ព័ត៌មានអន្ដរជាតិ

បារាំងគាំទ្រអឺរ៉ុបចាត់ថ្នាក់ «ឆ្មាំបដិវត្តន៍អ៊ីរ៉ង់»ជាក្រុមភេរវករ វិញ

បានផុស

៦ ខែ មុន

នៅ

ថ្ងៃព្រហស្បតិ៍ ២៩ មករា ២០២៦

ដោយ

ប្រទេសបារាំងបានលើកឡើងថា នឹងគាំទ្រសហភាពអឺរ៉ុប ក្នុងការដាក់អង្គភាពឆ្មាំបដិវត្តន៍អ៊ីស្លាមអ៊ីរ៉ង់ (IRGC) ជា «អង្គការភេរវករ» ឡើងវិញ ដែលខ្លួនធ្លាប់តែប្រឆាំងចំពោះចលនាពីមុនមក។

នៅក្នុងសេចក្តីថ្លែងការណ៍មួយដែលត្រូវបានចែករំលែកលើបណ្តាញសង្គមកាលពីថ្ងៃពុធ រដ្ឋមន្ត្រីការបរទេសបារាំង លោក Jean-Noel Barrot បានបង្ហោះសារថា ការកំណត់បែបនេះស្របទៅនឹងការបង្រ្កាបរបស់អាជ្ញាធរអ៊ីរ៉ង់ថ្មីៗនេះ លើការតវ៉ាប្រឆាំងរដ្ឋាភិបាលនៅទូទាំងប្រទេស។

លោក Jean-Noel Barrot ។ European Newsroom.

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Al Jazeera, លោក បានសរសេរនៅលើបណ្តាញសង្គម X របស់ខ្លួនថា៖ «ការគាបសង្កត់ដែលមិនអាចទ្រាំទ្របាននៃការតវ៉ាដោយសន្តិវិធីរបស់ប្រជាជនអ៊ីរ៉ង់ មិនអាចគ្មានចម្លើយនោះទេ។ ភាពក្លាហានដ៏អស្ចារ្យរបស់ពួកគេក្នុងការប្រឈមមុខ នឹងអំពើហិង្សាដែលបានធ្វើមកលើពួកគេក៏មិនអាចគ្មានលទ្ធផលដែរ»។

លោកបានសង្កត់ធ្ងន់ទៀតថា៖ «ជាមួយនឹងដៃគូអឺរ៉ុបរបស់យើង យើងនឹងចាត់វិធានការនៅថ្ងៃស្អែក(ព្រហស្បតិ៍នេះ) នៅទីក្រុងព្រុចសែល ប្រឆាំងនឹងអ្នកដែលប្រព្រឹត្តអំពើឃោរឃៅទាំងនេះ។ ពួកគេនឹងត្រូវហាមឃាត់មិនឱ្យជាន់លើទឹកដីអឺរ៉ុប ហើយទ្រព្យសម្បត្តិទាំងប៉ុន្មាននឹងត្រូវបង្កក។ ជាងនេះបារាំងនឹងគាំទ្រការកំណត់កងឆ្មាំបដិវត្តន៍អ៊ីស្លាមក្នុងបញ្ជីអង្គការភេរវករអឺរ៉ុប»។

គួរបញ្ជាក់ថា រដ្ឋមន្ត្រីការបរទេសសហភាពអឺរ៉ុបនឹងជួបប្រជុំគ្នា នៅថ្ងៃព្រហស្បតិ៍នេះ នៅទីក្រុងព្រុចសែល ជាកន្លែងដែលគេរំពឹងថានឹងចុះហត្ថលេខាលើទណ្ឌកម្មថ្មីប្រឆាំងនឹង IRGC ។

ចំណែក ចំណាត់ការនេះនឹងត្រូវបានដឹកនាំដោយប្រទេសអ៊ីតាលី ហើយត្រូវបានអនុម័តដោយអ្នកកាទូតក្នុងបណ្តាប្រទេស ទោះបីជា វាត្រូវការភាពឯកភាពគ្នាក្នុងចំណោមរដ្ឋសមាជិកទាំង ២៧ របស់ក្នុងតំបន់។

អង្គភាពឆ្មាំបដិវត្តន៍អ៊ីស្លាមអ៊ីរ៉ង់ ត្រូវបានបង្កើតឡើងបន្ទាប់ពីបដិវត្តអ៊ីស្លាម ឆ្នាំ ១៩៧៩ នៅក្នុងប្រទេសអ៊ីរ៉ង់ ជាមូលដ្ឋាននៃយោធារបស់ប្រទេស ដែលឆ្លើយតបដោយផ្ទាល់ទៅមេដឹកនាំកំពូល លោក Ayatollah Ali Khamenei ។

មិនតែប៉ុណ្ណោះ វាគ្រប់គ្រងកម្មវិធីមីស៊ីល និងនុយក្លេអ៊ែររបស់អ៊ីរ៉ង់ ហើយដើរតួនាទីសំខាន់ក្នុងវិស័យការពារជាតិរបស់អ៊ីរ៉ង់ ក៏ដូចជាប្រតិបត្តិការបរទេស និងមានឥទ្ធិពលនៅក្នុងតំបន់យ៉ាងខ្លាំងផងដែរ។ ខណៈដែលប្រទេសជាសមាជិកសហភាពអឺរ៉ុបមួយចំនួន បានជំរុញឱ្យអង្គភាព IRGC បញ្ចូលទៅក្នុងបញ្ជី «ភេរវករ» របស់សហភាពអឺរ៉ុប ប៉ុន្តែប្រទេសផ្សេងទៀតដែលដឹកនាំដោយបារាំងក៏មានការប្រុងប្រយ័ត្នជាងមុនអំពីផែនការនេះដែរ។

យ៉ាងណាក្តី បណ្តាប្រទេសទាំងនោះបារម្ភថា ទង្វើបែបនេះអាចនាំទៅដល់ការផ្តាច់ទំនាក់ទំនងទាំងស្រុងជាមួយអ៊ីរ៉ង់ ដែលប៉ះពាល់ដល់បេសកកម្មការទូត និងថែមទាំងធ្វើឱ្យប៉ះពាល់ដល់ការចរចា ដើម្បីដោះលែងពលរដ្ឋអឺរ៉ុបដែលជាប់ឃុំនៅក្នុងពន្ធនាគារអ៊ីរ៉ង់៕

ប្រែសម្រួល៖ ណឺ មិនា