លោក ជា វ៉ាន់ដេត Archives - Kampuchea Thmey Daily

ជាផ្លូវការ ទីម័រឡេស្តេដាក់ឱ្យប្រើប្រាស់ថ្នាលផ្ទៀងផ្ទាត់ឯកសារ verify ជួយអភិវឌ្ឍដោយក្រសួងប្រៃសណីយ៍ និងទូរគមនាគមន៍កម្ពុជា

Dy Bunnara — Mon, 01 Jun 2026 04:59:35 +0000

រដ្ឋាភិបាលទីម័រឡេស្តេ នៅថ្ងៃទី១ ខែមិថុនា ឆ្នាំ២០២៦ បានប្រកាសដាក់ឱ្យប្រើប្រាស់ជាផ្លូវការនូវថ្នាលផ្ទៀងផ្ទាត់ឯកសារ verify.gov.tl ដែលជួយអភិវឌ្ឍដោយក្រសួងប្រៃសណីយ៍ និងទូរគមនាគមន៍កម្ពុជា។

ការប្រកាសដាក់ឲ្យប្រើប្រាស់ជាផ្លូវការថ្នាលផ្ទៀងផ្ទាត់ឯកសារ verify.gov.tl បានធ្វើឡើងនៅសាលពហុបំណង GMN ក្នុងទីក្រុងឌីលី ក្រោមវត្តមានលោក Miguel Marques Gonçalves Manetelu រដ្ឋមន្ត្រីក្រសួងដឹកជញ្ជូន និងសារគមនាគមន៍ ទីម័រឡេស្តេ និងលោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងប្រតិភូជាន់ខ្ពស់។

ការប្រកាសដាក់ឱ្យប្រើប្រាស់ថ្នាលផ្ទៀងផ្ទាត់ឯកសារ verify.gov.tl របស់ទីម័រឡេស្តេ គឺជាសមិទ្ធផលនៃការអនុវត្ត “អនុស្សរណៈនៃការយោគយល់ស្តីពីកិច្ចសហប្រតិបត្តិការក្នុងវិស័យប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន និងបរិវត្តកម្មឌីជីថល” រវាងក្រសួងប្រៃសណីយ៍និងទូរគមនាគមន៍កម្ពុជា និងក្រសួងដឹកជញ្ជូននិងសារគមនាគមន៍ទីម័រឡេស្តេ ដែលបានចុះហត្ថលេខាកាលពីថ្ងៃទី២០ ខែមករា ឆ្នាំ២០២៥ កន្លងទៅ ដែលបានបញ្ជាក់អំពីកិច្ចសហប្រតិបត្តិការដ៏រឹងមាំ និងការប្តេជ្ញាចិត្តយ៉ាងមុតមាំរវាងប្រទេសទាំងពីរ ក្នុងការប្រើប្រាស់បច្ចេកវិទ្យាជាឃ្នាស់ ដើម្បីធ្វើឱ្យប្រសើរឡើងការផ្តល់សេវាសាធារណៈ និងគាំទ្រដល់ការអភិវឌ្ឍសេដ្ឋកិច្ចនិងសង្គមឌីជីថល។

សាធារណរដ្ឋប្រជាធិបតេយ្យទីម័រឡេស្តេ បានសម្រេចជ្រើសរើសយកបណ្ណបើកបរជាឯកសារទី១ ក្នុងការដាក់បញ្ចូល QR Code ដែលអាចផ្ទៀងផ្ទាត់ភាពត្រឹមត្រូវតាមថ្នាល verify.gov.tl ដែលការសម្រេចចិត្តនេះបានជួយឱ្យក្រសួងដឹកជញ្ជូននិងសារគមនាគមន៍ នៃសាធារណរដ្ឋប្រជាធិបតេយ្យទីម័រឡេស្តេកាត់បន្ថយថ្លៃចំណាយក្នុងការផលិតបណ្ណរឹងដែលមានតម្លៃ ៤ (បួន) ដុល្លារអាម៉េរិក មកសល់ត្រឹមតែ ០,១ (សូន្យក្បៀសមួយ) ដុល្លារអាម៉េរិកប៉ុណ្ណោះ។

បច្ចុប្បន្នប្រទេសកម្ពុជាក៏បានដាក់ QR Code ដែលអាចផ្ទៀងផ្ទាត់ភាពត្រឹមត្រូវតាមថ្នាល verify.gov.kh នៅលើបណ្ណបើកបរ ដែលអនុញ្ញាតឱ្យអ្នកបើកបរយានយន្តទាំងអស់អាចប្រើប្រាស់ បណ្ណបើកបរទម្រង់ឌីជីថលបានយ៉ាងទូលំទូលាយ និងជាផ្លូវការដើម្បីបង្ហាញដល់ស្ថាប័នមានសមត្ថកិច្ចពាក់ព័ន្ធនានា ដោយចំណាយពេលស្នើសុំតិចជាង ១នាទី នៅលើកម្មវិធី DG SuperApp ដោយធ្វើការ Logon តាមរយៈថ្នាល dgconnect ហើយ ក្រសួងប្រៃសណីយ៍ និងទូរគមនាគមន៍ នឹងសហការជាមួយក្រសួងដឹកជញ្ជូននិងសារគមនាគមន៍ទីម័រឡេស្តេ ដើម្បីចែករំលែកបទពិសោធនេះជូនសាធារណរដ្ឋប្រជាធិបតេយ្យទីម័រឡេស្តេបន្តទៀតផងដែរ។

ជាមួយគ្នានេះ ក្រុមការងារបច្ចេកទេសនៃក្រសួងទាំងពីរ នឹងបន្តកិច្ចសហប្រតិបត្តិការក្នុងការពង្រីកការដាក់ឱ្យប្រើប្រាស់ថ្នាល verify.gov.tl លើឯកសារសាធារណៈផ្លូវការដែលចេញដោយក្រសួង ស្ថាប័នពាក់ព័ន្ធនៃសាធារណរដ្ឋប្រជាធិបតេយ្យទីម័រឡេស្តេ រួមមាន សញ្ញាបត្រអប់រំ និងឯកសារចុះបញ្ជីអត្រានុកូលដ្ឋានជាដើម ដែលការសម្រេចប្រើប្រាស់ថ្នាលផ្ទៀងផ្ទាត់ឯកសារ verify.gov.tl ត្រូវបានទទួលការឯកភាពនិងការគាំទ្រពីគណៈរដ្ឋមន្រ្តីនៃសាធារណរដ្ឋ ប្រជាធិបតេយ្យទីម័រឡេស្តេផងដែរ។

ក្នុងឱកាសនេះជា វ៉ាន់ដេត និងឯកឧត្តមរដ្ឋមន្រ្តី Miguel Marques Gonçalves Manetelu បានបញ្ជាក់អំពីជំហរបន្តពង្រឹងកិច្ចសហប្រតិបត្តិការក្នុងវិស័យប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន និងបរិវត្តកម្មឌីជីថល៕

The post ជាផ្លូវការ ទីម័រឡេស្តេដាក់ឱ្យប្រើប្រាស់ថ្នាលផ្ទៀងផ្ទាត់ឯកសារ verify ជួយអភិវឌ្ឍដោយក្រសួងប្រៃសណីយ៍ និងទូរគមនាគមន៍កម្ពុជា appeared first on Kampuchea Thmey Daily.

