ការដង្ហែរក្បួនដោយថ្មើរជើងនៃប្រារព្ធពិធីបុណ្យមាឃបូជានេះ រៀបចំឡើងដោយព្រះចៅអធិការវត្ដដំណាក់ ដោយមានរួមសហការពីអាជ្ញាធរខេត្ត បានដង្ហែរចេញពីវត្តដំណាក់ ក្នុងសង្កាត់សាលាកំរើក ឆ្ពោះទៅកាន់ផ្លូវតាមដងស្ទឹងសៀមរាប និងតាមបណ្ដាផ្លូវសំខាន់ៗមួយចំនួនទៀតនៅក្នុងក្រុងសៀមរាប។

ប្រជាពុទ្ធបរិស័ទ ដែលបានចូលរួមបានលើកឡើងថា ពិធីបុណ្យមាឃបូជា ជាពិធីបុណ្យជាតិមួយដ៏សំខាន់សម្រាប់ប្រជាពលរដ្ឋខ្មែរដែលកាន់សាសនាព្រះពុទ្ធ។

ពិធីនេះត្រូវបានធ្វើឡើងជារៀងរាល់ឆ្នាំ មិនដែលអាក់ខាន នោះឡើយ ក្រោយថ្ងៃជ័យជំន្នះ៧មករា ១៩៧៩ ក្រោមដំបូលសុខសន្តិភាព។ តែនៅពេលដែលលើពិភពលោកជួបនូវ វិបត្តិ ជម្ងឺកូវិដ១៩ ក៏បានអាក់ខានក្នុងការដង្ហែរក្បួនជាទ្រង់ទ្រាយធំ តែពិធីគោរពបុណ្យមាឃបូជា ក៏នៅតែគោរពប្រតិបត្តិ ទៅតាមរូបភាពតូចៗតាមវត្តអារាម។តែក្រោយពីរាជរដ្ឋាភិបាលយកចិត្ដទុកដាក់ ក្នុងការចាក់ស្រោចចាក់វ៉ាក់សាំងជម្ងឺកូវីដ១៩ ជូនដល់ប្រជាពលរដ្ឋ ហើយមានភាពធូរស្រាលរូចមក ទើបប្រជាពលរដ្ឋមានឱកាសជួបជុំគ្នាធ្វើបុណ្យឡើងវិញ ដែលនេះបង្ហាញពីសុខសន្ដិភាពរបស់ប្រទេសកម្ពុជា។

ក្នុងការដង្ហែរក្បួននោះដែរ ពុទ្ធបរិស័ទបានប្ដេជ្ញាចូលរួមថែរក្សាវប្បធម៌ព្រះពុទ្ធសាសនាឲ្យកាន់តែរីកចំរើននិងគង់វង្សជាអមតៈ ព្រោះព្រះពុទ្ធសាសនា មិនត្រឹមតែបានធ្វើឲ្យប្រជាពលរដ្ឋបានរួមរស់ជាមួយគ្នាដោយសុខសាន្តខាងផ្លូវស្មារតីប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់នៅក្នុងការពង្រឹងសណ្ដាប់ធ្នាប់ សុខសន្តិភាព ស្ថិរភាពសង្គម ការអភិវឌ្ឍលើគ្រប់វិស័យ និងថែរក្សាការពារអត្តសញ្ញាណជាតិទៀតផង។

ម៉្យាងទៀត ដោយយល់ឃើញពីគុណតម្លៃ នៃបុណ្យមាឃបូជានេះហើយ បានជានៅគ្រប់វត្តអារាម បានរួមគ្នាប្រារព្ធពីធីនេះយ៉ាងអធិកអធម ដើម្បីផ្សព្វផ្សាយបញ្ជ្រាបការយល់ដឹងកាន់តែទូលំទូលាយ ទៅដល់ពុទ្ធបរិស័ទថា «តើយើងបានធ្វើអ្វីខ្លះ សម្រាប់ខ្លួនឯង គ្រួសារ និងសហគមន៍របស់យើង» ដូចនេះពុទ្ធបរិស័ទជាអ្នកកាន់ព្រះពុទ្ធសាសនា ត្រូវតែចូលរួមថែរក្សាសាសនា វប្បធម៌ ប្រពៃណីនេះឲ្យបានខ្ជាប់ខ្ជួនប្រយោជន៍ដល់កូន ចៅជំនាន់ក្រោយៗទៀត បានឃើញ បានដឹង បានយល់ និង គោរពប្រតិបត្តិ៕

អត្ថបទ÷ គឿន វេត

The post វត្តដំណាក់ខេត្តសៀមរាប ប្រារព្ធបុណ្យមាឃបូជា ដោយមានព្រះសង្ឃ និងពុទ្ធបរិស័ទចូលរួមជាង៥ពាន់អង្គ/នាក់ appeared first on Kampuchea Thmey Daily.

បុណ្យមាឃបូជា ប្រារព្ធឡើង ដើម្បីរំលឹកដល់ថៃ្ងដែលព្រះសម្មាសម្ពុទ្ធទ្រង់ប្រកាសបង្កើត ព្រះពុទ្ធសាសនាឡើង ក្នុងលោកនៅ ប្រទេសឥណ្ឌា កាលពី ៥៨៨ ឆ្នាំមុនគ្រិស្តសករាជ នាថៃ្ងទី ១៥ កើតខែមាឃ ក្រោយពីការត្រាស់ដឹងរបស់ព្រះអង្គចំនួន ៩ ខែគត់ ។ ការបង្កើត ព្រះពុទ្ធសាសនា ក្នុងឋានៈជាអង្គការសាសនាមួយនេះ ធ្វើឡើងនៅក្នុងចំណោមព្រះសង្ឃចំនួន ១,២៥០ អង្គ ជាសមាជិកក្នុងអង្គមហាសន្និបាតមួយ ដែលបាននិមន្តមកពីគ្រប់ស្រទាប់វណ្ណៈទាំងអស់ ។

នៅក្នុងមហាសន្និបាតនោះ ព្រះសម្មាសម្ពុទ្ធ ទ្រង់បានប្រកាសនូវគោលការណ៍ចំនួន ១១ ប្រការសម្រាប់ឲ្យសមាជិកមហាសន្និបាតទាំងអស់ កាន់យកជាវិថីជីវិត និងសម្រាប់យកទៅផ្សព្វផ្សាយ ដល់ជនដទៃទៀតឲ្យបានយល់អំពី ពុទ្ធសាសនា ។

គោលការណ៍ទាំង ១១ ប្រការនេះ មានឈ្មោះជាភាសាបាលីថា “ឱវាទបាដិមោក្ខ” ដែលពុទ្ធសាសនិកជនម្នាក់ៗត្រូវយកមកសិក្សាឲ្យយល់ដឹងនិងអនុវត្តដូចតទៅ៖

