មូលនិធិកសាងហេដ្ឋារចនាសម្ព័ន្ធតាមព្រំដែន Archives - Kampuchea Thmey Daily

ផ្លូវក្រវាត់ព្រំដែនខេត្តមណ្ឌលគិរី និងរតនគិរីសាងសង់ជិតបញ្ចប់ ១០០% លើផ្លូវព្រំដែនជាង ២៦០ គីឡូម៉ែត្រ

Dy Bunnara — Thu, 28 May 2026 01:49:18 +0000

ក្រុមការងារចំពោះកិច្ចគ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែន (ក.គ.ម) បានចេញសេចក្តីប្រកាសព័ត៌មានពីវឌ្ឍនភាពនៃការកសាងផ្លូវក្រវាត់ព្រំដែន ដោយប្រើប្រាស់មូលនិធិកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន។

របាយការណ៍បានបង្ហាញថា គិតចាប់ពីខែធ្នូ ឆ្នាំ២០២៤ មកដល់ថ្ងៃទី ០៨ ខែឧសភា ឆ្នាំ២០២៦ លទ្ធផលរួមនៃដំណើរការកសាងផ្លូវក្រវាត់ព្រំដែនសម្រេចបានប្រមាណ ៩៥,៩២% នៃផែនការរួម ក្នុងនោះខេត្តមណ្ឌលគិរីសម្រេចបាន ១០០% និងខេត្តរតនគិរីសម្រេចបាន ៩១,៤៨%។

របាយការណ៍បានបង្ហាញថា ក្នុងដំណើរការកសាងផ្លូវព្រំដែននៅក្នុងរយៈពេលប្រមាណ ១៧ ខែកន្លងមកនេះ ក្រុមការងារចំពោះកិច្ច (ក.គ.ម) បានចាត់បញ្ជូនកម្លាំងវិស្វកម្មកសាងផ្លូវចំនួន ៨ កងឯកភាពដោយប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទចំនួន ២៨៦ គ្រឿង ក្នុងនោះនៅខេត្តមណ្ឌលគិរីមាន ៥ កងឯកភាព ប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទចំនួន ២០០ គ្រឿង និងខេត្តរតនគិរីមាន ៣ កងឯកភាព ប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទចំនួន ៨៦ គ្រឿង។

ជាលទ្ធផលក្នុងដំណើរការកសាងផ្លូវក្រវាត់ព្រំដែន ក្រុមការងារចំពោះកិច្ច (ក.គ.ម) បានឈូសព្រៃទទឹង ៥ ម៉ែត្រ លើដីជាក់ស្តែងបានប្រវែង ២៦៤,៤០ គីឡូម៉ែត្រ សម្រាប់រកផ្លូវខ្សែដំបូងឈូសផ្លូវទទឹង ២០ ម៉ែត្របានប្រវែង ២៥៤,៩០ គីឡូម៉ែត្រ លុបជ្រលង បន្ទាបចំណោតភ្នំ ចិតជញ្ជាំងភ្នំ និងជីកប្រឡាយបង្ហូរទឹកភ្លៀង កសាងតួផ្លូវ សម្រេចបានប្រវែង ២៥២,៩០ គីឡូម៉ែត្រ, និងចាក់ក្រាលល្បាយកម្ទេចថ្ម-កិនបង្ហាប់បានប្រវែង ២៤២,៩ គីឡូម៉ែត្រ។

ក្រុមការងារចំពោះកិច្ច (ក.គ.ម) ក៏បានកសាងសម្រេចជាស្ថាពរសំណង់សិល្បការរួមមាន៖ លូប្រអប់សរុប ចំនួន ៤១ កន្លែង ស្មើនឹង ៣៧១,៧ ម៉ែត្រ, ដាក់លូមូលបេតុងគ្រប់ប្រភេទសរុប ៣៥៤ កន្លែង, និងស្ថាបនាសម្រេចជាស្ថាពរនូវសំណង់បេតុងរក្សាទឹកទុកប្រើប្រាស់សរុបចំនួន ១២ កន្លែង ស្មើនឹង ២៤០,៤០ ម៉ែត្រ ក្នុងនោះ ថ្នល់បេតុងបង្ហៀររក្សាទឹកទុកប្រើប្រាស់សម្រេចស្ថាពរបានចំនួន ៥ កន្លែង ស្មើនឹង ១៨០ ម៉ែត្រ និងទំនប់បេតុងបង្ហៀររក្សាទឹកទុកប្រើប្រាស់សម្រេចស្ថាពរបានចំនួន ៧ កន្លែង ស្មើនឹង ៦០,៤០ ម៉ែត្រ, និងស្ថាបនាស្ពានបេតុងសម្រេចបានចំនួន ១ កន្លែង ប្រវែង ១៨ ម៉ែត្រ។

ប្រវែងផ្លូវដែលត្រូវសាងសង់បានកើនដល់ ២៦៤,៤០ គីឡូម៉ែត្រ លើសប្រវែងផ្លូវដែលបានគ្រោងទុកក្នុងផែនការដែលមានត្រឹមតែ ២៥០ គីឡូម៉ែត្រ។

ក្រុមការងារចំពោះកិច្ច (ក.គ.ម) បានបញ្ជាក់ថា ការកើនឡើងនៃប្រវែងផ្លូវនេះដោយសារតែស្ថានភាពភូមិសាស្ត្រ ដែលត្រូវកសាងផ្លូវលើដីជាក់ស្តែងត្រូវបានកែសម្រួល។ ទន្ទឹមនឹងនោះ ផ្ទៃដីដែលត្រូវរាវរកគ្រាប់មីន-យុទ្ធភណ្ឌមិនទាន់ផ្ទុះតាមមុខសញ្ញាក៏បានកើនឡើងពីផ្ទៃដីទំហំ ៦.២៥០.០០០ ម៉ែត្រការ៉េ ក្នុងផែនការដែលបានគ្រោងទុកទៅដល់ផ្ទៃដីទំហំ ៦.៦១០.០០០ ម៉ែត្រការ៉េ ដោយបានរកឃើញគ្រាប់គ្រប់ប្រភេទចំនួន ១០៦ គ្រាប់, លោហធាតុ ១.០០៦ គីឡូក្រាម ក្នុងនោះរួមមានគ្រាប់ប៊ុមប៊ី (គ្រាប់បែកចង្កោម) ចំនួន ៤៣ គ្រាប់។

