ព្រំ សំណាង Archives - Kampuchea Thmey Daily

ផ្ទុះការសរសើរខ្លាំងចំពោះការជួយសង្គ្រោះរបស់លោកគ្រូ ឃឹម សុជាតិ លើ ព្រំ សំណាង

Sina Noun — Mon, 03 Mar 2025 07:28:20 +0000

ការភ្ញាក់ផ្អើលជាខ្លាំងនៅពេលកីឡាករទម្ងន់ធ្ងន់របស់កម្ពុជា ព្រំ សំណាង សន្លប់ធំក្រោមផ្លែកែងកីឡាករ អាបូលហ្វេហ្សល ដែលជាជនជាតិអ៉ីរ៉ង់ កាលយប់ថ្ងៃទី២ ខែមីនា ឆ្នាំ២០២៥ ប៉ុន្តែមានកោតសរសើរផងដែរចំពោះភាពរហ័សរហួនរបស់លោកគ្រូ ឃឹម សុជាតិ ដែលបានស្ទុះទៅជួយទ្រកីឡាករទាន់ពេលវេលាពេលដួលសន្លប់។

ជារឿងកម្រមួយដែលមិនសូវមានអ្នកណាវាយកីឡាករ ព្រំ សំណាង រហូតដល់សន្លប់ធំបែបនេះទេ ព្រោះកន្លងទៅបើទោះជាប៉ះអ្នកខ្លាំងប៉ុនណា រួមទាំង ដាវ លីឌុច ក៏មិនអាចផ្ដួលជើងខ្លាំងគុនខ្មែររូបនេះឈានដល់សន្លប់ធំនោះឡើយ។ អ្នកគាំទ្រដែលបានទស្សនាលើការ Live និងទស្សនាវីដេអូដែល ព្រំ សំណាង ប្រកួតនោះគឺបានសរសើរលោកគ្រូ ឃឹម សុជាតិ ជាខ្លាំង បន្ទាប់ពីលោកធ្វើចលនាបានលឿនស្ទុះទៅទ្រកីឡាករមិនឲ្យដួលបោកលើកម្រាល។ មួយវិញទៀតក៏បានសរសើរការសម្រេចចិត្តបានលឿនគ្រវីដៃបញ្ចប់ការប្រកួតភ្លាមៗ និងផ្ដល់សញ្ញាដល់គ្រូពេទ្យឲ្យឡើងមកសង្គ្រោះបឋមដល់កីឡាករ ព្រំ សំណាង នៅពេលនោះ។

យ៉ាងណាការសរសើរទៅដល់លោកគ្រូ ឃឹម សុជាតិ នេះក៏មិនមែនជាលើកទី១ ដែរសម្រាប់លោកគ្រូ ពីព្រោះកន្លងទៅរាល់ការប្រកួតធំៗគឺលោកតែងតែបំពេញភារកិច្ចយ៉ាងម៉ត់ចត់ល្អ ពិសេសរក្សាភាពរហ័សរហួននៅពេលឡើងចាប់ការប្រកួតតែម្ដង ការចាប់បំបែក ការរាប់កីឡាករ បញ្ឈប់ និងការសង្គ្រោះជាដើម។

រកីឡាករ ព្រំ សំណាង

ថ្លែងក្នុងកិច្ចសម្ភាសមួយក្រោយបញ្ចប់ការប្រកួត លោក ឃឹម សុជាតិ លើកឡើងថា ប្រសិនបើបណ្ដោយឲ្យកីឡាករ ព្រំ សំណាង ដួលបោកក្បាល និងកម្រាល ភ្លាមៗនៅពេលនោះអាចនឹងមានគ្រោះថ្នាក់ធ្ងន់ធ្ងរដល់ទៅ ៧០ ឬ ៨០%។ ព្រោះ ព្រំ សំណាង ចូលមួយកែងនោះគឺពេញ និងសន្លប់ឈរទៅហើយ បើទោះជាបញ្ចប់ការប្រកួតហើយក្ដី ស្មារតីនៅមិនទាន់ល្អប្រសើរវិញ។ ដូច្នេះបើដួលបោកក្បាល និងកម្រាលទៀតនោះអាចនឹងមានការប៉ះពាល់ខ្លាំង។ លោកសប្បាយចិត្តដែរនៅពេលនោះបានជួយសង្គ្រោះ ព្រំ សំណាង បានមិនឲ្យមានបញ្ហាធ្ងន់ធ្ងរ។

រូបភាពលើផេកលោក ឃឹម សុជាតិ-Official

បញ្ជាក់ដែរថា កាលពយប់ថ្ងៃទី២ ខែមីនា ឆ្នាំ២០២៥ កីឡាករ ព្រំ សំណាង ចាញ់ដោយសន្លប់ធំក្រោយចូលកែងបករបស់អ្នកប្រដាល់ជនជាតិអ៉ីរ៉ង់ អាបូលហ្វេហ្សល នៅទឹកទី២ លើសង្វៀនប្រកួតរបស់ស្ថានីយទូរទស្សន៍ប៉ុស្តិ៍លេខ៥ ដែលរៀបចំឡើងនៅក្នុងផ្សារ ជីប ម៉ុង ២៧១៕

អត្ថបទ៖ នួន ស៊ីណា

The post ផ្ទុះការសរសើរខ្លាំងចំពោះការជួយសង្គ្រោះរបស់លោកគ្រូ ឃឹម សុជាតិ លើ ព្រំ សំណាង appeared first on Kampuchea Thmey Daily.

