រដ្ឋបាលខេត្តព្រះសីហនុ បានឱ្យដឹងថា នៅព្រឹកថ្ងៃទី២២ ខែមិថុនា ឆ្នាំ២០២៥ ស្ថានភាពទឹកភ្លៀងនៅតែបន្តធ្លាក់ ហើយមានកម្រិតទឹកខ្ពស់បានធ្វើឱ្យមានទឹកជំនន់នៅតំបន់ក្បាលឆាយ និងបានហូរច្រោះដាច់ផ្លូវចូលរមណីយដ្ឋានក្បាលឆាយប្រវែង ២០ម៉ែត្រ ត្រង់ចំណុច PK4,70 ស្ថិតនៅសង្កាត់លេខ១ ក្រុងព្រះសីហនុ ខេត្តព្រះសីហនុ។

ក្នុងន័យនេះដើម្បីបញ្ចៀសនូវផលប៉ះពាល់ផ្សេងៗ ក៏ដូចជាការពារសុវត្ថិភាពជូនបងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ រដ្ឋបាលខេត្តព្រះសីហនុ សូមធ្វើការផ្អាកជាបណ្តោះអាសន្ន នូវការចូលកម្សាន្ត នៅក្នុងរមណីដ្ឋានក្បាលឆាយ និងការធ្វើចរាចរណ៍នៅលើកំណាត់ផ្លូវចូលរមណីយដ្ឋានក្បាលឆាយត្រង់ចំណុច PK4.70 រហូតដល់មានការជូនដំណឹងជាថ្មីអំពីការបើកចរាចរណ៍ឡើងវិញ៕

The post រដ្ឋបាលខេត្តព្រះសីហនុ ផ្អាកការចូលកម្សាន្ត ក្នុងរមណីយដ្ឋានក្បាលឆាយ ជាបណ្តោះអាសន្ន ព្រោះមានការដាច់ផ្លូវ appeared first on Kampuchea Thmey Daily.

សេចក្តីបំភ្លឺរបស់រដ្ឋបាលខេត្តព្រះសីហនុ បានបញ្ជាក់ថា៖«ព័ត៌មានដែលបង្ហោះផ្សាយខាងលើនេះ គឺជាព័ត៌មានមិនពិត និងបានបង្កប់នូវចេតនាទុច្ចរិត បំភាន់ ញុះញង់សាធារណមតិឱ្យមានការយល់ច្រឡំ។ រដ្ឋបាលខេត្ត បញ្ជាក់ថា កោះឬស្សី គឺស្ថិតក្នុងដែនអធិបតេយ្យភាពរបស់ប្រទេសកម្ពុជា មានទីតាំងស្ថិតនៅក្នុងភូមិអុង សង្កាត់រាម ក្រុងកំពង់សោម ខេត្តព្រះសីហនុ។

កោះឬស្សី ត្រូវបានរាជរដ្ឋាភិបាលកម្ពុជា បានចុះកិច្ចសន្យាជួលជូនក្រុមហ៊ុនវិនិយោគចំនួន ០២រួមមាន ១. ក្រុមហ៊ុន KOH RUSSEY RESORT Co.,LTD វិនិយោគលើទំហំផ្ទៃដី ៧៨ហិកតា តាមកិច្ចសន្យាជួល ចុះថ្ងៃទី២៨ ខែកុម្ភៈ ឆ្នាំ២០០៨។ ២. ក្រុមហ៊ុន EVERSPRING RESORT Co.,LTD វិនិយោគលើទំហំផ្ទៃដី ៥២ហិកតា តាមកិច្ចសន្យាជួល ចុះថ្ងៃទី០៣ ខែមិថុនា ឆ្នាំ២០១១។ បច្ចុប្បន្នក្រុមហ៊ុន បាននឹងកំពុងដំណើរការអាជីវកម្ម ទទួលភ្ញៀវទេសចរជាតិ និងអន្តរជាតិមកសម្រាកលំហែកាយ នៅលើកោះឬស្សី។

រដ្ឋបាលខេត្តព្រះសីហនុ ប្រកាសច្រានចោលចំពោះការផ្សាយព័ត៌មានមិនពិតនេះ និងសូមអំពាវនាវដល់បងប្អូនប្រជាពលរដ្ឋ កុំចែកចាយបន្តព័ត៌មានមិនពិតនេះ ចៀសវាងសាធារណមតិមានការភាន់ច្រឡំ និងស្នើសុំដល់អាជ្ញាធរមានសមត្ថកិច្ចជួយស្វែងរកម្ចាស់គណនីខាងលើមកផ្តន្ទាទោសតាមផ្លូវច្បាប់ជាធរមាន៕

The post រដ្ឋបាលខេត្តព្រះសីហនុ ច្រានចោលព័ត៌មានដែលផ្សាយថា កោះឬស្សីត្រូវបានវៀតណាមកាន់កាប់ appeared first on Kampuchea Thmey Daily.

