លីគបាល់ទះកម្ពុជា Archives - Kampuchea Thmey Daily

អ្នកប៉ះសេឆ្នើមប្រចាំក្លិប៦ក្នុងលីគបាល់ទះកំពូលកម្ពុជា

chean virakbot — Thu, 01 Feb 2024 10:09:25 +0000

កីឡាករប៉ះសេជាអ្នកចែកបាល់ឲ្យកីឡាករស្មាត់វ៉ៃផ្តាច់ត្រូវមានភាពឆ្លាតវៃក្នុងលើកបាល់ឲ្យស្មាត់ស្តាំ ឆ្វេង ឬកណ្តាលដើម្បីផ្តាច់។ អ្នកប៉ះសេត្រូវការជំនាញ បច្ចេកទេស កល់ល្បិច និងល្បឿនលឿន។

លីគបាល់ទះកំពូលកម្ពុជា (តេជោលីគ) បានឈានដល់ជុំទី២ បន្ទាប់ពីដំណើរការប្រកួតជុំទី១ចប់។ ថ្ងៃសារព័ត៌មាន«កម្ពុជាថ្មី» សូមលើកយកអ្នកប៉ះសេប្រចាំក្រុមទាំង៦ដែលកំពុងប្រកួតក្នុងជុំទី២តេជោលីគ។ ក្នុងចំណោមកីឡាករទាំង៦នាក់នេះ អាចមានម្នាក់ឈ្នះពានរង្វាន់ឯកតជនគឺអ្នកប៉ះឆ្នើមប្រចាំព្រឹត្តិការណ៍តេជោលីគ។

កីឡាករ ត្រឹង ឌឹកហាញ់ (លេខ២០) របស់ក្រសួងមហាផ្ទៃ

កីឡាករវៀតណាម ត្រឹង ឌឹកហាញ់ កើតឆ្នាំ១៩៩៥ កម្ពស់១.៨៨ ទម្ងន់៨០គីឡូក្រាម មានបទពិសោធច្រើនទាំងក្លិប និងក្រុមបាល់ទះជម្រើសជាតិវៀតណាម។ រូបគេមានបទពិសោធលេងនៅលីគបាល់ទះវៀតណាម កីឡាស៊ីហ្គេម និងពានរង្វាន់ផ្សេងៗទៀតជាមួយជម្រើសជាតិវៀតណាម។ ពេលនេះ រូបគេជាតួសំខាន់ម្នាក់ប្រចាំក្រុមបាល់ទះក្រសួងមហាផ្ទៃ។

កីឡាករ ហួត សុភា (លេខ១២) ជាប្រធានកងពលធំអន្តរាគមន៍លេខ៣

កីឡាករ ហួត សុភា អាចត្រូវបានចាត់ទុកជាកីឡាករអាយុច្រើនជាងគេប្រចាំព្រឹត្តិការណ៍បាល់ទះតេជោលីគរដូវកាលដំបូងនេះ។ លោកបានលេងបាល់ទះឲ្យក្រុមកងពលធំអន្តរាគមន៍លេខ៣រាប់ឆ្នាំមកហើយ និងត្រូវបានគេហៅថា អ្នកប៉ះសេ៧ជំនាន់។ ទោះបីជាអាយុច្រើនបន្តិច ប៉ុន្តែលោកនៅតែជាកីឡាករគ្រប់គ្រងស្ថានការប្រកួតដ៏សំខាន់របស់ក្រុមបញ្ជាការដ្ឋានអន្តរាគមន៍លេខ៣។

កីឡាករ ឡាង រាសីកែវ (លេខ១៩) ជាប្រធានក្រុមស្នងការដ្ឋាននគរបាលរាជធានីភ្នំពេញ

កីឡាករ ឡាង រាសីកែវ កើតឆ្នាំ១៩៩៧ កម្ពស់១.៨០ម៉ែត្រ ទម្ងន់៧៤គីឡូក្រាម បានដើរតួនាទីយ៉ាងសំខាន់របស់ស្នងការដ្ឋាននគរបាលរាជធានីភ្នំពេញ។ រូបគេមានពិសោធច្រើនសម្រាប់ការប្រកួតក្នុងស្រុក ប៉ុន្តែមិនសូវមានបទពិសោធច្រើនលើឆាកអន្តរជាតិទេ។

កីឡាករ ហុង ផារ័ត្ន (លេខ១៧) ជាប្រធានក្រុមស្នងការដ្ឋាននគរបាលខេត្តពោធិ៍សាត់

កើតឆ្នាំ១៩៩៦ កម្ពស់១.៧៥ម៉ែត្រ ទម្ងន់៦០គីឡូក្រាម ផារ័ត្ន ជាអ្នកប៉ះសេដ៏មានប្រសិទ្ធភាពឲ្យស្មាត់ ឌី លីដា ផ្តាច់ ដែលបានជួយក្រុមស្នងការដ្ឋាននគរបាលខេត្តពោធិ៍សាត់ក្លាយជាក្រុមខេត្តតែមួយគត់បានឡើងជុំទី២។ ទោះបីជាយ៉ាងណា រូបគេមានបទពិសោធច្រើនតែក្នុងស្រុកប៉ុណ្ណោះ។

កីឡាករ Dior Zulfiri (លេខ១៥) ជាប្រធានក្រុមបញ្ជាការដ្ឋានអង្គរក្ស

កើតឆ្នាំ១៩៩៦ កម្ពស់១.៨៧ម៉ែត្រ ទម្ងន់៧៨គីឡូក្រាម ឌីអូ ពាក់អាវលេខ១៥ ត្រូវបានក្រុមបញ្ជាការដ្ឋានអង្គរក្សផ្តល់ទំនុកចិត្តជាប្រធានក្រុម បើទោះជារូបគេចូលរួមជាមួយនៅដើមឆ្នាំ២០២៤។ រូបគេជាកីឡាករមានពិសោធច្រើននៅលីគបាល់ទះកំពូលឥណ្ឌូណេស៊ី និងជម្រើសជាតិឥណ្ឌូណេស៊ីដែលឈ្នះមេដាយមាសស៊ីហ្គេម៣លើកជាប់គ្នា និងធ្លាប់ឈ្នះពានរង្វាន់ឯកតជនជាអ្នកប៉ះសេឆ្នើមនៅលីគឥណ្ឌូណេស៊ី២ដង។

កីឡាករ សួន ចាន់ណារ៉ូ (លេខ១៧) ជាប្រធានក្រុមវិសាខា

អ្នកគាំទ្រស្គាល់ច្បាស់ណាស់កីឡាកររហស្សនាម«ក្មេងតូច» សួន ចាន់ណារ៉ូ កើតឆ្នាំ១៩៩៥ កម្ពស់១.៩២ម៉ែត្រ ទម្ងន់៩៨គីឡូក្រាម។ កីឡាករលេខ១៧មានបទពិសោធច្រើនទាំងក្នុង និងក្រៅប្រទេស ជាពិសេសជាប្រធានក្រុមបាល់ទះជម្រើសជាតិកម្ពុជាដែលបានឈ្នះមេដាយប្រាក់ ២០២៣ និងសំរិទ្ធស៊ីហ្គេម២០២១។ រូបគេជាអ្នកប៉ះសេដ៏ល្អរបស់វិសាខាដែលធ្វើដំណើរដ៏ជោគជ័យក្នុងលីគបាល់ទះកំពូលកម្ពុជា។

