លោកស្រីបានលើកឡើងដូច្នេះ ក្នុងឱកាសអញ្ជើញចុះអភិបាលកិច្ច និងត្រួតពិនិត្យការងារជាក់ស្តែងនៅមន្ទីរពេទ្យជាតិ តេជោសន្តិភាព ដើម្បីពង្រឹងគុណភាព និងប្រសិទ្ធភាព នៃការបម្រើសេវាសុខាភិបាលជូនប្រជាពលរដ្ឋ នាថ្ងៃទី២៣ ខែមេសា ឆ្នាំ២០២៦។ នាឱកាសនោះ លោកស្រីរដ្ឋលេខាធិការ បានពាំនាំនូវអនុសាសន៍ណែនាំដ៏ខ្ពង់ខ្ពស់របស់ លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ដែលផ្តោតលើចំណុចគន្លឹះចំនួន ដូចជា ការលើកទឹកចិត្តមន្រ្តីរាជការ បុគ្គលិកមន្ទីរពេទ្យទាំងអស់ ឱ្យយកទឹកចិត្តទុកដាក់ និងមានក្រមសីលធម៌។

ក្នុងនោះលោកស្រី បានជំរុញឱ្យមន្ត្រីរាជការ និងបុគ្គលិកសុខាភិបាលទាំងអស់ បន្តខិតខំប្រឹងប្រែងបម្រើសេវាពិនិត្យ និងព្យាបាលឱ្យកាន់តែប្រសើរ។ ទោះបីស្ថិតក្នុងស្ថានភាពមមាញឹក ឬមានអ្នកជំងឺច្រើនកុះករយ៉ាងណាក៏ដោយ បុគ្គលិកត្រូវរក្សាទឹកមុខញញឹមរាក់ទាក់ជានិច្ច ជាពិសេសផ្នែកសង្រ្គោះបន្ទាន់ និងផ្នែកប្រពោធនកម្ម (ICU) ។ លើសពីនេះ មន្រ្តីរាជការ និងបុគ្គលិកសុខាភិបាលទាំងអស់ ត្រូវបម្រើសេវាដោយសមធម៌ និងមិនរើសអើង គោលការណ៍ “សមធម៌” ត្រូវតែអនុវត្តយ៉ាងម៉ឹងម៉ាត់ ដោយបម្រើសេវាជូនអ្នកជំងឺគ្រប់រូបដោយស្មើភាព មិនថាជាអ្នកជំងឺបង់ថ្លៃដោយខ្លួនឯង អ្នកជំងឺមានប័ណ្ណ ប.ស.ស ឬប័ណ្ណក្រីក្រ (មូលនិធិសមធម៌)។ ចំពោះអ្នកជំងឺដែលខ្វះលទ្ធភាព និងមិនទាន់មានប័ណ្ណក្រីក្រ ត្រូវពិចារណាលើកលែងការបង់ថ្លៃ។

សម្រាប់ជនបរទេស ដែលមកធ្វើធុរកិច្ចនៅកម្ពុជា ជាទេសចរណ៍ ធ្វើការងាររយៈពេលខ្លី មធ្យម ឬវែង ត្រូវលើកទឹកចិត្តឱ្យជនបរទេសដែលរស់នៅ ធ្វើការ ឬទេសចរណ៍ក្នុងប្រទេសកម្ពុជា មានការធានារ៉ាប់រងសុខភាពគ្រប់កម្រិត ដើម្បីធានាដល់ការថែទាំ និងគ្រប់គ្រងហានិភ័យសុខភាពដែលអាចកើតឡើងជាយថាហេតុ។ ក្នុងករណីអ្នកជំងឺបរទេសខ្វះការគាំទ្រពីគ្រួសារ មន្ទីរពេទ្យត្រូវទទួលបន្ទុកមើលថែ និងព្យាបាលឱ្យអស់ពីលទ្ធភាព រហូតដល់ដំណាក់កាលចុងក្រោយ។ ត្រូវមានកិច្ចសហការជិតស្និទ្ធជាមួយស្ថានទូត ដោយមន្ទីរពេទ្យត្រូវបន្តសហការជាមួយស្ថានទូតនានា ក្នុងការទំនាក់ទំនងជាមួយក្រុមគ្រួសារអ្នកជំងឺបរទេស ជាពិសេសករណីសង្គ្រោះបន្ទាន់។

ដើម្បីពង្រឹងការគ្រប់គ្រង និងការទំនាក់ទំនង មន្ដ្រីរាជការ និងបុគ្គលិក ត្រូវយកចិត្តទុកដាក់ដោះស្រាយរាល់បញ្ហាប្រឈម ហើយត្រូវធានាថា ការវាយតម្លៃស្ថានភាពអ្នកជំងឺ និងការផ្តល់ព័ត៌មានមានភាពច្បាស់លាស់ និងត្រឹមត្រូវតាមជាក់ស្តែងហើយចៀសវាងការខ្វះចន្លោះជាយថាហេតុណាមួយ ឬការទំនាក់ទំនងមិនច្បាស់ ដែលអាចបណ្ដាលឱ្យមានការយល់ច្រឡំ និងការសន្និដ្ឋានមួយមិនជាក់ស្ដែងទៅតាមស្ថានភាព និងរាយការណ៍ជូនថ្នាក់ដឹកនាំតាមឋានានុក្រម។

ក្នុងឱកាសនោះដែរ លោកស្រីរដ្ឋលេខាធិការ បានអញ្ជើញចុះពិនិត្យដោយផ្ទាល់នៅផ្នែកសំខាន់ៗ រួមមាន ផ្នែកទទួលជំងឺដំបូង (Emergency ) ផ្នែកប្រពោធនកម្មវេជ្ជសាស្ត្រ (ICU) ផ្នែកវះកាត់ទូទៅ និងផ្នែកពិនិត្យពិគ្រោះជំងឺក្រៅ (OPD) ។ ព្រមទាំងបានថ្លែងនូវការកោតសរសើរដល់ថ្នាក់ដឹកនាំ និងបុគ្គលិកទាំងអស់ចំពោះការលះបង់កន្លងមក និងបានជំរុញឱ្យគណៈកម្មការមន្ទីរពេទ្យបន្តផ្សព្វផ្សាយ ដល់គ្រប់ផ្នែកទាំងអស់ អនុវត្តតាមការណែនាំនេះ៕

The post មន្ត្រីជាន់ខ្ពស់៖ បុគ្គលិកសុខាភិបាល ត្រូវខិតខំបម្រើសេវាប្រកបដោយសមធម៌ ទាំងប្រជាជនកម្ពុជា និងជនបរទេស appeared first on Kampuchea Thmey Daily.

ការណែនាំនេះ ធ្វើឡើងក្នុងកិច្ចប្រជុំបូកសរុបការងារអនុវត្តគោលនយោបាយ (ភូមិ ឃុំ សង្កាត់មានសុវត្ថិភាព) ប្រចាំត្រីមាសទី១ និងលើកទឹសដៅត្រីមាសទី២ ឆ្នាំ២០២៦ នៅថ្ងៃទី២៣ ខែមីនា ឆ្នាំ២០២៦។ កិច្ចប្រជុំនេះ មានការចូលរួមពីលោក ស៊ិន រុន សមាជិកក្រុមប្រឹក្សាខេត្ត លោក ង៉ូវ សេងកាក់ អភិបាលរងខេត្ត និងគណៈបញ្ជាការឯកភាពរដ្ឋបាលក្រុង ស្រុក កងកម្លាំងប្រដាប់អាវុធទាំង៣ អង្គភាពពាក់ព័ន្ធ អធិការដ្ឋាននគរបាល បញ្ជាការមូលដ្ឋានកងរាជហត្ថក្រុង ស្រុក មេប៉ុស្តិ៍ មេឃុំ សង្កាត់ប្រមាណ ៣០០នាក់ នៅសាលប្រជុំសាលាខេត្តសៀមរាប។

