ព្រះពុទ្ធសាសនា Archives - Kampuchea Thmey Daily

ឧបនាយករដ្ឋមន្ត្រី ហង់ជួន ណារ៉ុន៖ ព្រះពុទ្ធសាសនាគឺជាមាគ៌ាមួយដ៏សំខាន់ក្នុងការបង្កើតសាមគ្គីភាព ភាតរភាព និងរក្សាសន្តិភាព

hun sirivadh — Wed, 08 Apr 2026 07:05:17 +0000

ឧបនាយករដ្ឋមន្ត្រី ហង់ជួន ណារ៉ុន មានប្រសាសន៍ថា បញ្ហាក្នុងពិភពលោកបច្ចុប្បន្ននេះ ធ្វើឱ្យមនុស្សរស់នៅមិនចុះសម្រុង គ្មានការយោគយល់ បង្កើតជាបញ្ហាសង្គម សេដ្ឋកិច្ច និងសាសនាទៀតផង។ លោកថាការកសាងបាននូវសាមគ្គីភាព ភាតរភាព និងសន្តិភាព គឺជារឿងដែលសំខាន់សម្រាប់សន្តិភាព និងការអភិវឌ្ឍន៍ ដែលនេះគឺជាមាគ៌ាដ៏សំខាន់របស់ព្រះពុទ្ធសាសនា។

លើកឡើងក្នុងទិវាព្រះពុទ្ធសាសនាអន្តរជាតិ ឆ្នាំ២០២៦ ព្រឹកថ្ងៃទី៨ ខែមេសា ឆ្នាំ២០២៦នេះ នៅសាលសន្និសីទចតុម្មុខ លោកឧបនាយករដ្ឋមន្ត្រី ហង់ជួន ណារ៉ុន មានប្រសាសន៍ថា ទិវាព្រះពុទ្ធសាសនាអន្តរជាតិ នៅព្រះរាជាណាចក្រកម្ពុជា នាពេលនេះ សមស្របទៅនឹងបរិបទនៃពិភពលោកបច្ចុប្បន្ន កំពុងប្រឈមនឹងវិបត្តិជាច្រើនដូចជា ជម្លោះប្រដាប់អាវុធ សង្គ្រាមសេដ្ឋកិច្ច ការបម្រែបម្រួលអាកាសធាតុ ភាពឡើងកំដៅនៃភូមិសាស្ត្រនយោបាយ ភាពផុយស្រួយនៃជម្លោះសាសនា ការបំពុលបរិស្ថាន ជំងឺឆ្លង និងគម្លាតសង្គម ធ្វើឱ្យមនុស្សរស់នៅមិនមានភាពចុះសម្រុង និងមិនយោគយល់គ្នា ព្រមទាំងបង្កភាពរាំងស្ទះដល់ការរីកចម្រើនរបស់សង្គម ហើយវិបត្តិទាំងនោះ បានក្លាយជាបញ្ហារួមនៅក្នុងសង្គម ក្នុងតំបន់ ក៏ដូចជាពិភពលោក ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សង្គម សេដ្ឋកិច្ច និងវិស័យសាសនាទៀតផង។

លោកឧបនាយករដ្ឋមន្ត្រីបានបន្ថែមថា ព្រះពុទ្ធសាសនា គឺជាមាគ៌ាមួយដ៏សំខាន់ក្នុងការបង្កើតនូវសាមគ្គីភាព ភាតរភាព និងរក្សាសន្តិភាព តាមរយៈការផ្តល់ឱវាទដោយផ្អែកលើព្រហ្មវិហារធម៌ សង្គហធម៌ និងមាគ៌ាកណ្តាល ដែលអាចជួយឱ្យបុគ្គល គ្រួសារ សង្គម និងពិភពលោកប្រកាន់យកនូវវប្បធម៌អហិង្សា ការគោរពអធ្យាស្រ័យយោគយល់គ្នាខ្ពស់ ការប្រកាន់យកនូវសីលធម៌រស់នៅល្អ សុខដុមរមនា ដែលជាឧបករណ៍ចាំបាច់សម្រាប់សន្តិភាព និងការអភិវឌ្ឍប្រកបដោយចីរភាព។

ក្នុងឱកាសនោះលោកឧបនាយករដ្ឋមន្ត្រី ហង់ជួន ណារ៉ុន បានផ្ដល់នូវទស្សនាទានមួយចំនួនដែលមានដូចជា ការជំរុញបំផុសប្រធានបទនៃទិវាពុទ្ធសាសនាពិភពលោកនាថ្ងៃនេះឱ្យបានទូលំទូលាយប្រែក្លាយជាសកម្មភាពជាក់ស្ដែងដើម្បីធានាសុខដុមរមនានៅក្នុងសង្គម និងសន្ដិភាពសម្រាប់ពិភពលោក។ ការចូលរួមអភិវឌ្ឍព្រះពុទ្ធសាសនាឱ្យកាន់តែរីកចម្រើន ដោយលើកកម្ពស់តួនាទីព្រះពុទ្អសាសនាក្នុងសង្គមតាមរយៈការអប់រំលើកកម្ពស់សីលធម៌សង្គម និងសុខភាពផ្លូវចិត្តរបស់ប្រជាជន។ ជំរុញការយល់ដឹងរបស់ពលរដ្ឋចំពោះព្រះពុទ្ធសាសនាឱ្យបានស៊ីជម្រៅ និងគោរពប្រតិបត្តិត្រឹមត្រូវ និងការបន្តរក្សាសាមគ្គីភាពគ្នាជាធ្លុងមួយដើម្បីរក្សានូវឧត្តមប្រយោជន៍ជាតិ។

គួរឱ្យដឹងផងដែរថា ទិវាព្រះពុទ្ធសាសនាអន្តរជាតិ ក្នុងឆ្នាំ២០២៦នេះ ត្រូវបានប្រារព្ធឡើងក្រោមប្រធានបទ «ពង្រឹងសាមគ្គីធម៌ ជំរុញសន្តិភាព តាមរយៈមាគ៌ាព្រះពុទ្ធសាសនា»។ ទិវានេះត្រូវបានរៀបចំនៅសាលសន្និសីទចតុម្មុខ ដោយមានការយាននិមន្ត្ត និងអញ្ជើញចូលរួមពី សម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា, សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះសង្ឃនាយក គណៈមហានិកាយ សម្តេចសង្ឃព្រះសង្ឃនាយករង សម្ដេចព្រះរាជាគណៈ ព្រះមន្រ្តីសង្ឃ,មន្ត្រីរដ្ឋាភិបាល តំណាងអង្គទូត និង តំណាងសាសនិកគ្រប់សាសនា ព្រមទាំងនិស្សិតសរុបចំនួនជាង៩០០អង្គ/នាក់។

ពិធីនេះក៏មានការឡើងអានព្រះរាជសារថ្វាយព្រះពរព្រះមហាក្សត្រដោយសម្ដេចសង្ឃទាំងពីរគណៈ និងការឡើងអានព្រះរាជសារព្រះមហាក្សត្រ និងសុន្ទរកថាស្វាគមន៍ដោយរដ្ឋមន្ត្រីក្រសួងធម្មការលោក ចាយ បូរិន ផងដែរ៕

អត្ថបទដោយ ហ៊ុន សិរីវឌ្ឍន៍

The post ឧបនាយករដ្ឋមន្ត្រី ហង់ជួន ណារ៉ុន៖ ព្រះពុទ្ធសាសនាគឺជាមាគ៌ាមួយដ៏សំខាន់ក្នុងការបង្កើតសាមគ្គីភាព ភាតរភាព និងរក្សាសន្តិភាព appeared first on Kampuchea Thmey Daily.