ឡុង សុវណ្ណឌឿន ប្រាប់ថា រីករាយប៉ះ ព្រុំ សំណាង វគ្គពាក់កណ្តាលផ្តាច់ព្រ័ត្រ ថ្ងៃនេះ

chean virakbot — Tue, 05 Nov 2024 02:20:43 +0000

កីឡាករប្រដាល់គុនខ្មែរ ឡុង សុវណ្ឌឌឿន ត្រូវប៉ះជើងខ្លាំង ព្រុំ សំណាង វគ្គពាក់កណ្តាលផ្តាច់ព្រ័ត្រទម្ងន់៨១គីឡូក្រាម ក្នុងព្រឹត្តិការណ៍កីឡាជាតិ ឆ្នាំ២០២៤ ដើម្បីស្វែងរកឱកាសឡើងទៅកាន់វគ្គផ្តាច់ព្រ័ត្រ។

ក្នុងបទសម្ភាសជាមួយសារព័ត៌មាន«កម្ពុជាថ្មី» នៅពេលរង់ចាំលើកដៃ ក្រោយដឹងថា ដៃគូបានបោះបង់ចោលការប្រកួត ឡុង សុវណ្ណឌឿន បាននិយាយថា រូបគេសប្បាយរីករាយណាស់ដែលបានជួប ព្រុំ សំណាង ជាថ្មី។ ទោះបីជាលទ្ធផលឈ្នះ ឬចាញ់ ក៏លោកសប្បាយរីករាយក្នុងការប្រកួត ពីព្រោះក្នុងនាមជាកីឡាករត្រូវចូលរួមប្រកួត និងបំពេញកាតព្វកិច្ចក្នុងការចូលរួមប្រកួតព្រឹត្តិការណ៍កីឡាថ្នាក់ជាតិ។

ឡុង សុវណ្ណឌឿន បានប្រាប់ថា លោកបានជួប ព្រុំ សំណាង ៣លើកហើយ ប៉ុន្តែមិនដែលឈ្នះឡើយ។ សម្រាប់ការជួបគ្នាលើកនេះគួរឲ្យស្តាយណាស់ដែលមិនបានជួបគ្នានៅវគ្គផ្តាច់ព្រ័ត្រ។ កីឡាករណាឈ្នះនឹងឡើងទៅកាន់វគ្គផ្តាច់ព្រ័ត្រ ខណៈកីឡាករណាចាញ់ទទួលបានត្រឹមមេដាយសំរិទ្ធ។

នៅពេលសួរថា តើអ្វីជាចំណុចខ្លាំងរបស់ ព្រុំ សំណាង? ឡុង សុវណ្ណឌឿន បានឆ្លើយថា ព្រុំ សំណាង មានកាយសម្បទាធំខ្ពស់ ដៃជើងវែង ដូច្នេះពិបាកវ៉ៃឲ្យត្រូវគាត់ណាស់។ ម្យ៉ាងវិញទៀត ថ្វីបើអាយុប្រហាក់ប្រហែលគ្នាមែន ប៉ុន្តែដៃគូម្នាក់នេះនៅរក្សាភាពខ្លាំង រឹងមាំ និងស៊ូធន់បានល្អ ពីព្រោះគាត់តែងតែបានប្រកួតកម្រិតខ្ពស់រហូតក្នុងរយៈពេលប៉ុន្មានឆ្នាំចុងក្រោយដែលធ្វើឲ្យគាត់ក្លាយជាកីឡាករល្បីលំដាប់ជួរមុខ។

ការប្រកួតវគ្គជម្រុះកាលពីថ្ងៃទី៤ ខែតុលា ឡុង សុវណ្ណឌឿន ទទួលបានជ័យជម្នះដោយស្វ័យប្រវត្តិ បន្ទាប់ពីដៃគូកីឡាករ ទូន វិទូ បានបោះបង់ចោលការប្រកួត។ ជាមួយគ្នានេះ ព្រុំ សំណាង បានយកឈ្នះកីឡាករ កួយ រាជ ក្នុងទឹកទី១ ដូច្នេះអ្នកទាំងពីរត្រូវជួបគ្នាក្នុងវគ្គពាក់កណ្តាលផ្តាច់ព្រ័ត្រ៕

អត្ថបទ៖ វីរបុត្រ

The post ឡុង សុវណ្ណឌឿន ប្រាប់ថា រីករាយប៉ះ ព្រុំ សំណាង វគ្គពាក់កណ្តាលផ្តាច់ព្រ័ត្រ ថ្ងៃនេះ appeared first on Kampuchea Thmey Daily.

ឈ្នះនៅអង់គ្លេស កីឡាករ Bartek Paszczyk សរសើរស្មារតីតស៊ូរបស់ ព្រុំ សំណាង

chean virakbot — Fri, 25 Oct 2024 04:21:44 +0000

កីឡាករប្រដាល់ប៉ូឡូញ Bartek Paszczyk បានកោតសរសើរពីភាពតស៊ូរបស់កីឡាករកម្ពុជា ព្រុំ សំណាង បន្ទាប់ពីពួកគាត់បានប្រកួតគ្នាកាលពីថ្ងៃទី១៩ ខែតុលា ឆ្នាំ២០២៤ នៅប្រទេសអង់គ្លេស។

ការពិតនៅលើសង្វៀនបានបង្ហាញថា Bartek Paszczyk បានវាយឲ្យលោកអាជ្ញាកណ្តាលរាប់ ព្រុំ សំណាង ៨ដល់ទៅពីរដង ប៉ុន្តែអ្នកលេងគុនខ្មែរមិនបោះបង់ចោលការប្រកួតឡើយ។ កីឡាករកម្ពុជាបានតស៊ូ និងវាយបកវិញរហូតត្រូវបានអាជ្ញាកណ្តាលរាប់កីឡាករប៉ូឡូញ៨ម្តងវិញ ប៉ុន្តែអ្នកទាំងពីរបានតស៊ូគ្នារហូតចប់ទាំង៣ទឹក។ ចៅក្រុមបានកាត់សេចក្តីឲ្យ Paszczyk ឈ្នះ ព្រុំ សំណាង ដោយពិន្ទុ។