ក្នុងឱកាសនោះ លោក ង៉ូវ សេងកាក់ អភិបាលរងខេត្តសៀមរាប បានរាយការណ៍សង្ខេបពាក់ព័ន្ធនៃការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព ដែលក្រុមការងារបានអនុវត្តកន្លងមក ក្នុងនោះការបង្ក្រាបបទល្មើសនានាមានការថយចុះ ប៉ុន្តែបញ្ហាគ្រោះថ្នាក់ចរាចរណ៍មានការកើនឡើង។

ជាមួយគ្នានេះ លោកស្នងការដ្ឋាននគរបាលខេត្ត ក៏បានធ្វើបទបង្ហាញដោយផ្តោតសំខាន់លើឧបករណ៍ផ្តលព័ត៌មានសាធាណៈសម្រាប់ប្រជាពលរដ្ឋផ្តល់ព័ត៌មានដែលកើតឡើង ដើម្បីផ្តល់ដំណឹងដល់សមត្ថកិច្ចជួយអន្តរាគមន៍ ព្រមទាំងការបោសសម្អាតបទល្មើស ហ្គេមអនឡាយ  មិនឱកយកើតមាននៅខេត្តសៀមរាប ដែលធ្វើឱ្យប៉ះពាល់វិស័យទេសចរណ៍ និងអ្នកវិនិយោគ។

នាយឧត្តមសេនីយ៍ សួស អង្គារ៍ បានវាយតម្លៃខ្ពស់ទៅលើលទ្ធផលនៃការអនុវត្តគោលនយោបាយ (ភូមិ ឃុំ សង្កាត់មានសុវត្ថិភាព) ប្រចាំត្រីមាសរបស់រដ្ឋបាលខេត្តសៀមរាប និងបានណែនាំទៅដល់អង្គប្រជុំ ត្រូវពង្រឹងការអនុវត្តវិធានការច្បាប់ពាក់ព័ន្ធនឹងបទល្មើសទាំងឡាយឱ្យបានម៉ឺងម៉ាត់ ប្រកបដោយវិជ្ជាជីវៈ និងទទួលខុសត្រូវខ្ពស់។ លោកបានសង្កត់ធ្ងន់ ចំពោះបញ្ហាបទល្មើសល្បែងស៊ីសង ក្មេងទំនើង ចោរកម្ម គ្រឿងញៀន កម្លាំងសមត្ថកិច្ច និងអាជ្ញាធរមូលទាំង១០០ ឃុំ សង្កាត់ ក្នុងខេត្តសៀមរាប ត្រូវអនុវត្តវិធានការច្បាប់ និងបញ្ឈប់ឱ្យខាងតែបាន។ 

លោកបានសាទរផងដែរ ចំពោះវិធានការរបស់គណៈបញ្ជាការឯកភាពរដ្ឋាបាលខេត្តសៀមរាប និងកម្លាំងសមត្ថកិច្ចគ្រប់ជាន់ថ្នាក់ បានសហការគ្នាល្អ ជាមួយអាជ្ញាធរមូលដ្ឋាន ក្នុងការគ្រប់គ្រង ធានាសន្តិសុខ សុវត្ថិភាពជូនប្រជាពលរដ្ឋ និង ភ្ញៀវទេសចរណ៍ជាតិ អន្តរជាតិ ដែលបានមកធ្វើទេសចរណ៍នៅក្នុងខេត្តប្រវត្តិសាស្ត្រមួយ និងការកសាងសមទ្ធិផលនានាទទួលបានលទ្ធផលខ្ពស់។ លោកក៏បានផ្តោតសំខាន់ទៅលើបញ្ហា ការបង្ក្រាប(ហ្គេមអនឡាញ) បានទាន់ពេលវេលា ដោយបានធ្វើការបោសសម្អាត់មិនឱ្យមាននៅក្នុងភូមិសាស្ត្រ សៀមរាបផ្ទះខ្ញុំ។

បន្ថែមពីនេះ លោក សួស អង្គារ៍ បានឱ្យគណៈបញ្ជាការឯកភាពរដ្ឋបាលខេត្ត ក្រុង ស្រុក ត្រូវបន្តជំរុញ ពង្រឹងការងារប្រឡងប្រណាំង ការអនុវត្តគោលនយោបាយភូមិ ឃុំ សង្កាត់មានសុវត្ថិភាព ឱ្យបានម៉ឺងម៉ាត់ និងមានប្រសិទ្ធភាពខ្ពស់ ដោយអនុវត្តទៅតាមគោលការណ៍ទាំង ៧ចំណុច ដើម្បីធានាបាននៅសន្តិសុខសណ្ដាប់ធ្នាប់ល្អ។ ជាពិសេស ពង្រឹងការគ្រប់គ្រង និងត្រូវត្រៀមលក្ខណៈឆ្លើយតបបញ្ហាគ្រោះមហន្តរាយ គ្រោះថ្នាក់និងជម្ងឺរាតត្បាតផ្សេងៗឱ្យមានប្រសិទ្ធភាព សំខាន់ក្នុងឱកាសបុណ្យចូលឆ្នាំថ្មី ប្រពៃណីខ្មែរខាងមុខនេះ។

អាជ្ញាធរមូលដ្ឋាន និងគណៈបញ្ជាការឯកភាពរដ្ឋបាលក្រុង ស្រុកត្រូវសហការពង្រឹងការទប់ស្កាត់ និងអនុវត្តការងារបង្ក្រាបបទល្មើសនានាឱ្យបានល្អប្រសើរ និងប្រសិទ្ធភាព។ គណៈបញ្ជាការឯកភាពរដ្ឋបាលក្រុង ស្រុក និងកងកម្លាំងសមត្ថកិច្ចទាំងអស់ ចូលរួមបង្រ្កាបបញ្ហាគ្រឿងញៀន ក្មេងទំនើង និងគ្រោះថ្នាក់ចរាចរណ៍ត្រូវអនុវត្តឱ្យមានប្រសិទ្ធភាព និង ទៀងទាត់ នៅតាមទីសាធារណៈសាលារៀន និងតាមទីតាំងអាជីវកម្មសប្បាយ។ ព្រមទាំងត្រូវពង្រឹងក្រមសីលធម៌ អង្គការវិន័យរបស់កងកម្លាំង និងអនុវត្តឱ្យបាននូវអភិក្រមទាំង៥ របស់រាជរដ្ឋាភិបាល និងបង្កើនការយកចិត្តទុកដាក់អនុវត្តឱ្យមានប្រសិទ្ធភាពខ្ពស លើគោលនយោបាយភូមិ ឃុំ សង្កាត់មានសុវត្ថិភាព។

ក្នុងឱកាសនោះដែរ ក៏មានការប្រគល់ប័ណ្ណសរសើរដល់គណៈបញ្ជាការឯកភាពរដ្ឋបាលក្រុង ស្រុក និង ប៉ុស្តិនគរបាលរដ្ឋបាល ទាំង ១០០ ឃុំសង្កាត់ផងដែរ៕

ដោយ៖ គឿនវេត

The post មន្ត្រីជាន់ខ្ពស់ក្រសួងមហាផ្ទៃ ណែនាំដល់រដ្ឋបាលខេត្តសៀមរាប ពង្រឹងការអនុវត្តវិធានការច្បាប់ឱ្យបានម៉ឺងម៉ាត់ appeared first on Kampuchea Thmey Daily.