ក្នុងចំណោមកីឡាករប៉ះសេទាំង៦ខាងលើ ស៊ួន ចាន់ណារ៉ូ និង ឌីអូ ជាបេក្ខភាពលេចធ្លោជាងគេក្នុងការដណ្តើមពានរង្វាន់ឯកតជនអ្នកប៉ះសេឆ្នើមប្រចាំពានរង្វាន់បាល់ទះតេជោលីគ៕

អត្ថបទ៖ វីរបុត្រ

The post អ្នកប៉ះសេឆ្នើមប្រចាំក្លិប៦ក្នុងលីគបាល់ទះកំពូលកម្ពុជា appeared first on Kampuchea Thmey Daily.

គួន ម៉ុម បង្ហើបពីការចុះកុងត្រារួចរាល់ទៅលេងក្រៅប្រទេស

chean virakbot — Sat, 27 Jan 2024 01:29:19 +0000

កីឡាករបាល់ទះឆ្នើម គួន ម៉ុម បានបង្ហើញឲ្យដឹងពីការចុះកុងត្រារួចរាល់សម្រាប់ការទៅលេងនៅក្រៅប្រទេស បន្ទាប់ពីព្រឹត្តិការណ៍បាល់ទះតេជោលីគរដូវកាលទី១ និងពានរង្វាន់មួយទៀតនាខែមីនា ឆ្នាំ២០២៤។

បន្ទាប់ពីជួយក្រុមវិសាខាឲ្យយកឈ្នះលើក្រុមបញ្ជាការដ្ឋានអង្គរក្សដោយលទ្ធផល ៣-០ កាលពីរសៀលថ្ងៃសុក្រទី២៦ ខែមករា កីឡាករ គួន ម៉ុម បានបង្ហើបក្នុងបទសម្ភាសមួយថា ខ្លួនបានចុះកុងត្រារួចរាល់ហើយសម្រាប់ការទៅលេងនៅក្រៅប្រទេស ប៉ុន្តែសមាជិកជម្រើសជាតិកម្ពុជារូបនេះមិនទាន់ឲ្យដឹងពីឈ្មោះក្លិបនៅលីគប្រទេសណាដែលត្រូវទៅលេងនោះទេ។

កីឡាករបាននិយាយថា ៖«និយាយបង្ហើបតិចចុះ ប្រហែលជាចប់លីគអត់អាចមានពេលច្រើនលេងជាមួយគាត់ (សុវណ្ណនាថ)ទេ។ សុំលាក់ប្រទេសសិនដែលត្រូវទៅ តែចុះកុងត្រាហើយ សុំលាក់សិន»។ សុវណ្ណនាថដែលបានចេញទៅនៅក្រៅប្រទេសជាកីឡាករបាល់ទះដ៏ល្បីម្នាក់បានប្រកាសថា ខ្លួននឹងមកប្រកួតមិត្តភាពជាមួយ គួន ម៉ុម នាពេលខាងមុខ។

គួន ម៉ុន បានឲ្យដឹងថា បន្ទាប់ពីចប់ព្រឹត្តិការណ៍លីគបាល់ទះកំពូលកម្ពុជា ក្រុមវិសាខានឹងបន្តលេងពានរង្វាន់មួយទៀតនៅខែមីនា ឆ្នាំ២០២៤ ដូច្នេះក្រោយពេលចប់ភារកិច្ចក្នុងពានរង្វាន់ខាងមុខទើបចេញទៅក្រៅប្រទេស។

ទោះបីជាយ៉ាងណា នៅមិនទាន់ដឹងថា ការចុះកុងត្រាទៅលេងនៅក្រៅប្រទេសដែលតារាបាល់ទះដ៏ឆ្នើមរបស់កម្ពុជា គួន ម៉ុម បង្ហើបឲ្យដឹងថាតើជាកុងត្រាផ្ទាល់ខ្លួនម្នាក់ឯង ឬក៏ជាក្រុមវិសាខា ពីព្រោះតាមដំណឹងលេចឮថា ក្រុមបាល់ទាត់វិសាខា គ្រោងនឹងចេញទៅប្រកួតនៅក្រៅប្រទេសនាពេលខាងមុខ។

គិតត្រឹមសប្តាហ៍ទី៣នៃលីគបាល់ទះកំពូលកម្ពុជា ក្រុមវិសាខាមិនទាន់ស្គាល់បរាជ័យឡើយក្នុងចំណោម៦ប្រកួត និងកំពុងឈរលើកំពូលតារាងយ៉ាងរឹងមាំ។ ស្របពេលជាមួយគ្នានេះ គួន ម៉ុម សង្ឃឹម៧០%ដែលវិសាខាអាចឈ្នះជើងឯកលីគជាលើកដំបូង៕

អត្ថបទ៖ វីរបុត្រ

The post គួន ម៉ុម បង្ហើបពីការចុះកុងត្រារួចរាល់ទៅលេងក្រៅប្រទេស appeared first on Kampuchea Thmey Daily.

ជំនួបធំមិនគួររំលង! វិសាខា ប៉ះ បញ្ជាការដ្ឋានអង្គរក្ស តេជោលីគថ្ងៃសុក្រនេះ

chean virakbot — Wed, 24 Jan 2024 03:10:56 +0000

ការប្រកួតបាល់ទះដែលអ្នកគាំទ្រមិនគួររំលងនឹងចូលមកដល់នារសៀលថ្ងៃសុក្រ ទី២៦ ខែមករា នេះនៅពេលក្រុមមិនទាន់ចាញ់ដូចគ្នាគឺ វិសាខា ប៉ះ បញ្ជាការដ្ឋានអង្គរក្ស ក្នុងសប្តាហ៍ទី៣នៃពានរង្វាន់បាល់ទះតេជោលីគរដូវកាល២០២៤។

ឆ្លងកាត់ការប្រកួត៥លើកក្នុង២សប្តាហ៍កន្លងមក វិសាខា មិនទាន់ស្គាល់បរាជ័យម្តងណាឡើយ សូម្បីតែ១សិតក៏មិនធ្លាប់ចាញ់ដែរ។ ៥ប្រកួតស្មើនឹង១៥សិតគឺវិសាខាឈ្នះទាំងអស់ដោយរកបាន១៦ពិន្ទុពេញ កំពុងឈរចំណាត់ថ្នាក់លេខ១ក្នុងតារាងពិន្ទុ។

