រដ្ឋាករទឹកស្វយ័តរាជធានីភ្នំពេញ Archives - Kampuchea Thmey Daily

រដ្ឋបាលខេត្តកណ្ដាល និងរដ្ឋាករទឹកស្វយ័តក្រុងភ្នំពេញ ផ្សព្វផ្សាយអំពីការផ្គត់ផ្គង់ទឹកស្អាត ជូនពលរដ្ឋនៅបុរីសិរីមង្គល ក្នុងក្រុងតាខ្មៅ

Ung Meng — Fri, 22 May 2026 02:20:14 +0000

លោក ឯក សុនចាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមប្រឹក្សាភិបាល នៃរដ្ឋាករទឹកស្វយ័តក្រុងភ្នំពេញ និង លោក ខុន សេរីរដ្ឋា អភិបាលរងខេត្តកណ្ដាល ព្រមទាំងអជ្ញាធរក្រុងតាខ្មៅ និងមន្ត្រីពាក់ព័ន្ធ កាលពីថ្ងៃទី២១ ខែឧសភា ឆ្នាំ២០២៦ បានចុះជួបសំណេះសំណាល និងបានរៀបចំកិច្ចប្រជុំផ្សព្វផ្សាយអំពីស្ថានភាពផ្គត់ផ្គង់ ទឹកស្អាតជូនប្រជាពលរដ្ឋនៅបុរីសិរីមង្គល ស្ថិតនៅភូមិកោះគរ សង្កាត់រកាខ្ពស់ ក្រុងតាខ្មៅ។

កិច្ចប្រជុំនេះ ធ្វើឡើងក្នុងគោលបំណង ពន្យល់បកស្រាយ និងបំភ្លឺជូនជូនប្រជាពលរដ្ឋរស់នៅក្នុងបុរីសិរីមង្គល អំពីស្ថានភាពនៃការផ្គត់ផ្គង់ទឹកស្អាត និងបញ្ហាពាក់ព័ន្ធនឹងតម្លៃទឹកស្អាត ជាពិសេសនោះគឺ ដើម្បីផ្តល់ឱកាសដល់ប្រជាពលរដ្ឋបានលើកឡើងអំពីបញ្ហាប្រឈម និងសំណូមពរនានាផងដែរ។

មានប្រសាសន៍ទៅកាន់ ប្រជាពលរដ្ឋ លោក ឯក សុនចាន់ បានបញ្ជាក់ថា បន្ទាប់ពីកិច្ចប្រជុំនេះ ពលរដ្ឋនឹងមានការយល់ដឹងកាន់តែច្បាស់ ពាក់ព័ន្ធនិងតម្លៃទឹក។ ដោយឡែកសម្រាប់តម្លៃទឹកស្អាត ដែលពលរដ្ឋមិនទាន់បានបង់ អាចធ្វើការបង់ជាដំណាក់កាល (បង់រំលោះ)បាន ខណៈដែលការផ្គត់ផ្គង់ទឹកនៅតែដំណើរការធម្មតា។ មួយវិញទៀតចំពោះប្រជាពលរដ្ឋដែលមានជីវភាពខ្វះខាត និងមានប័ណ្ណសមធម៌សង្គម សូមអញ្ជើញមកដាក់ពាក្យនៅរដ្ឋាករទឹក ដើម្បីឱ្យក្រុមការងារធ្វើការពិនិត្យ និងដោះស្រាយជូនតាមរយៈកម្មវិធីមូលនិធិសង្គមរបស់រដ្ឋាករទឹកស្វយ័តក្រុងភ្នំពេញ៕

The post រដ្ឋបាលខេត្តកណ្ដាល និងរដ្ឋាករទឹកស្វយ័តក្រុងភ្នំពេញ ផ្សព្វផ្សាយអំពីការផ្គត់ផ្គង់ទឹកស្អាត ជូនពលរដ្ឋនៅបុរីសិរីមង្គល ក្នុងក្រុងតាខ្មៅ appeared first on Kampuchea Thmey Daily.

រដ្ឋបាលខេត្តកណ្ដាល និងរដ្ឋាករទឹកស្វយ័តក្រុងភ្នំពេញដោះស្រាយរឿងតម្លៃទឹកស្អាត ជូនពលរដ្ឋនៅបុរីសុភមង្គល ក្រុងតាខ្មៅ ទទួលបានជោគជ័យ

Ung Meng — Wed, 29 Apr 2026 03:26:31 +0000

នៅព្រឹកថ្ងៃទី២៨ ខែមេសា ឆ្នាំ២០២៦ លោក ឯក សុនចាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមប្រឹក្សាភិបាល នៃរដ្ឋាករទឹកស្វយ័តក្រុងភ្នំពេញ និងលោក គួច ចំរើន អភិបាលនៃគណៈអភិបាលខេត្តកណ្ដាល បានអញ្ជើញជាគណៈអធិបតី ក្នុងកិច្ចប្រជុំផ្សព្វផ្សាយអំពីស្ថានភាពផ្គត់ផ្គង់ទឹកស្អាតជូនប្រជាពលរដ្ឋ ដែលរស់នៅក្នុងបុរីសិរីមង្គល ស្ថិតនៅភូមិកោះគរ សង្កាត់រកាខ្ពស់ ក្រុងតាខ្មៅ។ កិច្ចនោះ ក៏មានការចូលរួមពីលោកអភិបាលរងខេត្ត អាជ្ញាធរក្រុងតាខ្មៅ មន្ទីរពាក់ព័ន្ធ និងតំណាងប្រជាពលរដ្ឋរស់នៅក្នុងបុរីសុភមង្គលផងដែរ។

