វាគ្មិនទាំងពីរ បានលើកឡើងបែបនេះ នៅក្នុងកិច្ចពិភាក្សាតុមូល ស្តីពី តើអ្វីដែលជាសេណារីយ៉ូធ្វើឱ្យពិភពលោកបាត់បង់សណ្តាប់ធ្នាប់នាពេលបច្ចុប្បន្ន? នាព្រឹកថ្ងៃទី១៧ កក្កដា ឆ្នាំ២០២៦។ ក្នុងវេទិកាពិភាក្សានេះ បណ្ឌិត សុខ ទូច បានលើកឡើងថា កម្ពុជាមិនគួរចាត់ទុកការឈ្លានពានរបស់ថៃជារឿងថ្មីនោះទេ ព្រោះប្រវត្តិសាស្ត្របានបង្ហាញថា សកម្មភាពបែបនេះកើតមានតាំងពីសម័យមុនៗមក។ លោកបានរំឮកថា នៅពេលកម្ពុជាបង្ហាញភាពស្មោះត្រង់ និងជួយថៃក្នុងសង្គ្រាមជាមួយភូមា ថៃបានឆ្លៀតឱកាសវាយប្រហារកម្ពុជានៅពេលដែលឃើញកម្ពុជាចុះខ្សោយ។

លោកក៏បានលើកយកប្រវត្តិសាស្ត្រនៃសន្ធិសញ្ញារវាងបារាំង និងសៀម ឆ្នាំ១៩០៤ មកធ្វើជាឧទាហរណ៍ ដោយបញ្ជាក់ថា ព្រះបាទជូឡាលង្ករណ៍ ដែលជាព្រះមហាក្សត្រថៃត្រូវបានប្រជាជនថៃគោរពយ៉ាងខ្លាំង គឺជាអ្នកចុះហត្ថលេខាលើសន្ធិសញ្ញានោះ។ លោកចោទជាសំណួរថា ហេតុអ្វីបានជាភាគីថៃសព្វថ្ងៃព្យាយាមបដិសេធ ឬមិនទទួលស្គាល់ឯកសារប្រវត្តិសាស្ត្រដែលបុព្វបុរសរបស់ខ្លួនបានទទួលស្គាល់រួចហើយ។

ក្នុងន័យនេះ បណ្ឌិត សុខ ទូច ពន្យល់ជាលក្ខណៈប្រវត្តិសាស្រ្តថា ប្រទេសថៃតែងតែកែសម្រួលយុទ្ធសាស្ត្រទៅតាមការប្រែប្រួលនៃស្ថានការណ៍អន្តរជាតិ ដូចជាការចាប់ដៃជាមួយអង់គ្លេសនៅពេលអង់គ្លេសមានឥទ្ធិពល ជាមួយបារាំងនៅពេលបារាំងមានអំណាច និងជាមួយជប៉ុននៅពេលជប៉ុនក្លាយជាមហាអំណាច ដើម្បីសម្រេចផលប្រយោជន៍របស់ខ្លួន រួមទាំងការពង្រីកឥទ្ធិពលលើកម្ពុជាផងដែរ។ ដូច្នេះ លោកអំពាវនាវឱ្យកូនខ្មែរទាំងអស់សិក្សាពីប្រវត្តិសាស្ត្រ និងពង្រឹងសមត្ថភាពខ្លួនឱ្យកាន់តែរឹងមាំ។

ជាមួយគ្នានេះ ប្រធានក្លិបអ្នកកាសែតកម្ពុជា លោក ពុយ គា មានប្រសាសន៍ថា សណ្តាប់ធ្នាប់ពិភពលោកបច្ចុប្បន្ន កុំពុងមានការប្រែប្រួលហើយ ពោលប្រទេសធំៗ និងមានអំណាច ធ្វើបាប ឈ្លានប្រទេសតូច និងទន់ខ្សោយជាងខ្លួន។
លោករំលេចថា ក្នុងបរិបទនេះ ថៃកំពុងយកគំរូតាមប្រទេសមហាអំណាច គាបសង្កត់ប្រទេសតូច ប្រើគ្រប់វិធីសាស្រ្តទាំងសព្វាវុធ និងសង្គ្រាមព័ត៌មាន ធ្វើសកម្មភាពដើម្បីឈ្លានពានដែនអធិបតេយ្យកម្ពុជា។

លោកថ្លែងថា៖«ជាក់ស្តែង ជម្លោះព្រំដែនកម្ពុជានិងថៃ ថៃបានប្រើគ្រប់មធ្យោបាយទាំងអស់ ទាំងសង្គ្រាមប្រដាប់អាវុធ យន្តហោះ ដ្រូន ហើយសង្គ្រាមព័ត៌មានមកជាមួយគ្នា។ នេះហើយដែលប្រទេសនីមួយៗ ក្នុងពិភពលោកកំពុងតែប្រឹងប្រែងប្រើប្រាស់»។

ជាមួយគ្នានេះ លោក ពុយ គា បង្ហាញប្រតិកម្មចំពោះសកម្មភាពរដ្ឋមន្ត្រីការបរទេសថៃដែលបានបើកកិច្ចពិភាក្សាក្រៅផ្លូវការជាមួយរដ្ឋមន្ត្រីការបរទេសអាស៊ាន ដើម្បីបង្ហាញថា ខ្លួនស្អាតស្អំ ជួយរកសន្តិភាពឱ្យមីយ៉ាន់ម៉ា ខណៈខ្លួនឯងកំពុងឈ្លានពានកម្ពុជា៕

The post បណ្ឌិត សុខ ទូច ថាថៃឈ្លានពានកម្ពុជា មិនមែនជារឿងថ្មី ខណៈលោក ពុយ គា បន្ទរ ថៃកំពុងយកគំរូតាមប្រទេសមហាអំណាចគាបសង្កត់កម្ពុជា appeared first on Kampuchea Thmey Daily.

