ភេរវករ Archives - Kampuchea Thmey Daily

យោធាអាមេរិកសម្លាប់មនុស្ស១៥៧នាក់ដោយចោទជាភេរវករ ប៉ុន្តែអ្នកជំនាញថា «ខុសច្បាប់»

Minea Neu — Wed, 18 Mar 2026 02:57:07 +0000

យោធាសហរដ្ឋអាមេរិក បានបញ្ជាក់ថា មនុស្សយ៉ាងហោចណាស់១៥៧នាក់ត្រូវបានសម្លាប់ នៅក្នុងការវាយប្រហារដ៏សាហាវប្រឆាំងនឹងក្រុមដែលអាមេរិកចោទថា ជា«ពួកភេរវករ» ជួញដូរគ្រឿងញៀននៅឯនាយសមុទ្រអាមេរិកឡាទីន តែអ្នកជំនាញផ្នែកច្បាប់អន្តរជាតិ បានពិពណ៌នាថា ជា«យុទ្ធនាការសម្លាប់ក្រៅប្រព័ន្ធតុលាការ»។

មន្ត្រីជាន់ខ្ពស់ការពារជាតិ លោក Joseph Humire និយាយថា៖ «នាវាជួញដូរគ្រឿងញៀនចំនួន ៤៧គ្រឿងត្រូវបានវាយប្រហារក្នុងតំបន់ការ៉ាប៊ីន និងប៉ាស៊ីហ្វិកខាងកើតចាប់តាំងពីយុទ្ធនាការនេះបានចាប់ផ្តើមក្នុងខែកញ្ញាឆ្នាំមុន»។ នេះបើយោងតាម Al Jazeera ផ្សាយថ្ងៃទី១៧ ខែមីនា ឆ្នាំ២០២៦ ។

ទូកដែលអាមេរិកថាពាក់ព័ន្ធគ្រឿងញៀន។ រូបភាព៖ Reuters

ទោះបីយ៉ាងណានៅថ្ងៃអង្គារពេលអ្នកតាក់តែងច្បាប់សួរថាតើបរិមាណគ្រឿងញៀនដែលចូលសហរដ្ឋអាមេរិកថយចុះឬអត់? លោក Humire ឆ្លើយថា៖ «នាវាចរជួញដូរគ្រឿងញៀនបានថយចុះ ២០ភាគរយក្នុងតំបន់ការ៉ាប៊ីន។ យើងបានវាស់វែងពីការថយចុះនៃការចល័តរបស់នាវា»។

ចំណែក លោក Adam Smith អ្នកតំណាងរាស្ត្រឆ្លើយតបវិញថា៖ «ប៉ុន្តែនោះជាការបដិសេធទាក់ទងនឹងគ្រឿងញៀនពីចំនួនពិតដែលចូលក្នុងសហរដ្ឋអាមេរិក»។

អ្នកជំនាញសម្តែងការសង្ស័យថា ការវាយប្រហារទាំងនេះមានផលប៉ះពាល់គួរឱ្យកត់សម្គាល់លើការជួញដូរគ្រឿងញៀន ហើយអ្នកជំនាញផ្នែកច្បាប់លើកឡើងថា៖ «យុទ្ធនាការនេះគឺជាការរំលោភច្បាប់អន្តរជាតិយ៉ាងច្បាស់ ហើយកំពុងធ្វើឱ្យមានភាពស្រពេចស្រពិលរវាងជម្លោះប្រដាប់អាវុធ និងសកម្មភាពឧក្រិដ្ឋកម្ម»។

យោងតាមច្បាប់អន្តរជាតិ ជម្លោះប្រដាប់អាវុធ សង្គ្រាម ឬភាពជាសត្រូវ (អរិភាព) រវាងរដ្ឋ ឬក្រុមប្រដាប់អាវុធដែលមានការរៀបចំ ក្នុងកាលៈទេសៈទាំងនោះ ច្បាប់អន្តរជាតិ (ដូចជាធម្មនុញ្ញអង្គការសហប្រជាជាតិ និងច្បាប់សង្គ្រាម) ទទួលស្គាល់ថា កម្លាំងយោធាអាចប្រើប្រាស់បាន ប៉ុន្តែក្នុងដែនកំណត់តឹងរ៉ឹងប៉ុណ្ណោះ។

រីឯសកម្មភាពឧក្រិដ្ឋកម្ម ដូចជាការជួញដូរគ្រឿងញៀន ឬការរត់ពន្ធ ទាំងនេះមិនមែនជាសកម្មភាពសង្គ្រាមទេ ដូច្នេះច្បាប់អន្តរជាតិមិនអនុញ្ញាតឱ្យរដ្ឋប្រើប្រាស់កម្លាំងយោធាប្រឆាំងនឹងពួកគេទេ។

គួរបញ្ជាក់ថា រដ្ឋបាល លោក ដូណាល់ ត្រាំ យកវិធីសាស្រ្តយោធានិយមក្នុងការប្រយុទ្ធប្រឆាំងនឹងការជួញដូរគ្រឿងញៀន អនុញ្ញាតឱ្យសហរដ្ឋអាមេរិកពង្រីកឥទ្ធិពលយោធានៅទូទាំងតំបន់៕

ប្រែសម្រួល៖ ណឺ មិនា

The post យោធាអាមេរិកសម្លាប់មនុស្ស១៥៧នាក់ដោយចោទជាភេរវករ ប៉ុន្តែអ្នកជំនាញថា «ខុសច្បាប់» appeared first on Kampuchea Thmey Daily.

