ប្រតិបត្តិការនេះធ្វើឡើងក្រោមការសម្របសម្រួលនីតិវិធីពី លោក ចាន់ វណ្ណៈ ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង ដោយមានការចូលរួមផ្ទាល់ពី អនុប្រធាននាយកដ្ឋានចារកម្ម លោកអភិបាលរងក្រុង លោកអធិការរងនគរបាលក្រុង លោកនាយករងរដ្ឋបាលក្រុង និងលោកនាយផ្នែក នៃនាយកដ្ឋានចារកម្ម។

ជាលទ្ធផលនៃការចុះត្រួតពិនិត្យតាមទីតាំងទាំង ៣ មានដូចខាងក្រោម៖ ទីតាំងទី១ (អគារ Dong Tai Park ឬតុងថៃ)៖ ស្ថិតនៅភូមិបាវិតកណ្តាល សង្កាត់បាវិត។ ក្រោយការពិនិត្យ សមត្ថកិច្ចពុំរកឃើញករណីពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យានោះទេ ប៉ុន្តែបានសម្រេចបិទសៀល (Seal) បន្ថែមចំនួន ១០៦សៀល និងបានដកហូតសម្ភារៈ ឧបករណ៍គមនាគមន៍មួយចំនួន រួមមាន៖ កុំព្យូទ័រ All in 1 ចំនួន ១០គ្រឿង, ទូរសព្ទដៃចម្រុះ ៧៨គ្រឿង, ខ្នោះដៃ ១ និងឧបករណ៍ SIMbox ចំនួន ២គ្រឿង ដើម្បីប្រគល់ជូនកម្លាំងនគរបាលខេត្ត,

ទីតាំងទី២ (កាស៊ីណូ ហ្គោលដេន ភែលេស – AI)៖ ស្ថិតនៅភូមិប្រាសាទ សង្កាត់ប្រាសាទ។ ទីតាំងនេះក៏ពុំរកឃើញករណីពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យាឡើយ និងទីតាំងទី៣ (ផ្ទះសំណាក់ N98)៖ ស្ថិតនៅភូមិបាវិតកណ្តាល សង្កាត់បាវិត។ សមត្ថកិច្ចបានរកឃើញជនបរទេសសរុបចំនួន ៤៤នាក់ (ស្រី ៨នាក់) មាន ៤សញ្ជាតិ ក្នុងនោះរួមមាន ជនជាតិវៀតណាម ៣៤នាក់, ចិន ៧នាក់, ហ្វីលីពីន ២នាក់ និងជប៉ុន ១នាក់។

ក្នុងការត្រួតពិនិត្យឯកសារ ក្នុងចំណោមជនបរទេសទាំង ៤៤នាក់នោះ មាន ៣០នាក់ មានលិខិតឆ្លងដែន និងទិដ្ឋាការត្រឹមត្រូវ។ ដោយឡែក អាជ្ញាធរបានរកឃើញជនបរទេសចំនួន ១៤នាក់ គ្មានលិខិតឆ្លងដែន។

បច្ចុប្បន្ន ជនបរទេសខុសច្បាប់ទាំង ១៤នាក់ខាងលើ ត្រូវបានកម្លាំងសមត្ថកិច្ចចម្រុះបញ្ជូនទៅកាន់ស្នងការដ្ឋាននគរបាលខេត្តស្វាយរៀង ដើម្បីចាត់ការ និងអនុវត្តនីតិវិធីបន្តទៅតាមផ្លូវច្បាប់អន្តោប្រវេសន៍៕

The post សមត្ថកិច្ចចម្រុះចុះឆែកឆេរទីតាំង សង្ស័យ៣កន្លែងនៅក្រុងបាវិត ឃាត់ខ្លួនជនបរទេសគ្មានលិខិតឆ្លងដែន ១៤នាក់ appeared first on Kampuchea Thmey Daily.

