រដ្ឋដាក់ឱ្យដំណើរការរដ្ឋបាលក្រុងកំពង់សោម ដោយមានសមាសភាពគណៈអភិបាល៧រូប

នាព្រឹកថ្ងៃទី១៧ ខែកុម្ភៈ ឆ្នាំ២០២៥ រដ្ឋបាលក្រុងកំពង់សោម នៃខេត្តព្រះសីហនុ ត្រូវបានប្រកាសដាក់ឱ្យដំណើរការជាផ្លូវការ ដោយមានសមាសភាពនៃគណៈអភិបាលក្រុងកំពង់សោមចំនួន៧រូប ក្នុងនោះ លោក នួន ប៊ុនថុល ជាអភិបាលក្រុង អមដោយអភិបាលរងចំនួន៦រូប។

ក្រុងកំពង់សោម គឺជាក្រុងទី៣ របស់ខេត្តព្រះសីហនុ បន្ទាប់ពីក្រុងព្រះសីហនុ និងក្រុងកោះរ៉ុង។ បើយោងតាមអនុក្រឹត្យរបស់ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត ចុះថ្ងៃទី២៨ ខែសីហា ឆ្នាំ២០២៤ ក្រុងកំពង់សោមបានបង្កើតថ្មីដោយកាត់ចេញពី ៥ឃុំនៃស្រុកព្រៃនប់ មានឃុំបិតត្រាំង ឃុំរាម ឃុំអូរឧកញ៉ាហេង ឃុំបឹងតាព្រហ្ម និងឃុំអូរជ្រៅ។

ពិធីប្រកាសដាក់ឱ្យដំណើរការនូវរដ្ឋបាលក្រុងកំពង់សោម នៃខេត្តព្រះសីហនុ នាព្រឹលថ្ងៃនេះ ក្រោមវត្តមានរបស់លោក វង្ស ផាណាត ប្រធានក្រុមប្រឹក្សាខេត្តព្រះសីហនុ និងលោក ឯម ភាព អភិបាលរងខេត្តខេត្តព្រះសីហនុ ដោយមានការចូលរួមពីសមាជិកក្រុមប្រឹក្សាខេត្ត លោក លោកស្រីអភិបាលរងខេត្ត នាយករដ្ឋបាលខេត្ត អភិបាលក្រុង ស្រុក ប្រធានមន្ទីរ អង្គភាព និងក្រុមប្រឹក្សាឃុំ សង្កាត់។

រដ្ឋបាលក្រុងកំពង់សោម គឺមានលោក នួន ប៊ុនថុល ដែលបានផ្ទេរភារកិច្ចពីអភិបាលក្រុងកោះរ៉ុង ឱ្យមកជាអភិបាលក្រុងកំពង់សោម។ រីឯ មន្ត្រីរាជការចំនួន ៣រូប ត្រូវបានផ្ទេរភារកិច្ចពីក្រុងស្រុកនានា ឱ្យមកកាន់ជាអភិបាលរងក្រុងកំពង់សោមនេះ រួមមានលោក យឹម សុខសំអូន ឋានន្តរស័ក្តិឧត្តមមន្រ្តី ថ្នាក់លេខ៤ ពីអភិបាលរងក្រុងព្រះសីហនុ លោក សេក ដារ៉ាវុទ្ធ ឋានន្តរស័ក្តិវរមន្រ្តី ថ្នាក់លេខ៣ ពីអភិបាលរងស្រុកព្រៃនប់ និងលោក សុន ពិសី ឋានន្តរស័ក្តិវរមន្រ្តី ថ្នាក់លេខ៤ ពីអភិបាលរងស្រុកស្ទឹងហាវ។

ដោយឡែក លោកស្រី តាក វណ្ណសៅនីតា ឋានន្តរស័ក្តិវរមន្រ្តី ថ្នាក់លេខ៤ លោក សុខ សិទ្ធិការ ឋានន្តរស័ក្តិអនុមន្ត្រី ថ្នាក់លេខ២ និងលោក នន់ ធូ ឋានន្តរស័ក្តិនាយក្រមការ ថ្នាក់លេខ៥ ក៏ត្រូវបានតែងតាំងតួនាទីជាអភិបាលរងក្រុងកំពង់សោម ផងដែរ៕