ឆ្លើយតបនឹងសំណួររបស់សារព័ត៌មាន«កម្ពុជាថ្មី» កីឡាករ Bartek Paszczyk បានសរសើការតស៊ូរបស់កីឡាករកម្ពុជាគឺជាអ្នកចម្បាំងពិតប្រាកដ។ កីឡាករបានសរសេរសារឆ្លើយតបថា ៖«សួស្តីកម្ពុជាពីប្រទេសប៉ូឡូញ។ ខ្ញុំមានពាក្យខ្លះចង់និយាយពីដៃគូរបស់ខ្ញុំកាលពីថ្ងៃសៅរ៍ដែលយើងបានប្រកួត៣ទឹក។ ព្រុំ (សំណាង) ជាកីឡាករដ៏រឹងមាំម្នាក់ ប៉ុន្តែខ្ញុំចង់ក្លាយជាកីឡាករដ៏ឆ្នើមក្នុងពិភពលោក នោះហើយជាអ្វីដែលខ្ញុំបានបង្ហាញជាមួយ ព្រុំ (សំណាង)។ គាត់ជាអ្នកចម្បាំងដែលតស៊ូ ធន់រឹងមាំ ខ្ញុំពិតជាគោរពគាត់»។

សូមបញ្ជាក់ថា កីឡាករគុនខ្មែរ៣នាក់គឺ ព្រុំ សំណាង, រឿង សុភ័ណ្ឌ និង ថៃ រ៉េត បានទៅប្រកួតនៅប្រទេសអង់គ្លេសជាលើកដំបូង ប៉ុន្តែបានចាញ់ពិន្ទុទាំង៣នាក់។ យ៉ាងណា ការប្រកួតរបស់កីឡាករកម្ពុជាហាក់មិនចាញ់ប្រៀបដៃគូនៅតំបន់អឺរ៉ុបខ្លាំងឡើយ។ ផ្ទុយទៅវិញ កីឡាករកម្ពុជាបានក្លាយជាដៃគូប្រយុទ្ធដ៏លំបាកផងដែរ៕

អត្ថបទ៖ វីរបុត្រ

The post ឈ្នះនៅអង់គ្លេស កីឡាករ Bartek Paszczyk សរសើរស្មារតីតស៊ូរបស់ ព្រុំ សំណាង appeared first on Kampuchea Thmey Daily.

ព្រុំ សំណាង, រឿង សុភ័ណ្ឌ និង ថៃ រ៉េត ដឹកដៃគ្នាទៅប្រកួតនៅអង់គ្លេស

chean virakbot — Wed, 09 Oct 2024 02:45:05 +0000

អ្នកលេងគុនខ្មែរ៣រូបទទួលបានទិដ្ឋាការរួចរាល់ហើយដើម្បីធ្វើដំណើរទៅប្រកួតនៅប្រទេសអង់គ្លេសនៅថ្ងៃទី១៩ ខែតុលា ឆ្នាំ២០២៤ នៅសង្វៀន Might Night London ក្នុងទីក្រុងឡុងដ៍។

កីឡាករ ព្រុំ សំណាង ត្រូវប្រកួតជាមួយកីឡាករប៉ូឡូញ Barket Paszcyk ខណៈអ្នកលេងកណ្តាប់ដៃភ្លើងជើងរន្ទះ រឿង សុភ័ណ្ឌ ប៉ះជើងខ្លាំងអង់គ្លេស Luke Whelan ហើយកីឡាករ ថៃ រ៉េត ក៏ជួបកីឡាករអង់គ្លេសវ័យក្មេង Donny Smith។

ថៃ រ៉េត vs Donny Smith

កីឡាករអង់គ្លេសរូបនេះអាចចាត់ទុកជាអ្នកប្រដាល់វ័យក្មេងកំពុងឡើងជើង។ រូបគេបានឆ្លងកាត់លើសង្វៀន៣៥ដងហើយគឺឈ្នះ៣២ដង និងចាញ់៣ដង គិតត្រឹមខែឧសភា ឆ្នាំ២០២៤ ប៉ុន្តែមិនទាន់ច្បាស់ថាតើរូបគេបានប្រកួតប៉ុន្មានដងទៀតចាប់ពីខែឧសភា ដល់ខែតុលានេះ។

Donny Smith មានទម្ងន់៨១គីឡូក្រាម អាយុ១៧ឆ្នាំ កម្ពស់១.៨៥ ដែលមានប្រៀបលើកីឡាករកម្ពុជា ថៃ រ៉េត ដែលមានកម្ពស់១.៧៥ម៉ែត្រ អាយុ២៤ឆ្នាំ ប៉ុន្តែកីឡាករកម្ពុជាមានបទពិសោធឡើងសង្វៀនច្រើនជាងគឺឈ្នះ៦៩ដង ចាញ់១៣ដង និងស្មើ២ដង។

ព្រុំ សំណាង vs Bartek Paszcyk

កីឡាករប្រដាល់ប៉ូឡូញរហស្សនាម«អ្នកបំផ្លាញ់» Bartek Paszcyk មានបទពិសោធច្រើនក្នុងការប្រកួតកីឡាផ្សេងៗគ្នាដូចជា មួយថៃ ឃីកបុកស៊ីង និងគុនចម្រុះ។ រូបគេស្ថិតនៅចំណាត់ថ្នាក់លេខ៤ប្រចាំចក្រភពអង់គ្លេស ក្នុងប្រភេទទម្ងន់៨០គីឡូក្រាម សម្រាប់កីឡាឃីកបុកស៊ីង។ កាលពីថ្ងៃទី១៥ មេសា ឆ្នាំ២០២៣ រូបគេបានផ្តួលកីឡាករ Toby Jackson ឲ្យសន្លប់តាមរយៈកណ្តាប់ដៃស្តាំ ប៉ុន្តែមិនមានចំនួនប្រកួតជាក់លាក់ទេអំពីឃីកបុកស៊ីង និងមួយថៃ។