នៅចំពោះមុខ ក្រុមការងារចំពោះកិច្ច (ក.គ.ម) កំពុងបន្តយកចិត្តទុកដាក់លើការងារថែទាំបច្ចេកទេសខ្សែផ្លូវក្នុងទិសខេត្តមណ្ឌលគិរីដែលបានស្ថាបនារួចរាល់ ដើម្បីធានាគុណភាពរឹងមាំ និងបង្កការខូចខាតជាយថាហេតុនៅក្នុងរដូវវស្សាខាងមុខ។

ជាមួយគ្នានេះ ក៏នឹងបន្តជំរុញល្បឿនការងារកសាងសំណង់ផ្លូវ និងការកសាងសំណង់សិល្បការ្យគ្រប់ប្រភេទនៅទិសខេត្តរតនគិរី ឱ្យបានលឿនបំផុតតាមដែលអាចធ្វើទៅបាន, និងចាត់តាំងដឹកជញ្ជូនប្រេងឥន្ធនៈ សម្ភារៈ វត្ថុធាតុដើម ចូលទៅផ្គត់ផ្គង់ដល់ការដ្ឋានទិសខេត្តរតនគិរីឱ្យបានទាន់ពេលវេលា មុនរដូវវស្សាមានភ្លៀងធ្លាក់ខ្លាំងជួបលំបាកក្នុងការដឹកជញ្ជូន។

មូលនិធិកសាងហេដ្ឋារចនាសម្ព័ន្ធព្រំដែនទទួលបានថវិកាប្រមាណ ២៧ លានដុល្លារ បានមកពីការបរិច្ចាគពីពលរដ្ឋទាំងក្នុងនិងក្រៅប្រទេស សម្រាប់យកទៅប្រើប្រាស់កសាងផ្លូវក្រវាត់ព្រំដែនប្រវែង ២៥០ គីឡូម៉ែត្រនៅខេត្តមណ្ឌលគិរីនិងរតនគិរី។

នៅក្នុងពិធីប្រគល់វិញ្ញាបនបត្រសម្បទាខាងវិជ្ជាជីវៈមេធាវីដល់សិស្សមេធាវី និងប្រគល់វិញ្ញាបនបត្រសុក្រឹតការវិជ្ជាជីវៈមេធាវីប្រមាណ ១ ៦៦០ នាក់ នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែតបានបញ្ជាក់ថា រដ្ឋាភិបាលបានដាក់ឲ្យអនុវត្តផែនការស្ថាបនាផ្លូវក្រវាត់ព្រំដែនដែលនៅសល់ប្រវែងជាង ១ ៣០០ គីឡូម៉ែត្រ ឲ្យបញ្ចប់រួចរាល់ក្នុងរយៈពេល ១០ ឆ្នាំទៀត។

ប្រមុខរដ្ឋាភិបាលបានអះអាងថា មកដល់ពេលនេះរាជរដ្ឋាភិបាលសម្រេចស្ថាបនាផ្លូវក្រវាត់ព្រំដែនបានប្រវែងជាង ១ ៣០០ គីឡូម៉ែត្រ នៅក្នុងប្រវែងសរុបជាង ២ ៦៦០ គីឡូម៉ែត្រ ហើយនៅសល់ ១ ៣០០ គីឡូម៉ែត្រទៀត នឹងបញ្ចប់នៅក្នុងរយៈពេល ១០ ឆ្នាំ ខាងមុខ។

ទាក់ទងការអភិវឌ្ឋហេដ្ឋារចនាសម្ព័ន្ធតាមបណ្តោយព្រំដែន សម្តេចនាយករដ្ឋមន្រ្តីក៏បានលើកឡើងពីមូលហេតុនៃការកៀរគរថវិកាពីពលរដ្ឋចូលរួមសាងសង់ផ្លូវក្រវាត់ព្រំដែន ដើម្បីឱ្យប្រជាពលរដ្ឋមានឱកាសចូលរួមដោយផ្ទាល់ក្នុងកិច្ចការពារនិងអភិវឌ្ឍន៍នៅតំបន់ព្រំដែន៕

The post ផ្លូវក្រវាត់ព្រំដែនខេត្តមណ្ឌលគិរី និងរតនគិរីសាងសង់ជិតបញ្ចប់ ១០០% លើផ្លូវព្រំដែនជាង ២៦០ គីឡូម៉ែត្រ appeared first on Kampuchea Thmey Daily.

រយៈពេល ១៣ ខែ ការស្ថាបនាផ្លូវក្រវាត់ព្រំដែនប្រើប្រាស់មូលនិធិកសាងផ្លូវក្រវាត់ព្រំដែនសម្រេចបានប្រមាណ ៧០%

Dy Bunnara — Mon, 09 Feb 2026 06:39:51 +0000

វឌ្ឍនភាពនៃការកសាងផ្លូវក្រវាត់ព្រំដែនដោយប្រើប្រាស់មូលនិធិកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែនសម្រេចលទ្ធផលបានប្រមាណ ៧០%។

គិតចាប់ពីខែធ្នូ ឆ្នាំ២០២៤ មកដល់ថ្ងៃទី ១១ ខែមករា ឆ្នាំ២០២៦ ពោលនៅក្នុងរយៈពេលប្រមាណ ១៣ ខែ វឌ្ឍនភាពនៃដំណើរការកសាងផ្លូវព្រំដែនបានឈូសព្រៃទទឹង ៥ ម៉ែត្រ បានប្រវែង ២៤១,៦០ គីឡូម៉ែត្រ សម្រាប់រកផ្លូវខ្សែដំបូង, ឈូសផ្លូវទទឹង ២០ ម៉ែត្រ បានប្រវែង ២១៧,៣០ គីឡូម៉ែត្រ សម្រាប់រកអ័ក្សផ្លូវ, លុបជ្រលង-អូរ បន្ទាបចំណោតភ្នំ និងធ្វើប្រឡាយបានប្រវែង ១៨៩,៨ គីឡូម៉ែត្រ, ចិតជញ្ជាំងភ្នំ ធ្វើប្រឡាយបង្ហូរទឹកភ្លៀង កសាងនូវទំនប់សុវត្ថិភាព និងកសាងតួផ្លូវសម្រេចបានប្រវែង ១៨៩,៣ គីឡូម៉ែត្រ, និងចាក់ក្រាលល្បាយកម្ទេចថ្ម-កិនបង្ហាប់បានប្រវែង ១២០,២០ គីឡូម៉ែត្រ។