ការវាយប្រហារដ៏ខ្លាំងក្លាមួយ នៅនីហ្សេរីយ៉ា សម្លាប់មនុស្ស ១៦២នាក់

Minea Neu — Fri, 06 Feb 2026 10:56:56 +0000

ការវាយប្រហារដ៏ខ្លាំងក្លាមួយបានកើតឡើង កាលពីល្ងាចថ្ងៃអង្គារ លើភូមិ Woro ក្នុងរដ្ឋ Kwara បន្ទាប់ពីយោធានីហ្សេរីយ៉ា បានធ្វើប្រតិបត្តិការក្នុងតំបន់ប្រឆាំងនឹងភេរវករ។ ភេរវករ ដែលជាខ្មាន់កាំភ្លើងបានដុតហាង និងផ្ទះរបស់ពលរដ្អ្ន ចំណែក អ្នករងរបួសមួយចំនួនបានរត់ចូលព្រៃ។ នេះបើតាមរដ្ឋលេខាធិការកាកបាទក្រហមតំបន់ Kwara បានប្រាប់ភ្នាក់ងារ AFP។

លោក Bola Ahmed Tinubu ក្នុងសន្និសីទ្ធសារព័ត៌មានមួយ។ Reuters

ប្រធានាធិបតីនីហ្សេរីយ៉ា (Nigeria) លោក Bola Ahmed Tinubu បានដាក់ពង្រាយកម្លាំង ទៅប្រចាំការក្នុងរដ្ឋដែលមានការប្រយុទ្ធគ្នា បន្ទាប់ពីខ្មាន់កាំភ្លើងបានសម្លាប់មនុស្សដល់ទៅ១៦២នាក់ នៅក្នុងការវាយប្រហារដ៏សាហាវបំផុតមួយរបស់ប្រទេសខ្លួន ក្នុងរយៈពេលប៉ុន្មានខែថ្មីៗនេះ។

ចំណែក លោក Babaomo Ayodeji រដ្ឋលេខាធិការកាកបាទក្រហម បាននិយាយថា៖ «ចំនួនអ្នកស្លាប់ឥឡូវនេះមានចំនួន ១៦២ នាក់ ខណៈការស្វែងរកសាកសពបន្ថែម នៅតែបន្ត»។

គួរឱ្យដឹងថា ការវាយប្រហារនេះត្រូវបានរាយការណ៍ដោយប៉ូលិស តែមិនបានប្រាប់ពីតួលេខអ្នករងរបួសទាំងអស់នៅឡើយទេ។

នៅមុននេះ សមាជិកសភាក្នុងស្រុក លោក Sa’idu Baba Ahmed បានឱ្យដឹងថាចំនួនអ្នកស្លាប់ដំបូងរកឃើញ ៣៥ ទៅ ៤០ នាក់។

លោកបានបន្ថែមថា៖ « ចំនួនសាកសពនឹងត្រូវរកឃើញបន្ថែមទៀត ខណៈដែលអ្នករបួសជាច្រើននាក់បានរត់ចូលទៅក្នុងព្រៃ»។

ចំណែកអភិបាលរដ្ឋភាគខាងលិច និងកណ្តាល លោក AbdulRahman AbdulRazaq បានផ្តល់ព័ត៌មានថាមានចំនួនអ្នកស្លាប់ចំនួន ៧៥នាក់ ។

គួរឱ្យដឹងថា ករណីជម្លោះដែលកើតមានញឹកញាប់ គឺជាការវាយប្រហារនៅតំបន់ជនបទ។

យ៉ាងណាគ្មានក្រុមណាមួយទទួលខុសត្រូវទេលើរឿងនេះឡើយ ប៉ុន្តែរដ្ឋាភិបាលបានស្តីបន្ទោសលើពួកភេរវករ។

គួរឱ្យដឹងថា ផ្នែកខ្លះនៃប្រទេសនីហ្សេរីយ៉ាត្រូវបានញាំញីដោយក្រុមក្មេងទំនើងប្រដាប់អាវុធដែលលួចរបស់អ្នកភូមិ និងចាប់ជំរិតយកប្រាក់ ក៏ដូចជាអំពើហិង្សាដែលកើតឡើងក្នុងរដ្ឋ ជាពិសេសក្រុមជីហាដ ( jihadist) ដែលមានភាពសកម្មខ្លាំងនៅភាគខាងជើង។

សេចក្តីថ្លែងការណ៍មួយបាននិយាយថា៖ « ប្រធានាធិបតី លោក Tinubu បានសម្តែងការខឹងសម្បារ ដែលអ្នកវាយប្រហារបានសម្លាប់សមាជិកសហគមន៍។ ជាពិសេសបានបដិសេធការប៉ុនប៉ងដ៏គួរឱ្យស្អប់ខ្ពើម ដែលកើតឡើងក្នុងតំបន់នេះ»៕

ប្រែសម្រួល៖ ណឺ មិនា

The post ការវាយប្រហារដ៏ខ្លាំងក្លាមួយ នៅនីហ្សេរីយ៉ា សម្លាប់មនុស្ស ១៦២នាក់ appeared first on Kampuchea Thmey Daily.