ក្រុងកំពង់សោម គឺជាក្រុងទី៣ របស់ខេត្តព្រះសីហនុ បន្ទាប់ពីក្រុងព្រះសីហនុ និងក្រុងកោះរ៉ុង។ បើយោងតាមអនុក្រឹត្យរបស់ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត ចុះថ្ងៃទី២៨ ខែសីហា ឆ្នាំ២០២៤ ក្រុងកំពង់សោមបានបង្កើតថ្មីដោយកាត់ចេញពី ៥ឃុំនៃស្រុកព្រៃនប់ មានឃុំបិតត្រាំង ឃុំរាម ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ។

ពិធីប្រកាសដាក់ឱ្យដំណើរការនូវរដ្ឋបាលក្រុងកំពង់សោម នៃខេត្តព្រះសីហនុ នាព្រឹលថ្ងៃនេះ ក្រោមវត្តមានរបស់លោក វង្ស ផាណាត ប្រធានក្រុមប្រឹក្សាខេត្តព្រះសីហនុ និងលោក ឯម ភាព អភិបាលរងខេត្តខេត្តព្រះសីហនុ ដោយមានការចូលរួមពីសមាជិកក្រុមប្រឹក្សាខេត្ត លោក លោកស្រីអភិបាលរងខេត្ត នាយករដ្ឋបាលខេត្ត អភិបាលក្រុង ស្រុក ប្រធានមន្ទីរ អង្គភាព និងក្រុមប្រឹក្សាឃុំ សង្កាត់។

រដ្ឋបាលក្រុងកំពង់សោម គឺមានលោក នួន ប៊ុនថុល ដែលបានផ្ទេរភារកិច្ចពីអភិបាលក្រុងកោះរ៉ុង ឱ្យមកជាអភិបាលក្រុងកំពង់សោម។ រីឯ មន្ត្រីរាជការចំនួន ៣រូប ត្រូវបានផ្ទេរភារកិច្ចពីក្រុងស្រុកនានា ឱ្យមកកាន់ជាអភិបាលរងក្រុងកំពង់សោមនេះ រួមមានលោក យឹម សុខសំអូន ឋានន្តរស័ក្តិឧត្តមមន្រ្តី ថ្នាក់លេខ៤ ពីអភិបាលរងក្រុងព្រះសីហនុ លោក សេក ដារ៉ាវុទ្ធ ឋានន្តរស័ក្តិវរមន្រ្តី ថ្នាក់លេខ៣ ពីអភិបាលរងស្រុកព្រៃនប់ និងលោក សុន ពិសី ឋានន្តរស័ក្តិវរមន្រ្តី ថ្នាក់លេខ៤ ពីអភិបាលរងស្រុកស្ទឹងហាវ។

ដោយឡែក លោកស្រី តាក វណ្ណសៅនីតា ឋានន្តរស័ក្តិវរមន្រ្តី ថ្នាក់លេខ៤ លោក សុខ សិទ្ធិការ ឋានន្តរស័ក្តិអនុមន្ត្រី ថ្នាក់លេខ២ និងលោក នន់ ធូ ឋានន្តរស័ក្តិនាយក្រមការ ថ្នាក់លេខ៥ ក៏ត្រូវបានតែងតាំងតួនាទីជាអភិបាលរងក្រុងកំពង់សោម ផងដែរ៕

The post រដ្ឋដាក់ឱ្យដំណើរការរដ្ឋបាលក្រុងកំពង់សោម ដោយមានសមាសភាពគណៈអភិបាល៧រូប appeared first on Kampuchea Thmey Daily.

