ២០២៦ ដោយមានការចូលរួមពីលោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហ៊ត រដ្ឋា ចៅសង្កាត់ត្រពាំងក្រសាំង និងសប្បុរសជន ជាច្រើនរូបទៀត។

លោក ងុយ រិទ្ធ បានលើកឡើង នូវវីរភាពរបស់វីរកងទ័ពរបស់កម្ពុជា ដែលបានលះគ្រប់បែបយ៉ាង ដើម្បីការពារបូរណភាពទឹកដីប្រឆាំងនឹងការឈ្លានពានពីប្រទេសជិតខាង។ លោកថា «សម្រាប់កម្លាំងជួរក្រោយ នៅតែបន្តគាំទ្រវីរកងទ័ពជួរមុខ ហើយការចុះជួបសំណេះសំណាលនាពេលនេះ ក៏ដើម្បីពាំនាំនូវការនឹករលឹកពីសំណាក់ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខណ្ឌពោធិ៍សែនជ័យ ចំពោះបងប្អូនគ្រួសារវីរកងទ័ពដែលនៅក្នុងសង្កាត់ត្រពាំងក្រសាំង ក៏ដូចជានឹករលឹកចំពោះប្រជាពលរដ្ឋដែលមានជីវភាពខ្វះខាត ដែលជាការគិតគូររបស់រាជរដ្ឋាភិបាល ក៏ដូចជាលោករដ្ឋមន្ត្រី»។

បន្ទាប់ពីជួបសំណេះសំណាលរួច ប្រធានក្រុមការងាររាជរដ្ឋាភិបាលចុះមូលដ្ឋានសង្កាត់ត្រពាំងក្រសាំង បាននាំយកអំណោយរបស់សប្បុរសជនចែកជូនគ្រួសារវីរកងទ័ពជួរមុខ និងគ្រួសារមានជីវភាពខ្វះខាតផងដែរ៕

The post ក្រុមការងារចុះមូលដ្ឋានសង្កាត់ត្រពាំងក្រសាំង នាំយកអំណោយជូនគ្រួសារវីរកងទ័ព និងពលរដ្ឋខ្វះខាតជាង ៧០គ្រួសារ appeared first on Kampuchea Thmey Daily.

លោក សាយ សំអាល់ ៖ «ការងារអប់រំជាកិច្ចការងារមួយសំខាន់មិនអាចខ្វះបាន ហើយអនាគតកម្ពុជាត្រូវពឹងលើវិស័យអប់រំនេះ»

អ៊ិន ពិសី — Sun, 19 Oct 2025 03:46:25 +0000

លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត លើកឡើងថា «ការងារអប់រំ ជាកិច្ចការងារមួយសំខាន់ មិនអាចខ្វះបាន ហើយអនាគតកម្ពុជា គឺ ត្រូវពឹងលើវិស័យអប់រំនេះ»។

ការលើកឡើងនេះ ក្នុងពិធីជួបសំណេះសំណាលជាមួយសិស្សជ័យលាភីប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤-២០២៥ ទូទាំងខេត្តកំពត និងផ្ដល់រង្វាន់ជូនសិស្សប្រឡងជាប់និទ្ទេស A ទាំង ៨៩ នាក់ ដែលបានរៀបចំធ្វើនៅបរិវេណពហុកីឡដ្ឋានខេត្តកំពត កាលពីថ្ងៃទី ១៨ ខែតុលា ឆ្នាំ ២០២៥ ម្សិលមិញ។

នាឱកាសនោះ លោកឧបនាយករដ្ឋមន្ត្រី សាយ សំអាល់ បានលើកទឹកចិត្តដល់យុវជន និងសិស្សានុសិស្ស ពិសេសអ្នករៀនមិនសូវពូកែ សូមកុំអាលអស់សង្ឃឹម ត្រូវបន្តប្រឹងប្រែងរៀនសូត្រជាប្រចាំ និងអភិវឌ្ឍន៍សមត្ថភាពជានិច្ច ទាំងជំនាញក្នុងសាលា ចំណេះដឹង បំណិតជីវិតក្នុងសង្គម ដើម្បីចូលរួមកសាងស្រុកទេសឲ្យរីកចម្រើនគង់វង្សតជំនាន់រហូតទៅ។

លោកបណ្ឌិត ប៉ែន ស៊ីម៉ន អ្នកតំណាងរាស្ត្រមណ្ឌលកំពត និងជាប្រធានក្រុមការងារគណបក្សប្រជាជនចុះមូលដ្ឋានខេត្តកំពត លើកឡើងដែរថា នៅក្នុងសម័យកាលណាក៏ដោយ ការសិក្សាអប់រំ បង្កើតធនធានមនុស្ស ជាការងារសំខាន់បំផុតសម្រាប់ប្រទេសជាតិមួយ ព្រោះមានតែចំណេះវិជ្ជាទេ ដែលអាចជួយស្រោចស្រង់កសាងប្រទេសឲ្យគង់វង្សរុងរឿងបាន។

លោក ម៉ៅ ធនិន អភិបាលខេត្តកំពត បញ្ជាក់ថា សម្រាប់លទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ឆ្នាំ ២០២៥ ខេត្តកំពត មានសិស្សប្រឡងជាប់សរុប ចំនួន ៤.៦៩៨ នាក់ ស្រី ២.៧២៥ នាក់ ស្នើ ៩០.៨៥%។ ក្នុងនោះ សិស្សទទួលបាននិទ្ទេស A មានចំនួន ៨៩ នាក់ កើនឡើងជាងឆ្នាំមុន ១១ នាក់ (និទ្ទេស A ទទួលបានម៉ូតូ ១ គ្រឿង ថវិកា ៤០ ម៉ឺនរៀល និងឱកាសទទួលបានកញ្ចប់អាហារូបករណ៍នៅថ្នាក់ឧត្ដមសិក្សា)៕

អត្ថបទ ៖ សឹង រ៉ាត់

The post លោក សាយ សំអាល់ ៖ «ការងារអប់រំជាកិច្ចការងារមួយសំខាន់មិនអាចខ្វះបាន ហើយអនាគតកម្ពុជាត្រូវពឹងលើវិស័យអប់រំនេះ» appeared first on Kampuchea Thmey Daily.