ចំពោះការប្រកួតគុនចម្រុះ (MMA) វិញ Bartek Paszcyk ធ្លាប់ប្រកួតបាន៥ដងគឺឈ្នះ១ និងចាញ់៤។ កាលពីខែមេសា ឆ្នាំ២០២៤ រូបគេបានចាញ់កីឡាករ Przemslaw Szyska ដោយត្រូវបានរឹតកឲ្យចុះចាញ់ក្នុងទឹកទី១។ នៅខែឧសភា ឆ្នាំ២០២១ រូបគេបានផ្តួលកីឡាករ Craig Allen ឲ្យសន្លប់ទឹកទី១។ ពីរប្រកួតផ្សេងទៀត រូបគេបានចាញ់កីឡាករ Kamil Korzeniewski ក្នុងទឹកទី២ និងចាញ់កីឡាករ Steven Hill ក្នុងទឹកទី១។

មែនទែនទៅ កីឡាករ Bartek Paszcyk មិនសូវជាខ្លាំងប៉ុន្មានឡើយ បើប្រៀបធៀបជាមួយកីឡាករ ព្រុំ សំណាង ពីព្រោះកីឡាករកម្ពុជាបានប្រកួតញឹកញាប់ និងមានបទពិសោធច្រើនជាង ប៉ុន្តែគ្រាន់តែថា ការប្រកួតនេះលក្ខណៈឃីកបុកស៊ីងដែលហាក់ថ្មីសម្រាប់កីឡាករកម្ពុជា។

រឿង សុភ័ណ្ឌ vs Luke Whelan

កីឡាករអង់គ្លេស Luke Whelan អាយុ៣៣ឆ្នាំ បានប្រឡូកក្នុងអាជីពប្រដាល់ឃីកបុកស៊ីង និងមួយថៃអស់រយៈពេល១៥ឆ្នាំហើយ។ រូបគេបានឆ្លងកាត់បទពិសោធឡើងសង្វៀនធំៗស្ទើរទូទាំងពិភពលោកដូចជា សង្វៀនឃីកបុកស៊ីងលំដាប់ពិភពលោក K-1 របស់ជប៉ុន សង្វៀនលំដាប់ពិភពលោក Glory របស់ប្រទេសអង់គ្លេស និងសង្វៀនជាច្រើននៅតំបន់អឺរ៉ុប។

រយៈពេល១៥ឆ្នាំនៃប្រដាល់អាជីពប្រដាល់ កីឡាករកម្ពស់១.៨៥ម៉ែត្រ គិតត្រឹមខែកញ្ញា ឆ្នាំ២០២៤ ធ្លាប់ឡើងសង្វៀនចំនួន៧៣ដង ក្នុងនោះទទួលបានជ័យជម្នះ៥៧ដង ចាញ់១៤ដង និងស្មើ២ដង ហើយជាកីឡាករលំដាប់លេខ១នៅចក្រភពអង់គ្លេសក្នុងប្រភេទទម្ងន់៧០គីឡូក្រាម។

កីឡាករ Luke Whelan បានឈ្នះខ្សែក្រវាត់ចំនួន៨ខ្សែគឺ ជើងឯកពិភពលោក៦ខ្សែនៅស្ថាប័ន IKF, FIBA, KGP, ISKA, ជើងឯកទ្វីបអឺរ៉ុប European Championship និងជើងឯកចក្រភពអង់គ្លេស២លើក។

ការជួបគ្នាជាមួយអ្នកលេងគុនខ្មែរ រឿង សុភ័ណ្ឌ មិនមានអ្វីគួរឲ្យបារម្ភខ្លាំងសម្រាប់កីឡាករអង់គ្លេសរូបនេះទេ ពីព្រោះរូបគេបានឆ្លងកាត់ដៃគូខ្លាំងៗជាច្រើន និងជាការប្រកួតនៅទឹកដីកំណើតខ្លួនឯងរឹតតែមានកម្លាំងចិត្ត៕

អត្ថបទ៖ វីរបុត្រ

The post ព្រុំ សំណាង, រឿង សុភ័ណ្ឌ និង ថៃ រ៉េត ដឹកដៃគ្នាទៅប្រកួតនៅអង់គ្លេស appeared first on Kampuchea Thmey Daily.

ជើងខ្លាំង Bartek Paszcyk ស្គាល់ច្បាស់ ព្រំ សំណាង មុនប៉ះគ្នានៅអង់គ្លេស

chean virakbot — Tue, 17 Sep 2024 02:06:27 +0000

កីឡាករប្រដាល់ប៉ូឡូញរហស្សនាម«អ្នកបំផ្លាញ់» Bartek Paszcyk ត្រូវតទល់នឹងដៃគូខ្លាំងគុនខ្មែរ ព្រុំ សំណាង នៅថ្ងៃទី១៩ ខែតុលា ឆ្នាំ២០២៤ នៅសង្វៀន Might Night London នៅប្រទេសអង់គ្លេស ដែលរៀបចំដោយស្ថាប័នប្រដាល់មួយថៃ MTGP។

កីឡាករ Bartek Paszcyk ជាអ្នកប្រដាល់ដែលមានក្បាច់គុនចម្រុះចូលគ្នាច្រើនប្រភេទគឺ គុនចម្រុះ ឃីកបុកស៊ីង និងមួយថៃ ដែលមានន័យថា រូបគេបានឆ្លងកាត់លើសង្វៀនគុនចម្រុះក្នុងទ្រុងក៏ច្រើន សង្វៀនវ៉ៃសេរីមួយថៃ និងសង្វៀនឃីកបុកស៊ីងក៏ច្រើន។