យុវជនកម្ពុជាជំរុញចាប់យកបច្ចេកវិទ្យា AI ឲ្យឆ្លាតវាងវៃ ដើម្បីដើរទាន់ចរន្តពិភពលោក

Dy Bunnara — Sun, 10 May 2026 02:35:52 +0000

ពិភពលោកទាំងមូលកំពុងឈានចូលយុគសម័យថ្មី ដែលគូសវាសដោយបរិវត្តកម្មឌីជីថល បញ្ញាសិប្បនិម្មិត និងប្រព័ន្ធដែលដំណើរការផ្អែកលើទិន្នន័យ។

ចរន្តថ្មីទាំងនេះមិនត្រឹមតែកែប្រែពាណិជ្ជកម្មតាមវិស័យប៉ុណ្ណោះទេ ប៉ុន្តែក៏កំពុងកែប្រែរបៀបរបបធ្វើការរបស់បណ្តារដ្ឋាភិបាល សណ្ឋាននៃការប្រកួតប្រជែងរវាងបណ្តាប្រទេស និងដំណើរការនានាក្នុងសង្គម។ នេះបើតាមការលើកឡើងរបស់លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍។

លោករដ្ឋមន្រ្តីចោទជាចម្ងល់ថា ក្នុងបរិការណ៍នេះ ប្រស្នាគន្លឹះតើគ្រប់គ្នាត្រូវធ្វើដូចម្ដេច ដើម្បីធានាថាបច្ចេកវិទ្យានឹងបម្រើឱ្យកំណើនសេដ្ឋកិច្ចប្រកបដោយបរិយាបន្ន ពង្រឹង សមត្ថភាពស្ថាប័ន និងការពារប្រជាពលរដ្ឋបាន?

ចំពោះកម្ពុជា រដ្ឋាភិបាលបានកំណត់ទិសដៅចាប់យកបច្ចេកវិទ្យាជាអាទិភាពគន្លឹះទី ៥ ក្នុងយុទ្ធសាស្ត្រអភិវឌ្ឍន៍ជាតិ ដែលរំលេចឱ្យឃើញអំពីទស្សនៈជាមូលដ្ឋានគ្រឹះមួយថាបច្ចេកវិទ្យាមិនមែនជាវិស័យមួយទេ វាជាឃ្នាស់សម្រាប់ជំរុញគ្រប់វិស័យ។

លោករដ្ឋមន្រ្តីបានគូសបញ្ជាក់ថា លើមាគ៌ាជាតិដែលបានដាក់ចេញ ការអប់រំដើរតួនាទីយ៉ាងសំខាន់។ សាកលវិទ្យាល័យលែងជាស្ថាប័នសម្រាប់តែការសិក្សាមួយមុខហើយ ប៉ុន្តែត្រូវក្លាយជាទីប្រជុំនៃធនធានមនុស្ស នវានុវត្តន៍ និងសមត្ថភាពឌីជីថល។

សាកលវិទ្យាល័យមានតួនាទីបណ្តុះបញ្ញាញាណរបស់ជាតិក្នុងការរចនាប្រព័ន្ធឌីជីថល យកបញ្ញាសិប្បនិម្មិតទៅប្រើប្រាស់តាមមុខងារផ្សេងៗ និងដឹកនាំកាច់ចង្កូតស្ថាប័នក្នុងពិភពលោកដែលមានការប្រែប្រួលយ៉ាងឆាប់រហ័ស។

ខណៈបច្ចុប្បន្នបញ្ញាសិប្បនិម្មិតកំពុងត្រូវបានរួមបញ្ចូលទៅក្នុងការសម្រេចចិត្ត ទិន្នន័យជាកត្តាកំណត់យុទ្ធសាស្ត្រ ហើយនវានុវត្តន៍ជាកត្តាកំណត់ពីសមត្ថភាពប្រកួតប្រជែង ប្រទេសកម្ពុជាត្រូវការធនធានមនុស្សដែលមានទាំងជំនាញ ទាំងភាពវាងវៃក្នុងការសម្របខ្លួន គុណធម៌និងក្រមសីលធម៌ និងចក្ខុវិស័យសំឡឹងទៅមុខ។

ទោះបីបែបនេះក្តី លោករដ្ឋមន្រ្តីបានក្រើនរំលឹកដល់យុវជនថា អនាគតកម្ពុជាមិនមែនកំណត់ដោយបច្ចេកវិទ្យាតែមួយមុខទេ ប៉ុន្តែនឹងត្រូវកំណត់ដោយប្រជាជនកម្ពុជា ដែលចេះប្រើប្រាស់បច្ចេកវិទ្យាប្រកបដោយបញ្ញាញាណ។

គៀន យូហ័ង ដែលទើបតែបានបញ្ចប់ការសិក្សាថ្នាក់បរិញ្ញាបត្រផ្នែកបច្ចេកវិទ្យាព័ត៌មាន និងសារគមនាគមន៍ (ICT) ពីសាកលវិទ្យាល័យអាមេរិកាំងភ្នំពេញ (AUPP) បានបញ្ជាក់ថា កាលសិក្សានៅសាកលវិទ្យាល័យ លោកបានសិក្សាទាំងជំនាញទន់ និងជំនាញរឹង រួមមានការបង្កើតកម្មវិធីទូរសព្ទ (App), ការបង្កើតគេហទំព័រ (Web) និងផ្នែកបញ្ញាសិប្បនិម្មិត (AI)។