ក្នុងវគ្គផ្តាច់ព្រ័ត្រ នៃការប្រកួតវោហារសព្ទជាក្រុមដែលបានរៀបចំឡើងនៅថ្ងៃទី២៦ ខែមិថុនា ឆ្នាំ២០២៦ នៅរាជបណ្ឌិត្យសភាកម្ពុជា បេក្ខជនចំនួន៤ក្រុមបានឡើងបង្ហាញសមត្ថភាព ដើម្បីទទួលបានប្រសិទ្ធនាមជាជ័យលាភី នៃការប្រកួតវោហារសព្ទជាក្រុមនៅចំពោះមុខគណៈកម្មការផ្តល់ពិន្ទុ និងអ្នកចូលរួមសរុបប្រមាណ៣០០នាក់។

យុវជនឆ្នើមទាំងបីរូប ដែលទទួលបានជ័យលាភីលេខ១ ក្នុងការប្រកួតវោហារសព្ទជាក្រុម បានបង្ហាញពីក្តីព្រួយបារម្ភយ៉ាងខ្លាំងអំពីការផ្សាយពាណិជ្ជកម្មគ្រឿងស្រវឹងដែលប៉ះពាល់យ៉ាងធ្ងន់ធ្ងរដល់មូលធនមនុស្សកម្ពុជា ដោយលើកឡើងបែបនេះថា «ក្នុងខណៈពេលដែលសាលារៀនកំពុងប្រឹងប្រែងបណ្តុះបណ្តាលចំណេះដឹង មន្ទីរពិសោធន៍កំពុងស្វែងរកនវានុវត្តន៍ ប៉ុន្តែនៅខាងក្រៅរបងសាលា និងនៅលើអេក្រង់ទូរស័ព្ទ សំឡេងអប់រំទាំងនោះបែរជាត្រូវសម្រែកនៃការជល់កែវ និងយុទ្ធសាស្ត្រទីផ្សារផ្សាយពាណិជ្ជកម្មគ្រឿងស្រវឹង លេបត្របាក់ស្ទើរតែទាំងស្រុង។

នៅពេលកុមារ និងយុវជនទទួលរងឥទ្ធិពលការផ្សាយពាណិជ្ជកម្ម ហើយឈានជើងចូលក្នុងវដ្តនៃការសេពគ្រឿងស្រវឹង វាមិនត្រឹមតែទៅបំផ្លាញកោសិកាខួរក្បាល បញ្ញាស្មារតី និង សមត្ថភាពសិក្សារបស់ពួកគេទាំង វ័យក្មេងប៉ុណ្ណោះទេ ប៉ុន្តែវាក៏បានលួចប្លន់យកសុខភាព ផលិតភាពការងារ និង កាត់ផ្តាច់ឱកាសក្នុងការអភិ វឌ្ឍខ្លួនទៅថ្ងៃអនាគតហើយពួកគេនឹងប្រែក្លាយពី “សសរទ្រូងជាតិដ៏រឹងមាំ” ទៅជា “បន្ទុកសង្គមដ៏ធ្ងន់ធ្ងរ” វិញ»។

ចំណែកជ័យលាភីលេខ២ ដែលបានមើលឃើញពីយុទ្ធសាស្ត្រពង្វក់យុវជន និងកុមារឱ្យសេពគ្រឿង ដែលកំពុងកើតមាននាពេលបច្ចុប្បន្ន «បច្ចុប្បន្ន ការផ្សាយពាណិជ្ជកម្មគ្រឿងស្រវឹងកំពុងវាយលុកយ៉ាងគំហុក និងគ្មានដែនកំណត់ លើបណ្តាញសង្គម ដូចជា Facebook, TikTok និង YouTube ទាំងលើកញ្ចក់ទូរទស្សន៍ ប៉ាណូតាមដងផ្លូវ សម្ភារៈប្រើប្រាស់ និងព្រឹត្តិការណ៍តន្ត្រី-កីឡានានា។ អ្វីដែលគួរឱ្យព្រួយបារម្ភបំផុត គឺយុទ្ធសាស្ត្រពង្វក់ស្មារតីតាមរយៈការផ្តល់រង្វាន់មហាសាល ដូចជាឡាន ម៉ូតូ មាសប្រាក់ ខុនដូរ ប្រាក់ខែ ដំណើរកំសាន្ត និងរង្វាន់ស្ទើរគ្រប់ក្រវិលកំប៉ុង ដែលទាក់ទាញឱ្យអ្នកប្រើប្រាស់ចង់ទិញព្រោះតែគិតថា “ចំណេញ”។

លើសពីនេះ ក្រុមហ៊ុនបានជួលតារាល្បីៗ និងអ្នកបង្កើតមាតិកា មកផ្សព្វផ្សាយ រួមផ្សំការវេចខ្ចប់យ៉ាងទាក់ ទាញ និងរសជាតិប្លែកៗ ធ្វើឱ្យកុមារនិងយុវជនចង់ដឹងចង់សាក ហើយយល់ច្រឡំថា ការសេពគ្រឿងស្រវឹងជាសញ្ញានៃភាពស៊ីវិល័យ ទាន់សម័យ និងជាការកម្សាន្តអារម្មណ៍»។