បន្ទាប់ពីទទួលបានព័ត៌មានពីករណីមានប្រេងអណ្តែតមកលើឆ្នេរព្រែកត្រែង នៅភូមិ៣ សង្កាត់លេខ១ ក្រុងព្រះសីហនុ និងឃុំអូរត្រេះ ស្រុកស្ទឹងហាវ ខេត្តព្រះសីហនុ កាលពីថ្ងៃទី១ ខែកុម្ភៈ ឆ្នាំ២០២៥ លោក ម៉ាង ស៊ីណេត អភិបាលខេត្តព្រះសីហនុ បានដឹកនាំមន្ទីរអង្គភាពពាក់ព័ន្ធ អាជ្ញាធរក្រុងព្រះសីហនុ ស្រុកស្ទឹងហាវ និងឃុំ សង្កាត់ ដោយមានការចូលរួមសហការពីតំណាងក្រសួងបរិស្ថាន និងក្រសួងរ៉ែ និងថាមពល ចុះពិនិត្យទីតាំងជាក់ស្តែង ដើម្បីស្វែងរកប្រភពនៃការលេចធ្លាយប្រេងនៅលើផ្ទៃសមុទ្រ និងបានចាត់កម្លាំងធ្វើការសម្អាតប្រេងនៅតាមបណ្តោយឆ្នេរ និងតាមទីតាំងមួយចំនួនទៀតដែលមានកក់កំណកប្រេង។

បើតាមរដ្ឋបាលខេត្តព្រះសីហនុ គិតត្រឹមល្ងាចថ្ងៃទី១ ខែកុម្ភៈ ឆ្នាំ២០២៥ ការសម្អាតប្រេងដែលអណ្តែតមកលើឆ្នេរព្រែកត្រែង និងតាមទីតាំងមួយចំនួនទៀតដែលមានកកកំណកប្រេង ស្ថិតនៅចន្លោះភូមិ៣ សង្កាត់លេខ១ ក្រុងព្រះសីហនុ និងឃុំអូរត្រេះ ស្រុកស្ទឹងហាវ ខេត្តព្រះសីហនុ ទទួលបានលទ្ធផលប្រមាណ ៩០%ហើយ ខណៈកាកសំណល់ប្រេងដែលនៅសេសសល់ ក្រុមការងារនឹងបន្ដសម្អាតបន្ថែមទៀតឱ្យបានឆាប់រួចរាល់។

នៅចំពោះមុខ លោក ម៉ាង ស៊ីណេត អភិបាលខេត្ត បានប្រាប់ដល់ប្រជាពលរដ្ឋ ភ្ញៀវទេសចរជាតិ និងអន្តរជាតិ ដែលមានបំណងមកកម្សាន្តនៅឆ្នេរព្រែកត្រែង អាចលេងនៅលើឆ្នេរខ្សាច់ជាធម្មតា ប៉ុន្តែសូមផ្អាកចុះលេងទឹកជាបណ្តោះអាសន្ន ដើម្បីទុកលទ្ធភាពជូនក្រុមការងារធ្វើការសម្អាត និងចៀសវាងផលប៉ះពាល់ផ្សេងៗ៕

The post អាជ្ញាធរខេត្តព្រះសីហនុ កំពុងបន្តសម្អាតកំណកប្រេងដែលអណ្ដែតមកលើឆ្នេរព្រែកត្រែង appeared first on Kampuchea Thmey Daily.

ជាការកត់សម្គាល់ កំពង់សោម ជាក្រុងថ្មី ដែលត្រូវបានសប្រមុខរាជរដ្ឋាភិបាល ចេញអនុក្រឹត្យបង្កើតឡើងនៅថ្ងៃទី២៨ ខែសីហា ឆ្នាំ២០២៤ ដោយកាត់យកឃុំចំនួន៥ពីស្រុកព្រៃនប់ គឺឃុំរាម ឃុំបិតត្រាង ឃុំអូឧកញ៉ាហេង ឃុំបឹងតាព្រហ្ម និងឃុំអូរជ្រៅ។ ទីតាំងអគាររដ្ឋបាលសាលាក្រុងកំពង់សោម ដែលកំពុងសាងសង់ គឺស្ថិតនៅភូមិអុង សង្កត់រាម ក្រុងកំពង់សោម ខេត្តព្រះសីហនុ។