កម្ពុជា ឈរលេខរៀងទី ១ ក្នុងពិភពលោកដែលបញ្ជូននិស្សិតវេជ្ជបណ្ឌិតឯកទេសច្រើនជាងគេ ទៅបន្តកម្មសិក្សានៅបារាំង

អ៊ិន ពិសី — Thu, 16 Oct 2025 08:57:00 +0000

លោកស្រី Marie Buscail ទីប្រឹក្សាទី ១ នៃស្ថានទូតបារាំង ប្រចាំព្រះរាជាណាចក្រកម្ពុជា បានមានប្រសាសន៍ថា ប្រទេសកម្ពុជា គឺជាប្រទេសឈរលេខរៀងទី ១ ក្នុងពិភពលោក ដែលបញ្ជូននិស្សិតវេជ្ជបណ្ឌិតឯកទេសច្រើនជាងគេទៅបន្តកម្មសិក្សានៅប្រទេសបារាំង។

លោកស្រីបានលើកឡើងបែបនេះកាលពីព្រឹកថ្ងៃទី ១៦ ខែតុលា ឆ្នាំ ២០២៥ ក្នុងពិធីសំណេះសំណាលជាមួយនិស្សិតវេជ្ជបណ្ឌិតឯកទេសដែលត្រូវបន្តការសិក្សានៅសាធារណរដ្ឋបារាំង ឆ្នាំសិក្សា ២០២៥-២០២៦ ក្រោមអធិបតីភាពលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល។

បើតាមលោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល (ស.វ.ស) បានឱ្យដឹងថា ចាប់ពីឆ្នាំ ១៩៩៦ មក តាមរយៈកិច្ចសហប្រតិបត្តិការជាយូរលង់ ជាមួយដៃគូបារាំង ដោយមានការគាំទ្រពីស្ថានទូតបារាំង ប្រចាំព្រះរាជាណាចក្រកម្ពុជា ស.វ.ស បានបញ្ជូននិស្សិតចុះកម្មសិក្សាតាមមន្ទីរពេទ្យនៅប្រទេសបារាំង ចំនួនពី ៣០ ទៅ ១២៤ នាក់ ក្នុងមួយឆ្នាំៗ ពោលបើគិតចាប់ពីឆ្នាំ ១៩៩៦ មកដល់ឆ្នាំ ២០២៤ សាកលវិទ្យាល័យបានបញ្ជូននិស្សិតចំនួន ១ ១៦១ នាក់ ទៅបន្តការសិក្សា ឬធ្វើកម្មសិក្សានៅប្រទេសបារាំង។ ដោយឡែកសម្រាប់ឆ្នាំ ២០២៥ នេះ មាននិស្សិតថ្នាក់វេជ្ជបណ្ឌិតឯកទេសសរុបចំនួន ៨៤ នាក់ បានទទួលអាហារូបករណ៍ទៅបន្តការសិក្សានៅប្រទេសបារាំង។

លោកសាស្ត្រាចារ្យ បានបន្តថា បច្ចុប្បន្ននេះ សាកលវិទ្យាល័យ មានដៃគូជាតិ និងអន្តរជាតិ ចំនួន ៩០ ស្ថាប័ន និងបានចូលរួមជាបណ្ដាញសាកលវិទ្យាល័យជាតិ និងអន្តរជាតិ ចំនួន ១៤ បណ្ដាញ។ ជាមួយនឹងសក្តានុពល នៃកិច្ចសហប្រតិបត្តិការដ៏ខ្លាំងក្លានេះ សាកលវិទ្យាល័យ មានឱកាសរៀបចំកម្មវិធីអន្តរជាតិ ចំនួន ៣ កម្មវិធីសិក្សាដែលទទួលបានសញ្ញាបត្រពីរ ចំនួន ៣ ក៏ដូចជាសកម្មភាពផ្លាស់ប្តូរសាស្ត្រាចារ្យ មន្ត្រី បុគ្គលិក និស្សិត គម្រោងអភិវឌ្ឍន៍-ស្រាវជ្រាវ ផ្សេងៗ ទៀត ក្នុងទិសដៅជំរុញទៅរកឧត្ដមភាព នៃការបណ្តុះបណ្តាល ការស្រាវជ្រាវ និងការផ្តល់សេវា។

