ព័ត៌មានអន្ដរជាតិ

លិខិតឆ្លងដែនម៉ាឡេស៊ី ឡើងចំណាត់ថ្នាក់ មានឥទ្ធិពលស្មើនឹងលិខិតឆ្លងដែនអាមេរិក

បានផុស

៧ ខែ មុន

នៅ

ថ្ងៃសុក្រ ១៧ តុលា ២០២៥

ដោយ

លិខិតឆ្លងដែនម៉ាឡេស៊ី បច្ចុប្បន្នឡើងចំណាត់ថ្នាក់ ដោយមានឥទ្ធិពលស្មើនឹងលិខិតឆ្លងដែនរបស់សហរដ្ឋអាមេរិកដែរ។ នេះបើតាមការចុះផ្សាយរបស់កាសែត VnExpress កាលពីថ្ងៃពុធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លិខិតឆ្លងដែននៃប្រទេសទាំង២ ជាប់ចំណាត់ថ្នាក់ទី ១២ លើសន្ទស្សន៍លិខិតឆ្លងដែន Henley ប្រចាំឆ្នាំ ២០២៥ ដោយមានសិទ្ធិធ្វើដំណើរដោយគ្មានទិដ្ឋាការទៅកាន់ប្រទេស ឬដែនដី គោលដៅចំនួន ១៨០ ក្នុងចំណោល ២២៧ ទូទាំងពិភពលោក។

លិខិតឆ្លងដែនរបស់សហរដ្ឋអាមេរិក បានធ្លាក់ចេញពីចំណាត់ថ្នាក់កំពូលទាំង ១០ ជាលើកដំបូងកាលពីខែមុន ហើយឥឡូវនេះបានជាប់ចំណាត់ថ្នាក់ទី ១២។ នេះបើយោងតាមក្រុមហ៊ុន Henley & Partners ដែលជាក្រុមហ៊ុនផ្តល់ប្រឹក្សាអំពីសញ្ជាតិ និងទិដ្ឋាការពិភពលោក។

សហរដ្ឋអាមេរិកជាប់ចំណាត់ថ្នាក់លេខ ១ ក្នុងឆ្នាំ ២០១៤ ប៉ុន្តែលិខិតឆ្លងដែនរបស់ប្រទេសមហាអំណាចមួយនេះ កាន់តែខ្សោយទៅៗ ក្នុងរយៈពេល ១០ ឆ្នាំកន្លងមក។

ក្រុមហ៊ុន Henley & Partners បាននិយាយថា ការធ្លាក់ចុះនេះមិនមែនគ្រាន់តែជាចំណាត់ថ្នាក់នោះទេ ពោលគឺវាបង្ហាញពីការផ្លាស់ប្តូរកាន់តែធំក្នុងសេរីភាពធ្វើដំណើរសកល និងឥទ្ធិពលអន្តរជាតិ។ ប្រទេសដែលទទួលការបើកចំហ និងសហប្រតិបត្តិការ កំពុងបង្កើនឥទ្ធិពលរបស់ខ្លួន ខណៈប្រទេសដែលពឹងផ្អែកលើអំណាចពីអតីតកាល កំពុងតែធ្លាក់ចុះ។

កាលពីឆ្នាំមុន លិខិតឆ្លងដែនរបស់ម៉ាឡេស៊ីបានឡើងមួយចំណាត់ថ្នាក់ ដោយក្លាយជាប្រទេសមានអំណាចបំផុតលំដាប់ទី ១១ នៅលើពិភពលោក ប៉ុន្តែបានធ្លាក់ចុះមួយលេខមកវិញនៅឆ្នាំនេះ។ VnExpress បានសរសេរថា អ្នកលេខអ៊ិនធឺរណិតនៅម៉ាឡេស៊ី នៅតែបង្ហាញមោទនភាពជាតិ ដោយថា ពួកគេអាចធ្វើដំណើរទៅកាន់ប្រទេស ឬដែនដី ជាច្រើន ដោយមិនចាំបាច់ត្រូវការទិដ្ឋាការ។

គួរគូសបញ្ជាក់ថា សិង្ហបុរីជាប់ចំណាត់ថ្នាក់លេខ ១ លើលិខិតឆ្លងដែនដ៏មានឥទ្ធិពលបំផុតរបស់ពិភពលោក ដោយមានសិទ្ធិចូលទៅកាន់ប្រទេស ឬដែនដី ចំនួន ១៩៣ ដោយមិនប្រើទិដ្ឋាការ។ បន្ទាប់មកគឺកូរ៉េខាងត្បូង និងជប៉ុន។

សន្ទស្សន៍លិខិតឆ្លងដែន Henley តាមដានសេរីភាពនៃការធ្វើដំណើរជាសកលនៅទូទាំង ២២៧ ប្រទេស និងដែនដី ដោយប្រើទិន្នន័យផ្តាច់មុខពីសមាគមដឹកជញ្ជូនផ្លូវអាកាសអន្តរជាតិ (IATA)។ សន្ទស្សន៍នេះ ត្រូវបានធ្វើបច្ចុប្បន្នភាពជាទៀងទាត់ពេញមួយឆ្នាំ ដើម្បីឆ្លុះបញ្ចាំងពីការផ្លាស់ប្តូរគោលនយោបាយទិដ្ឋាការ៕