វិសាខា ៣-០ នគរបាលខេត្តព្រះសីហនុ (២៥-១៣, ២៥-១៩ និង ២៥-១៨)
វិសាខា ៣-០ នគរបាលខេត្តពោធិ៍សាត់ (២៥-១៦, ២៥-២៣ និង២៥-១២)។
វិសាខា ៣-០ នគរបាលខេត្តកណ្តាល (២៥-១៤, ២៥-១៨ និង ២៥-១២)
វិសាខា ៣-០ នគរបាលរាជធានីភ្នំពេញ (២៥-១៩, ២៥-១៣ និង២៥-២០)
វិសាខា ៣-០ កងពលធំអន្តរាគមន៍លេខ៣ (២៥-២២, ២៥-១៥ និង២៥-២៣)

ចំណែកបញ្ជាការដ្ឋានអង្គរក្សវិញឆ្លងកាត់៥ប្រកួតក៏ទទួលបានជ័យជម្នះទាំង៥ប្រកួតដែរ ប៉ុន្តែប្រកួតខ្លះចាញ់១សិត ប្រកួតខ្លះចាញ់២សិត។ ជាក់ស្តែងពួកគេបានចាញ់នគរបាលរាជធានីភ្នំពេញ២សិត និងចាញ់ក្រសួងមហាផ្ទៃ២សិត។

បញ្ជាការដ្ឋានអង្គរក្ស ៣-២ នគរបាលរាជធានីភ្នំពេញ (២៥-២៣, ២៥-១៩, ២១-២៥, ២១-២៥ និង ២៣-២១)
បញ្ជាការដ្ឋានអង្គរក្ស ៣-១ នគរបាលខេត្តពោធិ៍សាត់ (២៥-២៣, ២៥-២១, ៣៣-៣៥ និង ២៥-១៤)
បញ្ជាការដ្ឋានអង្គរក្ស ៣-២ ក្រសួងមហាផ្ទៃ (២៥-១៥, ៤១-៤៣, ២៥-២២, ២៣-២៥ និង ១៥-៩)
បញ្ជាការដ្ឋានអង្គរក្ស ៣-១ កងពលធំអន្តរាគមន៍លេខ៣ (២៣-២៥, ២៥-១៨, ២៥-១៨ និង ២៥-២១)
បញ្ជាការដ្ឋានអង្គរក្ស ៣-០ នគរបាលខេត្តព្រះសីហនុ (២៥-១៥, ២៥-១៥ និង២៥-១៩)

សម្រាប់ការប្រកួតសប្តាហ៍ទី៣នេះ វិសាខា អាចត្រូវបានចាត់ទុកថាជាការប្រកួតដែលជួបដៃគូខ្លាំងជាងកាលពីរសប្តាហ៍កន្លងទៅនៅពេលពួកគេជួប បញ្ជាការដ្ឋានអង្គរក្ស នៅថ្ងៃសុក្រ ទី២៦ ខែមករា និងបន្តជួបក្រសួងមហាផ្ទៃ នៅថ្ងៃសៅរ៍ ទី២៧ ខែមករា។

នៅថ្ងៃអាទិត្យ ទី២៨ ខែមករា នឹងឈានចូលដល់ជុំទី២ ដោយមានតែ៦ក្រុមប៉ុណ្ណោះត្រូវប្រជែងគ្នាវគ្គវិលជុំសន្សំពិន្ទុទៀត ខណៈក្រុមចំណាត់ថ្នាក់លេខ៧ និងលេខ៨ត្រូវកាត់ចេញ បន្ទាប់ពីចប់ជុំទី១។

កម្មវិធីប្រកួតថ្ងៃទី២៦ ខែមករា ឆ្នាំ២០២៤

បញ្ជាការដ្ឋានអង្គរក្ស vs វិសាខា (ម៉ោង១រសៀល)
កងពលធំអន្តរាគមន៍លេខ៣ vs ក្រសួងមហាផ្ទៃ (ម៉ោង៣រសៀល)
នគរបាលរាជធានីភ្នំពេញ vs នគរបាលខេត្តកណ្តាល (ម៉ោង៥ល្ងាច
នគរបាលខេត្តព្រះសីហនុ vs នគរបាលខេត្តពោធិ៍សាត់ (ម៉ោង៧យប់)

កម្មវិធីថ្ងៃទី២៧ ខែមករា ឆ្នាំ២០២៤

កងពលធំអន្តរាគមន៍លេខ៣ vs នគរបាលខេត្តពោធិ៍សាត់ (ម៉ោង១រសៀល)
បញ្ជាការដ្ឋានអង្គរក្ស vs នគរបាលខេត្តកណ្តាល (ម៉ោង៣រសៀល)
នគរបាលរាជធានីភ្នំពេញ vs នគរបាលខេត្តព្រះសីហនុ (ម៉ោង៥ល្ងាច)
វិសាខា vs ក្រសួងមហាផ្ទៃ (ម៉ោង៧យប់)

អត្ថបទ៖ វីរបុត្រ

The post ជំនួបធំមិនគួររំលង! វិសាខា ប៉ះ បញ្ជាការដ្ឋានអង្គរក្ស តេជោលីគថ្ងៃសុក្រនេះ appeared first on Kampuchea Thmey Daily.

ផុល រតនៈ «ការដាក់កីឡាករបរទេសក្នុងលីគបាល់ទះកម្ពុជាជារឿងល្អបំផុត»

Pha Rothana — Tue, 23 Jan 2024 02:39:13 +0000

កីឡាករ ផុល រតនៈ បានមើលឃើញពីផលវិជ្ជមានដែលអនុញ្ញាតឲ្យមានកីឡាករបរទេសចូលរួមប្រកកួតប្រជែងក្នុងលីគបាល់ទះកំពូលកម្ពុជារដូវកាលដំបូង។

ឆ្នាំ២០២៤ សហព័ន្ធកីឡាបាល់ទះកម្ពុជារៀបចំបង្កើតពានរង្វាន់បាល់ទះ «តេជោលីគ»ជាលើកដំបូងដែលមានក្លិបចំនួន៨ចូលរួម។ កីឡាករជម្រើសជាតិកម្ពុជា ផុល រតនៈ របស់ក្លិបបាល់ទះវិសាខា យល់ឃើញថា ការដាក់កីឡាករបរទេសឲ្យចូលរួមគឺមានផលចំណេញច្រើន ដោយសារកីឡាករកម្ពុជាអាចរៀនសូត្របន្ថែមពីកីឡាករបរទេស ការប្រកួតប្រជែងកាន់តែខ្លាំង ហើយគុណភាពកីឡាករកម្ពុជាកាន់តែល្អប្រសើរដែលរួមចំណែកពង្រឹងដល់ក្រុមជម្រើសជាតិកម្ពុជាលើឆាកអន្តរជាតិ។