វៀតណាមអះអាងពីការជំរុញកិច្ចសហប្រតិបត្តិការខាងសាសនាជាមួយកម្ពុជា និងឡាវ

hun sirivadh — Wed, 29 Oct 2025 07:35:35 +0000

សាធារណរដ្ឋសង្គមនិយមវៀតណាមបានអះអាងពីការត្រៀមខ្លួនក្នុងការជំរុញកិច្ចសហប្រតិបត្តិការខាងសាសនារួមទាំងការផ្លាស់ប្ដូរការសិក្សាពីព្រះពុទ្ធសាសនាក្នុងប្រទេសកម្ពុជា និងឡាវ ដែលជាផ្នែកមួយដ៏សំខាន់នេះទំនាក់ទំនងការទូតប្រជាជន និងប្រជាជន ។

សារព័ត៌មានវៀតណាម Vietnam Plus បានចុះផ្សាយដោយដកស្រង់ប្រសាសន៍របស់អនុរដ្ឋមន្ត្រីក្រសួងកិច្ចការជនជាតិ និងសាសនាវៀតណាមលោក Nguyen Hai Trung ដែលបានថ្លែងក្នុងកិច្ចប្រជុំកំពូលព្រះពុទ្ធសាសនា៣ប្រទេស កម្ពុជា វៀតណាម ឡាវ នៅរាជធានីភ្នំពេញ កាលពីថ្ងៃទី២៨ ខែតុលាយកមកចុះផ្សាយថាក្នុងពិធីនោះលោក Nguyen បានលើកឡើងថាប្រទេសវៀតណាមផ្ដល់តម្លៃ និងត្រៀមខ្លួនរួចជាស្រេចក្នុងការលើកកម្ពស់កិច្ចសហប្រតិបត្តិការព្រះពុទ្ធសាសនាជាមួយ កម្ពុជា និងឡាវ ជាផ្នែកនៃការទូតប្រជាជនដែលរួមចំណែកដល់សាមគ្គីភាព កិច្ចសហប្រតិបត្តិការ ស្ថិរភាព និងការអភិវឌ្ឍន៍ក្នុងតំបន់ផងដែរ។ លោកបន្ថែមថាគោលនយោបាយការបរទេសរបស់វៀតណាមគឺ ឯករាជ្យ ភាពខ្លួនទីពឹងខ្លួន សន្តិភាព កិច្ចសហប្រតិបត្តិការ ការអភិវឌ្ឍន៍ ការធ្វើពិពិធកម្ម និងពហុភាគីនៃទំនាក់ទំនងខាងក្រៅ។

លោកថា៖ «រដ្ឋវៀតណាមជានិច្ចកាលគោរព និងធានាសិទ្ធិសេរីភាពខាងសាសនា ឬជំនឿរបស់ប្រជាជនទាំងអស់ដោយបានបង្កើតលក្ខខណ្ឌយ៉ាងខ្ជាប់ខ្ជួនសម្រាប់អង្គការសាសនាដើម្បីធ្វើប្រតិបត្តិការស្របតាមរដ្ឋធម្មនុញ្ញ និងសីលធម៌ល្អ ពង្រឹងសាមគ្គីភាពរវាងសាសនា និងនាំមកនូវតម្លៃវប្បធម៌ និងសីលធម៌ល្អ ព្រមទាំងធនធានសាសនាសម្រាប់អភិវឌ្ឍន៍ជាតិ»។

កម្ពុជាបានរៀបចំកិច្ចប្រជុំកំពូលព្រះពុទ្ធសាសនាបីប្រទេស កម្ពុជា ឡាវ វៀតណាម លើកទី៣ក្រោមមូលបទ «សុខដុមនីយកម្មព្រះពុទ្ធសាសនា ដើម្បីសន្តិភាព និងការអភិវឌ្ឍ ប្រកបដោយចិរភាព» ពីថ្ងៃទី២៧ ដល់ថ្ងៃទី២៨ ខែតុលា ឆ្នាំ២០២៥ នៅរាជធានីភ្នំពេញ ប្រទេសកម្ពុជា។

ក្នុងពិធីនោះរដ្ឋមន្ត្រីធម្មការ និងសាសនា លោក ចាយ បូរិន មានប្រសាសន៍កិច្ចប្រជុំនេះមិនត្រឹមតែឆ្លុះបញ្ចាំងពីការវិវិត្តន៍នៃការអនុវត្តព្រះពុទ្ធសាសនាក្នុងប្រទេសទាំង៣ប៉ុណ្ណោះទេ ថែមទាំងបានលើកឡើងនូវសេចក្ដីប្រាថ្នារួមគ្នារបស់ពុទ្ធសាសនិកក្នុងការលើកកម្ពស់សន្តិភាព និងសុខុមាលភាពសង្គមផងដែរ។ លោកបន្ថែមថាព្រឹត្តិការណ៍នៃនឹងរឹតចំណងសាមគ្គីភាព មិត្តភាព និងកិច្ចសហប្រតិបត្តិការរវាងប្រទេស កម្ពុជា ឡាវ និងវៀតណាម បន្ថែមទៀត ទន្ទឹមនឹងការផ្សព្វផ្សាយតម្លៃព្រះពុទ្ធសាសនានៅទូទាំងតំបន់ និងពិភពលោក។

សមាជិកឧត្តមទីប្រឹក្សាផ្ទាល់ព្រះមហាក្សត្រសម្ដេចកិត្តិសង្គហបណ្ឌិត ម៉ែន សំអន បានលើកឡើងក្នុងពិធីនោះថា ចាប់តាំងពីកម្ពុជាបានរំដោះពី របបខ្មែរក្រហមទំនាក់ទំនងប្រទេសកម្ពុជា ឡាវ និងវៀតណាមកាន់តែរឹងមាំ ជំរុញដល់កិច្ចសហប្រតិបត្តិការលើវិស័យផ្សេងៗ ជាពិសេសសាសនា។ សម្ដេចបន្តថា គុណតម្លៃព្រះពុទ្ធសាសនានៃក្ដីមេត្តា ការអត់ឱន ការមិនគិតតែពីប្រយោជន៍ផ្ទាល់ខ្លួន បានជះឥទ្ធិពលយ៉ាងខ្លាំងដល់ជីវភាពរស់នៅប្រចាំថ្ងៃរបស់ប្រជាជាតិទាំងបី ដោយចិញ្ចឹមបីបាច់ថែរក្សាការរួមរស់ដោយសន្តិភាព និងស្ថិរភាពសង្គម។