លោកស្រី បន្តថា លោក ឃួង ស្រេង អភិបាល នៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ តែងតែណែនាំ និង សង្កត់ធ្ងន់ជាប់ជាប្រចាំចំពោះ អភិបាលខណ្ឌទាំង ១៤ ត្រូវចុះត្រួតពិនិត្យទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ផ្សព្វផ្សាយអនុក្រឹត្យលេខ ០៣ ឲ្យកាន់តែសកម្ម និង មិនត្រូវរាថយដាច់ខាត ធ្វើយ៉ាងណាត្រូវតែធានាលុបបំបាត់ឲ្យអស់នូវបទល្មើសក្នុងមូលដ្ឋានរបស់ខ្លួនទាំងស្រុង។ ជាក់ស្តែងគិតត្រឹមថ្ងៃទី ០៣ ខែមិថុនា ឆ្នាំ ២០២៦ ម្សិលមិញនេះ គណៈបញ្ជាការឯកភាពរដ្ឋបាលរាជធានីភ្នំពេញ ក្រោមការដឹកនាំ និង បញ្ជាផ្ទាល់របស់ លោក ឃួង ស្រេង រដ្ឋបាលខណ្ឌទាំង ១៤ បានចុះត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និង សណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) និង ផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី ០៥ ខែមករា ឆ្នាំ ២០២៦ របស់រាជរដ្ឋាភិបាលកម្ពុជា ស្ដីពីការគ្រប់គ្រងសន្ដិសុខសុវត្ថិភាពតាមទីតាំងរស់នៅប្រមូលផ្ដុំក្នុងភូមិសាស្ដ្ររាជធានីភ្នំពេញបានចំនួន ៩៤ ទីតាំង រកឃើញជនបរទេសស្នាក់នៅសរុបចំនួន ៤៨០ នាក់ (ស្រី ១៤៤ នាក់) ក្នុងនោះ ជនបរទេសដែលស្នាក់នៅដោយពុំមានលិខិតឆ្លងដែនមានចំនួន ០៦ នាក់។

លោកស្រីអ្នកនាំពាក្យ បញ្ជាក់ទៀតថា ក្នុងថ្ងៃនេះដែរ នៅខណ្ឌសែនសុខ ក្រុមការងារបានចុះត្រួតពិនិត្យទីតាំងខុនដូរពិភពថ្មីសែនសុខ ស្ថិតនៅក្នុងភូមិសំរោងទាវ សង្កាត់ក្រាំងធ្នង់ មាន ០៨ អគារ រកឃើញជនបរទេសស្នាក់នៅសរុបចំនួន ៣៦ នាក់ (ស្រី ០២ នាក់) ពុំមានលិខិតឆ្លងដែន ០៣ នាក់។ ក្រុមការងារបានរកឃើញបទល្មើសឆបោកតាមប្រព័ន្ធបច្ចេកវិទ្យា ០១ ករណី នៅអគារទី ០៥ ជាន់ទី ១២ បន្ទប់ ១២០១ ដោយបានឃាត់ខ្លួនជនសង្ស័យជាជនជាតិចិន ០៣ នាក់ ព្រមទាំងសម្ភាររួមមាន Laptop ចំនួន ០១ គ្រឿង និង ⁠ទូរស័ព្ទចំនួន ០៣ គ្រឿង។ តាមការធ្វើកោសល្យវិច័យរបស់ការិយាល័យប្រឆាំងបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ រកឃើញមានជាប់ពាក់ព័ន្ធនឹងករណីសង្ស័យប្រព្រឹត្តអំពើឆបោកតាមប្រព័ន្ធបច្ចេកវិទ្យា។

លោកស្រី ដោ សម្ផស្ស បញ្ជាក់បន្ថែមថា ក្រោយចប់ប្រតិបត្តិការ ជនសង្ស័យ និង សម្ភារខាងលើ ត្រូវបានបញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្ដនីតិវិធី ហើយចំពោះទីតាំងបន្ទប់ពាក់ព័ន្ធករណីនេះ ក្រុមការងារសម្រេចបិទឃ្លុំបណ្ដោះអាសន្ន។

