រាជបណ្ឌិត្យសភាកម្ពុជា នឹងបោះពុម្ពសៀវភៅ «ប្រវត្តិសាស្ត្រខ្មែរសម័យទំនើប» ដើម្បីឱ្យកូនខ្មែរដឹងពីប្រវត្តិសាស្ត្ររបស់ខ្លួន

រាជបណ្ឌិត្យសភាកម្ពុជា នឹងបោះពុម្ពសៀវភៅ «ប្រវត្តិសាស្ត្រខ្មែរសម័យទំនើប» ដើម្បីឱ្យកូនខ្មែរដឹង និងយល់ច្បាស់ពីប្រវត្តិសាស្ត្ររបស់ខ្លួន ជៀសវាងការនិយាយតាមគ្នាដោយគ្មានឯកសារច្បាស់លាស់។ នេះបើតាមលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា។

តាមរយៈវីដេអូដែលបង្ហោះនៅលើទំព័រហ្វេសប៊ុកផ្ទាល់ខ្លួន លោកបណ្ឌិត សុខ ទូច បានឱ្យដឹងថា រាជបណ្ឌិត្យសភាកម្ពុជា នឹងបោះពុម្ពសៀវភៅ «ប្រវត្តិសាស្ត្រខ្មែរសម័យទំនើប» នៅខែតុលាខាងមុខនេះ។ សៀវភៅនេះ លើកឡើងពីសម័យអាណានិគមនិយមបារាំង រហូតដល់សម័យកម្ពុជាប្រជាធិបតេយ្យ ដែលមានកម្រាស់ ៨៥៦ទំព័រ។

ប្រធានរាជបណ្ឌិត្យសភាកម្ពុជារូបនេះ បានបញ្ជាក់ថា សៀវភៅ «ប្រវត្តិសាស្ត្រខ្មែរសម័យទំនើប» រៀបចំឡើងដើម្បីបង្ហាញថា តើបារាំងមកធ្វើអាណានិគមកម្ពុជាក្នុងទិសដៅអ្វី? បារាំងមកអាណាព្យាបាលកម្ពុជាក្នុងទិសដៅអ្វី? បារាំងមកចងមិត្តភាពដោយសារអ្វី? បើតាមលោកបណ្ឌិត សុខ ទូច ការបោះពុម្ពសៀវភៅនេះឡើង ព្រោះមិនចង់ឱ្យកូនខ្មែរមិនដឹងនូវប្រវត្តិសាស្ត្ររបស់ខ្លួន ដោយចេះតែនិយាយតគ្នា និយាយខុសគ្នា ហើយនិយាយតាមគ្នាដោយគ្មានឯកសារច្បាស់លាស់ និងមិនចង់ឱ្យប្រវត្តិសាស្ត្រច្រំដែល។

សូមបញ្ជាក់ថា សៀវភៅនេះ សម្រាប់អ្នកកក់មុនតម្លៃត្រឹមតែ ៣៦ ០០០ ៛/៩ដុល្លារ តែបើកក់ក្រោយខែតុលា តម្លៃមួយក្បាល ៦០ ០០០ ៛/១៥ដុល្លារ។ លោកអ្នកអាចធ្វើការកក់បានតាមរយៈ លេខទូរសព្ទ ០៩៧ ២៧២ ៧៨ ២៦/ ០៧១ ២២២ ២០១៤៕