លទ្ធផលរួមនៃដំណើរការកសាងផ្លូវក្រវាត់ព្រំដែនគឺសម្រេចបានប្រមាណ ៧២,២៩% នៃផែនការរួម ក្នុងនោះខេត្តមណ្ឌលគិរីសម្រេចបាន ៩១,២% និងខេត្តរតនគិរីសម្រេចបាន ៥១,៨១%។ នេះបើតាមក្រុមការងារចំពោះកិច្ចគ្រប់គ្រងមូលនិធិកសាង ហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន (ក.គ.ម)។

ជាមួយគ្នានេះ ក្រុមការងារចំពោះកិច្ចក៏បានកសាងបង្គោលស្លាកមូលនិធិបានចំនួន ៦ កន្លែង លើផែនការ ៨ កន្លែង និងបានដាំកូនត្នោតសរុបចំនួន ៩៣៦ ដើម ដែលជាអត្តសញ្ញាណជាតិតាមបណ្តោយផ្លូវខ្សែក្រវាត់ព្រំដែនទី១។

ចំពោះមុខ ក្រុមការងារចំពោះកិច្ចបានកំពុងបន្តជំរុញការងារកសាងផ្លូវ និងសំណង់មុខទឹកក្នុងភូមិសាស្ត្រខេត្តមណ្ឌលគិរីឱ្យសម្រេចបានជាស្ថាពរ ១០០% យ៉ាងយូរត្រឹមខែមីនា ឆ្នាំ២០២៦ ខាងមុខនេះ រួមទាំងពន្លឿនការងារកសាងផ្លូវនិងចាក់ក្រាលល្បាយថ្ម ជាពិសេសនៅតំបន់ដែលមានស្ថានភាពភូមិសាស្ត្រលំបាក, និងកែលម្អសំណង់ និងត្រួតពិនិត្យលក្ខណៈបច្ចេកទេស ដើម្បីធានាបានទាំងគុណភាព ភាពធន់ និងសោភ័ណភាព៕

The post រយៈពេល ១៣ ខែ ការស្ថាបនាផ្លូវក្រវាត់ព្រំដែនប្រើប្រាស់មូលនិធិកសាងផ្លូវក្រវាត់ព្រំដែនសម្រេចបានប្រមាណ ៧០% appeared first on Kampuchea Thmey Daily.

ផ្លូវក្រវាត់ព្រំដែនកម្ពជា-វៀតណាមជាង ២៥០ គីឡូម៉ែត្រ សាងសង់សម្រេចបានជាង ៥៦% នៃផែនការួម

Dy Bunnara — Thu, 10 Jul 2025 09:24:09 +0000

បើយោងតាមសេចក្តីប្រកាសព័ត៌មានរបស់ក្រុមការងារចំពោះកិច្ច គ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែន ផ្តោតលើការកសាងផ្លូវក្រវាត់ព្រំដែនចេញផ្សាយនៅថ្ងៃទី១០ ខែកក្កដា ឆ្នាំ២០២៥ បានបង្ហាញថា គិតចាប់ពីខែធ្នូ ឆ្នាំ២០២៤ មកដល់បំណាច់ខែមិថុនា ឆ្នាំ២០២៥ ដំណើរការកសាងផ្លូវក្រវាត់ព្រំដែន ដោយផ្តោតលើការកសាងផ្លូវក្រវាត់ព្រំដែនកម្ពុជា-វៀតណាម សម្រេចបានលទ្ធផលជារួមបានប្រមាណ ៥៣,៣០% នៃផែនការសររុបក្នុងនោះខេត្តមណ្ឌលគិរីសម្រេចបានប្រវែង ៦១ គីឡូម៉ែត្រ ស្មើនឹង ៥៦,៦៤% និងខេត្តរតនគិរីបានប្រវែង ២៤,៩០ គីឡូម៉ែត្រ ស្មើនឹង ៤៨,៤៨%។

ក្នុងសេចក្តីប្រកាសព័ត៌មាន បានសង្ខេបរបាយការណ៍ពីដំណើរការកសាងផ្លូវក្រវាត់ព្រំដែនដែលសម្រេចបានលទ្ធផលដូចខាងក្រោមនេះ៖

១. ក្រុមការងារចំពោះកិច្ច ក.គ.ម បានចាត់បញ្ជូនកម្លាំងវិស្វកម្មកសាងផ្លូវចំនួន ៨ កងឯកភាព ដោយប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទចំនួន ២៨៦ គ្រឿង ក្នុងនោះនៅខេត្តមណ្ឌលគិរីមាន ៥ កងឯកភាព ប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទចំនួន ២០០ គ្រឿង និងខេត្តរតនគិរីមាន ៣ កងឯកភាព ប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទចំនួន ៨៦ គ្រឿង។

២. ចំពោះការងាររាវរកគ្រាប់មីន-យុទ្ធភណ្ឌមិនទាន់ផ្ទុះតាមមុខសញ្ញានៃការដ្ឋានស្ថាបនាផ្លូវក្រវាត់ព្រំដែនសម្រេចជាស្ថាពរលើផ្ទៃដីទំហំ ៤.៤១៥.០០០ ម៉ែត្រការ៉េ ស្មើនឹង ៧០,៦៤% នៃផ្ទៃដីសរុប ដែលគ្រោងរាវរក ទំហំ ៦.២៥០.០០០ ម៉ែត្រការ៉េ ដោយបានរកឃើញគ្រាប់គ្រប់ប្រភេទចំនួន ៧៩ គ្រាប់ ក្នុនោះរួមមានគ្រាប់ប៊ុមប៊ី (គ្រាប់បែកចង្កោម) ចំនួន ៣៥ គ្រាប់។

៣. ក្រុមការងារចំពោះកិច្ច ក.គ.ម បានកសាងសម្រេចជាស្ថាពរសំណង់សិល្បការ្យរួមមាន៖ លូប្រអប់សរុបចំនួន ២៣ កន្លែង ស្មើនឹង ២៣៦,៧០ ម៉ែត្រ, ដាក់លូមូលបេតុងគ្រប់ប្រភេទសរុប ១៧៨ កន្លែង និងស្ថាបនាសម្រេចជាស្ថាពរនូវថ្នល់បេតុងបង្កៀរទឹកសរុបចំនួន ១០ កន្លែង ស្មើនឹង ២២១,៨០ ម៉ែត្រ។