កីឡាករប៉ូឡូញរូបនេះភាគច្រើនប្រកួតនៅប្រទេសប៉ូឡូញ ចក្រភពអង់គ្លេស និងអៀរឡង់ ហើយក៏មានខ្សែក្រវាត់ជាច្រើនគ្រឿងផងដែរដែលអាចនិយាយបានថាជា ជើងខ្លាំងមួយរូបប្រចាំតំបន់អឺរ៉ុប។ រូបគេទំនងជាស្គាល់គុនខ្មែរ និងកីឡាករកម្ពុជា ព្រុំ សំណាង ច្បាស់ដែរ។

កីឡាករបាននិយាយថា ៖«ការប្រឹងប្រែងជារៀងរាល់ថ្ងៃរបស់ខ្ញុំឈានចូលមកដល់ហើយ។ គោលដៅតែមួយគត់របស់ខ្ញុំគឺឈានទៅដល់លំដាប់កំពូល។ ខ្ញុំសូមបង្ហាញដៃគូប្រកួតបន្ទាប់របស់ខ្ញុំគឺជាជើងខ្លាំងពិតប្រាកដដែលមានប្រវត្តិប្រកួតប្រហែល១០០ដង ក្នុងនោះផ្តួលដៃគូឲ្យសន្លប់៥០ដង។ ការប្រកួតនេះនឹងក្លាយជាសង្គ្រាមដ៏សាហាវនៅលើសង្វៀន»។

នៅមិនទាន់ដឹងស្ថិតិច្បាស់លាស់ពីកីឡាករ Bartek Paszcyk ដោយសាររូបគេប្រកួតកីឡាច្រើនប្រភេទ។ យ៉ាងណាបើនិយាយពីការប្រកួតឃីកបុកស៊ីងវិញ រូបគេស្ថិតនៅចំណាត់ថ្នាក់លេខ៤ប្រចាំចក្រភពអង់គ្លេស ក្នុងប្រភេទទម្ងន់៨០គីឡូក្រាម។ កាលពីថ្ងៃទី១៥ មេសា ឆ្នាំ២០២៣ រូបគេបានផ្តួលកីឡាករ Toby Jackson ឲ្យសន្លប់តាមរយៈកណ្តាប់ដៃស្តាំ ប៉ុន្តែមិនមានចំនួនប្រកួតជាក់លាក់ទេអំពីឃីកបុកស៊ីង និងមួយថៃ។

នៅរាត្រីជាមួយគ្នានេះ កីឡាករកម្ពុជា រឿង សុភ័ណ្ឌ ប៉ះកីឡាករអង់គ្លេស Luke Whelan ហើយកីឡាករ ឡៅ ចិត្រា ក៏មានឈ្មោះទៅប្រកួតដែរ៕

អត្ថបទ៖ វីរបុត្រ

The post ជើងខ្លាំង Bartek Paszcyk ស្គាល់ច្បាស់ ព្រំ សំណាង មុនប៉ះគ្នានៅអង់គ្លេស appeared first on Kampuchea Thmey Daily.

ព្រុំ សំណាង ប៉ះកីឡាករបារាំង Reda ជាម្ចាស់ខ្សែក្រវាត់ពិភពលោក៣ស្ថាប័ន

chean virakbot — Wed, 12 Jun 2024 06:24:23 +0000

កីឡាករគុនខ្មែរ ព្រុំ សំណាង ប្រឈមនឹងជើងខ្លាំងបារាំង Reda Oudgou ក្នុងជំនួបមិត្តភាពអន្តរជាតិទម្ងន់៨១គីឡូក្រាម នៅថ្ងៃទី២៧ ខែមិថុនា ឆ្នាំ២០២៤ នៅទីក្រុងបារីស ប្រទេសបារាំងដែលនឹងមានការផ្សាយបន្តផ្ទាល់តាមរយៈទូរទស្សន៍ BTV។

ជំនួបនេះអាចចាត់ទុកជាការងារដ៏ធ្ងន់បំផុតសម្រាប់កីឡាករកម្ពុជាដែលជួបដៃគូជាជើងខ្លាំង និងជាម្ចាស់ខ្សែក្រវាត់ពិភពលោក៣ស្ថាប័នផ្សេងគ្នា និងជាម្ចាស់ខ្សែក្រវាត់ថ្នាក់ជាតិបារាំង៣ខ្សែ។

កីឡាករ Reda Oudgou បានចាប់ផ្តើមហ្វឹកហាត់កីឡាឃីកបុកស៊ីង និងគុនចម្រុះតាំងពីតូចដោយបានប្រកួតដំបូងជាអ្នកស្ម័គ្រចិត្តរហូតក្លាយជាកីឡាករអាជីព។ បច្ចុប្បន្នរូបគេមានអាយុ៣៣ឆ្នាំ កម្ពស់១.៨៧ម៉ែត្រ និងទម្ងន់៨១គីឡូក្រាម។

បន្ទាប់ពីជោកជាំក្នុងការប្រកួតលក្ខណៈស្ម័គ្រចិត្ត រូបគេបានចាប់ផ្តើមប្រកួតអាជីពស្ទើរទូទាំងពិភពលោក ជាពិសេសនៅតំបន់អឺរ៉ុបតែម្តង។ រហូតដល់ពេលនេះ រូបគេបានឆ្លងកាត់បទពិសោធលើសង្វៀនចំនួន៣៧ដង ក្នុងនោះឈ្នះ៣២ដង និងចាញ់៥ដង។ ក្រៅពីប្រកួតឃីកបុកស៊ីង រូបគេក៏មានបទពិសោធប្រកួតចម្រុះថែមទៀត។