យោធាអាមេរិកសម្លាប់មនុស្ស២នាក់សង្ស័យ «ភេរវករគ្រឿងញៀន» ប៉ុន្តែក្រុមសិទ្ធិមនុស្ស ថាខុសច្បាប់អន្តរជាតិ

Minea Neu — Fri, 06 Feb 2026 10:46:36 +0000

យោធាសហរដ្ឋអាមេរិកបានឱ្យដឹងថា ខ្លួនបានសម្លាប់មនុស្សពីរនាក់នៅក្នុងការវាយប្រហារចុងក្រោយលើនាវានៅភាគខាងកើតមហាសមុទ្រប៉ាស៊ីហ្វិក (Pacific Ocean)។

ទីបញ្ជាការខាងត្បូងរបស់សហរដ្ឋអាមេរិក (SOUTHCOM) បានត្រួតពិនិត្យប្រតិបត្តិការយោធាអាមេរិក នៅអាមេរិកឡាទីន បាននិយាយនៅថ្ងៃព្រហស្បតិ៍ថា៖ «ភេរវករគ្រឿងញៀនពីរនាក់ ត្រូវបានសម្លាប់អំឡុងពេលប្រត្តិបត្តិការណ៍យោធា»។

កងកម្លាំងអាមេរិក។ Reuters

យ៉ាងណា ទីបញ្ជាការយោធាអាមេរិក SOUTHCOM មិនបានផ្តល់ភស្តុតាងណាមួយ គាំទ្រចំពោះការអះអាងរបស់ខ្លួន ដែលថានាវានិងជនរងគ្រោះទាំងពីរនាក់ជាប់ពាក់ព័ន្ធនឹងការជួញដូរគ្រឿងញៀននោះទេ។

យោងតាមការចុះផ្សាយរបស់ Al Jazeera កាលពីថ្ងៃទី៦ខែកុម្ភៈ ការវាយប្រហាររបស់សហរដ្ឋអាមេរិកមកលើនាវានៅតំបន់ប៉ាស៊ីហ្វិក និងការាបៀន (Caribbean) បានសម្លាប់មនុស្ស ១២៦នាក់ នៅលើការវាយប្រហារជាង ៣៤ លើក ចាប់តាំងពីឧប្បត្តិហេតុលើកដំបូង នៅក្នុងខែកញ្ញា ឆ្នាំ ២០២៥។ នេះបើយោងតាមក្រុមឃ្លាំមើលរបស់អង្គភាព Airwars និងលើកឡើងថាការធ្វើបែបនេះ គឺខុសច្បាប់អន្តរជាតិ។

គួរឱ្យដឹងថា បូករួមការសម្លាប់ចុងក្រោយបំផុត ចំនួនអ្នកស្លាប់ដោយសារការវាយប្រហាររបស់អាមេរិក បានកើនឡើងដល់ទៅ ១២៨នាក់។

រដ្ឋបាល លោក ដូណាល់ ត្រាំ បានប្រដូចការវាយប្រហាររបស់ខ្លួន ទៅនឹងការវាយប្រហារគ្រឿងញៀន និងបានចាត់ថ្នាក់ការបាញ់ប្រហារនោះជាក្រុមឧក្រិដ្ឋជន ដែលពាក់ព័ន្ធនឹងការជួញដូរគ្រឿងញៀន ពិសេសថាជាអង្គការ «ភេរវករ»។

ចំណែកអ្នកច្បាប់អន្តរជាតិ ក្រុមធ្វើការលើសិទ្ធិមនុស្ស និងមេដឹកនាំក្នុងតំបន់ផ្សេងទៀត បានច្រានចោលការអះអាងរបស់សហរដ្ឋអាមេរិក ដោយព្រមានថា៖ « កូដកម្មនេះជាការសម្លាប់ក្រៅប្រព័ន្ធតុលាការ ហើយគ្មានរដ្ឋណាបញ្ចប់ជម្លោះដោយអាវុធទេ វាក៏គ្មានភាពត្រឹមត្រូវនៃប្រតិបត្តិការបែបនេះទេដែរ»។

គួរបញ្ជាក់ថា នាវាជាង ៣៨ ត្រូវបានវាយប្រហារដោយកងកម្លាំងសហរដ្ឋអាមេរិកចំនួន ៣៦ លើក។

លោក Ben Saul អ្នករាយការណ៍ពិសេសរបស់អង្គការសហប្រជាជាតិ(UN) ទទួលបន្ទុកការពារសិទ្ធិមនុស្ស ប្រឆាំងភេរវកម្មបាននិយាយលើកមុនថា៖ « គ្មានសិទ្ធិអំណាចណាមួយក្នុងច្បាប់អន្តរជាតិ អាចប្រើប្រាស់កម្លាំងយោធានៅលើសមុទ្រ ក្នុងការសម្លាប់អ្នកជួញដូរគ្រឿងញៀន ដែលសង្ស័យថាជាក្រុមឧក្រិដ្ឋជន ឬក្រុមណាមួយផ្សេងទៀតនោះទេ»៕

ប្រែសម្រួល៖ ណឺ មិនា

The post យោធាអាមេរិកសម្លាប់មនុស្ស២នាក់សង្ស័យ «ភេរវករគ្រឿងញៀន» ប៉ុន្តែក្រុមសិទ្ធិមនុស្ស ថាខុសច្បាប់អន្តរជាតិ appeared first on Kampuchea Thmey Daily.