៤. វឌ្ឍនភាពនៃដំណើរការកសាងផ្លូវព្រំដែននៅក្នុងរយៈពេលប្រមាណ ៧ ខែកន្លងមកនេះ ក្រុមការងារចំពោះកិច្ច ក.គ.ម បានឈូសព្រៃទទឹង ៥ ម៉ែត្របានប្រវែង ១៧៦,៥០ គីឡូម៉ែត្រសម្រាប់រកផ្លូវខ្សែដំបូង, ឈូសផ្លូវទទឹង ២០ ម៉ែត្រ បានប្រវែង ១៥១,២០ គីឡូម៉ែត្រ សម្រាប់រកអ័ក្សផ្លូវ, លុបជ្រលង-អូរ បន្ទាបចំណោតភ្នំ និងធ្វើប្រឡាយបានប្រវែង ១២៧,៨០ គីឡូម៉ែត្រ, ចិតជញ្ជាំងភ្នំ ធ្វើប្រឡាយបង្ហូរទឹកភ្លៀង កសាងនូវទំនប់សុវត្ថិភាព និងកសាងតួផ្លូវបានប្រវែង ១២៤,៨០ គីឡូម៉ែត្រ និងក្រាលល្បាយកម្ទេចថ្មសម្រេចជាស្ថាពរប្រវែង ៨៥,៩០ គីឡូម៉ែត្រ។ ជាលទ្ធផលរួមនៃដំណើរការកសាងផ្លូវក្រវាត់ព្រំដែនគឺសម្រេចបានប្រមាណ ៥៣,៣០% នៃផែនការ ក្នុងនោះខេត្តមណ្ឌលគិរី សម្រេចបានប្រវែង ៦១ គីឡូម៉ែត្រ ស្មើនឹង ៥៦,៦៤% និងខេត្តរតនគិរី បានប្រវែង ២៤,៩០ គីឡូម៉ែត្រ ស្មើនឹង ៤៨,៤៨%។

៥. នៅចំពោះមុខ ក្រុមការងារកំពុងបន្តជំរុញការងារបោសសម្អាតមីនយុទ្ធភណ្ឌមិនទាន់ផ្ទុះបន្ថែមទៀត, បន្តជំរុញល្បឿនកសាងផ្លូវក្នុងរដូវវស្សា ដោយធានាឱ្យបានតាមបទដ្ឋានលក្ខណៈបច្ចេកទេស មានគុណភាព និងភាពធន់នឹងអាកាសធាតុ, បន្តជំរុញល្បឿននៃការកសាងសំណង់សិល្បការ្យ ដោយពេលភ្លៀងធ្លាក់ខ្លាំងគឺសម្រាក និងពេលរាំងភ្លៀងបន្តអនុវត្តភារកិច្ចកសាងសំណង់។

៦. ក្រុមការងារចំពោះកិច្ច ក.គ.ម ប្តេជ្ញាបន្តអនុវត្តភារកិច្ចរបស់ខ្លួនឱ្យកាន់តែសកម្ម ប្រកបដោយស្មារតីទទួលខុសត្រូវខ្ពស់ ដើម្បីឈានទៅសម្រេចបាននូវការកសាងផ្លូវតាមព្រំដែនតាមផែនការដែលបានគ្រោងទុក និងបន្តផ្តល់ព័ត៌មាន ស្តីពីវឌ្ឍនភាពថ្មីៗនៃដំណើរការកសាងផ្លូវក្រវាត់ព្រំដែន ដោយប្រើប្រាស់មូលនិធិកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែននេះជាបន្តបន្ទាប់៕

The post ផ្លូវក្រវាត់ព្រំដែនកម្ពជា-វៀតណាមជាង ២៥០ គីឡូម៉ែត្រ សាងសង់សម្រេចបានជាង ៥៦% នៃផែនការួម appeared first on Kampuchea Thmey Daily.

ងាកចេញពីព្រំដែនកម្ពុជា-ថៃ ទៅមើលការកសាងផ្លូវក្រវាត់ព្រំដែនកម្ពុជា-វៀតណាម សម្រេចបានអ្វីខ្លះ?

Samean Lay — Thu, 12 Jun 2025 09:04:50 +0000

រាជរដ្ឋាភិបាលកម្ពុជា តាមរយៈកងឯកភាពស្ថាបនាថ្នល់-ស្ពាន នៃបញ្ជាការដ្ឋានវិស្វកម្ម អគ្គបញ្ជាការ បានចល័តគ្រឿងចក្រទៅតាមគោលដៅ ដើម្បីកសាងផ្លូវក្រវាត់ព្រំដែន ផ្តោតសំខាន់ទៅទិស ខេត្តមណ្ឌលគិរី និងខេត្តរតនគិរី ចាប់តាំងពី ខែធ្នូ ឆ្នាំ ២០២៤ មកម៉្លះ។

ការសាងសង់ផ្លូវនេះ ដោយប្រើប្រាស់ថវិកា «មូលនិធិកសាងហេដ្ឋារចនាសម្ព័ន្ធតាមព្រំដែន» ជិត ២៧ លានដុល្លារ ដែលទទួលបានពីប្រជាពលរដ្ឋគ្រប់មជ្ឈដ្ឋាន និងគ្រប់ ស្រទាប់ វណ្ណៈ។ បើតាមផែនការ និងការសិក្សា ពេលវេលានៃការស្ថាបនាផ្លូវនេះ នឹងត្រូវប្រើរយៈពេលសាងសង់ប្រមាណ ៣០ ខែ គ្រោងនឹងបញ្ចប់ជាស្ថាពរនៅក្នុងអំឡុងខែឧសភា ឆ្នាំ ២០២៧។

លោក គីម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារចំពោះកិច្ចគ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែន បានឱ្យដឹងថា ផ្លូវក្រវាត់ព្រំដែន ត្រូវបានវិស្វករសិក្សាកំណត់ស្ថាបនាផ្លូវក្រាលល្បាយថ្មមួយខ្សែជាផ្លូវថ្មី ដែលមានតួផ្លូវប្រវែងពី ៩ ទៅ ១០ម៉ែត្រ ទទឹងផ្លូវ ៧ ម៉ែត្រ និងមានប្រវែងសរុបប្រមាណ ២៥០ គីឡូម៉ែត្រ មាន៤ខ្សែរត់។ ក្នុងនោះខេត្តមណ្ឌលគិរី ប្រវែងប្រមាណ ១៤៧ គីឡូម៉ែត្រ និងខេត្តរតនគិរី មានប្រវែងប្រមាណ ១០២ គីឡូម៉ែត្រ។