ថ្លែងក្នុងពិធីផ្សព្វផ្សាយច្បាប់ស្តីពី ការគ្រប់គ្រងអ្នកប្រកបវិជ្ជាជីវៈសុខាភិបាល ក្រមសីលធម៌​វិជ្ជាជីវៈ និង​ភាពជាអ្នកមាន​វិជ្ជាជីវៈ​សុខាភិបាល ជូនដល់មន្រី្ត និងនិសិ្សត នៅ​សាកលវិទ្យាល័យ​វិទ្យាសាស្រ្ត​សុខាភិបាល លោក​សាស្ត្រាចារ្យ បានបន្តថា ក្រុមប្រឹក្សាគណៈគ្រូពេទ្យជាតិ មាន​បេសកកម្ម​ស្នូល ធានានូវការអនុវត្តវិជ្ជាជីវៈវេជ្ជសាស្រ្តនៅកម្ពុជា ឱ្យប្រព្រឹត្តទៅស្របតាមច្បាប់ មានស្តង់ដារ ហើយ​គោរពទៅតាម​គោលការណ៍ នៃក្រមសីលធម៌​វិជ្ជាជីវៈឱ្យបានជាប់លាប់ ដោយ​ផ្តោតសំខាន់​ទៅ​លើ​គុណភាព នៃសេវា​សុខាភិបាល និយាយជារួម។ បើយើងនៅផ្នែកវេជ្ជសាស្រ្តនេះ ជាគ្រូពេទ្យ គឺ​សេវា​វេជ្ជសាស្ត្រ​ដែលយើងត្រូវអនុវត្តកិច្ចការងារធ្វើជាគ្រូពេទ្យ ពិនិត្យ ព្យាបាល ថែទាំអ្នកជំងឺ ត្រូវឱ្យ​មាន​គុណភាព​សេវា។ ហើយគុណភាពសេវានេះ ត្រូវភ្ជាប់រួមទាំងមិនអាចផ្តាច់បានអំពីសុវតិ្ថភាពរបស់​អ្នក​ជំងឺ។

លោករដ្ឋលេខាធិការ បានបន្តទៀតថា មកដល់បច្ចុប្បន្ននេះ យើងមានគណៈវិជ្ជាជីវៈសុខាភិបាល​ចំនួន ៥ រួមមាន គណៈគ្រូពេទ្យ គណៈទន្តពេទ្យ គណៈ​គិលានុបដ្ឋាក គណៈ​ឆ្មប និងគណៈ​ឱសថ​ការី ដើម្បីកសាងប្រព័ន្ធសុខាភិបាល ដែលមានភាពខ្លាំង គណនេយ្យភាព និងផលិតភាពខ្ពស់ ហើយគ្រូពេទ្យទាំងអស់ នៅពេលបញ្ចប់ការសិក្សា មានសញ្ញាបត្រជាវេជ្ជបណ្ឌិត និងប្រឡងថ្នាក់​ជាតិ​រួចរាល់ ហើយអាចទៅបម្រើសេវាសុខាភិបាលត្រូវតែចុះ​បញ្ជិកា​ទៅក្នុង​គណៈ​វិជ្ជាជីវៈ​សុខាភិបាល។ ដូច្នេះអ្នកប្រកបវិជ្ជាជីវៈទាំងអស់ មិនមានន័យថាបញ្ចប់ការសិក្សាហើយទៅ​បម្រើ​ការងារ​លើជំនាញរបស់ខ្លួនក្រៅម៉ោង ដោយមិនមាន​ការ​អនុញ្ញាត​ពី​គណៈ​វិជ្ជាជីវៈ​សុខាភិបាល​នោះ​ទេ។

លោកសាស្រ្តាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជា​សកលវិទ្យាធិការ នៃ​សាកលវិទ្យាល័យ​វិទ្យាសាស្រ្ត​សុខាភិបាល (ស.វ.ស )មានប្រសាសន៍ថា ក្នុងគោលដៅពង្រឹងគុណភាពបណ្តុះបណ្តាល​ធនធានមនុស្ស​នៅ​សាកលវិទ្យាល័យ​វិទ្យាសាស្ត្រ​សុខាភិបាល ប្រកបដោយគុណភាព និងសីលធម៌វិជ្ជាជីវៈខ្ពស់ សាកលវិទ្យាល័យ បានរៀបចំកម្មវិធី​បណ្តុះបណ្តាល មុខវិជ្ជាក្រមសីលធម៌វិជ្ជាជីវៈ ដែលហៅកាត់ថា MedPro-ម៉េដប្រូ (Medical Ethics Deontology and Professionalism) ដោយមានការជួយជ្រោមជ្រែងពីលោកសាស្ត្រាចារ្យ ឆែម គាតរិទ្ធី ទេសរដ្ឋមន្ត្រីទទួល​បេសកកម្ម​ពិសេស និងជាប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ (ក.ស.វ.) និងបានបណ្តុះបណ្តាលគ្រូបង្គោល សម្រាប់មុខវិជ្ជា MedPro នេះ បានចំនួន ១០ នាក់ រៀបចំ​បញ្ចូល​មុខវិជ្ជា MedPro-ម៉េដប្រូ ជាមុខវិជ្ជាមួយ ចាំបាច់ដែលត្រូវបំពេញក្នុងកម្មវិធីចំនួន ២៣ គឺ ១)ថ្នាក់បរិញ្ញាបត្រវិទ្យាសាស្ត្រវេជ្ជសាស្ត្រ ២)ថ្នាក់វេជ្ជបណ្ឌិតទូទៅ និង ៣) ថ្នាក់វេជ្ជបណ្ឌិត​ឯកទេស ចំនួន ២១ កម្មវិធីបណ្តុះបណ្តាលដោយរៀបចំកែសម្រួលសៀវភៅតាមដានកម្មសិក្សា លើគ្រប់កម្មវិធីសិក្សាទាំង ៥២ កម្មវិធីសិក្សា នៅ ស.វ.ស ដោយមានបញ្ចូលសេចក្តីណែនាំ លក្ខខណ្ឌ​វាយតម្លៃកម្មសិក្សា ព្រមទាំងធ្វើការឆ្លុះបញ្ចាំងខ្លួនឯងដោយនិស្សិត និងការផ្តល់យោបល់​ណែនាំដោយគ្រូ លើការអនុវត្តបច្ចេកទេស និងការអនុវត្តក្រមសីលធម៌វិជ្ជាជីវៈ នៅក្នុង Porfolio។

លោក​សាស្ត្រាចារ្យ បានបន្តទៀតថា តម្រង់ទិស គ្រូ និងនិស្សិត គ្រប់កម្មវិធីសិក្សា អំពីការប្រើប្រាស់​សៀវភៅ​កម្មសិក្សា មុនពេលចុះកម្មសិក្សា ដោយផ្តោតលើការឆ្លុះបញ្ចាំងខ្លួនឯង អំពីការវាយតម្លៃ ការ​អនុវត្តបច្ចេកទេស និងការអនុវត្តក្រមសីលធម៌វិជ្ជាជីវៈ ដោយនិស្សិតផ្ទាល់ និងដោយគ្រូដឹកនាំ​កម្មសិក្សា។ បណ្តុះបណ្តាលគ្រូ អំពីការប្រើប្រាស់ porfolio ដែលជាឧបករណ៍កត់ត្រា និងវាយតម្លៃ​ការ​អនុវត្ត បច្ចេកទេស និងការអនុវត្តក្រមសីលធម៌វិជ្ជាជីវៈបាន ៥៤ នាក់។ តម្រង់​ទិសគ្រូ លើការ​អនុវត្ត​ក្រមសីលធម៌​វិជ្ជាជីវៈបានចំនួន ៤១ នាក់ បណ្តុះបណ្តាល​និស្សិតថ្នាក់បរិញ្ញាបត្រ​វិទ្យាសាស្ត្រ​វេជ្ជសាស្ត្រ និស្សិតវេជ្ជបណ្ឌិតទូទៅ និង វេជ្ជបណ្ឌិតឯកទេស លើមុខវិជ្ជា MedPro បានចំនួនសរុប ៤៦៧ នាក់។ បន្ថែមនេះ សាកលវិទ្យាល័យ ក៏បានរៀបចំជាកម្មវិធី Student Forum និង Live ក្នុងផេច ស.វ.ស ពិភាក្សាអំពី Ethics and Professionalism ផងដែរ។