អឺរ៉ុបដាក់បញ្ចូល «កងឆ្មាំបដិវត្តិន៍អ៊ីរ៉ង់» ជាអង្គការភេរវករជាផ្លូវការជាថ្មី

Minea Neu — Fri, 30 Jan 2026 03:59:35 +0000

រដ្ឋមន្ត្រីការបរទេសសហភាពអឺរ៉ុប បានថ្លែងកាលពីថ្ងៃព្រហស្បតិ៍ថា អឺរ៉ុបអនុម័តដាក់បញ្ចូល«កងឆ្មាំបដិវត្តន៍អ៊ីរ៉ង់» ក្នុងបញ្ជីនៃអង្គការភេរវករជាថ្មីម្តងទៀត។ ឆ្មាំដ៏មានឥទ្ធិពលនេះ ស្រដៀងទៅនឹងក្រុមរដ្ឋអ៊ីស្លាម និងអាល់កៃដា ( al Qaeda) ដែលអឺរ៉ុបសម្គាល់ការផ្លាស់ប្តូរដ៏សំខាន់ចំពោះការដឹកនាំរបស់អ៊ីរ៉ង់។

លោកស្រី Kaja Kallas. Reuters

ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas បានសរសេរនៅលើបណ្តាញសង្គម X ថា៖«របបណាដែលសម្លាប់ប្រជាជនខ្លួនឯងរាប់ពាន់នាក់បែបនោះ គឺកំពុងដើរឆ្ពោះទៅរកការសម្លាប់ខ្លួនឯងហើយ»។

គួរឱ្យដឹងថា កងឆ្មាំបដិវត្តន៍អ៊ីរ៉ង់បង្កើតឡើង បន្ទាប់ពីបដិវត្តន៍អ៊ីស្លាម ឆ្នាំ ១៩៧៩ ដើម្បីការពារប្រព័ន្ធគ្រប់គ្រងមដឹកនាំសាសនាអ៊ីស្លាមនិកាយស៊ីអ៊ីត (Shi’ite) [សំដៅដល់ទម្រង់របស់រដ្ឋាភិបាល ដែលបង្ហាញជាផ្លូវការដោយសាធារណរដ្ឋអ៊ីរ៉ង់]។

កងឆ្មាំបដិវត្តន៍អ៊ីរ៉ង់ (IRGC) មានឥទ្ធិពលយ៉ាងខ្លាំងនៅក្នុងប្រទេសអ៊ីស្លាមមួយនេះ ដោយគ្រប់គ្រងផ្នែកសេដ្ឋកិច្ច និងកងកម្លាំងប្រដាប់អាវុធ។ ឆ្មាំក៏ត្រូវដាក់ឱ្យទទួលខុសត្រូវលើកម្មវិធីមីស៊ីលផ្លោង និងនុយក្លេអ៊ែររបស់អ៊ីរ៉ង់ផងដែរ។

មិនតែប៉ុណ្ណោះ ប្រទេសជាសមាជិកសហភាពអឺរ៉ុបមួយចំនួន បានជំរុញឱ្យកងឆ្មាំបដិវត្តន៍អ៊ីរ៉ង់ (IRGC) បញ្ចូលទៅក្នុងបញ្ជីក្រុមភេរវករ របស់សហភាពអឺរ៉ុបកាលពីមុនរួចហើយ។

ចំណែក ប្រទេសខ្លះទៀតក៏មានការប្រុងប្រយ័ត្នជាងមុនចំពោះការដាក់បញ្ចូលនេះ ដោយបារម្ភថាវាអាចរារាំងដល់ការប្រាស្រ័យទាក់ទងជាមួយរដ្ឋាភិបាលអ៊ីរ៉ង់ និងបង្កគ្រោះថ្នាក់ដល់ពលរដ្ឋអឺរ៉ុបនៅក្នុងប្រទេសនេះ។

យ៉ាងណា ការបង្រ្កាបយ៉ាងឃោរឃៅលើចលនាតវ៉ាទូទាំងប្រទេសកាលពីដើមខែនេះ ដែលបានសម្លាប់មនុស្សរាប់ពាន់នាក់។

រដ្ឋមន្ត្រីការបរទេសហូឡង់ លោក David van Weel បាននិយាយកាលពីព្រឹកថ្ងៃព្រហស្បតិ៍ថា៖ « វាជារឿងសំខាន់ដែលយើងបញ្ចូលឆ្មាំបដិវត្តន៍ ជាអង្គការភេរវករ។ ចំណែកការបង្ហូរឈាម និងអំពើហិង្សាប្រឆាំងនឹងបាតុករដែលយើងបានឃើញ គឺមិនអាចអត់ឱនឱ្យបានទេ» ។

ចំណែក ប្រទេសបារាំង និងអ៊ីតាលី ដែលពីមុនមានការស្ទាក់ស្ទើរក្នុងការដាក់កងឆ្មាំបដិវត្តន៍អ៊ីរ៉ង់(IRGC) ជាអង្គការភេរវករ បានចេញគាំទ្រដល់ពួកគេនៅសប្តាហ៍នេះផងដែរ៕

ប្រែសម្រួល៖ ណឺ មិនា

The post អឺរ៉ុបដាក់បញ្ចូល «កងឆ្មាំបដិវត្តិន៍អ៊ីរ៉ង់» ជាអង្គការភេរវករជាផ្លូវការជាថ្មី appeared first on Kampuchea Thmey Daily.