ផុល រតនៈ បានប្រាប់«កម្ពុជាថ្មី»ថា ៖«យើងគួរបើកចិត្តឲ្យទូលាយ ហើយយើងអនុញ្ញាតឲ្យកីឡាករបរទេសចូលលេងបាន ដើម្បីដកស្រង់បទពិសោធពីពួកគាត់វិញ។ យើងអាចមើលឃើញថា ពួកគាត់ល្អត្រង់ណា ហើយចំណុចពិសេសរបស់ពួកគាត់កន្លែងណា។ យើងអាចរៀនសូត្រពីពួកគាត់បាន។ យើងអាចផ្លាស់ប្តូរបទពិសោធគ្នាទៅវិញទៅមក។ អីចឹងយើងទើបអាចអភិវឌ្ឍទៅមុខ។ បើយើងលេងតែយើងខ្មែរសុទ្ធគឺយើងស្គាល់សមត្ថភាពគ្នាអស់ហើយ។ បើមានបរទេសចូលរួមយើងអាចឡើងទៅមួយកម្រិតទៀត»។

ផល រតនៈ (លេខ១៦) ក្នុងក្រុមជម្រើសជាតិកម្ពុជា

ក្នុងរដូវកាលដំបូងនេះក្រុមបាល់ទះខ្លាំងៗមួយចំនួនបាននាំយកកីឡាករបរទេសល្អៗមកពង្រឹងក្រុមក្នុងពានរង្វាន់បាល់ទះ «តេជោលីគ»។ ក្នុងនោះក្រុមបញ្ជាការដ្ឋានអង្គរក្សបាននាំយកកីឡាករឥណ្ឌូណេស៊ី៣រូប ក្រសួងមហាផ្ទៃបាននាំចូលកីឡាករវៀតណាម៣រូប វិសាខាមានកីឡាករគុយបា៣រូប និងក្រុមស្នងការដ្ឋាននគរបាលរាជធានីភ្នំពេញមានកីឡាករគុយបា។

កីឡាករ ផុល រតនៈ បានបន្ថែមថា៖«ចំពោះកីឡាករបរទេសដែលមកលេងនៅកម្ពុជាសុទ្ធតែល្អ។ ពួកគាត់សុទ្ធតែធ្លាប់លេងជាមួយខ្ញុំ។ ខ្ញុំធ្លាប់ជាកីឡាករជម្រើសជាតិ អីចឹងពួកយើងធ្លាប់ជួបគ្នា។ ក្រុមបញ្ជាការដ្ឋានអង្គរក្សមានកីឡាករឥណ្ឌូណេស៊ី ក្រសួងមហាផ្ទៃមានកីឡាករវៀតណាម ខ្ញុំសុទ្ធតែធ្លាប់លេងប៉ះពួកគាត់នៅជម្រើសជាតិ»៕

អត្ថបទ៖ ផា រតនា

The post ផុល រតនៈ «ការដាក់កីឡាករបរទេសក្នុងលីគបាល់ទះកម្ពុជាជារឿងល្អបំផុត» appeared first on Kampuchea Thmey Daily.

វិសាខាមានកំណត់ត្រា១០០%កំពុងឈរលើកំពូលតារាងតេជោលីគ

chean virakbot — Mon, 22 Jan 2024 03:31:25 +0000

ក្រុមបាល់ទះវិសាខាមិនទាន់ស្គាល់ចាញ់ឡើយ សូម្បីមួយសិតក្នុងចំណោមការប្រកួត៥លើកស្មើនឹង១៥សិតនៃពានរង្វាន់បាល់ទះតេជោលីគដែលសប្តាហ៍ទី២ដែលបានបញ្ចប់ទៅកាលពីថ្ងៃសៅរ៍ និងអាទិត្យកន្លងទៅ។

ការប្រកួតលើកទី១ វិសាខាបានយកឈ្នះនគរបាលខេត្តកណ្តាល ដោយលទ្ធផល ៣-០ (២៥-១៤, ២៥-១៨ និង ២៥-១២)។ ការប្រកួតទី២ វិសាខា បានយកឈ្នះក្រុមនគរបាលខេត្តពោធិ៍សាត់ ដោយលទ្ធផល ៣-០ (២៥-១៦, ២៥-២៣ និង២៥-១២)។

ការប្រកួតលើកទី៣កាលពីថ្ងៃសុក្រ ទី១៩ ខែមករា វិសាខាបានយកឈ្នះក្រុមនគរបាលខេត្តព្រះសីហនុ ៣-០ (២៥-១៣, ២៥-១៩ និង ២៥-១៨)។ កាលពីថ្ងៃសៅរ៍ ទី២០ ខែមករា ពួកគេបានយកឈ្នះស្នងការដ្ឋាននគរបាលរាជធានីភ្នំពេញដោយលទ្ធផល ៣-០ (២៥-១៩, ២៥-១៣ និង២៥-២០) សម្រាប់ការប្រកួតលើកទី៤ និងថ្ងៃអាទិត្យ ទី២១ ខែមករា បានយកឈ្នះកងពលធំអន្តរាគមន៍លេខ៣ ដោយលទ្ធផល ៣-០ (២៥-២២, ២៥-១៥ និង២៥-២៣) សម្រាប់ការប្រកួតលើកទី៥។

ការទទួលបានជ័យជម្នះទាំង៥ប្រកួត វិសាខា មាន១៥ពិន្ទុពេញ កំពុងឈរលើកំពូលតារាងដែលជាកំណត់ត្រាល្អឥតខ្ចោះ១០០%។

ជាមួយគ្នានេះ ក្រុមខ្លាំងបញ្ជាការដ្ឋានអង្គរក្ស ក៏ទទួលបានជ័យជម្នះទាំង៥ប្រកួតដែរ ប៉ុន្តែប្រកួតខ្លះពួកគេចាញ់១ ឬ២សិតដែលធ្វើឲ្យមិនអាចរកបានពិន្ទុពេញ ដូច្នេះពួកគេមាន១៣ពិន្ទុឈរចំណាត់ថ្នាក់លេខ២ ខណៈក្រសួងមហាផ្ទៃចាញ់១ប្រកួត មាន១៣ពិន្ទុ ឈរចំណាត់ថ្នាក់លេខ៣។

ក្រុមកងពលធំអន្តរាគមន៍លេខ៣មាន៦ពិន្ទុ ឈរលេខ៤ បន្ទាប់ពីឈ្នះ២ប្រកួត និងចាញ់៣ប្រកួត។ ដូចគ្នានេះដែរ ស្នងការរដ្ឋាននគរបាលរាជធានីភ្នំពេញមាន៦ពិន្ទុ ឈរលេខ៥ តាមរយៈជ័យជម្នះ២ប្រកួត និងចាញ់៣ប្រកួត ហើយក្រុមនគរបាលខេត្តព្រះសីហនុរកបាន៤ពិន្ទុ កំពុងឈរលេខ៦ បន្ទាប់ពីឈ្នះ ១ប្រកួត និងចាញ់៤ប្រកួត។