លោកសាស្ត្រាចារ្យ បានបញ្ជាក់ថា បន្ថែមពីសកម្មភាពដែលបានអនុវត្តខាងលើ សាកលវិទ្យាល័យ ក៏កំពុងខិតខំពង្រីកការបញ្ចូលមុខវិជ្ជាក្រមសីលធម៌វិជ្ជាជីវៈ MedPro ក្នុងកម្មវិធីជំនាញផ្សេងៗ ទៀត នៅ ស.វ.ស ធ្វើបច្ចុប្បន្នភាពបញ្ជី check list សម្រាប់ការអនុវត្តបង្ហាញត្រាប់ ដោយបញ្ចូល​ក្រមសីលធម៌​វិជ្ជាជីវៈ​សម្រាប់​ការ​រៀន និងការវាយតម្លៃ ក្នុងពេលបង្ហាញត្រាប់ និងពង្រឹងការអនុវត្ត porfolio សម្រាប់កម្មសិក្សានិស្សិត ដោយផ្តោតការយកចិត្តទុកដាក់បន្ថែម លើការអនុវត្ត ក្រម​សីលធម៌​វិជ្ជាជីវៈ ក្នុងពេលកម្មសិក្សាគ្លីនីក។

លោកសាស្ត្រាចារ្យ បានបញ្ជាក់ទៀតថា ភាពជោគជ័យដែលសាកលវិទ្យាល័យអាចទទួល​បាន​ទាំងនេះ កើតមានឡើង ក៏អាស្រ័យដោយមានការចង្អុលបង្ហាញ និងណែនាំដោយផ្ទាល់ ពី​សំណាក់​លោក​សាស្ត្រាចារ្យ​រដ្ឋមន្ត្រី​ក្រសួងសុខាភិបាល និង​លោកសាស្ត្រាចារ្យ​ប្រធាន​ក្រុមប្រឹក្សា​ភិបាល នៃ ស.វ.ស ផង​ដែរ៕

អត្ថបទ ៖ សំអឿន

The post មន្ត្រីជាន់ខ្ពស់ ចាត់ទុកគណៈគ្រូពេទ្យជាតិមានតួនាទីសំខាន់ជួយអភិវឌ្ឍន៍នូវ វិជ្ជាជីវៈវេជ្ជសាស្ត្រនៅកម្ពុជាឱ្យមានសេចក្ដីថ្លៃថ្នូរ appeared first on Kampuchea Thmey Daily.

ថ្លែងក្នុងព្រឹត្តិការណ៍ការប្រកួតកម្មវិធីសិក្សាបែប STEMប្រចាំឆ្នាំ ២០២៥ដែលសហការរៀបចំរវាងក្រសួងអប់រំ យុវជន និងកីឡាជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) និង Think!Think ប្រចាំកម្ពុជានៅផ្សារទំនើប AEON Mean Chey កាលពីថ្ងៃទី១៨មករាដោយមានកុមារចូលរួមប្រកួតប្រមាណ១.០០០ នាក់  

ក្នុងនាមក្រសួងអប់រំលោក អ៊ុង បូរ៉ាត់ បានថ្លែងអំណរគុណដល់អង្គការ JICA និង Wonderfyដែលបាននាំយកនូវកម្មវិធីដ៏ពិសេសនេះដល់ប្រទេសកម្ពុជាដើម្បីជួយពង្រឹងសមត្ថភាពក្នុងការគិតក៏ដូចជាការគិតលេខប្រកបដោយការត្រឹះរិះពិចារណានិងបង្កើតភាពវ័ឆ្លាតរបស់កុមារកម្ពុជា។

លោក អ៊ុង បូរ៉ាត់ រដ្ឋលេខាធិការ តំណាងលោកបណ្ឌិតសភាចារ្យ ហង់ ជួន ណារ៉ុន ឧបនាយករដ្ឋមន្ត្រី និងជារដ្ឋមន្ត្រីក្រសួងអប់រំ យុវជន និងកីឡាបានមានប្រសាសន៍ថា «នៅក្នុងពិភពលោកយើងដែលកំពុងផ្លាស់ប្តូរយ៉ាងឆាប់រហ័សនេះ ភាពស្ទាត់ជំនាញលើផ្នែក STEM និងបំណិនសតវត្សរ៍ទី២១ តាំងពីវ័យក្មេង គឺជាមូលដ្ឋានគ្រឹះសម្រាប់ភាពជោគជ័យនាពេលអនាគតរបស់កុមារ។ កម្មវិធី Think!Think! World Cupមិនមែនគ្រាន់តែជាការប្រកួតប្រជែងមួយប៉ុណ្ណោះទេប៉ុន្តែវាគឺជាវេទិកាដ៏សំខាន់មួយដែលជួយឱ្យកុមារបណ្តុះក្តីស្រឡាញ់ចំពោះជំ នាញដ៏ចាំបាច់ទាំងនេះ តាមរយៈបទពិសោធន៍ប្រកបដោយភាពសប្បាយរីករាយ និងមានអត្ថន័យជាទីបំផុត។»

លោក Kei Kawashima តំណាង Wonderfy បានមានប្រសាសន៍ថា «ជាមូលដ្ឋាន ការអប់រំគួរតែជាបទពិសោធន៍ដ៏រីករាយមួយ។ Think!Think! បំផុសគំនិតនៃការចង់ដឹងចង់ឮពីធម្មជាតិរបស់កុមារ និងទាញចេញសក្តានុពលពេញលេញរបស់ពួកគេ តាមរយៈការធ្វើឱ្យការសិក្សាមានភាពសប្បាយរីករាយ។ កុមារគ្រប់រូបរីកចម្រើនទៅតាមល្បឿនរបស់ពួកគេរៀងៗខ្លួន។ដូច្នេះអ្វីដែលសំខាន់បំផុតគឺពួកគេបានទទួលបទពិសោធន៍នូវភាពរំភើបរីករាយកើតចេញពីការគិតដ៏ពិតប្រាកដ។ កម្មពិធី World Cup ប្រចាំឆ្នាំនេះ គឺជាការអបអរសាទរការរៀនដែលជម្រុញការគិតបែបនោះ។

យើងនៅតែប្តេជ្ញាថានឹងនាំមកនូវបច្ចេកវិទ្យា និងជំនាញអប់រំដ៏ល្អបំផុតរបស់ប្រទេសជប៉ុន ដើម្បីផ្តល់ដល់កុមារគ្រប់រូបនៅក្នុងប្រទេសកម្ពុជា»។

សិស្សចំនួន ២នាក់ដែលមានពិន្ទុខ្ពស់បំផុតក្នុងប្រភេទថ្នាក់នីមួយៗ គឺទទួលបានរង្វាន់សំបុត្រយន្តហោះ និងឱកាសចូលរួមព្រឹត្តិការណ៍ Think! Think! Cup នៅទីក្រុងតូក្យូក្នុងឆ្នាំ ២០២៦។ ក្រៅពីនេះសម្រាប់សិស្សចូលរួមទាំងអស់នៅក្នុងម្មពិធី ក៏អាចទទួលបានឱកាសពិសេសទៅប្រទេសជប៉ុន តាមរយៈការចាប់រង្វាន់សំណាងផងដែរ។

ចំពោះសិស្សជ័យលាភីនៃកម្មពិធី Think!Think! World Cup 2025រួមមានកម្រិតមត្តេយ្យ (Kinder Category)

លេខ 1៖ ខឹម បុទុម រមនា

លេខ 2៖ កានបញ្ញា ដារិត

លេខ 3៖ ហុង សេង ងួន

លេខ 4៖ ខេន វាតាណាបិ

លេខ 5៖ សុខ លីហុង

កម្រិតបឋមសិក្សា (Primary Category)

លេខ 1៖ សម្បត្តិ សុវណ្ណវឌ្ឍនៈ

លេខ 2៖ នីណូ តាមូរ៉ា

លេខ 3៖ សារ៉ា ជូរី

លេខ 4៖ ជា ចន្ទវីរៈ

លេខ 5៖ ខេង ផាន់រតនៈ

កម្រិតខ្ពស់ (Advanced Category)