លោកសាស្ត្រាចារ្យ បានបន្តទៀតថា នៅឆ្នាំ ២០២៥ នេះ សាកលវិទ្យាល័យ បានទទួលចំណាត់ថ្នាក់លេខ ១៤៩ ក្នុងចំណោមសាកលវិទ្យាល័យនវានុវត្តន៍កម្រិតពិភពលោក ចំនួន ៤០០ ដែលចូលរួម ប្រកួតប្រជែងក្នុងប្រព័ន្ធ World University Ranking for Innovation (WURI)។ សាកលវិទ្យាល័យ ក៏បានទទួលនូវការទទួលស្គាល់គុណភាពបណ្ដុះបណ្ដាលពីគណៈកម្មាធិការទទួលស្គាល់គុណភាពអប់រំនៅកម្ពុជាពីឆ្នាំ ២០២៤-២០២៨ ដែលនេះជាការទទួលស្គាល់លើកទី ២ បន្ទាប់ពីការទទួលស្គាល់លើកទី ១ ពីឆ្នាំ ២០១៨-២០២៣។ បន្ថែមនេះ សាកលវិទ្យាល័យ ក៏បានទទួលស្គាល់ជា Associate Membership នៃ AUN-QA ដែលការទទួលស្គាល់នេះ ផ្តល់លទ្ធភាពឱ្យ ស.វ.ស អាចដាក់បេក្ខភាពទទួលការវាយតម្លៃកម្មវិធីសិក្សាថ្នាក់តំបន់ផងដែរ។

មានប្រសាសន៍សំណេះសំណាលក្នុងឱកាសនោះដែរ លោកសាស្ត្រាចារ្យ ឈាង រ៉ា បានវាយតម្លៃខ្ពស់ និងកោតសរសើរសាកលវិទ្យាល័យវិទ្យាសាស្ត្រសុខាភិបាល ដែលបានខិតខំពង្រឹងគុណភាពបណ្តុះបណ្តាលនិស្សិត។ លោកសាស្ត្រាចារ្យ បានថ្លែងនូវអំណរគុណដ៏ជ្រាលជ្រៅចំពោះរដ្ឋាភិបាលបារាំង ដែលបាននិងកំពុងបន្តគាំទ្រដល់ការអភិវឌ្ឍវិស័យសុខាភិបាល ជាពិសេសការបណ្តុះបណ្តាលនៅសាកលវិទ្យាល័យវិទ្យាសាស្ត្រសុខាភិបាល។ លោកសាស្ត្រាចារ្យ ឈាង រ៉ា បានកោតសរសើរចំពោះនិស្សិតជ័យលាភីអាហារូបករណ៍ទាំងអស់ ដែលបានខិតខំប្រឹងប្រែងសិក្សាស្រាវជ្រាវតាមឯកទេសរៀងៗ ខ្លួន។

ជាមួយគ្នានេះដែរ លោកសាស្ត្រាចារ្យ បានផ្តល់អនុសាសន៍រំឭកជូននិស្សិតជ័យលាភីទាំងអស់ ត្រូវថែរក្សាសុខភាព , ខិតខំរក្សាអត្តសញ្ញាណ និងលើកកម្ពស់កិត្យានុភាពប្រទេសជាតិ , បង្កើតបណ្ដាញមិត្តភាពអន្តរជាតិ និងសហការវិទ្យាសាស្ត្រជាមួយសាស្ត្រាចារ្យបារាំង , និស្សិតបរទេស , និងសិក្សាស្រូបចំណេះដឹងថ្មីៗ ទៅតាមជំនាញរៀងៗ ខ្លួន ឱ្យអស់ពីលទ្ធភាព សំដៅខិតខំឱ្យស្មើនឹងកម្ពស់កាលានុវត្តភាពដែលបានទទួល។

គួរបញ្ជាក់ថា បច្ចុប្បន្ន សាកលវិទ្យាល័យវិទ្យាសាស្ត្រសុខាភិបាល បានដំណើរការថ្នាក់បណ្តុះបណ្តាលវេជ្ជបណ្ឌិតឯកទេសសរុបចំនួន ២១ និងនៅឆ្នាំសិក្សា ២០២៤-២០២៥ នេះ មាននិស្សិតកំពុងសិក្សាវេជ្ជបណ្ឌិតឯកទេសសរុបទាំង ២១ ឯកទេស មានចំនួន ៩៥០ នាក់៕

អត្ថបទ ៖ សំអឿន

The post កម្ពុជា ឈរលេខរៀងទី ១ ក្នុងពិភពលោកដែលបញ្ជូននិស្សិតវេជ្ជបណ្ឌិតឯកទេសច្រើនជាងគេ ទៅបន្តកម្មសិក្សានៅបារាំង appeared first on Kampuchea Thmey Daily.

និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី

អ៊ិន ពិសី — Thu, 17 Jul 2025 08:32:31 +0000

និស្សិតសាកលវិទ្យាល័យវិទ្យាសាស្ត្រសុខាភិបាលចំនួន ៥៨៤ នាក់ បន្ថែមទៀត បានចូលរួមជាសមាជិកក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ដែលធ្វើឱ្យចំនួនសមាជិកក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យ កើនឡើងដល់ជាង ៣ ៤០០ នាក់។

ថ្លែងក្នុងពិធីសំណេះសំណាលជាមួយសមាជិកថ្មីរបស់ក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល កាលពីព្រឹកថ្ងៃទី ១៧ កក្កដា នេះ ក្រោមអធិបតីភាពដ៏ខ្ពង់ខ្ពស់ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ប្រធានសហភាពសហព័ន្ធយុវជនកម្ពុជា និងជាប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី , លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល សកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល និងជាអនុប្រធានប្រតិបត្តិទទួលបន្ទុកជាប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល បានគោរពថ្លែងអំណរគុណយ៉ាងជ្រាលជ្រៅចំពោះ ឯកឧត្ដមប្រធាន ហ៊ុន ម៉ានី ដែលបានផ្តល់កិត្តិយស និងឱកាសដល់និស្សិតសាកលវិទ្យាល័យវិទ្យាសាស្ត្រសុខាភិបាល បានទទួលការរៀនសូត្របន្ថែម អនុវត្តផ្ទាល់នៅមូលដ្ឋាន និងឱកាសចូលរួមលើកកម្ពស់សុខភាព និងសុខុមាលភាពរបស់ប្រជាពលរដ្ឋ ដែលជាអាទិភាពមួយដ៏សំខាន់របស់រាជរដ្ឋាភិបាល នៃព្រះរាជាណាចក្រកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជាប្រមុខដឹកនាំដ៏ខ្ពង់ខ្ពស់។