ជុំវិញទស្សនៈលើផ្នែកបញ្ញាសិប្បនិម្មិត (AI) យុវជនរូបនេះមានការចាប់អារម្មណ៍ការសិក្សាតាំងពីដើមមក។

យូហ័ង មើលឃើញសារៈសំខាន់នៃបច្ចេកវិទ្យា AI ដែលលោកជឿជាក់ថានឹងអាចជួយសង្គមបានច្រើន ជាពិសេសក្នុងការដោះស្រាយបញ្ហានានា ដូចជាក្នុងវិស័យសុខាភិបាលជាដើម។

យ៉ាងណាមិញ សម្រាប់ការចាប់យកការសិក្សាបច្ចេកវិទ្យា AI យូហ័ង យល់ឃើញថាអ្នកសិក្សាត្រូវមានមូលដ្ឋានគ្រឹះរឹងមាំលើផ្នែកវិទ្យាសាស្ត្រកុំព្យូទ័រ និងគណិតវិទ្យា៕

The post យុវជនកម្ពុជាជំរុញចាប់យកបច្ចេកវិទ្យា AI ឲ្យឆ្លាតវាងវៃ ដើម្បីដើរទាន់ចរន្តពិភពលោក appeared first on Kampuchea Thmey Daily.

ថ្នាលផ្ទៀងផ្ទាត់ឯកសារ (Verify) របស់កម្ពុជាក្លាយជាហេដ្ឋារចនាសម្ព័ន្ធឌីជីថលទី៤របស់ពិភពលោក

hun sirivadh — Tue, 17 Mar 2026 08:02:53 +0000

រដ្ឋមន្ត្រីប្រៃសណីយ៍ និងទូរគមនាគមន៍ លោក ជា វ៉ាន់ដេត លើកឡើងថា ថ្នាលផ្ទៀងផ្ទាត់ឯកសាររបស់កម្ពុជាដែលមានឈ្មោះថា Verify បានក្លាយជាហេដ្ឋារចនាសម្ព័ន្ធឌីជីថលទី៤របស់ពិភពលោក និងត្រូវបានធនាគារពិភពលោក និង UNDP កំពុងសិក្សាដើម្បីយកទៅប្រទេសនៅតំបន់អាហ្វ្រិកផងដែរ។

ថ្លែងក្នុងសិក្ខាសាលាស្ដីពីភាពធន់ជាតិនៅវិមានរដ្ឋសភា ថ្ងៃទី១២ ខែមីនា លោក ជា វ៉ាន់ដេត មានប្រសាសន៍ថា Verify គឺជាមោទនភាពមួយរបស់កម្ពុជាដែលបង្ហាញទៅកាន់ពិភពលោក ខណៈថ្នាលផ្ទៀងផ្ទាត់ឯកសារនេះត្រូវបានប្រទេសភីលីពីនយកទៅប្រើប្រាស់ និងកំពុងចរចាយកទៅប្រើដោយទីម័រខាងកើត បង់ក្លាដេស និងប្រទេសមួយចំនួននៅអាស៊ីកណ្ដាលផងដែរ។

លោកថា៖ «សាំងហ្គាពួរមិនដែលសរសើរអ្នកណា តែរដ្ឋមន្ត្រីសាំងហ្គាពួរគឺសរសើរខ្មែរ! ថាខ្មែរមានសមត្ថភាពជជែកគ្នាពីសមត្ថភាព AI នៅក្នុងក្រុមបច្ចេកទេស។ រដ្ឋមន្ត្រីសាំងហ្គាពួរពេលប្រកួតប្រជែងម្ដងៗ តែងតែសួរខ្ញុំថាកម្ពុជាជាប់អីទៀតហើយ ព្រោះយើងបានជាប់ Verify មួយដែលគាត់នឹងស្មានមិនដល់ហើយ Verify យើងក្លាយជាហេដ្ឋារចនាសម្ព័ន្ធទី៤របស់ពិភពលោក។ ខ្មែរអាចធ្វើបាន»។

រដ្ឋមន្ត្រី ជា វ៉ាន់ដេត (ស្ដាំ) និងតំណាង UNDP ប្រចាំកម្ពុជាលោកស្រី Vladanka Andreeva

លោកក៏បានឱ្យដឹងដែរថាបច្ចុប្បន្នកម្មវិធីអភិវឌ្ឍន៍សហប្រជាជាតិ និងធនាគារពិភពលោកកំពុងសិក្សាដើម្បីយកថ្នាលផ្ទៀងផ្ទាត់ឯកសាររបស់កម្ពុជានេះទៅប្រើប្រាស់នៅប្រទេសក្នុងតំបន់អាហ្វ្រិកផងដែរ។

គួរឱ្យដឹងដែរថាហេដ្ឋារចនាសម្ព័ន្ធឌីជីថលមាន៥គឺ ការតភ្ជាប់ទិន្នន័យឌីជីថល ហេដ្ឋារចនាសម្ព័ន្ធទិន្នន័យ យន្តការអត្តសញ្ញាណឌីជីថល ការទូទាត់ឌីជីថល និងប្រព័ន្ធសន្តិសុខសាយប័រ។ ថ្នាលផ្ទៀងផ្ទាត់ឯកសារកម្ពុជាបានទទួលពានរង្វាន់មេដាយមាសក្នុងការប្រកួតពានរង្វាន់ឌីជីថលអាស៊ានកាលពីឆ្នាំ២០២៤ ដែលត្រូវបានទទួលស្គាល់ថា ជាថ្នាលឌីជីថលដ៏ពិសេសបំផុតសម្រាប់ការផ្ដល់សេវាសាធារណៈនៅក្នុងអាស៊ាន៕

អត្ថបទដោយ ហ៊ុន សិរីវឌ្ឍន៍

The post ថ្នាលផ្ទៀងផ្ទាត់ឯកសារ (Verify) របស់កម្ពុជាក្លាយជាហេដ្ឋារចនាសម្ព័ន្ធឌីជីថលទី៤របស់ពិភពលោក appeared first on Kampuchea Thmey Daily.