ក្រោមការពន្យល់ បកស្រាយ និងបំភ្លឺពីសំណាក់ លោក ឯក សុនចាន់ និងលោកម គួច ចំរើន បានធ្វើឲ្យតំណាងប្រជាពលរដ្ឋ ដែលមានបញ្ហាពាក់ព័ន្ធនឹងតម្លៃទឹកស្អាត យល់ព្រម និងឯកភាពស្រុះស្រួលជាមួយរដ្ឋាករទឹក ដោយបរិយាកាសសប្បាយរីករាយ។

ការលើកឡើងទៅកាន់តំណាងប្រជាពលរដ្ឋរស់នៅក្នុងបុរីសុភមង្គល លោក គួច ចំរើន បានបញ្ជាក់ថា ក្រុមការងារនឹងចុះទៅផ្សព្វផ្សាយ និងពន្យល់ជូនប្រជាពលរដ្ឋដល់ទីតាំងបុរីដោយផ្ទាល់ ដើម្បីឲ្យមានការយល់ដឹងកាន់តែច្បាស់ ពាក់ព័ន្ធនឹងតម្លៃទឹក ដែលពលរដ្ឋមិនទាន់បានបង់ អាចធ្វើការបង់ជាដំណាក់កាល (បង់រំលោះ)បាន ខណៈដែលការផ្គត់ផ្គង់ទឹកនៅតែដំណើរការធម្មតា។

ដោយឡែក សម្រាប់ប្រជាពលរដ្ឋដែលមានជីវភាពខ្វះខាត និងមានប័ណ្ណសមធម៌សង្គម សូមអញ្ជើញមកដាក់ពាក្យនៅរដ្ឋាករទឹក ដើម្បីឲ្យក្រុមការងារធ្វើការពិនិត្យ និងដោះស្រាយជូនតាមរយៈកម្មវិធីមូលនិធិសង្គម រដ្ឋបាលខេត្ត នឹងរៀបចំមន្ត្រីជួយសម្រួលផងដែរ៕

The post រដ្ឋបាលខេត្តកណ្ដាល និងរដ្ឋាករទឹកស្វយ័តក្រុងភ្នំពេញដោះស្រាយរឿងតម្លៃទឹកស្អាត ជូនពលរដ្ឋនៅបុរីសុភមង្គល ក្រុងតាខ្មៅ ទទួលបានជោគជ័យ appeared first on Kampuchea Thmey Daily.

ភ្នំពេញមានរោងចក្រផលិតទឹកស្អាត ៦ កន្លែងសមត្ថភាពផលិតបានប្រមាណ ១ លានម៉ែត្រគូបក្នុងមួយថ្ងៃ

Dy Bunnara — Sat, 14 Jun 2025 03:50:19 +0000

លោក ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃរដ្ឋាករទឹកស្វយ័តក្រុងភ្នំពេញបានឲ្យដឹងថា បច្ចុប្បន្ននេះនៅរាជធានីភ្នំពេញ មានរោងចក្រផលិតទឹកស្អាតចំនួន ៦ ដែលមានសមត្ថភាពផលិតទឹកស្អាតបានប្រមាណ ១ លានម៉ែត្រគូបក្នុងមួយថ្ងៃ។

លោក ឡុង ណារ៉ូ បានគូសបញ្ចាក់ថា នៅត្រឹមឆ្នាំ ២០២៧ រដ្ឋាករទឹកភ្នំពេញ គ្រោងនឹងពង្រីកការផ្គត់ផ្គង់ទឹកស្អាតគ្របដណ្ដប់ឲ្យបាន ១០០% នៅរាជធានីភ្នំពេញ។

«បើមើលលើការងារផ្គត់ផ្គង់ទឹកស្អាតនៅសល់ខណ្ឌចំនួន ៣ ទៀតនៅជាយក្រុង មានខណ្ឌពោធិ៍សែនជ័យ ខណ្ឌកំបូល និងខណ្ឌដង្កោ»។

លោក ឡុង ណារ៉ូ បានថ្លែងបញ្ជាក់ថា ខណ្ឌពោធិ៍សែនជ័យកំពុងពង្រីក និងខណ្ឌដង្កោក៏កំពុងពង្រីក ខណៈខណ្ឌកំបូលបានពង្រីកគ្របដណ្តប់ស្ទើរ ១០០% ក្រោយដំណើរការរោងចក្របឹងធំកាលពីខែ ១១ ឆ្នាំ ២០២៤ ដែលធ្វើឲ្យខណ្ឌកំបូលដោះស្រាយបានលឿនការផ្គត់ផ្គង់ទឹកស្អាត។

ផ្ទៃសេវាគ្រប់ដណ្តប់ទឹកស្អាតនៅរាជធានីភ្នំពេញមានភាពធំទូលាយ ប៉ុន្តែរបាយប្រជាជនរស់នៅមិនស្មើគ្នាពេញលេញនោះទេ។ នៅរាជធានីភ្នំពេញការផ្គត់ផ្គង់ទឹកស្អាតដល់ប្រជាជនបានជាង ៩០% នៅសល់ជាង ៧% ទៀតដែលត្រូវការដោះស្រាយហើយក៏មិនស្រួលដែរ ដោយសាររប៉ាយប្រជាជនរស់នៅឆ្ងាយៗពីគ្នា។ លោក ឡុង ណារ៉ូ បញ្ជាក់បន្ថែម។