ជ័យលាភីលេខ៣ នៃការប្រកួត យល់ឃើញអំពីបទដ្ឋានគតិយុត្តពាក់ព័ន្ធការផ្សាយពាណិជ្ជកម្មគ្រឿងស្រវឹង ដែលកំពុងអនុវត្តបច្ចុប្បន្ន «ប្រកាសលេខ ០៨៤ ប្រក.ពម ស្តីពីការកំណត់អំពីបែបបទ នីតិវិធី និងវិធានក្នុងការគ្រប់គ្រងការផ្សាយពាណិជ្ជកម្មផលិតផលគ្រឿងស្រវឹង តែឯងពិតជាពុំអាចការពារកុមារនិងយុវជនពីឥទ្ធិពលនៃការផ្សាយពាណិជ្ជកម្មបានទេ ហើយការអនុវត្តប្រកាសនេះក៏នៅពុំទាន់មានប្រសិទ្ធភាពគ្រប់គ្រាន់នៅឡើយដែរ»។

យ៉ាងណាមិញ យុវជនភាគច្រើនដែលបានចូលរួមប្រកួត បានសំណូមពរដល់រដ្ឋាភិបាលឱ្យហាមឃាត់ការផ្សាយពាណិជ្ជកម្មគ្រឿងស្រវឹង ដើម្បីការពារមូលធនមនុស្សរបស់កម្ពុជា។

ក្នុងស្ថានភាពបច្ចុប្បន្នដែលកម្ពុជាពុំទាន់ហាមឃាត់ការផ្សាយពាណិជ្ជកម្មទាំងស្រុងបាន រដ្ឋាភិបាលគួរហាមឃាត់ដាច់ខាត នូវការផ្សាយពាណិជ្ជគ្រឿងស្រវឹងក្នុងបណ្តាញព័ត៌មានសង្គម ព្រមទាំងហាមឃាត់មិនឱ្យមានវត្តមានតារា ឬបុគ្គលមានឥទ្ធិពល ចូលរួមផ្សព្វផ្សាយគ្រឿងស្រវឹងជាដាច់ខាត។ ទន្ទឹមនឹងនេះ ការផ្សាយពាណិជ្ជកម្មគ្រឿងស្រវឹង គួរមានត្រឹមតែ “ម៉ាក និងឡូហ្គោ” ផលិតផលតែប៉ុណ្ណោះ។

ជាការឆ្លើយតប លោក ម៉ែន សាម៉ន អនុរដ្ឋលេខាធិការក្រសួងព័ត៌មាន និងជាសមាជិកក្រុមការងារត្រួតពិនិត្យការផ្សាយពាណិជ្ជកម្មគ្រឿងស្រវឹង បានមានប្រសាសន៍សង្កត់ធ្ងន់ថា «ការប្រកួតវោហារសព្ទនេះ មានសារសំខាន់ណាស់ ព្រោះជាវេទិកាមួយដែលយើងបានស្តាប់ឮសំឡេងរបស់យុវជនព្រួយបារម្ភអំពីការផ្សាយពាណិជ្ជកម្មគ្រឿងស្រវឹង និងយកធាតុចូលរបស់ក្មួយៗទៅពិចារណាសម្រាប់ការចាត់វិធានការបន្តទៀត»។

លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានមានប្រសាសន៍ថា «ប្រទេសខ្លាំង ត្រូវមានប្រជាពលរដ្ឋខ្លាំង ដើម្បីអភិវឌ្ឍប្រជាពលរដ្ឋ ត្រូវដកគ្រឿងស្រវឹងចេញពីខួរក្បាលមនុស្ស ដូច្នេះខ្ញុំសូមឱ្យមានច្បាប់គ្រប់គ្រងគ្រឿងស្រវឹង»ចាប់ពីពេលនេះតទៅផងដែរ៕

The post អ្នកជំនាញរួមទាំងយុវជនស្នើសុំរដ្ឋាភិបាលហាមឃាត់ការផ្សាយពាណិជ្ជកម្មគ្រឿងស្រវឹង ដើម្បីការពារមូលធនមនុស្សរបស់កម្ពុជា appeared first on Kampuchea Thmey Daily.

លោកបណ្ឌិត បានលើកឡើងថា តាមរយៈអនុស្សរណៈនៃការយោគយល់គ្នានេះ ភាគីទាំងពីរបានព្រមព្រៀងគ្នាលើ ៨ចំណុច។ ចំណុចទី១. ការផ្លាស់ប្តូរឯកសារបោះពុម្ពផ្សាយសិក្សា និងសម្ភារៈស្រាវជ្រាវ, ទី២. ការផ្លាស់ប្តូរអ្នកជំនាញវិទ្យាសាស្ត្ររវាងគ្នា, ទី៣. ការផ្លាស់ប្តូរគ្រូបង្រៀនពីស្ថាប័នទាំងពីរសម្រាប់ការបណ្តុះបណ្តាលភាសា, ទី៤. កិច្ចសហប្រតិបត្តិការលើវិស័យកសិកម្ម, ទី៥. ការផ្លាស់ប្តូរទស្សនកិច្ចរបស់អ្នកសិក្សាស្រាវជ្រាវ អ្នកស្រាវជ្រាវថ្នាក់បណ្ឌិត និងគណៈប្រតិភូ សម្រាប់ការសិក្សាស្រាវជ្រាវ និងទស្សនកិច្ចសិក្សា។ ចំណុចទី៦. សំណើគម្រោងស្រាវជ្រាវរួម និងអនុវត្តគម្រោងស្រាវជ្រាវរួម, ទី៧. ស្វែងរកដៃគូសហប្រតិបត្តិការ ដើម្បីជួយគ្នាទៅវិញទៅមក និងទី៨ គឺការរៀបចំសិក្ខាសាលា និងសន្និសីទរួមគ្នា។