ជាមួយគ្នានេះដែរ ថ្ងៃនេះ ស្នងការដ្ឋានននគរបាលរាជធានីភ្នំពេញ បានអនុវត្តការផាកពិន័យចំពោះម្ចាស់ ឬ អ្នកគ្រប់គ្រងទីតាំងរស់នៅប្រមូលផ្ដុំតាមអនុក្រឹត្យលេខ ០៣ ចំនួន ០២ ទីតាំង មនុស្សចំនួន ០៩ នាក់ គិតជាថវិកាសរុបចំនួន ៣៦.០០០.០០០ រៀល (សាមសិបប្រាំមួយលានរៀល)៕
អត្ថបទ ៖ ស្រីរ័ត្ន

The post ថ្ងៃទី ០៣ មិថុនា ចុះត្រួតពិនិត្យទីតាំងសង្ស័យប្រព្រឹត្ត (ONLINE SCAMS) ៩៤ ទីតាំង រកឃើញជនបរទេសស្នាក់នៅជិត ៥០០ នាក់ ពុំមានលិខិតឆ្លងដែន ០៦ នាក់ appeared first on Kampuchea Thmey Daily.

ប្រតិបត្តិការនេះធ្វើឡើងនៅ កាលពីថ្ងៃទី២៣ ខែឧសភា ឆ្នាំ២០២៦ នៅផ្ទះលេខ០៥ ផ្លូវ A០២ ក្នុងបុរីជីបម៉ុង ហ្គ្រេន ភ្នំពេញស៊ីធី ស្ថិតតាមបណ្តោយផ្លូវ១០១៩ ក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។

តាមប្រភពពីសមត្ថកិច្ចបានឱ្យដឹងថា ក្នុងការចុះត្រួតពិនិត្យនេះ កម្លាំងបានប្រទះឃើញជនជាតិចិនសរុបចំនួន ៥នាក់ ជាបុរស ក្នុងនោះមានជនជាតិចិនចំនួន ៣នាក់ ដែលត្រូវបានសង្ស័យថាកាន់កាប់លិខិតឆ្លងដែនក្លែងក្លាយ។

ក្នុងប្រតិបត្តិការនេះ សមត្ថកិច្ចបានដកហូតវត្ថុតាងជាច្រើនរួមមាន៖ កុំព្យូទ័រយួរដៃ ចំនួន ០១គ្រឿងលិខិតឆ្លងដែនជនជាតិចិនក្លែងក្លាយ ចំនួន ៤៨ក្បាលបណ្ណការងារជនបរទេស ចំនួន ៤៥កាត ,ត្រា ចំនួន ០៥ ,ស្ទិកឃ័របញ្ជាក់សុពលភាពទិដ្ឋាការ (Visa) មួយចំនួន , តាំប៉ុងពណ៌ក្រហម ចំនួន ០២ , ទឹកថ្នាំត្រាពណ៌ក្រហម ចំនួន ០៣ដប។

ក្រោយការសាកសួរបឋម សមត្ថកិច្ចបានសន្និដ្ឋានថា ជនសង្ស័យខាងលើមានជាប់ពាក់ព័ន្ធនឹងបទល្មើសក្លែងឯកសារសាធារណៈ ដែលរួមមានការរក្សាទុកលិខិតឆ្លងដែនក្លែងក្លាយ សៀវភៅការងារជនបរទេសក្លែងក្លាយ និងទិដ្ឋាការស្នាក់នៅ (Visa) ក្លែងក្លាយសម្រាប់ជនជាតិចិន។

បន្ទាប់ពីបញ្ចប់ប្រតិបត្តិការ និងដោយមានការអនុញ្ញាតពីលោក លី គីមស៊ាន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ សមត្ថកិច្ចបានសម្រេចនាំខ្លួនជនជាតិចិនទាំង ៥នាក់ រួមទាំងវត្ថុតាងទាំងអស់ ប្រគល់ទៅអធិការដ្ឋាននគរបាលខណ្ឌសែនសុខ ដើម្បីបន្តកសាងសំណុំរឿង និងអនុវត្តនីតិវិធីតាមផ្លូវច្បាប់៕ អត្ថបទ ៖សំណាង

The post អាជ្ញាធរខណ្ឌសែនសុខ ចុះបង្ក្រាបទីតាំងផលិត និង ចែក ចាយលិខិតឆ្លងដែនចិនក្លែងក្លាយ ឃាត់ជនបរទេស៥នាក់ appeared first on Kampuchea Thmey Daily.