បារាំងគាំទ្រអឺរ៉ុបចាត់ថ្នាក់ «ឆ្មាំបដិវត្តន៍អ៊ីរ៉ង់»ជាក្រុមភេរវករ វិញ

Minea Neu — Thu, 29 Jan 2026 04:36:26 +0000

ប្រទេសបារាំងបានលើកឡើងថា នឹងគាំទ្រសហភាពអឺរ៉ុប ក្នុងការដាក់អង្គភាពឆ្មាំបដិវត្តន៍អ៊ីស្លាមអ៊ីរ៉ង់ (IRGC) ជា «អង្គការភេរវករ» ឡើងវិញ ដែលខ្លួនធ្លាប់តែប្រឆាំងចំពោះចលនាពីមុនមក។

នៅក្នុងសេចក្តីថ្លែងការណ៍មួយដែលត្រូវបានចែករំលែកលើបណ្តាញសង្គមកាលពីថ្ងៃពុធ រដ្ឋមន្ត្រីការបរទេសបារាំង លោក Jean-Noel Barrot បានបង្ហោះសារថា ការកំណត់បែបនេះស្របទៅនឹងការបង្រ្កាបរបស់អាជ្ញាធរអ៊ីរ៉ង់ថ្មីៗនេះ លើការតវ៉ាប្រឆាំងរដ្ឋាភិបាលនៅទូទាំងប្រទេស។

លោក Jean-Noel Barrot ។ European Newsroom.

យោងតាម Al Jazeera, លោក បានសរសេរនៅលើបណ្តាញសង្គម X របស់ខ្លួនថា៖ «ការគាបសង្កត់ដែលមិនអាចទ្រាំទ្របាននៃការតវ៉ាដោយសន្តិវិធីរបស់ប្រជាជនអ៊ីរ៉ង់ មិនអាចគ្មានចម្លើយនោះទេ។ ភាពក្លាហានដ៏អស្ចារ្យរបស់ពួកគេក្នុងការប្រឈមមុខ នឹងអំពើហិង្សាដែលបានធ្វើមកលើពួកគេក៏មិនអាចគ្មានលទ្ធផលដែរ»។

លោកបានសង្កត់ធ្ងន់ទៀតថា៖ «ជាមួយនឹងដៃគូអឺរ៉ុបរបស់យើង យើងនឹងចាត់វិធានការនៅថ្ងៃស្អែក(ព្រហស្បតិ៍នេះ) នៅទីក្រុងព្រុចសែល ប្រឆាំងនឹងអ្នកដែលប្រព្រឹត្តអំពើឃោរឃៅទាំងនេះ។ ពួកគេនឹងត្រូវហាមឃាត់មិនឱ្យជាន់លើទឹកដីអឺរ៉ុប ហើយទ្រព្យសម្បត្តិទាំងប៉ុន្មាននឹងត្រូវបង្កក។ ជាងនេះបារាំងនឹងគាំទ្រការកំណត់កងឆ្មាំបដិវត្តន៍អ៊ីស្លាមក្នុងបញ្ជីអង្គការភេរវករអឺរ៉ុប»។

គួរបញ្ជាក់ថា រដ្ឋមន្ត្រីការបរទេសសហភាពអឺរ៉ុបនឹងជួបប្រជុំគ្នា នៅថ្ងៃព្រហស្បតិ៍នេះ នៅទីក្រុងព្រុចសែល ជាកន្លែងដែលគេរំពឹងថានឹងចុះហត្ថលេខាលើទណ្ឌកម្មថ្មីប្រឆាំងនឹង IRGC ។

ចំណែក ចំណាត់ការនេះនឹងត្រូវបានដឹកនាំដោយប្រទេសអ៊ីតាលី ហើយត្រូវបានអនុម័តដោយអ្នកកាទូតក្នុងបណ្តាប្រទេស ទោះបីជា វាត្រូវការភាពឯកភាពគ្នាក្នុងចំណោមរដ្ឋសមាជិកទាំង ២៧ របស់ក្នុងតំបន់។

អង្គភាពឆ្មាំបដិវត្តន៍អ៊ីស្លាមអ៊ីរ៉ង់ ត្រូវបានបង្កើតឡើងបន្ទាប់ពីបដិវត្តអ៊ីស្លាម ឆ្នាំ ១៩៧៩ នៅក្នុងប្រទេសអ៊ីរ៉ង់ ជាមូលដ្ឋាននៃយោធារបស់ប្រទេស ដែលឆ្លើយតបដោយផ្ទាល់ទៅមេដឹកនាំកំពូល លោក Ayatollah Ali Khamenei ។

មិនតែប៉ុណ្ណោះ វាគ្រប់គ្រងកម្មវិធីមីស៊ីល និងនុយក្លេអ៊ែររបស់អ៊ីរ៉ង់ ហើយដើរតួនាទីសំខាន់ក្នុងវិស័យការពារជាតិរបស់អ៊ីរ៉ង់ ក៏ដូចជាប្រតិបត្តិការបរទេស និងមានឥទ្ធិពលនៅក្នុងតំបន់យ៉ាងខ្លាំងផងដែរ។ ខណៈដែលប្រទេសជាសមាជិកសហភាពអឺរ៉ុបមួយចំនួន បានជំរុញឱ្យអង្គភាព IRGC បញ្ចូលទៅក្នុងបញ្ជី «ភេរវករ» របស់សហភាពអឺរ៉ុប ប៉ុន្តែប្រទេសផ្សេងទៀតដែលដឹកនាំដោយបារាំងក៏មានការប្រុងប្រយ័ត្នជាងមុនអំពីផែនការនេះដែរ។