សម្ដេចថា៖ «ព្រះពុទ្ធសាសនានៅតែបន្តជាគ្រឹះខាងសីលធម៌ និងស្មារតីសម្រាប់សុខដុមរមនាជាតិ ស្នេហាជាតិ កិច្ចសហប្រតិបត្តិការ និងសង្គមសន្តិភាព និងរីកចម្រើន»។

នៅក្នុងកិច្ចប្រជុំកំពូលនោះ គណៈប្រតិភូបានពិភាក្សាអំពីវិធីពង្រឹងកិច្ចសហប្រតិបត្តិការព្រះពុទ្ធសាសនា និងតួនាទីរបស់ខ្លួនក្នុងការលើកកម្ពស់សុខដុមរមនា និងកំណើនប្រកបដោយចិរភាព ព្រមទាំងបានចុះហត្ថលេខាលើសេចក្ដីប្រកាសរួមមួយលើការអភិរក្ស លើកកម្ពស់បេតិកភណ្ឌព្រះពុទ្ធសាសនា ជំរុញកិច្ចសហប្រតិបត្តិការពុទ្ធសាសនាក្នុងតំបន់ ការលើកកម្ពស់សន្តិភាព និងភាពសុខដុមរមនា គាំទ្រការអភិវឌ្ឍប្រកបដោយចិរភាព ការផ្ដល់សិទ្ធិអំណាចដល់យុវជន និងការពង្រឹងសាមគ្គីភាព និងកិច្ចសហប្រតិបត្តិការពិភពលោក៕

អត្ថបទដោយ ហ៊ុន សិរីវឌ្ឍន៍

The post វៀតណាមអះអាងពីការជំរុញកិច្ចសហប្រតិបត្តិការខាងសាសនាជាមួយកម្ពុជា និងឡាវ appeared first on Kampuchea Thmey Daily.

ឯកអគ្គរដ្ឋទូតឥណ្ឌា៖ កម្ពុជានៅតែជាដៃគូដ៏សំខាន់ក្នុងក្របខណ្ឌគោលនយោបាយទិសបូព៌ា និងអភិវឌ្ឍរួមគ្នា

Samean Lay — Fri, 24 Oct 2025 08:22:52 +0000

ឯកអគ្គរដ្ឋទូតឥណ្ឌាប្រចាំកម្ពុជាលោក បាវីតលុង វ៉ាន់ឡាល់វ៉ាវណា (Bawitlung Vanlalvawna) បានលើកឡើងថា ប្រទេសកម្ពុជានៅតែជាដៃគូដ៏សំខាន់នៅក្នុងក្របខណ្ឌគោលនយោបាយទិសបូព៌ារបស់ឥណ្ឌា ហើយមិត្តភាពរវាងប្រទេសទាំងពីរស្ថិតនៅលើមូលដ្ឋាននៃប្រវត្តិសាស្ត្រ និងទស្សនវិស័យរួមគ្នាសម្រាប់ការអភិវឌ្ឍន៍រួម និងប្រកបដោយចីរភាព។

លោកឯកអគ្គរដ្ឋបានលើកឡើងបែបនេះ នាឱកាសអញ្ជើញចូលរួមក្នុងពិធីសម្ពោធមជ្ឈមណ្ឌលព័ត៌មានវិទ្យា នៅពុទ្ធិកសាកលវិទ្យាល័យព្រះសីហមុនីរាជា ដែលបង្កើតឡើង ដោយមានការគាំទ្រពីរដ្ឋាភិបាលនៃប្រទេសឥណ្ឌា ក្រោមគម្រោងផ្តល់ផលរហ័ស Quick Impact Project (QIP) នៃកិច្ចសហប្រតិបត្តិការទន្លេមេគង្គ-គង្គា។ កម្មវិធីសម្ពោធនេះ ក្រោមព្រះវត្តមានសម្ដេចព្រះមហាសង្ឃរាជ បួរ គ្រី ព្រះសាកលវិទ្យាធិការពុទ្ធិកសាកលវិទ្យាល័យព្រះសីហមុនីរាជា។

លោកមានប្រសាន៍ថា ប្រទេសឥណ្ឌា និងកម្ពុជា មានទំនាក់ទំនងនិងចំណងអរិយធម៌យ៉ាងជ្រាលជ្រៅ ដែលត្រូវបានពង្រឹងនិងពង្រីកដោយមានការផ្លាស់ប្តូរគ្នាទៅវិញទៅមកខាងសាសនា និង វប្បធម៌ជាច្រើនសតវត្ស ជាពិសេសតាមរយៈព្រះពុទ្ធសាសនា ដែលបន្តជំរុញឲ្យប្រជាជនរបស់យើងមានទឹកចិត្តប្រកបដោយក្តីមេត្តា ប្រាជ្ញា និងសន្តិភាពក្នុងផ្លូវចិត្ត។ លោកថ្លែងថា៖«ប្រទេសយើងទាំងពីរគឺជាអ្នកទទួលបាននូវមរតកដ៏មានមោទនភាពនៃបេតិកភណ្ឌព្រះពុទ្ធសាសនារួមគ្នា។ ដូច្នេះវាពិតជាមានអត្ថន័យពិសេសណាស់ សម្រាប់ពួកយើងក្នុងការគាំទ្រស្ថាប័នដូចជាស្ថាប័នព្រះពុទ្ធសាសនាមួយនេះ ក្នុងកំឡុងពេលដែលយើងកំពុងរក្សានូវកេរ្តិ៍ដំណែលព្រះសាសនានោះ យើងក៏បានចាប់យកឱកាសថ្មីមួយទៀតនៃយុគសម័យឌីជីថលផងដែរ»។

លោកបានកត់សម្គាល់ឃើញថា នេះគឺជាមជ្ឈមណ្ឌលពត៌មានវិទ្យាមួយក្នុងចំណោមមជ្ឈមណ្ឌលព័ត៌មានវិទ្យាជាច្រើនដែលបង្កើតឡើងដោយប្រទេសឥណ្ឌា នៅក្នុងពុទ្ធិកសាកលវិទ្យាល័យនៅកម្ពុជា។ មជ្ឈមណ្ឌលពត៌មានវិទ្យាស្រដៀងគ្នានេះដែរត្រូវបានបង្កើតឡើងនៅពុទ្ធិកសាកលវិទ្យាល័យព្រះសីហនុរាជ សាខាក្នុងរាជធានីភ្នំពេញ ខេត្តបាត់ដំបង និងសាកលវិទ្យាល័យសម្តេចព្រះមហាសង្ឃរាជបួរគ្រី។ លោកគូសបញ្ជាក់ថា គម្រោងទាំងនេះឆ្លុះបញ្ចាំងពីការប្តេជ្ញាចិត្តរួមគ្នារបស់យើងក្នុងការលើកកម្ពស់វិស័យអប់រំឌីជីថល ការពង្រឹងសមត្ថភាពផ្នែកបច្ចេកវិទ្យា និងការបន្តផ្តល់នូវអាហារូបករណ៍ និងតម្លៃព្រះពុទ្ធសាសនា។ មជ្ឈមណ្ឌលពត៌មានវិទ្យា ដែលសម្ពោធនេះនឹងផ្តល់លទ្ធភាពដល់សាស្ត្រាចារ្យ និងនិស្សិត ដើម្បីពង្រឹងចំណេះជំនាញផ្នែកឌីជីថលក្នុងការបង្កើននូវចំណេះដឹង និងឱកាសការងារ។