គោលបំណង៖ គោលបំណងរបស់ ព្រះពុទ្ធសាសនា ឬក៏ដូចជា គោលបំណងរបស់ពុទ្ធសាសនិកម្នាក់ៗ គឺសែ្វងរកនិព្វានដែលប្រែថា សភាវ:ប្រាសចាកទុក្ខ មិនមានសេចក្តីទុក្ខ មិនមានបញ្ហានៅក្នុងដួងចិត្តរបស់ខ្លួន ពាក្យនិព្វាននេះ មានន័យស្មើនិងពាក្យថា “សន្តិ” ដែលប្រែថា “សេចក្តីស្ងប់” ។ យើងអាចនិយាយថា គោលបំណង របស់ ព្រះពុទ្ធសាសនា គឺការបង្កើតឡើងនូវ សន្តិភាព ក្នុងដួងចិត្តនេះដែរ ក៏ជាមូលដ្ឋានគ្រឹះនៃសន្តិភាពក្នុងសង្គមដែលខ្លួនរស់នៅផង ។ ការកាន់ ព្រះពុទ្ធសាសនា គឺជាការប្រឹងប្រែងដើម្បីបង្កើតសន្តិភាពដល់ខ្លួន និងចូលរួមចំណែកដល់សន្តិភាពសង្គម និង ពិភពលោក នេះជាកាតព្វកិច្ចដែលពុទ្ធសាសនិកម្នាក់ៗត្រូវប្រឹងប្រែងធ្វើអោយសម្រេច ។

គោលដៅ៖ សន្តិភាព ឬនិញ្វន មិនមែនកើតឡើងដោយការសុំបន់ស្រន់បួងសួងទេ និងក៏មិនអាចកើតឡើងដោយសារផ្តល់ឬប្រទានឲ្យដោយចិត្តស្រឡាញ់មេត្តារបស់អាទិទេព ឬព្រះជាម្ចាស់អង្គណាមួយឡើយ សន្តិភាពនេះកើតដោយសារការសន្សំរបស់សកម្មភាព ៣ យ៉ាងគឺ៖

-ការមិនធ្វើអាក្រក់ ការកម្ចាត់អំពើអាក្រក់ និងការពារអំពើអាក្រក់គ្រប់ប្រភេទមិនឲ្យកើតក្នុងជីវិតរស់នៅទាំងផ្លូវកាយនិងផ្លូវសម្តី ។

-ការធ្វើអំពើល្អ បង្កើតអំពើល្អ និងរក្សាអំពើល្អឲ្យស្ថិតសេ្ថរគង់វង្សក្នុងជីវិតរស់នៅប្រចាំថៃ្ង ទាំងអំពើល្អខាងផ្លូវកាយនិងផ្លូវសម្តី ។

-ពង្រឹងចិត្តដែលជាមូលដ្ឋាននៃអំពើ ដោយកម្ចាត់កិលេស ឬមេរោគដែលតោង ចិត្តឲ្យអស់ទៅ រហូតដល់ចិត្តស្អាតបរិសុទ្ធ មិនមានសភាវៈអាក្រក់ស្ថិតនៅ ។

លក្ខណៈរបស់ព្រះពុទ្ធសាសនិកជន ៖

លក្ខខណ្ឌទី ១ ៖ មានការអត់ធ្មត់ក្នុងការធ្វើអំពើល្អ និងកម្ចាត់អំពើអាក្រក់ ។

លក្ខខណ្ឌទី ២ ៖ មិនប្រើអំពើហិង្សាក្នុងការរស់នៅ ។

លក្ខខណ្ឌទី ៣ ៖ មិនប្រើពាក្យបៀតបៀននិងតិះដៀលអ្នកដទៃ ។

លក្ខខណ្ឌទី ៤ ៖ រក្សាសីល រស់នៅក្នុងច្បាប់ យកច្បាប់ជាធំ ។

លក្ខខណ្ឌទី ៥ ៖ បរិភោគ ប្រើប្រាស់វត្ថុទាំងទ្បាយដោយសន្សំសំចៃនិងស្គាល់ប្រមាណ ។

លក្ខខណ្ឌទី ៦ ៖ ចូលចិត្តភាពស្ងប់ស្ងាត់ និងបង្កើតបរិយាកាសស្ងប់ស្ងាត់ ។

លក្ខខណ្ឌទី ៧ ៖ មានសេចក្តីព្យាយាមក្នុងការសម្អាតចិត្ត ធ្វើឲ្យចិត្តមានសមាធិ ។

មេរៀនពីបុណ្យមាឃបូជា ៖​ ថៃ្ងនេះជាថៃ្ងដែលព្រះពុទ្ធអង្គទ្រង់ប្រកាសគោលការណ៍ទាំង ១១ ប្រការនេះ សម្រាប់ជាប្រយោជន៍ដល់បរិស័ទយកទៅប្រើប្រាស់ៈ

ចំណុច ១ ៖ ក្នុងឋានៈជាបរិស័ទ ការអនុវត្តតាមប្រការទាំង ១១ នេះនឹងនាំទៅរកសន្តិភាពផ្លូវចិត្តជាពិតប្រាកដ ។

ចំណុច ២ ៖ ក្នុងឋានៈជាពលរដ្ឋ ក្នុងសង្គម ការមានគោលបំណងរួម មានគោលដៅដូចគ្នា និងការប្រព្រឹត្តប្រហាក់ប្រហែលគ្នានេះ នឹងអាចនាំមកនូវ សន្តិភាព និងការអភិវឌ្ឍដែលប្រកបដោយនិរន្តរភាព ។

ចំណុច ៣ ៖ ក្នុងឋានៈជាក្រុមបក្សនៅក្នុងសង្គម ឬប្រទេសជាតិមួយដែលព្យាយាមសែ្វងរកនូវឱកាសដើម្បីរក្សាសន្តិភាព និងជំរុញដល់ការអភិវឌ្ឍដល់ ប្រទេសជាតិតែឯងនោះ ការគោពតាមគោលការណ៍ទាំង ១១ ប្រការនេះនឹងកាត់បន្ថយបាននូវអស្ថិរភាព ជម្លោះ និងអំពើហិង្សាដែលកើតមកពីការប្រគួតប្រជែងគ្នាបាន ។

ចំណុច ៤ ៖ ក្នុងឋានៈជាអ្នកផ្សាយសាសនា ការប្រព្រឹត្តទៅតាមគោលការណ៍នេះ នឹងនាំឲ្យមានការយោគយល់ ការផ្តល់កិត្តិយស ដល់គ្នានិងគ្នា និងការរស់នៅជុំគ្នា ក្នុងឋានៈជាមនុស្សជាតិបាន បើទោះជាមាន សាសនាខុសគ្នាៗក៏ដោយ ។

ចំណុច ៥: ក្នុងឋានៈជាអន្តរជាតិ ការគោរពតាមគោលការណ៍នេះ នឹងនាំមកនូវនិរន្តរភាពរបស់មនុស្សជាតិ បរិស្ថានធម្មជាតិ ពិភពសត្វ និងអាកាសធាតុដ៏យូរអងែ្វងបាន ដោយមិនបាច់ព្រួយបារម្ភក្នុងការដណ្តើមគ្នា ដើម្បីរស់ឡើយ ។