តាមផែនការក្នុងឆ្នាំ ២០២៧ រដ្ឋាករទឹកគ្រោងពង្រីកសេវាផ្គត់ផ្កង់ឲ្យបាន ១០០% ដល់ប្រជាជនរស់នៅរាជធានីភ្នំពេញដែលនឹងទទួលទឹកស្អាតប្រើប្រាស់ពីរដ្ឋាករទឹកភ្នំពេញ លើកលែងតែទីតាំងដែលទទួលបានសេវាពីប្រតិបត្តិករឯកជន។

រដ្ឋាករទឹករាជធានីភ្នំពេញ កំពុងសាងសង់រោងចក្រប្រព្រឹត្តកម្មទឹកស្អាតបាក់ខែងជំហានទី៣ ដែលមានសមត្ថភាពផលិតទឹកស្អាត ១៩៥ ០០០ ម៉ែត្រគូបក្នុងមួយថ្ងៃ ដែលបច្ចុប្បន្ននេះសាងសង់សម្រេចបានប្រមាណ ២៥%។

តាមផែនការរោងចក្រនេះ នឹងបញ្ចប់ការសាងសង់ទាំងស្រុងនៅឆ្នាំ២០២៧ ដើម្បីបង្កើនការផលិតទឹកស្អាតក្នុងរាជធានីភ្នំពេញឱ្យបាន ១.២លានម៉ែត្រគូបក្នុងមួយថ្ងៃ ឆ្លើយតបទៅនឹងតម្រូវការប្រចាំថ្ងៃរបស់ប្រជាពលរដ្ឋទាំងនៅក្នុងរាជធានីភ្នំពេញ និងនៅក្រុងតាខ្មៅ៕

The post ភ្នំពេញមានរោងចក្រផលិតទឹកស្អាត ៦ កន្លែងសមត្ថភាពផលិតបានប្រមាណ ១ លានម៉ែត្រគូបក្នុងមួយថ្ងៃ appeared first on Kampuchea Thmey Daily.

ពលរដ្ឋភូមិប្រការ ជាង ៥០ គ្រួសារ សាទរយ៉ាងខ្លាំង ខណៈរដ្ឋាករស្វយ័ត ចុះតបណ្ដាញទឹកស្អាតជូន ក្រោយគ្មានទឹកប្រើប្រាស់យូរឆ្នាំ

អ៊ិន ពិសី — Wed, 07 May 2025 07:05:14 +0000

ប្រជាពលរដ្ឋរស់នៅភូមិប្រការ សាទរយ៉ាងខ្លាំង ខណៈដែលអាជ្ញាធរបានយកចិត្តទុកដាក់ជំរុញឲ្យខាងរដ្ឋាករស្វយ័តមកភ្ជាប់បណ្ដាញទឹកស្អាតជូនពួកគាត់ ក្រោយគ្មានទឹកស្អាតប្រើប្រាស់យូរឆ្នាំមកហើយ ដោយត្រូវចំណាយប្រាក់ជាច្រើនសម្រាប់ទិញទឹកប្រើប្រាស់ជាប្រចាំថ្ងៃ។

ជាក់ស្ដែងប្រជាពលរដ្ឋរស់នៅក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ មានជាង ៥០ គ្រួសារ បានសាទរយ៉ាងខ្លាំងចំពោះការខិតខំប្រឹងប្រែងរបស់អាជ្ញាធរសង្កាត់ដែលបានយកចិត្តទុកដាក់ពីទុក្ខលំបាកពលរដ្ឋក្នុងមូលដ្ឋាន។

បើតាមមន្ត្រីរដ្ឋាករទឹក បានបញ្ជាក់ថា រដ្ឋាករទឹក បានជីកបង្កប់ទុយោ តមេ ភ្ជាប់បណ្ដាញទឹកស្អាតចូលតាមផ្ទះប្រជាពលរដ្ឋមានប្រវែងជាង ១៨០ ម៉ែត្រ និងធ្វើការបំបែកចូលតាមផ្ទះពលរដ្ឋ ដើម្បីប្រើប្រាស់។

គួររំលឹកផងដែរថា កន្លងមក កម្ពុជាថ្មី ធ្លាប់បានសម្ភាសន៍ជាមួយ លោក មាន មឿន និង អ្នកស្រី វ៉ា ហៀប ដែលជាប្រជាពលរដ្ឋរស់នៅក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ដោយពួកគាត់បានរៀបរាប់ពីទុក្ខលំបាកប្រចាំថ្ងៃ ត្រូវទិញទឹកប្រើប្រាស់ប្រចាំថ្ងៃ ខ្លះទៀតជីកអណ្ដូងប្រើប្រាស់ផ្ទាល់ខ្លួន។ ពួកគាត់ចំណាយថវិកាច្រើនសម្រាប់ទិញទឹកស្អាតក្នុង ០១ ឡាន មានចំណុះប្រហែល ០៣ គូប តម្លៃ ៤ ម៉ឺនរៀល ទៅ ៥ ម៉ឺនរៀល។

ជាមួយគ្នានេះ លោក សួង សំអុល ចៅសង្កាត់ព្រៃស ក៏បានបញ្ជាក់ប្រាប់ កម្ពុជាថ្មី ដែរថា អាជ្ញាធរបានខិតខំយកចិត្តទុកដាក់ជំរុញការតបណ្ដាញទឹកជាច្រើនលើកមកហើយ ទើបតែពេលនេះរដ្ឋាករស្វយ័តរាជធានីភ្នំពេញ បានសហការជាមួយអាជ្ញាធរមូលដ្ឋាន ចុះជួបប្រជាពលរដ្ឋ និងធ្វើការសន្យា តបណ្ដាញទឹកស្អាតជូនពលរដ្ឋឲ្យបានប្រើប្រាស់ក្នុងពេលឆាប់ៗ ខាងមុខ៕

អត្ថបទ ៖ ម៉េង

The post ពលរដ្ឋភូមិប្រការ ជាង ៥០ គ្រួសារ សាទរយ៉ាងខ្លាំង ខណៈរដ្ឋាករស្វយ័ត ចុះតបណ្ដាញទឹកស្អាតជូន ក្រោយគ្មានទឹកប្រើប្រាស់យូរឆ្នាំ appeared first on Kampuchea Thmey Daily.