ក្រសួងប្រៃសណីយ៍បង្កើតមូលនិធិផ្ដល់កម្ចីសិក្សាគ្មានការប្រាក់ដល់និស្សិតដែលចូលរៀនផ្នែកបច្ចេកវិទ្យាឌីជីថល

hun sirivadh — Tue, 17 Mar 2026 03:09:45 +0000

ក្រសួងប្រៃសណីយ៍ និងទូរគមនាគមន៍ បានបង្កើតមូលនិធិមួយដើម្បីផ្ដល់កម្ចីសិក្សាដែលគ្មានការប្រាក់ដល់សិស្សដែលប្រឡងអាហារូបករណ៍ក្រសួងមិនជាប់ និងសិស្សពូកែផ្សេងទៀតដែលចាប់អារម្មណ៍សិក្សាផ្នែកបច្ចេកវិទ្យាឌីជីថលនៅថ្នាក់ឧត្ដមសិក្សា។ រដ្ឋមន្ត្រី ជា វ៉ានដេត បានបញ្ជាក់ថាការធ្វើបែបនេះដោយលោកសង្ឃឹមថាថ្ងៃអនាគតកម្ពុជានឹងមានអ្នកជំនាញផ្នែកបច្ចេកវិទ្យា សន្តិសុខឌីជីថលគ្រប់គ្រាន់។

ថ្លែងក្នុងសិក្ខាសាលាស្ដីពី ភាពធន់កម្ពុជានៅវិមានរដ្ឋសភា កាលពីថ្ងៃទី១២ ខែមីនា លោក ជា វ៉ានដេត បានលើកឡើងថា ការខ្វះអ្នកជំនាញផ្នែកសន្តិសុខឌីជីថលនៅកម្ពុជាគឺជាបញ្ហាដ៏ធំមួយក្នុងពេលដែលពិភពលោកដើរដល់សម័យទំនើបនេះ។ លោកបន្ថែមថាដើម្បីឆ្លើយតបនឹងបញ្ហានេះក្រសួងបានផ្ដល់អាហារូបករណ៍ដែលតម្រូវឱ្យសិស្សប្រឡងយកហើយក្នុងរយៈពេល៥ឆ្នាំមកនេះមានចំនួនជាង២០០០នាក់ហើយដែលបានអាហារូបករណ៍កំពុងសិក្សានឹងអាចបញ្ចេញជាបន្តបន្ទាប់សម្រាប់ចូលរួមអភិវឌ្ឍន៍វិស័យបច្ចេកវិទ្យាឌីជីថលនៅកម្ពុជា។

លោកបន្ថែមថាក្រៅពីផ្ដល់អាហារូបករណ៍នេះ ក្រសួងក៏មានមូលនិធិសម្រាប់ផ្ដល់កម្ចីដល់និស្សិតដែលបានប្រឡងអាហារូបករណ៍ធ្លាក់ និងសិស្សពូកែដទៃទៀត ដែលចង់ចូលរៀនផ្នែកបច្ចេកវិទ្យាឌីជីថលនេះផងដែរ។ លោកបញ្ជាក់ថា ប្រាក់កម្ចីដែលបានផ្ដល់គឺជាកម្ចីដែលគ្មានការប្រាក់ ហើយនិស្សិតនឹងទទួលបានការបណ្ដុះបណ្ដាលពីក្រសួងបន្ថែមដើម្បីឆាប់ទទួលបានការងារធ្វើថែមទៀត។

លោកថា៖ «ខ្ចីហើយរៀនចប់គឺយើងឱ្យគាត់សងវិញនៅពេលដែលគាត់បានទទួលប្រាក់ខែ៥០០ដុល្លារ បើក្រោម៥០០ដុល្លារអត់សងទេ។ ហើយសងតែ២០%នៃប្រាក់ខែ៥០០ដុល្លាររបស់គាត់។ ក្នុងរយៈពេលរៀនដើម្បីឱ្យគាត់ទទួលបានជោគជ័យយើងបានកៀរគរអ្នកស្ម័គ្រចិត្ត ៣០០–៤០០នាក់មកធ្វើជាគ្រូបង្វឹកជូនគាត់ដើម្បីធ្វើមិចធានាគាត់រៀនចប់បានចូលធ្វើការ ហើយមានថវិកាសងមកក្រសួងវិញ»។

បើតាមលោក ជា វ៉ាន់ដេត ពេលលោកចូលកាន់ដំណែងជារដ្ឋមន្ត្រីក្រសួងប្រៃសណីយ៍ដំបូង អ្នកមានជំនាញផ្នែកសន្តិសុខឌីជីថលនៅកម្ពុជាមានតែ៣នាក់ប៉ុណ្ណោះ ខណៈបច្ចុប្បន្នមាន ១៥នាក់ ហើយក្រសួងក៏ខិតខំសហការជាមួយសាកលវិទ្យាល័យនានាបណ្ដុះបណ្ដាលនិស្សិតជាង៤០០នាក់ និងមានបញ្ជូនទៅសិក្សានៅក្រៅប្រទេសប្រហែល១០នាក់ផងដែរ។ កង្វះអ្នកជំនាញផ្នែកបច្ចេកវិទ្យាឌីជីថល និងសន្តិសុខឌីជីថលនេះធ្វើឱ្យកម្ពុជាប៉ះពាល់ខ្លះក្នុងពេលដែលមានសង្គ្រាមជាមួយថៃកាលពីឆ្នាំ២០២៥ ដែលក្រុមចោរបច្ចេកវិទ្យាបានវាយប្រហារជាច្រើនមកស្ថាប័នជាតិ៕

អត្ថបទដោយ ហ៊ុន សិរីវឌ្ឍន៍

The post ក្រសួងប្រៃសណីយ៍បង្កើតមូលនិធិផ្ដល់កម្ចីសិក្សាគ្មានការប្រាក់ដល់និស្សិតដែលចូលរៀនផ្នែកបច្ចេកវិទ្យាឌីជីថល appeared first on Kampuchea Thmey Daily.

