ឆ្លើយតប​ការសាកសួរ​របស់កម្ពុជាថ្មី លោក អ៊ុន បុត្ត អភិបាល​រង​ខេត្ត​កំពង់ធំ បាន​ថ្លែង​ថា «វឌ្ឍនភាព​បច្ចុប្បន្ន​ដំណើរការ​កំពុង​តែ​ធ្វើ​រហូត គឺ​អត់​ទាន់​ចប់​នៅ​ឡើយ​ទេ។ ការ​ប៉ាន់ស្មាន​នៃ​ការងារ​សម្រេច​បាន​ប្រហែល​ជា ៨០% ទៅ ៩០%»។

លោក អ៊ុន បុត្ត បន្ត​ថា ការងារ​នៅ​បន្តិច​បន្តួចទៀត​​ដូចជា​នៅ​ស្រុក​ស្ទោង និងស្រុក​ប្រាសាទ​បល្ល័ង្កដែលត្រូវអនុវត្តបន្ត។

គម្រោង​រៀបចំ​​បង្គោល​ភ្លើង​បំភ្លឺ​នៅ​តាម​ដង​ផ្លូវជាតិ​ក្នុង​ភូមិសាស្ត្រ​ខេត្ត​កំពង់ធំ ទទួល​បាន​ការ​ចាប់អារម្មណ៍​យ៉ាង​ខ្លាំង​ពី​មហាជន។

បើ​តាម​លោក អ៊ុន បុត្ត គោលដៅ​របស់​អាជ្ញាធរ​ខេត្ត​មិនមែន​គ្រាន់តែ​ពង្រីក​ការដំឡើង​តាម​បណ្ដោយ​ផ្លូវជាតិ​ប៉ុណ្ណោះ​ទេ តែ​ថែម​ទាំងគ្រោងរៀបចំនៅ​តាម​​ទាំង​ទី​ប្រជុំ​ជន ​តាម​ដង​ផ្លូវ​បេតុង​ និង​នៅ​តាម​បណ្តា​សង្កាត់​នានា​នៅ​ក្នុង​ក្រុង​ស្ទឹងសែន​ទៀត​ផង។

អាជ្ញាធរខេត្ត​កំពង់ធំ​បាន​ប្រមូល​កៀរគរ​កម្លាំង​​អនុវត្ត​ការ​រៀបចំ​​ដំឡើង​បង្គោល​ភ្លើង​បំភ្លឺ​សាធារណៈ​តាម​ដង​ផ្លូវ​ជាតិ​លេខ ៦ នៅក្នុងភូមិសាស្ត្រ​ខេត្តកំពង់ធំចាប់​ពី​ពីព្រំប្រទល់​ខេត្តកំពង់ចាម រហូត​ដល់​ព្រំប្រទល់​ខេត្តសៀមរាបដែលមាន​​ប្រវែង​សរុប ១៤៤ គីឡូម៉ែត្រ។

អភិបាលខេត្តកំពង់ធំលោក នួន ផារ័ត្ន បាន​ហៅ​យុទ្ធនាការ​នេះ​ពិត​ជា​មាន​សារៈសំខាន់​ណាស់ ក្រៅពីជួយ​​សម្រួល​ការធ្វើដំណើររ​បស់ប្រជាពលរដ្ឋ​ក្នុងពេលយប់ព្រលប់ ក៏​ដើម្បីពង្រឹងការងារសន្តិសុខដល់មូលដ្ឋានផង​ដែរ។

បើតាម​រដ្ឋបាល​ខេត្ត​កំពង់ធំ ក្រោម «យុទ្ធនាការបំពាក់ បង្គោលភ្លើងសូឡា នៅតាមដងផ្លូវជាតិលេខ៦» នឹង​ជំរុញ​ឲ្យ​ការ​អនុវត្ត​កិច្ចការ​នេះ​ឲ្យ​បាន​ចប់​រួចរាល់​នៅត្រឹមដំណាច់ឆ្នាំ ២០២៦ ខាង​មុខ៕

The post ​វឌ្ឍនភាព​ការ​រៀបចំ​​បង្គោល​ភ្លើង​បំភ្លឺ​តាម​ផ្លូវ​ជាតិ​លេខ ៦ ភូមិសាស្ត្រ​ខេត្ត​កំពង់ធំ​ សម្រេច​បាន​ប្រមាណ ៨០% appeared first on Kampuchea Thmey Daily.