កម្ពុជាបើកការតភ្ជាប់បំពង់មេនាំទឹកឆៅដោយពុំផ្ដាច់ការផ្គត់ផ្គង់ទឹក លើកទី១ ក្នុងប្រវត្តិសាស្រ្ត

Din Thary — Fri, 21 Mar 2025 10:31:44 +0000

រដ្ឋាករទឹកស្វយ័តក្រុងភ្នំពេញ បានចាប់ផ្តើមតភ្ជាប់បំពង់មេនាំទឹកឆៅដោយពុំផ្ដាច់ការផ្គត់ផ្គង់ទឹកស្អាតក្នុងតំបន់កោះនរា ដោយនេះគឺជាលើកទី១ ក្នុងប្រវត្តិសាស្រ្តដែលកម្ពុជាអាចតភ្ជាប់ ដោយមិនកាត់ផ្តាច់ការផ្គត់ផ្គង់ទឹក ក្រោមគម្រោងអភិវឌ្ឍន៍ប្រព័ន្ធគ្រប់គ្រងការផ្គត់ផ្គង់ទឹកស្អាតបែបឌីជីថលក្នុងតំបន់ទីប្រជុំជន។

លោក ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានមានប្រសាសន៍នៅក្នុងកម្មវិធីនៃការតភ្ជាប់នៅថ្ងៃទី២១ ខែមីនា ឆ្នាំ២០២៥ នេះថា គម្រោងសាងសង់ស្ថានីយបូមទឹកឆៅថ្មី កោះនរា ជាគម្រោងជំនួសស្ថានីយបូមទឹកឆៅក្ដីតាកុយ ដើម្បីជួយសម្រួលដល់គម្រោងអភិវឌ្ឍន៍កោះនរាថ្មីរបស់ក្រុមហ៊ុន OCIC ។

គម្រោងនេះនឹងរួមបញ្ចូលសេវាទីប្រឹក្សាបច្ចេកទេស ការសាងសង់ស្ថានីយ៍បូមទឹកឆៅដែលមានសមត្ថភាពសរុប ៤៦០.០០០ ម៉ែត្រគូបក្នុងមួយថ្ងៃ ដែលរួមបញ្ចូលសមត្ថភាពមានស្រាប់របស់ស្ថានីយ៍បូមទឹកឆៅក្តីតាកុយចំនួន ២៦០.០០០ ម៉ែត្រគូបក្នុងមួយថ្ងៃ និងសមត្ថភាពថ្មី ២០០.០០០ ម៉ែត្រគូបក្នុងមួយថ្ងៃ។ បន្ថែមពីនេះ ក៏នៅមានការដំឡើងប្រព័ន្ធអេឡិចត្រូមេកានិក សម្ភារបរិក្ខារ និងបំពង់មេនាំទឹកឆៅទំហំមុខកាត់ ១.៤០០មម ចំនួន ២ ខ្សែប្រវែង ១.៦០០ម៉ែត្រ។

តាមការសិក្សាកន្លងមក ការតភ្ជាប់បំពង់មេនាំទឹកឆៅចេញពីស្ថានីយបូមទឹកឆៅថ្មី កោះនរា មកកាន់បំពង់មេនាំទឹកឆៅដែលមានស្រាប់ទំហំមុខកាត់ ១.៦០០មម ស្ថិតនៅលើបណ្ដោយផ្លូវជាតិលេខ ១ នេះ ចាំបាច់ត្រូវធ្វើការបញ្ឈប់ការផ្គត់ផ្គង់ទឹកស្អាតពីរោងចក្រផលិតទឹកស្អាតនិរោធ ដែលមានសមត្ថភាពផលិត ២៦០ពាន់ម៉ែត្រគូប ក្នុងមួយថ្ងៃរយៈពេលប្រមាណមួយសប្ដាហ៍ ដែលនឹងប៉ះពាល់ដល់ការផ្គត់ផ្គង់ទឹកស្អាតប្រមាណជាង ៣០% នៃបរិមាណផលិតសរុបរបស់រដ្ឋាករទឹកស្វយ័តក្រុងភ្នំពេញ ហើយនឹងប៉ះពាល់ទៅដល់អតិថិជនជាអ្នកប្រើប្រាស់ទឹកស្អាតក្នុងរាជធានីភ្នំពេញ និងក្រុងតាខ្មៅ ប្រមាណ ១ លាននាក់។

