ព័ត៌មានជាតិ

លោក សាយ សំអាល់ ៖ «ការងារអប់រំជាកិច្ចការងារមួយសំខាន់មិនអាចខ្វះបាន ហើយអនាគតកម្ពុជាត្រូវពឹងលើវិស័យអប់រំនេះ»

បានផុស

៩ ខែ មុន

នៅ

ថ្ងៃអាទិត្យ ១៩ តុលា ២០២៥

ដោយ

លោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពត លើកឡើងថា «ការងារអប់រំ ជាកិច្ចការងារមួយសំខាន់ មិនអាចខ្វះបាន ហើយអនាគតកម្ពុជា គឺ ត្រូវពឹងលើវិស័យអប់រំនេះ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ ក្នុងពិធីជួបសំណេះសំណាលជាមួយសិស្សជ័យលាភីប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤-២០២៥ ទូទាំងខេត្តកំពត និងផ្ដល់រង្វាន់ជូនសិស្សប្រឡងជាប់និទ្ទេស A ទាំង ៨៩ នាក់ ដែលបានរៀបចំធ្វើនៅបរិវេណពហុកីឡដ្ឋានខេត្តកំពត កាលពីថ្ងៃទី ១៨ ខែតុលា ឆ្នាំ ២០២៥ ម្សិលមិញ។

នាឱកាសនោះ លោកឧបនាយករដ្ឋមន្ត្រី សាយ សំអាល់ បានលើកទឹកចិត្តដល់យុវជន និងសិស្សានុសិស្ស ពិសេសអ្នករៀនមិនសូវពូកែ សូមកុំអាលអស់សង្ឃឹម ត្រូវបន្តប្រឹងប្រែងរៀនសូត្រជាប្រចាំ និងអភិវឌ្ឍន៍សមត្ថភាពជានិច្ច ទាំងជំនាញក្នុងសាលា ចំណេះដឹង បំណិតជីវិតក្នុងសង្គម ដើម្បីចូលរួមកសាងស្រុកទេសឲ្យរីកចម្រើនគង់វង្សតជំនាន់រហូតទៅ។

លោកបណ្ឌិត ប៉ែន ស៊ីម៉ន អ្នកតំណាងរាស្ត្រមណ្ឌលកំពត និងជាប្រធានក្រុមការងារគណបក្សប្រជាជនចុះមូលដ្ឋានខេត្តកំពត លើកឡើងដែរថា នៅក្នុងសម័យកាលណាក៏ដោយ ការសិក្សាអប់រំ បង្កើតធនធានមនុស្ស ជាការងារសំខាន់បំផុតសម្រាប់ប្រទេសជាតិមួយ ព្រោះមានតែចំណេះវិជ្ជាទេ ដែលអាចជួយស្រោចស្រង់កសាងប្រទេសឲ្យគង់វង្សរុងរឿងបាន។

លោក ម៉ៅ ធនិន អភិបាលខេត្តកំពត បញ្ជាក់ថា សម្រាប់លទ្ធផល នៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ឆ្នាំ ២០២៥ ខេត្តកំពត មានសិស្សប្រឡងជាប់សរុប ចំនួន ៤.៦៩៨ នាក់ ស្រី ២.៧២៥ នាក់ ស្នើ ៩០.៨៥%។ ក្នុងនោះ សិស្សទទួលបាននិទ្ទេស A មានចំនួន ៨៩ នាក់ កើនឡើងជាងឆ្នាំមុន ១១ នាក់ (និទ្ទេស A ទទួលបានម៉ូតូ ១ គ្រឿង ថវិកា ៤០ ម៉ឺនរៀល និងឱកាសទទួលបានកញ្ចប់អាហារូបករណ៍នៅថ្នាក់ឧត្ដមសិក្សា)៕

អត្ថបទ ៖ សឹង រ៉ាត់