ក្រុមដែលស្ថិតនៅតំបន់កាត់ចេញគឺ នគរបាលខេត្តពោធិ៍សាត់ មាន៣ពិន្ទុ ឈរលេខ៧ ពីការឈ្នះ១ប្រកួត និងចាញ់៤ប្រកួត ខណៈនគរបាលខេត្តកណ្តាលមិនទាន់មានពិន្ទុទេ ដោយសារចាញ់ទាំង៥ប្រកួត ក្នុងនោះសូម្បីតែ១សិតក៏មិនដែលឈ្នះ ដូច្នេះគ្មានពិន្ទុឡើយ។

លទ្ធផលឥតខ្ចោះរបស់វិសាខា

វិសាខា ៣-០ នគរបាលខេត្តព្រះសីហនុ
វិសាខា ៣-០ នគរបាលពោធិ៍សាត់
វិសាខា ៣-០ នគរបាលខេត្តកណ្តាល
វិសាខា ៣-០ នគរបាលរាជធានីភ្នំពេញ
វិសាខា ៣-០ កងពលធំអន្តរាគមន៍លេខ៣

អត្ថបទ៖ វីរបុត្រ

The post វិសាខាមានកំណត់ត្រា១០០%កំពុងឈរលើកំពូលតារាងតេជោលីគ appeared first on Kampuchea Thmey Daily.

កំពុងមានកំណត់ត្រាល្អជាងគេ តើក្រុមណាអាចបញ្ឈប់វិសាខាក្នុងតេជោលីគ?

chean virakbot — Sat, 20 Jan 2024 02:39:19 +0000

ក្រុមបាល់ទះវិសាខាកំពុងក្លាយជាក្រុមដែលមានកំណត់ត្រាល្អជាងគេសម្រាប់ការប្រកួត៣លើកកន្លងមកក្នុងការប្រកួតបាល់ទះតេជោលីគរដូវកាលទី១ស្ថិតក្នុងសប្តាហ៍ទី២។

ឆ្លងកាត់ការប្រកួត៣លើកកន្លងមក គ្មានក្រុមណាមួយដែលអាចយកឈ្នះលើក្រុមវិសាខាឡើយ សូម្បីតែ១សិតក៏មិនទាន់ចាញ់ផង។ ការប្រកួតលើកទី១ វិសាខាបានយកឈ្នះនគរបាលខេត្តកណ្តាល ដោយលទ្ធផល ៣-០ (២៥-១៤, ២៥-១៨ និង ២៥-១២)។

ការប្រកួតទី២ វិសាខា បានយកឈ្នះក្រុមនគរបាលខេត្តពោធិ៍សាត់ ដោយលទ្ធផល ៣-០ (២៥-១៦, ២៥-២៣ និង២៥-១២) ហើយការប្រកួតលើកទី៣កាលពីថ្ងៃសុក្រម្សិលមិញនេះ វិសាខាបានយកឈ្នះក្រុមនគរបាលខេត្តព្រះសីហនុ ៣-០ (២៥-១៣, ២៥-១៩ និង ២៥-១៨)។

ងាកទៅមើលក្រុមខ្លាំងផ្សេងៗទៀត ថ្វីបើបានយកឈ្នះដៃគូមែន ប៉ុន្តែក៏មានចាញ់សិតខ្លះដែរ។ ក្នុងនោះ ក្រសួងមហាផ្ទៃប្រកួតលើកទី១បានឈ្នះនគរបាលខេត្តពោធិ៍សាត់ ៣-១, ប្រកួតលើកទីបានឈ្នះនគរបាលរាជធានីភ្នំពេញ ៣-១ និងប្រកួតលើកទី៣ បានចាញ់បញ្ជាការដ្ឋានអង្គរក្ស ១-៣។

ក្រុមខ្លាំងបញ្ជាការដ្ឋានអង្គរក្ស បានឈ្នះទាំង៣ប្រកួតគឺប្រកួតលើកទី១ឈ្នះនគរបាលខេត្តព្រះសីហនុ ៣-០, ប្រកួតលើកទី២ឈ្នះកងពលធំអន្តរាគមន៍លេខ៣ ដោយលទ្ធផល ៣-១ និងប្រកួតលើកទី៣ ឈ្នះក្រសួងមហាផ្ទៃ ៣-១។ ក្នុងចំណោមក្នុងទាំង៣ប្រកួត បញ្ជាការដ្ឋានអង្គរក្សចាញ់២សិត។

ចំណែកក្រុមផ្សេងៗទៀត សុទ្ធតែចាញ់ និងឈ្នះ ដូច្នេះមានតែវិសាខាតែមួយគត់ដែលមានកំណត់ត្រាល្អជាងគេក្នុងចំណោម៣ប្រកួតកន្លងទៅ។ វេលាម៉ោង១រសៀល ថ្ងៃសៅរ៍ ទី២០ ខែមករានេះ វិសាខា ប៉ះ នគរបាលរាជធានីភ្នំពេញ និងថ្ងៃស្អែក អាទិត្យ ទី២១ ខែមករា ប៉ះ កងពលធំអន្តរាគមន៍លេខ៣។

ថ្ងៃទី១៩ ខែមករា ឆ្នាំ២០២៤

នគរបាលខេត្តកណ្តាល ០-៣ កងពលធំអន្តរាគមន៍លេខ៣
ក្រសួងមហាផ្ទៃ ១-៣ បញ្ជាការដ្ឋានអង្គរក្ស
នគរបាលខេត្តពោធិ៍សាត់ ០-៣ នគរបាលរាជធានីភ្នំពេញ
វិសាខា ៣-០ នគរបាលខេត្តព្រះសីហនុ

ថ្ងៃទី១៤ ខែមករា ឆ្នាំ២០២៤

បញ្ជាការដ្ឋានអង្គរក្ស ៣-១ កងពលធំអន្តរាគមន៍លេខ៣
ក្រសួងមហាផ្ទៃ ៣-១ នគរបាលរាជធានីភ្នំពេញ
នគរបាលខេត្តកណ្តាល ០-៣ នគរបាលខេត្តព្រះសីហនុ
វិសាខា ៣-០ នគរបាលខេត្តពោធិ៍សាត់

ថ្ងៃទី១៣ ខែមករា ឆ្នាំ២០២៤

បញ្ជាការដ្ឋានអង្គរក្ស ៣-0 នគរបាលខេត្តព្រះសីហនុ
ក្រសួងមហាផ្ទៃ ៣-១ នគរបាលខេត្តពោធិ៍សាត់
វិសាខា ៣-០ នគរបាលខេត្តកណ្តាល
កងពលធំអន្តរាគមន៍លេខ៣ ២-៣ នគរបាលរាជធានីភ្នំពេញ

អត្ថបទ៖ វីរបុត្រ

The post កំពុងមានកំណត់ត្រាល្អជាងគេ តើក្រុមណាអាចបញ្ឈប់វិសាខាក្នុងតេជោលីគ? appeared first on Kampuchea Thmey Daily.