លោក សេង គន្ធ អភិបាលនៃគណៈអភិបាលខណ្ឌមានជ័យ បានអោយដឹងថា ដោយយោងតាមប្រសាសន៍ថ្នាក់ដឹកនាំ រាជរដ្ឋាភិបាល និងអនុវត្តន៍បទបញ្ជាពី លោក ឃួងស្រេង អភិបាលនៃគណៈអភិបាលរាជធានីភ្នំពេញ ដែលបានដាក់គោលការណ៍ដ៏មុឺងម៉ាត់ ដល់គណៈអភិបាលទាំង ១៤ខណ្ឌ ត្រូវបន្តចុះរដ្ឋបាលតាមទីតាំងខុនដូរ អាផាតមិនជួល និងតាមបណ្តាសណ្ឋាគារ មិនអោយមានជាដាច់ខាត នូវជនបរទេស ដែលគ្មានលិខិតឆ្លងដែនស្របច្បាប់ ក្នុងភូមិសាស្រ្តរាជធានីភ្នំពេញនោះឡើយ ។

លោក អភិបាលបន្តថា ជាក់ស្តែងកម្លាំងគណៈបញ្ជាការឯកភាពខណ្ឌមានជ័យ បានចុះពិនិត្យទីតាំងខុនដូ មួយកន្លែង ដែលមានយីហោ« ដេលី សង្ហាររឹម» រកឃើញមានជនបរទេសរស់នៅ រួមមានជនជាតិ ឥណ្ឌា ០១នាក់ , ជនជាតិ កាមេរ៉ូន ០៤នាក់, ជនជាតិ ប៉ាគីស្ថាន ០២នាក់ , ជនជាតិ នីហ្សេរីយ៉ា ០១នាក់ (សរុប ០៨នាក់ )។

ក្នុងនោះសមត្ថកិច្ចបានរកឃើញជនបរទេសចំនួន ០៣នាក់ ជនជាតិឥណ្ឌា និងជនជាតិប៉ាគីស្ថាន មានលិខិតឆ្លងដែន ទិដ្ឋការត្រឹមត្រូវ ចំណែកឯជនជាតិ កាមេរ៉ូន ៤នាក់ និងជនជាតិនីហ្សេរីយ៉ា ០១នាក់ មិនមានលិខិតឆ្លងដែន និងទិដ្ឋការត្រឹមត្រូវនោះទេ។

បច្ចុប្បន្នជនបរទេសទាំង០៥នាក់ដែលមានគ្មានលិខិត ត្រូវបានសមត្ថកិច្ចជំនាញបញ្ជូនទៅ ស្នងការដ្ឋាននគរបាលរាជធានីភ្នំពេញដើម្បីចាត់ការបន្តនីតិវិធី៕ អត្ថបទ ៖ រដ្ឋា

The post កម្លាំងចម្រុះខណ្ឌមានជ័យ ចុះរដ្ឋបាលត្រួតពិនិត្យអគារខុនដូយីហោ «ដេលី សង្ហារឹម» រកឃើញជនបរទេស០៥នាក់ គ្មានលិខិតឆ្លងដែន appeared first on Kampuchea Thmey Daily.

