ព្យុះ Wutip នាំ​ទឹកភ្លៀង និងទឹកជំនន់​ដល់​កម្រិត​​ខ្ពស់​​ជាប្រវត្តិសាស្ត្រនៅភាគកណ្តាលវៀតណាម

យោងតាមការចេញផ្សាយរបស់កាសែត Viet Nam News កាលពីថ្ងៃទី១៧ខែមិថុនា ព្យុះ Wutip ដែលជាព្យុះដំបូងគេក្នុងរដូវកាលនេះ បានបង្កើតប្រវត្តិសាស្ត្រជាព្យុះទីហ្វុងដំបូងដែលបានបង្កឲ្យមានជំនន់ទឹកភ្លៀងបំបែកកំណត់ត្រា និងទឹកជំនន់យ៉ាងធ្ងន់ធ្ងរនៅប្រទេសវៀតណាម។

បរិមាណទឹកភ្លៀងសរុបបានកើនឡើងដល់​កម្ពស់​ជាង ១២០០ មីលីម៉ែត្រនៅតាមស្ថានីយមួយចំនួន ដោយទីក្រុង Bach Ma ក្នុងខេត្ត Hue បានកត់ត្រាទឹកភ្លៀងខ្ពស់បំផុតក្នុងខែមិថុនានេះមិនធ្លាប់មាន។

ក្នុងរយៈពេលត្រឹមតែ ៦ម៉ោងប៉ុណ្ណោះ តំបន់ចំនួន ៣២ ឃើញមានភ្លៀងធ្លាក់ជាង ២០០ មីលីម៉ែត្រ ដែលបណ្តាលឱ្យទឹកទន្លេកើនឡើងដល់កម្រិតប្រកាសអាសន្ន។ ក្នុងនោះទន្លេ Thach, Han និង Bo បានឡើងលើសពីការប្រកាសអាសន្នទឹកជំនន់​ជា​ប្រវត្តិសាស្ត្រ ដែលជាកម្រិតទឹកជំនន់ខ្ពស់បំផុតក្នុងខែមិថុនាក្នុងរយៈពេល ៣០ឆ្នាំមិនធ្លាប់មាន។

ចន្លោះថ្ងៃទី ១១ ដល់ថ្ងៃទី ១៤ខែមិថុនា ទឹកជំនន់ដំបូងនិងខ្លាំងនេះបាននាំឱ្យមានការខាតបង់យ៉ាងធ្ងន់ធ្ងរដោយមនុស្ស ៩ នាក់បានស្លាប់ ដំណាំជាង ៦ម៉ឺន​ហិកតាត្រូវបានលិចទឹក ហើយវារីវប្បកម្មចំនួន ២៣០០ ហិកតា ត្រូវបានបំផ្លាញ។ ខេត្ត Quang Binh, Hue, និង Quang Trị រងផលប៉ះពាល់ខ្លាំងជាងគេ។

ខ្យល់ព្យុះនេះក៏បានបំផ្លាញផ្ទះសម្បែង និងហេដ្ឋារចនាសម្ព័ន្ធផងដែរ ដោយផ្ទះចំនួន ៩៤ខ្នងត្រូវបានរងផលប៉ះពាល់ និងបំផ្លាញទូកនេសាទចំនួន ៨ គ្រឿង។ អ្នកជំនាញព្រមានថាព្យុះ Wutip កំពុងបង្ហាញពីនិន្នាការកើនឡើងនៃបញ្ហាអាកាស​ធាតុដែលមិនអាចទាយទុកជាមុនបាន និងកាន់តែធ្ងន់ធ្ងរ៕

អត្ថបទ៖ ប៊ុន សុភាព