យ៉ាងណាក្តី បណ្តាប្រទេសទាំងនោះបារម្ភថា ទង្វើបែបនេះអាចនាំទៅដល់ការផ្តាច់ទំនាក់ទំនងទាំងស្រុងជាមួយអ៊ីរ៉ង់ ដែលប៉ះពាល់ដល់បេសកកម្មការទូត និងថែមទាំងធ្វើឱ្យប៉ះពាល់ដល់ការចរចា ដើម្បីដោះលែងពលរដ្ឋអឺរ៉ុបដែលជាប់ឃុំនៅក្នុងពន្ធនាគារអ៊ីរ៉ង់៕

ប្រែសម្រួល៖ ណឺ មិនា

The post បារាំងគាំទ្រអឺរ៉ុបចាត់ថ្នាក់ «ឆ្មាំបដិវត្តន៍អ៊ីរ៉ង់»ជាក្រុមភេរវករ វិញ appeared first on Kampuchea Thmey Daily.

អាមេរិក ប្រកាសថា ខ្លួនបានសម្លាប់ មេភេរវករនៅ ស៊ីរី

Sok Sovann — Sun, 18 Jan 2026 02:32:09 +0000

សហរដ្ឋអាមេរិក បានប្រកាសពីការសម្លាប់មេភេរវករ នៅប្រទេសស៊ីរី ក្នុងប្រតិបត្តិការវាយប្រហារពីអាកាស Operation Hawkeye Strike។

ការវាយប្រហារនៅស៊ីរី (រូបថត៖ Reuters)

តាមការផ្សាយរបស់ NBC News នៅថ្ងៃអាទិត្យទី១៨ខែមករាឆ្នាំ២០២៦ ដឹកនាំសម្ព័ន្ធក្រុមអាល់កៃដាឈ្មោះ Bilal Hasan al-Jasim ត្រូវបានផ្តាច់ជីវិតក្នុងការវាយប្រហារសងសឹក នៅភាគពាយព្យប្រទេសស៊ីរី កាលពីថ្ងៃសុក្រ។

កងកម្លាំងអាមេរិកបញ្ជាក់ថា បុរសម្នាក់នេះជាអ្នកនៅពីក្រោយ ការវាយឆ្មក់របស់ក្រុម ISIS ក្នុងទីក្រុង Palmyra ដែលបណ្តាលឲ្យទាហានអាមេរិក២នាក់ និងអ្នកបកប្រែម្នាក់ បាត់បង់ជីវិតកាលពីខែមុន។

កងកម្លាំងអាមេរិក (រូបថត៖ Reuters)

ជុំវិញការវាយប្រហារនេះ លោកឧត្តមនាវីឯក Brad Cooper មេបញ្ជាការនៃទីបញ្ជាការកណ្តាលអាមេរិក (CENTCOM) បាននិយាយនៅក្នុងសេចក្តីថ្លែងការណ៍មួយ កាលពីថ្ងៃសៅរ៍ថា៖ «ការស្លាប់របស់ភេរវករដែលមានជាប់ពាក់ព័ន្ធនឹងការបាត់បង់ជីវិតរបស់ជនជាតិអាមេរិក ៣ នាក់ បង្ហាញពីការប្តេជ្ញាចិត្តរបស់យើងក្នុងការតាមកម្ទេចពួកភេរវករដែលវាយប្រហារលើកងកម្លាំងរបស់យើង។ គ្មានកន្លែងសុវត្ថិភាពទេសម្រាប់អ្នកដែលប្រព្រឹត្ត រៀបចំផែនការ ឬជំរុញឲ្យមានការវាយប្រហារលើពលរដ្ឋអាមេរិក និងយុទ្ធជនរបស់យើង! យើងនឹងតាមរកអ្នកឲ្យឃើញ»។

កងកម្លាំងអាមេរិក (រូបថត៖ Reuters)

សូមបញ្ជាក់ថា ក្នុងប្រតិបត្តិការសងសឹកនេះ អាមេរិកបានបាញ់មីស៊ីលដែលមានភាពជាក់លាក់ខ្ពស់ជាង ២០០ គ្រាប់ ទៅលើគោលដៅភេរវករជាង ១០០ កន្លែងក្នុងប្រទេសស៊ីរី។

ក្រៅពីសម្លាប់មេដឹកនាំរូបនេះ អាមេរិក និងសម្ព័ន្ធមិត្តក៏បានចាប់ខ្លួនសមាជិក ISIS ជាង ៣០០ នាក់ និងសម្លាប់ជាង ២០ នាក់ផ្សេងទៀតផងដែរ ក្នុងរយៈពេលប៉ុន្មានខែចុងក្រោយ៕

អត្ថបទ៖ សុខ សុវណ្ណ

អាមេរិកបង្កើនការតាមដានឃ្លាំមើលសកម្មភាពគ្រឿងញៀន នៅម៉ិកស៊ិក និង អាមេរិកឡាទីន

The post អាមេរិក ប្រកាសថា ខ្លួនបានសម្លាប់ មេភេរវករនៅ ស៊ីរី appeared first on Kampuchea Thmey Daily.