សង្ឃឹមថាយើងម្នាក់ៗ អាចទាញយកប្រយោជន៍បានខ្លះពីថៃ្ងមាឃបូជានេះ នឹងអញ្ជើញនាំគ្នាធ្វើបុណ្យទានរក្សាសីល និងសមាធិសម្អាតចិត្តរបស់ខ្លួនក្នុងថៃ្ងនេះ ដើម្បីបូជានិងរំលឹកចំពោះគុណព្រះសម្មាសម្ពុទ្ធ ដែលព្រះអង្គបានបង្កើត ព្រះពុទ្ធសាសនា សម្រាប់ជាមាគ៌ា‌ជីវិតដល់ពួកយើងទាំងអស់គ្នា ៕

គ្រូ ណុប

ប្រភព៖wikipedia

ចុចអាន៖សម្រង់ទូន្មានពីព្រះពុទ្ធ ជួយផ្លាស់ប្ដូរជីវិតឲ្យជ្រះថ្លា មានភាពវិជ្ជមានមកវិញ

ចុចអាន៖ផ្ទះទុកចោល អាចមានវិញ្ញាណអាក្រក់រស់នៅ ប្រើក្បួននេះ ពពួកអមនុស្សចាកឆ្ងាយ

The post ជាពុទ្ធសាសនិកខ្មែរ គួរស្វែងយល់ពីពិធី «បុណ្យមាឃបូជា​» appeared first on Kampuchea Thmey Daily.

ទន្ទឹម​នេះ ​មាឃបូជា ​ជា​ថ្ងៃ​ដែល​ព្រះ​សម្មាសម្ពុទ្ធ​ ទ្រង់​ប្រោស​ទាន​ឧបោសថ​សីល​ ដល់​ព្រះសង្ឃ​ ជា​លើក​ដំបូងផងដែរ។ ក្នុងនាមជា​ពុទ្ធសាសនិកខ្មែរ ​នៃ​អ្នក​គោរពព្រះ​ពុទ្ធ​សាសនា ​​អ្នកអាច​យក​លទ្ធិ​ ឬការបង្រៀននេះ ​មក​បដិបត្តិ​ក្នុង​ថ្ងៃ​បុណ្យ​មាឃបូជា ឬ​ក្នុង​ជីវិត​ប្រចាំ​ថ្ងៃ​ ដោយ​គោលការណ៍ ៣ យ៉ាង​នៃ​ការ​បង្រៀន​ដូច​ខាង​ក្រោម​៖

១ ការ​មិន​ប្រព្រឹត្ត​អំពើ​បាប​ទាំង​ឡាយ ការ​លុប​បំបាត់​នូវ​អំពើ​អាក្រក់​ទាំង ១០ ប្រការ គឺ​ផ្លូវកាយ ពោល​គឺ​ការ​មិន​សម្លាប់ មិន​លួច មិន​ប្រព្រឹត្ត​ខុស​ក្នុង​ផ្លូវ​ភេទ ពាក្យ​សម្ដី មិន​និយាយ​កុហក មិន​និយាយ​បង្កាច់​បង្ខូច មិន​និយាយ​គំនិត​ឥត​ប្រយោជន៍ ពោល​គឺ​មិន​ចង់​បាន​របស់​អ្នក​ដទៃ មិន​សងសឹក មិន​ឃើញ​អំពើ​ខុស។

២ ការ​ធ្វើ​បុណ្យ​ ​ គឺ​ធ្វើ​នូវ​អំពើ​ល្អ​ទាំង​អស់​ តាម​អំពើ​ល្អ​ទាំង ១០ រួម​ទាំង​អំពើ​ល្អ​ទាំង​ផ្លូវ​កាយ វាចា និង​ចិត្ត។

៣ បន្សុទ្ធចិត្ត លះបង់​នូវ​ឧបេក្ខា​ដែល​រារាំង​ចិត្ត​ មិន​ឲ្យ​បាន​ដល់​នូវ​សេចក្ដី​ស្ងប់​នោះ​គឺ សេចក្ដី​ត្រេកត្រអាល ការ​សងសឹក ការ​ធ្លាក់​ទឹក​ចិត្ត ការ​បាក់​ទឹក​ចិត្ត ការ​មន្ទិល​សង្ស័យ។

សរុប​មក​ឲ្យ​ខ្លី​មក ឧបោសថសីល ធ្វើល្អ វៀរចាក​អំពើ​អាក្រក់ ធ្វើ​ឲ្យ​ចិត្តរបស់អ្នក​បរិសុទ្ធនេះឯង៕

គ្រូ ណុប

ចុចអាន៖ព្រះសង្ឃនិងព្រះពុទ្ធ ក្នុងសុបិន តំណាងឲ្យកាងារឡើងស្រឺតៗ ជីវិតថ្កុំថ្កើងជាងមុន

ចុចអាន៖ព្រះសង្ឃនិងព្រះពុទ្ធ ក្នុងសុបិន តំណាងឲ្យកាងារឡើងស្រឺតៗ ជីវិតថ្កុំថ្កើងជាងមុន

The post មេរៀន ៣ យ៉ាង ពុទ្ធសាសនិកខ្មែរ គួរអនុវត្តនៅថ្ងៃ «បុណ្យមាឃបូជា» appeared first on Kampuchea Thmey Daily.

បើ​យោងតាម​គេហទំព័រ​របស់​អាជ្ញាធ​រ​ជាតិ​អប្សរា​បាន​ឲ្យ​ដឹងថា​ មាឃបូជា គឺជា​ពិធីបុណ្យ​មួយ​ដែល ពុទ្ធសាសនិកជន​គ្រប់​ប្រទេស​ អ្នក​កាន់​ព្រះពុទ្ធសាសនា តែង​ប្រារព្ធ​ធ្វើជា​រៀងរាល់ឆ្នាំ មិនដែល​ខក​ខាន​។​

ពិធីបុណ្យ​នេះ​ប្រារព្ធ​ឡើងជា​រៀងរាល់ថ្ងៃ​១៥​កើត ខែមាឃ​ ដើម្បី​រំឭក​ទៅដល់​ព្រឹត្តិការណ៍​ដ៏​សំខាន់ ២ចំណុច​ដែល​បា​នកើត​ឡើង​នៅក្នុង​ពេលដែល​ព្រះពុទ្ធ​ជា​ម្ចាស់ ទ្រង់​ព្រះ​ធរមាន​នៅឡើយ​។​

ព្រឹត្តិការណ៍​សំខាន់​ទី​១ គឺ​ពេល​ដែល​ព្រះអង្គ​ទ្រង់​ប្រជុំ​ព្រះ​ភិក្ខុសង្ឃ​ចំនួន​១២៥០​អង្គ ជាការ​ប្រជុំ​លើក​ដំបូង ដើម្បី​ប្រកាស​នូវ​គោលការណ៍​មូលដ្ឋាន​នៃ​សាសនា​ ដែល​ហៅថា ​ឱវាទបាតិមោក្ខ​។​