ជាមួយគ្នានេះ បណ្ឌិត សុខ ទូច បានបញ្ជាក់ទៀតថា កម្ពុជា ត្រូវតែមានធនធានមនុស្សគ្រប់ភាសា។ សម្រាប់រាជបណ្ឌិត្យសភា នឹងផ្ដោតជាសំខាន់លើកិច្ចសហប្រតិបត្តិការបណ្ដុះបណ្ដាលភាសាអេស្ប៉ាញ ដើម្បីទាក់ទាញទេសចរពីបណ្ដាប្រទេសអាម៉េរិកឡាទីន។ ត្រង់ចំណុចនេះ លោកអះអាងថា៖ «យើងមិនត្រូវធ្វើជាឧបករណ៍គេនោះទេ ត្រូវធ្វើជាម្ចាស់លើវិស័យទេសចរណ៍»៕

The post រាជបណ្ឌិត្យសភាកម្ពុជា ចុះMOU ជាមួយស្ថានទូតគុយបាដើម្បីពង្រឹងកិច្ចសហការវិស័យអប់រំ និងការស្រាវជ្រាវរួមគ្នា appeared first on Kampuchea Thmey Daily.

វេទិកាទំនាក់ទំនងអន្តរជាតិឆ្នាំនេះ ត្រូវរៀបចំឡើងក្រោមប្រធានបទ«គោលនយោបាយការបរទេសរបស់រដ្ឋតូច៖ ការទូតសន្តិភាព និងការទូតបង្ការ»។ វេទិកានេះ នឹងមានការចូលរួមពីសំណាក់អ្នកការទូត បញ្ញវន្ត អ្នកសិក្សាស្រាវជ្រាវ អ្នកបង្កើតគោលនយោបាយ សាស្ត្រាចារ្យ និងនិស្សិត ប្រមាណជាង១៥០នាក់ ដើម្បីស្វែងរកវិធីសាស្រ្តជាយុទ្ធសាស្ត្រសម្រាប់រដ្ឋតូចៗក្នុងការកំណត់មាគ៌ាត្រូវដើរក្នុងយុគសម័យនៃការប្រកួតប្រជែងភូមិសាស្ត្រនយោបាយដែលកាន់តែខ្លាំងក្លាឡើង និងភាពមិនប្រាកដប្រជាជាសកល។

វេទិកានេះ នឹងបើកដោយសុន្ទរកថាគន្លឹះដោយលោក បណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បន្ទាប់មកមានការពិភាក្សាកម្រិតខ្ពស់ដែលមានការចូលរួមជាវាគ្មិន រួមមាន  លោកសាស្រ្តាចារ្យបណ្ឌិត ប៊ុលឡាត អាគ្មេតខារីម៉ូហ្វ (Bulat AKHMETKARIMOV) សាកលវិទ្យាធិការនៃសាកលវិទ្យាល័យអន្តរជាតិប៉ារ៉ាហ្កន លោក ធន ឆាយពិសិដ្ឋ ប្រធាននាយកដ្ឋានស្តីទីនាយកដ្ឋានច្បាប់អន្តរជាតិ និងការទូតនៃវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បណ្ឌិត ប៉ូ សុវីនដា គ្រូឧទ្ទេសន៍ជាន់ខ្ពស់នៃវិទ្យាស្ថានសិក្សាអន្តរជាតិ និងគោលនយោបាយសាធារណៈនៃសាកលវិទ្យាល័យភូមិន្ទភ្នំពេញ និងលោកលោក ហ៊ីម រដ្ឋា អនុប្រធានមជ្ឈមណ្ឌលខ្មែសម្រាប់រសិក្សាកិច្ចការតំបន់។

លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា បានមានប្រសាសន៍ថា នៅក្នុងពិភពលោកដែលនយោបាយមហាអំណាចតែងតែគ្របដណ្ដប់ វេទិកានេះបង្ហាញពីសមត្ថភាព ការសម្របខ្លួន និងភាពប៉ិនប្រសប់នៃរដ្ឋតូចៗ។ លោកថា៖ «គោលបំណងរបស់យើង គឺចង់ប្រែក្លាយការយល់ដឹងបែបទ្រឹស្តី ទៅជាយុទ្ធសាស្ត្រដែលអាចធ្វើសកម្មភាពបានដើម្បីឱ្យរដ្ឋតូចៗ ដូចជាកម្ពុជា អាចធានាមិនត្រឹមតែការរស់រានមានជីវិតប៉ុណ្ណោះទេ ប៉ុន្តែ ថែមទាំងដើម្បីរក្សាបាននូវវិបុលភាព និងភាពពាក់ព័ន្ធរបស់ខ្លួនក្នុងកម្រិតសាកលផងដែរ»។