ក្នុងឱកាសនេះដែរ លោកបានលើកឡើងនូវគោលបំណងរបស់ប្រមុខរាជរដ្ឋាភិបាលកម្ពុជា ដែលតែងយកចិត្តទុកដាក់ និងនៅតែបន្តលើកកម្ពស់លក្ខខណ្ឌការងារ សិទ្ធិសេរីភាព អត្ថប្រយោជន៍បេឡាជាតិរបបសន្តិសុខសង្គមដល់ប្រជាពលរដ្ឋ ជាពិសេសនិយោជិតគ្រប់ទីកន្លែង។

តាមរយៈភាពសកម្មភាពគ្រប់តំណាងរាជរដ្ឋាភិបាល លើកិច្ចការងារនេះដែរ បានបង្ហាញឱ្យឃើញកាន់តែច្បាស់នូវការប្តេជ្ញាចិត្ត ការយកចិត្តទុកដាក់ខ្ពស់របស់រាជរដ្ឋាភិបាល ក្នុងការបន្តលើកកម្ពស់លក្ខខណ្ឌការងារ សិទ្ធិសេរីភាព អត្ថប្រយោជន៍បេឡាជាតិរបបសន្តិសុខសង្គម អត្ថប្រយោជន៍នានារបស់បងប្អូនកម្មកនិយោជិត និងពង្រឹងយន្តការដោះស្រាយវិវាទការងារ ដែលអាចកើតមានឡើងជាសត្យានុម័ត សំដៅធ្វើឱ្យមានភាពកាន់តែល្អប្រសើរឡើងនៃទំនាក់ទំនងវិជ្ជាជីវៈនៅកន្លែងធ្វើការងារ។

បើតាមលោក នួន ផារ័ត្ន រាជរដ្ឋាភិបាលមិនត្រឹមតែមានមហិច្ឆតាទាក់ទាញវិនិយោគិនមកអភិវឌ្ឍ បង្កើតសហគ្រាស និងការងារជូនបងប្អូនប្រជាពលរដ្ឋនោះទេ រាជរដ្ឋាភិបាលក៏មានគោលបំណងបង្កើត និងពង្រីកឱ្យមានភាពសុខសាន្តនៅគ្រប់ទីតាំងសហគ្រាស ដើម្បីជាប្រយោជន៍រួមដល់ប្រជាពលរដ្ឋ ពិសេសកម្មករនិយោជិតផងដែរ។

ទន្ទឹមនេះ សមិទ្ធិផលជាច្រើនដែលបានកសាង នៅក្នុងប្រទេសកម្ពុជាយើងចាប់តាំងពីក្រោយថ្ងៃរំដោះ ៧មករា ឆ្នាំ១៩៧៩ រាជរដ្ឋាភិបាល បានកសាងប្រទេសពីបាតដៃទទេ ដោយខិតខំស្តារ កសាងឡើងវិញនូវហេដ្ឋារចនាសម្ព័ន្ធរូបវ័ន្ត ដូចជា ផ្លូវថ្នល់ ស្ពានខ្វាត់ខ្វែង សំណង់អគារខ្ពស់ៗ ទំនប់ប្រឡាយ សាលារៀន មន្ទីរពេទ្យ វត្តអារាម រហូតទទួលបាននូវការអភិវឌ្ឍគ្រប់វិស័យ ដូចដែលប្រជាពលរដ្ឋកម្ពុជាបានឃើញសព្វថ្ងៃនេះ៕ អត្ថបទ៖ ឈាង មករា 

The post រាជរដ្ឋាភិបាល តែងបន្តលើកកម្ពស់លក្ខខណ្ឌការងារ សិទ្ធិសេរីភាព និងអត្ថប្រយោជន៍ប.ស.ស តាមរយៈសកម្មភាពមន្ត្រី appeared first on Kampuchea Thmey Daily.

ជាមួយការប្រមូលកៀរគរកម្លាំងសរុប និងមធ្យោបាយសរុបពីគ្រប់មជ្ឈដ្ឋាន រដ្ឋបាល​ខេត្តកំពង់ធំ​បាន​អះអាង​ថា គម្រោងដ៏ធំមានសារៈសំខាន់នេះ គឺ​សម្រាប់សម្រួល​ការធ្វើដំណើររបស់ប្រជាពលរដ្ឋនៅពេលមេឃងងឹត និងចំពោះពលរដ្ឋដែលរស់​នៅតាមដងផ្លូវជាតិលេខ ៦ ព្រមទាំងដើម្បីពង្រឹងការងារសន្តិសុខផងដែរ។