ជុំវិញការងារនេះ រដ្ឋាករទឹកស្វយ័តក្រុងភ្នំពេញ និងក្រុមជំនាញការជប៉ុន បានសហការគ្នាយ៉ាងជិតស្និទ្ធ ដើម្បីរិះរកវិធីសាស្ត្រ បញ្ជៀសការកាត់ផ្តាច់សេវា ឬបញ្ឈប់ដំណើរការរោងចក្រផលិតទឹកស្អាត នៅពេលអនុវត្តការតភ្ជាប់នេះ។ ជាលទ្ធផល រដ្ឋាករទឹកស្វយ័តក្រុងភ្នំពេញ បានទទួលការគាំទ្រផ្នែកបច្ចេកទេស និងសម្ភារ តាមរយៈគម្រោងភ្ជាប់បំពង់មេនាំទឹកឆៅដោយពុំផ្ដាច់ការផ្គត់ផ្គង់ទឹកស្អាត ដែលជាផ្នែកមួយនៃគម្រោងអភិវឌ្ឍន៍ប្រព័ន្ធគ្រប់គ្រងប្រព័ន្ធផ្គត់ផ្គង់ទឹកស្អាតបែបឌីជីថលក្នុងតំបន់ទីប្រជុំជន ក្រោមជំនួយឥតសំណងរបស់រដ្ឋាភិបាលជប៉ុន។

ក្នុងឱកាសនោះដែរ លោកឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយករដ្ឋាករទឹកស្វយ័តក្រុងភ្នំពេញ បានលើកឡើងថា នេះជាលើកទី១ ក្នុងប្រវត្តិសាស្រ្ត ដែលកម្ពុជាអាចតភ្ជាប់បំពង់មេនាំទឹកឆៅដោយពុំផ្ដាច់ការផ្គត់ផ្គង់ទឹកស្អាត សម្រាប់បំពង់ដែលមានមុខកាត់ធំបែបនេះ។

ប្រព័ន្ធបច្ចេកវិទ្យាតភ្ជាប់ដោយពុំផ្ដាច់ការផ្គត់ផ្គង់ទឹកស្អាតនេះ នឹងធានានិរន្តរភាពនៃការផ្គត់ផ្គង់ទឹកស្អាតជូនអតិថិជនក្នុងរាជធានីភ្នំពេញ និងក្រុងតាខ្មៅ ព្រមទាំងនិរន្តរភាពនៃសកម្មភាពសេដ្ឋកិច្ច ពាណិជ្ជកម្ម ផលិតកម្ម និងសេវាកម្មនានា ដែលត្រូវការទឹកស្អាត បន្ថែមលើតម្រូវការសម្រាប់ការរស់នៅប្រចាំថ្ងៃរបស់ប្រជាពលរដ្ឋ។

គម្រោងនេះក៏បង្ហាញពីការរួមចំណែករបស់ក្រុមហ៊ុន OCIC ដល់ការអភិវឌ្ឍហេដ្ឋារចនាសម្ព័ន្ធទឹកស្អាតរបស់រដ្ឋាករទឹកស្វយ័តក្រុងភ្នំពេញ ដោយក្រុមហ៊ុនបានសាងសង់ជំនួសមកវិញនូវស្ថានីយបូមទឹកឆៅមួយ ដែលមានសមត្ថភាពលើសពីស្ថានីយបូមទឹកឆៅក្ដីតាកុយ៕

The post កម្ពុជាបើកការតភ្ជាប់បំពង់មេនាំទឹកឆៅដោយពុំផ្ដាច់ការផ្គត់ផ្គង់ទឹក លើកទី១ ក្នុងប្រវត្តិសាស្រ្ត appeared first on Kampuchea Thmey Daily.

តម្រូវការប្រើប្រាស់ទឹកស្អាតនៅកម្ពុជា កើនឡើងខ្ពស់

deth leng — Tue, 25 Feb 2025 04:59:58 +0000

នៅក្នុងឆ្នាំ ២០២៤ ការផលិត និងផ្គង់ទឹកស្អាតសរុបចំនួនប្រមាណ ៥៣០ លានម៉ែត្រគូប កើនឡើង ៦៨ លានម៉ែត្រគូប ស្មើនឹង ១៤,៩ ភាគរយ ធៀបនឹងឆ្នាំ ២០២៣ ក្នុងនោះរដ្ឋាករទឹកសាធារណៈបានផលិត និងផ្គត់ផ្គង់ទឹកស្អាតប្រមាណ ៣៥៧ លានម៉ែត្រគូប កើនឡើង ៥០ លានម៉ែត្រគូប ស្មើនឹង ១៦,៣ ភាគរយ ខណៈប្រតិបត្តិករឯកជនផលិត និងផ្គត់ផ្គង់បាន ១៧៣ លានម៉ែត្រគូប កើន ១២%។ នេះបើយោងតាមរបាយការណ៍របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

លោក ញឹម ខេមរា រដ្ឋលេខាធិការប្រចាំការ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍នៅថ្ងៃទី ២៥ ខែកុម្ភៈ ឆ្នាំ ២០២៥ នេះថា ក្រសួងបន្តពង្រឹងវិស័យទឹកស្អាត ព្រមទាំងបន្តអនុវត្តគោលនយោបាយទឹកស្អាត លើកទឹកចិត្តដល់វិស័យឯកជន ក្នុងការចូលរួមវិនិយោគលើវិស័យទឹកស្អាត ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ ក្នុងការផ្គត់ផ្គង់ទឹកស្អាតក្នុងភូមិសាស្ត្រអាទិភាព មានដូចជាតំបន់សេដ្ឋកិច្ចពិសេស និងតំបន់ប៉ូលសេដ្ឋកិច្ចនៅតាមបណ្ដារាជធានីខេត្តជាដើម ដែលជាកត្តាចាំបាច់ក្នុងការរួមចំណែកជំរុញកំណើនសេដ្ឋកិច្ចជាតិ។

