ពិធីដ៏មានអត្ថន័យនេះ ត្រូវបានប្រារព្ធធ្វើឡើងនៅទីតាំងដីទល់មុខមន្ទីរអប់រំ យុវជន និងកីឡាខេត្ត ស្ថិតក្នុងភូមិចក សង្កាត់រកាក្នុង ក្រុងដូនកែវ ខេត្តតាកែវ ដោយមានការចូលរួមពីថ្នាក់ដឹកនាំមន្ទីរ-អង្គភាពជុំវិញខេត្ត តំណាងកងកម្លាំងប្រដាប់អាវុធទាំងបីប្រភេទ ព្រមទាំងសមាជិក សមាជិកា សមាគមអតីតយុទ្ធជន និងនិវត្តជនកម្ពុជាយ៉ាងច្រើនកុះករ។

ការសាងសង់អគារសមាគមថ្មីនេះ ត្រូវបានចាត់ទុកជាសមិទ្ធផលថ្មីមួយដ៏សំខាន់សម្រាប់ខេត្តតាកែវ ដែលឆ្លុះបញ្ចាំងពីការយកចិត្តទុកដាក់ និងការដឹងគុណយ៉ាងជ្រាលជ្រៅរបស់រាជរដ្ឋាភិបាល និងថ្នាក់ដឹកនាំគ្រប់លំដាប់ថ្នាក់ ចំពោះអតីតយុទ្ធជន និងនិវត្តជន ដែលបានលះបង់កម្លាំងកាយចិត្ត សាច់ស្រស់ឈាមស្រស់ ក្នុងបុព្វហេតុការពារជាតិមាតុភូមិ និងការរក្សាសន្តិភាពជូនប្រទេសជាតិ។

ថ្នាក់ដឹកនាំបានលើកឡើងថា អគារសមាគមអតីតយុទ្ធជន និងនិវត្តជនកម្ពុជា ប្រចាំខេត្តតាកែវ ដែលនឹងលេចរូបរាងឡើងនាពេលខាងមុខនេះ មិនត្រឹមតែជាទីស្នាក់ការបំពេញការងារប៉ុណ្ណោះទេ ប៉ុន្តែនឹងក្លាយជាមជ្ឈមណ្ឌលសម្រាប់ជួបជុំ ពិភាក្សា និងសម្របសម្រួលកិច្ចការងារនានា ដើម្បីគាំទ្រ និងលើកកម្ពស់ជីវភាពរស់នៅរបស់អតីតយុទ្ធជន និងនិវត្តជនក្នុងខេត្តឱ្យកាន់តែមានភាពប្រសើរឡើង។

ការបញ្ចុះបឋមសិលាសាងសង់អគារនេះ ក៏ជាការបន្តអនុវត្តគោលនយោបាយយកចិត្តទុកដាក់លើសុខុមាលភាព និងសិទ្ធិប្រយោជន៍របស់អតីតយុទ្ធជន ដែលជាវីរជនបានចូលរួមចំណែកយ៉ាងធំធេងក្នុងការកសាង ការពារ និងអភិវឌ្ឍប្រទេសជាតិ រហូតសម្រេចបាននូវសុខសន្តិភាព និងការអភិវឌ្ឍដូចសព្វថ្ងៃ៕

អត្ថបទ៖ វីរៈ

The post រដ្ឋបាលខេត្តតាកែវ បញ្ចុះបឋមសិលាសាងសង់អគារសមាគមអតីតយុទ្ធជន និងនិវត្តជនកម្ពុជា appeared first on Kampuchea Thmey Daily.