វេទិកាទំនាក់ទំនងអន្តរជាតិលើកទី៤នេះ មានគោលបំណងបង្កើតលទ្ធផលដែលទាក់ទងទៅនឹងគោលនយោបាយ និងមានមូលដ្ឋានគរុសភា។ កិច្ចពិភាក្សានឹងបង្កើតនូវអនុសាសន៍ដែលអាចអនុវត្តបានសម្រាប់អ្នកធ្វើគោលនយោបាយបរទេស ដោយសង្កត់ធ្ងន់លើស្ថាប័ននិយកម្មការទូតបង្ការ និងការប្រើប្រាស់ជាយុទ្ធសាស្ត្រនូវវេទិកាពហុភាគីដើម្បីការពារអធិបតេយ្យភាពជាតិ។ អ្នកចូលរួមក៏នឹងស្វែងយល់ពីរបៀបដែលរដ្ឋតូចៗអាចប្រែក្លាយភាពងាយរងគ្រោះទៅជាភាពខ្លាំងដោយការជំរុញ«ការទូតជ្រុងពិសេស» (Niche diplomacy) នៅក្នុងតំបន់ ដូចជា ការថែរក្សាសន្តិភាព អភិបាលកិច្ចឌីជីថល និងការអភិវឌ្ឍប្រកបដោយចីរភាព។ វេទិកានេះ នឹងពង្រឹងបណ្តាញសម្រាប់កិច្ចសហការនាពេលអនាគត និងជំរុញគំនិតផ្តួចផ្តើមស្រាវជ្រាវរួមគ្នាក្នុងចំណោមភាគីពាក់ព័ន្ធជាតិ និងអន្តរជាតិ។

លទ្ធផលនៃកិច្ចពិភាក្សា នឹងត្រូវបានចងក្រងជារបាយការណ៍វិភាគ និងករណីសិក្សា រួមចំណែកដល់ការសិក្សាស្រាវជ្រាវសហសម័យ ស្តីពី ការទូតរដ្ឋតូច និងផ្តល់នូវក្របខ័ណ្ឌជាក់ស្តែងសម្រាប់អ្នកធ្វើគោលនយោបាយ។ វេទិកាទំនាក់ទំនងអន្តរជាតិលើកទី៤នេះ បញ្ជាក់ជាថ្មីនូវការប្តេជ្ញាចិត្តរួមរបស់វិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា និងមូលនិធិខុនរ៉ាដ អាដិណៅអ៊ែរ ក្នុងការជំរុញកិច្ចសន្ទនាសំខាន់ៗលើបញ្ហាសកលនិងតំបន់ ខណៈរក្សាជំហរប្រទេសកម្ពុជាជាសំឡេងមួយដែលសកម្មនិងប្រកបដោយលក្ខណៈស្ថាបនា ក្នុងការលើកកម្ពស់សន្តិភាព សន្តិសុខ និងស្ថិរភាព៕

The post ស្អែកនេះ រាជបណ្ឌិត្យសភាកម្ពុជានឹងបើកវេទិកាជជែកពីយុទ្ធសាស្រ្តរបស់រដ្ឋតូចៗដែលត្រូវដើរក្នុងយុគសម័យបច្ចុប្បន្ន appeared first on Kampuchea Thmey Daily.

ថ្លែងនៅព្រឹកថ្ងៃទី៨ ខែតុលា បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា បានលើកឡើងថា ក្រោមប្រធានបទឆ្នាំ២០២៥នេះ មិនត្រឹមតែជាលំហាត់បែបគរុសភាប៉ុណ្ណោះទេ ប៉ុន្តែ គឺជាតថភាពមួយដែលត្រូវប្រឈមមុខផងដែរ។ វេទិកានេះ មានគោលបំណងឆ្លើយតប និងបកស្រាយសំណួរដ៏សំខាន់តាមរយៈការឆ្លុះបញ្ចាំងលើទិដ្ឋភាពសំខាន់៣។

ទី១ ពិនិត្យមើលជម្លោះយុទ្ធសាស្ត្រភូមិសាស្ត្រ និងវាយតម្លៃពីបច្ច័យប៉ះពាល់នៃការផ្លាស់ប្តូរគោលនយោបាយរបស់មហាអំណាចចំពោះស្វ័យភាពអាស៊ាន និងជវភាពសន្និសុខតំបន់។ ទី២ ស្វែងយល់ពីកាលានុវត្តភាព និងបញ្ហាប្រឈមដែលកើតចេញពីទម្រង់ថ្មីនៃកិច្ចសហប្រតិបត្តិការត្បូង-ត្បូង រួមមាន ក្របខ័ណ្ឌ  BRICS គំនិតផ្តួចផ្តើមខ្សែក្រវ៉ាត់ និងផ្លូវធនាគារអភិវឌ្ឍន៍ហេដ្ឋារចនាសម្ព័ន្ធអាស៊ី កិច្ចសហប្រតិបត្តិការមេគង្គ-ឡានឆាង សម្រាប់សមាហរណកម្ម និងគោលដៅអភិវឌ្ឍន៍ផ្ទាល់ខ្លួនរបស់អាស៊ាន។ ទី៣ គឺពិចារណាពីរបៀបការពារស្ថិរភាពនយោបាយ និងអធិបតេយ្យរបស់កម្ពុជាប្រឆាំងនឹងទម្រង់នៃឥទ្ធិពលខាងក្រៅ ដោយធានានូវភាពស្អិតរមួតផ្ទៃក្នុង និងភាពធន់។

តាមរយៈគោលបំណងទាំង៣ ខាងលើ លោកបណ្ឌិត គិន ភា ថា៖ “ខ្ញុំសង្ឃឹមថា វេទិកានេះ នឹងរួមចំណែកដល់ការកំណត់របៀបវារៈអាស៊ានដែលមានតុល្យភាព និងសម្លឹងឆ្ពោះទៅមុខ ដែលមិនត្រឹមតែពង្រឹងភាពធន់របស់យើងប៉ុណ្ណោះទេ ប៉ុន្តែថែមទាំងអាចឱ្យយើងដើរតួនាទីប្រកបដោយបុរេសកម្មបន្ថែមទៀត នៅក្នុងអភិបាលកិច្ចតំបន់ និងពិភពលោក”។