លោកសាស្ត្រាចារ្យ បានបន្តទៀតថា «ការចូលរួមសកម្មភាពមនុស្សធម៌ និងសង្គមទាំងនេះ បានបង្ហាញច្បាស់អំពីការយកចិត្តទុកដាក់របស់ ឯកឧត្ដមប្រធាន និងក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ទាំងអស់ ដែលតែងតែខ្វល់ខ្វាយគិតគូរ និងរួមសុខ រួមទុក្ខ ជាមួយប្រជាពលរដ្ឋដែលជួបការលំបាកក្នុងគ្រប់កាលៈទេសៈ។ ប្រជាពលរដ្ឋ បានយល់អំពីអំពើល្អរបស់ ឯកឧត្ដមប្រធាន ហ៊ុន ម៉ានី ក៏ដូចជា សម្តេចតេជោ សម្តេចមហាបវរធិបតី និងក្រុមគ្រួសារ ថ្នាក់ដឹកនាំក្នុងជួររាជរដ្ឋាភិបាលកម្ពុជា ហើយមានទឹកចិត្តកាន់តែស្រលាញ់ គាំទ្រ សម្តេចមហាបវរធិបតី ហ៊ុន ម៉ាណែត បន្តជាប្រមុខដឹកនាំនាវាកម្ពុជាទៅមុខទៀត ដើម្បីធ្វើឱ្យប្រទេសជាតិយើង ឱ្យកាន់តែមានការរីកចម្រើន ក្រោមម្លប់សន្តិភាពដ៏ត្រជាក់ត្រជំ»។

លោកសាស្ត្រាចារ្យ បានបន្ថែមថា អំពើល្អទាំងនេះ ក៏ជាគំរូដ៏ឧត្តុង្គឧត្ដមសម្រាប់និស្សិតសាកលវិទ្យាល័យវិទ្យាសាស្ត្រសុខាភិបាល អនុវត្តតាម ដើម្បីអភិវឌ្ឍន៍ខ្លួនឱ្យក្លាយជាអ្នកវិជ្ជាជីវៈសុខាភិបាលដែលមាន គុណធម៌ សីលធម៌វិជ្ជាជីវៈខ្ពស់ និងតែងតែប្រកាន់ខ្ជាប់នូវស្មារតី ស្រឡាញ់ជាតិ ប្រព្រឹត្តតែអំពើល្អ សុចរិត ត្រឹមត្រូវ និង មិនទុកឱ្យប្រជាពលរដ្ឋណាម្នាក់ មិនទទួលបានសេវាសុខាភិបាលប្រកបដោយគុណភាពឡើយ។

អញ្ជើញមានមតិក្នុងឱកាសនោះ ឯកឧត្ដមឧបនាយករដ្ឋមន្ត្រី បានរំលេចពីសារៈសំខាន់ នៃការងារស្ម័គ្រចិត្តដែលត្រូវការទឹកចិត្តចេញពីបេះដូង ស ពីការវាស់វែងភាពអត់ធ្មត់ និងការជួបប្រទះនូវការប្រតិបត្តិដោយផ្ទាល់រវាងការរៀននៅក្នុងថ្នាក់ និងការអនុវត្តជាក់ស្តែង ដើម្បីទទួលការហ្វឹកហាត់ជាក់ស្ដែង និងទទួលបទពិសោធនាំមកនូវអនុស្សាវរីយ៍យូរអង្វែង។

គួរបញ្ជាក់ថា គិតពីឆ្នាំ ២០២៣ មកដល់បច្ចុប្បន្ននេះ ក្រុមការងារគ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី ប្រចាំសាកលវិទ្យាល័យវិទ្យាសាស្ត្រសុខាភិបាល បានចូលរួមចំណែកផ្តល់សេវាអប់រំ ថែទាំ ព្យាបាលសុខភាពជូនប្រជាពលរដ្ឋដោយឥតគិតថ្លៃ បានចំនួន ២០ លើក សរុបប្រជាពលរដ្ឋមកទទួលសេវា ចំនួន ១៥៦ ៩១៥ នាក់។ ក្រៅពីសកម្មភាពចុះអប់រំ ថែទាំ ព្យាបាល សុខភាពនេះ មន្ត្រី បុគ្គលិក និស្សិតសាកលវិទ្យាល័យវិទ្យាសាស្ត្រសុខាភិបាល បានចូលរួមយ៉ាងសកម្មជាមួយការងារសង្គមផ្សេងៗ ដែលរួមមាន ការចូលរួមសកម្មភាពក្នុងនាមជាសមាជិកសហភាពសហព័ន្ធយុវជនកម្ពុជា សកម្មភាពកាកបាទក្រហមកម្ពុជា សកម្មភាពសប្បុរសធម៌ជួយនិស្សិតខ្វះខាតលទ្ធភាពបន្តការសិក្សា ការងារបរិច្ចាគឈាម ការងារបរិស្ថាន កីឡា និងសិល្បៈ និងជាពិសេសការចូលរួមជាមួយរាជរដ្ឋាភិបាល គាំទ្រលើកទឹកចិត្តកងទ័ពកំពុងប្រចាំការ ការពារប្រទេស នៅសមរភូមិមុខ៕

អត្ថបទ ៖ សំអឿន

The post និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី appeared first on Kampuchea Thmey Daily.