កម្មវិធីនេះ ត្រូវបានចាត់ទុកថា ជាឱកាសដ៏សំខាន់សម្រាប់ពលករដែលធ្លាប់រៀនជំនាញតាមការដ្ឋាន ឬតាមរោងជាងនៅក្រៅប្រទេស ប៉ុន្តែមិនទាន់មានសញ្ញាបត្រឬវិញ្ញាបនបត្រផ្លូវការ ដើម្បីអាចបញ្ជាក់សមត្ថភាពរបស់ខ្លួនតាមប្រព័ន្ធស្តង់ដារជាតិ។

ក្នុងឱកាសអញ្ជើញចុះពិនិត្យដំណើរការធ្វើតេស្ត លោកបណ្ឌិត ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គនាយកដ្ឋានបណ្តុះបណ្តាលបច្ចេកទេស និងវិជ្ជាជីវៈ បានមានប្រសាសន៍ថា កម្មវិធី RPL គឺជាការផ្តល់ “វិញ្ញាបនបត្រទទួលស្គាល់សមត្ថភាព” ជូនដល់បងប្អូនដែលមានជំនាញពិតប្រាកដ ទោះបីមិនបានឆ្លងកាត់ការសិក្សាតាមប្រព័ន្ធសាលាក៏ដោយ។

លោកបណ្ឌិត បានបញ្ជាក់ថា វិញ្ញាបនបត្រដែលចេញដោយក្រសួងការងារ មានតម្លៃស្មើនឹងការបណ្តុះបណ្តាលក្នុងស្ថាប័នបច្ចេកទេសផ្លូវការ ដែលអាចឱ្យម្ចាស់ជំនាញយកទៅប្រើប្រាស់សម្រាប់ដាក់ពាក្យធ្វើការនៅតាមក្រុមហ៊ុនធំៗ ទទួលបានប្រាក់បៀវត្សរ៍សមរម្យ និងមានឱកាសការងារកាន់តែប្រសើរ ស្របតាមស្តង់ដារវិជ្ជាជីវៈ។

លោក មូល វិចិត្រ អភិបាលរងខេត្តតាកែវ ក៏បានសម្តែងការគាំទ្រយ៉ាងពេញទំហឹងចំពោះកម្មវិធីនេះ និងបានកោតសរសើរចំពោះបងប្អូនពលករ ដែលបានស្ម័គ្រចិត្តមកធ្វើតេស្ត ដើម្បីអភិវឌ្ឍសមត្ថភាព និងបង្កើនតម្លៃជំនាញរបស់ខ្លួន។
លោកអភិបាលរងខេត្ត ក៏បានអំពាវនាវដល់ប្រជាពលរដ្ឋនៅក្នុងខេត្តតាកែវទាំងអស់ ដែលមានជំនាញច្បាស់លាស់លើការងារសំណង់ ឬជំនាញបច្ចេកទេសផ្សេងៗ ប៉ុន្តែមិនទាន់មានសញ្ញាបត្រ សូមកុំរារែកក្នុងការមកចូលរួមធ្វើតេស្តទទួលស្គាល់សមត្ថភាពនេះ ព្រោះវាជាឱកាសដ៏មានតម្លៃ ក្នុងការប្រែក្លាយ “ជំនាញដៃ” ឱ្យក្លាយជា “ឯកសារផ្លូវការ” ដែលអាចប្រើប្រាស់បានទូទាំងប្រទេស និងជួយបង្កើនឱកាសការងារនាពេលអនាគត៕

​អត្ថបទ៖ វីរៈ

The post រដ្ឋបាលខេត្តតាកែវ ជំរុញអតីតពលករពីថៃ មកធ្វើតេស្តទទួលស្គាល់ជំនាញសំណង់ដោយឥតគិតថ្លៃ ដើម្បីទទួលបានសញ្ញាបត្រផ្លូវការ appeared first on Kampuchea Thmey Daily.

ព្រឹត្តិការណ៍ដ៏គួរឱ្យចាប់អារម្មណ៍នេះ ត្រូវបានរៀបចំនៅទីតាំងអតីតសាលានយោបាយខេត្ត ស្ថិតក្នុងភូមិ៣ សង្កាត់រការក្នុង ក្រុងដូនកែវ ខេត្តតាកែវ ដែលបានទាក់ទាញភ្ញៀវទេសចរ និងប្រជាពលរដ្ឋមកទស្សនាយ៉ាងច្រើនកុះករ បង្កើតបរិយាកាសសប្បាយរីករាយ និងអធិកអធមមុនពេលចូលឆ្នាំថ្មី។