កាលពីល្ងាចថ្ងៃទី១៧ ខែវិច្ឆិកា ឆ្នាំ២០២៤ លោក ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានអញ្ជើញចុះពិនិត្យទីតាំងសង់អគាររដ្ឋបាលក្រុងកំពង់សោម និងបានដឹកនាំកិច្ចប្រជុំត្រួតពិនិត្យវឌ្ឍនភាពដំណើរការសាងសង់អគាររដ្ឋបាលសាលាក្រុងកំពង់សោម រួមទាំងកិច្ចការពាក់ព័ន្ធមួយចំនួនទៀត។ ក្នុងកិច្ចប្រជុំនេះ លោកឧបនាយករដ្ឋមន្ត្រី ស សុខា បានប្រកាសផ្ដល់សិទ្ធិទាំងស្រុងដល់រដ្ឋបាលខេត្តព្រះសីហនុ ដើម្បីរៀបចំមន្រ្តីផ្ទេរពីអង្គភាពផ្សេងៗ ចូលទៅបម្រើការងារនៅរដ្ឋបាលសាលាក្រុងកំពង់សោម ទាំងមន្រ្តីរាជការស៊ីវិល និងកងកម្លាំង ដោយត្រូវរៀបចំជាកញ្ចប់ និងធានាថា មន្រ្តីទាំងនោះ នឹងមិនផ្ទេរចេញទៅវិញ។

គួរជម្រាបដែរថា ក្នុងឱកាសពិនិត្យទីតាំងនេះ លោក សួស ប្រាថ្នា អគ្គនាយកអគ្គនាយកដ្ឋានរដ្ឋបាល ក្រសួងមហាផ្ទៃ និងលោក ម៉ាង ស៊ីណេ អភិបាលខេត្តព្រះសីហនុ រួមទាំងមន្រ្តីជំនាញ បានធ្វើបទបង្ហាញជូនលោកឧបនាយករដ្ឋមន្រ្តី អំពីទីតាំងភូមិសាស្រ្តជាក់ស្ដែង និងគម្រោងសាងសង់ហេដ្ឋារចនាសម្ព័ន្ធនានា ព្រមទាំងទីតាំងត្រូវកំណត់ក្នុងគម្រោងប្លង់សង់អគាររដ្ឋបាល រួមទាំងអគារអង្គភាពចំណុះគណៈបញ្ជាការឯកភាពរដ្ឋបាលក្រុង ដូចជា អធិការដ្ឋាននគរបាលក្រុង បញ្ជាការដ្ឋានកងរាជអាវុធហត្ថក្រុង ផ្នែកសឹករងក្រុង និងសាខាកាកបាទក្រហមកម្ពុជាក្រុង ជាដើម។

ក្រុងកំពង់សោម ត្រូវបានបង្កើតឡើងតាមរយៈអនុក្រឹត្យលេខ២០១ អនក្រ.បក ចុះថ្ងៃទី២៨ ខែសីហា ឆ្នាំ២០២៤ ដោយបានកាត់យកឃុំចំនួន ៥ ពីស្រុកព្រៃនប់ រួមមាន៖ ឃុំបិតត្រាំង ឃុំរាម ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ និងមាន ២៣ភូមិ ផ្ទៃដីសរុបទំហំ ៤២.២៥៦,៤៩ហិកតា មានប្រជាជនសរុបចំនួន ១១.២៧៩គ្រួសារ មនុស្សចំនួន ៤៤.១២២នាក់ មានព្រំប្រទល់ខាងជើងជាប់នឹងស្រុកព្រៃនប់ និងស្រុកស្ទឹងហាវ ខាងត្បូងជាប់នឹងសមុទ្រ ខាងកើតជាប់នឹងសមុទ្រ និងស្រុកព្រៃនប់ ខាងលិចជាប់នឹងក្រុងព្រះសីហនុ៕

The post រដ្ឋមន្ត្រីមហាផ្ទៃ​ ផ្ដល់សិទ្ធិឱ្យរដ្ឋបាលខេត្តរៀបចំផ្ទេរមន្ត្រីទៅបម្រើការនៅរដ្ឋបាលក្រុងកំពង់សោម appeared first on Kampuchea Thmey Daily.

ដោយយោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម បានបង្ហាញថា «មានសម្ពាធទាប គ្របដណ្តប់មកលើឈូងសមុទ្រថៃ ព្រះរាជាណាចក្រកម្ពុជា ភាគកណ្តាលនៃទន្លេមេគង្គ និងសមុទ្រចិនខាងត្បូង» ស្ថានភាពបែបនេះ នៅក្នុងភូមិសាស្ត្រខេត្តព្រះសីហនុ និងនៅលើសមុទ្រ នឹងមានភ្លៀងធ្លាក់ ខ្យល់កន្ត្រាក់ រលក សមុទ្រកម្ពស់ពី ០,៥០ម៉ែត្រ ទៅ ១,៥០ម៉ែត្រ ចាប់ពីថ្ងៃទី១៣ ដល់ ថ្ងៃទី១៥ ខែកក្កដា ឆ្នាំ២០២៤។ ក្នុងន័យនេះ ដើម្បីធានានូវសុវត្ថិភាពខ្ពស់ ពីគ្រោះថ្នាក់ និងហានិភ័យនានា ដែលអាចបង្កឡើងដោយ កត្តាគ្រោះធម្មជាតិខាងលើ រដ្ឋបាលខេត្តព្រះសីហនុ បានអំពាវនាវដល់សាធារណជន ប្រជាពលរដ្ឋ ប្រជានេសាទ ភ្ញៀវទេសចរជាតិ-អន្តរជាតិ និងអ្នកប្រកបអាជីវកម្មដឹកជញ្ជូនភ្ញៀវទេសចរទៅតាមបណ្តាកោះ ត្រូវផ្អាកជាបណ្តោះអាសន្ន ក្នុងការចេញនេសាទនៅលើផ្ទៃសមុទ្រ និងការដឹកជញ្ជូនភ្ញៀវទេសចរ ទៅតាមបណ្តាកោះនានា ដោយត្រូវរង់ចាំអាកាសធាតុបានធូរស្រាល ទើបអនុញ្ញាតឱ្យចេញនេសាទ និងមានការដឹកជញ្ជូនភ្ញៀវទេសចរជាធម្មតាឡើងវិញ។

បន្ថែមពីនេះ ត្រូវបង្កើនការយកចិត្តទុកដាក់ខ្ពស់ និងប្រុងប្រយ័ត្នក្នុងការលេងទឹកកំសាន្តតាមឆ្នេរសមុទ្រដែមានរលកខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានជាយថាហេតុ។ ហេតុដូច្នេះ សូមសាធារណជន ប្រជាពលរដ្ឋ ប្រជានេសាទ ភ្ញៀវ ទេសចរជាតិ-អន្តរជាតិ និងអ្នកប្រកបអាជីវកម្មដឹកជញ្ជូនភ្ញៀវទេសចរទៅតាមបណ្តាកោះ យកចិត្តទុកដាក់អនុវត្តតាមខ្លឹមសារខាងលើឱ្យមានប្រសិទ្ធភាព។

ទន្ទឹមនោះ កងកម្លាំងមានសមត្ថកិច្ច ប្រធានមន្ទីរ អង្គភាពពាក់ព័ន្ធ អាជ្ញាធរ មូលដ្ឋាន ត្រូវយកចិត្តទុកដាក់ផ្សព្វផ្សាយឱ្យបានទូលំទូលាយ ព្រមទាំងត្រូវត្រៀមមធ្យោបាយ សម្ភារ និងកម្លាំង ដើម្បីចេញអន្តរាគមន៍បានទាន់ពេលវេលា៕

The post រដ្ឋបាលខេត្តព្រះសីហនុ ផ្អាកការធ្វើដំណើរតាមទូកលើផ្ទៃសមុទ្រជាបណ្តោះអាសន្ន appeared first on Kampuchea Thmey Daily.

លោក ស សុខា ឧបនាយករដ្ឋមន្ត្រី រដ្ឋមន្រ្តីក្រសួងមហាផ្ទៃ បានសង្កត់ធ្ងន់ពីភាពចាំបាច់នៃការបន្តពង្រឹងការងារសន្តិសុខ និងសណ្ដាប់ធ្នាប់សាធារណៈនៅក្នុងភូមិសាស្ត្រខេត្តព្រះសីហនុ។ ពាក់ព័ន្ធការងារនេះ លោកឧបនាយករដ្ឋមន្ត្រី បានគូសបញ្ជាក់អំពីចំណាត់ការដ៏មុតស្រួចរបស់រាជរដ្ឋាភិបាល ដែលមានក្រសួងមហាផ្ទៃ ជាសេនាធិការ បាននិងកំពុងយកចិត្តទុកដាក់បង្ក្រាបបទល្មើសគ្រប់ប្រភេទ ជាពិសេសបទល្មើសដែលមានការប្រឈមនៅខេត្តភាគនិរតីមួយនេះ ដូចជា បទល្មើសឆបោកតាមប្រព័ន្ធអនឡាញ បទល្មើសពាក់ព័ន្ធគ្រប់ទម្រង់នៃអំពើជួញដូរមនុស្ស ល្បែងស៊ីសងខុសច្បាប់ និងបទល្មើសព្រហ្មទណ្ឌផ្សេងៗទៀត។