ហេតុអ្វីបារាំងខ្លាំងបាល់ទះមកចាប់ដៃគូជាមួយបាល់ទះខ្មែរ?

chean virakbot — Fri, 19 Jan 2024 02:29:28 +0000

កាលពីថ្ងៃទី១៧ ខែមករា ឆ្នាំ២០២៤ សហព័ន្ធកីឡាបាល់ទះកម្ពុជាបានចុះអនុស្សរណៈនៃការយោគយល់គ្នា (MOU) ជាមួយសហព័ន្ធកីឡាបាល់ទះបារាំងដើម្បីផ្លាស់ប្តូរបទពិសោធ និងជួយគ្នាទៅវិញទៅមកឆ្ពោះទៅរកការអភិវឌ្ឍបាល់ទះប្រទេសទាំងពីរឲ្យរីកចម្រើន។

ការចុះអនុស្សរណៈនៃការយោគយល់គ្នានេះមានគោលដៅសំខាន់រួមគ្នាគឺ ផ្លាស់ប្តូរបទពិសោធ ចំណេះជំនាញ បច្ចេកទេស និង ទិន្នន័យសម្រាប់អត្តពលិក គ្រូបង្វឹក រួមទាំងក្រុមការងារ។ ក្នុងនោះកម្ពុជាអាចអញ្ជើញក្រុមបាល់ទះបារាំងមកហ្វឹកហាត់រួមគ្នានៅកម្ពុជា និងលេងជាមួយគ្នា ហើយបារាំងក៏អាចអញ្ជើញក្រុមកម្ពុជាទៅបារាំងដើម្បីហ្វឹកហាត់រួមគ្នា និងប្រកួតមិត្តភាព។

បើក្រឡេកមើលគុណភាពកីឡាបាល់ទះកម្ពុជា និងបារាំងមានលក្ខណៈខុសគ្នាឆ្ងាយទាំងជម្រើសជាតិ ក្លិប និងលីគ។ បច្ចុប្បន្នក្រុមបាល់ទះបារាំងស្ថិតនៅចំណាត់ថ្នាក់លេខ៦លើពិភពលោក FIVB Men’s Volleyball World Ranking ប្រៀបធៀបនឹងក្រុមជម្រើសជាតិកម្ពុជាស្ថិតកក្រោម១៣០។ កម្ពុជាមានកីឡាករបាល់ទះអាជីពមិនច្រើនទេ ថ្វីបើមានមហាជនលេងច្រើន ហើយការប្រកួតលីគក៏ទើបចាប់ផ្តើមរដូវកាលដំបូង។ ចំណែកប្រទេសបារាំងមានអ្នកលេងបាល់ទះអាជីពរាប់ម៉ឺននាក់ មានក្លិបច្រើន មានក្រុមយុវជនទាំងបុរស-នារី មានការប្រកួតលីគរាប់ឆ្នាំ ហើយប្រកួតពានរង្វាន់អន្តរជាតិជាច្រើន។

ទោះបីបែបណាក្តី សហព័ន្ធកីឡាបាល់ទះបារាំងបានចុះអនុស្សរណៈនៃការយោគយល់គ្នាជាមួយសហព័ន្ធកីឡាបាល់ទះកម្ពុជា ជាពិសេសកម្ពុជាជាប្រទេសទី១ក្នុងតំបន់អាស៊ានដែលបារាំងចាប់ដៃគូ។ លោក Eric Tanguy ប្រធានសហព័ន្ធកីឡាបាល់ទះបារាំងបានឲ្យដឹងថា នេះជាលើកទី១ដែលប្រទេសបារាំងបានចាប់ដៃគូជាមួយប្រទេសនៅក្នុងតំបន់អាស៊ាន។ លោកសូមអរគុណដល់កម្ពុជាដែលបានទទួលក្រុមបាល់ទះជម្រើសជាតិបារាំងអាយុ១៩ឆ្នាំសម្រាប់ការប្រកួតមិត្តភាពកាលពីឆ្នាំ២០២៣។

លោកបានលើកឡើងថា ៖«បន្ទាប់ពីមានការប្រកួតមិត្តភាពរបស់ក្រុមបារាំងអាយុ១៩ឆ្នាំជាមួយកម្ពុជា ជាលទ្ធផលក្រុម U19 បារាំងបានឈ្នះជើងឯកពិភពលោកអាយុក្រោម១៩ឆ្នាំ ហើយក្រុមកម្ពុជាទទួលបានមេដាយប្រាក់ពីកីឡាស៊ីហ្គេម។ ដូច្នេះខ្ញុំសង្ឃឹមថា នឹងមានកម្មវិធីប្រកួតបែបនេះទៀត»។

លោក អាំង សិរីពិសិដ្ឋ អនុប្រធាន និងជាអគ្គលេខាធិការនៃសហព័ន្ធកីឡាបាល់ទះកម្ពុជាបានឲ្យដឹងថា ក្រុមបាល់ទះជម្រើសជាតិបារាំងអាយុក្រោម១៩ឆ្នាំបានឈ្នះជើងឯកពិភពលោកអាយុក្រោម១៩ឆ្នាំ បន្ទាប់ពីពួកគាត់បានមកប្រកួតមិត្តភាពជាមួយនឹងក្រុមជម្រើសជាតិកម្ពុជា។ តាមរយៈសមិទ្ធផលនេះ ថ្នាក់ដឹកនាំសហព័ន្ធបាល់ទះបារាំងចង់ឲ្យមានសកម្មភាពជាមួយកម្ពុជាបន្តទៀត ហើយឈានដល់ការចុះ MOU ជាមួយគ្នាដើម្បីបង្កើតចំណងមិត្តភាពឲ្យកាន់តែខ្លាំងលើសពីការប្រកួតមិត្តភាព។

តំណាងសហព័ន្ធកីឡាបាល់ទះកម្ពុជាបន្ថែមថា ជាងនេះទៀតនោះ ភាគីបារាំងចង់ឲ្យបាល់ទះកម្ពុជាបានចូលក្នុងក្របខណ្ឌលីគបាល់ទះដែលនិយាយភាសាបារាំង ស្របពេលកម្ពុជាកំពុងចង់បង្កើនការចាប់ដៃគូជាមួយប្រទេសដែលមានការអភិវឌ្ឍបាល់ទះស្រាប់។ នៅពេលកម្ពុជាចូលក្នុងក្របខណ្ឌលីគដែលនិយាយភាសាបារាំង កម្ពុជានឹងកាន់តែមានឱកាសក្នុងការចាប់ដៃគូជាមួយប្រទេសផ្សេងៗដូចជាជប៉ុនដែលជាដៃគូរបស់បារាំងផងដែរ។