ការប្រណាំងគោរទេះសាឡី គឺជាប្រពៃណីមួយដ៏មានអត្តសញ្ញាណជាតិខ្មែរ ដែលមិនត្រឹមតែផ្តល់ភាពសប្បាយរីករាយប៉ុណ្ណោះទេ ប៉ុន្តែថែមទាំងជាការលើកកម្ពស់ និងថែរក្សាវប្បធម៌ប្រពៃណីដ៏ល្អប្រណិតរបស់បុព្វបុរសខ្មែរ ឱ្យបន្តរស់រវើក និងស្ថិតស្ថេរជាយូរអង្វែង៕

​អត្ថបទ៖ វីរៈ

The post ដូចការគ្រោងទុក រដ្ឋបាលខេត្តតាកែវ រៀបចំពីធីប្រណាំងរទេះសាឡី ដើម្បីអបអរសាទរ «សង្ក្រាន្តតាកែវ» appeared first on Kampuchea Thmey Daily.

លោក វ៉ី សំណាង អភិបាលនៃគណៈអភិបាលខេត្តតាកែវ បានលើកឡើងថា គម្រោងសាងសង់ប្រាសាទកណ្ដាលបឹងតាកែវនេះ គឺជាគំនិតផ្ដួចផ្ដើមរបស់រដ្ឋបាលខេត្តតាកែវ ដោយទទួលបានការគាំទ្រ និងចូលរួមបរិច្ចាគថវិកាពីសប្បុរសជននានាជិតឆ្ងាយ។ សំណង់នេះត្រូវបានកសាងឡើងក្នុងគោលបំណងរំលឹកដល់ប្រវត្តិសាស្ត្រដ៏រុងរឿងនៃទឹកដីតាកែវ ក៏ដូចជាទុកជាមរតកវប្បធម៌សម្រាប់មហាជនគោរពសក្ការបូជាតទៅអនាគត។

លោកអភិបាលខេត្តបញ្ជាក់ថា គម្រោងសាងសង់ប្រាសាទកណ្ដាលបឹងតាកែវនេះ សាងសង់តាមលំនាំអាស្រមតាឥសី នៅចង្កេះភ្នំដា សង់ឡើងអំពីបេតុងអាមេយ៉ាងរឹងមាំ ដោយមានការបិទ និងក្រាលលម្អដោយថ្មភក់ ប្រកបដោយភាពផ្ចិតផ្ចង់។ ប្រាសាទមានរាងចតុកោណ ដែលមានបណ្តោយ ៦,៥៦ ម៉ែត្រ និងទទឹង ៦ ម៉ែត្រ កម្ពស់ ៩ ម៉ែត្រ បំពាក់ដោយដំបូលជ្រុងក្រឡូមតាមលក្ខណៈបុរាណ និងបញ្ចប់ដោយកំពូលប្រាសាទមានរូបរាងជា “ក្រពុំឈូក” ដែលជានិមិត្តរូបនៃភាពបរិសុទ្ធ និងភាពរីកចម្រើន។

សូមបញ្ជាក់ថា កាលពីរសៀលថ្ងៃទី២០ ខែមករា ឆ្នាំ២០២៦ លោក វ៉ី សំណាង អភិបាលខេត្តតាកែវ អមដំណើរដោយលោកអភិបាលរងខេត្ត និងមន្រ្តីជំនាញពាក់ព័ន្ធ បានចុះពិនិត្យ និងបោះបង្គោលតម្រុយទីតាំងគម្រោងសាងសង់ប្រាសាទកណ្ដាលបឹងតាកែវ ដែលនឹងត្រៀមបើកការដ្ឋានសាងសង់ជាផ្លូវការនៅថ្ងៃទី៧ ខែកុម្ភៈ ឆ្នាំ២០២៦ខាងមុខនេះ៕

The post រដ្ឋបាលខេត្តតាកែវ នឹងចាប់ផ្ដើមបើកការដ្ឋានសាងសង់ប្រាសាទកណ្ដាលបឹងតាកែវនៅថ្ងៃទី៧ ខែកុម្ភៈខាងមុខនេះ appeared first on Kampuchea Thmey Daily.

