ព័ត៌មានជាតិ

រដ្ឋបាលខេត្តតាកែវ ស្នើអាជ្ញាធរស្រុកជាប់ព្រំប្រទល់ព្រលានយន្តហោះអន្តរជាតិតេជោ ទប់ស្កាត់សកម្មភាពអាចប៉ះពាល់ការហោះហើរ

បានផុស

៨ ខែ មុន

នៅ

ថ្ងៃពុធ ១៧ កញ្ញា ២០២៥

ដោយ

រដ្ឋបាលខេត្តតាកែវ បញ្ជាឲ្យអាជ្ញាធរមូលដ្ឋាន ចាត់វិធានការទប់ស្កាត់ការបាញ់កាំជ្រួច ភ្លើងហ្វា ភ្លើងឡាស៊ែរ ការបង្ហោះដ្រូន គោម និងប៉េងប៉ោង នៅតំបន់ជុំវិញអាកាសយានដ្ឋានអន្តរជាតិតេជោ ដែលការហាមឃាត់នេះធ្វើឡើងក្នុងទិសដៅធានាសុវត្ថិភាពក្នុងប្រតិបត្តិការហោះហើររបស់យន្តហោះ។

តាមសេចក្ដីជូនដំណឹងរបស់រដ្ឋបាលខេត្តតាកែវ ចេញកាលពីថ្ងៃទី ១៦ ខែកញ្ញា ឆ្នាំ ២០២៥ បានស្នើទៅកាន់អភិបាលស្រុកបាទី និងស្រុកព្រៃកប្បាស ត្រូវចាត់វិធានការទប់ស្កាត់ការបង្ហោះដ្រូន ខ្លែង គោម ប៉េងប៉ោង បាញ់កាំជ្រួច ភ្លើងហ្វា ភ្លើងឡាស៊ែរបញ្ចាំងឡើងលើ និងសកម្មភាពផ្សេងៗ ទៀត ដែលអាចប៉ះពាល់ដល់សុវត្ថិភាពប្រតិបត្តិការហោះហើររបស់អាកាសយានដ្ឋានក្នុងភូមិសាស្ត្ររបស់ខ្លួន ស្ថិតនៅតំបន់ជុំវិញអាកាសយានដ្ឋានអន្តរជាតិតេជោ។ យ៉ាងណាមិញ សកម្មភាពទាំងនេះ អាចប្រព្រឹត្តទៅបានទាល់តែមានការអនុញ្ញាតពីរដ្ឋលេខាធិការអាកាសចរណ៍ស៊ីវិល និងជូនដំណឹងដល់អ្នកប្រើប្រាស់ដែនអាកាស។

សូមបញ្ជាក់ថា អាកាសយានដ្ឋានអន្តរជាតិតេជោ ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ ត្រូវបានសាងសង់នៅលើផ្ទៃដីជាង ២៦០០ ហិតា។ អាកាសយានដ្ឋាន នេះ ជាប្រភេទព្រលាន 4F មានសមត្ថភាពទទួលបានការហោះហើរពីឆ្ងាយឆ្លងទ្វីបដោយអាចឲ្យយន្តហោះធុនធំរហូតដល់ Airbus A 380-800 និងយន្តហោះ Boeing 747 – 800 ចុះចតបាន។

អាកាសយានដ្ឋានអន្តរជាតិតេជោ នេះ បានបើកប្រតិបត្តិការហោះហើរជាផ្លូវការ កាលពីថ្ងៃទី ០៩ ខែកញ្ញា ឆ្នាំ ២០២៥ ថ្មីៗ នេះ។ ដោយឡែក ពិធីសម្ពោធជាផ្លូវការវិញ គ្រោងរៀបចំឡើងនៅថ្ងៃទី ២០ ខែតុលា ឆ្នាំ ២០២៥ ខាងមុខនេះ ក្រោមវត្តមាន សម្តេចនាយករដ្ឋមន្ត្រី ហ៊ុន ម៉ាណែត៕

អត្ថបទ ៖ វីរៈ