អភិបាលខេត្តបាត់ដំបង៖ ប្រជាពលរដ្ឋ និងកម្លាំងទាំងអស់ គាំទ្រជានិច្ចរាល់ការសម្រេចរបស់រាជរដ្ឋាភិបាល

Ken Malis — Mon, 23 Jun 2025 08:05:58 +0000

លោក សុខ លូ អភិបាលខេត្តបាត់ដំបង បានមានប្រសាសន៍ថា ប្រជាពលរដ្ឋ និងកម្លាំងទាំងអស់ គឺបានបង្ហាញការគាំទ្រជានិច្ចរាល់ការសម្រេចរបស់រាជរដ្ឋាភិបាល។

លោកបានថ្លែងបែបនេះ នាឱកាសអញ្ជើញចូលរួមជាគណៈធិបតីក្នុងកិច្ចប្រជុំផ្សព្វផ្សាយសភាពការណ៍ និងគោលការណ៍របស់រាជរដ្ឋាភិបាលពាក់ព័ន្ធកិច្ចការព្រំដែន ត្រួតពិនិត្យកម្លាំង និងយុទ្ធោបករណ៍ និងសំណេះសំណាលសួរសុខទុក្ខកងកម្លាំង នៅស្នងការដ្ឋាននគរបាលខេត្តបាត់ដំបង នាព្រឹកថ្ងៃទី២៣ ខែមិថុនា ឆ្នាំ២០២៥។ ពិធីនេះ មានការអញ្ជើញចូលរួមជាគណៈធិបតី ពីលោកកែវ វណ្ណថន រដ្ឋលេខាធិការក្រសួងមហាផ្ទៃ ផងដែរ។

ក្នុងឱកាសនោះ លោកអភិបាលខេត្ត បានបញ្ជាក់ថា រាជរដ្ឋាភិបាលតែងតែគិតគូរជាប់ជាប្រចាំក្នុងការដោះស្រាយបញ្ហានានាជូនប្រជាពលរដ្ឋ។ ជាមួយគ្នានេះ លោកបានណែនាំដល់កងកម្លាំងទាំងអស់ត្រូវត្រៀមលក្ខណៈគ្រប់ពេលវេលា និងរង់ចាំទទួលបទបញ្ជាពីថ្នាក់ដឹកនាំ។

ឆ្លៀតក្នុងឱកាសនោះ លោក កែវ វណ្ណថន បានមានប្រសាសន៍ លើកទឹកចិត្តដល់កងកម្លាំងទាំងដែលកំពុងឈរជើងនៅតាមខ្សែបន្ទាត់ព្រំដែន និងត្រូវចូលរួមក្នុងការប្រយុទ្ធប្រឆាំងព័ត៌មានក្លែងក្លាយផ្សេងៗទាក់ទងនឹងបញ្ហាព្រំដែន។ លើសពីនេះ លោកបានថ្លែងនូវការកោតសរសើរចំពោះភាពអង់អាចក្លាហានរបស់កងកម្លាំងជួរមុខដែលកំពុងឈរជើងនៅតាមខ្សែបន្ទាត់ព្រំដែនកម្ពុជា-ថៃ ក្នុងកិច្ចការពារបូរណភាពទឹកដី។

បន្ទាប់ពីការសំណេះសំណាល និងពាំនាំនូវប្រសាសន៍ណែនាំផ្តាំផ្ញើ របស់លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ រួចមក លោករដ្ឋលេខាធិការ និងប្រតិភូ អញ្ជើញត្រួតពិនិត្យ កងកម្លាំង មធ្យោបាយ សម្ភារៈ យុទ្ធោបករណ៍ ដែលកំពុងត្រៀមបម្រុងសម្រាប់ប្រើប្រាស់ក្នុងកិច្ចការពាររក្សាសន្តិសុខ សណ្តាប់ធ្នាប់សង្គម និងកិច្ចការពារនូវបូរណ ភាពទឹកដី ក្នុងភូមិសាស្រ្តទទួលខុសត្រូវ ។

ជាមួយគ្នានេះ គណៈអធិបតី បានប្រគល់ជូននូវគ្រឿងឧបភោគ បរិភោគ ទឹកបរិសុទ្ធ ជាអំណោយដ៏ថ្លៃថ្លារបស់លោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ដល់ស្នងការ ដ្ឋាននគរបាលខេត្តបាត់ដំបង ដើម្បីបានបែង ចែកនិងប្រើប្រាស់ក្នុងអង្គភាព៕

The post អភិបាលខេត្តបាត់ដំបង៖ ប្រជាពលរដ្ឋ និងកម្លាំងទាំងអស់ គាំទ្រជានិច្ចរាល់ការសម្រេចរបស់រាជរដ្ឋាភិបាល appeared first on Kampuchea Thmey Daily.