លោកបានបញ្ជាក់ថា វេទិកាភ្នំពេញ បានបង្កើតឡើងតាំងពីឆ្នាំ២០២២ ដោយវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា ដើម្បីផ្តល់នូវលំហពហុទិស និងប្រកបដោយបរិយាបន្ន សម្រាប់ការជជែកដេញដោល និងចូលរួមគោលនយោបាយ។ វេទិកានេះ បានដើរតួនាទីជាស្ពានទំនាក់ទំនងរវាងអ្នកប្រាជ្ញ អ្នកបង្កើតគោលនយោបាយ និងអ្នកអនុវត្ត ដោយបង្កើត វេទិកានៃគំនិត មានទស្សនវិស័យផ្សេងៗគ្នាជួបប្រសព្វគ្នា ដើម្បីដោះស្រាយបញ្ហាប្រឈមក្នុងតំបន់ និងសកលលោក។ បន្ថែមពីនេះ វេទិកានេះក៏ជំរុញដល់ការពិភាក្សាស្មោះត្រង់ លើកទឹកចិត្តនវានុវត្តគោលនយោបាយ និងការលើកកម្ពស់វិធីសាស្ត្របែបសហការក្នុងទំនាក់ទំនងការទូតផងដែរ។

បណ្ឌិត គិន ភា បន្ថែមទៀតថា៖ “ខ្ញុំមានជំនឿចិត្តយ៉ាងមុតមាំថា វេទិកាភ្នំពេញនឹងបង្ហាញឱ្យឃើញជាថ្មីម្តងទៀតនូវអំណាចនៃការពិចារណារួមគ្នា និងអំណាចនៃការផ្លាស់ប្តូរយោបល់គ្នាទៅវិញទៅមក។ សូមឱ្យការពិភាក្សានៅថ្ងៃនេះ ជំរុញឱ្យមានអនុសាសន៍គោលនយោបាយជាក់ស្តែង ការយល់ដឹងថ្មីៗ និងបណ្តាញនៃការជឿទុកចិត្តគ្នាដ៏យូរអង្វែង ដែលនឹងរួមចំណែកដល់ឯកភាពរបស់អាស៊ាន សន្តិភាព និងស្ថិរភាពនៅក្នុងតំបន់ដ៏ធំទូលាយរបស់យើង”៕

The post បណ្ឌិត គិន ភា សង្ឃឹមថា វេទិកាភ្នំពេញលើកទី៤ នឹងរួមចំណែកដល់ការកំណត់របៀបវារៈអាស៊ានដែលមានតុល្យភាព និងសម្លឹងទៅមុខ appeared first on Kampuchea Thmey Daily.

បើតាមសេចក្តីប្រកាស លក្ខខណ្ឌនៃការជ្រើសរើសសម្រាប់អាហារូបករណ៍នេះ មិនកំណត់អាយុអ្នកសិក្សាឡើយ ពោល គឺសម្រាប់អ្នកចូលចិត្តកុំព្យូទ័រ និងចេះភាសាចិត្តបន្តិចបន្តួច ឬចេះចាប់ពី HSK3 ឡើងទៅ។ ចំពោះកម្មវិធីសិក្សាភាសាចិន គឺសិក្សាជាមួយគ្រូជនជាតិចិនផ្ទាល់តែម្តង។ បើនិយាយពីការសិក្សាវិញ គឺសិក្សាពីពាក្យដែលពាក់ព័ន្ធនឹងកុំព្យូទ័រ និងកម្មវិធីកុំព្យូទ័រ សម្រាប់ការធ្វើប្រតិបត្តិការទូទៅនៅការិយាល័យ ឬសហគ្រាស។ បន្ថែមពីនេះ ក៏សិក្សាពីការគ្រប់គ្រង និងប្រើប្រាស់ទិន្នន័យ Database តាមរយៈរូបមន្ត T-SQL ផងដែរ។  

ចំពោះពេលវេលាសិក្សា ត្រូវបែងចែកដូចជា សម្រាប់ការសិក្សាថ្ងៃចន្ទ ដល់ថ្ងៃសុក្រ ចាប់ផ្តើមពីម៉ោង ៥៖៣០ ដល់ ៧៖០០នាទីល្ងាច និងចូលរៀនចាប់ពីថ្ងៃទី១៥ ខែកញ្ញា ដល់ថ្ងៃទី១០ ខែវិច្ឆិកា ឆ្នាំ២០២៥។ ចំណែក ថ្ងៃសោរិ៍ និង អាទិត្យ ចូលរៀនចាប់ពីថ្ងៃទី១៤ ខែកញ្ញា ដល់ថ្ងៃទី៨ ខែវិច្ឆិកា ឆ្នាំ២០២៥ មានចំនួនពីរវេន។ វេនទី១ ចាប់ផ្តើមសិក្សាពីម៉ោង ៨៖០០ ដល់១១៖០០នាទីព្រឹក, វេនទី២ ចាប់ផ្តើមពីម៉ោង ២៖០០ រសៀល ដល់ម៉ោង ៥៖០០ល្ងាច។

សូមបញ្ជាក់ថា ការផ្តល់នេះមិនតម្រូវឱ្យមានឯកសារភ្ជាប់ឡើយ ប៉ុន្តែ តម្រូវឱ្យបង់ប្រាក់ថ្លៃទឹក ភ្លើងចំនួន ១៥ដុល្លារ និងថ្លៃពាក្យស្នើសុំ ១០ដុល្លារ សរុប ២៥ដុល្លារ។ ចំពោះព័ត៌មានបន្ថែមអាចសាកសួរតាមរយៈតេឡេក្រាមលេខ ០៩៨ ៥២២ ៤៧៧៕

The post រាជបណ្ឌិត្យសភាកម្ពុជា ផ្តល់អាហារូបករណ៍១០០% សម្រាប់ថ្នាក់ភាសាចិន និងកុំព្យូទ័រ appeared first on Kampuchea Thmey Daily.