សមិទ្ធផលធំសំខាន់គឺកីឡាករ Reda Oudgou បានឈ្នះខ្សែក្រវាត់ចំនួន៦ខ្សែ។ រូបគេបានឈ្នះខ្សែក្រវាត់ថ្នាក់ជាតិបារាំង៣ខ្សែ។ ខ្សែក្រវាត់ពិភពលោក ISKA World Championship, ខ្សែក្រវាត់ពិភពលោក WBC Mediterranean Championship និងខ្សែក្រវាត់ពិភពលោក MTGP World Championship។

លោក សឿ វណ្ណៈ ស្ថាបនិកកម្មវិធីប្រដាល់គុនខ្មែរស៊ុបភើហ្វៃ (Kun Khmer Super Fight) បានលើកឡើងថា កម្មវិធីប្រកួតនៅថ្ងៃទី២៧ ខែមិថុនា ឆ្នាំ២០២៤ នៅទីក្រុងបារីស ប្រទេសបារាំងគឺជាព្រឹត្តិការណ៍ប្រកួតដ៏ធំមិនធ្លាប់មានសម្រាប់កីឡាករគុនខ្មែរចូលរួមប្រកួត។ ដៃគូបរទេសគឺសុទ្ធជាជម្រើសឈានមុខនៅតំបន់អឺរ៉ុបដែលពិតជាពិបាកខ្លាំងសម្រាប់កីឡាករគុនខ្មែរ។

លោកបាននិយាយថា ៖«យើងយកកីឡាករគុនខ្មែរជម្រើសឈានមុខទៅប្រកួត ហើយគេក៏ដាក់សុទ្ធតែជម្រើសជួរមុខដែរ។ ជាក់ស្តែងដៃគូរបស់ ព្រុំ សំណាង គឺជាជើងខ្លាំងពិតប្រាកដប្រចាំតំបន់អឺរ៉ុប។ គាត់ជាជើងឯកបារាំង ជាម្ចាស់ខ្សែក្រវាត់ពិភពលោកជាច្រើនស្ថាប័ន។ អីចឹង ព្រុំ សំណាង បើអាចយកឈ្នះកីឡាករបារាំងនោះបានគឺជាជោគជ័យបំផុត»។

លោក សឿ វណ្ណៈ បានបញ្ជាក់ថា ការប្រកួតជាច្រើនគូនេះ បើកីឡាករកម្ពុជាឈ្នះត្រឹមតែ២ ឬ៣នាក់គឺចាត់ទុកជាជោគជ័យបំផុតហើយសម្រាប់កម្ពុជា ដូច្នេះជាឱកាសធំដែលកីឡាករគុនខ្មែរត្រូវសាងកេរ្តិ៍ឈ្មោះលើឆាកអន្តរជាតិ។

ដៃគូរបស់ លន បញ្ញា

នៅថ្ងៃទី២៧ ខែមិថុនាជាមួយគ្នានេះដែរ ឈុត សេរីវ៉ាន់ថង ត្រូវប្រកួតម៉ារ៉ាតុងដែលមានបេក្ខភាព៣ប្រទេសផ្សេងទៀតគឺម្ចាស់ផ្ទះបារាំង អង់គ្លេស និងអេស្ប៉ាញ។ ប្រសិនបើ រូបគេទទួលបានជ័យជម្នះក្នុងការប្រកួតម៉ារ៉ាតុងនេះ រូបគេនឹងទទួលបានរង្វាន់រថយន្ត១គ្រឿង។ កីឡាករ លន បញ្ញា, ឡៅ ចិត្រា និង ធីម សៀងហៃ ក៏សុទ្ធតែជួបដៃគូខ្លាំងៗដូចគ្នា៕

អត្ថបទ៖ វីរបុត្រ

The post ព្រុំ សំណាង ប៉ះកីឡាករបារាំង Reda ជាម្ចាស់ខ្សែក្រវាត់ពិភពលោក៣ស្ថាប័ន appeared first on Kampuchea Thmey Daily.

ព្រុំ សំណាង លេងបាល់ទាត់លើកទី១ ភ័យជាងប្រដាល់»

chean virakbot — Thu, 02 May 2024 04:37:21 +0000

កីឡាករប្រដាល់ ព្រុំ សំណាង មានអារម្មណ៍ភ័យជាងការឡើងប្រដាល់នៅពេលរូបគេបានលេងបាល់ទាត់លើកទី១ក្នុងព្រឹត្តិការណ៍«រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿង ញៀន និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា» កាលពីយប់ថ្ងៃទី១ ខែឧសភា ឆ្នាំ២០២៤ នៅពហុកីឡដ្ឋានជាតិអូឡាំពិក។

ក្រោយចប់ការប្រកួត ព្រុំ សំណាង បានប្រាប់ថា រូបគេមិនសូវដឹងពីច្បាប់ទម្លាប់ និងរបៀបលេងបាល់ទាត់ទេ ដូច្នេះសម្រាប់ការបង្ហាញខ្លួនលើកទី១បានធ្វើឲ្យរូបគេភ័យផង អផងដោយបារម្ភខុសបច្ចេកទេស និងប៉ះទង្គិចដល់កីឡាករផ្សេង។

«នេះជាលើកទី១ដែលខ្ញុំបានលេងបាល់ទាត់ តែអារម្មណ៍សប្បាយប្លែក។ ចាប់ពីពេលនេះទៅ ខ្ញុំចង់ចំណាយពេលលេងបាល់ទាត់ខ្លះក្នុងមួយសប្តាហ៍ដើម្បីកុំឲ្យថ្ងៃក្រោយអត់ស្គាល់បាល់ទាត់។ សម្រាប់ការលេងលើកទី១នេះ ខ្ញុំមានអារម្មណ៍សប្បាយផង ភ័យផង ភ័យជាងនៅលើសង្វៀន ពីព្រោះខ្ញុំមិនសូវដឹងពីរបៀបលេង»។