ក្រោមក្របខណ្ឌកិច្ចសហប្រតិបត្តិការទន្លេមេគង្គ-គង្គា ប្រទេសឥណ្ឌាពិតជាមានមោទនភាពក្នុងការអនុវត្តគម្រោងផ្តល់ផលរហ័សចំនួន ១០ ជារៀងរាល់ឆ្នាំនៅក្នុងប្រទេសកម្ពុជា ដែលគម្រោងទាំងនោះផ្តោតលើវិស័យសំខាន់ៗដូចជា វិស័យអប់រំ ការថែទាំសុខភាព ការពង្រឹងសិទ្ធិអំណាចរបស់ស្ត្រី អនាម័យ និងកសិកម្ម។ គម្រោងទាំងនេះតំណាងឱ្យភាពជាដៃគូអភិវឌ្ឍដ៏រឹងមាំ និងរីកចម្រើនរវាងប្រជាជាតិយើងទាំងពីរសំដៅផ្តល់នូវអត្ថប្រយោជន៍ជាក់ស្តែងនៅកម្រិតមូលដ្ឋាន៕

The post ឯកអគ្គរដ្ឋទូតឥណ្ឌា៖ កម្ពុជានៅតែជាដៃគូដ៏សំខាន់ក្នុងក្របខណ្ឌគោលនយោបាយទិសបូព៌ា និងអភិវឌ្ឍរួមគ្នា appeared first on Kampuchea Thmey Daily.

ថៃ ក្រពុលមុខ រឿងចៅអធិការវត្តនិងស្រីស្នេហ៍ ទើបពន្លឿនការស៊ើបអង្កេត កុំឲ្យកាន់តែអាម៉ាស់

សាង ស្រីល័ក្ខ — Mon, 21 Jul 2025 06:12:05 +0000

ការិយាល័យស៊ើបអង្កេតកណ្តាល (CIB) បានសន្យាថា នឹងពន្លឿនការស៊ើបអង្កេតរបស់ខ្លួន លើការចោទប្រកាន់ពីបទប្រព្រឹត្តខុសលើអតីតចៅអធិការវត្តមួយក្នុងខេត្ត Nakhon Sawan ។ បន្ទាប់ពីក្រពុលមុខ និងអាម៉ាស់ខ្លាំង ទាក់ទិននឹងរូបថតរបស់ព្រះសង្ឃជាន់ខ្ពស់ កំពុងឱបស្រ្តីម្នាក់ពេលពាក់សក់ បានធ្វើឲ្យកក្រើកពេញអ៊ីនធឺណិត ពាសពេញប្រទេសថៃ។

Thamma Wachiratheerakhun អតីតព្រះចៅអធិការវត្ត Nakhon Sawan ត្រូវបានគេឃើញពាក់សក់ពាក់ ពេលឱបស្ត្រីម្នាក់(រូបថត៖ Wassayos Ngamkham)

អតីតព្រះចៅអធិការវត្ត Thamma Wachiratheerakhun ដែលបានលាចាក្ខសក្ខាបទ ពីគណៈសង្ឃមុនពាក់កណ្តាលអធ្រាត្រកាលពីថ្ងៃសៅរ៍ ក៏កំពុងស្ថិតក្រោមការស៊ើបអង្កេត ពាក់ព័ន្ធនឹងភាពមិនប្រក្រតីផ្នែកហិរញ្ញវត្ថុនៅក្នុងគម្រោងឧទ្យានពុទ្ធសាសនា Nakhon Sawan ដែលត្រូវបានពន្យារពេលប្រហែល១០ឆ្នាំ។

សេចក្តីរាយការណ៍បាននិយាយថា ព្រះជន្ម៦៧វស្សាបានលាចាក្ខសក្ខាបទ នៅម៉ោង១១និង៤៩នាទីយប់ថ្ងៃសៅរ៍ ក្នុងពិធីមួយដឹកនាំដោយព្រះចៅអធិការរងនៃវត្ត Nakhon Sawan ក្នុងស្រុក Muang ។

ក្រុមអ្នកស៊ើបអង្កេត CIB បានរកឃើញកំណប់នៃការជជែក និងរូបថតដែលបង្ហាញថា អតីតចៅអធិការមានទំនាក់ទំនងស្នេហាជាមួយស្ត្រីអាយុ ៥៧ ឆ្នាំម្នាក់ ដែលឃើញនៅក្នុងរូបភាព។ គេថា អ្នកទាំងពីរមានទំនាក់ទំនងស្នេហាជាមួយគ្នា១៥ឆ្នាំមកហើយ។ នៅក្នុងរូបថតមួយសន្លឹកនោះ គេអាចឃើញអតីតព្រះសង្ឃកំពុងឱបស្ត្រីនោះ ខណៈពេលដែលពាក់សក់ និងសម្លៀកបំពាក់ជាឧបាសក។

CIB និយាយថា អតីតព្រះសង្ឃដែលជាប្រធានសាសនារបស់ Nakhon Sawan បានស្នើសុំបច័យពីអ្នកកាន់សាសនានៅ Nakhon Sawan និងខេត្តជុំវិញខ្លួនជាទៀងទាត់។ អ្នកស៊ើបអង្កេតក៏បានរកឃើញទៀតថា ដៃគូដែលចោទប្រកាន់របស់គាត់ មានទ្រព្យសម្បត្តិយ៉ាងច្រើនរួមទាំងរថយន្ត គ្រឿងអលង្ការមានតម្លៃ និងដីឡូត៍ ទោះបីជាមិនមានប្រភពចំណូលច្បាស់លាស់ក៏ដោយ។

កន្លងមក អតីតសង្ឃរូបនេះក៏បានបដិសេធនូវភាពមិនប្រក្រតីណាមួយនៅក្នុងគម្រោងសាងសង់ ហើយទទូចថា ខ្លួនមានកំណត់ត្រាហិរញ្ញវត្ថុ ដើម្បីច្រានចោលការអះអាងថា ការពន្យារពេលនេះ ដោយសារតែអ្នកម៉ៅការមិនស្មោះត្រង់ បោះបង់ចោលការងារដែលពួកគេបានទទួលប្រាក់ខែដើម្បីធ្វើ។

ទោះបីជាមានការកត់សម្គាល់ក៏ដោយ CIB បាននិយាយថា អ្នកស៊ើបអង្កេតនឹងបន្តពិនិត្យមើលរបាយការណ៍ហិរញ្ញវត្ថុរបស់ប្រាសាទដើម្បីមើលថា តើមានភាពមិនប្រក្រតីណាមួយឬអត់។