ចំពោះ​ខ្លឹមសារ​សង្ខេបនៃ​ឱវាទ បាតិមោក្ខ​នោះ​មាន ៣​គាថា​គឺ​៖ គាថា​ទី​១ ទ្រង់​សម្តែង​ថាៈ កិរិយា​មិន​ធ្វើ​នូវ​បាប​ទាំងពួង កិរិយា​បំពេញ​កុសល​ កិរិយា​ធ្វើ​ចិត្ត​របស់ខ្លួន​ឲ្យ​ផូរផង់ ទាំងនេះ​ជា​ពាក្យ​ប្រដៅ​របស់​ព្រះពុទ្ធ​ទាំងឡាយ​។​

គាថា​ទី​២ ទ្រង់​សម្តែង​ថាៈ អំណត់​ គឺ​សេចក្តី​អត់ធន់​ជា​តបធម៌​ដ៏​ឧ​ត្ត​ម​ ព្រះពុទ្ធ​ទាំងឡាយ​ទ្រង់​ត្រាស់​ថា ព្រះ​និព្វាន​ជា​គុណជាតិ​ដ៏​ឧ​ត្ត​ម​ អ្នកបួស​ដែល​បៀតបៀន​សត្វ​ដទៃ សម្លាប់សត្វ​ដទៃ មិនមែនជា​បព្វជិត​ មិនមែនជា​សមណៈ​ឡើយ​។​ គាថា​ទី​៣ ទ្រង់​សម្តែង​ថាៈ កិរិយា​មិន​តិះដៀល​អ្នកដទៃ​១កិរិយា​មិន​បៀតបៀន​អ្នកដទៃ​១ កិរិយា​សង្រួម​ក្នុង​ព្រះ​បាតិមោក្ខ​១ ភាវៈ​ដឹង​ប្រមាណ​ក្នុង​ភត្តាហារ​១ ទី​ដេក និង​ទី​អង្គុយ​ដ៏​ស្ងាត់​១ កិរិយា​បំពេញ​ព្យាយាម​ក្នុង​អធិចិត្ត​១ ទាំងនេះ​ជា​ពាក្យ​ប្រដៅ​នៃ​ព្រះពុទ្ធ​ទាំង​ឡាយ​។​

ក្នុង​អង្គប្រជុំ​នេះ ព្រះអង្គ​ក៏​ទ្រង់​រៀបចំ​តែងតាំង​អគ្គសាវ័ក​ឆ្វេង​ស្តាំ​របស់​ព្រះអង្គ​ផង​គឺ​៖ ព្រះ​សារីបុត្រ​ដែលជា​កំពូល​លើស​អស់​ភិក្ខុ​ទាំងឡាយ ផ្នែក​ខាង​បញ្ញា​ត្រូវបានតែងតាំង​ជា​អគ្គ​-សាវ័ក​ទី​១ ឬ អគ្គ​សាវ័ក​ស្តាំ ចំណែក​តំណែង​ជា​អគ្គសាវ័ក​ទី​២ ឬ​អគ្គសាវ័ក​ឆ្វេង​ បាន​ទៅលើ​ព្រះ​មហា​មោគ្គល្លាន ដែល​ជា​កំពូល​លើស​អស់ភិក្ខុ​ទាំងឡាយ​ផ្នែក​ខាង​ឫទ្ធិ​។​

អង្គសន្និបាត​នេះ ​មាន​លក្ខណៈពិសេស ប្រកប​ដោយហេតុ៤​យ៉ាង​ ទើប​មាន​ឈ្មោះថា​ចតុរង្គ​សន្និ​បាត​ ដែល​ហេតុ​ទាំង៤​យ៉ាងនោះ​គឺ ៖​ទី​១.ថ្ងៃនោះ​ចំ​ថ្ងៃពេញបូណ៌មី ​ខែមាឃ​ទី​២.ភិក្ខុសង្ឃ​ចំនួន ១២៥០​អង្គ​ ដែល​មក​ប្រ​ជុំគ្នា​នោះ ឥតមាន​អ្នកណា​និមន្ត​ទុក​មុន​មក​ទេ​ គឺ​និមន្ត​ដោយ​អង្គ​ឯង​តែម្តង​ទី​៣. ភិក្ខុសង្ឃ​ទាំង១២៥០​អង្គ​នោះ សុទ្ធតែជា​ឯ​ហិ​ភិក្ខុ​ គឺ​ព្រះពុទ្ធ​ទ្រង់​បំបួស​ផ្ទាល់​ទាំងអស់​​ និង​ទី​៤. ភិក្ខុសង្ឃ​ទាំង១២៥០​អង្គ​នោះ​ សុទ្ធតែជា​ព្រះអរហន្ត ដែល​បានសម្រេច​អភិញ្ញា៦​ទាំងអស់​។​អង្គសន្និ​បាត​នេះ​កើតមានឡើង​ក្រោយពី​ព្រះពុទ្ធ​អង្គ​ទ្រង់​បាន​ត្រា​ស់ដឹង​រយៈពេល៩ខែ​គត់​។​

ចំណែក​ព្រឹត្តិការណ៍​ទី​២​នៃ​ពិធីបុណ្យ​មាឃបូជា​ គឺ​ដើម្បី​រំឭក​ដល់​ព្រឹត្តិការណ៍​ដែល​ព្រះ​ពុទ្ធអង្គ​ទ្រង់​ប្រកាស​ដាក់​ព្រះ​ជន្មាយុ​សង្ខារ​ នៅ​ចំពោះមុខ​មារ​។ ព្រឹត្តិការណ៍​នេះ​កើតឡើង​ក្រោយពេល​ដែល​ព្រះ​ពុទ្ធអង្គ​ទ្រង់​គង់​ចាំ​វស្សា​ទី​៤៥ ដែលជា​វស្សា​ចុងក្រោយ ដោយ​ក្នុង​កាលនោះ​ស្តេច​មារ បាន​ចូលគាល់​ព្រះអង្គ​ហើយ ក៏​អារាធនា​ដើម្បី​ឲ្យ​ព្រះអង្គ​ទ្រង់​ចូល​បរិនិព្វាន​។​

ពេលនោះ​ព្រះអង្គ​ទ្រង់​ប្រកាស​ចំពោះមុខ​មារ​ថា “ ម្នាល​មារ​មានចិត្ត​បាប​ចូរ​អ្នកមាន​សេចក្តី​ខ្វល់ខ្វាយ​តិច​ចុះ ការ​បរិនិព្វាន​របស់​តថាគត មិនយូរប៉ុន្មាន​ទេ កន្លង​៣​ខែអំពី​ថ្ងៃនេះ​ទៅ តថាគត​នឹង​បរិនិព្វាន​ហើយ​”​។​