លេខ 1៖ អុីអូរិ គីមូរ៉ា

លេខ 2៖ សារ៉ា ម៉ូរីសា

លេខ 3៖ ផាន់ វុីនឆាយ

លេខ 4៖ រ៉ុងមុនី ប្រសិដ្ឋ

លេខ 5៖ អុឹង លីមហ័រ

គួរបញ្ជាក់ថាThink!Think! គឺជាកម្មវិធីបច្ចេកវិទ្យាអប់រំ (EdTech) ឈានមុខគេរបស់ប្រទេសជប៉ុនដែលផ្តោតលើការអភិវឌ្ឍជំនាញគិតបែបវិភាគ និងជំនាញមិនមែនពុទ្ធិបញ្ញា (Non-cognitive Skills) របស់កុមារ។ ជាមួយនឹងអ្នកប្រើប្រាស់ជាង ២,៥ លាននាក់ទូទាំងពិភពលោក កម្មវិធីនេះមានល្បែងផ្តុំរូប និងហ្គេមយុទ្ធសាស្ត្រយ៉ាងទូលំទូលាយ ដែលត្រូវបានរចនាឡើងដើម្បីជំរុញចំណង់ចង់រៀនសូត្រពេញមួយជីវិត។វិធីសាស្រ្តច្នៃប្រឌិតថ្មីរបស់កម្មវិធីនេះបានទទួលការទទួលស្គាល់ជាសាកល រួមទាំងពានរង្វាន់ “កម្មវិធីល្អបំផុតសម្រាប់កុមារ” ពី Google និងពានរង្វាន់ “កម្មវិធីច្នៃប្រឌិតថ្មីបំផុត” ពីកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC)៕

អត្ថបទ ៖ សំអឿន

The post មន្ត្រីជាន់ខ្ពស់ ៖ ភាពស្ទាត់ជំនាញលើផ្នែកSTEM និងបំណិនសតវត្សរ៍ទី២១ជាមូលដ្ឋានគ្រឹះជួយឱ្យកុមារជោគជ័យនាពេលអនាគត appeared first on Kampuchea Thmey Daily.

នៅ​ក្នុង​កិច្ចប្រជុំ​ពិភាក្សា​អំពី​ការ​គ្រប់គ្រង​ទិន្នន័យ និង​ព័ត៌មាន​វិនិយោគ​, និង​ការ​គ្រប់គ្រង​សម្បទាន​ដី​សេដ្ឋកិច្ច សម្រាប់​ជំរុញ​ការ​វិនិយោគ​ក្នុង​ខេត្ត​ទាំង ៤ នៃ​ភូមិភាគ​ឦសាន​ កាលពី​ថ្ងៃទី​ ១១ ​ធ្នូ លោកបណ្ឌិត​សភា​ចា​រ្យ ហ៊ាន សា​ហ៊ី​ប ទីប្រឹក្សា​សម្តេច​ធិបតី​នាយករដ្ឋមន្ត្រី​ , រដ្ឋលេខាធិការ​ក្រសួង​សេដ្ឋកិច្ច និង​ហិរញ្ញវត្ថុ និង ជា​ប្រធាន​ក្រុមការងារ​ជំរុញ​ការវិនិយោគ​ក្នុងភូមិ​ភាគ​ឦសាន (​ក​.​វ​.​ឦសាន​)​ បាន​លើកឡើងថា ​រដ្ឋបាល​ខេត្ត​ទាំង​បួន ​ត្រូវ​បន្ត​យកចិត្តទុកដាក់​ពិនិត្យ​លើ​កិច្ចការ​សម្បទាន​ដី​សេដ្ឋកិច្ច ក្នុង​ដែន​សមត្ថកិច្ច​របស់ខ្លួន ដោយ​សម្បទានិក​ដែល​បាន​អនុវត្ត​ការងារ​របស់​ខ្លួន​ហើយ ត្រូវ​បន្ត​ជំរុញ​ទៅមុខ​បន្ថែម​ទៀត ​, ហើយ​សម្បទា​និក​ដែល​បាន​អភិវឌ្ឍន៍​សម្បទាន​ដី​សេដ្ឋកិច្ច​បាន​តិចតួច ឬ មិនទាន់បាន​អនុវត្ត​ការងារ​សោះ ត្រូវ​ជំរុញ​ឱ្យ​អនុវត្ត​ការងារ​ឱ្យ​បាន​សកម្ម​ផុលផុស ដើម្បី​ធានា​ឱ្យ​បាន​ថា ធនធាន​ដែលមាន ត្រូវបាន​ប្រើប្រាស់​អស់​សក្តានុពល និង មាន​ផលិតភាព​សេដ្ឋកិច្ច​ខ្ពស់។

លោក​បណ្ឌិតសភា​ចា​រ្យ បាន​ណែនាំ​ក្រសួង​-​ស្ថាប័ន​ពាក់ព័ន្ធ និង រដ្ឋបាលខេត្ត​ទាំង​បួន ឱ្យ​ពង្រឹង​កិច្ច​សហការ​ល្អ ក្នុងការ​រៀបចំ និង ការគ្រប់គ្រង​ប្រព័ន្ធ​ទិន្នន័យ​វិនិយោគ និង ការចែករំលែក​ព័ត៌មាន ក្រោម​ការសម្របសម្រួល​រួម​របស់ ក​.​វ​.​ឦសាន សំដៅ​រួមគ្នា​ដោះស្រាយ​បញ្ហា​ជា​កញ្ចប់ ដោយ​គិតគូរ​អំពី​ផលប្រយោជន៍​សង្គម​-​សេដ្ឋកិច្ច​ជាតិ ​, ជាពិសេស ត្រូវ​ធានា​ឱ្យបាន​ថា វិនិយោគិន​ នឹង​ទទួលបាន​នូវ​ការ​គាំទ្រ​វិនិយោគ ឬ ធុរកិច្ច បាន​យ៉ាង​ពេញលេញ និង ទាន់ពេលវេលា និង អាច​ទាញយក​អត្ថប្រយោជន៍​ជា​អតិបរមា ពី​កាលានុវត្តភាព​សេដ្ឋកិច្ច​ដ៏​ធំធេង នៃ​ភូមិភាគ​ឦសាន។

ជាមួយគ្នានេះ លោក​បណ្ឌិតសភា​ចា​រ្យ បាន​គូស​រំលេច​អំពី​តួនាទី​ស្នូល​របស់ ក​.​វ​.​ឦសាន ដែល​ជា «ច្រក​ចេញ​ចូល​តែមួយ​» ក្នុង​អភិក្រម​ជវភាព ​នៃ​ប្រព័ន្ធ​តួអង្គ​តែមួយ ដើម្បី​ផ្តល់​ការ​សម្របសម្រួល​ជា​កញ្ចប់​នូវ​ព័ត៌មាន​វិនិយោគ ​, ការសម្រួល​នីតិវិធី​ពាក់ព័ន្ធ និង ការដោះស្រាយ​បញ្ហា​ប្រឈម​នានា ​នៃ​ការ​វិនិយោគ​ឯកជន ប្រកបដោយ​ប្រសិទ្ធភាព សំដៅ​ផ្តល់​ភាព​កក់ក្តៅ និង ទំនុក​ចិត្ត​ខ្ពស់ ដល់​វិនិយោគិន​/​ក្រុមហ៊ុន​វិនិយោគ ឱ្យមក​បណ្តាក់​ទុនវិនិយោគនៅ​ភូមិភាគ​ឦសាន។