តាមរយៈវីដេអូដែលបង្ហោះនៅលើទំព័រហ្វេសប៊ុកផ្ទាល់ខ្លួន លោកបណ្ឌិត សុខ ទូច បានឱ្យដឹងថា រាជបណ្ឌិត្យសភាកម្ពុជា នឹងបោះពុម្ពសៀវភៅ «ប្រវត្តិសាស្ត្រខ្មែរសម័យទំនើប» នៅខែតុលាខាងមុខនេះ។ សៀវភៅនេះ លើកឡើងពីសម័យអាណានិគមនិយមបារាំង រហូតដល់សម័យកម្ពុជាប្រជាធិបតេយ្យ ដែលមានកម្រាស់ ៨៥៦ទំព័រ។

ប្រធានរាជបណ្ឌិត្យសភាកម្ពុជារូបនេះ បានបញ្ជាក់ថា សៀវភៅ «ប្រវត្តិសាស្ត្រខ្មែរសម័យទំនើប» រៀបចំឡើងដើម្បីបង្ហាញថា តើបារាំងមកធ្វើអាណានិគមកម្ពុជាក្នុងទិសដៅអ្វី? បារាំងមកអាណាព្យាបាលកម្ពុជាក្នុងទិសដៅអ្វី? បារាំងមកចងមិត្តភាពដោយសារអ្វី? បើតាមលោកបណ្ឌិត សុខ ទូច ការបោះពុម្ពសៀវភៅនេះឡើង ព្រោះមិនចង់ឱ្យកូនខ្មែរមិនដឹងនូវប្រវត្តិសាស្ត្ររបស់ខ្លួន ដោយចេះតែនិយាយតគ្នា និយាយខុសគ្នា ហើយនិយាយតាមគ្នាដោយគ្មានឯកសារច្បាស់លាស់ និងមិនចង់ឱ្យប្រវត្តិសាស្ត្រច្រំដែល។

សូមបញ្ជាក់ថា សៀវភៅនេះ សម្រាប់អ្នកកក់មុនតម្លៃត្រឹមតែ ៣៦ ០០០ ៛/៩ដុល្លារ តែបើកក់ក្រោយខែតុលា តម្លៃមួយក្បាល ៦០ ០០០ ៛/១៥ដុល្លារ។ លោកអ្នកអាចធ្វើការកក់បានតាមរយៈ លេខទូរសព្ទ ០៩៧ ២៧២ ៧៨ ២៦/ ០៧១ ២២២ ២០១៤៕

The post រាជបណ្ឌិត្យសភាកម្ពុជា នឹងបោះពុម្ពសៀវភៅ «ប្រវត្តិសាស្ត្រខ្មែរសម័យទំនើប» ដើម្បីឱ្យកូនខ្មែរដឹងពីប្រវត្តិសាស្ត្ររបស់ខ្លួន appeared first on Kampuchea Thmey Daily.

បណ្ឌិត ស៊ឺន សំ ចេញមកប្រតិកម្មដូច្នេះនាព្រឹកថ្ងៃទី២៦ ខែសីហា បន្ទាប់ពីកាលពីថ្ងៃទី២៥ ខែសីហា ស៊ុយអែត ចុះហត្ថលេខាលក់យន្តហោះចម្បាំងជំនាន់ថ្មី Gripen E/F ឱ្យទៅថៃចំនួន៤គ្រឿង ដែលស៊ុយអែតនឹងប្រគល់ឱ្យចាប់ពីចុងឆ្នាំ២០២៥ ដល់ឆ្នាំ២០៣០ ខណៈដែលកាលពីចុងខែកក្កដា ក្នុងសង្គ្រាម៥ថ្ងៃ ថៃបានប្រើប្រាស់ ​​យន្តហោះ​ចម្បាំង ​Gripen C/D ​​ដែល​ពួក​គេ​បាន​ទិញ​ពី​ស៊ុយអែត​​កាលឆ្នាំ​២០១១ រួមជាមួយយន្តហោះចម្បាំង  បំពាក់គ្រាប់បែកចង្កោម គ្រាប់បែកទម្ងន់ធ្ងន់ដូចជា និងផ្សែងគីមីពុលវាយប្រហារលើកម្ពុជា កម្ទេចប្រាសាទព្រះវិហារសម្បត្តិបេតិកភណ្ឌពិភពលោក សម្លាប់ពលរដ្ឋស្លូតត្រង់ជាច្រើន។

តាមរយៈគណនីហ្វេសប៊ុកផ្លូវការ បណ្ឌិត ស៊ឺន សំ បង្ហាញការកត់សម្គាល់ដូច្នេះ៖«ប្រទេសស៊ុយអែត បានសម្រេចចិត្តដកស្ថានទូតចេញពីប្រទេសកម្ពុជា ដោយលើកហេតុផលថាមានការធ្លាក់ចុះខ្លាំងនៃសិទ្ធិមនុស្ស និងលទ្ធិប្រជាធិបតេយ្យនៅក្នុងប្រទេសនេះ។ ប៉ុន្តែក្រោយមក គាត់បែរជាទៅបើកស្ថានទូតឡើងវិញនៅកូរ៉េខាងជើង ដែលជាប្រទេសមួយត្រូវបានគេស្គាល់ថាមានកំណត់ត្រាសិទ្ធិមនុស្ស និងលទ្ធិប្រជាធិបតេយ្យមិនល្អជាងកម្ពុជាទៅទៀត។ មិនត្រឹមតែប៉ុណ្ណោះ គាត់ថែមទាំងបានចូលរួមក្នុងការលក់យន្តហោះទម្លាក់គ្រាប់បែកទៅឱ្យប្រទេសផ្សេងទៀត ដែលបានប្រើប្រាស់សព្វាវុធទាំងនោះដើម្បីវាយប្រហារនៅកម្ពុជាបណ្តាលឱ្យជនស្លូតត្រង់ជាច្រើនបាត់បង់ជីវិត។»។