ការប្រកាស​ដាក់​ព្រះ​ជន្មាយុ​សង្ខារ​នេះ បានធ្វើ​ឲ្យ​ភិក្ខុសង្ឃ​និង​បរិស័ទ​ទាំងឡាយ​មាន​សេចក្តី​តក់ស្លុត​ជាខ្លាំងដោយ​ដឹងថា ព្រះពុទ្ធ​ជា​បរមគ្រូ​នឹង​ត្រូវ​យាង​ចូល​បរិនិព្វាន ក្នុងពេល​ដ៏​ឆាប់​ខាងមុខ​។​ការប្រ​កាស​នេះ​កើតមានឡើង​នៅ​ថ្ងៃ១៥​កើត ខែមាឃ ឆ្នាំម្សាញ់ មុន​ព្រះអង្គ​បរិនិព្វាន​៣​ខែ​។​

អាស្រ័យ​ព្រឹត្តិការណ៍​សំខាន់​ទាំង​២ខាងលើ​នេះហើយ ​ដែល​ពុទ្ធសាសនិកជន​គ្រប់​ប្រទេស​អ្នក​កាន់​ព្រះពុទ្ធសាសនា​ តែង​ប្រារព្ធ​ពិធីបុណ្យ​មាឃបូជា​ ជា​រៀងរាល់ថ្ងៃ១៥​កើត ខែមាឃ​ ដើម្បី​សម្តែង​នូវ​សេចក្តី​ដឹងគុណរបស់ខ្លួន​ចំពោះ​ព្រះអង្គ ដោយ​ការបូជា​គ្រឿង​សក្ការៈ​ផ្សេងៗ សូត្រធម៌ សមាទាន​សីល ស្តាប់ធម៌​ទៅតាម​សទ្ធា​ជ្រះថ្លា​រៀងៗ​ខ្លួន​។​

កម្មវិធី​បុណ្យ​មាឃបូជា ក៏ដូចជា​ពិសាខបូជា​ដែរ​គេ​តែង​ប្រារព្ធ​ឡើង​ចាប់ពី​ពេល​ល្ងាច​តទៅ​ដោយ​តម្រូវ​ទៅតាម​ព្រឹត្តិការណ៍​ដែល​កើតមានឡើង​នៅ​ពេល​ល្ងាច​ផង​ តម្រូវ​ទៅតាម​ពេលវេលា​ដែល​មនុស្ស​ម្នា​ទាំងឡាយ​សម្រាក​ពី​ការងារ​ផ្សេងៗ​ផង​ ហើយ​ស្ថិត​ក្រោម​ពន្លឺព្រះច័ន្ទ​ពេញវង់​ស្អាត​ល្អ​ផង​។ គ្រឿង​ស​ក្ការៈបូជា​សំខាន់ៗ​នៅក្នុង​កម្មវិធី​បុណ្យ​នេះ​មានដូចជា ទៀន ធូប ផ្កា​ភ្ញី ផ្កាកម្រង គ្រឿង​ក្រអូប​ផ្សេងៗ​ ទៅតាម​លទ្ធភាព និង​សេចក្តី​ជ្រះថ្លា​។​

ដោយឡែក នៅក្នុង​វត្តអារាម​វិញ ព្រះសង្ឃ​និង​អារាមិកជន​ទាំងអស់​នាំគ្នា​រៀបចំ​សម្អាត​វត្ត និង​រៀបចំ​គ្រឿង​សក្ការៈ​ផ្សេងៗ​តាក់តែង​ភ្លើង ក្បូរក្បាច់​រចនា​ទៅតាមទំនៀមទម្លាប់​របស់​វត្ត​នីមួយៗ​។​

ជាការ​កត់សម្គាល់ នៅក្នុង​ប្រទេស​កម្ពុជា​យើង កម្មវិធី​បុណ្យមា​ឃបូជា​ពី​វត្ត​មួយ​ទៅ​វត្ត​មួយ​មិន​ដូចគ្នា​ទាំងស្រុង​នោះទេ ប្លែក​គ្នា​ខ្លះ​ទៅតាម​តំបន់​ ស្រុកទេស​រៀងៗ​ខ្លួន តែមាន​អត្ថន័យ​រួម​តែមួយ​គឺ​ដើម្បី​សម្តែង​នូវ​ការដឹងគុណ​ដល់​ព្រះពុទ្ធ​ជា​ម្ចាស់ដែលជា​បរមគ្រូ​។​ ការប្រព្រឹត្តទៅ​នៃ​កម្មវិធី​បុណ្យមាឃ​បូ​ជា ជាទូទៅ​រួមមាន​ ការ​ដង្ហែ​គ្រឿង​សក្ការៈបូជា​ប្រទក្សិណ​បូជនីយដ្ឋាន​នានា​មាន​ព្រះវិហារ​ជាដើម​ បន្ទាប់មក​វេរ​គ្រឿង​សក្ការៈ​ទាំងនោះ​​ថ្វាយ​ចំពោះ​ព្រះ​រតនត្រ័យ នមស្ការ សមា​ទានសីល​ ហើយ​ព្រះ​សង្ឃ ឬ អាចារ្យ​ដឹកនាំ​ប្រកាស​មាឃ​- បូជា​ និង​ស​ម្តែង​ព្រះធម៌​ទេសនា​អំពី​ពុទ្ធប្រវត្តិ និង​ប្រវត្តិ​មាឃ​បូជា​តទៅ​។​

វត្ត​ខ្លះ ព្រះសង្ឃ និង​ពុទ្ធបរិស័ទ​នាំគ្នា​សូត្រធម៌ ឬ​ស្មូត​អំពី​ពុទ្ធប្រវត្តិ​រហូតទល់​ភ្លឺ​ វត្ត​ខ្លះទៀត​សម្តែង​ពុទ្ធប្រវត្តិ​ទៅតាម​កណ្ឌ​នីមួយៗ ឆ្លាស់គ្នា​នឹង​សំឡេង​ស្មូត​ទល់​ភ្លឺ​។​ តែ​វត្ត​ខ្លះ​ប្រារព្ធ​កម្មវិធី​ត្រឹម​ម៉ោង ១០ ឬ ១១​យប់​ក៏​បញ្ចប់ទៅ អាស្រ័យ​ទៅតាម​លទ្ធភាព​ និង​សេចក្តី​ជ្រះថ្លា​។​ ខ្លឹមសារ​សំខាន់​ដែល​យើង​ត្រូវ​សិក្សា ពី​កម្មវិធី​បុណ្យមា​ឃបូជា​ គឺ​នៅត្រង់​ការយក​ឱវាទ​របស់ព្រះអង្គ​មក​គោរព​ប្រតិបត្តិ រឹត​ចំណង​សាមគ្គី​រួមរស់​ដោយ​សុខសន្តិភាព ក្នុងនាម​ជា​ពុទ្ធសាសនិកជន និង​មនុស្សជាតិ​ទូទៅ​ ហើយ​បង្កើតបាន​នូវ​ពិភពលោក​មួយ ដែល​ប្រាសចាក​ការ​បៀតបៀន​គ្នា​ សម្លឹង​មើល​គ្នា​ដោយ​ទឹកចិត្ត​មេត្រី ស្រឡាញ់​រាប់អាន​គ្នា​ជា​រៀងរហូត​។​