គិតត្រឹមចុងឆ្នាំ ២០២៤ រដ្ឋាករទឹក និងប្រតិបត្តិករឯកជនបានភ្ជាប់តំណជូនអតិថិជនចំនួន ១,៤៤ លាន តំណ កើនឡើង ១០,២ ភាគរយ ធៀបនឹងឆ្នាំ ២០២៣។

រាជរដ្ឋាភិបាលបានគិតគូដល់ការពង្រឹងសមត្ថភាពផលិត និងការផ្ដល់សេវាផ្គត់ផ្គង់ទឹកស្អាតនៅគ្រប់តំបន់ទីប្រជុំជន រហូតដល់ជនបទ សម្រាប់ការប្រើប្រាស់ដល់សាធារណជនដោយពង្រឹង និងធានាប្រសិទ្ធភាពនៃការផលិត និងចែកចាយ និងការធ្វើអាជីវកម្មប្រកបដោយគុណភាព និងតម្លៃសមរម្យ៕

អត្ថបទ៖ ឡេង ដេត

The post តម្រូវការប្រើប្រាស់ទឹកស្អាតនៅកម្ពុជា កើនឡើងខ្ពស់ appeared first on Kampuchea Thmey Daily.

ពលរដ្ឋស្នើឲ្យរដ្ឋាករទឹកស្វយ័តក្រុងភ្នំពេញកុំឲ្យជីកខូចផ្លូវហើយទុកចោល

Sokhom Khon — Thu, 24 Oct 2024 07:13:41 +0000

ប្រជាពលរដ្ឋរស់នៅក្នុងមូលដ្ឋានខណ្ឌទួលគោក រាជធានីភ្នំពេញ បានស្នើឱ្យរដ្ឋាករទឹកស្វយ័តរាជធានីភ្នំពេញ កុំជីកឱ្យខូចផ្លូវហើយ ទុកចោល និងស្នើសុំឱ្យស្តារអាងស្តុបទឹកនៅតាមបណ្តោយផ្លូវរថភ្លើង ដូរអំពូលភ្លើងបំភ្លឺសាធារណៈ និងការស្នើសុំការសាងសង់អគារសង្កាត់ ដែលមានលក្ខណៈចាស់ទ្រុឌទ្រោមនៅសង្កាត់ទឹកល្អក់ទី៣។

ការស្នើសុំពីសំណាក់ពលរដ្ឋនេះបានធ្វើឡើងនាព្រឹកថ្ងៃទី២៤ ខែតុលា ឆ្នាំ២០២៤នេះ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានី អាណត្តិទី៤ ឆ្នាំ២០២៤ នៅមជ្ឈមណ្ឌលសហប្រតិបត្តិការកម្ពុជា កូរ៉េ ក្នុងសាកលវិទ្យាល័យភូមិន្ទភ្នំពេញ មហាវិថីសហព័ន្ធរុស្ស៊ី សង្កាត់ទឹកល្អក់ទី១ ខណ្ឌទួលគោក ក្រោមវត្តមានលោក ម៉ប់ សារិន ប្រធានក្រុមប្រឹក្សារាជធានីភ្នំពេញ លោក សុខ ពេញវុធ អភិបាលរងរាជធានី តំណាងលោក ឃួង ស្រេង អភិបាលរាជធានីភ្នំពេញ និងលោក ទូច ស៊ុនណារី អនុប្រធានក្រុមការងាររាជរដ្ឋាភិបាលចុះជួយមូលដ្ឋានខណ្ឌទួលគោក។

ក្នុងវេទិកានេះ លោក សុខ ពេញវុធ បានលើកឡើងថា រាល់សំណើ និងសំណូមពរផ្ទាល់មាត់របស់ប្រជាពលរដ្ឋ ក្នុងវេទិកានេះ យើងដោះស្រាយជូនភ្លាមៗ ចំពោះអ្វីដែលយើងដោះស្រាយបាន ហើយចំពោះប្រជាពលរដ្ឋដែលបានស្នើឡើងជាលាយលក្ខណ៍អក្សរ ដាក់ចូលក្នុងប្រអប់សំបុត្រ រដ្ឋបាលរាជធានីភ្នំពេញ នឹងយកមកដោះស្រាយពេលក្រោយ ពោលគឺ អ្វីជាអត្តភាពចាំបាច់ បន្ទាន់ៗ យើងនឹងដោះស្រាយមុនគេ ហើយអ្វីដែលនៅសេសសល់យើងនឹងដាក់ចូលទៅក្នុងគម្រោងកម្មវិធីវិនិយោគ៣ឆ្នាំរំកិល រាជធានី ខណ្ឌ សង្កាត់។

ជាក់ស្តែង នៅក្នុងវេទិកានាព្រឹកនេះ មានពលរដ្ឋ២រូបបានលើកឡើង ជាសំណើរ និងសំណូមពរចំនួន៤បញ្ហា ក្នុងនោះរួមមាន ស្នើសុំស្តារអាងស្តុបទឹក ដែលបានព្រៃ ស្មៅដុះ ស៊ុបទ្រុប នៅតាមបណ្តោយផ្លូវរថភ្លើង ក្នុងសង្កាត់បឹងកក់ទី២ ដែលបង្កអោយលិចលំនៅដ្ឋាន និងបណ្តាលអោយសត្វធាតុចូលក្នុងផ្ទះពួកគាត់។ ប្រជាជននៅសង្កាត់ទឹក៣ ស្នើសុំ ដូរអំពូលភ្លើងចំនួន៧៨អំពូល,ស្នើកុំឱ្យរដ្ឋាករទឹកស្វយ័តក្រុងភ្នំពេញកុំជីកផ្លូវលេខ១៩២ខួចអស់ហើយទុកចោល និងការស្នើសុំការសាងសង់អគារសង្កាត់ ដែលមានលក្ខណៈចាស់ទ្រុឌទ្រោមនៅសង្កាត់ទឹកល្អក់ទី៣ ដែលអាចបង្កគ្រោះថ្នាក់ចំពោះ អ្នកមកបំពេញការងារនៅក្នុងអគារនេះ។

