យោងតាមគេហទំព័រ Zoom Earth, វាជាព្យុះកំណាចមួយក្នុងឆ្នាំ២០២៦ ដែលបានវិវត្តខ្លួន ទៅជាព្យុះលំដាប់កំពូលទី៥ ជាមួយល្បឿនខ្យល់បោកបក់អតិបរមារហូតដល់ ២៨៥គីឡូម៉ែត្រក្នុងមួយម៉ោង។

ហ្វីលីពីន ជាប្រទេសមានមនុស្សស្លាប់ ច្រើនជាងគេបំផុត ដោយសារព្យុះនេះ ពោលគឺមានមនុស្សបាត់បង់ជីវិតចំនួន ១៨នាក់ និងបាត់ខ្លួន ១៤ នាក់។ គ្រោះថ្នាក់នេះ គឺបណ្តាលមកពីបំណាក់ដី និងទឹកជំនន់រហ័ស ដែលបង្កឡើងដោយ ភ្លៀងធ្លាក់ខ្លាំង។

ទន្ទឹមនោះ មនុស្សជាង ១១ ០០០នាក់ ក៏ត្រូវបង្ខំឲ្យចាកចេញពីផ្ទះសម្បែងផងដែរ ខណៈរាប់ម៉ឺនគ្រួសារ គ្មានអគ្គិសនីប្រើប្រាស់។

ចំណែកនៅចិន, អាជ្ញាធរបានជម្លៀសប្រជាជនប្រមាណ ២.៨លាននាក់ នៅតាមបណ្តាខេត្តឆ្នេរសមុទ្រភាគខាងកើត ដូចជា Zhejiang និង Fujian ព្រមទាំងទីក្រុងសៀងហៃ និងរដ្ឋធានីប៉េកាំង ផងដែរ។ យ៉ាងណា មិនមានសេចក្តីរាយការណ៍ អំពីមនុស្សស្លាប់ ដោយផ្ទាល់ពីព្យុះ នេះទេ។

ប្រព័ន្ធផ្លូវរថភ្លើងល្បឿនលឿន នៅភាគអាគ្នេយ៍ប្រទេសចិន ក៏ត្រូវផ្អាកដំណើរការទាំងស្រុង ផងដែរ ឯនៅទីក្រុង Yueqing បាក់ដើមឈើជាង ១ ៣០០ ដើម ហើយទឹកបានជន់លិចផ្លូវថ្នល់ ជម្រៅជាង ២ ម៉ែត្រនៅក្នុងខេត្ត Hebei ព្រមទាំងបណ្តាលឲ្យលិចលង់ដីកសិកម្ម រាប់ម៉ឺនហិកតា។

រីឯនៅកោះតៃវ៉ាន់វិញ មនុស្សជាង២០០ នាក់បានរងរបួស ប៉ុន្តែមិនមាន អ្នកបាត់បង់ជីវិតឡើយ ខណៈ ជាង ១៤ ០០០នាក់ទៀត ត្រូវបានជម្លៀសចេញពីតំបន់គ្រោះថ្នាក់។

លើសពីនេះ ផ្ទះប្រជាជនជាង ១៧០ ០០០ ខ្នងបានដាច់ចរន្តអគ្គិសនី រួមទាំងខ្សែទូរស័ព្ទជាង ១ ០០០ ខ្សែ និងបង្គោលសេវាទូរស័ព្ទ ៥៩ កន្លែងរងការខូចខាត។

ងាកទៅជប៉ុន ព្យុះ Bavi បានបោកបក់ កាត់កោះ Sakishima និងតំបន់ Okinawa បណ្តាលឲ្យមានអ្នករបួសមួយចំនួន ប៉ុន្តែមិនមានមនុស្សស្លាប់ឡើយ។ យ៉ាងណា ផ្ទះរាប់ម៉ឺនខ្នង ក៏ដាច់ចរន្តអគ្គិសនីដែរ៕ 

អត្ថបទ៖ សុវណ្ណ

The post ឥទ្ធិពលព្យុះកំណាច Bavi ឆក់យកជីវិតមនុស្សច្រើននាក់ និងបង្កការបំផ្លាញធំធេង នៅអាស៊ី appeared first on Kampuchea Thmey Daily.

