ជប៉ុន ប្រកាសឲ្យប្រជាជនជម្លៀសខ្លួន​បន្ទាន់​ ខណៈព្យុះទីហ្វុង Ha Long មានកម្លាំងខ្លាំងមហិមា

យោងតាម NHK បានដកស្រង់ចេញពីទីភ្នាក់ងារឧតុនិយមជប៉ុន (JMA) ដោយចេញការព្រមានជាបន្ទាន់មួយ ខណៈដែលព្យុះទីហ្វុង Ha Long (ព្យុះទី ២២ នៅប្រទេសជប៉ុន) បានបោកបក់មកភាគខាងត្បូងនៃប្រទេស ជាមួយនឹងកម្លាំងខ្យល់បក់ខ្លាំងដែលអាចបំផ្លាញផ្ទះសម្បែង។ ជាពិសេស កោះ Izu នឹង​ក្លាយ​ជា​តំបន់​ដែល​រងគ្រោះ​ដោយ​ផ្ទាល់​បំផុត​ នៅ​ព្រឹក ​ថ្ងៃ​ទី​៩ ខែ​តុលានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្យាករណ៍ចុងក្រោយពី JMA បានគូសបញ្ចាក់ថា ខ្យល់ខ្លាំងបំផុតមានកម្លាំង ១៨០គីឡូម៉ែត្រក្នុងមួយម៉ោង ហើយមានខ្យល់បក់រហូតដល់ ២៥០គីឡូម៉ែត្រក្នុងមួយម៉ោង ដែលជាកម្រិតព្យុះទីហ្វុងខ្លាំង គ្រប់គ្រាន់ដើម្បីបំផ្លាញដើមឈើធំៗ បំផ្ទុះដំបូល អគារ និងបំផ្លាញរចនាសម្ព័ន្ធទន់ខ្សោយ។ ចំណែកកោះ Izu ត្រូវបានគេរំពឹងថា នឹងទទួលភ្លៀងរហូតដល់ ១៨០ មីលីម៉ែត្រក្នុងរយៈពេល ២៤ ម៉ោងរហូតដល់ព្រឹកថ្ងៃសុក្រតែម្ដង។

ទីភ្នាក់ងារ​ឧតុនិយម​ជប៉ុនបាន​និយាយ​ទៀតថា ​ប្រភេទ​ភ្លៀង​ធ្លាក់​ខ្លាំង​ដែល​មនុស្ស​មិន​ធ្លាប់​ជួប​ប្រទះ ​នឹង​គ្រោះថ្នាក់​ដល់​អាយុជីវិតរបស់មនុស្ស។ ដូច្នេះ JMA បានចេញការណែនាំឲ្យប្រជាជននៅតំបន់ Izu, Kanto, Hachijo និង Tokai ត្រូវមានការប្រុងប្រយ័ត្ន ដើម្បីការពារខ្លួន។ ទីភ្នាក់ងារឧតុនិយមរបស់ប្រទេសជប៉ុន ក៏បានចេញការព្រមានចំពោះខ្យល់បក់ខ្លាំង និងរលកខ្ពស់នៅក្នុងទីក្រុង និងភូមិចំនួនប្រាំមួយផ្សេងទៀតដែរ។

ទីភ្នាក់ងារនេះបាននិយាយថា គិតត្រឹមម៉ោង ៨ព្រឹកថ្ងៃព្រហស្បតិ៍ ព្យុះទីហ្វុងបានស្ថិតនៅលើផ្ទៃទឹកក្បែរកោះ Hachijojima ដោយផ្លាស់ទីទៅភាគឦសានក្នុងល្បឿន ៣០ គីឡូម៉ែត្រក្នុងមួយម៉ោង។ វាត្រូវបានព្យាករណ៍ថា នឹងផ្លាស់ទីទៅទិសខាងកើត។

សូមជម្រាបជូនថា ព្យុះទីហ្វុង Ha Long គឺជាព្យុះដ៏ខ្លាំងបំផុតមួយដែលកំពុងខិតជិតប្រទេសជប៉ុនក្នុងឆ្នាំ ២០២៥ ជាមួយនឹងរចនាសម្ព័ន្ធពេញលេញ និងថាមពលដ៏ធំបំផុត។ អ្នកជំនាញខាងឧតុនិយមព្រមានថា ទោះបីជាវាមិនបានធ្វើប៉ះដីគោកដោយផ្ទាល់ក៏ដោយ ឥទ្ធិពលនៃព្យុះនេះអាចបណ្តាលឲ្យខូចខាតយ៉ាងធ្ងន់ធ្ងរ ដល់តំបន់ឆ្នេរនៃភាគកណ្តាល និងភាគខាងកើតប្រទេសជប៉ុន៕

អត្ថបទ៖ សាង ស្រីល័ក្ខ

ចុចអាន៖ព្យុះពីរដើរស្របផ្លូវគ្នានឹងជះឥទ្ធិពលលើកម្ពុជា