រដ្ឋមន្ត្រី ជា វ៉ាន់ដេត លើកទឹកចិត្តពលរដ្ឋខេត្តតាកែវឱ្យខិតខំបង្កើនការដាំដុះបន្លែបង្ការ និងចិញ្ចឹមសត្វ

Thoeun Vansong — Sat, 17 Jan 2026 09:28:31 +0000

រដ្ឋមន្រ្តីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត ដែលជាប្រធានក្រុមការងាររាជរដ្ឋាភិបាលចុះមូលដ្ឋានខេត្តតាកែវ បានលើកទឹកចិត្តដល់ប្រជាពលរដ្ឋខេត្តតាកែវឱ្យខិតខំបង្កើនការដាំដុះបន្លែ ផ្លែឈើ និងចិញ្ចឹមសត្វ។ ការលើកទឹកចិត្តនេះ ធ្វើឡើងក្នុងពេលលោករដ្ឋមន្ត្រី អញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ជាផ្លូវការអគារពហុបំណង និងហេដ្ឋារចនាសម្ព័ន្ធពាក់ព័ន្ធ ដែលជាសមិទ្ធផលរបស់គម្រោងស្តារវិស័យទេសចរណ៍សហគមន៍ពីវិបត្តិកូវីដ-១៩។

នៅសាលាស្រុកអង្គរបូរី ខេត្តតាកែវ នាព្រឹកថ្ងៃទី១៧ ខែមករា ឆ្នាំ២០២៦ លោករដ្ឋមន្ត្រី ជា វ៉ាន់ដេត បានថ្លែងពីការយកចិត្តទុកដាក់របស់រាជរដ្ឋាភិបាលកម្ពុជា ដែលបានដាក់ចេញយុទ្ធសាស្រ្តបញ្ចកោណ ដោយបានកំណត់អាទិភាពចំនួន ៥ គឺមនុស្ស ផ្លូវ ទឹក ភ្លើង និងបច្ចេកវិទ្យា។ តាមរយៈអាទិភាពទាំង៥នេះ លោករដ្ឋមន្ត្រី ថា ពិតជាបានឆ្លើយតបនឹងតម្រូវការរបស់ប្រជាពលរដ្ឋគ្រប់មជ្ឈដ្ឋាន ហើយរាជរដ្ឋាភិបាលបាននិងកំពុងអនុវត្ត ព្រមទាំងទទួលបានលទ្ធផលគួរជាទីមោទនៈ។

ចំពោះក្នុងបរិបទដែលកម្ពុជារងការឈ្លានពានពីសំណាក់កងទ័ពថៃ រដ្ឋមន្រ្តី ជា វ៉ាន់ដេត បានអំពាវនាវដល់ប្រជាពលរដ្ឋគ្រប់មជ្ឈដ្ឋានបន្តជឿជាក់លើរាជរដ្ឋាភិបាល ក្រោមការដឹកនាំរបស់សម្តេចតេជោ និងសម្ដេចធិបតី ហើយត្រូវរួបរួមគ្នាសាមគ្គីជាធ្លុងមួយ។

ជាមួយគ្នានេះ លោករដ្ឋមន្រ្តី បានលើកទឹកចិត្តឱ្យអាជ្ញាធរមូលដ្ឋាន និងប្រជាពលរដ្ឋ ក៏ដូចជាប្រជាកសិករ ឱ្យខិតខំធ្វើយ៉ាងបង្កើនប្រសិទ្ធភាពនិងបរិមាណដាំដុះ បន្លែ ផ្លែឈើ និងចិញ្ចឹមសត្វ ជាពិសេសការចិញ្ចឹមបង្កងដោយមានការជួយជ្រោមជ្រែងពីគម្រោងតេជោភូមិ១០០ វេទិកាសម្ព័ន្ធសង្គមស៊ីវិល និងភាគីពាក់ព័ន្ធទាំងអស់។

ដើម្បីប្រមូលផលបានទៀងទាត់ លោកបានជំរុញឱ្យប្រជាកសិករ និងអាជ្ញាធរមូលដ្ឋានត្រូវចងក្រងប្រមូលផ្តុំជាសហគមន៍ ក្នុងការជួយគាំទ្រគ្នាទៅវិញទៅមក ទាំងបច្ចេកទេស ស្មារតី និងការស្វែងរកទីផ្សារ។ បន្ថែមលើនេះ លោក ក៏បានណែនាំដល់អាជ្ញាធរគ្រប់លំដាប់ត្រូវខិតខំរៀបចំកែលម្អសោភ័ណភាពស្រុក ដាំដើមឈើ ពង្រឹងគុណភាពនិងអនាម័យម្ហូបអាហារ និងផ្តល់ភាពកក់ក្តៅដល់ភ្ញៀវទេសចរណ៍ ដែលមកទស្សនាស្រុកអង្គរបូរី អតីតរាជធានីខ្មែរសម័យហ្វូណន៕

The post រដ្ឋមន្ត្រី ជា វ៉ាន់ដេត លើកទឹកចិត្តពលរដ្ឋខេត្តតាកែវឱ្យខិតខំបង្កើនការដាំដុះបន្លែបង្ការ និងចិញ្ចឹមសត្វ appeared first on Kampuchea Thmey Daily.

ត្រឹមឆ្នាំ ២០៣០ កម្ពុជាដាក់មហិច្ឆតាមានក្រុមហ៊ុនបច្ចេកវិទ្យា Start Up យ៉ាងតិចមួយមានតម្លៃ ១ ប៊ីលានដុល្លារ

Dy Bunnara — Mon, 08 Dec 2025 03:08:22 +0000

ត្រឹមឆ្នាំ ២០៣០ កម្ពុជាមានបំណងចង់ឲ្យមានក្រុមហ៊ុន Unicorn (ក្រុមហ៊ុនដែលមានតម្លៃ ១ ០០០ លានដុល្លារឡើងទៅ) យ៉ាងតិចបំផុតមួយនៅកម្ពុជា។ នេះបើតាមលោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ ថ្លែងក្នុងពិធីបិទបញ្ចប់វេទិការដ្ឋាភិបាលឌីជីថលឆ្នាំ ២០២៥ និងពិព័រណ៍បច្ចេកវិទ្យាឌីជីថលកាលពីម្សិលមិញនេះ។

ថ្លែងក្នុងកម្មវិធីដែលមានការចូលរួមពីរដ្ឋមន្ត្រីឌីជីថលអាស៊ាន បណ្តាប្រទេសនានា គណៈប្រតិភូអន្តរជាតិ ដៃគូអភិវឌ្ឍន៍ ក្រសួង-ស្ថាប័ន ក្រុមហ៊ុនបច្ចេកវិទ្យាឌីជីថល ធុរកិច្ចថ្មីឌីជីថល លោករដ្ឋមន្រ្តីបានគូសបញ្ជាក់ថា មហិច្ឆតារបស់កម្ពុជាគឺចង់ឲ្យមានក្រុមហ៊ុន Startup អាចពង្រីកខ្លួនមិនត្រឹមតែក្នុងទីផ្សារក្នុងស្រុក តែដល់ទីផ្សារតំបន់និងទីផ្សារអន្តរជាតិដែលមាននៅអាស៊ី អាមេរិកឡាទីន និងអាហ្វ្រិក។