យោងតាមកាសែតរដ្ឋ Rodong Sinmun ចេញផ្សាយនៅថ្ងៃអង្គារ ទី១៤ ខែកក្កដា ឆ្នាំ២០២៦, ព្យុះកំណាចនេះ កំពុងវាយប្រហារប្រទេសចិន ហើយបន្ទាប់ពីនោះ វានឹងបោះពួយ ឆ្លងកាត់សមុទ្រលឿង ចូលមកវាយលុកតំបន់ភាគកណ្តាល នៃប្រទេសកូរ៉េខាងជើង នៅថ្ងៃពុធ។

ឥទ្ធិពលរបស់ព្យុះនេះ នឹងបង្កឲ្យមានខ្យល់កន្ត្រាក់ និងភ្លៀងធ្លាក់ដូចហែកមេឃ វាយប្រហារទូទាំងតំបន់កណ្តាល និងភាគខាងជើងប្រទេស។

ជាវិធានការប្រុងប្រយ័ត្ន! លោក គីម ជុងអ៊ុន បានចេញបញ្ជាឲ្យស្ថាប័នពាក់ព័ន្ធទាំងអស់ ត្រូវរៀបចំលក្ខណៈឲ្យស្រេចបាច់ និងត្រៀមជម្លៀសប្រជាជនភ្លាមៗ ក្នុងករណីអាសន្ន។

លោកក៏បញ្ជាឲ្យបុគ្គលិក និងមន្ត្រីគ្រប់លំដាប់ថ្នាក់ ត្រូវប្រុងជើងការជាប់ជានិច្ចផងដែរ ព្រោះឥទ្ធិពលព្យុះនេះមិនធម្មតាទេ ដែលអាចធ្វើឲ្យខូចខាតដល់សំណង់ហេដ្ឋារចនាសម្ព័ន្ធនានា ប៉ះពាល់ខ្លាំងដល់វិស័យសេដ្ឋកិច្ច។

សូមជម្រាបថា កូរ៉េខាងជើង ធ្លាប់រងការវាយប្រហារដោយព្យុះធំៗជាច្រើនលើក ដែលបង្កការខូចខាតយ៉ាងធ្ងន់ធ្ងរដល់សេដ្ឋកិច្ច ហេដ្ឋារចនាសម្ព័ន្ធ និងជីវភាពរស់នៅរបស់ប្រជាជន។

ព្យុះ Lionrock ក្នុងឆ្នាំ២០១៦ គឺជាព្យុះសម្លាប់មនុស្សច្រើន និងបង្កជាមហន្តរាយដ៏អាក្រក់បំផុត ក្នុងប្រវត្តិសាស្ត្រសម័យទំនើបរបស់ កូរ៉េខាងជើង ដោយមនុស្សយ៉ាងតិច ៥២៥ នាក់ ត្រូវបានរាយការណ៍ថា ស្លាប់ និងបាត់ខ្លួន៕

អត្ថបទ៖ សុវណ្ណ

The post គីម ជុងអ៊ុន ប្រកាសអាសន្ន និងបញ្ជាឲ្យប្រជាជនកូរ៉េខាងជើង ត្រៀមខ្លួន ចំពោះព្យុះទីហ្វុងកំណាច Bavi  appeared first on Kampuchea Thmey Daily.

នៅ​ព្រឹកថ្ងៃសុក្រ ព្យុះទីហ្វុង Bavi បាន​​ខិតជិតកោះ Sakishima របស់​ប្រទេសជប៉ុន ដែល​ជាកោះដាច់ស្រយាលមួយ​នៅជិតតៃវ៉ាន់ ជាមួយ​នឹងល្បឿន​ខ្យល់អតិបរមា ១៦២គីឡូម៉ែត្រ​ក្នុងមួយម៉ោង ជំរុញឱ្យ​ប្រជាជន​ក្នុងតំបន់បិទ​បង្អួច និងបិទសំណាញ់ការពារ​ខ្យល់នៅ​តាមផ្ទះ និងហាងនានា​។ ​

មិន​តែ​ប៉ុណ្ណោះ ក្រុមហ៊ុន​អាកាសចរណ៍ បានលុបចោល​ជើងហោះហើរ​រាប់សិប​ជើង​ នៅក្នុងតំបន់ រួមទាំងសម្រាប់​ថ្ងៃសៅរ៍ផងដែរ។