លោក ឃុត ប៊ុនធឿន ប្រធានអង្គភាពច្រកចេញចូលតែមួយរបស់រដ្ឋបាលខេត្តតាកែវ បានថ្លែងឱ្យដឹងថា ក្នុងរយៈពេលពេញមួយឆ្នាំ២០២៥ អង្គភាពច្រកចេញចូលតែមួយរបស់រដ្ឋបាលខេត្តតាកែវ រកចំណូលបានសរុបចំនួន​៥,២១៥,៨០៣,៧៥០រៀល ឬប្រមាណ១លាន៣សែនដុល្លារសហរដ្ឋអាមេរិក កើនឡើងចំនួន៧,១៤ភាគរយ។

លោកបញ្ជាក់ថា ចំណូលទាំងអស់នេះ បានមកពីសេវាលើវិស័យចំនួន១៤ ដែលបានធ្វើការបម្រើសេវាជូនប្រជាពលរដ្ឋបានចំនួន ៣០,២៣២សេវា កើនឡើងប្រមាណ៦,៣៩ ហើយចំណូលដែលទទួលបានច្រើនជាងគេ គឺទទួលបានពីវិស័យសូរិយោដី វិស័យកសិកម្ម និងវិស័យសាធារណការ។

លោក ឃុត ប៊ុនធឿន បានថ្លែងបន្តទៀតថា ពាក់ព័ន្ធទៅនឹងកំណើនសេវាមានការកើនឡើង ជាពិសេសប្រាក់ចំណូលក៏កើនឡើងខ្ពស់ដែលនោះ គឺបណ្ដាលមកពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងការថែរក្សាសុខសន្តិភាព ស្ថិរភាពនយោបាយ ជាពិសេសថ្នាក់ដឹកនាំខេត្តតាកែវ លោក វ៉ី សំណាង បានប្រឹងប្រែងកៀរគរ និងអូសទាញឱ្យក្រុមហ៊ុនវិនិយោគជាច្រើន បានចូលមកបណ្ដាក់ទុន នៅក្នុងខេត្តតាកែវ ដែលក្នុងឆ្នាំនេះមានក្រុមហ៊ុនថ្មីចំនួន៩៥ បានមកចូលបណ្ដាក់ទុនបើករោងចក្រថ្មីៗ ក្នុងខេត្តតាកែវ។

ជាមួយគ្នានេះដែរ លោក ឃុត ប៊ុនធឿន ប្រធានអង្គភាពច្រកចេញចូលតែមួយរបស់រដ្ឋបាលខេត្តតាកែវ បានអំពាវនាវប្រជាពលរដ្ឋដែលត្រូវការសេវាផ្សេងៗ សូមអញ្ជើញមកទទួលសេវា នៅអង្គភាពច្រកចេញចូលតែមួយរបស់រដ្ឋបាលខេត្ត ឬនៅតាមអង្គភាពច្រកចេញចូលតែមួយ នៅតាមបណ្ដាក្រុងស្រុកដោយផ្ទាល់ ហើយត្រូវចៀសវាងពឹងអ្នករត់ការជំនួស ដែលនាំឲ្យមានការយកតម្លៃសេវាលើសពីតារាងតម្លៃរបស់រដ្ឋ៕

អត្ថបទ៖ វីរៈ

The post ឆ្នាំ២០២៥ ច្រកចេញចូលតែមួយរដ្ឋបាលខេត្តតាកែវ រកចំណូលបានជាងមួយលានដុល្លារ appeared first on Kampuchea Thmey Daily.

តាមរយៈសេចក្ដីជូនដំណឹង ការហាមឃាត់នេះ គឺដើម្បីធានានូវសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈជូនប្រជាពលរដ្ឋក្នុងខេត្តតាកែវ ក្នុងកាលៈទេសៈដែលប្រទេសជាតិត្រូវបានប្រទេសសៀមរំលោភបំពានមកលើអធិបតេយ្យ និងបូរណភាពទឹកដីនៃព្រះរាជាណាចក្រកម្ពុជា។