លោកឧបនាយករដ្ឋមន្ត្រី ក៏បានណែនាំបន្ថែមលើការងារបង្ក ទប់ស្កាត់ និងបង្ក្រាបបទល្មើសគ្រឿងញៀន ដោយលោក បញ្ជាក់ឱ្យដឹងថា ទោះបីជាប្រតិបត្តិការក្នុងរយៈពេល៦ខែឆ្នាំ២០២៤ បង្ក្រាបបានច្រើនករណី ដោយរឹបអូសគ្រឿងញៀនរហូតដល់ជាង៥តោនក៏ដោយ ក៏មិនមែនមានន័យថាគ្រឿងញៀនបានថយចុះនោះដែរ។ ផ្ទុយទៅវិញ លោកឧបនាយករដ្ឋមន្ត្រី បានជំរុញឱ្យរដ្ឋបាលខេត្ត រួមទាំងកម្លាំងអនុវត្តច្បាប់គ្រប់លំដាប់ថ្នាក់បង្កើនការយកចិត្តទុកដាក់អនុវត្តយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ក្នុងនោះត្រូវបំផុសចលនាចូលរួមពីគ្រប់ភាគី ដោយអនុវត្តវិធានការណ៍៣កុំ១រាយការណ៍។

ក្រៅពីនេះ លោករដ្ឋមន្ត្រីក្រសួងមហាផ្ទៃ បានណែនាំឱ្យរដ្ឋបាលខេត្ត និងកងកម្លាំងមានសមត្ថកិច្ច យកចិត្តទុកដាក់ទប់ស្កាត់ និងបង្ក្រាបបទល្មើសអាជីវកម្មផ្លូវភេទ ជួញដូរកម្លាំងពលកម្ម និងបទល្មើសចរាចរណ៍ ជាពិសេសការរឹតបន្តឹងច្បាប់នៅពេលយប់ និងផ្ដោតលើមុខសញ្ញាមិនពាក់មួកសុវត្ថិភាព ព្រមទាំងបង្ក្រាបបទល្មើសលើផ្ទៃសមុទ្រ ប្រកបដោយការទទួលខុសត្រូវខ្ពស់ និងធានាឱ្យបាននូវសោភណ្ឌភាព និងអនាម័យតំបន់ឆ្នេរប្រកបដោយភាពទាក់ទាញ។

បើតាមការគូសបញ្ជាក់របស់លោករដ្ឋមន្ត្រី ការធានាបាននូវការទប់ស្កាត់ និងបង្ក្រាបបទល្មើសគ្រប់ប្រភេតខាងលើ នឹង រុញច្រានឱ្យខេត្តព្រះសីហនុ កាន់តែអាចទាក់ទាញវិនិយោគ និងទេសចរណ៍កាន់តែច្រើនឡើងថែមទៀតមកកាន់ខេត្តជាប់សមុទ្រមួយនេះ។ លោកប្រមុខមហាផ្ទៃ បានបង្ហាញក្ដីសង្ឃឹមថា ក្រោមការដឹកនាំរបស់អភិបាលថ្មី រដ្ឋបាលខេត្ត រួមទាំងមន្ត្រី កងកម្លាំង និងប្រជាពលរដ្ឋខេត្តព្រះសីហនុ នឹងរួមគ្នាជាកម្លាំងទាក់ទាញក្នុងវិស័យវិនិយោគ និងទេសចរណ៍ ស្របតាមគោលការណ៍ដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងសក្ដានុពលជាក់ស្ដែងរបស់ខេត្តព្រះសីហនុ។