ព្យុះទី​ហ្វុង Bavi មិន​ត្រឹម​​តែ​រំពឹងថានឹងបោក​បក់មកដល់​កោះតៃវ៉ាន់​ទេ ប៉ុន្តែនឹង​បង្កឱ្យ​មានភ្លៀងធ្លាក់ច្រើន​នៅលើកោះនេះ។ តំបន់ខ្លះ​អាច​នឹងមានភ្លៀងធ្លាក់រហូតដល់​មួយម៉ែត្រ ដោយចាប់ផ្តើម​នៅសុក្រ​។

រដ្ឋាភិបាលនិយាយថា មនុស្ស​ជាង ១ ០០០ នាក់​ ត្រូវបាន​ជម្លៀស​ចេញ ភាគច្រើនមកពីឆ្នេរ​សមុទ្រ​ភាគខាងកើត​ដែលមានភ្នំ ហើយ​យោធាជិត ២៩ ០០០ នាក់​ កំពុងត្រៀមខ្លួន​ដើម្បីជួយសង្គ្រោះ។

ប្រធានាធិបតីតៃវ៉ាន់ លោក Lai Ching-te សរសេរលើ​​បណ្តាញ​សង្គម​ហ្វេសប៊ុក ថា៖ « ទោះបីជាព្យុះទីហ្វុងនេះ​បានចុះខ្សោយ​បន្តិច ហើយ​ត្រូវបាន​បន្ទាបទៅជាព្យុះទីហ្វុង​កម្រិតមធ្យមក៏ដោយ ​កាំ​ព្យុះរបស់វា​មានទំហំធំ ហើយនៅតែអាចនាំមកនូវខ្យល់​បក់ខ្លាំង និងភ្លៀងធ្លាក់ខ្លាំងដល់តំបន់ជាច្រើន»។

គួរ​បញ្ជាក់​ថា ក្រុមហ៊ុនអាកាសចរណ៍តៃវ៉ាន់​បានលុបចោលជើងហោះហើរទាំងអស់​៕

The post ​ព្យុះទីហ្វុង Bavi ដ៏​មាន​ឥទ្ធិពល សំដៅទៅ​​​​ជប៉ុន​ និង តៃ​វ៉ាន់ ខណៈ​អាជ្ញាធរ ​​​ព្រមានពីគ្រោះថ្នាក់​​ appeared first on Kampuchea Thmey Daily.

តាមការផ្សាយរបស់ The Star នៅថ្ងៃចន្ទ ទី២២ ខែមិថុនា ឆ្នាំ២០២៦ ដែលដកស្រង់ប្រភពពី រដ្ឋបាលសេវាបរិយាកាស ភូមិសាស្ត្រ និងតារាសាស្ត្រហ្វីលីពីន ហៅកាត់ PAGASA, ព្យុះទីហ្វុងមួយនេះ ដែលមានឈ្មោះជាភាសាហ្វីលីពីន ថា Francisco នឹងបោកបក់ លើតំបន់ចំនួន៦ ដូចជា Batanes; Gonzaga និង Santa Ana ក្នុងទីក្រុង Cagayan និង Babuyan, Didicas និង Camiguin នៅកោះ Babuyan ភាគខាងកើត។

ព្យុះនេះ ត្រូវគេឃើញចុងក្រោយ ស្ថិតនៅចម្ងាយប្រមាណ ៧១៥គីឡូម៉ែត្រ ភាគខាងកើតទីក្រុង Tuguegarao ជាមួយកម្លាំងខ្យល់បក់ ១៥៥គីឡូម៉ែត្រ ក្នុងមួយម៉ោង និងខ្យល់កន្ត្រាក់ ១៩០គីឡូម៉ែត្រ ក្នុងមួយម៉ោង ប៉ុន្តែឥឡូវ វាកំពុងឆ្លងកាត់លើសមុទ្រហ្វីលីពីន ក្នុងល្បឿន ៣០គីឡូម៉ែត្រ ក្នុងមួយម៉ោង។

ដោយសារតែឥទ្ធិពល ដ៏ខ្លាំងរបស់វា ឈានដល់ការគំរាមកំហែង ដល់អាយុជីវិតមនុស្ស, ប៉ូលិសជាតិហ្វីលីពីន បានចេញការព្រមាន ឲ្យពលរដ្ឋប្រុងប្រយ័ត្ន និងត្រៀមខ្លួនជម្លៀសជានិច្ច ក្នុងករណីមានរឿងហេតុអាក្រក់ណាមួយ កើតឡើង។