គួរ​បញ្ជាក់ថា​ កិច្ចប្រជុំ​នេះ មានការ​ចូលរួម​ពី​តំណាង​ក្រសួង-ស្ថាប័ន​ពាក់ព័ន្ធ និង រដ្ឋបាលខេត្ត​ទាំង​បួន នៃ​ភូមិភាគ​ឦសាន ដើម្បី​ពង្រឹង​យន្តការ​សម្របសម្រួល ​, គ្រប់គ្រង​ព័ត៌មាន​/​ទិន្នន័យ​វិនិយោគ និង គ្រប់គ្រង​ដី​សម្បទាន​សេដ្ឋកិច្ច ឱ្យមាន​ភាពស៊ីចង្វាក់​គ្នា រវាង​តួអង្គ​ពាក់ព័ន្ធ​ទាំងអស់ ក្នុង​អភិក្រម​នៃ “​ជវភាព​ប្រព័ន្ធ​តួអង្គ​តែមួយ​” ដើម្បី​ឆ្លើយតប​ទៅនឹង​តម្រូវការ និង កង្វល់​របស់​វិស័យ​ឯកជន ពាក់ព័ន្ធ​នឹង​ការស្វែងរក និង ការទទួលបាន​នូវ​ព័ត៌មាន​/​ទិន្នន័យ​ដីធ្លី​សម្រាប់​ការវិនិយោគ ដែលមាន​លក្ខណៈ​រហ័ស ច្បាស់លាស់ និង គ្រប់​ជ្រុងជ្រោយ ដែល​ជា​ធាតុ​ចូល​ដ៏​សំខាន់​សម្រាប់​ការ​សម្រេច​ចិត្ត​វិនិយោគ និង អាជីវកម្ម។ លើសពីនេះ ការពង្រឹង​យន្តការ​សម្របសម្រួល​ព័ត៌មាន នឹង​ពង្រឹង​សហ​ថាមពល ​នៃ​ការ​ប្រមូលផ្ដុំ​ឧស្សាហកម្ម ដែល​ផ្សារភ្ជាប់​ខ្សែ​ច្រវាក់​ផលិតកម្ម និង ផ្គត់ផ្គង់ ស្រប​តាម​សក្ដានុពល​សេដ្ឋកិច្ច​ នៃ​តំបន់​ភូមិភាគ​ឦសាន៕

អត្ថបទ ៖ សំអឿន

The post មន្ត្រីជាន់ខ្ពស់ ជំរុញឱ្យរដ្ឋបាលខេត្តទាំងបួនក្នុងភូមិភាគឦសាន ពិនិត្យលើកិច្ចការសម្បទានដីសេដ្ឋកិច្ច ដើម្បីទាក់ទាញការវិនិយោគ appeared first on Kampuchea Thmey Daily.

លោក​វេជ្ជបណ្ឌិត អ៊ុក វិជ្ជា ប្រធាន​មជ្ឈមណ្ឌល​ជាតិ​ប្រយុទ្ធ​នឹង​ជំងឺ​អេដស៍​សើ​ស្បែក និង​កាមរោគ នៃ​ក្រសួងសុខាភិបាល​ បាន​មានប្រសាសន៍​នៅ​ព្រឹក​ថ្ងៃទី​ ២៧ ​វិច្ឆិកា​ នេះ​ថា គោលដៅ​សកល ៩៥-៩៥-៩៥ ក្នុងនោះ ​៩៥% នៃ​អ្នក​ផ្ទុកមេរោគ​អេដស៍ បានដឹង​ពី​ស្ថានភាព​ នៃ​មេរោគ​អេដស៍​របស់ខ្លួន ៩៥% នៃ​អ្នក​ដឹងខ្លួន​ថា​ផ្ទុកមេរោគ​អេដស៍ បានទទួល​ការព្យាបាល​ដោយ​ឱសថ​ប្រឆាំង​មេរោគ​អេដស៍ (ART) និង ៩៥% នៃ​អ្នក​កំពុង​ទទួល ART មាន​លទ្ធផល​តេស្ត​បន្ទុក​មេរោគ​អេដស៍​ក្នុង​ឈាម​កម្រិត​ទាប​បំផុត​មិនអាច​រាប់បាន។ ជា​លទ្ធផល ធៀប​នឹង​គោលដៅ ៩៥-៩៥-៩៥ ខាងលើនេះ គិត​ត្រឹម​ដំណាច់​ឆ្នាំ ២០២៤ កម្ពុជា សម្រេចបាន ៩២% ១០០% និង ៩៨%។

លោក​វេជ្ជបណ្ឌិត បាន​បន្តទៀតថា ​ក្នុង​គោលបំណង​កាត់បន្ថយ​ការឆ្លង​ថ្មី ​នៃ​មេរោគ​អេដស៍ ឱ្យ​កាន់​តែ​មាន​ជម្រើស និង​ផ្តល់​ជម្រើស​នានា​ដល់​ក្រុម​ប្រឈម ក្រសួងសុខាភិបាល​បាន​អនុវត្ត​ការ​ផ្តល់​សេវា​ប្រើ​ថ្នាំ​បង្ការ មុនពេល​ប្រឈម​នឹង​ការឆ្លង​មេរោគ​អេដស៍ ​(​សេវា PrEP ឬ ប្រឹព​) ចំនួន ៥២ កន្លែង ដោយ​អនុវត្ត​នៅតាម​មូលដ្ឋាន​សុខាភិបាល​ចំនួន ៣៤ ទីតាំង និង នៅតាម​មណ្ឌល​សំចត​របស់​អង្គការ​តាម​សហគមន៍ ១៨ ទីតាំង នៅក្នុង​រាជធានី-ខេត្ត​ចំនួន ១៦។

លោក​វេជ្ជបណ្ឌិត ​បាន​លើក​របាយការណ៍​មក​បញ្ជាក់​បន្ថែមថា គិត​ត្រឹម​ត្រីមាស​ទី ៣ ឆ្នាំ ២០២៥ មាន​អតិថិជន​ទទួល​ឱសថ​ប្រឹព​ចំនួន ៤៣ ៧៩០ នាក់ ក្នុងនោះ ៦៩% ជា​ក្រុម​បុរស​រួមភេទ​ជាមួយ​បុរស​, ១៣% ជា​ក្រុម​អ្នក​បំប្លែង​ភេទ​, ១៥% ជា​ក្រុម​ស្ត្រី​បម្រើការ​នៅ​សេវា​កម្សាន្ត និង ៣% ជា​ដៃគូ​ក្រុម​ប្រឈម និង​ដៃគូ​របស់​អ្នក​ផ្ទុកមេរោគ​អេដស៍។

លោក​វេជ្ជបណ្ឌិត​ បាន​ពន្យល់​ថា ​សេវា PrEP ឬ ប្រឹព​នេះ​មាន​ ៣ ​មុខ​ រួមមាន ​ប្រឹព​ប្រភេទ​ថ្នាំលេប ប្រឹព​ប្រភេទ​ចាក់​ក្នុង​មួយ​ម្ជុល​ប្រើ​បាន ​២​ ខែ​ និង​ប្រឹព​ប្រភេទ​ដាក់​កង​សម្រាប់​ស្ត្រី។

លោក​វេជ្ជបណ្ឌិត ​បាន​រំលឹកថា​ ក្រោយពី​បាន​រកឃើញ​ករណី​មេរោគ​អេដស៍​លើកដំបូង​នៅ​ឆ្នាំ ​១៩៩១ អត្រា​ឆ្លង​បាន​រីក​រាលដាល​យ៉ាងខ្លាំង​ស្របពេល​ដែលមាន​ការកើនឡើង​នូវ​ឧស្សាហកម្ម​ផ្លូវ​ភេទ ចន្លោះ​ពី​ឆ្នាំ ​១៩៩៥ ទៅ​ឆ្នាំ​ ១៩៩៨ អត្រា​ប្រេ​វ៉ាឡង់​ នៃ​ជំងឺអេដស៍​បាន​កើនឡើង ២​ ដង គឺ​ពី ០,៦ % នៅ​ឆ្នាំ​ ១៩៩៥ ទៅ ១,២% នៅ​ឆ្នាំ ២០០០ ក្នុងចំណោម​មនុស្សពេញវ័យ​អាយុ​ចន្លោះ​ពី ១៥ ទៅ ៤៩​ ឆ្នាំ។