ប្រតិបត្តិការបង្ក្រាបនេះធ្វើឡើងក្រោមបទបញ្ជាពី លោក ឃួង ស្រេង អភិបាល នៃគណៈអភិបាលរាជធានីភ្នំពេញ , លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ , លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ដោយមានការសម្របសម្រួលនីតិវិធីច្បាប់ពីសំណាក់ លោក សេង ហៀង , លោក ចើង ជើងគ័ង និង លោក ថេង សំណាង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និង អាជ្ញាធរខណ្ឌពោធិ៍សែនជ័យ។

ជាលទ្ធផល ក្រុមការងារបានឃាត់ខ្លួនជនសង្ស័យសរុបចំនួន ៦១ នាក់ (ស្រី ៦ នាក់) ក្នុងនោះ គ្មានលិខិតឆ្លងដែន ស្នាក់នៅខុសច្បាប់ ចំនួន ៤២ នាក់ , ជាប់ពាក់ព័ន្ធនឹងការរក្សាទុកសម្ភារសម្រាប់ប្រព្រឹត្តបទល្មើស Online Scam ១៥ នាក់ និង ជាប់ពាក់ព័ន្ធនឹងការប្រើប្រាស់គ្រឿងញៀន ៤ នាក់។

ជាមួយគ្នានេះ សមត្ថកិច្ចក៏បានដកហូតវត្ថុតាង និង សម្ភារបច្ចេកវិទ្យាមួយចំនួនមានដូចជា ៖ កុំព្យូទ័រយួរដៃចំនួន ៤៨ គ្រឿង , ទូរសព្ទដៃចំនួន ៤៦៨ គ្រឿង , អេក្រង់ម៉ូនីទ័រចំនួន ៣២ គ្រឿង , CPU ចំនួន ១០ គ្រឿង , Tablet ចំនួន ១ គ្រឿង , និង ស៊ីមកាតទូរស័ព្ទបរទេសមួយចំនួនធំទៀតផងដែរ។

បច្ចុប្បន្ន ក្រុមការងារសម្រេចប្រគល់ជនសង្ស័យ រួមនឹងវត្ថុតាងទាំងអស់ ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីសាកសួរ និង កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមច្បាប់ជាធរមាន។

សូមរម្លឹកថា ច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ត្រូវបានអនុម័តកាលពីថ្ងៃ ទី៦ ខែមេសា និង បានកំពុងអនុវត្តចាប់តាំងពីថ្ងៃទី ៧ ខែមេសា ឆ្នាំ ២០២៦ មក បានកំណត់ដាក់ទោស ជនល្មើស ត្រូវប្រឈមនឹងការជាប់ពន្ធនាគារខ្ពស់បំផុតរហូតដល់ ១ ជីវិត និង ពិន័យជាប្រាក់ដល់ទៅ ១ ០០០ លានរៀល ថែមទាំងការរឹបអូសទ្រព្យសម្បត្តិរបស់ជនល្មើសផងដែរ៕
អត្ថបទ ៖ សុភា

The post ឃាត់ខ្លួនជនសង្ស័យ ៦១ នាក់ ឆបោកអនឡាញ និង គ្រឿងញៀន នៅខណ្ឌពោធិ៍សែនជ័យ appeared first on Kampuchea Thmey Daily.

លិខិតឆ្លងដែននៃប្រទេសទាំង២ ជាប់ចំណាត់ថ្នាក់ទី ១២ លើ​សន្ទស្សន៍លិខិតឆ្លងដែន Henley ប្រចាំឆ្នាំ ២០២៥ ដោយ​មាន​សិទ្ធិធ្វើដំណើរដោយ​គ្មានទិដ្ឋាការ​ទៅកាន់ប្រទេស ឬដែនដី គោលដៅចំនួន ១៨០ ក្នុងចំណោល ២២៧ ទូទាំងពិភព​លោក​។

លិខិតឆ្លងដែនរបស់សហរដ្ឋអាមេរិក បានធ្លាក់ចេញពីចំណាត់ថ្នាក់កំពូលទាំង ១០​ ជាលើកដំបូងកាលពីខែមុន ហើយឥឡូវនេះបានជាប់ចំណាត់ថ្នាក់ទី ១២។ នេះបើយោងតាមក្រុមហ៊ុន Henley & Partners ដែលជាក្រុមហ៊ុនផ្តល់ប្រឹក្សាអំពីសញ្ជាតិ និងទិដ្ឋាការពិភពលោក។

