ព័ត៌មានជាតិ

ពលរដ្ឋភូមិប្រការ ជាង ៥០ គ្រួសារ សាទរយ៉ាងខ្លាំង ខណៈរដ្ឋាករស្វយ័ត ចុះតបណ្ដាញទឹកស្អាតជូន ក្រោយគ្មានទឹកប្រើប្រាស់យូរឆ្នាំ

បានផុស

៥០ នាទីutes មុន

នៅ

ថ្ងៃពុធ ៧ ឧសភា ២០២៥

ដោយ

ប្រជាពលរដ្ឋរស់នៅភូមិប្រការ សាទរយ៉ាងខ្លាំង ខណៈដែលអាជ្ញាធរបានយកចិត្តទុកដាក់ជំរុញឲ្យខាងរដ្ឋាករស្វយ័តមកភ្ជាប់បណ្ដាញទឹកស្អាតជូនពួកគាត់ ក្រោយគ្មានទឹកស្អាតប្រើប្រាស់យូរឆ្នាំមកហើយ ដោយត្រូវចំណាយប្រាក់ជាច្រើនសម្រាប់ទិញទឹកប្រើប្រាស់ជាប្រចាំថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងប្រជាពលរដ្ឋរស់នៅក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ មានជាង ៥០ គ្រួសារ បានសាទរយ៉ាងខ្លាំងចំពោះការខិតខំប្រឹងប្រែងរបស់អាជ្ញាធរសង្កាត់ដែលបានយកចិត្តទុកដាក់ពីទុក្ខលំបាកពលរដ្ឋក្នុងមូលដ្ឋាន។

បើតាមមន្ត្រីរដ្ឋាករទឹក បានបញ្ជាក់ថា រដ្ឋាករទឹក បានជីកបង្កប់ទុយោ តមេ ភ្ជាប់បណ្ដាញទឹកស្អាតចូលតាមផ្ទះប្រជាពលរដ្ឋមានប្រវែងជាង ១៨០ ម៉ែត្រ និងធ្វើការបំបែកចូលតាមផ្ទះពលរដ្ឋ ដើម្បីប្រើប្រាស់។

គួររំលឹកផងដែរថា កន្លងមក កម្ពុជាថ្មី ធ្លាប់បានសម្ភាសន៍ជាមួយ លោក មាន មឿន និង អ្នកស្រី វ៉ា ហៀប ដែលជាប្រជាពលរដ្ឋរស់នៅក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ដោយពួកគាត់បានរៀបរាប់ពីទុក្ខលំបាកប្រចាំថ្ងៃ ត្រូវទិញទឹកប្រើប្រាស់ប្រចាំថ្ងៃ ខ្លះទៀតជីកអណ្ដូងប្រើប្រាស់ផ្ទាល់ខ្លួន។ ពួកគាត់ចំណាយថវិកាច្រើនសម្រាប់ទិញទឹកស្អាតក្នុង ០១ ឡាន មានចំណុះប្រហែល ០៣ គូប តម្លៃ ៤ ម៉ឺនរៀល ទៅ ៥ ម៉ឺនរៀល។

ជាមួយគ្នានេះ លោក សួង សំអុល ចៅសង្កាត់ព្រៃស ក៏បានបញ្ជាក់ប្រាប់ កម្ពុជាថ្មី ដែរថា អាជ្ញាធរបានខិតខំយកចិត្តទុកដាក់ជំរុញការតបណ្ដាញទឹកជាច្រើនលើកមកហើយ ទើបតែពេលនេះរដ្ឋាករស្វយ័តរាជធានីភ្នំពេញ បានសហការជាមួយអាជ្ញាធរមូលដ្ឋាន ចុះជួបប្រជាពលរដ្ឋ និងធ្វើការសន្យា តបណ្ដាញទឹកស្អាតជូនពលរដ្ឋឲ្យបានប្រើប្រាស់ក្នុងពេលឆាប់ៗ ខាងមុខ៕

អត្ថបទ ៖ ម៉េង