តាមលោកបណ្ឌិត ស៊ឺន សំ សកម្មភាពរបស់ស៊ុយអែតបែបនេះ បានបង្ហាញឱ្យឃើញច្បាស់ថា ការនិយាយអំពីសិទ្ធិមនុស្ស និងលទ្ធិប្រជាធិបតេយ្យ ជួនកាលគ្រាន់តែជាពាក្យសំដីដ៏ស្រស់ស្អាតដែលប្រើដើម្បីបិទបាំងផលប្រយោជន៍ផ្ទាល់ខ្លួន ឬគោលបំណងនយោបាយប៉ុណ្ណោះ។ ពាក្យសំដីទាំងនោះ ទោះបីជាស្តាប់ទៅហាក់មានឧត្តមគតិក៏ដោយ ប៉ុន្តែបើគ្មានការអនុវត្តជាក់ស្តែងដែលស្របនឹងគោលការណ៍ទាំងនោះទេ វាគ្រាន់តែជាពាក្យទទេប៉ុណ្ណោះ។ ផ្ទុយទៅវិញ អ្វីដែលសំខាន់គឺត្រូវសង្កេតមើលទង្វើជាក់ស្តែង និងផលប៉ះពាល់នៃសកម្មភាពទាំងនោះ ដើម្បីវាយតម្លៃថាតើមានភាពស្មោះត្រង់ ឬគ្រាន់តែជាការប្រើឧត្តមគតិជាលេសដើម្បីសម្រេចផលប្រយោជន៍ផ្សេង។

អ្នកជំនាញវិទ្យាសាស្ត្រនយោបាយ បណ្ឌិត ស៊ឺន សំ  ប្រាប់ពលរដ្ឋកម្ពុជាថា មុននឹងជឿសម្ដីរបស់បរទេស ត្រូវពិនិត្យមើលទង្វើជាក់ស្ដែងសិន។ លោកសង្កត់ធ្ងន់ថា៖« នៅពេលដែលគេនិយាយអំពីសិទ្ធិមនុស្ស ឬលទ្ធិប្រជាធិបតេយ្យ យើងគួរតែប្រុងប្រយ័ត្ន និងពិនិត្យឱ្យច្បាស់លាស់អំពីបរិបទ និងគោលបំណងនៅពីក្រោយ។ ការវិនិច្ឆ័យមិនគួរផ្អែកតែលើពាក្យសំដីដ៏ល្អផូរផង់នោះទេ ប៉ុន្តែត្រូវផ្អែកលើទង្វើ និងលទ្ធផលជាក់ស្តែងដែលអាចវាស់វែងបាន។ តាមរយៈការសង្កេតបែបនេះ យើងនឹងអាចស្វែងយល់បានកាន់តែច្បាស់អំពីភាពស្មោះត្រង់ និងគោលបំណងពិតប្រាកដនៅពីក្រោយការប្តេជ្ញាចិត្តទាំងនោះ។»។

សូមរម្លឹកថា ស៊ុយអែតបានប្រកាសបិទទ្វារការិយាល័យស្ថានទូតរបស់ខ្លួនប្រចាំនៅកម្ពុជាចាប់ពីចុងខែកញ្ញា ឆ្នាំ២០២៤ ទាំងដែលប្រទេស​ស៊ុយអែតបានភ្ជាប់​ទំនាក់ទំនង​ការទូតជាផ្លូវការ​ជាមួយកម្ពុជា​នៅក្នុងឆ្នាំ​១៩៦១។

កាលពីថ្ងៃទី០៦ ខែសីហា សម្ដេចតេជោ ហ៊ុន សែន ធ្លាប់លើកឡើងថា ប្រទេសដែលលក់យន្តហោះ ចម្បាំងឲ្យថៃ ត្រូវរឹតបណ្តឹងលើកិច្ចសន្យាប្រើប្រាស់យន្តហោះ ព្រោះកន្លងទៅនេះថៃបានប្រើយន្តហោះ ដែលទិញពីអាមេរិក និងស៊ុយអែត វាយចូលជ្រៅក្នុងទឹកដីកម្ពុជា។ កម្ពុជាមិនជំទាស់នឹងស៊ុយអែត ដែលលក់យន្តហោះចម្បាំងឲ្យថៃទេ តែត្រូវកំណត់កុំឲ្យថៃប្រើប្រាស់យន្តហោះវាយប្រហារចូលទឹកដីកម្ពុជា ឬទឹកដីឡាវ ឬម៉ាឡេសុី ឬមីយ៉ាន់ម៉ា ដែលជាប្រទេសជាប់ព្រំដែនជាមួយថៃ៕

ដោយ៖ ង៉ិល ណារ៉ាត់

The post បណ្ឌិត ស៊ឺន សំ៖ ស៊ុយអ៊ែត និយាយពីសិទ្ធិមនុស្សយ៉ាងពីរោះ ប៉ុន្តែលក់យន្តហោះចម្បាំងឱ្យថៃ ដែលបានប្រើវាយប្រហារកម្ពុជា សម្លាប់ពលរដ្ឋស្លូតត្រង់ appeared first on Kampuchea Thmey Daily.