សហរដ្ឋអាមេរិកជាប់ចំណាត់ថ្នាក់លេខ ១ ក្នុងឆ្នាំ ២០១៤ ប៉ុន្តែលិខិតឆ្លងដែន​របស់ប្រទេសមហាអំណាចមួយ​នេះ កាន់តែខ្សោយទៅៗ ក្នុងរយៈពេល ១០ ឆ្នាំកន្លងមក​។

ក្រុមហ៊ុន Henley & Partners បាននិយាយថា ការធ្លាក់ចុះនេះមិនមែនគ្រាន់តែជាចំណាត់ថ្នាក់នោះទេ ពោលគឺវាបង្ហាញពីការផ្លាស់ប្តូរកាន់តែធំ​ក្នុងសេរីភាពធ្វើដំណើរសកល និងឥទ្ធិពលអន្តរជាតិ។ ប្រទេស​ដែលទទួល​ការ​​បើក​ចំហ និង​សហប្រតិបត្តិការ​ កំពុង​​បង្កើនឥទ្ធិពលរបស់ខ្លួន​ ខណៈ​​ប្រទេស​​ដែល​ពឹង​ផ្អែក​លើ​អំណាច​ពី​អតីតកាល ​កំពុង​តែ​ធ្លាក់​ចុះ។

កាលពីឆ្នាំមុន លិខិតឆ្លងដែនរបស់​ម៉ាឡេស៊ីបាន​ឡើងមួយចំណាត់ថ្នាក់ ដោយ​ក្លាយជាប្រទេសមានអំណាចបំផុតលំដាប់ទី ១១ នៅលើពិភពលោក ប៉ុន្តែបានធ្លាក់ចុះ​មួយលេខមកវិញនៅឆ្នាំនេះ​។ VnExpress បាន​សរសេរថា អ្នកលេខអ៊ិនធឺរណិតនៅម៉ាឡេស៊ី នៅតែ​បង្ហាញមោទនភាពជាតិ ដោយថា ពួកគេអាច​ធ្វើដំណើរទៅកាន់ប្រទេស ឬដែនដី ជាច្រើន ដោយ​មិនចាំបាច់ត្រូវការទិដ្ឋាការ។ ​

គួរគូសបញ្ជាក់ថា សិង្ហ​បុរី​ជាប់​ចំណាត់ថ្នាក់លេខ ១ លើ​​លិខិតឆ្លងដែន​ដ៏​មាន​ឥទ្ធិពល​បំផុត​របស់​ពិភពលោក ​ដោយមាន​សិទ្ធិចូលទៅកាន់ប្រទេស ឬដែនដី ចំនួន ១៩៣ ដោយ​មិនប្រើទិដ្ឋាការ។ បន្ទាប់មក​គឺកូរ៉េខាងត្បូង និងជប៉ុន។ ​​

សន្ទស្សន៍លិខិតឆ្លងដែន​ Henley តាមដានសេរីភាពនៃការធ្វើដំណើរជាសកលនៅទូទាំង ២២៧ ប្រទេស និងដែនដី ដោយប្រើទិន្នន័យផ្តាច់មុខពីសមាគមដឹកជញ្ជូនផ្លូវអាកាសអន្តរជាតិ (IATA)។ សន្ទស្សន៍នេះ ត្រូវបាន​ធ្វើបច្ចុប្បន្នភាពជាទៀងទាត់ពេញមួយឆ្នាំ ដើម្បីឆ្លុះបញ្ចាំងពីការផ្លាស់ប្តូរគោលនយោបាយទិដ្ឋាការ៕

The post លិខិតឆ្លងដែនម៉ាឡេស៊ី ឡើងចំណាត់ថ្នាក់ មាន​ឥទ្ធិពលស្មើនឹង​លិខិតឆ្លងដែនអាមេរិក appeared first on Kampuchea Thmey Daily.