ក្នុងសេចក្ដីជូនដំណឹងបានសង្កត់ធ្ងន់ថា ហាមដាច់ខាតការប្រើប្រាស់អាកាសយានគ្មានមនុស្សបើក (ដ្រូន)គ្រប់ប្រភេទក្នុងភូមិសាស្ត្រខេត្តតាកែវ។ ជនណាដែលបំពាន ឬប្រើប្រាស់អាកាសយានគ្មានមនុស្សបើក(ដ្រូន)ដោយគ្មានការអនុញ្ញាតពីរដ្ឋបាលខេត្តតាកែវ ត្រូវទទួលខុសត្រូវទាំងស្រុងចំពោះមុខច្បាប់។ ករណីប្រជាពលរដ្ឋក្នុងមូលដ្ឋានប្រទះឃើញអាកាសយានគ្មានមនុស្សបើក(ដ្រូន) ត្រូវរាយការណ៍មកអាជ្ញាធរមានសមត្ថកិច្ចជាបន្ទាន់ ឬតាមរយៈលេខ ១២៩៩ ដើម្បីចាត់វិធានការឱ្យទាន់ពេលវេលា។

រដ្ឋបាលខេត្តក៏ណែនាំឲ្យស្នងការដ្ឋាននគរបាលខេត្ត បញ្ជាការកងរាជអាវុធហត្ថខេត្ត និងគណៈបញ្ជាការឯកភាពរដ្ឋបាលក្រុង ស្រុកទាំង១០ ត្រូវបង្កើនការយកចិត្តទុកដាក់តាមដាន ចាត់ចែង និងគ្រប់គ្រងសភាពការឱ្យបានល្អប្រសើរ។
ក្នុងករណីពិនិត្យឃើញមានជនណាបំពាននូវសេចក្ដីណែនាំនេះ ត្រូវចាត់វិធានការជាបន្ទាន់៕

អត្ថបទ៖ វីរៈ

The post រដ្ឋបាលខេត្តតាកែវ ហាមឃាត់ការបង្ហោះដ្រូនគ្រប់​ប្រ​ភេទក្នុងភូមិសាស្រ្ត និងព្រមានចាត់វិធានការផ្លូវច្បាប់លើជនណាដែលល្មើស appeared first on Kampuchea Thmey Daily.

ការវាយកម្ទេចចោលរបងដែលសាងសង់រំលោភចំណីមាត់ស្ទឹងនេះនេះ កើតឡើងបន្ទាប់ពីមានរិះគន់ជាបន្តបន្ទាប់ពីសំណាក់ប្រជាពលរដ្ឋតាមរយៈបណ្ដាញសង្គម និងឈានដល់រដ្ឋមន្ត្រីក្រសួងធនធានទឹក និងឧតុនិយម លោក ថោ ជេដ្ឋា និងអភិបាលខេត្តតាកែវ នាព្រឹកថ្ងៃទី១៣ ខែតុលា  បានចុះទៅពិនិត្យអំពីផលប៉ះពាល់ជាក់ស្ដែងដែលកើតចេញពីសំណង់ខុសច្បាប់មួយនេះ។

ក្នុងពេលចុះពិនិត្យផលប៉ះពាល់  រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិគ្រប់គ្រងអាងទន្លេ នាព្រឹកនេះ បានទុកពេលឱ្យម្ចាស់សំណង់របងរយៈពេល១៤ថ្ងៃ រុះរើសំណង់របងបេតុងប្រវែង ១១៩ម៉ែត្រ ដែលបានសង់កៀកនឹងមាត់ស្ទឹង ហើយថយមកខាងក្រោយដោយរក្សាទុកគម្លាត ៣០ម៉ែត្រ ពីមាត់ច្រាំងស្ទឹង ទៅតាមច្បាប់កំណត់។ ការអនុវត្តការរុះរើរបងនេះ គឺស្ថិតក្រោមការត្រួតពិនិត្យយ៉ាងយកចិត្តទុកដាក់សំណាក់ស្ថាប័នជំនាញ។

ជុំវិញករណីនេះ តាមរយៈបណ្ដាញសង្គមហ្វេសប៊ុក លោកបណ្ឌិត គិន ភា ជំរុញ​ឱ្យចាប់ខ្លួនបុគ្គលប្រព្រឹត្តបទល្មើស ឬមន្ត្រីដែលពុករលួយគប់គិតគ្នា ផ្ដន្ទាទោសតាមច្បាប់  ដើម្បីព្រមានកុំឱ្យមានអ្នកជាន់ឈ្លីច្បាប់បន្តទៅទៀត បើមិនអនុវត្តច្បាប់ទេ  ករណីល្មើសច្បាប់បែបនេះ នឹងបន្តកើតមានទៀត។   