លោក អាំង សិរីពិសិដ្ឋ បានបញ្ជាក់ថា ការប្រកួតមិត្តភាពអន្តរជាតិជាមួយបារាំងមិនមែនគិតតែចង់បានក្រុមជម្រើសជាតិបារាំងទាំងស្រុងនោះទេ ពីព្រោះពួកគេមានសមត្ថភាព និងបច្ចេកទេសខ្ពស់ណាស់ បើប្រៀបធៀបនឹងកម្ពុជា។ ទោះបីជាយ៉ាងណា ការដាក់លាយបញ្ចូលគ្នារវាងក្រុមយុវជនបារាំងជាមួយក្រុមធំបារាំងដើម្បីប្រកួតជាមួយជម្រើសជាតិកម្ពុជា ឬក្រុមយុវជនបារាំងអាយុក្រោម១៩ឆ្នាំ អាយុក្រោម២៣ឆ្នាំប្រកួតជាមួយជម្រើសជាតិកម្ពុជាដែលមានគុណភាពប្រហាក់ប្រហែលគ្នាពោលគឺមិនខុសគ្នាឆា្ងយដែលជាផ្នែកមួយធ្វើឲ្យភាគីទាំងពីរទទួលបានផលចំណេញរៀងៗខ្លួន។

សូមបញ្ជាក់ថា ការចុះអនុស្សរណៈនៃការយោគយល់គ្នាកាលពីរសៀលថ្ងៃទី១៧ ខែមករា ឆ្នាំ២០២៤ ក្រោមអធិបតីភាពលោក ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានសហព័ន្ធកីឡាបាល់ទះកម្ពុជាជាមួយលោក Eric Tanguy ប្រធានសហព័ន្ធកីឡាបាល់ទះបារាំង៕

អត្ថបទ៖ វីរបុត្រ

The post ហេតុអ្វីបារាំងខ្លាំងបាល់ទះមកចាប់ដៃគូជាមួយបាល់ទះខ្មែរ? appeared first on Kampuchea Thmey Daily.

ប្រវត្តិក្រាស់ Doni សមាជិកថ្មីរបស់បញ្ជាការដ្ឋានអង្គរក្សធ្លាប់លេងលីគជប៉ុន និងបារ៉ែន

chean virakbot — Thu, 18 Jan 2024 02:03:23 +0000

កីឡាករបាល់ទះជម្រើសជាតិឥណ្ឌូណេស៊ី Doni Haryono បានក្លាយជាសមាជិកថ្មីរបស់ក្លិបបញ្ជាការដ្ឋានអង្គរក្សក្នុងព្រឹត្តិការណ៍បាល់ទះតេជោលីគរដូវកាលដំបូង បន្ទាប់ពីដំណើរការបាន១សប្តាហ៍។

កីឡាករកើតនៅទី២១ ខែកុម្ភៈ ឆ្នាំ១៩៩៩ ក្នុងតំបន់ Magelang ខេត្ត Jawa Tengah ប្រទេសឥណ្ឌូណេស៊ី។ កីឡាករដែលមានកម្ពស់១.៩១ម៉ែត្រមានបទពិសោធច្រើនទាំងការលេងឲ្យក្លិប និងជម្រើសជាតិឥណ្ឌូណេស៊ី។

មុនពេលក្លាយជាកីឡាករបាល់ទះអាជីព Doni Haryono យុវជនដ៏មានទេពកោសល្យម្នាក់នេះធ្លាប់លេងកីឡាបាល់ទាត់នៅសាលាបឋមសិក្សា និងអនុវិទ្យាល័យ។ រូបគេធ្លាប់ត្រូវបានកោះហៅចូលក្រុមបាល់ទាត់ជម្រើសជាតិឥណ្ឌូណេស៊ីអាយុក្រោម១៦ឆ្នាំក្នុងនាមជាអ្នកចាំទី ប៉ុន្តែឪពុករបស់ខ្លួនសម្រេចឲ្យលេងបាល់ទះវិញ។ រូបគេបានចាប់ផ្តើមលេងបាល់ទះនៅពេលរៀនវិទ្យាល័យតាមបំណងប្រាថ្នារបស់ឪពុកដោយបានចូលហ្វឹកហាត់នៅមជ្ឈមណ្ឌលហ្វឹកហាត់ និងអប់រំរបស់ខេត្ត Central Java។

កីឡាករ Doni Haryono (លេខ៩)ពេលលេងស៊ីហ្គេមនៅកម្ពុជា

បន្ទាប់មក រូបគេបានចាប់ផ្តើមចូលរួមប្រកួតជើងឯកថ្នាក់ជាតិកម្រិតយុវជន។ នៅឆ្នាំ២០១៥ រូបគេបានចូលរួមក្រុមបាល់ទះយុវជនឥណ្ឌូណេស៊ីក្នុងព្រឹត្តិការណ៍កីឡាសិស្សអាស៊ាន ASEAN School Games នៅឆ្នាំ២០១៥ និង២០១៦។

ឆ្នាំ២០១៧ Doni បានចូលរួមជាមួយក្រុមបាល់ទះជម្រើសជាតិឥណ្ឌូណេស៊ីក្រុមធំក្នុងព្រឹត្តិការណ៍កីឡាស៊ីហ្គេម នៅប្រទេសម៉ាឡេស៊ី ដោយបានជួយក្រុមទទួលបានមេដាយប្រាក់។ បន្ទាប់មករូបគេបានជួយក្រុមបាល់ទះជម្រើសជាតិឥណ្ឌូណេស៊ីទទួលបានមេដាយមាសកីឡាស៊ីហ្គេម៣លើកជាប់គ្នាគឺ ស៊ីហ្គេមឆ្នាំ២០១៩ នៅហ្វីលីពីន ស៊ីហ្គេមឆ្នាំ២០២១នៅវៀតណាម និងស៊ីហ្គេមឆ្នាំ២០២៣ នៅប្រទេសកម្ពុជា។

កីឡាករ Doni Haryono (លេខ៩) ពេលលេងស៊ីហ្គេមនៅកម្ពុជា

ក្រៅពីនោះ រូបគេក៏បានជួយក្រុមជម្រើសជាតិឥណ្ឌូណេស៊ីឈ្នះជើងឯកលីគបាល់ទះអាស៊ាន SEA Men’s V.League ២ដងក្នុងឆ្នាំ២០២៣ដែលរៀបចំនៅឥណ្ឌូណេស៊ី និងហ្វីលីពីន។

រហូតមកដល់ពេលនេះ Doni Haryono បានលេងឲ្យក្លិបបាល់ទះអាជីពផ្លូវការចំនួន៧ផ្សេងនៅក្នុងប្រទេស៤ផ្សេងគ្នារាប់ទាំងកម្ពុជា។ ចាប់ផ្តើមដំបូងក្នុងឆ្នាំ២០១៦ រូបគេលេងឲ្យក្លិប Bekasi BVN នៅក្នុងលីគបាល់ទះឥណ្ឌូណេស៊ី។ ចន្លោះឆ្នាំ២០១៧-១៨ រូបគេលេងឲ្យក្លិបឥណ្ឌូណេស៊ី Jakarta Pertamina Energi។ នៅក្លិបនេះហើយដែលរូបគេបានឈ្នះជើងឯកលីគកំពូលឥណ្ឌូណេស៊ីជាលើកដំបូងក្នុងឆ្នាំ២០១៧។