តាមការព្យាករ ឥទ្ធិពល ព្យុះ Mekkhala ក៏នឹងបង្អុរទឹកភ្លៀងដ៏ខ្លាំង ក្នុងកម្រិត ៥០-១០០ មិល្លីម៉ែត្រ ផងដែរ។

សូមជម្រាបថា ប្រទេសហ្វីលីពីន ឧស្សាហ៍ជួបខ្យល់ព្យុះសាហាវណាស់ ដោយសារតែទីតាំងភូមិសាស្ត្រ ស្ថិតនៅតំបន់ខ្សែក្រវាត់ព្យុះប៉ាស៊ីហ្វិក (Pacific Typhoon Belt) ដែលជាតំបន់សកម្មបំផុត នៅលើពិភពលោកក្នុងការបង្កើតព្យុះសមុទ្រ។

ជាមធ្យម ក្នុងមួយឆ្នាំៗ ប្រទេសដែនកោះមួយនេះ ត្រូវរងការវាយប្រហារពីព្យុះទីហ្វុង ប្រហែល ២០ ដង ដោយបង្កការបំផ្លិចបំផ្លាញ និងបណ្តាលឲ្យមានមនុស្សស្លាប់-របួស៕

អត្ថបទ៖ សុខ សុវណ្ណ

The post ហ្វីលីពីន ចេញការព្រមាន និងប្រុងជើងការខ្ពស់ ត្រៀមទប់ទល់ជាមួយ ព្យុះកំណាច  appeared first on Kampuchea Thmey Daily.

​បើតាមព័ត៌មាន​ពីមជ្ឈមណ្ឌលព្រមានព្យុះទីហ្វុងរួមគ្នា (JTWC) ​គិតត្រឹម​ព្រឹកថ្ងៃអាទិត្យ​ កាលមែជី ដែលស្ថិតនៅជាព្យុះត្រូពិកនៅឡើយនោះ ចាប់ផ្ដើមមាន​រូបរាងជួរពពកវិលជុំវិញផ្ចិតនៃប្រព័ន្ធសម្ពាធទាប (Low Pressure) ជាបណ្ដើរៗជាមួយ​នឹង​កម្លាំងខ្យល់បក់បោកថេរ ៨៥ គីឡូម៉ែត្រ/ម៉ោង ហើយរំពឹងថានឹង​បង្កើនកម្លាំងក្លាយជាទីហ្វុងនៅពាក់កណ្ដាល​យប់​នេះ។

ការព្យាករផ្លូវដើររបស់ព្យុះត្រឹមព្រឹកថ្ងៃអាទិត្យ​បង្ហាញថា កាលមែជី កំពុលរំកិលខ្លួនឆ្ពោះទៅទិសខាងលិច ពោលគឺបំបុកប្រជុំកោះភាគកណ្ដាល​នៃប្រទេសហ្វីលីពីននៅថ្ងៃអង្គារ (៤ វិច្ឆិកា) មុនឆ្លងចូលមក​សមុទ្រចិនខាងត្បូង។ ជាមួយ​នឹង​លក្ខខណ្ឌសមស្រប រួមទាំងសីតុណ្ហភាពលើ​ផ្ទៃសមុទ្រខ្ពស់ដល់ ២៨ អង្សាសេ កាលមែជី នឹង​បង្កើនកម្លាំងក្លាយជាទីហ្វុងខ្លាំងក្លា (Very Strong Typhoon) ជាមួយនឹង​កម្លាំងខ្យល់បក់បោកថេរ ១៩៥ គីឡូម៉ែត្រ/ម៉ោង (ឬស្មើនឹង​សង្ឃរាកម្រិតធំទី៣នៅអាត្លង់ទិកខាងជើង) មុនវាយប្រហារភាគកណ្ដាលវៀតណាម(នៅថ្ងៃសុក្រ) ពោលគឺនៅក្បែរតំបន់ភាគឦសានរបស់កម្ពុជា ។

ការព្យាករដដែលអាច​មាន​ការប្រែប្រួលខ្លះៗ ដោយផ្អែកទៅលើលក្ខខណ្ឌបរិយាកាស​នាពេលអនាគត​ ប៉ុន្តែអ្វីដែលគេដឹងនោះគឺថា ភាពខ្លាំងនៃប្រព័ន្ធសម្ពាធខ្ពស់ (High Pressure) នឹងរុញប្រព័ន្ធសម្ពាធទាបរបស់ កាលមែជី មិនឱ្យបោលក្បាលទៅទិសខាងជើងឆ្ងាយ ជាហេតុធ្វើឱ្យ​ព្យុះនេះវាយប្រហារភាគកណ្ដាលវៀតណាម ដែលនៅក្បែរកម្ពុជា ហើយមាន​លទ្ធភាព​បន្តរុលទៅដល់ឡាវ ឬថៃ។