ការបង្ហាញខ្លួនលើកទី១របស់ ព្រុំ សំណាង បានប៉ះទង្គិចដៃគូដូចអ្វីដែលរូបគេបារម្ភមែនគឺប៉ះទង្គិចជាមួយតារាចម្រៀង គូម៉ា។ កីឡាករប្រដាល់រូបនេះបាននិយាយថា ៖«ខ្ញុំចង់អរគុណដល់ Idol គឺគូម៉ា។ ខ្ញុំស្រឡាញ់ចូលចិត្តគាត់ ហើយប៉ះទង្គិចគ្នាចំ Idol របស់ខ្ញុំ ហើយក៏សូមទោសដែលកែងរបស់បងប៉ះប្អូន។ បងសូមទោសប្អូន»។

ព្រឹត្តិការណ៍នេះពិតជាល្អខ្លាំងមែនទែន។ ម្នាក់ៗចង់ជួបសម្តេចតេជោ ហ៊ុន សែន ហើយព្រឹត្តិការណ៍បានផ្តល់ឱកាសឲ្យបានជួបសម្តេចផ្ទាល់។ ព្រុំ សំណាង បានប្រាប់ថា ៖«ខ្ញុំបានចាប់ដៃសម្តេច ហើយយកដៃសម្តេចដាក់លើក្បាលខ្ញុំ។ អូ! ពិតជារំភើបខ្លាំងណាស់ មិនងាយបានជួបសម្តេចផ្ទាល់ទេ»។

កីឡាករបានបន្តថា ៖«ពីដំបូងឡើយ ខ្ញុំមិននឹកស្មានថា បានលេងទេ តែដល់ពេលគ្រូដូរចូល ហើយពិធីការិនីប្រកាសឈ្មោះរបស់ខ្ញុំ ស្រាប់តែអ្នកគាំទ្រស្រែកហោពេញស្តាត អូ! ខ្ញុំរំភើបខ្លាំងមែនទែន។ និយាយទៅ អារម្មណ៍នៅលើទីលានបាល់ទាត់ខុសប្លែកពីអារម្មណ៍នៅលើសង្វៀនប្រដាល់»។

ព្រឹត្តិការណ៍ប្រកួតបាល់ទាត់មិត្តភាពក្រោមមូលបទ«រួមគ្នាដើម្បីសប្បុរសធម៌ និងប្រយុទ្ធប្រឆាំងគ្រឿងញៀន និងដើម្បីប្រមូលថវិកាជួយដល់មន្ទីរពេទ្យគន្ធបុប្ផា»កាលពីយប់ថ្ងៃទី១ ខែឧសភា ឆ្នាំ២០២៤ នៅពហុកីឡដ្ឋានជាតិអូឡាំពិកដែលមានអ្នកទស្សនាផ្ទាល់ជាង៣ម៉ឺននាក់ទទួលបានថវិកាជាង៥លានដុល្លារសហរដ្ឋអាមេរិក៕

អត្ថបទ៖ វីរបុត្រ

The post ព្រុំ សំណាង លេងបាល់ទាត់លើកទី១ ភ័យជាងប្រដាល់» appeared first on Kampuchea Thmey Daily.

កីឡាករអ៊ីរ៉ង់ អាវីន រំភើបខ្លាំងមែនទែន ក្រោយឈ្នះ ព្រុំ សំណាង យប់មិញ

chean virakbot — Fri, 12 Apr 2024 02:47:44 +0000

កីឡាករអ៉ីរ៉ង់ អាវីន មីប៊ូឌី (Arvin Mehboudi) បានឈ្នះពានរង្វាន់ម៉ារ៉ាតុងគុនខ្មែរអមដោយប្រាក់រង្វាន់៥០០០ដុល្លារអាមេរិក បន្ទាប់ពីបានយកឈ្នះកីឡាករគុនខ្មែរ ព្រុំ សំណាង នៅវគ្គផ្តាច់ព្រ័ត្រ យប់ថ្ងៃទី១១ ខែមេសា ឆ្នាំ២០២៤ នៅសង្វៀនថោន។

ការប្រកួតជម្រុះជុំទី១ អាវីន បានផ្តួលកីឡាករអាល្លឺម៉ង់ ភីលីប អេងហ្អើរ៉ូប ឲ្យសន្លប់ក្នុងទឹកទី១ តាមរយៈកណ្តាប់ដៃដើម្បីឡើងទៅវគ្គផ្តាច់ព្រ័ត្រ។ ជាមួយគ្នានេះ ព្រុំ សំណាង បានផ្តួលកីឡាករអ៊ូបេគីស្ថាន ប៉ាស្កូ នីកូឡៃ ក្នុងទឹកទី១តាមរយៈជង្គង់។

នៅវគ្គផ្តាច់ព្រ័ត្របានតស៊ូគ្នា៣ទឹកពេញ ប៉ុន្តែកីឡាករទាំងពីរមិនសូវបានវ៉ៃគ្នាពេញល្អទេរហូតត្រូវបានអាជ្ញាកណ្តាលព្រមានដល់ទៅ៣ដង។ ព្រុំ សំណាង បានព្យាយាមវ៉ៃមួយតាមរយៈការទាត់ និងឆក់កណ្តាប់ដៃ ខណៈកីឡាករអ៉ីរ៉ង់ អាវីន ចេញកណ្តាប់ដៃ និងទាត់មានទម្ងន់។ ជាពិសេសរូបគេបានវាយមួយដៃចុងទឹកទី៣ឲ្យ សំណាង ដួលអុកគូថ។ ចប់ការប្រកួត ចៅក្រមទាំង៥រូបបានផ្តល់ពិន្ទុឲ្យ អាវីន ទទួលបានជ័យជម្នះជាឯកច្ឆន្ទៈដើម្បីទទួលបានពានរង្វាន់ម៉ារ៉ាតុងគុនខ្មែរ។