គិតចាប់ពីខែធ្នូ ឆ្នាំ ២០២៤ មកដល់បច្ចុប្បន្ន កងកម្លាំង នៃកងឯកភាពស្ថាបនាថ្នល់-ស្ពាន របស់បញ្ជាការដ្ឋានវិស្វកម្ម អគ្គបញ្ជាការ បានកសាងសម្រេចជាស្ថាពរសំណង់សិល្បការ្យនៅតំបន់មួយចំនួនរួមមាន លូប្រអប់ ដាក់លូមូលបេតុងគ្រប់ប្រភេទ និងស្ថាបនាសម្រេចជាស្ថាពរនូវថ្នល់បេតុងបង្រៀរទឹក។

វឌ្ឍនភាពនៃដំណើរការកសាងផ្លូវព្រំដែន ក្រុមការងារ បានឈូសព្រៃទទឹងសម្រាប់រកផ្លូវខ្សែដំបូង លុបជ្រលង-អូរ បន្ទាបចំណោតភ្នំ និងធ្វើប្រឡាយ កសាងតួផ្លូវ ការចិតជញ្ជាំងភ្នំ ក្រាលល្បាយ និងបានកម្ទេចថ្មសម្រេចជាច្រើនកន្លែង។ ជាលទ្ធផលរួមនៃដំណើរការកសាងផ្លូវក្រវាត់ព្រំដែន គិតត្រឹមរយៈពេល ៥ ខែនៃការចាប់ផ្តើមមក គឺសម្រេចបានប្រមាណ ៣៩,៩២% នៃផែនការ ក្នុងនោះ ខេត្តមណ្ឌលគិរី បានប្រវែង ៤៤,៩០ គីឡូម៉ែត្រ ស្មើនឹង ៤២,៤៥% និងខេត្តរតនគិរី បានប្រវែង ៣០,៣០ គីឡូម៉ែត្រ ស្មើនឹង ៣៤,២៦%។

ក្នុងបេសកកម្មនេះ ក្រុមការងារ បានចាត់បញ្ជូនកម្លាំងវិស្វកម្មកសាងផ្លូវចំនួន ៨ កងឯកភាព ដោយប្រើប្រាស់ រថយន្ត-គ្រឿងចក្រ និងម៉ាស៊ីនគ្រប់ប្រភេទ ចំនួន ២៨៦ គ្រឿង ក្នុងនោះនៅខេត្តមណ្ឌលគិរី មាន ៥ កងឯកភាព ប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទ ចំនួន ២០០ គ្រឿង និងខេត្តរតនគិរី មាន ៣ កងឯកភាព ប្រើប្រាស់រថយន្ត-គ្រឿងចក្រ និងម៉ាស៊ីនគ្រប់ប្រភេទ ចំនួន ៨៦ គ្រឿង។

ចំពោះការងាររាវរកគ្រាប់មីន-យុទ្ធភណ្ឌមិនទាន់ផ្ទុះតាមមុខសញ្ញានៃការដ្ឋានស្ថាបនាផ្លូវក្រវាត់ព្រំដែន ត្រូវបាន សម្រេចជាស្ថាពរលើផ្ទៃដីទំហំ ២.៧៥២.៥០០ ម៉ែត្រការ៉េ ស្មើនឹង ៤៤% នៃផ្ទៃដីសរុប ដែលគ្រោងរាវរកទំហំ ៦.២៥០.០០០ ម៉ែត្រការ៉េ ដោយបានរកឃើញគ្រាប់គ្រប់ប្រភេទ ចំនួន ៧៩ គ្រាប់ ក្នុងនោះរួមមាន គ្រាប់ប៊ុមប៊ី (គ្រាប់បែកចង្កោម) ចំនួន ៣៥ គ្រាប់។ នេះគិតត្រឹមរយៈពេល ៥ខែ ប៉ុណ្ណោះ។

ចំពោះមុខនេះ ក្រុមការងារកំពុងបន្តជំរុញការងារបោសសម្អាតមីនយុទ្ធភណ្ឌមិនទាន់ផ្ទុះបន្ថែមទៀត, បន្តជំរុញល្បឿនកសាងផ្លូវក្នុងរដូវប្រាំង ដោយធានាឱ្យបានតាមបទដ្ឋានលក្ខណៈបច្ចេកទេស មានគុណភាព និង ភាពធន់នឹងអាកាសធាតុ បន្តជំរុញល្បឿននៃការកសាងសំណង់សិល្បការ្យ ធ្វើយ៉ាងណាឱ្យសម្រេចជាស្ថាពរ នៅមុនពេលភ្លៀងធ្លាក់ជោគជាំនារដូវវស្សា។

ទោះបីស្ថិតក្នុងរដូវវស្សា ដែលមានភ្លៀងធ្លាក់ស្ទើរជារៀងរាល់ថ្ងៃក្តី កងឯកភាពស្ថាបនាថ្នល់-ស្ពាន នៃបញ្ជាការដ្ឋានវិស្វកម្ម អគ្គបញ្ជាការ បាននឹងកំពុងមមាញឹក អនុវត្តន៍ការងារតាមគោលដៅនីមួយៗ ដើម្បីធានាឱ្យបានតាមលក្ខណៈបច្ចេកទេសសំណង់ ទាំងគុណភាពរឹងមាំ និងមានសោភ័ណភាព ឈានទៅសម្រេចបាននូវការកសាងផ្លូវតាមព្រំដែនតាមផែនការដែលបានគ្រោងទុក ក្នុងឆ្នាំ ២០២៧។ សមិទ្ធផលផ្លូវក្រវាត់ព្រំដែនជាសរសៃឈាមតភ្ជាប់យ៉ាងសំខាន់ពីតំបន់ព្រំដែនទៅកាន់តំបន់នានាក្នុងប្រទេស និងជាការបង្កើតនូវព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍ ប្រកបដោយចីរភាព។

សូមរំឮកថា ការផ្តួចផ្តើមស្ថាបនាផ្លូវក្រវាត់ព្រំដែននេះ បន្ទាប់ពីរាជរដ្ឋាភិបាលកម្ពុជា បានសម្រេចដកខ្លួនចេញពីកិច្ចសហប្រតិបត្តិការអភិវឌ្ឍតំបន់ត្រីកោណកម្ពុជា ឡាវ និង វៀតណាម (CLV-DTA)៕

The post ងាកចេញពីព្រំដែនកម្ពុជា-ថៃ ទៅមើលការកសាងផ្លូវក្រវាត់ព្រំដែនកម្ពុជា-វៀតណាម សម្រេចបានអ្វីខ្លះ? appeared first on Kampuchea Thmey Daily.