លោកបណ្ឌិត គិន ភា សង្កត់ ធ្ងន់ដូច្នេះ៖« មន្ត្រីពុករលួយ អ្នកចាក់ដីយកស្ទឹង យកបឹង យកទន្លេ យកសមុទ្ររបស់រដ្ឋ អ្នកកាយដីយកភ្នំរដ្ឋ អ្នកព័ទ្ធយកដីរដ្ឋនិងដីរាស្ត្រ និងឈ្មួញគេចពន្ធ ចាប់បាន រឹបអូសទ្រព្យសម្បត្តិឱ្យអស់ និងដាក់គុកតាមទម្ងន់ទោសឱ្យបានត្រឹមត្រូវទៅ លែងមានអ្នកហ៊ានប្រព្រឹត្តហើយ។»។

បើតាមអនុក្រឹត្យស្តីពីការគ្រប់គ្រងអាងទន្លេ ត្រង់មាត្រា៨ បញ្ញត្តិថា ដីចំណីមាត់ច្រាំង និងឆ្នេរ នៃតំបន់អាងទន្លេត្រូវកំណត់ចម្ងាយដូចតទៅ៖ ទី១)ឆ្នេរនិងពាមសមុទ្រ ចម្ងាយ១០០ម៉ែត្រពីមាត់ឆ្នេរ និងមាត់ពាម(ពេលទឹកជោរអតិបរមា),  ទី២)ទន្លេចម្ងាយ៥០ម៉ែត្រពីមាត់ច្រាំងទន្លេ, ទី៣)ស្ទឹង ចម្ងាយ៣០ ម៉ែត្រពីមាត់ច្រាំងស្ទឹង , ទី៤)ព្រែក ចម្ងាយ២០ម៉ែត្រពីមាត់ច្រាំងព្រែក, ទី៥) អូរ ចម្ងាយ១០ម៉ែត្រពីមាត់ច្រាំងអូរ,  ទី៦)ប្រឡាយមេ ចម្ងាយ១០ម៉ែត្រ ពីជើងទេរភ្លឺប្រឡាយផ្នែកខាងក្រៅ, ទី៧)ប្រឡាយរង ចម្ងាយ៥ម៉ែត្រពីជើងទេរភ្លឺប្រឡាយផ្នែកខាងក្រៅ,ទី៨) ប្រឡាយស្រោចស្រព ចម្ងាយ៣ម៉ែត្រពីជើងទេរភ្លឺប្រឡាយផ្នែកខាងក្រៅ, ទី៩)អាងទឹក ចម្ងាយ១០០ម៉ែត្រពីក្រិតកម្ពស់ទឹកអតិបរមាដែលបានតម្កល់នៅក្នុងអាងទឹក, ទី១០)បឹងបួ ចម្ងាយ៥០ ម៉ែត្រគិតពីក្រិតកម្ពស់ទឹកអតិបរមាដែលបានតម្កល់នៅក្នុងអាងទឹក និងទី១១)ទំនប់អាងទឹកចម្ងាយ២០ម៉ែត្រពីជើងទេរផ្នែកខាងក្រោមទំនប់អាងទឹកដែលមានកម្ពស់តិចជាង៤ម៉ែត្រ។ ចម្ងាយ១០០ម៉ែត្រ គិតពីជើងទេរផ្នែកខាងក្រោមទំនប់អាងទឹកដែលមានកម្ពស់ពី៤ម៉ែត្រទៅ៨ម៉ែត្រ។ ក្នុងករណីទំនប់ដែលមានកម្ពស់លើសពី៨ម៉ែត្រឡើងទៅត្រូវបានកំណត់អនុក្រឹត្យដោយឡែក៕

ដោយ៖ ង៉ិល ណារ៉ាត់

The post អភិបាលខេត្តតាកែវ៖ របងថ្ម១៤៨ម៉ែត្រ សង់ប៉ះពាល់ចំណីស្ទឹងស្លាគូរ ត្រូវបានម្ចាស់វាយរំលំរួចរាល់ appeared first on Kampuchea Thmey Daily.