ពីវេទិកានេះដែរ លោក ស សុខា បានកោតសរសើររដ្ឋបាលខេត្តព្រះសីហនុ ក្រោមការដឹកនាំរបស់លោក គួច ចំរើន ជាអភិបាលខេត្ត កន្លងមក បានដឹកនាំមន្ត្រី កងកម្លាំង និងកៀរគរការចូលរួមពីប្រជាពលរដ្ឋ ដើម្បីពង្រឹងគុណភាពសេវាសាធារណៈ ធានាសន្តិសុខ សណ្ដាប់ធ្នាប់ និងរបៀបរៀបរយសង្គម ប្រកបដោយការទទួលខុសត្រូវខ្ពស់ ធ្វើឱ្យបទល្មើសគ្រប់ប្រភេទនៅក្នុងខេត្ត ជាពិសេសក្នុងក្រុងព្រះសីហនុ មានការថយចុះ ហើយពលរដ្ឋមានការសាទរ និងគាំទ្រ ភ្ញៀវទេសចរណ៍ និងវិនិយោគិនជាតិ និងអន្តរជាតិ ក៏ទទួលបានភាពកក់ក្ដៅ។

សូមបញ្ជាក់ថា លោក ម៉ាង ស៊ីណេត អតីតអភិបាលរងខេត្តព្រះសីហនុ ត្រូវបានព្រះករុណា ព្រះមហាក្សត្រនៃកម្ពុជា ត្រាស់បង្គាប់តែងតាំងជា អភិបាលខេត្តព្រះសីហនុ ជំនួសលោក គួច ចំរើន ដែលត្រូវបានផ្ទេរទៅកាន់មុខតំណែងជាអភិបាលខេត្តកណ្ដាល៕

The post ដូរអភិបាលខេត្តថ្មី, រដ្ឋមន្ត្រីមហាផ្ទៃ ប្រាប់ឱ្យខេត្តព្រះសីហនុ បង្ក្រាបការឆបោកតាមអនឡាញ និងអំពើជួញដូរមនុស្ស appeared first on Kampuchea Thmey Daily.

ការណែនាំនេះ បន្ទាប់ពីអាជ្ញាធរដែនដីក្រុងព្រះសីហនុ កាលពីព្រឹកថ្ងៃទី១០ ខែមិថុនា ឆ្នាំ២០២៤ ដឹកនាំដោយលោក អ៊ី សុខឡេង អភិបាលរងខេត្ត បានចុះត្រួតពិនិត្យទីតាំងស្នើសុំសាងសង់អាងតន្ត្រីបាញ់ទឹក និងរបាំងការពាររលកសមុទ្រ របស់ក្រុមហ៊ុន យូណាន ជីងចេង ខូអិលធីឌី ដែលមានទីតាំងស្ថិតនៅតាមបណ្តោយឆ្នេរអូរត្រេះ ភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ។

ក្នុងករណីនេះ លោក ឃាង ភារម្យ មន្ត្រីអ្នកនាំពាក្យសាលាខេត្តព្រះសីហនុ ទទួលស្គាល់ថា ផ្អែកតាមការចុះពិនិត្យជាក់ស្តែងឃើញថា ក្រុមហ៊ុនខាងលើ ទទួលបានការឯកភាពជាគោលការណ៍ពីក្រសួងរៀបចំដែនដី ពិតមែន ប៉ុន្តែមិនទាន់អាចសាងសង់បានទេ ។ លោកបញ្ជាក់ថា៖«ដោយក្រុមហ៊ុនមានការភាន់ច្រឡំថាជាលិខិតរបស់ក្រសួងរៀបចំដែនដី អនុញ្ញាតឱ្យក្រុមហ៊ុនមានសិទ្ធិសាងសង់ ទើបក្រុមហ៊ុនចាប់ផ្តើមដំណើរការការដ្ឋានរបស់ខ្លួន។ បន្ទាប់ពីស្តាប់ការណែនាំរបស់ក្រុមការងារខេត្តរួច ក្រុមហ៊ុនមានការយល់ច្បាស់ និងសូមអនុវត្តតាមខ្លឹមសារលិខិតរបស់ក្រសួង និងក្រុមការងារ»។