អតីត Thamma Wachiratheerakhun បានសរសេរក្នុងលិខិតលាលែងពីតំណែងកាលពីថ្ងៃសុក្រថា លោកបានជ្រើសរើសលាលែងពីតំណែងដោយសារតែបញ្ហាសុខភាព និងការពារកុំឲ្យមានការបំផ្លាញបន្ថែមទៀតដល់សណ្តាប់ធ្នាប់ព្រះពុទ្ធសាសនារបស់ប្រទេសជាតិ។

យ៉ាងណាមិញ ដោយមើលឃើញពីរឿងអាស្រូវពាក់ព័ន្ធនឹងព្រះសង្ឃនាពេលថ្មីៗនេះ CIB បានបើកមជ្ឈមណ្ឌលពិសេសមួយ ដើម្បីដោះស្រាយការតវ៉ាអំពីការប្រព្រឹត្តខុសរបស់ព្រះសង្ឃ។ ករណីមួយនោះគឺរឿងអាស្រូវផ្លូវភេទដែលពាក់ព័ន្ធនឹងនាង Wilawan Emsawat ស្ត្រីអាយុ ៣៥ ឆ្នាំដែលគេស្គាល់ថាជា Sika Golf និងព្រះសង្ឃជាន់ខ្ពស់មកពីវត្តល្បីៗមួយចំនួន៕

Phra Thamma Wachiratheerakhun អតីតព្រះចៅអធិការវត្តនគរសុវណ្ណ(រូបថត៖supplied)

អត្ថបទ៖ សាង ស្រីល័ក្ខ

ចុចអាន៖ព្រះសង្ឃថៃ ផ្ទុះរឿងអាស្រូវផ្លូវភេទ បាននាំឥទ្ធិពលអវិជ្ជមានដល់ស្ថាប័នពុទ្ធសាសនា និងសង្គម

The post ថៃ ក្រពុលមុខ រឿងចៅអធិការវត្តនិងស្រីស្នេហ៍ ទើបពន្លឿនការស៊ើបអង្កេត កុំឲ្យកាន់តែអាម៉ាស់ appeared first on Kampuchea Thmey Daily.

ព្រះសង្ឃថៃ ផ្ទុះរឿងអាស្រូវផ្លូវភេទ បាននាំឥទ្ធិពលអវិជ្ជមានដល់ស្ថាប័នពុទ្ធសាសនា និងសង្គម

សាង ស្រីល័ក្ខ — Tue, 15 Jul 2025 09:15:24 +0000

រឿងអាស្រូវផ្លូវភេទនៅក្នុងស្ថាប័នពុទ្ធសាសនាក្នុងប្រទេសថៃ ជាពិសេសពាក់ព័ន្ធនឹងព្រះសង្ឃជាន់ខ្ពស់ បានធ្វើឲ្យមានការរង្គោះរង្គើយ៉ាងខ្លាំង នូវទំនុកចិត្តរបស់សាធារណជន និងបណ្តាលឲ្យមានការប៉ះពាល់យ៉ាងធ្ងន់ធ្ងរដល់សង្គម វប្បធម៌ និងសាសនា។

ព្រះចៅអធិការ Phra Thep Wachiratheeraporn ជាចៅអធិការវត្តនៃខេត្ត Saraburi (រូបភាពរបស់ Sika Golf)

ខាងក្រោមនេះជាការវិភាគ អំពីរបៀបរឿងអាស្រូវដែលព្រះសង្ឃនៅថៃបង្កឡើងមកនាពេលថ្មីៗនេះ ដោយបានជះឥទ្ធិពលអវិជ្ជមានដល់សង្គមថៃ។

ដោយសារតែប្រជាជនថៃជាច្រើនជឿជាក់យ៉ាងជ្រៅលើព្រះសង្ឃនិងពុទ្ធសាសនា ដែលនាំមកនូវសេចក្តីបរិសុទ្ធ វិន័យ និងសីល។ នៅពេលដែលព្រះសង្ឃពាក់ព័ន្ធនឹងរឿងអាស្រូវផ្លូវភេទ ជាពិសេស ព្រះសង្ឃដែលមានឋានៈខ្ពស់ ជាចៅអធិការវត្ត ឬមានឥទ្ធិពល មិនថាជាមួយស្ត្រី ឬសូម្បីតែអនីតិជនក៏ដោយ វាជាការបំពានលើសិក្ខាបទរបស់ព្រះពុទ្ធសាសនាដោយផ្ទាល់។

ជាលិទ្ធផល មនុស្សជាច្រើនបាត់បង់ជំនឿលើព្រះសង្ឃ (សហគមន៍ព្រះសង្ឃ) នាំឲ្យមានមន្ទិលសង្ស័យ និងកាត់បន្ថយការចូលរួមក្នុងសកម្មភាពសាសនាដូចជា ការបន់ស្រន់ ការថ្វាយបង្ខំនៅក្នុងព្រះវិហារ និងការធ្វើទានជាដើម។

ជាងនេះទៅទៀត វាក៏បង្កឲ្យមានភាពច្របូកច្របល់ខាងសីលធម៌ ជាពិសេសក្នុងចំណោមយុវជន ពោលគឺទៅលើកុមារថៃជាច្រើន ដែលត្រូវបានលើកឡើងដើម្បីគោរពព្រះសង្ឃជាអ្នកណែនាំសីលធម៌។ នៅពេលដែលព្រះសង្ឃចូលរួមក្នុងការប្រព្រឹត្តិខុសផ្លូវភេទ នោះបានធ្វើឲ្យយុវជនយល់ច្រឡំអំពីអ្វីដែលត្រូវ និងខុស ជាពិសេសនៅពេលដែលជនល្មើសប្រឈមមុខនឹងការទទួលខុសត្រូវតិចតួចឬគ្មានទោសទាល់សោះ។ ដែលទាំងនោះ បានធ្វើឲ្យអាជ្ញាធរសីលធម៌ដែលវត្ត និងព្រះសង្ឃកាន់តាមប្រពៃណីក្នុងសង្គមថៃកាន់តែចុះខ្សោយទៅៗ។

រូបភាព៖ijm

ជាពិសេស ប្រសិនបើសង្គមថៃកំពុងតែជួបរឿងអាស្រូវផ្លូវភេទក្នុងស្ថាប័នព្រះពុទ្ធសាសនានេះទៀតសោត នោះនាំមកនូវការអាម៉ាស់ដល់ប្រទេសជាតិទាំងមូល។ ដោយសារតែ ព្រះពុទ្ធសាសនាមានទំនាក់ទំនងយ៉ាងជ្រាលជ្រៅ ទៅនឹងអត្តសញ្ញាណជាតិថៃ។ នៅពេលដែលព្រះសង្ឃមួយអង្គត្រូវបានគេចាប់បាននៅក្នុងរឿងអាស្រូវ ជាពិសេសរឿងអាស្រូវដែលពាក់ព័ន្ធនឹងការរួមភេទ លុយកាក់ ឬការរំលោភបំពាន។ ជារឿយៗទទួលបានការចាប់អារម្មណ៍ពីប្រព័ន្ធផ្សព្វផ្សាយជាតិ និងអន្តរជាតិ ដែលទាំងនោះហើយ បានធ្វើឲ្យខូចកេរ្តិ៍ឈ្មោះរបស់ប្រទេសថៃ ក្នុងនាមជាបពុទ្ធសាសនិក ហើយចោទជាសំណួរអំពីការត្រួតពិនិត្យសាសនារបស់រដ្ឋនៃប្រទេសមួយនេះជាក់ជាមិនខានឡើយ។