លោក​វេជ្ជបណ្ឌិត បាន​បន្ថែម​ថា​ ប៉ុន្តែ​ដោយមាន​ការចូលរួម និង​គាំទ្រ​យ៉ាង​ពេញទំហឹង និង​ទាន់​ពេលវេលា​ពី​ថ្នាក់ដឹកនាំ​កំពូល ​នៃ​រាជរដ្ឋាភិបាល​កម្ពុជា ដៃគូ​អភិវឌ្ឍន៍​ទាំងអស់ និង​ការចូលរួម​អនុវត្ត​គ្រប់លំដាប់​ថ្នាក់​ក្នុងការ​ឆ្លើយតប​ទៅនឹង​ការ​រីក​រាលដាល​មេរោគ​អេដស៍​ដ៏​មាន​ប្រសិទ្ធភាព ប្រទេស​កម្ពុជា​បានទទួល​ជោគជ័យ​ដែល​ធ្វើឱ្យ​អត្រា​ប្រេ​វ៉ាឡង់​បាន​ថយចុះ​ពី ១,២% នៅ​ឆ្នាំ​ ២០០០ មក ០,៥% នៅ​ឆ្នាំ ២០២៤ ដែល​បានធ្វើការ​ប៉ាន់ប្រមាណ ​នៃ​ករណី​អ្នក​ផ្ទុកមេរោគ​អេដស៍​មាន​ប្រមាណ ៧៦.០០០ នាក់ ករណី​ឆ្លង​ថ្មី​ នៃ​មេរោគ​អេដស៍​មាន​ចំនួន ១.២០០ នាក់​។ ៨៦% នៃ​ករណី​ឆ្លង​ថ្មី ​នៃ​មេរោគ​អេដស៍ គឺជា​ក្រុម​គោលដៅ​ប្រឈមមុខ​ខ្ពស់ និង​ដៃគូ ក្នុងនោះ​ ៤៥% គឺជា​ក្រុម​យុវវ័យ​មាន​អាយុ​ចាប់ពី ១៥-២៤ ឆ្នាំ។ ចំណែកឯ អ្នករស់នៅ​ជាមួយ​មេរោគ​អេដស៍​មាន​ចំនួន ៧៦.០០០ នាក់ ក្នុង​ឆ្នាំ ២០២៤៕

អត្ថបទ ៖ សំអឿន

The post មន្ត្រីជាន់ខ្ពស់ ៖ កម្ពុជា កំពុងស្ថិតនៅលើមាគ៌ាឆ្ពោះទៅសម្រេចគោលដៅសកល​ក្នុងការប្រយុទ្ធនឹងជំងឺអេដស៍ appeared first on Kampuchea Thmey Daily.

ថ្លែង​ក្នុង​ពិធី​បើក និង​បិទ «​កិច្ចប្រជុំ​ក្រុមប្រឹក្សា​គណៈ​វិជ្ជាជីវៈ​ឆ្មប​កម្ពុជា អាណត្តិ​ទី ​៣»​ កាលពី​ថ្ងៃទី ២៧​ កញ្ញា លោកស្រី​វេជ្ជបណ្ឌិត បាន​ណែនាំ​ដល់​ឆ្មប​គ្រប់រូប ​ត្រូវតែ​ពង្រឹង​សមត្ថភាព​របស់​ខ្លួន​ឱ្យ​បាន​ជាប់​ជាប្រចាំ ដើម្បី​ដោះស្រាយ​អាទិភាព​សុខភាព ព្រមទាំង​ឆ្លើយតប​ទៅ​នឹង​គ្រោះអាសន្ន​នានា​ឱ្យ​បាន​ទាន់​ពេល។

លោកស្រី​វេជ្ជបណ្ឌិត​ បាន​បន្តថា ​ទន្ទឹមនឹងនេះ ការ​លើក​កម្ពស់​គុណភាព​សេវា​ថែទាំ​សុខភាព និង​អាហារូបត្ថម្ភ ការ​ជំរុញ​ការប្រើប្រាស់​សេវា​សុខាភិបាល​ឌីជីថល និង​ការ​ជំរុញ​ការចូលរួម​របស់​បុគ្គល​គ្រួសារ និង​សហគមន៍ ក្នុងការ​លើកកម្ពស់​សុខភាព​មាតា ទារក និង​កុមារ គឺជា​ជំហាន​សំខាន់​មួយ ដើម្បី​សម្រេច​បាន​នូវ​ការ​គ្របដណ្តប់​សុខភាព​ជា​សកល។

លោកស្រី​វេជ្ជបណ្ឌិត​ បាន​បន្តទៀត​ថា ក្នុង​រយៈពេល ២ ​ទសវត្ស ​កន្លងមក​នេះ ប្រទេស​កម្ពុជា​មាន​ការ​រីកចម្រើន​យ៉ាងខ្លាំងក្នុងការ​កាត់បន្ថយ​អត្រា​ស្លាប់​របស់​ទារក និង​កុមារ ដោយ​បច្ចុប្បន្ន​អត្រា​ស្លាប់​របស់​ទារក​នៅសល់​ត្រឹមតែ ៨ ក្នុង ១ ០០០ កំណើត​រស់ និង​កុមារ​អាយុ​ក្រោម ​១ ​ឆ្នាំ នៅសល់​ត្រឹមតែ ១២ ក្នុង ១ ០០០ កំណើត​រស់ ​ប៉ុណ្ណោះ​។ នេះ​មានន័យថា កម្ពុជា ​សម្រេចបាន​រួចហើយ​នូវ​គោលដៅ​អភិវឌ្ឍន៍​ប្រកប​ដោយ​ចីរភាព​នៅ​ឆ្នាំ ២០៣០។

លោកស្រី​វេជ្ជបណ្ឌិត បាន​ណែនាំ​ឱ្យ​ក្រុមប្រឹក្សា​គណៈ​វិជ្ជាជីវៈ​ឆ្មប​ថ្នាក់​ជាតិ និង​ថ្នាក់​រាជធានី ខេត្ត ធ្វើការ​រួមគ្នា រៀបចំ​ផែនការ​សកម្មភាព​ជាមួយ​គ្នា ដើម្បី​ពង្រឹង​ការ​អនុវត្ត​បទដ្ឋាន​គតិយុត្តិ ការ​បណ្តុះបណ្តាល​ដោយ​អនុលោម​តាម​គោលការណ៍ CPD​។ ពង្រឹង​ប្រព័ន្ធ​កត់ត្រា និង​បញ្ជូន​របាយការណ៍​ប្រចាំខែ អំពី​វឌ្ឍនភាព​មក​នាយកដ្ឋាន​មន្ទីរពេទ្យ និង​ថ្នាក់ដឹកនាំ​ទទួលបន្ទុក។ បង្កើន​សមត្ថភាព និង​អនុវត្ត​នូវ​និយាម​ នៃ​ការ​អនុវត្ត​ការងារ​ឆ្មប។ ពង្រឹង​ការ​ចុះ​បញ្ជិកា និង​បន្ត​អាជ្ញាប័ណ្ណ​ឱ្យ​បាន ​១០០%​។ ត្រូវ​ពង្រឹង​យន្តការ​ពិនិត្យ​តាមដាន​លើ​ការប្រតិបត្តិ​ការងារ​របស់​សមាជិក​ឆ្មប នៅ​គ្រប់​លំដាប់ថ្នាក់ ដើម្បី​ធានាបាន​នូវ​ក្រមសីលធម៌​វិជ្ជាជីវៈ សុចរិត​ភាព និង​ភាព​ថ្លៃថ្នូរ​ក្នុងនាម​ជា​អ្នក​ផ្តល់​សេវា។

លោកស្រី​វេជ្ជបណ្ឌិត បាន​សំណូមពរ​ដល់​សមាជិក​ទាំងអស់ ចូលរួម​ពិនិត្យ ផ្តល់​មតិ​យោបល់ ដល់​ការ​ពិនិត្យឡើងវិញ​នូវ​វឌ្ឍនភាព នៃ​ការអនុវត្ត​ការងារ​របស់​គណៈ​វិជ្ជាជីវៈ​ឆ្មប​កន្លងមក នូវ​ចំណុច​ល្អ និង​ចំណុច​ដែល​នៅ​ខ្វះចន្លោះ ដើម្បី​ជា​ទុន​ក្នុង​ការរៀបចំ​ផែនការ​សកម្មភាព​សម្រាប់​ឆ្នាំ​បន្តបន្ទាប់​ទៀត៕

អត្ថបទ ៖ សំអឿន

The post មន្ត្រីជាន់ខ្ពស់ ៖ ឆ្មប គឺជាកម្លាំងចលករមួយយ៉ាងសំខាន់ក្នុងការចូលរួមចំណែកផ្តល់ សេវាសាធារណៈប្រកបដោយប្រសិទ្ធភាព appeared first on Kampuchea Thmey Daily.