លោករដ្ឋមន្រ្តីបានកត់សម្គាល់ពីវត្តមានរបស់ក្រុមហ៊ុន Plug and Play ដែលជាក្រុមហ៊ុនភ្ញាស់ធុរកិច្ចថ្មីដ៏មានបទពិសោធន៍ និងជោគជ័យនៅក្នុងពិភពលោក ដែលស្ថាបនិករបស់ក្រុមហ៊ុន Plug and Play បានប្រកាសពីបំណងចង់វិនិយោគទៅលើក្រុមហ៊ុនធុរកិច្ចរបស់កម្ពុជា។

លោកថា តាមរយៈការគាំទ្រពីក្រុមហ៊ុនលំដាប់ពិភពលោកនេះនឹងជួយភ្ញាស់ក្រុមហ៊ុន Startup នៅកម្ពុជា ដើម្បីឈានសម្រេចគោលដៅរួមទាំងពង្រឹងសមត្ថភាពនិងលទ្ធភាពឈានជើងចូលទីផ្សារអន្តរជាតិ។

វេទិការដ្ឋាភិបាលឌីជីថលឆ្នាំ ២០២៥ បានប្រព្រឹត្តទៅដោយជោគជ័យក្នុងរយៈពេល ៣ ថ្ងៃ ចាប់ពីថ្ងៃទី ៥ ដល់ថ្ងៃទី ៧ ខែធ្នូ ឆ្នាំ ២០២៥។ ព្រឹត្តិការណ៍នេះត្រូវបានរៀបចំឡើងក្រោមប្រធានបទ “ការពន្លឿនអនាគតឌីជីថល៖ អភិបាលកិច្ច កំណើន និងភាពជាដៃគូសកល”។

វេទិកានេះបានប្រមូលផ្តុំអ្នកចូលរួមសរុបប្រមាណ ២ ម៉ឺននាក់ រួមមានរដ្ឋមន្ត្រីឌីជីថលអាស៊ាន និងបណ្តាប្រទេសនានា គណៈប្រតិភូអន្តរជាតិ ដៃគូអភិវឌ្ឍន៍ ក្រសួង-ស្ថាប័ន ថ្នាក់ដឹកនាំវិស័យឯកជន ក្រុមហ៊ុនបច្ចេកវិទ្យាឌីជីថល ធុរកិច្ចថ្មីឌីជីថល គ្រឹះស្ថានអប់រំ សិស្សានុសិស្ស និងសាធារណជន។

ក្នុងរយៈពេល ៣ ថ្ងៃ វេទិកាបានបង្ហាញនូវសមិទ្ធផលរដ្ឋាភិបាលរបស់កម្ពុជា ក៏ដូចជាការពង្រឹងភាពជាដៃគូក្នុងតំបន់ លើកកម្ពស់ឧត្តមភាព និងឱកាសវិនិយោគ ព្រមទាំងផ្តល់នូវបទពិសោធន៍ចំណេះដឹង និងឧត្តមានុវត្តលើការផ្លាស់ប្តូរ ឌីជីថល ហេដ្ឋារចនាសម្ព័ន្ធ និងវត្តមានឌីជីថល។

ចំនួនអ្នកចូលរួមក៏កើនឡើងពីរដងបើធៀបនឹងការរៀបចំជាលើកទី ១ កាលពីឆ្នាំមុន។ មានក្រុមហ៊ុនជាច្រើនបានចូលរួមក្នុងពិព័រណ៍ រួមទាំងក្រុមហ៊ុនធុរកិច្ចថ្មីៗ (Startup) ដែលកំពុងកើតឡើង និងបានចូលរួមក្នុងការប្រកួតប្រជែងយកពានរង្វាន់។

នៅក្នុងវេទិកា មជ្ឍមណ្ឌលបច្ចេកវិទ្យាឌីជីថល Plug and Play ដែលមានមូលដ្ឋាននៅ Silicon សហរដ្ឋអាមេរិក បានជ្រើសរើសក្រុមហ៊ុន Start Up មួយចំនួនរបស់កម្ពុជា ដើម្បីវិនិយោគ និងជំរុញឱ្យទៅជាក្រុមហ៊ុនកម្រិតអន្តរជាតិ។

លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍បានគូសបញ្ជាក់ថា ការសម្រេចចិត្តរបស់ Plug and Play វិនិយោគលើក្រុមហ៊ុន Start Up នៅកម្ពុជា ស្ដែងឱ្យឃើញពីលទ្ធផលនៃកិច្ចខិតខំរបស់គ្រប់ភាគគីពាក់ព័ន្ធ ក្នុងការកសាងបរិយាកាសអំណោយផល សម្រាប់អ្នកមានសមត្ថភាពក្នុងការចាប់ឱកាសរីកចម្រើនទាំងក្នុងស្រុកនិងសាកលលោក។

ការវិនិយោគនេះគឺជាសមិទ្ធផលដ៏សំខាន់ សម្រាប់ប្រព័ន្ធអេកូឡូស៊ីធុរកិច្ចថ្មីឌីជីថលរបស់កម្ពុជាដែលកំពុងរីកចម្រើន និងឆ្លុះបញ្ចាំងពីសមត្ថភាពលេចធ្លោរបស់ធុរជនកម្ពុជាក្នុងវិស័យបច្ចេកវិទ្យាឌីជីថល៕

The post ត្រឹមឆ្នាំ ២០៣០ កម្ពុជាដាក់មហិច្ឆតាមានក្រុមហ៊ុនបច្ចេកវិទ្យា Start Up យ៉ាងតិចមួយមានតម្លៃ ១ ប៊ីលានដុល្លារ appeared first on Kampuchea Thmey Daily.