ផ្លូវក្រវាត់ព្រំដែនខេត្តមណ្ឌលគិរី លេចរូបរាងបណ្ដើរៗ ដើម្បីត្រៀមទទួលពលរដ្ឋដែលចង់មកលេងកម្សាន្ត

Kang Tola — Tue, 03 Jun 2025 16:32:20 +0000

មូលនិធិកសាងហេដ្ឋារចនាសម្ព័ន្ធតាមព្រំដែនផ្ដោតលើការកសាងផ្លូវក្រវាត់ព្រំដែន ស្ថាបនាដោយកងវិស្វកម្ម ដែលកំពុងពុះពាររាល់ឧបសគ្គនាពេលកន្លងមក បានលេចចេញជារូបរាងល្អស្អាតបណ្ដើរៗហើយ តាមតំបន់មួយចំនួន សម្រាប់ប្រជាពលរដ្ឋក៏ដូចភ្ញៀវទេសចរជាតិនិងអន្តរជាតិ ដែលមានបំណងធ្វើដំណើរកម្សាន្តទស្សនាតាមព្រំដែន ផ្លូវក្រាលក្រួសក្រហមក្នុងភូមិសាស្ត្រជាច្រើននៅខេត្តមណ្ឌលគិរី ជាប់និងប្រទេសវៀតណាម។

សូមគូសបញ្ជាក់ថា កងកម្លាំងកងវិស្វកម្មចំនួន៥អង្គភាព កំពុងស្ថាបនាផ្លូវខ្សែក្រវាត់ព្រំដែនជាងរៀងរាល់ថ្ងៃក្នុងភូមិសាស្ត្រខេត្តមណ្ឌលគិរី បើទោះបីក្នុងស្ថានភាពមេឃភ្លៀងរលឹមលំបាកស្ថាបនាក្នុងរដូវនេះ ប៉ុន្តែក្រុមកងវិស្វកម្ម ពួកគេមិនបានសម្រាកនោះដែរ នៅតែបន្តខិតខំពុះពាររាល់ឧបសគ្គ ដើម្បីពន្លឿនការស្ថាបនាផ្លូវក្រាលក្រួសក្រហមនៅតាមតំបន់មួយចំនួន សាងសង់បានយ៉ាងល្អសម្រាប់ទទួលភ្ញៀវទេសចរដែលមានបំណង់ ធ្វើដំណើរទស្សនាកំសាន្ត មើលទិដ្ឋភាពតាមដងព្រៃភ្នំ ជាពិសេស អាចមើលទិដ្ឋភាពជាក់ស្ដែងនៅតាមបង្គោលព្រំដែន របស់កម្ពុជាយើង។

ផ្លូវដែលប្រជាពលរដ្ឋនិងភ្ញៀវទេសចរ អាចធ្វើដំណើរកម្សាន្តបាននោះ រួមមានចំណុចទីតាំងស្ថិតនៅក្នុងស្រុកអូររាំង ឆ្ពោះទៅឃុំដាក់ដាំ និងពីឃុំដាក់ដាំ ឆ្ពោះទៅភ្នំណាមលៀរស្រុកពេជ្រាដា ដែលផ្លូវទាំងនោះ កម្លាំងកងវិស្វកម្មបានស្ថាបនាបានស្អាតល្អងាយស្រួលធ្វើដំណើរ៕

The post ផ្លូវក្រវាត់ព្រំដែនខេត្តមណ្ឌលគិរី លេចរូបរាងបណ្ដើរៗ ដើម្បីត្រៀមទទួលពលរដ្ឋដែលចង់មកលេងកម្សាន្ត appeared first on Kampuchea Thmey Daily.

ទោះបីភ្លៀងបន្តធ្លាក់ កងវិស្វកម្មពុះពារបន្តសាងសង់ផ្លូវក្រវាត់ព្រំដែន នៅទិសរតនគិរី

Samean Lay — Fri, 30 May 2025 11:30:00 +0000

ទោះបីស្ថិតក្នុងរដូវវស្សា ដែលមានភ្លៀងធ្លាក់ស្ទើរជារៀងរាល់ថ្ងៃក្តី កងឯកភាពស្ថាបនាថ្នល់-ស្ពាន នៃបញ្ជាការដ្ឋានវិស្វកម្ម អគ្គបញ្ជាការ ប្រចាំទិសរតនគិរី បាននឹងកំពុងមមាញឹក អនុវត្តន៍ការងារតាមគោលដៅនីមួៗ ក្នុងការសាងសង់ផ្លូវក្រវាត់ព្រំដែន ប្រកបដោយការយកចិត្តទុកដាក់ខ្ពស់ ដើម្បីធានាឱ្យបានតាមលក្ខណៈបច្ចេកទេសសំណង់ ទាំងគុណភាពរឹងមាំ និងមានសោភ័ណភាព។

ចាប់ពីចុងខែ ឧសភា ឆ្នាំ២០២៥ ជារដូវវស្សាមានភ្លៀងធ្លាក់ខ្លាំង ដែលនឹងធ្វើឱ្យដំណើរការស្ថាបនាផ្លូវក្រវាត់ព្រំដែនទៅតំបន់កន្ទុយនាគជួបបញ្ហាប្រឈម ដោយសារភូមិសាស្រ្តដែលនឹងត្រូវសាងសង់ផ្លូវ និង ស្ពាន មានដីបាក់ស្រុតចុះតាមចង្កេះភ្នំ។ ទោះបីជាយ៉ាងណា កងវិស្វកម្មប្រចាំទិសរតនគិរី នៅតែបន្តពុះពារ សម្រេចតាមផែនការរបស់ថ្នាក់ដឹកនាំ ដើម្បីកសាងផ្លូវក្រវាត់ព្រំដែនឱ្យមានភាពរឹងមាំ ជារបងការពារជាតិមាតុភូមិ។

លោក ដា ភារម្យ ជាកងកម្លាំងវិស្វកម្មនៅតំបន់នោះបានប្រាប់ថា ទោះបីភ្លៀងបន្តធ្លាក់ ប៉ុន្តេក្រុមការងារ កំពុងមមាញឹកធ្វើការងារ ដើម្បីបញ្ចប់ពីផែនការកំណត់ ពីបង្គោលមួយទៅបង្គោលមួយទៀ។ លោកថា ថ្វីត្បិតមានភ្លៀងធ្លាក់ជោគជាំនារដូវវស្សា បង្កជាផលរំខានខ្លះៗ ជាពិសេសនៅតាមការដ្ឋានសំណង់មុខទឹក ដែលតែងតែជួបបញ្ហាជំនន់ទឹកភ្លៀង ក៏ដូចជាផលលំបាកក្នុងការដឹកជញ្ជូន ដែលត្រូវឆ្លងកាត់ទឹកហូរ កាត់ព្រៃ និងជ្រលងភ្នំ ក៏ក្រុមការងារនៅតែបន្តសកម្មភាពសាងសង់ផ្លូវឥតឈប់ឈរ ។