​នេះ​ជា​ពិធីបុណ្យ​នៃ ព្រះពុទ្ធសាសនា​ដ៏​សំខាន់​មួយ​ដែល​ដូនតា​ខ្មែរ​បាន​គោរព​និង​រក្សា​មក​រហូតដល់​សព្វថ្ងៃ​។ ពិធី​នេះ​បាន​ក្លាយ​ជា​ទំនៀម​ប្រពៃណី​របស់​ខ្មែរ​ទៅហើយ​។ ការរក្សាបាន​នូវ​ទំនៀមប្រពៃ​ណី​នេះ ក៏​ឈ្មោះថា​រក្សា​នូវ​អត្តសញ្ញាណ​របស់​ខ្មែរ ដែល​ធ្វើ​ឲ្យ​វប្បធម៌​ខ្មែរ​នៅតែ​បន្ត​រស់រានមានជីវិត​ជា​អមតៈ​។​

គួរ​បញ្ជាក់ថា​ រាជរដ្ឋាភិបាល​ក៏បាន​ចាត់ចែង​រៀបចំ​កម្មវិធី​បុណ្យ​នេះ​នៅ​បរិវេណ​ព្រះមហាសក្យមុនី​ចេតិយ ភ្នំ​ព្រះរាជ​ទ្រព្យ (​ឧ​ត្តុ​ង្គ​)​ស្រុក​ពញាឮ ខេត្តកណ្ដាល​ ដោយមាន​ថ្នាក់ដឹកនាំ​ជាន់ខ្ពស់​ព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ គ្រូ​ សិស្ស សីលវន្ត សីលវតី និង​ពុទ្ធបរិស័ទ​ចូលរួម​បំពេញ​កុ​សល​តាម​ប្រពៃណី​ព្រះពុទ្ធសាសនា​ផងដែរ​៕

អត្ថបទ​ ៖ ​សំអឿន​

The post ស្វែងយល់​ពី​ប្រវត្តិ​ខ្លះៗ​ នៃការ​ប្រារព្ធ​ពិធីបុណ្យ​មាឃបូជា​ appeared first on Kampuchea Thmey Daily.

ពិធីបុណ្យ​មាឃ​បូជា​ឆ្នាំនេះ​ នឹង​ប្រព្រឹត្តទៅ​ចំនួន​ពីរ​ថ្ងៃ​ គឺ​ចាប់ពី​ថ្ងៃ​ទី​២៨​ដល់​ថ្ងៃ​ទី​២៩ ខែមករា ឆ្នាំ​២០២១​នេះ​ ដែល​រៀបចំឡើង​ក្នុង​បរិវេណ​ព្រះ​មហា​សក្យមុនីចេតិយ​ភ្នំ​ព្រះរាជ​ទ្រព្យ​(​ឧ​ត្តុ​ង្គ​) ស្រុក​ពញាឮ ខេត្តកណ្តាល​។​

ថ្លែង​នៅ​ក្នុង​កិច្ចប្រជុំ​រៀបចំ​ផែនការ​ការពារ សន្តិសុខ សណ្តាប់ធ្នាប់​ក្នុង​ពិធីបុណ្យ​មាឃបូជា​កាលពី​ថ្ងៃ​ទី​២៦​មករា លោក​ឧ​ត្ត​ម​សេនីយ៍​ឯក យឹម លាង​ អគ្គ​ស្នង​ការ​រង​នគរ​បា​លជាតិ បាន​មានប្រសាសន៍​ថា​ កងកម្លាំង​ចម្រុះ​ប្រមាណ​១.៦០០​នាក់ នឹង​ត្រូវ​ដា​ក់ពង្រាយ ចាប់ពី​រាជធានី​ភ្នំពេញ​ទៅដល់​ខេត្ត​កណ្តាល​ កំពង់ស្ពឺ និង​កំពង់ឆ្នាំង​ដើម្បី​ជួយ​សម្រួល​និង​ការពារ​សន្តិសុខ​ សណ្តាប់ធ្នាប់ ជូន​ភ្ញៀវ​ជាតិ និង​អន្តរជាតិ រួម​ទាំង​ពុទ្ធបរិស័ទ​ ក្នុងឱកាស​ពី​ធី​បុ​ណ្យមាឃបូជា​ នៅ​ថ្ងៃស្អែក​នេះ​។​

ទន្ទឹម​នឹង​នេះ​ លោកឧ​ត្ត​ម​សេនីយ៍​ឯក ​បាន​ណែនាំ​ទៅដល់​គ្រប់​អង្គភាព​ទាំងអស់​ត្រូវ​យក​ចិត្ត​ទុក​ដាក់​ឲ្យបាន​ខ្ពស់បំផុត ចំពោះ​ឥស្សរជន ថ្នាក់ដឹកនាំ និង​អង្គទូត​នានា​ ដែល​នឹង​ត្រូវ​ចូលរួម​កម្មវិធី​នោះ​។ មួយវិញទៀត​ត្រូវតែ​ធ្វើការ​តាមដាន​ឲ្យបាន​ហ្មត់ចត់​ បំផុត​ចំពោះ ភេរវករ ​ពួកឧទ្ទាមក្រៅ​ច្បាប់​ រួម​ទាំង​ក្រុម ពួកចោរ លួច ឆក់ ប្លន់​ ដើម្បី​បញ្ចៀស​កុំឲ្យ​កើតមាន​ការរំខាន​ដល់​កម្មវិធី​បុណ្យ​នេះ​។​

លោក​ឧ​ត្ត​ម​សេនីយ៍​ឯក យឹម លាង បាន​មានប្រសាសន៍ថា​ ការ​ប្រារព្ធ​ពិធីបុណ្យ​មាឃបូជា​ឆ្នាំនេះ មិន​អាច​ធ្វើ​ដូច​ឆ្នាំ​កន្លងទៅ​នោះ​ឡើយ​ ដោយសារ​បញ្ហា​ជំងឺ​កូ​វីដ​-១៩ ខណៈ​អ្នកចូលរួមក៏ត្រូវ​មាន​កម្រិត​តិចតួច​ផង​ដែរ​ ដោយ​ព្រះសង្ឃ នឹង​និមន្ត​ត្រឹមតែ៨០​អង្គ និង​ពុទ្ធបរិស័ទ តម្រូវឲ្យ​មាន​ជិត១ ពាន់​នាក់​តែប៉ុណ្ណោះ​។​

លោក​ឧ​ត្ត​ម​សេនីយ៍​ឯក​បាន​បន្ត​ថា បើ​ទោះបីជា​ឆ្នាំនេះ​ត្រូវ​កំណត់​ចំនួន​អ្នកចូលរួម​បែបនេះ ក៏​កង​កម្លាំង​ការពារ​សន្តិសុខ​សណ្តាប់ធ្នាប់​ នៅតែ​បន្ត​បង្កើន​ការ​រឹតបណ្តឹង​ដដែល​។​