តាម​សេចក្ដីជូនដំណឹង​របស់​រដ្ឋបាល​ខេត្ត​តាកែវ ចេញ​កាលពី​ថ្ងៃ​ទី ១៦ ខែ​កញ្ញា ឆ្នាំ ២០២៥ បាន​ស្នើ​ទៅកាន់​អភិបាល​ស្រុក​បាទី និង​ស្រុក​ព្រៃកប្បាស ត្រូវ​ចាត់វិធានការ​ទប់ស្កាត់​ការ​បង្ហោះ​ដ្រូន ខ្លែង គោម ប៉េងប៉ោង បាញ់​កាំជ្រួច ភ្លើង​ហ្វា ភ្លើង​ឡាស៊ែរ​បញ្ចាំង​ឡើង​លើ និង​សកម្មភាព​ផ្សេងៗ ទៀត ដែល​អាច​ប៉ះពាល់​ដល់​សុវត្ថិភាព​ប្រតិបត្តិការ​ហោះហើរ​របស់​អាកាសយានដ្ឋាន​ក្នុង​ភូមិសាស្ត្រ​របស់​ខ្លួន ស្ថិត​នៅ​តំបន់​ជុំវិញ​អាកាសយានដ្ឋាន​អន្តរជាតិ​តេ​ជោ។ យ៉ាងណាមិញ សកម្មភាព​ទាំងនេះ អាច​ប្រព្រឹត្ត​ទៅ​បាន​ទាល់តែ​មាន​ការ​អនុញ្ញាត​ពី​រដ្ឋលេខាធិការ​អាកាសចរណ៍​ស៊ីវិល និង​ជូនដំណឹង​ដល់​អ្នក​ប្រើប្រាស់​ដែនអាកាស។

សូម​បញ្ជាក់​ថា អាកាសយានដ្ឋាន​អន្តរជាតិ​តេ​ជោ ស្ថិតនៅ​ឃុំ​ព្រែកស្លែង ស្រុក​កណ្តាលស្ទឹង ខេត្ត​កណ្តាល និង​មួយ​ផ្នែក​ស្ថិតនៅ​ស្រុក​បាទី ខេត្ត​តាកែវ ត្រូវ​បាន​សាងសង់​នៅ​លើ​ផ្ទៃដី​ជាង ២៦០០ ហិតា។ អាកាសយានដ្ឋាន នេះ ជា​ប្រភេទ​ព្រលាន​ 4F​ មាន​សមត្ថភាព​ទទួល​បាន​ការ​ហោះហើរ​ពី​ឆ្ងាយ​ឆ្លង​ទ្វីប​ដោយ​អាច​ឲ្យ​យន្តហោះ​ធុន​ធំ​រហូតដល់ Airbus A 380-800 និង​យន្តហោះ Boeing 747 – 800 ចុះ​ចត​បាន។

អាកាសយានដ្ឋាន​អន្តរជាតិ​តេ​ជោ នេះ បាន​បើក​ប្រតិបត្តិការ​ហោះហើរ​ជា​ផ្លូវការ កាលពី​ថ្ងៃ​ទី ០៩ ខែ​កញ្ញា ឆ្នាំ ២០២៥ ថ្មីៗ នេះ។ ដោយឡែក ពិធី​សម្ពោធ​ជា​ផ្លូវការ​វិញ គ្រោង​រៀបចំឡើង​នៅ​ថ្ងៃ​ទី ២០ ខែ​តុលា ឆ្នាំ ២០២៥ ខាងមុខ​នេះ ក្រោម​វត្តមាន សម្តេច​នាយករដ្ឋមន្ត្រី ហ៊ុន ម៉ាណែត៕

អត្ថបទ ៖ វីរៈ

The post រដ្ឋបាលខេត្តតាកែវ ស្នើអាជ្ញាធរស្រុកជាប់ព្រំប្រទល់ព្រលានយន្តហោះអន្តរជាតិតេជោ ទប់ស្កាត់សកម្មភាពអាចប៉ះពាល់ការហោះហើរ appeared first on Kampuchea Thmey Daily.