លោកបន្តថា៖« ផ្លូវខ្សែទី១ គឺផ្លូវសេដ្ឋកិច្ច ដែលយើងធ្វើនៅខាងក្នុង មានម្ងាយមួយគីឡូម៉ែត្រ ពីរគីឡូម៉ែត្រ ឬបួនគីឡូម៉ែត្រពីខ្សែព្រំដែន ខណៈផ្លូវខ្សែទី២ គឺផ្លូវក្រវ៉ាត់ព្រំដែន ដែលធ្វើកៀកខ្លាំងនឹងព្រំដែន កន្លែងខ្លះមានចម្ងាយត្រឹម១០ ទៅ ៣០ម៉ែត្រ ពីបង្គោលព្រំដែនប៉ុណ្ណោះ» ។

សូមជម្រាបថា សមិទ្ធផលផ្លូវក្រវាត់ព្រំដែន គឺជាសរសៃឈាមតភ្ជាប់យ៉ាងសំខាន់ពីតំបន់ព្រំដែនទៅកាន់តំបន់នានាក្នុងប្រទេស និងជាការបង្កើតនូវព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍ ប្រកបដោយចីរភាព។ ពិសេសផ្លូវទិសរតនគិរី ក៏បានជួយសម្រួលដល់ជនជាតិដើមភាគតិច នៅត្រង់កន្ទុយនាគ ដែលពីមុនមកធ្លាប់ជាទីកន្លែងសមរភូមិប្រយុទ្ធគ្នា ខ្ទេចខ្ទីដោយសារសង្គ្រាម មិនទាន់មានផ្លូវធ្វើដំណើរទៅធ្វើស្រែចម្ការ និងដឹកជញ្ជូនដំណាំកសិកម្ម ទៅលក់នៅទីផ្សារឡើយ។

ដោយអនុវត្តតាមបទបញ្ជារពីប្រមុខរដ្ឋាភិបាល កងវិស្វកម្មបានជួសជុលផ្លូវដែលរងការខូចខាត និងបានសាងសង់បន្តបានប្រវែងជាង ៣០ គីឡូម៉ែត្រគឺទៅដល់បង្គោលព្រំដែនលេខ ៩ ឆ្ពោះទៅតំបន់កន្ទុយនាគ។

ខេត្តរតនគិរី បានបញ្ចប់ការបោះបង្គោលព្រំដែនជាមួយប្រទេសប្រទេសឡាវរវាងពីឆ្នាំ២០១៥ ដល់២០២២ បានប្រវែង ១៧៩.២ គីឡូម៉ែត្រ លើផែនការសរុប ៣៧៧គីឡូម៉ែត្រ ពីបង្គោលលេខ ០ (កន្ទុយនាគ) រហូតដល់បង្គោល ៣០ (ច្រកអូរយ៉ាដាវ)។ ដោយឡែកចាប់ពីបង្គោលលេខ ៣១ ដល់បង្គោលលេខ ៤០ ព្រំប្រទល់ខេត្តមណ្ឌលគិរីនៅកំពុងចរចាដោះស្រាយនៅឡើយ៕

អត្ថបទ៖ ខៀវ ចាប

The post ទោះបីភ្លៀងបន្តធ្លាក់ កងវិស្វកម្មពុះពារបន្តសាងសង់ផ្លូវក្រវាត់ព្រំដែន នៅទិសរតនគិរី appeared first on Kampuchea Thmey Daily.

កម្លាំងសប្បុរជនកម្ពុជា រួមចំណែករុញឱ្យលេចចេញរូបរាងផ្លូវក្រវាត់ព្រំដែនជាបណ្តើរៗ

Samean Lay — Fri, 14 Feb 2025 04:52:49 +0000

មួយប៉ព្រិចភ្នែក ការសាងសង់ហេដ្ឋារចនាសម្ព័ន្ធផ្លូវក្រវ៉ាត់ព្រំដែនកម្ពុជា បានលេចចេញជារូបរាងបណ្តើរៗហើយ បន្ទាប់ពីរាជរដ្ឋាភិបាលផ្តល់ការអនុញ្ញាត ឱ្យក្រុមវិស្វករជំនាញ ចល័តគ្រឿងចក្រចូលទៅតាមគោលដៅដើម្បីបើកការដ្ឋាន កាលពីខែ វិច្ឆិកា ឆ្នាំ ២០២៤។

រយៈពេលប្រមាណ៣ខែ មកនេះ ពោលគិតត្រឹមថ្ងៃទី ១៤ ខែកុម្ភៈ ឆ្នាំ ២០២៥នេះ កម្លាំងជំនាញនៃកងឯកភាពស្ថាបនាថ្នល់-ស្ពាន នៃបញ្ជាការដ្ឋានវិស្វកម្ម អគ្គបញ្ជាការ បាននិងកំពុងធ្វើការឈូសឆាយ លុបជ្រលងអូរ បន្ទាបចំណោតភ្នំរួម និងកសាងសំណង់សិល្បៈការ្យ។

ការកសាងហេដ្ឋារចនាសម្ព័ន្ធតាមព្រំដែន បានជួបឧបសគ្គជាច្រើនដូចជាការ ពុះហែកភ្នំ រាវរកគ្រាប់មីន -យុទ្ធភណ្ឌមិនទាន់ផ្ទុះតាមគោលដៅការដ្ឋាន ផ្ទៀងផ្ទាត់ប្លង់ផែនទី ការបោះតម្រុយ និងឆ្លងកាត់អូរ ស្ទឹងជាដើម។ ទោះជាជួបឧបសគ្គយ៉ាងណា ការសាងសង់ផ្លូវក្រវាត់ព្រំដែនបានលេចចេញជារូបរាងបណ្តើរៗ និងសម្រេចបានលទ្ធផលជាច្រើន។