យោងតាមលិខិតរបស់រដ្ឋលេខាធិការប្រចាំការនៃក្រសួងរៀបចំដែនដី នគរូបនីយកម្ម និងសំណង់ លោក តឹករ៉េត សំរេច ចុះថ្ងៃទី៨​ ខែឧសភា ឆ្នាំ២០២៤ គឺបានឯកភាពជាគោលការណ៍ ចំពោះសំណើសុំគោលការណ៍អនុញ្ញាតសាងសង់អាងតន្ត្រីបាញ់ទឹកទំហំ ៨.៦១២ ម៉ែត្រក្រឡា និងរបាំងការពាររលកសមុទ្រ ប្រវែង ៤២០ម៉ែត្រ នៅតាមបណ្ដោយឆ្នេរអូរត្រេះ ប៉ុន្តែហេដ្ឋារចនាសម្ព័ន្ធទាំងនោះត្រូវដាក់ឱ្យបម្រើផលប្រយោជន៍សាធារណៈ។ លិខិតដដែលបញ្ជាក់ថា៖«បន្ទាប់ពីទទួលបានគោលការណ៍អនុញ្ញាតនេះ និងមុនពេលចាប់ផ្តើមដំណើរការសាងសង់ ក្រុមហ៊ុនត្រូវបំពេញនីតិវិធីតាមផ្លូវច្បាប់មួយចំនួន»។
ក្នុងនោះរួមមាន ១. ក្រុមហ៊ុនត្រូវស្នើសុំកិច្ចសហការពីមន្ទីររៀបចំដែនដី នគំរូបនីយកម្ម សំណង់ និងសុរិយោដីខេត្តព្រះសីហនុ ដើម្បីកំណត់និយាមកាទីតាំងសាងសង់អាងតន្ត្រីបាញ់ទឹក និងរបាំងការពាររលកសមុទ្រឱ្យបានច្បាស់លាស់ និងត្រូវស្នើសុំគោលការណ៍ប្រើប្រាស់ដីសាធារណៈពីរាជរដ្ឋាភិបាល។
២. ក្រុមហ៊ុន ត្រូវសិក្សាគម្រោងប្លង់អាងតន្ត្រីបាញ់ទឹក និងរបាំងការពាររលកសមុទ្រឱ្យបានច្បាស់លាស់ ត្រឹមត្រូវតាមលក្ខណៈបច្ចេកទេស និងអត្តសញ្ញាណល្អឯកសម្រាប់ខេត្តព្រះសីហនុ ដែលផ្ដល់បន្ថែមនូវសោភណភាព ដល់តំបន់ឆ្នេរសមុទ្រទាញភ្ញៀវទេសចរជាតិ និងអន្តរជាតិ ។
៣. ក្រុមហ៊ុនត្រូវស្នើសុំលិខិតអនុញ្ញាតសាងសង់ និងលិខិតអនុញ្ញាតបើកការដ្ឋានសំណង់ ពីក្រសួងរៀបចំដែនដី នគរូបនីយកម្ម និងសំណង់ ស្របតាមនីតិវិធីជាធរមាន។

ប៉ុន្តែបើតាមអាជ្ញាធរក្រុងព្រះសីហនុ ក្រុមហ៊ុននេះពុំទាន់បានបំពេញលក្ខខណ្ឌខាងលើនៅឡើយទេ។
ជាមួយគ្នានេះ លោក អ៊ី សុខឡេង អភិបាលរងខេត្តព្រះសីហនុ និងជាប្រធានក្រុមការងារ ដែលបានចុះពិនិត្យទីតាំងផ្ទាល់ បានធ្វើការណែនាំក្រុមហ៊ុន ត្រូវផ្អាកការដ្ឋានសាងសង់ទាំងស្រុងជាបណ្តោះអាសន្ន និងត្រូវកាយដីដែលបានចាក់លើឆ្នេរសមុទ្រចេញវិញ ព្រមទាំងជួសជុលផ្លូវក្រានីតឱ្យបានស្អាតដូចដើមវិញ ។ បន្ថែមពីនេះ ក្រុមហ៊ុនត្រូវសហការជាមួយមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ក្នុងការកំណត់និយាមកាទីតាំងសាងសង់អាងតន្ត្រីបាញ់ទឹក និងរបាំងការពាររលកសមុទ្រឱ្យបានច្បាស់លាស់ រួចដាក់ជូនរដ្ឋបាលខេត្ត ដើម្បីប្រជុំពិនិត្យ មុននឹងដាក់ស្នើសុំគោលការណ៍ប្រើប្រាស់ដីឆ្នេរសាធារណៈពីរាជរដ្ឋាភិបាល៕

អត្ថបទ៖ ឡាយ សាមាន

The post ព្រះសីហនុ៖ ក្រុមហ៊ុនត្រូវបំពេញលក្ខខណ្ឌតាមច្បាប់ មុននឹងសាងសង់អាងតន្រ្តីបាញ់ទឹកនៅឆ្នេរអូរត្រេះ appeared first on Kampuchea Thmey Daily.