១. នាយកដ្ឋានលិខិតឆ្លងដែន

នាយកដ្ឋានលិខិតឆ្លងដែនមានអាសយដ្ឋាន ស្ថិតនៅភូមិតាង៉ូវ សង្កាត់និរោធ ខណ្ឌច្បារអំពៅ រាជធានីភ្នំពេញ ដែលអាចទំនាក់ទំនងតាមរយៈលេខ ០៩៥ ២៧៩ ៥០០។

២. ទីស្នាក់ការផ្តល់សេវាលិខិតឆ្លងដែនប្រចាំផ្សារអ៊ីអនម៉លសែនសុខ(អ៊ីអន២)

ទីស្នាក់ការផ្តល់សេវាលិខិតឆ្លងដែនប្រចាំផ្សារអ៊ីអនម៉លសែនសុខ(អ៊ីអន២) ស្ថិតនៅក្នុងផ្សារអ៊ីអនម៉លសែនសុខ ផ្លូវ១០០៣ ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ សម្រាប់លេខទំនាក់ទំនង ០១៥ ៨០៧ ៧៧៣។

៣. ទីស្នាក់ការផ្តល់សេវាលិខិតឆ្លងដែនប្រចាំផ្សារអ៊ីអនម៉លមានជ័យ ((អ៊ីអន៣)

មានអាសយដ្ឋាន នៅក្នុងផ្សារអ៊ីអនម៉លមានជ័យ មហាវិថីសម្តេចតេជោហ៊ុនសែន (ផ្លូវ៦០ម៉ែត្រ) ភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ លេខទំនាក់ទំនង ០១១ ៥៨២ ២៧៧។

៤.ទីស្នាក់ការផ្តល់សេវាលិខិតឆ្លងដែនសម្រាប់ពលករធ្វើការនៅក្រៅប្រទេស

ទីស្នាក់ការផ្តល់សេវាលិខិតឆ្លងដែនសម្រាប់ពលករធ្វើការនៅក្រៅប្រទេស មានអាសយដ្ឋាន ស្ថិតនៅក្នុងផ្សារស្ទឹងមានជ័យថ្មី ជាន់ទី២ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ លេខទំនាក់ទំនង ០១៥ ២២៣ ២២៦។

៥. ទីស្នាក់ការផ្តល់សេវាលិខិតឆ្លងដែនប្រចាំខេត្តសៀមរាប

មានអាសយដ្ឋាន ស្ថិតនៅជាន់ទី២ ផ្សារទំនើប The Heritage Walk ផ្លូវជាតិលេខ៦ ភូមិមណ្ឌល២ សង្កាត់ស្វាយជ្រុំ ក្រុងសៀមរាប ខេត្តសៀមរាប លេខទំនាក់ទំនង ០១២ ៩៥៧ ៦៧៩។

៦. សាខាលិខិតឆ្លងដែនប្រចាំខេត្តបាត់ដំបង

សាខាលិខិតឆ្លងដែនប្រចាំខេត្តបាត់ដំបង មានអាសយដ្ឋាន ស្ថិតនៅដីឡូត៍លេខ F29 ភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង លេខទំនាក់ទំនង ០៦៨ ៤០០ ១៨៤។

៧.សាខាលិខិតឆ្លងដែនប្រចាំខេត្តបន្ទាយមានជ័យ

សាខាលិខិតឆ្លងដែនប្រចាំខេត្តបន្ទាយមានជ័យមានអាសយដ្ឋាន នៅភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ លេខទំនាក់ទំនង ០៦១ ២១១ ១៩៨។

៨. សាខាលិខិតឆ្លងដែនប្រចាំខេត្តកោះកុង

សាខាលិខិតឆ្លងដែនប្រចាំខេត្តកោះកុងស្ថិតនៅភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង លេខទំនាក់ទំនង ០៨១ ៨៤៤ ៨១២។

សម្រាប់ព័ត៌មានបន្ថែម លោកអ្នកអាចទាញយកកម្មវិធីព័ត៌មានសេវាកម្មអត្តសញ្ញាណកម្ម (GDI eServices) ដើម្បីសាកសួរពីសេវាអត្តសញ្ញាណកម្ម ឬទំនាក់ទំនងទៅកាន់លេខ ១២៧១ ឬ ០១៧ ៨៩ ៨៩ ១៥ ដែលអាចហៅដោយឥតគិតថ្លៃ រៀងរាល់ម៉ោងធ្វើការ ចាប់ពីថ្ងៃច័ន្ទ-សុក្រ៕

The post មកស្គាល់ទីតាំងចំនួន៨ ដែលប្រជាពលរដ្ឋអាចស្នើសុំផ្តល់លិខិតឆ្លងដែន appeared first on Kampuchea Thmey Daily.