យុវជនបក្សប្រជាជនប្រចាំទ្វីបអាស៊ី រៀបចំអាហារសាមគ្គី ដើម្បីពង្រឹងភាពស្និទ្ធស្នាល និងភាពស្អិតល្មួត

Kang Tola — Sat, 22 Mar 2025 13:59:13 +0000

ភ្នំពេញ ៖ ក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជានៅទ្វីបអាស៊ីខាងកើត និងអាគ្នេយ៍ បានរៀបចំពិធីសំណេះសំណាល និងពិសាអាហារសាមគ្គីជូនសមាជិកសមាជិកាក្រោមអធិបតីភាព លោក ហេង សួរ សមាជិកគណៈកម្មាធិការកណ្តាល សមាជិកគណៈអចិន្ត្រៃយ៍យុវជនគណបក្សថ្នាក់កណ្តាល និងជាប្រធានក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជានៅទ្វីបអាស៊ីខាងកើត និងអាគ្នេយ៍។

កម្មវិធីនេះ បានរៀបចំឡើងនៅល្ងាចថ្ងៃសៅរ៍ ៩រោច ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២២ ខែមីនា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ។

កម្មវិធីសំណេះសំណាល និងពិសាអាហារសាមគ្គីនេះ ធ្វើឡើងក្នុងគោលបំណងពង្រឹងភាពស្និទ្ធស្នាល និងភាពស្អិតល្មួតរបស់ក្រុមការងារឱ្យកាន់តែខ្លាំងក្លាបន្ថែមទៀតនៅតាមប្រទេសគោលដៅដើម្បីធានាបាននូវភាពរឹងមាំ និងការពង្រឹងកិត្យានុភាពរបស់គណបក្សប្រជាជនកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស និងសម្តេចមហាបវរធិបតី ហ៊ុន ម៉ាណែត អនុប្រធានគណបក្ស និងជានាយករដ្ឋមន្ត្រីនៃព្រះរាជាណាចក្រកម្ពុជា៕

The post យុវជនបក្សប្រជាជនប្រចាំទ្វីបអាស៊ី រៀបចំអាហារសាមគ្គី ដើម្បីពង្រឹងភាពស្និទ្ធស្នាល និងភាពស្អិតល្មួត appeared first on Kampuchea Thmey Daily.

លោក ហង់ជួន ណារ៉ុន ជួបសំណេះសំណាលជាមួយ បុគ្គលិក អប់រំ នៃមន្ទីរអប់រំយុវជនកីឡាខេត្តបន្ទាយមានជ័យ

Kang Tola — Tue, 16 Jul 2024 11:56:15 +0000

នៅល្ងាចថ្ងៃទី ១៦ ខែកក្កដា ឆ្នាំ២០២៤នេះ ក្នុងសាលប្រជុំមន្ទីរអប់រំយុវជនកីឡាខេត្តបន្ទាយមានជ័យ បានបើកកិច្ចប្រជុំនិងធ្វើការសំណេះសំណាល ជាមួយ បុគ្គលិកអប់រំ នៃមន្ទីរអប់រំ យុវជនកីឡាខេត្តបន្ទាយមានជ័យ។

ពិធីនេះមានការចូលរួម លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា រដ្ឋមន្ត្រីអមដំណើរ លោកអ៊ុំ រាត្រីអភិបាលខេត្តបន្ទាយមានជ័យ លោកឈួ ប៊ុនរឿង ប្រធានមន្ទីរអប់រំយុវជននិងកីឡាខេត្តបន្ទាយមានជ័យ លោកគ្រូ អ្នកគ្រូ ប្រហែល ៣០០នាក់បានចូលរួម។

ក្នុងពិធីសំណេះសំណាលនោះ លោកឈួ ប៊ុនរឿង បានមានប្រសាសន៍ថា លោកសូមថ្លែងអំណរគុណដល់ លោក ហង់ជួន ណារ៉ុន បានចុះមកពិនិត្យវឌ្ឍនភាពលើវិស័យអប់រំ នៅថ្នាក់ខេត្ត ក្រុង ស្រុក និងសាលារៀនដោយផ្ទាល់ រួមជាមួយការសួរសុខទុក្ខ ការផ្តល់ភាពកក់ក្តៅ និងការលើកទឹកចិត្តដល់បុគ្គលិកអប់រំនៅថ្នាក់ក្រោមជាតិ នៅគ្រប់កាលៈទេសៈ។

លោកឈូ ប៊ុនរឿង បានមានប្រសាសន៍បញ្ជាក់ឱ្យដឹងបន្តទៀតថា តាមរបាយការណ៍សង្ខេប អំពីសមិទ្ធផលសម្រេចបានក្នុងវិស័យអប់រំក្នុងបច្ចុប្បន្នមាន។

១.គ្រឹះស្ថានសិក្សាសាធារណៈទូទៅក្នុងខេត្តមានចំនួន ៨២១កន្លែង ២.គ្រឹះស្ថានសិក្សាឯកជនចំណេះទូទៅ មានចំនួន ១៥៨កន្លែង ៣.មានវិទ្យាល័យចំណេះទូទៅនិងបច្ចេកទេសមានចំនួន២កន្លែង ៤.គ្រឹះស្ថានឧត្តមសិក្សាទូទាំងខេត្តមានចំនួន៤កន្លែង និង វិទ្យាស្ថានពហុបច្ចេកទេសខេត្ត។

លោកបានបញ្ជាក់ឱ្យដឹងបន្តទៀតថា គិតមកត្រឹមខែកក្កដា ឆ្នាំ ២០២៤នេះ សម្តេចតេជោហ៊ុន សែនបានផ្តល់អគារសិក្សាចំនួន ២០២ខ្នង ស្មើនិង ១៦៤០បន្ទប់ ក្នុងនោះមានម៉ាស៊ីនកាត់ដេរចំនួន ៣៧០គ្រឿងម៉ាស៊ីនថតចម្លងមានចំនួន ១១គ្រឿង ម៉ាស៊ីនព្រីនធ័រ ចំនួន២០គ្រឿង។