បើមែនទែនទៅ តំបន់នៃភាពមិនច្បាស់លាស់​នៃព្យុះ (Cone of Uncertainty) ដែល​សំដៅលើតំបន់ដែលគេមិនទាន់អាច​កំណត់ទិសដៅព្យុះបាន​នោះ ក៏រាប់បញ្ចូល​ទាំងតំបន់ភាគឦសានកម្ពុជាផងដែរ។ នេះបើតាមការព្យាកររបស់ JTWC ដដែល។ នោះមាន​ន័យថា កម្ពុជាអាច​ស្ថិតនៅលើគន្លង ឬនៅក្បែរផ្លូវដើរ(ស្នូល)នៃព្យុះ។

ឥឡូវនេះ អាជ្ញាធរហ្វីលីពីន ក៏ដូចជាវៀតណាម ថៃ កំពុងព្រមានឱ្យ​ប្រជាជនរបស់ខ្លួនត្រៀមខ្លួនសម្រាប់ការបក់បោករបស់ កាលមែជី ដែលនឹង​នាំមកនូវខ្យល់កន្រ្តាក់ខ្លាំងក្លា ភ្លៀងធ្លាក់ខ្លាំងជោគជាំ ជំនោរទឹកសមុទ្រដោយសារកម្លាំងខ្យល់ ទឹកជំនន់ភ្លាមៗ និងការរអិលបាក់ដីជាដើម។

ការបក់បោកនៃព្យុះថ្មីនេះ កើតឡើងខណៈវៀតណាម និងហ្វីលីពីន រងគ្រោះនូវព្យុះទីហ្វុង ឬត្រូពិកជាច្រើនរួចមកហើយនៅឆ្នាំនេះ។ ភាគកណ្ដាលវៀតណាម​ឯណោះវិញ ក៏កំពុងរងគ្រោះដោយទឹកជំនន់ធ្ងន់ធ្ងរជាប្រវត្តិសាស្រ្ត ដែល​មិនទាន់ស្រកទៅវិញ ដោយសារតែឥទ្ធិពលនៃព្យុះជាបន្តបន្ទាប់ និងមុសុងឦសាន ដែលធ្វើឱ្យ​ប្រព័ន្ធសម្ពាធទាបគ្របដណ្ដប់ទូទាំងតំបន់។

សម្រាប់កម្ពុជា មិនថាស្ថិត ឬមិនស្ថិតនៅក្នុងគន្លងរបស់ព្យុះ​ កាលមែជី នោះទេ គេអាចនឹងឃើញភ្លៀងធ្លាក់ខ្លាំង លាយឡំនឹង​ខ្យល់កន្រ្តាក់ និងផ្គររន្ទះ នៅពេលវាបក់បោកមកក្បែរ ពោលគឺនៅសមុទ្រចិនខាងត្បូង៕

The post ព្យុះថ្មីកកើត និងអាច​ក្លាយជាសង្ឃរាកម្រិតខ្លាំង មុនវាយប្រហារវៀតណាម ក្បែរកម្ពុជា appeared first on Kampuchea Thmey Daily.

ការព្យាករណ៍ចុងក្រោយពី JMA បានគូសបញ្ចាក់ថា ខ្យល់ខ្លាំងបំផុតមានកម្លាំង ១៨០គីឡូម៉ែត្រក្នុងមួយម៉ោង ហើយមានខ្យល់បក់រហូតដល់ ២៥០គីឡូម៉ែត្រក្នុងមួយម៉ោង ដែលជាកម្រិតព្យុះទីហ្វុងខ្លាំង គ្រប់គ្រាន់ដើម្បីបំផ្លាញដើមឈើធំៗ បំផ្ទុះដំបូល អគារ និងបំផ្លាញរចនាសម្ព័ន្ធទន់ខ្សោយ។ ចំណែកកោះ Izu ត្រូវបានគេរំពឹងថា នឹងទទួលភ្លៀងរហូតដល់ ១៨០ មីលីម៉ែត្រក្នុងរយៈពេល ២៤ ម៉ោងរហូតដល់ព្រឹកថ្ងៃសុក្រតែម្ដង។