មិនតែប៉ុណ្ណោះ រឿងអាស្រូវទាំងនោះនឹងបញ្ឆេះការទាមទារសាធារណៈសម្រាប់កំណែទម្រង់ ជាពិសេសឆ្ពោះទៅរក តម្លាភាពក្នុងហិរញ្ញវត្ថុព្រះវិហារ ទំនួលខុសត្រូវចំពោះព្រះសង្ឃ ការត្រួតពិនិត្យដោយអាជ្ញាធរខាងលោកិយ។ នេះបង្កើតភាពតានតឹងរវាងស្ថាប័នព្រះពុទ្ធសាសនាបែបប្រពៃណី និងសង្គមស៊ីវិលសម័យទំនើប ដោយបង្ហាញទស្សនៈផ្ទុយគ្នាអំពីរបៀបដែលព្រះពុទ្ធសាសនាគួរតែត្រូវបានអនុវត្ត និងគ្រប់គ្រងនៅក្នុងប្រទេសថៃ។

ក្នុងករណីជាច្រើន ជាពិសេសអ្នកដែលពាក់ព័ន្ធនឹងអ្នកថ្មីថ្មោង កុមារ ឬអ្នកដើរតាម សុទ្ធតែជាជនរងគ្រោះប្រឈមមុខនឹងការមាក់ងាយ និងសម្ពាធមិនឲ្យរាយការណ៍ពីការរំលោភបំពាន។ កង្វះប្រព័ន្ធគាំទ្រត្រឹមត្រូវនៅក្នុងស្ថាប័នសាសនា នាំឲ្យរបួសផ្លូវចិត្ត ភាពឯកោ និងជួនកាលសូម្បីតែការធ្វើអត្តឃាតក្នុងចំណោមព្រះសង្ឃ និងក្មេងស្នាក់នៅក្នុងវត្ត។

ទន្ទឹមគ្នានោះដែរ សូម្បីតែរឿងអាស្រូវជាច្រើនក៏ពាក់ព័ន្ធនឹងលុយ ភាពប្រណីត និងការក្លែងបន្លំផងដែរ ដែលព្រះសង្ឃប្រើការបរិច្ចាគឬជួយសាងសង់វិហារ ដើម្បីផលប្រយោជន៍ផ្ទាល់ខ្លួន ដែលជារឿយៗត្រូវបានចងភ្ជាប់ជាមួយនឹងទំនាក់ទំនងខុសច្បាប់។ មិនថាជាវិហារ ឬជាកសាងកុដវត្ត វាអាចប្រថុយនឹងត្រូវបានគេមើលឃើញថាជាសហគ្រាសពាណិជ្ជកម្មជាជាងជម្រកខាងសាសនា ការរៀនសូត្រ និងធ្វើឲ្យខូចតម្លៃស្នូលរបស់ព្រះពុទ្ធសាសនាជាដើម។

សរុបមក រឿងអាស្រូវផ្លូវភេទក្នុងស្ថាប័នពុទ្ធសាសនានៅក្នុងប្រទេសថៃ បានជះឥទ្ធិពលអវិជ្ជមានជាច្រើនដល់សង្គមថៃ រាប់ចាប់តាំងពី បាក់បែកជំនឿសាសនា នាំឲ្យមនុស្សបោះបង់ការជឿលើព្រះសង្ឃ ឈានដល់បញ្ហាអត្តសញ្ញាណ និងការរងការរិះគន់យ៉ាងខ្លាំងពីអន្ដរជាតិ នាំឲ្យមានជម្លោះច្បាប់សាសនា-នយោបាយកើនឡើង ដែលទាំងអស់នោះ បានជះឥទ្ធិពលលើយុវជនជំនាន់ក្រោយក្នុងប្រទេសថៃ រួមទាំងខូចខាតដល់ប្រទេសដែលកាន់ព្រះពុទ្ធសាសនាទៅជាមួយដែរ៕

រូបភាព៖.scmp

អត្ថបទ៖ សាង ស្រីល័ក្ខ

ចុចអាន៖ជនបរទេសនៅថៃ ជិះតាក់ស៊ីមិនឲ្យលុយ បែរជាបោះកញ្ឆាជំនួសវិញ

The post ព្រះសង្ឃថៃ ផ្ទុះរឿងអាស្រូវផ្លូវភេទ បាននាំឥទ្ធិពលអវិជ្ជមានដល់ស្ថាប័នពុទ្ធសាសនា និងសង្គម appeared first on Kampuchea Thmey Daily.

សម្ដេច ហ៊ុន ម៉ាណែត សង្ឃឹមថាលោកតា ស៊ុច នឹងជួយអប់រំពលរដ្ឋខ្មែរតាមផ្លូវព្រះធម៌នៃព្រះពុទ្ធសាសនា

Ngoeul Narath — Fri, 04 Jul 2025 03:49:36 +0000

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា សង្ឃឹមថាលោកតា ស៊ុច នឹងជួយដល់ប្រជាជនកម្ពុជា លេីវិថីនៃការអប់រំតាមព្រះធម៌នៃមាគាព្រះពុទ្ធសាសនា។ សម្ដេចធិបតី ហ៊ុន ម៉ាណែត ដាក់ក្ដីសង្ឃឹមថាបែបនេះ បន្ទាប់ពីបានជួបលោកតា ស៊ុច នៅវិមានសន្តិភាព នាព្រឹកថ្ងៃទី០៤ ខែកក្កដា ឆ្នាំ២០២៥ នេះ បន្ទាប់ពីលោកតា ស៊ុច និមន្តមកដល់កម្ពុជា កាលពីព្រឹកថ្ងៃទី០២ ខែកក្កដា។

ដើមឡើយលោកតា ស៊ុច ប្រើប្រាស់ឯកសារ និងលិខិតឆ្លងដែនរបស់ប្រទេសថៃ។ នៅពាក់កណ្ដាលខែមិថុនា លោកតា ស៊ុច មានថេរដីកាថា ព្រះអង្គមិនអាចនិមន្តចូលទៅក្នុងប្រទេសថៃបានឡើយ និងបានបិណ្ឌបាត្រស្នើសុំរដ្ឋាភិបាលកម្ពុជាជួយសម្របសម្រួល ដើម្បីបាននិមន្តចូលប្រទេសកម្ពុជា និងកុំចាប់បញ្ជូនព្រះអង្គទៅឱ្យសមត្ថកិច្ចថៃ។