ក្នុងនោះ នាយឧត្តមសេនីយ៍ កែ គឹមយ៉ាន អ្នកតំណាងរាស្ត្រខេត្តបន្ទាយមានជ័យ បានផ្តល់អគារសិក្សា បណ្ណាល័យ ទីចាត់ការ និងផ្ទះគ្រូសរុបចំនួន ៨៤ខ្នង ស្មើនឹង៤១៥បន្ទប់។ លោកបានបញ្ជាក់ឱ្យដឹងបន្តទៀតថា ឆ្នាំ២០២៣ នេះ បេក្ខជនប្រឡង ទាំងអស់ គោរពតាមគោលការណ៍ប្រឡងបាក់ឌុបបានល្អ មានវិន័យតឹងរ៉ឹងខ្លាំង ការប្រឡងនេះ មានស្តង់ដារ គុណភាពខ្ពស់ បេក្ខជន បេក្ខនារី គោរពម៉ោង រួមទាំង វិន័យប្រឡង មិនយកសំណៅឯកសារ ចម្លើយ ក៏ដូចឧបករណ៍ អេឡិចត្រូនិចចូលក្នុងថ្នាក់ប្រឡង ពោលគឺគោរពតាមបទបញ្ជាបទបញ្ញត្តិ ដែលក្រសួងបានដាក់ចេញ បានគ្រប់ជ្រុងជ្រោយទាំងអស់ អ្នកចេះ គឺជាប់ បេក្ខជននិងបេក្ខនារី មិនបានផ្ទុយនិងបទបញ្ញត្តិនិងកម្រិតវិន័យរបស់ក្រសួងអប់រំឡើយ។

ក្នុងឱកាសនោះ លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បាន កោតសរសើរដល់លោកគ្រូ អ្នកគ្រូទាំងបានយកចិត្តទុក ដាក់ក្នុងការបង្រៀនសិស្ស ហើយបានជំរុញឲ្យសិស្សមានការប្រកួតប្រជែងផងដែរ ដើម្បីសម្រេចឲ្យបានចំគោលដៅនៃការផ្សារភ្ជាប់ទៅកាន់ការអប់រំថ្នាក់ឧត្តមសិក្សា និងការកសាងវិជ្ជាជីវៈផ្ទាល់ខ្លួន។

ការផ្ដួចផ្ដើមឱ្យមានការប្រកួតប្រជែងថ្នាក់ជាតិ ថ្នាក់ក្រោមជាតិនេះទាក់ទងនឹងវិទ្យាសាស្ត្រ បច្ចេកវិទ្យា វិស្វកម្ម គណិតវិទ្យា ដោយមានការបញ្ចូលបន្ថែមជាមួយសិល្បៈមនុស្សសាស្ត្រ នៅថ្ងៃអនាគតផងដែរ៕

ដោយ ៖ វ៉ាន់ ណាង

The post លោក ហង់ជួន ណារ៉ុន ជួបសំណេះសំណាលជាមួយ បុគ្គលិក អប់រំ នៃមន្ទីរអប់រំយុវជនកីឡាខេត្តបន្ទាយមានជ័យ appeared first on Kampuchea Thmey Daily.

ជម្រើសជាតិបាល់ទះអង្គុយកម្ពុជា ទទួលបានការលើកទឹកចិត្តពីប្រធានសហព័ន្ធ មុនចេញទៅអាស៊ានប៉ារ៉ាហ្គេម នៅឥណ្ឌូណេស៊ី

Sorn Phanith — Mon, 25 Jul 2022 06:54:31 +0000

នៅព្រឹកថ្ងៃចន្ទទី ២៥ ខែកក្កដា ឆ្នាំ ២០២២ នេះនៅមជ្ឈមណ្ឌលជាតិហ្វឹកហ្វឺន និងកីឡា ក្នុងរាជធានីភ្នំពេញ ឯកឧត្តម ស សុខា រដ្ឋលេខាធិការក្រសួងអប់រំ យុវជន និងកីឡា និងជាអនុប្រធានសហព័ន្ធកីឡាបាល់ទះកម្ពុជា បានជួបសំណេះសំណាលជាមួយថ្នាក់ដឹកនាំ ប្រតិភូ គ្រូបង្វឹក កីឡាករ-កីឡាការិនីបាល់ទះអង្គុយ ចំនួន ២៦ រូប មុនពេលធ្វើដំណើរទៅប្រកួតក្នុងព្រឹត្តិការណ៍កីឡាអាស៊ានប៉ារ៉ាហ្គេម លើកទី ១១ ឆ្នាំ ២០២២ នៅទីក្រុង Solo ប្រទេសឥណ្ឌូណេស៊ី។

ឯកឧត្តម ស សុខា ចូលរួមក្នុងនាមតំណាងឯកឧត្តមនាយឧត្តមសេនីយ៍សន្តិបណ្ឌិត នេត សាវឿន ប្រធានសហព័ន្ធកីឡាបាល់ទះកម្ពុជា។ ក្នុងឱកាសនោះផងដែរឯកឧត្តមនាយឧត្តមសេនីយ៍សន្តិបណ្ឌិត នេត សាវឿន បានផ្ញើថវិការជូនគ្រូបង្វឹក និងកីឡាករកីឡាការិនីសរុបទាំងអស់ ២៦ នាក់ ក្នុងនោះម្នាក់ ២០០ ដុល្លារអាមេរិក។ ស្របពេលដែលឯកឧត្តម ស សុខា និងលោកជំទាវ បានឧបត្ថម្ភបន្ថែម ៥០០ ដុល្លារ ជូនដល់ឯកឧត្តម យី វាសនា សម្រាប់ចំណាយនានា ក្នុងពេលចេញទៅប្រកួតនៅឥណ្ឌូណេស៊ី នេះដែរ។