សូមបញ្ជាក់ថា​ ពិធីបុណ្យ​មាឃបូជា​ឆ្នាំនេះ ​នឹង​ធ្វើឡើង​រយៈពេល​២​ថ្ងៃ​គឺ​ចាប់ពី​ថ្ងៃ​ទី​២៨​និ​ង​២៩ ​ខែ​មករា​ឆ្នាំ​២០២១​ ដែលជា​ពិធីបុណ្យ​មួយ​ដែលមាន​សារសំខាន់​នៅក្នុង​វិស័យ​ព្រះ​ពុទ្ធសាសនា​ ហើយ​ការ​ប្រារព្ធ​ពិធី​នេះ​ឡើង​ក្នុង​គោលបំណង​ដើម្បី​រំលឹក​ដល់​អភិលក្ខិត សម័យ​ទាំងពីរ​នៃ​សាសនា​ព្រះ​សម្មាសម្ពុទ្ធ​បរមគ្រូ ដែល​កើតឡើង នៅ​ថ្ងៃពេញបូណ៌មី​ ខែមាឃ​ដូចគ្នា​គឺ​ថ្ងៃ​ប្រជុំ​ចតុរង្គ សន្និបាត​និង​ថ្ងៃ​ដែល​ព្រះអង្គ​ទ្រង់​ប្រកាស​ដាក់​ព្រះ​ជន្មាយុ​សង្ខារ​៕

អត្ថបទ ៖ ​សំអឿន​

The post សមត្ថកិច្ច​នឹងដាក់​ពង្រាយ​កម្លាំងប្រដាប់អាវុធ​ចម្រុះ​ជិត​២​ពាន់​នាក់​ការ​ពារ​សន្តិសុខ​ក្នុង​ពិធីបុណ្យ​មាឃបូជា​ appeared first on Kampuchea Thmey Daily.

ការលើកឡើងរបស់អ្នកនាំពាក្យនេះជាការឆ្លើយតបទៅនឹងចម្ងល់របស់ប្រជាពលរដ្ឋនិងពុទ្ធបរិស័ទមួយចំនួនដែលបាននិយាយតៗគ្នាថា ពិធីបុណ្យមាឃបូជាឆ្នាំនេះមានកំណត់ចំនួនមនុស្សចូលរួម។ លោក បានបន្តថាទោះបីជាកម្ពុជានៅទទួលរងនូវបញ្ហាជំងឺកូវីដ១៩ ក៏ដោយក៏ក្រសួងនៅតែអនុញ្ញាតឲ្យគ្រប់វត្តអារាមទាំងអស់នៅទូទាំងប្រទេសរៀបចំពិធីបុណ្យមាឃបូជានេះឲ្យបានអធិកអធមដោយអាស្រ័យទៅលើទីធ្លានៃវត្តអារាមនីមួយៗប៉ុណ្ណោះព្រោះពិធីបុណ្យនេះជាពិធីបុណ្យមួយក្នុងបណ្តាបុណ្យធំៗទាំងឡាយដែលប្រទេសកាន់ព្រះពុទ្ធសាសនាលើសកលលោក តែងតែប្រារព្ធធ្វើពុំដែលអាកខានឡើយ។

លោក បានបន្តទៀតថា«ប៉ុន្តែការប្រារព្វពិធីនេះគ្រប់ទីវត្តអារាមត្រូវប្រកាន់ខ្ជាប់ជាមូយនឹងវិធានការតឹងរឹងរបស់ក្រសួងសុខាភិបាលដូចជាពាក់ម៉ាស ឧស្សាហ៍លាងសំអាតដៃជាមួយ អាកុលឬជែលនិងរក្សាគម្លាតសុវត្តិភាពបុគ្គលដើម្បីការពារកុំឲ្យឆ្លងជំងឺកូវីដ១៩»។

ជាមួយគ្នានេះដែរ លោកបានណែនាំដល់មន្ត្រីក្រសួងធម្មការស្រុកត្រូវសហការជាមួយមន្ត្រីសង្ឃនិងអាជ្ញាធរមូលដ្ឋានចុះពិនិត្យតាមទីវត្តអារាមនានាដើម្បីធ្វើយ៉ាងណារៀបចំពិធីបុណ្យមាឃបូជានេះប្រព្រឹត្តិទៅប្រកបដោយដោយរលូននិងចៀសផុតពីការឆ្លងជំងឺកូវីដ១៩។

ទន្ទឹមនឹងនេះលោកក៏បានក្រើនរំលឹកដល់គ្រប់បណ្តាទីវត្តអារាមនៅទូទាំងប្រទេសត្រូវរៀបចំវត្ត តុបតែងលម្អបរិវេណវត្តដោយផ្កាភ្ញី បំភ្លឺភ្លើង ផ្ទាំងប៉ាណូធំៗ ស្ដីពីព្រះពុទ្ធទ្រង់ប្រសូត ព្រះពុទ្ធទ្រង់ត្រាស់ដឹង ព្រះពុទ្ធទ្រង់បរិនិព្វាន និងលើកទង់ជាតិ ទង់សាសនា ទង់ព្រះមហាក្សត្រ ទង់រំយោល ទង់ក្លែប ព្រមទាំងបដាពាក្យស្លោកផ្សេងៗដើម្បីប្រារព្វពិធីបុណ្យមាឃបូជានេះឱ្យបានអធិកអធម។

គួរបញ្ជាក់ថាពិធីបុណ្យមាឃបូជាប្រារព្ធធ្វើឡើងដើម្បីរម្លឹកដល់អភិលក្ខិតសម័យទាំងពីរនៃសាសនាព្រះសម្មាសម្ពុទ្ធបរមគ្រូ ដែលកើតឡើង នៅថ្ងៃពេញបូណ៌មី ខែមាឃដូចគ្នា គឺថ្ងៃប្រជុំចតុរង្គ សន្និបាត និងថ្ងៃដែលព្រះអង្គទ្រង់ប្រកាសដាក់ព្រះជន្មាយុសង្ខារ។ រាជរដ្ឋាភិបាលក៏បានចាត់ចែងរៀបចំកម្មវិធីបុណ្យនេះនៅបរិវេណព្រះមហាសក្យមុនីចេតិយ ភ្នំព្រះរាជទ្រព្យ (ឧត្តុង្គ)ស្រុកពញាឮ ខេត្តកណ្ដាល ដោយមានថ្នាក់ដឹកនាំជាន់ខ្ពស់ព្រឹទ្ធសភា រដ្ឋសភា រាជរដ្ឋាភិបាល មន្ត្រីរាជការ គ្រូ សិស្ស សីលវន្ត សីលវតី និង ពុទ្ធបរិស័ទចូលរួមបំពេញកុសលតាមប្រពៃណីព្រះពុទ្ធសាសនាផងដែរ៕

សំអឿន

The post អ្នកនាំពាក្យក្រសួងធម្មការ៖ក្រសួងមិនបានកំណត់ចំនួនមនុស្សចូលរួមក្នុធីបុណ្យមាឃ បូជានោះទេ appeared first on Kampuchea Thmey Daily.