ក្នុងវេទិកាអភិបាលកិច្ចអ៊ីនធឺណិតកម្ពុជា រដ្ឋមន្ត្រីក្រសួងប្រៃសណីយ៍ ជំរុញឱ្យពង្រឹងកិច្ចសហការពហុភាគី ប្រយុទ្ធប្រឆាំងការក្លែងបន្លំតាមអ៊ីនធឺណិត

Dy Bunnara — Sun, 07 Dec 2025 02:27:18 +0000

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានជំរុញឱ្យពង្រឹងកិច្ចសហប្រតិបត្តិការពហុភាគី ដើម្បីសម្របសម្រួលកិច្ចខិតខំប្រឹងប្រែងក្នុងសន្តិសុខតាមអ៊ីនធឺណិត ប្រយុទ្ធប្រឆាំងនឹងការក្លែងបន្លំតាមអ៊ីនធឺណិត និងខ្លឹមសារខុសច្បាប់ និងកសាងបរិយាកាសឌីជីថលដែលគួរឱ្យទុកចិត្ត។

ការជំរុញនេះ បានធ្វើឡើងនៅថ្ងៃទី ៦ ខែធ្នូ ឆ្នាំ២០២៥ ខណៈលោករដ្ឋមន្ត្រី ជា វ៉ាន់ដេត បានអញ្ជើញជាអធិបតីបើក វេទិកាអភិបាលកិច្ចអ៊ីនធឺណិតកម្ពុជា ២០២៥ ក្រោមប្រធានបទ “ការកសាងសង្គមឌីជីថលកម្ពុជា ប្រកបដោយបរិយាបន្ន (Building Cambodia’s Inclusive Digital Society)” ដែលជាព្រឹត្តិការណ៍អមក្នុង វេទិការដ្ឋាភិបាលឌីជីថល ពិព័រណ៍បច្ចេកវិទ្យាឌីជីថល និងព្រឹត្តិការជាតិ-អន្តរជាតិពាក់ព័ន្ធ។

ក្នុងឱកាសនោះ លោករដ្ឋមន្ត្រី ជា វ៉ាន់ដេត ក៏បានជំរុញការអភិវឌ្ឍក្របខ័ណ្ឌគោលនយោបាយរហ័សរហួន ដើម្បីទាញយកអត្ថប្រយោជន៍ពីបច្ចេកវិទ្យាថ្មីៗ ដូចជាបញ្ញាសិប្បនិម្មិត ខណៈពេលដែលគ្រប់គ្រងហានិភ័យដែលទាក់ទងនឹងភាពឯកជននៃទិន្នន័យ សន្តិសុខតាមអ៊ីនធឺណិត និងភាពសុខដុមរមនាក្នុងសង្គមប្រកបដោយប្រសិទ្ធភាព។

លោករដ្ឋមន្ត្រី ជា វ៉ាន់ដេត ក៏បានលើកឡើងពីការលើកកម្ពស់ការដាក់បញ្ចូល និងអក្ខរកម្មឌីជីថល ដើម្បីធានាថាប្រជាពលរដ្ឋទាំងអស់ ជាពិសេសយុវជន ស្ត្រី និងអ្នកដែលនៅតំបន់ជនបទ អាចចូលប្រើប្រើប្រាស់ និងបង្កើតតម្លៃតាមរយៈឧបករណ៍ឌីជីថល ដោយមិនទុកនរណាម្នាក់ឱ្យនៅខាងក្រោយក្នុងការផ្លាស់ប្តូរឌីជីថលឡើយ។

ក្រៅពីនេះ លោករដ្ឋមន្ត្រីក៏បានលើកឡើងបន្ថែមពីលើកកម្ពស់នវានុវត្តន៍ និងការអភិវឌ្ឍហេដ្ឋារចនាសម្ព័ន្ធ ដោយកសាងលើសមិទ្ធផលជាតិថ្មីៗក្នុងការត្រួតពិនិត្យបទប្បញ្ញត្តិ ខ្សែកាបអុបទិកក្រោមដី និងហេដ្ឋារចនាសម្ព័ន្ធទូរគមនាគមន៍ទំនើប ដើម្បីបង្កើតមូលដ្ឋានគ្រឹះរឹងមាំសម្រាប់ការរីកចម្រើន។ ទន្ទឹមនេះ ពង្រឹងយុវជនជាអ្នកដឹកនាំឌីជីថល តាមរយៈគំនិតផ្តួចផ្តើមដូចជា Youth IGF ដែលទើបនឹងបង្កើតថ្មី ដោយធានាថាមនុស្សជំនាន់ក្រោយគឺជាស្ថាបត្យករនៃគោលនយោបាយឌីជីថលដែលនឹងកំណត់អនាគតរបស់ពួកគេ។

លោករដ្ឋមន្ត្រី បានលើកទឹកចិត្តឱ្យមានការចូលរួមពិភាក្សា និងផ្លាស់ប្តូរទស្សនៈឱ្យបានផុលផុស សម្រាប់ជាទុនក្នុងការកសាងអនាគតឌីជីថលរួមគ្នា ជាពិសេសយកឱកាសនេះបង្កើតបណ្តាញទំនាក់ទំនង និងកសាងភាពជាដៃគូឱ្យកាន់តែស៊ីជម្រៅនិងទូលំទូលាយបន្ថែមទៀត ដើម្បីរួមគ្នាសម្រេចសមិទ្ធផលបន្ថែមទៀតជូនជាតិ និងប្រជាជនរបស់ខ្លួន។

វេទិកាអភិបាលកិច្ចអ៊ីនធឺណិតកម្ពុជា ២០២៥ ត្រូវបានរៀបចំឡើងដោយក្រសួងប្រៃសណីយ៍ និងទូរគមនាគមន៍ អង្គការយូណេស្កូ (UNESCO) អង្គការ Open Development Cambodia (ODC) និងបណ្ឌិត្យសភាបច្ចេកវិទ្យាឌីជីថលកម្ពុជា (CADT) ដោយផ្តោតជាពិសេសសម្រាប់កំណើន និងស្ថិរភាពរបស់ប្រទេសយើង រួមមានដូចជា៖ សុវត្ថិភាពអនឡាញក្នុងយុគសម័យបញ្ញាសិប្បនិម្មិត (AI) -ការតភ្ជាប់អ៊ីនធឺណិតជាសកល និងប្រកបដោយអត្ថន័យ -ការពង្រឹងសមត្ថភាពយុវជនសម្រាប់អនាគតឌីជីថល៕

The post ក្នុងវេទិកាអភិបាលកិច្ចអ៊ីនធឺណិតកម្ពុជា រដ្ឋមន្ត្រីក្រសួងប្រៃសណីយ៍ ជំរុញឱ្យពង្រឹងកិច្ចសហការពហុភាគី ប្រយុទ្ធប្រឆាំងការក្លែងបន្លំតាមអ៊ីនធឺណិត appeared first on Kampuchea Thmey Daily.