មេទ័ពជើងគោក៖ ជនណា ដែលប៉ុនប៉ងផ្តួលរំលំរាជរដ្ឋាភិបាលស្របច្បាប់ គឺជា«ភេរវករ»

Ngoeul Narath — Wed, 08 Jan 2025 06:47:09 +0000

«ជនណា ឬក្រុមណា ដែលមានគម្រោង ឬឃុបឃិតបង្កើតចលនាប្រឆាំងជ្រុលនិយម ដែលបំពុលសង្គម បំផ្លាញដំណើររីកចម្រើនរបស់ជាតិ បង្កការបែកបាក់ជាតិ និងប៉ុនប៉ងផ្តួលរំលំរាជរដ្ឋាភិបាលស្របច្បាប់ គឺជាភេរវករ»។ នេះគឺជាការគូសបញ្ជាក់របស់ នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅក្នុងពិធីអបអរសាទរខួបលើកទី៤៦ នៃទិវាជ័យជម្នះ ៧មករា (១៩៧៩-២០២៥) នៅខេត្តព្រះវិហារ កាលពីថ្ងៃទី៧ ខែមករា ឆ្នាំ២០២៥។

នាយឧត្តមសេនីយ៍ ម៉ៅ សុផាន់ បានថ្លែងថា រយៈពេល៤៦ឆ្នាំបន្ទាប់ពីជ័យជម្នះ ៧ មករា ១៩៧៩ ប្រទេសកម្ពុជាបានឆ្លងកាត់របត់នយោបាយ និងសេដ្ឋកិច្ចជាច្រើនដំណាក់កាល និងបានផ្លាស់ប្តូរមុខមាត់ថ្មីលើគ្រប់វិស័យ បានបញ្ចប់សង្គ្រាមស៊ីវិលដ៏រ៉ាំរ៉ៃ នាំមកនូវសន្តិភាព ឯកភាពជាតិ ឯកភាពទឹកដី និងការអភិវឌ្ឍ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សមេ្តចតេជោ ហ៊ុន សែន។

មេបញ្ជាការកងទ័ពជើងគោកបានបន្តថា រាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា កំពុងបន្តដឹកនាំនាវាកម្ពុជា និងធានាបាននិរន្តរភាពជាតិ សន្តិភាព ស្ថិរភាព ដែលជាមូលដ្ឋានគ្រឹះក្នុងការអភិវឌ្ឍប្រទេសជាតិលើគ្រប់វិស័យ និងបានកំពុងបង្កើតសមិទ្ធផលថ្មីៗថែមទៀត ដើម្បីឈានទៅសម្រេចឱ្យបាននូវចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០។

នាយឧត្តមសេនីយ៍ ម៉ៅ សុផាន់ សង្កត់ធ្ងន់ថា ដើម្បីការពារសន្តិភាព ស្ថិរភាព និងការអភិវឌ្ឍ លោកសូមគាំទ្រគោលគំនិតក្នុងការកសាងច្បាប់ កំណត់ជនណា ឬក្រុមណា ដែលមានគម្រោង ឬឃុបឃិតបង្កើតចលនាប្រឆាំងជ្រុលនិយម ដែលបំពុលសង្គម បំផ្លាញដំណើររីកចម្រើនរបស់ជាតិ បង្កការបែកបាក់ជាតិ និងប៉ុនប៉ងផ្តួលរំលំរាជរដ្ឋាភិបាលស្របច្បាប់គឺជា ភេរវករ ដែលត្រូវតែនាំខ្លួនយកមកវិនិច្ឆ័យទោស៕

The post មេទ័ពជើងគោក៖ ជនណា ដែលប៉ុនប៉ងផ្តួលរំលំរាជរដ្ឋាភិបាលស្របច្បាប់ គឺជា«ភេរវករ» appeared first on Kampuchea Thmey Daily.

សម្ដេចតេជោ ជំរុញឱ្យធ្វើច្បាប់ដាក់ក្រុមជ្រុលនិយមចង់ផ្ដួលរំលំរដ្ឋាភិបាលជា «ពួកភេរវករ»

hun sirivadh — Tue, 07 Jan 2025 02:22:19 +0000

ប្រធានព្រឹទ្ធសភាកម្ពុជាសម្ដេចតេជោ ហ៊ុន សែន បានជំរុញឱ្យធ្វើច្បាប់មួយដើម្បីដាក់អ្នកក្រុមជ្រុលនិយមមានបំណងបង្កអសន្តិសុខ បង្កើតសង្គ្រាម ជាពួកភេវករ ដើម្បីថែរក្សាសន្ដិភាព ទប់ស្កាត់ការកើតឡើងវិញនៃសង្គ្រាម និងអំពើប្រល័យពូជសាសន៍។