ប៉ុន្តែ​ការ​ប្រារព្ធ​ពិធី​នេះ​ត្រូវធ្វើ​ឡើងជា​មួយ​នឹង​វិធានការ​របស់​ក្រសួងសុខាភិបាល​ ដូចជា​ ពាក់​ម៉ាស ឧស្សាហ៍​លាង​សំអាត​ដៃ​ជាមួយ​សាប៊ូ​ អាកុល​ ឬ​ជែល​ និង​រក្សា​គម្លាត​សុ​វត្តិភាព​បុគ្គល​ ដើម្បី​ការពារ​កុំ​ឲ្យ​ឆ្លង​ជំងឺ​កូ​វីដ​-១៩​។​

តាមរយៈ​សេចក្តី​ជូន​ដំណឹង​ ដែល​ទើប​ទទួល​បាន​នៅ​ថ្ងៃនេះ ​លោក​រដ្ឋមន្ត្រី​ ក៏បាន​ណែនាំ​ទៅគ្រប់​មន្ទីរ​ធម្មកា​រ និង​សាសនា​រាជធានី​-​ខេត្ត​ សហការ​ជាមួយ​ព្រះ​មេគណ ព្រះ​អនុគណ ព្រះចៅ​អធិការ អា​ចារ្យ​ គណៈ​កម្ម​ការ​វត្ត​ ធ្វើការ​បោសសម្អាត​ទីធ្លា​ក្នុង​វត្ត ព្រះវិហារ កុដិ សាលាឆាន់ ឧបដ្ឋានសាលា​ និង​កន្លែង​គោរព​សក្ការបូជា ​របស់​ពុទ្ធបរិស័ទ​ ព្រមទាំង​តុបតែង​លំអ​​បរិវេណ​វត្ត​អារាម​ដោយ​ផ្កា​ភ្ញី បំភ្លឺ​ភ្លើង ផ្ទាំង​ប៉ាណូ​ធំៗ​ ស្ដីពី​ព្រះពុទ្ធ​ទ្រង់​ប្រសូត ព្រះពុទ្ធ​ទ្រង់​ត្រាស់ដឹង ព្រះពុទ្ធ​ទ្រង់​បរិនិព្វាន និង​លើក​ទង់ជាតិ​ ទង់សាសនា ទង់​ព្រះមហាក្សត្រ ទង់​រំយោល ទង់​ក្លែប ព្រមទាំង​បដា​ពាក្យស្លោក​។​

ជាមួយគ្នានេះ​លោករដ្ឋមន្ត្រី​ បាន​អំពាវនាវ​សប្បុរសជន ពុទ្ធបរិស័ទ ប្រជាពលរដ្ឋ​ អញ្ជើញ​ចូលរួម​បំ​ពេញ​កុសល​តាម​សទ្ធា​ជ្រះថ្លា​ ដើម្បី​ជា​គុណប្រយោជន៍​ដល់​ការថែរក្សា​នូវ​អត្តសញ្ញាណ​ជាតិ ប្រពៃ​ណី​ ព្រះពុទ្ធសាសនា និង​អនុមោទនា​យក​ផល្លា​និ​សង្ឃ​រៀងៗ​ខ្លួន​។​

គួរ​បញ្ជាក់ថា ​ពិធីបុណ្យ​មាឃបូជានៅ​ឆ្នាំនេះ នឹង​​ប្រព្រឹត្តទៅ​រយៈ​ពេល​ពីរ​ថ្ងៃ​ នា​ថ្ងៃ​ព្រហស្បតិ៍១៥​កើត និង​ថ្ងៃ​សុក្រ១​រោច ខែមាឃ ឆ្នាំជូត ទោស័ក ព​.​ស​.២៥៦៤ ត្រូវ​នឹង​ថ្ងៃ​ទី​២៨និង​ថ្ងៃ​ទី​២៩ខែ​មករា ឆ្នាំ​២០២១​។ បុណ្យមាឃបូជា​ គឺជា​បុណ្យ​មួយ​ក្នុង​បណ្ដា​បុណ្យ​ធំៗ​ទាំងឡាយ ក្នុង​ព្រះពុទ្ធសាសនា​ដែល​ប្រទេស​កាន់​ព្រះពុទ្ធសាសនា​លើ​សកលលោក​តែងតែ​ប្រារព្ធ​ធ្វើ​ពុំ​ដែល​ខាន​។ ​ពិធីបុណ្យ​នេះ ​ប្រារព្ធ​ធ្វើឡើង​ ដើម្បី​រម្លឹក​ដល់​អភិលក្ខិត សម័យ ​ទាំងពីរ​នៃ​សាសនា​ព្រះសម្មាសម្ពុទ្ធ​បរមគ្រូ ដែល​កើតឡើង នៅ​ថ្ងៃពេញបូណ៌មី​ ខែមាឃ​ដូចគ្នា គឺ​ថ្ងៃ​ប្រជុំ​ចតុរង្គសន្និបាត​ និង​ថ្ងៃ​ដែល​ព្រះអង្គ​ទ្រង់​ប្រ​កាស​ដាក់​ព្រះ​ជន្មាយុ​សង្ខារ​។​

​រាជរដ្ឋាភិបាល​ ​បាន​ចាត់ចែង​រៀបចំ​កម្មវិធី​បុណ្យ​នេះ​ នៅ​បរិវេណ​ព្រះមហាសក្យមុនីចេតិយ​ភ្នំ​ព្រះ​រាជ​ទ្រព្យ (​ឧ​ត្តុ​ង្គ​) ស្រុក​ពញាឮ ខេត្តកណ្ដាល ដោយមាន​ថ្នាក់ដឹកនាំ​ជាន់ខ្ពស់​ ព្រឹទ្ធសភា រដ្ឋសភា រាជ​រដ្ឋាភិបាល មន្ត្រីរាជការ អ្នកមុខអ្នកការ សាស្ត្រាចារ្យ លោកគ្រូ​អ្នកគ្រូ និស្សិត សិស្ស សីលវន្ត សីលវតី និង​ពុទ្ធបរិស័ទ​ចូលរួម​បំពេញ​កុសល​តាម​ប្រពៃណី​ព្រះ​ពុទ្ធ​សាសនា ស្របតាម​រដ្ឋធម្មនុញ្ញ​ ​នៃ​ព្រះរាជាណាចក្រ​កម្ពុជា ដែល​បាន​ចែងថា «​ព្រះពុទ្ធសាសនា​ជា​សាសនា​របស់​រដ្ឋ​»​ផងដែរ​៕​

អត្ថបទ​ ៖ សំអឿន​

The post រដ្ឋមន្ត្រី​ ណែនាំ​​ឲ្យមន្ទីរ​រៀបចំ​ពិធីបុណ្យ​មាឃបូជា​ឲ្យ​អធិកអធម​ appeared first on Kampuchea Thmey Daily.