ថ្នាល verify របស់កម្ពុជា ត្រូវបានរដ្ឋាភិបាលហ្វីលីពីន យកទៅប្រើប្រាស់លើអត្តសញ្ញាណឌីជីថលជូនប្រជាជនជាង ៩០ លាននាក់

Dy Bunnara — Fri, 05 Dec 2025 09:36:55 +0000

រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជាលើកឡើងថា ថ្នាល verify របស់កម្ពុជា ត្រូវបានរដ្ឋាភិបាលហ្វីលីពីន យកទៅប្រើប្រាស់លើអត្តសញ្ញាណឌីជីថលជូនប្រជាជនជាង ៩០ លាននាក់។

ថ្លែងក្នុងពិធីបើកវេទិការដ្ឋាភិបាលឌីជីថលឆ្នាំ២០២៥ និងពិព័រណ៍បច្ចេកវិទ្យាឌីជីថល នៅព្រឹកថ្ងៃទី៥ ខែធ្នូ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍គូសបញ្ជាក់ថា ក្រៅពីជោគជ័យក្នុងប្រទេស ថ្នាល verify បានក្លាយជាឧត្តមានុវត្តន៍ដែលត្រូវបានប្រទេសជាមិត្តក្នុងតំបន់ដកពិសោធន៍។ ជាក់ស្តែង លោកទទួលបានព័ត៌មានពីអនុរដ្ឋមន្ត្រីហ្វីលីពីនថា ហ្វីលីពីនបានដាក់ឱ្យប្រើនិម្មាបនកម្មរបស់ថ្នាល verify លើអត្តសញ្ញាណឌីជីថល ជូនប្រជាជនជាង ៩០ លាននាក់ និងមានប្រតិបត្តិការជាង ១៦៤លានដង ក្នុងរយៈពេលដ៏ខ្លី ដែលបង្ហាញពីសក្តានុពលយ៉ាងធំសម្បើមនៃបច្ចេកវិទ្យារបស់កម្ពុជា។

បើតាមលោករដ្ឋមន្រ្តី ក្នុងរយៈពេល ១ ឆ្នាំមកនេះ ថ្នាល verify.gov.kh ដែលជាថ្នាលផ្ទៀងផ្ទាត់ឯកសាររបស់រាជរដ្ឋាភិបាល បានពង្រីកវិសាលភាពនៃការប្រើប្រាស់យ៉ាងទូលំទូលាយ។ គិតមកដល់ពេលនេះ ថ្នាល verify ត្រូវបានប្រើប្រាស់ក្នុងក្រសួងស្ថាប័នចំនួន ១៦ និងគ្រឹះស្ថានអប់រំចំនួន ៣១ ដែលមានឯកសារសរុបជាង ៤ លាន។

បន្ថែមលើនេះ ក្រសួងក៏បានដាក់ឱ្យប្រើប្រាស់ថ្នាល និងកម្មវិធីរដ្ឋាភិបាលឌីជីថលមួយចំនួនទៀតផងដែរដូចជា កម្មវិធី DG SuperApp ថ្នាលផ្ទុកឯកសារសាធារណៈ go.gov.kh ផ្ទាលបញ្ជូនសារ nomsa.gov.kh ផ្ទាលបង្កើតទម្រង់បែបបទ form.gov.kh កម្មវិធីបញ្ញាសិប្បនិម្មិតបំប្លែងអត្ថបទជាសម្លេងសារិកា SARIKA។

ថ្នាលផ្ទៀងផ្ទាត់ឯកសារ verify.gov.kh (http://verify.gov.kh/) គឺជាថ្នាលរបស់រាជរដ្ឋាភិបាល ដែលអភិវឌ្ឍដោយក្រសួងប្រៃសណីយ៍និងទូរគមនាគមន៍ និងត្រូវបានដាក់ឱ្យប្រើក្នុងគោលបំណងលុបបំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើ និងផ្ទៀងផ្ទាត់ភាពត្រឹមត្រូវនៃឯកសារ ផ្តល់ទំនុកចិត្ត ចំណេញពេលវេលា និងកាត់បន្ថយចំណាយនានា ព្រមទាំងជំរុញការធ្វើបរិវត្តកម្មឌីជីថល ស្របតាមឧត្តមានុវត្តជាអន្តរជាតិ។

ការផ្ទៀងផ្ទាត់ឯកសារនៅលើថ្នាល verify.gov.kh ត្រូវធ្វើឡើងតាមរយៈការដាក់បញ្ចូល QR Code ស្តង់ដា ដោយប្រើបច្ចេកវិទ្យាប្លុកឆេន (Blockchain) ដែលមានសុវត្ថិភាពខ្ពស់នៅលើសន្លឹកនៃឯកសារនីមួយៗ។ ទន្ទឹមនឹងនេះ ការប្រើឯកសារដែលមានដាក់បញ្ចូល QR Code ស្តង់ដានេះ មិនតម្រូវឱ្យមានការធ្វើនីត្យានុកូលកម្ម លើឯកសារថតចម្លងក្នុងទម្រង់ជាក្រដាសឡើយ៕

The post ថ្នាល verify របស់កម្ពុជា ត្រូវបានរដ្ឋាភិបាលហ្វីលីពីន យកទៅប្រើប្រាស់លើអត្តសញ្ញាណឌីជីថលជូនប្រជាជនជាង ៩០ លាននាក់ appeared first on Kampuchea Thmey Daily.

លោក ជា វ៉ាន់ដេត Archives - Kampuchea Thmey Daily

យុវជន​កម្ពុជា​ជំរុញ​ចាប់​យក​​បច្ចេកវិទ្យា AI ឲ្យ​ឆ្លាត​វាងវៃ​ ដើម្បី​ដើរ​ទាន់​ចរន្ត​ពិភពលោក

ថ្នាល​ផ្ទៀងផ្ទាត់​ឯកសារ​ (Verify) របស់​កម្ពុជា​ក្លាយ​ជា​ហេដ្ឋារចនាសម្ព័ន្ធ​ឌីជីថល​ទី​៤​របស់​ពិភព​លោក

រដ្ឋមន្ត្រី ជា វ៉ាន់ដេត លើកទឹកចិត្តពលរដ្ឋខេត្តតាកែវឱ្យខិតខំបង្កើនការដាំដុះបន្លែបង្ការ និងចិញ្ចឹមសត្វ

យុវជនកម្ពុជាជំរុញចាប់យកបច្ចេកវិទ្យា AI ឲ្យឆ្លាតវាងវៃ ដើម្បីដើរទាន់ចរន្តពិភពលោក

ថ្នាលផ្ទៀងផ្ទាត់ឯកសារ (Verify) របស់កម្ពុជាក្លាយជាហេដ្ឋារចនាសម្ព័ន្ធឌីជីថលទី៤របស់ពិភពលោក