បើតាមលោក ទូច សុឃៈ ទីស្នាក់ការធ្វើលិខិតឆ្លងដែន នៅខេត្តសៀមរាប ជាសមិទ្ធផលថ្មីមួយបន្ថែមទៀតរបស់ក្រសួងមហាផ្ទៃ នៃរាជរដ្ឋាភិបាល ក្រោមការដឹកនាំ របស់សម្តេចមហាបវរធិបតី  ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។ សម្ដេចមហាបវរធិបតី បានណែនាំឱ្យក្រសួងមហាផ្ទៃ យកចិត្តទុកដាក់ រិះរកមធ្យោបាយថ្មីៗបន្ថែមទៀតដើម្បីផ្តល់ភាពងាយស្រួល និងប្រកបដោយគុណភាព ជូនប្រជាពលរដ្ឋ ស្របតាមយុទ្ធសាស្ដ្របញ្ចកោណ ដំណាក់កាលទី១ របស់រាជរដ្ឋាភិបាល។ 

ទីស្នាក់ការធ្វើលិខិតឆ្លងដែនខេត្តសៀមរាប មានទីតាំងស្ថិតនៅជាន់ទី២ ផ្សារទំនើប The Heritage Walk ផ្លូវជាតិលេខ៦ ភូមិមណ្ឌល២ សង្កាត់ស្វាយដង្គំ ក្រុងសៀមរាប ខេត្តសៀមរាប។ បើតាមលោក ឧត្តមសេនីយ៍ឯកបណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម ការផ្តល់សេវាលិខិតឆ្លងដែននៅខេត្តសៀមរាបនេះ មានគោលបំណងបង្ខិតសេវានោះឱ្យកាន់តែកៀកប្រជាពលរដ្ឋ។ លោកបញ្ជាក់ថា ពលរដ្ឋខេត្តឧត្តរមានជ័យ ព្រះវិហារ បន្ទាយមានជ័យ និងខេត្តផ្សេងៗទៀតអាចមកស្នើសុំសេវានៅសៀមរាបបាន ចាប់ពីថ្ងៃពុធ ដល់ថ្ងៃអាទិត្យ ពីម៉ោង ៩ ព្រឹក ដល់ម៉ោង៤ រសៀល។ សម្រាប់ថ្ងៃច័ន្ទ និងថ្ងៃអង្គារ មន្ត្រីជំនាញនឹងបើកទ្វារទីស្នាក់ការនេះសម្រាប់តែផ្ដល់ព័ត៌មាន និងបើកលិខិតឆ្លងដែនជូនអ្នកមកទទួលសេវាតែប៉ុណ្ណោះ។ 

គួរឱ្យដឹងថា បច្ចុប្បន្នទីតាំងធ្វើលិខិតឆ្លងដែនធម្មតាដែលកំពុងអនុវត្តមានចំនួន៦ រួមមាន នៅនាយកដ្ឋានលិខិតឆ្លងដែន ភូមិតាង៉ូវសង្កាត់និរោធខណ្ឌច្បារអំពៅ រាជធានីភ្នំពេញ សាខាលិខិតឆ្លងដែន ផ្សារទំនើបអ៊ីអន២សែនសុខ ខេត្តបាត់ដំបង ខេត្តកោះកុង ក្រុងប៉ោយប៉ែតខេត្តបន្ទាយមានជ័យ និងសាខាលិខិតឆ្លងដែន ខេត្តសៀមរាម៕ 

The post បើកដំណើរបាន១ខែ ស្នាក់ការធ្វើលិខិតឆ្លងដែនខេត្តសៀមរាប ផ្ដល់សេវាជូនពលរដ្ឋបានជាង ២ពាន់នាក់ appeared first on Kampuchea Thmey Daily.