នាយឯក ហេង សុខដា យុទ្ធជនក្រុមការងារស្ថាបនាសំណង់ទទួលបន្ទុកខេត្តរតនគិរី មានប្រសាសន៍ថា អ្វីដែលជាឧបសគ្គនោះ ដំណាក់ទី១ ត្រូវហែកកាត់ភ្នំ ចំណោតខ្ពស់ទម្លាក់មកទាប និងកុំឱ្យមានប៉ះពាល់ថ្ម ហើយដំណាក់កាល ទី២ សម្រុតភ្នំបន្តរហូតទាបដែលអាចធ្វើចរាចរណ៍បាន១០០ %»។ លោកឱ្យដឹងថា៖«ការងារខ្ញុំខាងវត្ថុរារាំង និងពុះពារ ការហែកភ្នំ យើងមានផលវិបាកភ្នំខ្ពស់ៗច្រើនពិបាកខ្លាំង ព្រោះការងារឈូសឆាយនៅតាមខ្សែបន្ទាត់ព្រំដែនជាមួយវៀតណាម»។

គម្រោងកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន និងផ្លូវតភ្ជាប់ចូលផ្លូវព្រំដែន មានប្រវែងផ្លូវសរុបប្រមាណ២៥០ គីឡូម៉ែត្រ ក្នុងនោះ ខេត្តមណ្ឌលគិរី ប្រវែងប្រមាណ១៤៧ គីឡូម៉ែត្រ និង ខេត្តរតនគិរី ប្រវែងប្រមាណ ១០២ គីឡូម៉ែត្រ។ ការកសាងនេះគ្រោងប្រើរយៈពេលប្រមាណ ៣០ខែ នឹងសម្រេចជាស្ថាពរក្នុងអំឡុង ខែឧសភា ឆ្នាំ២០២៧។

សមិទ្ធផលដែលសម្រេចបាននាពេលនេះ ដោយមានការចូលរួមពីប្រជាពលរដ្ឋខ្មែរគ្រប់ទិសទី ដែលបានចូលរួមបរិច្ចាគថវិកាដោយស្ម័គ្រប្រមាណ ២៧ លានដុល្លាអាមេរិក។ ការចូលរួមនេះ បន្ទាប់ពីរាជរដ្ឋាភិបាលកម្ពុជា កាលពីថ្ងៃទី២២ ខែសីហា ឆ្នាំ ២០២៤ បានសម្រេច «មូលនិធិកសាងហេដ្ឋារចនាសម្ព័ន្ធតាមព្រំដែន – FBID» និងបានអំពាវនាវដល់ពលរដ្ឋដែលមានទឹកចិត្តស្នេហាជាតិចង់ចូលរួមអភិវឌ្ឍព្រំដែន ចូលរួមថវិកាតាមគោលការណ៍ស្ម័គ្រចិត្ត។

សូមជម្រាបថា ការកសាងហេដ្ឋារចនាសម្ព័ន្ធផ្តោតលើកសាងផ្លូវក្រវាត់តាមព្រំដែន បន្ទាប់ពីរាជរដ្ឋាភិបាលកម្ពុជា បានសម្រេចជាផ្លូវការ ប្រកាសដកខ្លួនចេញពីកិច្ចសហប្រតិបត្តិការអភិវឌ្ឍតំបន់ត្រីកោណ កម្ពុជា-ឡាវ-វៀតណាម (CLV DTA)៕

The post កម្លាំងសប្បុរជនកម្ពុជា រួមចំណែករុញឱ្យលេចចេញរូបរាងផ្លូវក្រវាត់ព្រំដែនជាបណ្តើរៗ appeared first on Kampuchea Thmey Daily.

សិក្ខាកាមវគ្គអប់រំនយោបាយជំនាន់ទី៨២ រៃអង្គាសថវិកាបានមួយម៉ឺនដុល្លារ ជួយដល់មន្ទីរពេទ្យគន្ធបុប្ផា និងមូលនិធិកសាងហេដ្ឋារចនាសម្ព័ន្ធតាមព្រំដែន

Kang Tola — Mon, 21 Oct 2024 13:50:54 +0000

សិក្ខាកាមវគ្គអប់រំនយោបាយ របស់គណបក្សប្រជាជនកម្ពុជាជំនាន់ទី៨២ ចំនួន១៥១នាក់ ត្រូវបានរៃអង្គាសថវិកាចំនួន១០០០០ដុល្លារអាមេរិក ជួយដល់មន្ទីរពេទ្យគន្ធបុប្ផា និងចូលរួមក្នុង មូលនិធិកសាងហេដ្ឋារចនាសម្ព័ន្ធតាមបណ្តោយព្រំដែន ដោយផ្តោតលើការសាងសង់នូវផ្លូវក្រវាត់ព្រំដែន។

ថវិកាទាំងនេះ គឺបានផ្តល់ជូនទៅដល់លោក សេង ទៀង នាយករងខុទ្ធកាល័យសម្តេចធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា ចំនួន៥០០០ដុល្លារ និងជូនដល់មន្ទីរពេទ្យគន្ធបុប្ផារាជធានីភ្នំពេញចំនួន៥០០០ដុល្លារ៕

The post សិក្ខាកាមវគ្គអប់រំនយោបាយជំនាន់ទី៨២ រៃអង្គាសថវិកាបានមួយម៉ឺនដុល្លារ ជួយដល់មន្ទីរពេទ្យគន្ធបុប្ផា និងមូលនិធិកសាងហេដ្ឋារចនាសម្ព័ន្ធតាមព្រំដែន appeared first on Kampuchea Thmey Daily.

មូលនិធិកសាងហេដ្ឋារចនាសម្ព័ន្ធតាមព្រំដែន Archives - Kampuchea Thmey Daily

ផ្លូវក្រវាត់ព្រំដែនកម្ពជា-វៀតណាមជាង ២៥០ គីឡូម៉ែត្រ សាងសង់​សម្រេច​បាន​ជាង ៥៦% នៃ​ផែនការួម

ងាកចេញពីព្រំដែនកម្ពុជា-ថៃ ទៅមើលការកសាងផ្លូវក្រវាត់ព្រំដែនកម្ពុជា-វៀតណាម សម្រេចបានអ្វីខ្លះ?

ទោះបីភ្លៀងបន្តធ្លាក់ កងវិស្វកម្មពុះពារបន្តសាងសង់ផ្លូវក្រវាត់ព្រំដែន នៅទិសរតនគិរី

កម្លាំងសប្បុរជនកម្ពុជា រួមចំណែករុញឱ្យលេចចេញរូបរាងផ្លូវក្រវាត់ព្រំដែនជាបណ្តើរៗ

ផ្លូវក្រវាត់ព្រំដែនកម្ពជា-វៀតណាមជាង ២៥០ គីឡូម៉ែត្រ សាងសង់សម្រេចបានជាង ៥៦% នៃផែនការួម