លោក​វេជ្ជបណ្ឌិត ហ៊ុយ រ៉េកុល ប្រធាន​មជ្ឈមណ្ឌល​ជាតិ​ប្រយុទ្ធ​នឹង​ជំងឺគ្រុនចាញ់​ប៉ារ៉ាស៊ីត​សាស្ត្រ និង​បាណក​សាស្ត្រ បាន​មានប្រសាសន៍​នៅ​រសៀល​ថ្ងៃទី​ ១២ ​សីហា​ នេះ​ថា ​ការ​ឈានទៅ​សូន្យ​ករណី​ជំងឺគ្រុនចាញ់​នា​ដំណាច់ឆ្នាំ ​២០២៥​ នេះ​ ដោយសារ​ការយកចិត្តទុកដាក់ និង​គាំទ្រ​ខ្ពស់​ពី​ក្រសួង​សុខាភិបាល និង​មាន​កិច្ចសហការ​ពេញលេញ​ពី​គ្រប់​ដៃគូ​ពាក់ព័ន្ធ ក្រោម​ការ​យន្តការ​សម្រប​សម្រួល​អភិបាលកិច្ច​តម្រង់​ទិស​បច្ចេកទេស​ផ្ទាល់​ជាប្រចាំ​របស់​មជ្ឈមណ្ឌល​ជាតិ​ប្រយុទ្ធ​នឹង​ជំងឺ​គ្រុនចាញ់​ប៉ារ៉ាស៊ីត​សាស្ត្រ និង​បាណក​សាស្ត្រ គឺ​ ជំងឺគ្រុនចាញ់​ កំពុង​ឆ្ពោះទៅ​សូន្យ​ករណី​ នៃ​ការ​ចម្លង​ក្នុង​តំបន់ និង​ក៏​កំពុង​បន្ត​ឈានទៅ​សូន្យ​ករណី​ក្នុង​គ្រប់​ភូមិសាស្ត្រ​ទូទាំងប្រទេស​នា​ដំណាច់ឆ្នាំ ២០២៥ ដែល​ជា​គោលដៅ​ចុងក្រោយ។

ជាងនេះទៀត ​កម្ពុជា មាន​យុទ្ធសាស្ត្រ​ជាតិ​លុបបំបាត់​ជំងឺគ្រុនចាញ់​ឆ្នាំ ២០១១-២០២៥ ដែល​កំពុង​ប្រតិបត្តិ​នេះ គឺជា​ត្រីវិស័យ​ដ៏​ត្រឹមត្រូវ ដែល​សមស្រប​តាម​យុទ្ធសាស្ត្រ​តំបន់ និង​សកលលោក។ មុន​ពេល​មាន​យុទ្ធសាស្ត្រ​នេះ​ កម្ពុជា មាន​ករណី​ជំងឺគ្រុនចាញ់​រាយការណ៍​មាន​ជិត ២០ ​ម៉ឺន​ករណី ក្នុង​មួយ​ឆ្នាំ (​ជា​មធ្យម​មាន ១៣ ម៉ឺន​ករណី​ ក្នុង​មួយឆ្នាំៗ​) និង​ស្លាប់ ៧០០ – ៨០០ នាក់ ​ក្នុង​មួយឆ្នាំ។

លោក​វេជ្ជបណ្ឌិត ហ៊ុយ រ៉េកុល បាន​ពន្យល់ថា ក្រៅពីនេះ​យើង​បាន​បន្ថែម​វិធីសាស្ត្រ និង​បង្កើន​ការ​ផ្សព្វផ្សាយ​ដល់​ប្រជាពលរដ្ឋ​ដែល​រស់នៅក្នុង​សំបុក​ចម្លងជំងឺ​គ្រុនចាញ់​ឱ្យបាន​យល់ដឹង​កាន់តែ​ច្បាស់​ពី​វិធី​ការពារ​ជំងឺគ្រុនចាញ់ ផ្តល់​ថ្នាំ​បង្ការ​ការពារ​ដល់​ប្រជាពលរដ្ឋ​រស់នៅ​តំបន់​ប្រឈម​ខ្ពស់​ជាងគេ​ទៅនឹង​ជំងឺគ្រុនចាញ់​ ក៏ដូចជា​ផ្តល់​មុង​ជ្រលក់​ថ្នាំ​ដល់​ប្រជាពលរដ្ឋ​មាន​មុខ​របរ​ចូល​ព្រៃ​ប្រចាំ​ថ្ងៃ​ផង​ដែរ។

ជាមួយគ្នានេះ ការ​មាន​សម្ភារៈ​គ្រប់គ្រាន់​ដូចជា​ ឧបករណ៍​ធ្វើតេស្ត​រក​មេរោគ​គ្រុនចាញ់ ​និង​ឱសថ​ព្យាបាល​ជំងឺគ្រុនចាញ់​ប្រកបដោយ​ប្រសិទ្ធភាព​ខ្ពស់ និង​ដោយសារ​មានការ​ចូលរួម​គាំទ្រ​ពី​ថ្នាក់​ដឹកនាំ​គ្រប់​ជាន់ថ្នាក់ មន្ទីរ​សុខាភិបាល រាជធានី​ខេត្ត អាជ្ញាធរ​មូលដ្ឋាន ​អង្គការ​ដៃគូ​ ពិសេស​ប្រមុខ​រាជរដ្ឋាភិបាល​កម្ពុជា បាន​ដាក់ចេញ​យុទ្ធសាស្ត្រ​ជាតិ​លុបបំបាត់​ជំងឺគ្រុនចាញ់ ទើបបាន​ធ្វើ​ឱ្យ​ការងារ​ប្រយុទ្ធ​នឹង​ជំងឺគ្រុនចាញ់​ទទួលបាន​លទ្ធផល​ល្អ​ប្រសើរ។

លោក​វេជ្ជបណ្ឌិត បាន​បន្ថែមទៀតថា «​យើង​កំពុងស្ថិត​លើ​មាគ៌ា​ត្រឹមត្រូវ​ សង្ឃឹមថា​លុបបំបាត់​បាន។ យើង​កំពុង​សស្រាក់សស្រាំ​ណាស់ តាមដាន​ស្ថានភាព និង​រុករក​ជំងឺគ្រុនចាញ់​»។

លោក​វេជ្ជបណ្ឌិត ហ៊ុយ រ៉េ​កុល សង្ឃឹមថា កម្ពុជា នឹង​អាច​លុបបំបាត់​ជំងឺគ្រុនចាញ់​ឱ្យ​អស់ទាំង​ស្រុង នៅ​ឆ្នាំ ២០២៥​ ដោយសារ​ពីមួយ​ឆ្នាំទៅ​មួយឆ្នាំ​បាន​កាត់បន្ថយ​ករណី​ជំងឺគ្រុនចាញ់​ថយ​ចុះ​ស្ទើរ​មួយ​រយ​ភាគរយ និង​មិនមាន​អ្នកស្លាប់​ដោយសារ​ជំងឺ​នេះ​ទេ ប្រសិនបើ​មិនមាន​វិបត្តិ​អ្វីមួយ​មក​រារាំង​ឧបសគ្គ​នោះ។

គួរ​បញ្ជាក់​ថា ​ក្នុង​ឆមាស​ទី ​១ ឆ្នាំ​ ២០២៥ កម្ពុជា មាន​ករណី​ជំងឺគ្រុនចាញ់​ជាង ១០ ករណី និង​គ្មាន​អ្នក​ស្លាប់​តាំងពី​ឆ្នាំ ២០១៨ មក ថយ​ចុះ ៩៤% បើ​ធៀប​ទៅ​នឹង​រយៈពេល ៦ ខែ​ដូចគ្នា ឆ្នាំ ២០២៤ កន្លងទៅ៕

អត្ថបទ ៖ សំអឿន

The post មន្ត្រីជាន់ខ្ពស់ ៖ កម្ពុជា កំពុងស្ថិតក្នុងស្ថានភាពឈានទៅសូន្យករណីជំងឺគ្រុនចាញ់ នាដំណាច់ឆ្នាំ ២០២៥ appeared first on Kampuchea Thmey Daily.