ព័ត៌មានជាតិ

ឧបនាយករដ្ឋមន្ត្រី ហង់ជួន ណារ៉ុន៖ ព្រះពុទ្ធសាសនាគឺជាមាគ៌ាមួយដ៏សំខាន់ក្នុងការបង្កើតសាមគ្គីភាព ភាតរភាព និងរក្សាសន្តិភាព

បានផុស

៣ ខែ មុន

នៅ

ថ្ងៃពុធ ៨ មេសា ២០២៦

ដោយ

ឧបនាយករដ្ឋមន្ត្រី ហង់ជួន ណារ៉ុន មានប្រសាសន៍ថា បញ្ហាក្នុងពិភពលោកបច្ចុប្បន្ននេះ ធ្វើឱ្យមនុស្សរស់នៅមិនចុះសម្រុង គ្មានការយោគយល់ បង្កើតជាបញ្ហាសង្គម សេដ្ឋកិច្ច និងសាសនាទៀតផង។ លោកថាការកសាងបាននូវសាមគ្គីភាព ភាតរភាព និងសន្តិភាព គឺជារឿងដែលសំខាន់សម្រាប់សន្តិភាព និងការអភិវឌ្ឍន៍ ដែលនេះគឺជាមាគ៌ាដ៏សំខាន់របស់ព្រះពុទ្ធសាសនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងទិវាព្រះពុទ្ធសាសនាអន្តរជាតិ ឆ្នាំ២០២៦ ព្រឹកថ្ងៃទី៨ ខែមេសា ឆ្នាំ២០២៦នេះ នៅសាលសន្និសីទចតុម្មុខ លោកឧបនាយករដ្ឋមន្ត្រី ហង់ជួន ណារ៉ុន មានប្រសាសន៍ថា ទិវាព្រះពុទ្ធសាសនាអន្តរជាតិ នៅព្រះរាជាណាចក្រកម្ពុជា នាពេលនេះ សមស្របទៅនឹងបរិបទនៃពិភពលោកបច្ចុប្បន្ន កំពុងប្រឈមនឹងវិបត្តិជាច្រើនដូចជា ជម្លោះប្រដាប់អាវុធ សង្គ្រាមសេដ្ឋកិច្ច ការបម្រែបម្រួលអាកាសធាតុ ភាពឡើងកំដៅនៃភូមិសាស្ត្រនយោបាយ ភាពផុយស្រួយនៃជម្លោះសាសនា ការបំពុលបរិស្ថាន ជំងឺឆ្លង និងគម្លាតសង្គម ធ្វើឱ្យមនុស្សរស់នៅមិនមានភាពចុះសម្រុង និងមិនយោគយល់គ្នា ព្រមទាំងបង្កភាពរាំងស្ទះដល់ការរីកចម្រើនរបស់សង្គម ហើយវិបត្តិទាំងនោះ បានក្លាយជាបញ្ហារួមនៅក្នុងសង្គម ក្នុងតំបន់ ក៏ដូចជាពិភពលោក ធ្វើឱ្យប៉ះពាល់ដល់សន្តិសុខ សណ្តាប់ធ្នាប់សង្គម សេដ្ឋកិច្ច និងវិស័យសាសនាទៀតផង។

លោកឧបនាយករដ្ឋមន្ត្រីបានបន្ថែមថា ព្រះពុទ្ធសាសនា គឺជាមាគ៌ាមួយដ៏សំខាន់ក្នុងការបង្កើតនូវសាមគ្គីភាព ភាតរភាព និងរក្សាសន្តិភាព តាមរយៈការផ្តល់ឱវាទដោយផ្អែកលើព្រហ្មវិហារធម៌ សង្គហធម៌ និងមាគ៌ាកណ្តាល ដែលអាចជួយឱ្យបុគ្គល គ្រួសារ សង្គម និងពិភពលោកប្រកាន់យកនូវវប្បធម៌អហិង្សា ការគោរពអធ្យាស្រ័យយោគយល់គ្នាខ្ពស់ ការប្រកាន់យកនូវសីលធម៌រស់នៅល្អ សុខដុមរមនា ដែលជាឧបករណ៍ចាំបាច់សម្រាប់សន្តិភាព និងការអភិវឌ្ឍប្រកបដោយចីរភាព។

ក្នុងឱកាសនោះលោកឧបនាយករដ្ឋមន្ត្រី ហង់ជួន ណារ៉ុន បានផ្ដល់នូវទស្សនាទានមួយចំនួនដែលមានដូចជា ការជំរុញបំផុសប្រធានបទនៃទិវាពុទ្ធសាសនាពិភពលោកនាថ្ងៃនេះឱ្យបានទូលំទូលាយប្រែក្លាយជាសកម្មភាពជាក់ស្ដែងដើម្បីធានាសុខដុមរមនានៅក្នុងសង្គម និងសន្ដិភាពសម្រាប់ពិភពលោក។ ការចូលរួមអភិវឌ្ឍព្រះពុទ្ធសាសនាឱ្យកាន់តែរីកចម្រើន ដោយលើកកម្ពស់តួនាទីព្រះពុទ្អសាសនាក្នុងសង្គមតាមរយៈការអប់រំលើកកម្ពស់សីលធម៌សង្គម និងសុខភាពផ្លូវចិត្តរបស់ប្រជាជន។ ជំរុញការយល់ដឹងរបស់ពលរដ្ឋចំពោះព្រះពុទ្ធសាសនាឱ្យបានស៊ីជម្រៅ និងគោរពប្រតិបត្តិត្រឹមត្រូវ និងការបន្តរក្សាសាមគ្គីភាពគ្នាជាធ្លុងមួយដើម្បីរក្សានូវឧត្តមប្រយោជន៍ជាតិ។

គួរឱ្យដឹងផងដែរថា ទិវាព្រះពុទ្ធសាសនាអន្តរជាតិ ក្នុងឆ្នាំ២០២៦នេះ ត្រូវបានប្រារព្ធឡើងក្រោមប្រធានបទ «ពង្រឹងសាមគ្គីធម៌ ជំរុញសន្តិភាព តាមរយៈមាគ៌ាព្រះពុទ្ធសាសនា»។ ទិវានេះត្រូវបានរៀបចំនៅសាលសន្និសីទចតុម្មុខ ដោយមានការយាននិមន្ត្ត និងអញ្ជើញចូលរួមពី សម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា, សម្តេចព្រះមហាសុមេធាធិបតី កិត្តិបណ្ឌិត អំ លីមហេង សម្តេចព្រះសង្ឃនាយក គណៈមហានិកាយ សម្តេចសង្ឃព្រះសង្ឃនាយករង សម្ដេចព្រះរាជាគណៈ ព្រះមន្រ្តីសង្ឃ,មន្ត្រីរដ្ឋាភិបាល តំណាងអង្គទូត និង តំណាងសាសនិកគ្រប់សាសនា ព្រមទាំងនិស្សិតសរុបចំនួនជាង៩០០អង្គ/នាក់។

ពិធីនេះក៏មានការឡើងអានព្រះរាជសារថ្វាយព្រះពរព្រះមហាក្សត្រដោយសម្ដេចសង្ឃទាំងពីរគណៈ និងការឡើងអានព្រះរាជសារព្រះមហាក្សត្រ និងសុន្ទរកថាស្វាគមន៍ដោយរដ្ឋមន្ត្រីក្រសួងធម្មការលោក ចាយ បូរិន ផងដែរ៕