ថ្លែងក្នុងមីទិញអបអរខួប៤៦ឆ្នាំទិវាជ័យជម្នះ៧មករា នៅមជ្ឈមណ្ឌលកោះពេជ្រ ក្នុងរាជធានីភ្នំពេញ សម្ដេចតេជោ ហ៊ុន សែន បានថ្លែងជំរុញការប្ដេជ្ញាទប់ស្កាត់ការដណ្ដើមអំណាចដែលបំពានរដ្ឋធម្មនុញ្ញ និងនីតិរដ្ឋ ដោយថាទោះកម្ពុជាមានសន្តិភាព២៦ឆ្នាំក្ដី តែស្ថានភាពនៅតែផុយស្រួលដោយសារតែពួកជ្រុលនិយមនៅតែមានបំណងញុះញង់ពលរដ្ឋ និងមន្ត្រីរាជការក្រោកឡើងប្រឆាំងរដ្ឋ។

សម្ដេចតេជោថា គួរតែដល់ពេលកម្ពុជារៀបចំច្បាប់ដាក់ក្រុមជ្រុលនិយមទាំងនេះជាពួកភេរវករហើយ។

សម្ដេចថា៖ «វាដល់ពេលហើយដែលយើងត្រូវកសាងច្បាប់ និងកំណត់ចំពោះជនណា ឬក្រុមណាដែលមានគម្រោងការ ឬអំពើឃុបឃិតបង្កើតចលនាជ្រុលនិយមបង្កភាពវឹកវរបង្កអសន្តិសុខក្នុងសង្គម បង្កឱ្យមានជម្លោះជាមួយរដ្ឋដទៃនិងប៉ុនប៉ងផ្ដួលរំលំរដ្ឋាភិបាលស្របច្បាប់គឺជាភារវករដែលត្រូវនាំខ្លួនមកវិនិច្ឆ័យទោសដើម្បីការពារសន្ដិភាព»។

សម្ដេចតេជោបន្ថែមថាចាប់ពីពេលនេះកម្ពុជាត្រូវការបោះជំហានទៅរកប្រទេសជឿនលឿនដែលត្រូវការដំណើរការវែងឆ្ងាយបន្តទៀតដោយមិនត្រូវឱ្យកម្ពុជាធ្លាក់ក្នុងសង្គ្រាម និងអំពើប្រល័យពូជសាសន៍ជាថ្មីនោះទេ។

សម្ដេចជំរុញដល់ពលរដ្ឋ សមាជិកបក្សប្រជាជន និងបក្សក្រៅរដ្ឋាភិបាលចូលរួមសាមគ្គីជាធ្លុងមួយដើម្បីជំរុញសកម្មភាពនិងយុទ្ធសាស្រ្តបញ្ចកោណរបស់រដ្ឋាភិបាលអាណត្តិថ្មីសម្រេចបានជោគជ័យជូនជាតិមាតុភូមិបន្ថែមទៀត៕

អត្ថបទដោយ ហ៊ុន សិរីវឌ្ឍន៍

The post សម្ដេចតេជោ ជំរុញឱ្យធ្វើច្បាប់ដាក់ក្រុមជ្រុលនិយមចង់ផ្ដួលរំលំរដ្ឋាភិបាលជា «ពួកភេរវករ» appeared first on Kampuchea Thmey Daily.

ភេរវករ Archives - Kampuchea Thmey Daily

​យោធាអាមេរិក​សម្លាប់​មនុស្ស​​១៥៧នាក់ដោយ​ចោទ​ជា​​ភេរវករ ប៉ុន្តែ​អ្នក​ជំនាញ​ថា​ «ខុសច្បាប់​»​

ការ​វាយប្រហារ​​ដ៏​ខ្លាំង​ក្លាមួយ​​ ​នៅ​នីហ្សេរីយ៉ា សម្លាប់​មនុស្ស​ ១៦២នាក់

អឺរ៉ុប​ដាក់​បញ្ចូល​ «កងឆ្មាំ​បដិវត្តិន៍​អ៊ីរ៉ង់​» ជាអង្គការ​ភេរវករ​​​ជាផ្លូវការ​ជាថ្មី​

បារាំង​គាំទ្រ​អឺរ៉ុប​ចាត់ថ្នាក់ «​​ឆ្មាំបដិវត្តន៍​អ៊ីរ៉ង់»​ជាក្រុម​ភេរវករ​​​ វិញ

អាមេរិក ប្រកាសថា ខ្លួនបានសម្លាប់ មេភេរវករនៅ ស៊ីរី

មេទ័ពជើងគោក៖ ជនណា ដែលប៉ុនប៉ងផ្តួលរំលំរាជរដ្ឋាភិបាលស្របច្បាប់ គឺជា«ភេរវករ»

សម្ដេចតេជោ ជំរុញឱ្យធ្វើច្បាប់ដាក់ក្រុមជ្រុលនិយមចង់ផ្ដួលរំលំរដ្ឋាភិបាលជា «ពួកភេរវករ»

យោធាអាមេរិកសម្លាប់មនុស្ស១៥៧នាក់ដោយចោទជាភេរវករ ប៉ុន្តែអ្នកជំនាញថា «ខុសច្បាប់»

ការវាយប្រហារដ៏ខ្លាំងក្លាមួយ នៅនីហ្សេរីយ៉ា សម្លាប់មនុស្ស ១៦២នាក់

អឺរ៉ុបដាក់បញ្ចូល «កងឆ្មាំបដិវត្តិន៍អ៊ីរ៉ង់» ជាអង្គការភេរវករជាផ្លូវការជាថ្មី

បារាំងគាំទ្រអឺរ៉ុបចាត់ថ្នាក់ «ឆ្មាំបដិវត្តន៍អ៊ីរ៉ង់»ជាក្រុមភេរវករ វិញ