ចំពោះសំណើខាងលើត្រូវបានអាជ្ញាធររាជធានីភ្នំពេញ ធ្វើការដោះស្រាយបំភ្លឺ និងដោះស្រាយភ្លាមៗ។ តែចំពោះការស្នើសាងសង់អគារសង្កាត់ទឹកល្អក់ទី៣ ដែលមានលក្ខណចាស់ទ្រុឌទ្រោមនោះ លោក សុខ ពេញវុធ បានបញ្ជាក់ថា យើងមិនមានកញ្ចប់ថវិកាណាមួយនៃការសាងសង់អគាររដ្ឋបាលទេ។ ប៉ុន្តែទោះបីជាយ៉ាងណាក្តី លោកនឹងយកសំណើទាំងនេះទៅរាយការណ៍ជូនលោក ឃួង ស្រេង អភិបាលរាជធានីភ្នំពេញ ដើម្បីចាត់ការបន្ត។

លោក ម៉ប់ សារិន បានលើកឡើងថា វេទិកាផ្សព្វផ្សាយ និងពិគ្រោះយោបល់នេះធ្វើឡើងក្នុង១ឆ្នាំម្តង ក្នុងត្រីមាសទី៤ ពោលគឺនៅក្នុងខែតុលា ខែវិច្ឆិកា និងខែធ្នូ ហើយសំរាប់ខណ្ឌនីមួយៗត្រូវធ្វើឡើងនៅខែមិថុនា រាល់ឆ្នាំ ហើយឆ្នាំនេះខណ្ឌបានធ្វើរួចរាល់ហើយ។

លោក ម៉ប់ សារិន បានបញ្ជាក់ទៀតថា គោលបំណងរបស់វេទិកានេះ គឺចង់ស្តាប់ពីការចង់បានរបស់ប្រជាពលរដ្ឋ ដើម្បីបានដឹង ហើយដោះស្រាយជូន។ អភិបាលកិច្ចល្អ ដាច់ខាតត្រូវតែមានការចូលរួមពីប្រជាពលរដ្ឋ។ ក្រោយពីក្តាប់បាន បញ្ហាប្រឈម តម្រូវការពីប្រជាពលរដ្ឋហើយ យើងយកបញ្ហាទាំងនោះមកដោះស្រាយ។ នៅក្នុងវេទិកានេះដែរ ក៏មានការផ្តល់ជារបាយការណ៍ដែលបានអនុវត្តកន្លងមក ជូនអ្នកចូលរួមផងដែរ ដើម្បីបានដឹងពីព័ត៌មានពីទិសដៅនៃការអភិវឌ្ឍរាជធានី។ អ្វីដែលជាកង្វល់ ការចង់បានរបស់ប្រជាពលរដ្ឋតាមរយៈការស្នើឡើង យើងដាច់ខាតត្រូវតែដោះស្រាយជូន អ្វីដោះស្រាយបានភ្លាមយើងដោះស្រាយភ្លាម បើដោះស្រាយមិនទាន់បាន យើងនឹងយកបញ្ហាទាំងនោះទៅដាក់បញ្ជូលក្នុងគម្រោងកម្មវិធីវិនិយោគ៣ឆ្នាំរំកិល៕

អត្ថបទ៖ ស្រីរ័ត្ន

The post ពលរដ្ឋស្នើឲ្យរដ្ឋាករទឹកស្វយ័តក្រុងភ្នំពេញកុំឲ្យជីកខូចផ្លូវហើយទុកចោល appeared first on Kampuchea Thmey Daily.

ចំណូលរបស់រដ្ឋាករទឹកស្វយ័តក្រុងភ្នំពេញថយចុះតិចតូចនៅត្រីមាសទី២

May Kunmakara — Thu, 17 Oct 2024 07:01:59 +0000

រដ្ឋាករទឹកស្វយ័តក្រុងភ្នំពេញ (រ.ទ.ស.ភ) ដែលជាក្រុមហ៊ុនបោះផ្សាយមូលបត្រនៅផ្សារមូលបត្រកម្ពុជាទទួលមានចំណូលសរុបចំនួនជិត ៩៣ ពាន់លានរៀលក្នុងត្រីមាសទី២ ឆ្នំា២០២៤ ថយចុះជាងត្រីមាសទី២ ឆ្នំា២០២៣ជិត ៧% ខណៈចំណេញសុទ្ធសរុបចំនួន ជាង២,៤២៥ពាន់លានរៀល ប្រមាណ ៨១,៦៧% បើធៀបនឹងត្រីមាសទី២ ឆ្នំា២០២៣។