ជាការឆ្លើយតបទៅនឹងការបិណ្ឌបាតរបស់លោកតា ស៊ុច នៅយប់ថ្ងៃទី១៩ ខែមិថុនា សម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា ប្រកាសស្វាគមន៍លោកតា ស៊ុច សម្រាប់និមន្តចូលមកក្នុងប្រទេសកម្ពុជាគ្រប់ពេលវេលា។ មិនត្រឹមតែចំពោះលោកតាស៊ុច មួយអង្គទេ ក្នុងករណីព្រះតេជគុណ ព្រះថេរានុថេរៈអង្គផ្សេងទៀត ឬប្រជាពលរដ្ឋខ្មែរ ដែលទទួលរងនូវការរើសអើង ឬការមាក់ងាយ ដោយសារតែខ្លួនជាខ្មែរ ឬដោយសារមានសង្ឃដីកា ឬបញ្ចេញមតិការពារនូវយុត្តិធម៌ សេចក្តីថ្លៃថ្នូរ និងភាពត្រឹមត្រូវរបស់កម្ពុជា ក្នុងការការពារបូរណភាពទឹកដីរបស់ខ្លួន សម្ដេចធិបតី ហ៊ុន ម៉ាណែត ប្រកាសនិមន្តនិងអញ្ជើញព្រះតេជគុណ និងប្រជាពលរដ្ឋរស់នៅនៅប្រទេសកម្ពុជាវិញ។

សម្ដេចធិបតី ហ៊ុន ម៉ាណែត អះអាងថា រាជរដ្ឋាភិបាលកម្ពុជា និងប្រជាជនខ្មែរស្វាគមន៍ព្រះតេជគុណគ្រប់ព្រះអង្គ និងប្រជាគ្រប់ពេលវេលា ហើយធានាថានឹងមិនមានការរើសអើង ឬចាប់ជនជាតិខ្មែរបញ្ជូនទៅប្រទេសណាផ្សេងនោះឡើយ។

នៅរសៀលថ្ងៃទី២០ ខែមិថុនា សម្ដេចតេជោ ហ៊ុន សែន អបអរសាទរជាមួយចំពោះលោកតា ស៊ុច ដែលនាយករដ្ឋមន្ត្រី ហ៊ុន ម៉ាណែត ស្វាគមន៍ទទួលយកមកគង់នៅកម្ពុជា។ សម្ដេចតេជោ ហ៊ុន សែន អរគុណនាយករដ្ឋមន្ត្រី ហ៊ុន ម៉ាណែត និងរាជរដ្ឋាភិបាលកម្ពុជា ដែលមានចិត្តសប្បុរសសម្រាប់លោកតា ស៊ុច និងសង្ឃឹមថា សម្ដេចនាយករដ្ឋមន្ត្រី នឹងទូលស្នើសុំព្រះមហាក្សត្រ ប្រគេនសញ្ជាតិខ្មែរដល់លោកឪស៊ុចផងដែរ ដើម្បីព្រះអង្គបំពេញកាងារក្នុងជាជនជាតិខ្មែរ។

ប៉ុន្តែទន្ទឹមនឹងនេះ សម្ដេច ហ៊ុន សែន ដាក់ក្ដីសង្ឃឹមថា រឿងលោកតាស៊ុច នឹងមិនបង្កការរំខានដល់ទំនាក់ទំនងកម្ពុជា-ថៃ ឬថាជាការលូកដៃចូលកិច្ចផ្ទៃក្នុងរបស់ថៃនោះទេ ព្រោះកម្ពុជាក៏មិនអនុញ្ញាតឲ្យលោកតាស៊ុច កសាងកម្លាំងប្រឆាំងជាមួយថៃនោះឡើយ។

យ៉ាងណានៅព្រឹកថ្ងៃទី០២ ខែកក្កដា លោកតា ស៊ុច បាននិមន្តមកដល់កម្ពុជា ដូចទៅនឹងការនិមន្តរបស់សម្ដេចធិបតី ហ៊ុន ម៉ាណែត។ នៅពេលនិមន្តមកដល់អាកាសយាន្តដ្ឋានអន្តរជាតិភ្នំពេញ លោកតា ស៊ុច មានថេរដីការអរគុណចំពោះសម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា ដែលផ្ដល់ក្ដីមេត្តាដល់ព្រះអង្គឱ្យបាននិមន្តចូលមកគង់នៅក្នុងព្រះរាជាណាចក្រកម្ពុជា និងបានអរគុណដល់សម្ដេចតេជោ ហ៊ុន សែន ដែលបានស្វាគមន៍ និងអរគុណពុទ្ធបរិស័ទខ្មែរដែលបានទៅទទួលដល់អាកាសយានដ្ឋានអន្តរជាតិភ្នំពេញ៕

ដោយ៖ ង៉ិល ណារ៉ាត់

The post សម្ដេច ហ៊ុន ម៉ាណែត សង្ឃឹមថាលោកតា ស៊ុច នឹងជួយអប់រំពលរដ្ឋខ្មែរតាមផ្លូវព្រះធម៌នៃព្រះពុទ្ធសាសនា appeared first on Kampuchea Thmey Daily.

សម្ដេច យ៉ន សេងយៀត នឹងធ្វើដំណើរធម្មយាត្រាថ្មើរជើងតាមជួរភ្នំក្រវាញ ៣២ថ្ងៃ ដើម្បីពុទ្ធសាសនា និងបរិស្ថាន

អុន ស្រីមាន — Wed, 28 May 2025 04:06:52 +0000

សម្ដេចព្រះមហាអរិយវង្ស បណ្ឌិត យ៉ន សេងយៀត ព្រះសាកលវិទ្យាធិការពុទ្ធិកសាកលវិទ្យាល័យព្រះសីហនុរាជ រួមជាមួយព្រះសង្ឃ និងគ្រហស្ថចំនួន ៣០អង្គ/នាក់ នឹងធ្វើដំណើរធម្មយាត្រាថ្មើរជើងរយៈពេល៣២ថ្ងៃ តាមតំបន់ជួរភ្នំក្រវាញ ដោយឆ្លងកាត់ខេត្ត៣ គឺខេត្តកោះកុង កំពង់ស្ពឺ និងពោធិ៍សាត់ ក្នុងចម្ងាយចន្លោះ ២៧០គីឡូម៉ែត្រ ទៅ៣០០គីឡូម៉ែត្រ ដើម្បីផ្សព្វផ្សាព្រះពុទ្ធសាសនា និងរួមចំណែកអភិរក្សបរិស្ថាន។

តាមរយៈការបង្ហោះវីដេអូរបស់សម្ដេចព្រះមហាអរិយវង្ស បណ្ឌិត យ៉ន សេងយៀត លើបណ្តាញសង្គម បានឱ្យដឹងថា ដំណើរធម្មយាត្រាថ្មើរជើង របស់ព្រះអង្គនឹងធ្វើចាប់ពីថ្ងៃទី២៩ ខែឧសភា ដល់ថ្ងៃទី១ ខែកក្កដា ឆ្នាំ២០២៥ ដើរក្រោមប្រធានបទ (ដំណើរអភិរក្ស-Walk to Preserve) ដើម្បីពុទ្ធសាសនា និងបរិស្ថាន។ តាមរយៈវីដេអូរបស់ សម្ដេចព្រះមហាអរិយវង្ស បណ្ឌិត យ៉ន សេងយៀត បញ្ជាក់ថា គោលបំណងនៃការធ្វើធម្មយាត្រានេះ គឺដើម្បីលើកកម្ពស់អំពីការយល់ដឹងនៃសារសំខាន់ព្រៃឈើ ចូលរួមជាមួយរដ្ឋាភិបាលក្នុងការថែរក្សាអភិរក្សព្រៃឈើ និងចូលរួមលើកកម្ពស់ពីទេសចរណ៍ធម្មជាតិ។