ទីភ្នាក់ងារ​ឧតុនិយម​ជប៉ុនបាន​និយាយ​ទៀតថា ​ប្រភេទ​ភ្លៀង​ធ្លាក់​ខ្លាំង​ដែល​មនុស្ស​មិន​ធ្លាប់​ជួប​ប្រទះ ​នឹង​គ្រោះថ្នាក់​ដល់​អាយុជីវិតរបស់មនុស្ស។ ដូច្នេះ JMA បានចេញការណែនាំឲ្យប្រជាជននៅតំបន់ Izu, Kanto, Hachijo និង Tokai ត្រូវមានការប្រុងប្រយ័ត្ន ដើម្បីការពារខ្លួន។ ទីភ្នាក់ងារឧតុនិយមរបស់ប្រទេសជប៉ុន ក៏បានចេញការព្រមានចំពោះខ្យល់បក់ខ្លាំង និងរលកខ្ពស់នៅក្នុងទីក្រុង និងភូមិចំនួនប្រាំមួយផ្សេងទៀតដែរ។

ទីភ្នាក់ងារនេះបាននិយាយថា គិតត្រឹមម៉ោង ៨ព្រឹកថ្ងៃព្រហស្បតិ៍ ព្យុះទីហ្វុងបានស្ថិតនៅលើផ្ទៃទឹកក្បែរកោះ Hachijojima ដោយផ្លាស់ទីទៅភាគឦសានក្នុងល្បឿន ៣០ គីឡូម៉ែត្រក្នុងមួយម៉ោង។ វាត្រូវបានព្យាករណ៍ថា នឹងផ្លាស់ទីទៅទិសខាងកើត។

សូមជម្រាបជូនថា ព្យុះទីហ្វុង Ha Long គឺជាព្យុះដ៏ខ្លាំងបំផុតមួយដែលកំពុងខិតជិតប្រទេសជប៉ុនក្នុងឆ្នាំ ២០២៥ ជាមួយនឹងរចនាសម្ព័ន្ធពេញលេញ និងថាមពលដ៏ធំបំផុត។ អ្នកជំនាញខាងឧតុនិយមព្រមានថា ទោះបីជាវាមិនបានធ្វើប៉ះដីគោកដោយផ្ទាល់ក៏ដោយ ឥទ្ធិពលនៃព្យុះនេះអាចបណ្តាលឲ្យខូចខាតយ៉ាងធ្ងន់ធ្ងរ ដល់តំបន់ឆ្នេរនៃភាគកណ្តាល និងភាគខាងកើតប្រទេសជប៉ុន៕

អត្ថបទ៖ សាង ស្រីល័ក្ខ

ចុចអាន៖ព្យុះពីរដើរស្របផ្លូវគ្នានឹងជះឥទ្ធិពលលើកម្ពុជា

The post ជប៉ុន ប្រកាសឲ្យប្រជាជនជម្លៀសខ្លួន​បន្ទាន់​ ខណៈព្យុះទីហ្វុង Ha Long មានកម្លាំងខ្លាំងមហិមា appeared first on Kampuchea Thmey Daily.

កាសែត Vietnam Plus បាន​រាយការណ៍ថា ក្រុមហ៊ុនអាកាសចរណ៍ Vietnam Airlines Group ដែលរួមបញ្ចូលទាំង​ក្រុមហ៊ុន Vietnam Airlines, Pacific Airlines និង Vasco បានប្រកាសពី​ការលុបចោលជើងហោះហើរបណ្ដោះអាសន្នសម្រាប់ថ្ងៃទី ២១ ខែកក្កដា នេះ​ ដើម្បីធានាសុវត្ថិភាពសម្រាប់អ្នកដំណើរ និង​បុគ្គលិកយន្តហោះ​។ ការលុបចោលសកម្មភាព​អាកាសចរណ៍នេះ ប៉ះពាល់ជាទូទៅ​ទាំងសម្រាប់ជើង​ហោះ​ហើរក្នុងស្រុក និងអន្តរជាតិ ពោលគឺសម្រាប់ជើង​ហោះហើរ ដែលពាក់ព័ន្ធ ឬនៅក្នុងតំបន់ភាគខាងជើងវៀតណាម​ ដូចជាក្រុងហាណូយ និង​កំពង់ផែ​​ហៃហ្វុង ជាដើម​។