យោងតាមរបាយការណ៍ហិរញ្ញវត្ថុរបស់ក្រុមហ៊ុនផ្ញើរទៅកាន់ផ្សារមូលបត្រកម្ពុជាកាលពីពេលថ្មីៗនេះ សម្រាប់រយៈពេល៦ខែ គិតត្រឹមថ្ងៃទី៣០ ខែមិថុនា ឆ្នាំ២០២៤ រ.ទ.ស.ភ មានចំណូលសរុបចំនួនជាង ១៩៩ ពាន់លានរៀល កើនឡើង ៩,១២% និងចំណេញសុទ្ធក្នុងការិយបរិច្ឆេទសរុបចំនួនជាង ៥៤ ពាន់លានរៀល កើនឡើង ៥,៥៧% បើធៀបទៅនឹង រយៈពេល៦ខែ គិតត្រឹមថ្ងៃទី៣០ ខែមិថុនា ឆ្នាំ២០២៣។

នាថ្ងៃទី៣០ ខែមិថុនា ឆ្នំា២០២៤ នេះដែរ ទ្រព្យសកម្មសរុបរបស់ រ.ទ.ស.ភ មានចំនួន ជាង៣ទ្រីលានរៀល កើនឡើង ២,៧០% និងមូលធនសរុបមានចំនួនជាង ១,៤៤៤ទ្រីលានរៀល កើនឡើងចំនួន ៣,៥៨%។

លោក ឯក សុនចាន់ ប្រធានក្រុមប្រឹក្សាភិបាលនៃរ.ទ.ស.ភបានគូសបញ្ជាក់ក្នុងរបាយការណ៍នោះថា ក្នុងត្រីមាសទី២ ឆ្នាំ២០២៤ នេះ រ.ទ.ស.ភ បានដាក់បំពង់មេនាំទឹក និងបណ្តាញចែកចាយទឹកស្អាតសរុប ប្រវែង ១៣២.២០២,៦៣ម៉ែត្រ, ផលិតទឹកស្អាតបាន ៨១.៩៣៧.២៧៦ម និងតបណ្តាញជូនអតិថិជនបានចំនួន ៥.៧០០បណ្តាញ ក្នុងនោះអតិថិជនចំណូលទាបមានចំនួន ៥១០បណ្តាញ ដោយជាលទ្ធផលទទួលបានចំណូលសរុប ចំនួន ៩២.៥៩៨.៧១៨.០០០រៀល, និងចំណេញពិតចំនួន ២.៨២៥.៩២៨.០០០រៀល។ ចំណេញក្នុងមួយភាគហ៊ុន ជាមូលដ្ឋាន (Basic Earmings per Share) គឺ ២៧,៨៩រៀល។

លោកថា៖«រ.ទ.ស.ភ វិនិយោគ កសាង ពង្រីក ដំណើរការ និងជួសជុលថែរក្សាមាព្យាបាយសម្រាប់ផលិត និងប្រព័ន្ធចែកចាយ ទឹកស្អាត និងអនាម័យ, ប្រើប្រាស់នូវគ្រប់វិធានការដើម្បីបង្កើនផលិតកម្ម-សេវាកម្ម និងធានាគុណភាពទឹកស្អាត ដើម្បីឆ្លើយតប ទៅនឹងតម្រូវការសម្រាប់ជីវភាពរស់នៅ អាជីវកម្ម សេវាកម្ម និងឧស្សាហកម្ម, ធ្វើអាជីវកម្ម សេវាកម្ម និងការងារផ្សេងៗទៀត ដែលទាក់ទងនឹងវិស័យទឹកស្អាត និងអនាម័យនៅក្នុងឬក្រៅប្រទេស តាមការសម្រេចរបស់ក្រុមប្រឹក្សាភិបាល និងដោយអនុលោមតាមច្បាប់»។

លោកថា សម្រាប់ត្រីមាសទី៣ ឆ្នាំ២០២៤ រ.ទ.ស.ភ គ្រោងផលិតទឹកស្អាត ៧០ ៩៥៤ ២០០ម” ជាមួយនឹងការពង្រីក បណ្តាញចែកបាយទឹកបន្ថែម ១២៦.០២០ម៉ែត្រ, គ្រោងចំណូលសរុបចំនួនជិត ១១៥ ពាន់លានរៀល និង ចំណាយសរុបចំនួនជាង ៧០ ពាន់លានរៀល៕

The post ចំណូលរបស់រដ្ឋាករទឹកស្វយ័តក្រុងភ្នំពេញថយចុះតិចតូចនៅត្រីមាសទី២ appeared first on Kampuchea Thmey Daily.

រដ្ឋាករទឹកស្វយ័តរាជធានីភ្នំពេញ Archives - Kampuchea Thmey Daily

កម្ពុជាបើកការតភ្ជាប់បំពង់មេនាំទឹកឆៅដោយពុំផ្ដាច់ការផ្គត់ផ្គង់​ទឹក លើកទី១ ក្នុងប្រវត្តិសាស្រ្ត

តម្រូវការប្រើប្រាស់ទឹកស្អាតនៅកម្ពុជា កើនឡើងខ្ពស់

ពលរដ្ឋស្នើឲ្យរដ្ឋាករទឹកស្វយ័តក្រុងភ្នំពេញកុំឲ្យជីក​ខូចផ្លូវហើយទុកចោល

ចំណូលរបស់រដ្ឋាករទឹកស្វយ័តក្រុងភ្នំពេញថយចុះតិចតូចនៅត្រីមាសទី២

កម្ពុជាបើកការតភ្ជាប់បំពង់មេនាំទឹកឆៅដោយពុំផ្ដាច់ការផ្គត់ផ្គង់ទឹក លើកទី១ ក្នុងប្រវត្តិសាស្រ្ត

ពលរដ្ឋស្នើឲ្យរដ្ឋាករទឹកស្វយ័តក្រុងភ្នំពេញកុំឲ្យជីកខូចផ្លូវហើយទុកចោល