តាមរយៈជ័យជម្នះនេះ កីឡាករអ៉ីរ៉ង់ អាវីន ពិតជាសប្បាយរីករាយយ៉ាងខ្លាង។ ទាំងកីឡាករ មិត្តភក្តិ និងអ្នកឲ្យទឹកបានលោតកញ្ជ្រោលសប្បាយរីករាយនៅលើសង្វៀន។ សកម្មភាពបែបនេះជារឿងល្អដែលកីឡាករបរទេសរីករាយនឹងការប្រកួតគុនខ្មែរ និងរួមចំណែកផ្សព្វផ្សាយគុនខ្មែរទៅក្រៅប្រទេស។

តាមពិតទៅកីឡាករអ៉ីរ៉ង់ អាវីន ធ្លាប់មកប្រកួតនៅកម្ពុជាច្រើនលើក និងធ្លាប់ចាញ់ពិន្ទុតែម្តងគត់ ប៉ុន្តែប្រកួតជាច្រើនទៀតរូបគេទទួលបានជ័យជម្នះ។

លទ្ធផលរបស់ អាវីន មកប្រកួតនៅកម្ពុជា

ចាញ់ពិន្ទុ ព្រុំ សំណាង កាលពីខែមេសា ឆ្នាំ២០២៣
ផ្តួល ធន់ រិទ្ធី សន្លប់ទឹកទី២ កាលពី ខែតុលា ឆ្នាំ២០២៣
ឈ្នះពិន្ទុ អ៊ុង វីរៈ កាលពីខែកញ្ញា ឆ្នាំ២០២៣
ផ្តួល គឹម វាសនា ឲ្យសន្លប់ទឹកទី៣ កាលពីខែកុម្ភៈ ឆ្នាំ២០២៤
ផ្តួល ភីលីប អេងហ្អើរ៉ូប (អាល្លឺម៉ង់) សន្លប់ទឹកទី១ ថ្ងៃទី១១ ខែមេសា ឆ្នាំ២០២៤
ឈ្នះពិន្ទុ ព្រុំ សំណាង ថ្ងៃទី១១ ខែមេសា ឆ្នាំ២០២៤

អត្ថបទ៖ វីរបុត្រ

The post កីឡាករអ៊ីរ៉ង់ អាវីន រំភើបខ្លាំងមែនទែន ក្រោយឈ្នះ ព្រុំ សំណាង យប់មិញ appeared first on Kampuchea Thmey Daily.

ព្រំ សំណាង Archives - Kampuchea Thmey Daily

ផ្ទុះ​ការសរសើរខ្លាំង​ចំពោះ​ការ​ជួយ​សង្គ្រោះ​របស់​លោក​គ្រូ​ ឃឹម​ សុជាតិ​ លើ​ ព្រំ សំណាង​

ឡុង សុវណ្ណឌឿន ប្រាប់ថា រីក​រាយ​ប៉ះ​ ព្រុំ សំណាង វគ្គ​ពាក់​កណ្តាល​ផ្តាច់​ព្រ័ត្រ ថ្ងៃនេះ

ឈ្នះនៅអង់គ្លេស កីឡាករ Bartek Paszczyk សរសើរស្មារតីតស៊ូរបស់ ព្រុំ សំណាង

ព្រុំ សំណាង, រឿង សុភ័ណ្ឌ និង​ ថៃ រ៉េត ដឹក​ដៃគ្នា​ទៅប្រកួតនៅអង់គ្លេស

ជើង​ខ្លាំង Bartek Paszcyk ស្គាល់​ច្បាស់ ព្រំ សំណាង មុនប៉ះគ្នានៅអង់គ្លេស

ព្រុំ សំណាង ប៉ះកីឡាករ​បារាំង Reda ជា​ម្ចាស់​ខ្សែក្រវាត់ពិភពលោក៣ស្ថាប័ន

ព្រុំ សំណាង លេង​បាល់ទាត់លើកទី១ ភ័យជាងប្រដាល់»

កីឡាករអ៊ីរ៉ង់ អាវីន រំភើបខ្លាំងមែនទែន ក្រោយឈ្នះ ព្រុំ សំណាង យប់មិញ

ផ្ទុះការសរសើរខ្លាំងចំពោះការជួយសង្គ្រោះរបស់លោកគ្រូ ឃឹម សុជាតិ លើ ព្រំ សំណាង

ឡុង សុវណ្ណឌឿន ប្រាប់ថា រីករាយប៉ះ ព្រុំ សំណាង វគ្គពាក់កណ្តាលផ្តាច់ព្រ័ត្រ ថ្ងៃនេះ

ព្រុំ សំណាង, រឿង សុភ័ណ្ឌ និង ថៃ រ៉េត ដឹកដៃគ្នាទៅប្រកួតនៅអង់គ្លេស

ជើងខ្លាំង Bartek Paszcyk ស្គាល់ច្បាស់ ព្រំ សំណាង មុនប៉ះគ្នានៅអង់គ្លេស

ព្រុំ សំណាង ប៉ះកីឡាករបារាំង Reda ជាម្ចាស់ខ្សែក្រវាត់ពិភពលោក៣ស្ថាប័ន

ព្រុំ សំណាង លេងបាល់ទាត់លើកទី១ ភ័យជាងប្រដាល់»