Vietnam Airlines Group បាន​និយាយថា ប្រតិបត្តិការហោះហើរ អាច​នឹង​ដំណើរការឡើងវិញ ដោយអាស្រ័យទៅលើស្ថានភាព​របស់ព្យុះវីពផា ខណៈអាជ្ញាធររំពឹងពីផលប៉ះពាល់ផ្នែកអាកាសចរណ៍ដល់ថ្ងៃស្អែក ២២ កក្កដា បន្តទៀត​។

គួរគូសបញ្ជាក់ថា ព្យុះវីពផា បាន​វិវត្តក្លាយជាព្យុះទីហ្វុងកាលពីព្រឹកថ្ងៃអាទិត្យ ជាមួយ​នឹង​កម្លាំងខ្យល់កន្រ្តាក់ ១២០ គីឡូម៉ែត្រ/ម៉ោង ដោយ​វាយប្រហារនៅភាគខាងត្បូងនៃប្រទេសចិន រួមទាំងក្រុង​ហុងកុង ក្រុងម៉ាកាវ ខេត្តក្វាងទុង រួចបន្តបក់បោកមកភាគខាងត្បូងខេត្តក្វាងស៊ី ហើយរំកិលខ្លួន​ចូលក្នុងឈូងសមុទ្រតុងកឹងព្រឹកថ្ងៃចន្ទនេះ ដោយ​រំពឹង​ថានឹង​ឆ្ពោះទៅភាគខាងជើងនៃវៀតណាម​បន្ទាប់ ក្នុងកម្រិតជាព្យុះត្រូពិក​។

យ៉ាងណាមិញ វិសាលភាព និងឥទ្ធិពល​នៃព្យុះ​វីពផា ដែលជាព្យុះទី៦ បាន​គ្រប់ដណ្ដប់ទូទាំងតំបន់រួចហើយ រួមទាំង​កោះហៃណាន់ វៀតណាម ​និង​បណ្ដាប្រទេសអាស៊ីអាគ្នេយ៍ដីគោក​ផ្សេង​ៗ​ ចាប់តាំងពីម្សិលមិញ មកទល់ថ្ងៃនេះ និងបន្តទៅមុខ​ទៀត ដោយ​បង្កជាខ្យល់កន្រ្តាក់បក់បោក និង​ភ្លៀងធ្លាក់ខ្លាំងដ៏ជោគជាំ​ ដែល​បណ្ដាលជាការព្រមាន​ពីអាជ្ញាធរក្នុងតំបន់​​ពីជំនោរទឹក​សមុទ្រ ទឹកជំនន់ និងការរអិលបាក់ដីជាដើម​។

មែនទែនទៀត ព្យុះវីពផាមិនតែបង្កការលុបជើងហោះហើរនៅវៀតណាមប៉ុណ្ណោះទេ អាជ្ញាធរ និងក្រុមហ៊ុនអាកាសចរណ៍នៅប្រទេសផ្សេងៗ រួមមាន​ទាំងថៃ ក៏បាន​ប្រកាសលុបចោលជើងហោះហើរបណ្ដោះអាសន្នទៅកាន់ ឬមកពីតំបន់ប៉ះពាល់នៅចិន​។ តួយ៉ាង ក្រុមហ៊ុនអាកាសចរណ៍ Thai Airways International ​បានប្រកាសលុបចោលជើងហោះហើរជាច្រើនទៅ និងមកពីហុងកុង និងខេត្តក្វាងចូវ នៅថ្ងៃទី ២០-២១ ខែកក្កដា ឆ្នាំ ២០២៥។

នៅឯក្រុងហុងកុងឯណោះវិញ អាជ្ញាធរ​បាន​ចេញការព្រមានកម្រិតខ្ពស់បំផុត ដោយសារតែព្យុះវីពផា មុនដកចេញការព្រមានទាំងអស់នៅព្រឹកថ្ងៃចន្ទនេះ​ ក្រោយពេលវីពផារំកិលខ្លួន​ផុត។ ដោយសារឥទ្ធិពលនៃព្យុះ អាកាសយានដ្ឋានអន្តរជាតិហុងកុងកាលពីថ្ងៃអាទិត្យ បាន​លុបចោលជើងហើរប្រមាណ ៥០០ ជើង ដែលប៉ះពាល់ដល់អ្នកដំណើរប្រហែល ១០០ ០០០ នាក់ ហើយកំពុង​បែងចែក​ប្រតិបត្តិការ​​ជើងហោះហើរឡើងវិញ​ ​ចំពេល​អ្នកដំណើរសម្រុកទៅព្រលាន​យន្តហោះ នាព្រឹកថ្ងៃចន្ទនេះ។ នេះបើតាមការចុះផ្សាយរបស់កាសែត South China Morning Post។ ​