ឆ្នាំ២០១៩ រូបគេបានចូលរួមជាមួយក្លិប Jakarta BNI 46 មុនពេលផ្លាស់ទៅក្រៅប្រទេសជាលើកដំបូងដោយបានចូលរួមជាមួយក្លិប Al Nasser ក្នុងលីគបាល់ទះបារ៉ែនជាកន្លែងដែលរូបគេបានចំណាយពេល២រដូវកាលឆ្នាំ២០២០ និង២០២១។ បន្ទាប់មក រូបគេបានវិលត្រឡប់មកឥណ្ឌូណេស៊ីវិញដោយចូលរួមក្លិប Bogor LavAni ក្នុងឆ្នាំ២០២២ ជាកន្លែងដែលរូបគេបានឈ្នះជើងឯកលីគកំពូលឥណ្ឌូណេស៊ីជាលើកទី២។

កាលពីឆ្នាំ២០២៣ Doni បានចូលរួមជាមួយក្លិប VC Nagano Tridents របស់លីគបាល់ទះកំពូលជប៉ុនដែលបានបញ្ចប់នៅចំណាត់ថ្នាក់លេខ៩ក្នុងចំណោម១០ក្លិប បន្ទាប់ពីឆ្លងកាត់៣៦ប្រកួតគឺឈ្នះតែ៥ប្រកួតប៉ុណ្ណោះ និងបានចាញ់៣១ប្រកួត។

តាមព័ត៌មានដែលបានផ្សាយថា ក្រោយចាកចេញពីប្រទេសជប៉ុន កីឡាករ Doni Haryono បានចូលក្លិបឥណ្ឌូណេស៊ី STIN Pasundan ប៉ុន្តែពេលនេះបានធ្វើដំណើរមកប្រទេសកម្ពុជាដើម្បីចូលរួមជាមួយក្លិបបញ្ជាការដ្ឋានអង្គរក្សសម្រាប់បាល់ទះតេជោលីគ។

ប្រវត្តិលេងឲ្យក្លិប

ឆ្នាំ២០១៦ ក្លិប Bekasi BVN (ឥណ្ឌូណេស៊ី)
ឆ្នាំ២០១៧-១៨ ក្លិប Jakarta Pertamina Energi (ឥណ្ឌូណេស៊ី)
ឆ្នាំ២០១៩ ក្លិប Jakarta BNI 46 (ឥណ្ឌូណេស៊ី)
ឆ្នាំ២០២០-២១ ក្លិប Al Nasser (បារ៉ែន)
ឆ្នាំ២០២២ ក្លិប Bogor LavAni ((ឥណ្ឌូណេស៊ី)
ឆ្នាំ២០២៣ ក្លិប VC Nagano Tridents (ជប៉ុន)
ឆ្នាំ២០២៤ ក្លិបបញ្ជាការដ្ឋានអង្គរក្ស (កម្ពុជា)

ក្រុមឥណ្ឌូណេស៊ីឈ្នះមេដាយមាសស៊ីហ្គេមនៅកម្ពុជា

សមិទ្ធផល

មេដាយមាសស៊ីហ្គេម ៣លើក សម្រាប់ជម្រើសជាតិឥណ្ឌូណេស៊ី ឆ្នាំ២០១៩ ២០២១ និង២០២៣
ជើងឯកលីគអាស៊ាន SEA V.League ២លើក សម្រាប់ជម្រើសជាតិ ឆ្នាំ២០២៣
ពានរង្វាន់កីឡាករឆ្នើមបំផុតប្រចាំព្រឹត្តិការណ៍កីឡាស៊ីហ្គេម ឆ្នាំ២០១៩
ពានរង្វាន់កីឡាករឆ្នើមបំផុតប្រចាំលីគឥណ្ឌូណេស៊ី ឆ្នាំ២០២២
ជើងឯកលីគបាល់ទះឥណ្ឌូណេស៊ី ឆ្នាំ២០១៧ ជាមួយក្លិប Jakarta Pertamina Engergi
ជើងឯកលីគបាល់ទះឥណ្ឌូណេស៊ី ឆ្នាំ២០២២ ជាមួយក្លិប Bogor LavAni
មេដាយប្រាក់កីឡាសិស្សអាស៊ាន ឆ្នាំ២០១៦
មេដាយប្រាក់ស៊ីហ្គេម ឆ្នាំ២០១៧

អត្ថបទ៖ វីរបុត្រ

The post ប្រវត្តិក្រាស់ Doni សមាជិកថ្មីរបស់បញ្ជាការដ្ឋានអង្គរក្សធ្លាប់លេងលីគជប៉ុន និងបារ៉ែន appeared first on Kampuchea Thmey Daily.

លីគបាល់ទះកម្ពុជា Archives - Kampuchea Thmey Daily

អ្នក​ប៉ះ​សេឆ្នើមប្រចាំក្លិប៦ក្នុងលីគបាល់ទះកំពូល​កម្ពុជា​

គួន ម៉ុម បង្ហើបពីការចុះកុងត្រារួចរាល់ទៅលេងក្រៅប្រទេស

ជំនួបធំមិនគួររំលង! វិសាខា ប៉ះ បញ្ជាការដ្ឋានអង្គរក្ស តេជោលីគថ្ងៃសុក្រនេះ

ផុល រតនៈ «ការដាក់កីឡាករបរទេសក្នុងលីគបាល់ទះកម្ពុជាជារឿងល្អបំផុត»

វិសាខាមានកំណត់ត្រា១០០%​កំពុងឈរលើកំពូលតារាងតេជោលីគ

កំពុងមានកំណត់ត្រាល្អជាងគេ តើក្រុមណាអាចបញ្ឈប់វិសាខាក្នុងតេជោលីគ​?

ហេតុអ្វីបារាំងខ្លាំងបាល់ទះមកចាប់ដៃគូជាមួយបាល់ទះខ្មែរ?

ប្រវត្តិក្រាស់ Doni សមាជិកថ្មីរបស់បញ្ជាការដ្ឋានអង្គរក្សធ្លាប់លេងលីគជប៉ុន និងបារ៉ែន

អ្នកប៉ះសេឆ្នើមប្រចាំក្លិប៦ក្នុងលីគបាល់ទះកំពូលកម្ពុជា

វិសាខាមានកំណត់ត្រា១០០%កំពុងឈរលើកំពូលតារាងតេជោលីគ

កំពុងមានកំណត់ត្រាល្អជាងគេ តើក្រុមណាអាចបញ្ឈប់វិសាខាក្នុងតេជោលីគ?