ឯកឧត្តមអនុប្រធានសហព័ន្ធបានសង្កត់ធ្ងន់ថា៖ «យើងធ្វើដំណើរលើកនេះ គឺចេញទៅប្រកួតដណ្តើមមេដាយជាមួយគេផង និងសិក្សាពីគេផង ដោយមើលលើបច្ចេកទេសប្រកួតរបស់ក្រុមគេ និងមើលលើការរៀបចំរបស់ម្ចាស់ផ្ទះ ដើម្បីយកមកបំពេញចំណុចខ្វះខាត ធ្វើយ៉ាងណាឱ្យយើងរៀបចំកីឡាស៊ីហ្គេមឆ្នាំ ២០២៣ ដំណើរការបានរលូន និងឈ្នះមេដាយ។ ជាពិសេស គឺផ្តោតលើធនធានមនុស្សផ្នែកកីឡាករ-កីឡាការិនី ពង្រឹងអាជ្ញាកណ្ដាល និងសម្ភារៈបច្ចេកទេសប្រកួត ជាដើម»។

ឯកឧត្តមបានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងបង្វឹករបស់លោកគ្រូអ្នកគ្រូ និងការខិតខំហ្វឹកហាត់របស់បងប្អូនអត្តពលិករបស់យើងបានល្អប្រសើរនាពេលកន្លងមក ទោះជាស្ថានភាពនៃជំងឺកូវីដ-១៩ ទើបមានការមិនច្បាស់លាស់នៃការទទួលធ្វើជាម្ចាស់ផ្ទះក្នុងព្រឹត្តិការណ៍ប្រកួតកីឡាតំបន់អាស៊ាន យើងនេះ ប៉ុន្តែកីឡាករកីឡាការិនីមិនផ្អាកនៃការហ្វឹកហាត់ក្នុងការត្រៀមខ្លួនប្រកួតនោះទេ។

ក្រៅពីនោះឯកឧត្តមបានក្រើនរំលឹកដល់ប្រតិភូ គ្រូបង្វឹកនិងកីឡាករកីឡាការិនី សូមខិតខំរក្សាការពារសុខភាពទាំងពេលធ្វើដំណើរនិងហ្វឹកហាត់ ដើម្បីជៀសផុតពីជំងឺនានា ជាពិសេសជំងឺកូវីដ-១៩ នាំឱ្យប៉ះពាល់ដល់ការប្រកួតប្រជែងយកមេដាយ។ យ៉ាងណាក្តីមុនចេញទៅប្រកួតគ្រប់គ្នាសុទ្ធតែបានចាក់វ៉ាក់សាំងគ្រប់ដូសតាមការរៀបចំដោយរាជរដ្ឋាភិបាលកម្ពុជា រួចរាល់ផងដែរ។

សូមបញ្ជាក់ថា ព្រឹត្តិការណ៍អាស៊ានប៉ារ៉ាហ្គេម លើកទី ១១ នៅប្រទេសឥណ្ឌូណេស៊ី នេះកម្ពុជានឹងបញ្ជូន ១១ ប្រភេទកីឡា ទៅដណ្តើមមេដាយ រួមមានកីឡាអត្តពលកម្ម, ហែលទឹក, បាល់ទះអង្គុយបុរស និងនារី, បាល់បោះរទេះបុរស និងនារី, បាល់បោះជនពិការភ្នែក, បាល់ទាត់ ៧ ម្ខាង (ចលករខួរក្បាល), វាយកូនឃ្លីលើតុ, វាយសី, លើកទម្ងន់, អុក និងប៊ូស្យា៕

អត្ថបទ៖ មន្នីរ័ត្ន

The post ជម្រើសជាតិបាល់ទះអង្គុយកម្ពុជា ទទួលបានការលើកទឹកចិត្តពីប្រធានសហព័ន្ធ មុនចេញទៅអាស៊ានប៉ារ៉ាហ្គេម នៅឥណ្ឌូណេស៊ី appeared first on Kampuchea Thmey Daily.

ពិធីជួបសំណេះសំណាល Archives - Kampuchea Thmey Daily

កម្ពុជា ឈរលេខរៀងទី ១ ក្នុងពិភពលោកដែលបញ្ជូននិស្សិតវេជ្ជបណ្ឌិតឯកទេស​ច្រើនជាងគេ ទៅបន្តកម្មសិក្សានៅបារាំង

និស្សិតពេទ្យជិត ៦០០ នាក់ បន្ថែមទៀត បានចូលរួមជាសមាជិកក្រុមការងារ គ្រូពេទ្យស្ម័គ្រចិត្ត ឯកឧត្ដម ហ៊ុន ម៉ានី

អភិបាលខេត្តបាត់ដំបង៖ ប្រជាពលរដ្ឋ និងកម្លាំងទាំងអស់ គាំទ្រជានិច្ចរាល់ការសម្រេចរបស់រាជរដ្ឋាភិបាល

លោក ហង់​ជួន ណា​រ៉ុ​ន ជួប​សំណេះ​សំ​ណាល​ជាមួយ បុគ្គ​លិក អប់រំ នៃ​មន្ទីរអប់រំ​យុវជន​កីឡា​ខេត្តបន្ទាយមានជ័យ

កម្ពុជា ឈរលេខរៀងទី ១ ក្នុងពិភពលោកដែលបញ្ជូននិស្សិតវេជ្ជបណ្ឌិតឯកទេសច្រើនជាងគេ ទៅបន្តកម្មសិក្សានៅបារាំង

លោក ហង់ជួន ណារ៉ុន ជួបសំណេះសំណាលជាមួយ បុគ្គលិក អប់រំ នៃមន្ទីរអប់រំយុវជនកីឡាខេត្តបន្ទាយមានជ័យ