សម្ដេចព្រះមហាអរិយវង្ស បណ្ឌិត យ៉ន សេងយៀត មានសង្ឃដីកាសំណូមពរថា៖ “ព្រៃឈើគឺជាដង្ហើមរស់នៃមនុស្សជាតិ សូមញាតិញោមពុទ្ធបរិស័ទ និងប្រជាពលរដ្ឋខ្មែរគ្រប់រូប ចូលរួមថែរក្សាអភិរក្សព្រៃឈើរបស់យើង”។

សូមជម្រាបថា ចំពោះដំណើរធម្មយាត្រាថ្មើរជើងតាមជួរភ្នំក្រវាញរបស់ សម្ដេច យ៉ន សេងយៀត ត្រូវបានឧបត្ថម្ភដោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនណម៉ាណែត លោក ស សុខា និងភរិយា លោក ពេជ សោភ័ន និងភរិយា លោក ហួត ហាក់ និងភរិយា រួមជាមួយអ្នកឧបត្ថម្ភជាច្រើនរូបទៀត៕

The post សម្ដេច យ៉ន សេងយៀត នឹងធ្វើដំណើរធម្មយាត្រាថ្មើរជើងតាមជួរភ្នំក្រវាញ ៣២ថ្ងៃ ដើម្បីពុទ្ធសាសនា និងបរិស្ថាន appeared first on Kampuchea Thmey Daily.

សម្ដេចធិបតីឱ្យក្រសួងធម្មការ ពិចារណាដាក់«សមាធិ»ក្នុងកម្មវិធីសិក្សារបស់ពុទ្ធិកសិក្សា

Thoeun Vansong — Fri, 14 Mar 2025 03:38:41 +0000

ថ្លែងក្នុងឱកាសអញ្ជើញស្រោចស្រពព្រះសុគន្ធវារីថ្វាយ និងប្រគេនសម្ដេចព្រះសង្ឃជាន់ខ្ពស់ព្រះពុទ្ធសាសនា នាព្រឹកថ្ងៃទី១៤ ខែមីនា ឆ្នាំ២០២៥នេះ សម្ដេចធិបតី ហ៊ុន ម៉ាណែត បានចង្អុលបង្ហាញឱ្យក្រសួងធម្មការ ពិចារណាដាក់ «ប្រតិបត្តិសមាធិ» ក្នុងកម្មវិធីសិក្សារបស់ពុទ្ធិកសិក្សា ដើម្បីជាការធានាបាននូវសុខភាពផ្លូវកាយ ចិត្ត និងស្មារតី។

បំណងចង់ឱ្យដាក់បញ្ចូលកម្មវិធីប្រតិបត្តិសមាធិក្នុងកម្មវិធីសិក្សារបស់ពុទ្ធិកសិក្សាគ្រប់កម្រិត គឺត្រូវបានសម្តេចធិបតី ហ៊ុន ម៉ាណែត គូសបញ្ជាក់ថា ដើម្បីពង្រឹងគុណភាពអប់រំ កសាងឱ្យបានមូលធនមនុស្ស មានទាំងសុខភាពផ្លូវកាយ សុខភាពផ្លូវចិត្ត បញ្ញាស្មារតី និងការទទួលខុសត្រូវក្នុងការរស់នៅក្នុងសង្គម។

ភ្ជាប់ជាមួយគ្នានេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏ណែនាំឱ្យក្រសួងធម្មការ និងសាសនា សហការជាមួយគណៈសង្ឃទាំងពីរគណៈ ក្នុងការរៀបចំបណ្តុះបណ្តាលតួនាទី ភារកិច្ចដល់ព្រះមន្ត្រីសង្ឃ អាចារ្យ គណៈកម្មការវត្ត ជាពិសេសប្រព័ន្ធសង្ឃាភិបាល ឱ្យបានទូលំទូលាយទូទាំងប្រទេស ដើម្បីពង្រឹងសមត្ថភាព និងបង្កើនការយល់ដឹងពីតួនាទី និងភារកិច្ច ស្របតាមបទដ្ឋានគតិយុត្ត សំដៅបង្ការ ទប់ស្កាត់ និងកាត់បន្ថយឱ្យបាននូវអធិករណ៍តាមវត្តអារាម។

នៅចំពោះព្រះវត្តមានសម្ដេចព្រះសង្ឃនាយក សម្ដេចព្រះសង្ឃនាយករង សម្តេច ព្រះរាជាគណៈ ព្រះថេរានុត្ថេរៈគ្រប់ព្រះអង្គ សម្ដេចធិបតី ហ៊ុន ម៉ាណែត ក៏បានបន្តទទូចឱ្យជួយដល់សង្គមលើការលើកកម្ពស់គុណធម៌ សីលធម៌ សុជីវធម៌ ថែរក្សាវប្បធម៌ ប្រពៃណី ទំនៀមទម្លាប់ដ៏ល្អ របស់ជាតិ តាមរយៈការសម្តែងធម្មទេសនានៅគ្រប់ទីកន្លែង និងការផ្សព្វផ្សាយតាមបណ្តាញសង្គមផ្សេងៗ ដើម្បីជួយឱ្យប្រជាជនមានព្រហ្មវិហារធម៌ កាត់បន្ថយអំពើអនាចារ អបាយមុខ អំពើហិង្សា អសីលធម៌ និងជួយឱ្យសង្គមជាតិ មានសុខដុមរមនា និងពង្រឹងសាមគ្គីធម៌។

តាមរបាយការណ៍របស់រដ្ឋមន្ត្រីក្រសួងធម្មការ និងសាសនា លោក ចាយ បូរិន គិតទល់បច្ចុប្បន្ន នៅទូទាំងប្រទេសកម្ពុជា មានវត្តចំនួន ៥ ១៤៦វត្ត មានព្រះសង្ឃសរុបចំនួន ៧១ ១៧៩ព្រះអង្គ ហើយលើវិស័យពុទ្ធិកសិក្សា បានបណ្ដុះបណ្ដាលព្រះសង្ឃ តាំងពីថ្នាក់ធម្មវិន័យ ពុទ្ធិកបឋមសិក្សា រហូតដល់ពុទ្ធិកឧត្តមសិក្សា និងក្រោយឧត្តមសិក្សា៕

ដោយ៖ ធឿន វ៉ាន់សុង

The post សម្ដេចធិបតីឱ្យក្រសួងធម្មការ ពិចារណាដាក់«សមាធិ»ក្នុងកម្មវិធីសិក្សារបស់ពុទ្ធិកសិក្សា appeared first on Kampuchea Thmey Daily.