អាកាសយានដ្ឋានអន្តរជាតិម៉ាកាវឯណោះវិញ ក៏បានលុបចោល​ជើងហោះហើរជិត ២០០ ​ជើងផងដែរ។ នេះ​បើតាមការចុះផ្សាយរបស់កាសែតញូវយ៉កថែមស៍ ខណៈអាជ្ញាធរ​នៅបណ្ដាទីក្រុងភាគខាងត្បូងប្រទេសចិនផ្សេងទៀត​​ បានបិទកន្លែងធ្វើការ និង​សាលារៀន​ ​ផ្អាក​ប្រតិបត្តិការកំពង់ផែ​ ​និងផ្លូវរថភ្លើង​ ​ក៏ដោយ​ជាលុបចោល​ហោះហើរ​ជាដើម​៕

​

The post វៀតណាម និងចិន​​​លុបចោលជើងហោះហើរ ខណៈព្យុះទីហ្វុង​វីពផា បន្តបក់បោក appeared first on Kampuchea Thmey Daily.

បរិមាណទឹកភ្លៀងសរុបបានកើនឡើងដល់​កម្ពស់​ជាង ១២០០ មីលីម៉ែត្រនៅតាមស្ថានីយមួយចំនួន ដោយទីក្រុង Bach Ma ក្នុងខេត្ត Hue បានកត់ត្រាទឹកភ្លៀងខ្ពស់បំផុតក្នុងខែមិថុនានេះមិនធ្លាប់មាន។

ក្នុងរយៈពេលត្រឹមតែ ៦ម៉ោងប៉ុណ្ណោះ តំបន់ចំនួន ៣២ ឃើញមានភ្លៀងធ្លាក់ជាង ២០០ មីលីម៉ែត្រ ដែលបណ្តាលឱ្យទឹកទន្លេកើនឡើងដល់កម្រិតប្រកាសអាសន្ន។ ក្នុងនោះទន្លេ Thach, Han និង Bo បានឡើងលើសពីការប្រកាសអាសន្នទឹកជំនន់​ជា​ប្រវត្តិសាស្ត្រ ដែលជាកម្រិតទឹកជំនន់ខ្ពស់បំផុតក្នុងខែមិថុនាក្នុងរយៈពេល ៣០ឆ្នាំមិនធ្លាប់មាន។

ចន្លោះថ្ងៃទី ១១ ដល់ថ្ងៃទី ១៤ខែមិថុនា ទឹកជំនន់ដំបូងនិងខ្លាំងនេះបាននាំឱ្យមានការខាតបង់យ៉ាងធ្ងន់ធ្ងរដោយមនុស្ស ៩ នាក់បានស្លាប់ ដំណាំជាង ៦ម៉ឺន​ហិកតាត្រូវបានលិចទឹក ហើយវារីវប្បកម្មចំនួន ២៣០០ ហិកតា ត្រូវបានបំផ្លាញ។ ខេត្ត Quang Binh, Hue, និង Quang Trị រងផលប៉ះពាល់ខ្លាំងជាងគេ។

ខ្យល់ព្យុះនេះក៏បានបំផ្លាញផ្ទះសម្បែង និងហេដ្ឋារចនាសម្ព័ន្ធផងដែរ ដោយផ្ទះចំនួន ៩៤ខ្នងត្រូវបានរងផលប៉ះពាល់ និងបំផ្លាញទូកនេសាទចំនួន ៨ គ្រឿង។ អ្នកជំនាញព្រមានថាព្យុះ Wutip កំពុងបង្ហាញពីនិន្នាការកើនឡើងនៃបញ្ហាអាកាស​ធាតុដែលមិនអាចទាយទុកជាមុនបាន និងកាន់តែធ្ងន់ធ្ងរ៕

អត្ថបទ៖ ប៊ុន សុភាព

The post ព្យុះ Wutip នាំ​ទឹកភ្លៀង និងទឹកជំនន់​ដល់​កម្រិត​​ខ្ពស់​​ជាប្រវត្តិសាស្ត្រនៅភាគកណ្តាលវៀតណាម appeared first on Kampuchea Thmey Daily.