លោក នួន ផារ័ត្ន អភិបាល​ខេត្តកំពង់ធំ​បាន​គូស​បញ្ជាក់ថា រដ្ឋបាលខេត្តកំពង់ធំនឹង​ចាប់ផ្តើមបើក «យុទ្ធនាការបំពាក់បង្គោលភ្លើងសូឡានៅតាមដងផ្លូវជាតិលេខ ៦» នៅក្នុងភូមិសាស្ត្រខេត្តកំពង់ធំ ដោយ​អនុវត្ត​ជាជំហានៗ ជាមួយការប្រមូលកៀរគរកម្លាំងសរុប និងមធ្យោបាយសរុបពីគ្រប់មជ្ឈដ្ឋាន។

លោកបន្ត​ថា យុទ្ធនាការបំពាក់បង្គោលភ្លើងសូឡានៅតាមផ្លូវជាតិលេខ ៦ គឺ​អនុវត្ត​ចាប់ពី​ព្រំប្រទល់ខេត្តកំពង់ចាម រហូតដល់ព្រំប្រទល់ខេត្តសៀមរាបប្រវែងសរុប ១៤៤ គីឡូម៉ែត្រ ហើយ​តាម​ផែនការ​​ត្រូវ​សម្រេច​ឱ្យ​បញ្ចប់​ទាំងស្រុងនៅត្រឹមដំណាច់​ឆ្នាំ២០២៦៕

The post ​​បំពាក់ភ្លើង​សូឡា​​​តាម​ផ្លូវ​ជាតិលេខ ៦ ពី​​ព្រំប្រទល់​ខេត្តកំពង់ចាមដល់​ខេត្តសៀមរាប សម្រួល​ធ្វើ​ដំណើរ​ពេលយប់ដល់​ពលរដ្ឋ​ appeared first on Kampuchea Thmey Daily.

នៅថ្ងៃទី២៨ ខែមករា ឆ្នាំ២០២៥ លោក ថោង ខុន ទេសរដ្ឋមន្ត្រីទទួលបេសកកម្មពិសេសរបស់រាជរដ្ឋាភិបាលកម្ពុជា អញ្ជើញជាអធិបតីក្នុងពិធីបើកការដ្ឋានសាងសង់ផ្លូវកៅស៊ូ DBST នៅតំបន់រម្យនីយដ្ឋានប្រាសាទបេតិកភណ្ឌពិលោកសំបូរព្រៃគុក។

លោក នួន ផារ័ត្ន អភិបាលខេត្តកំពង់ធំបានលើកឡើងថា កំណាត់ផ្លូវឆ្លងកាត់ប្រាសាទសំបូរព្រៃគុក ដែលមានប្រវែង​១ ៨០០ ម៉ែត្រ បច្ចុប្បន្នជាផ្លូវក្រាលគ្រួសក្រហម និងមានធូលីដីហ៊ុយប៉ះពាល់ដល់ការធ្វើដំណើរ​របស់ប្រជាពលរដ្ឋ និងភ្ញៀវទេសចរ។ អាជ្ញាធរជាតិប្រាសាទសំបូរព្រៃគុក ក្នុងនាមរាជរដ្ឋាភិបាលកម្ពុជា បានឆ្លងកិច្ចប្រជុំពី អាយ ស៊ី ស៊ី (ICC) សម្រេចអនុញ្ញាតឲ្យសាងសង់ឡើងវិញនូវផ្លូវកៅស៊ូ ប្រភេទ DBST មានប្រវែងសរុប ១៧៦០ ម៉ែត្រ ទទឹង ៦ ម៉ែត្រ មានចិញ្ចើមផ្លូវក្រាលល្បាយក្រួសក្រហម ម្ខាងៗប្រវែង ១ ម៉ែត្រ, មានសំណង់លូមូល ចំនួន៤កន្លែង រយៈពេលសាងសង់ចំនួន ៦ ខែ ដែលស្ថាបនាដោយកងវិស្វកម្ម នៃក្រសួងការពារជាតិ។

លោក ថោង ខុន ទេសរដ្ឋមន្ត្រីទទួលបេសកកម្មពិសេស រាជរដ្ឋាភិបាលកម្ពុជា មានប្រសាសន៍ថា ការសាងសង់ផ្លូវមួយខ្សែនៅបរិវេណប្រាសាទ ប្រាសាទបេតិកភណ្ឌពិភពលោកសំបូរព្រៃគុក គឺត្រូវបានអនុញ្ញាតដោយគណៈកម្មាធិការសម្បត្តិបេតិកភណ្ឌពិភពលោក ព្រោះប្រាសាទសំបូរព្រៃគុក ជាសម្បត្តិរួមរបស់មនុស្សជាតិទូទាំងពិភលោក បានដឹង និងទទួលស្គាល់ ទាំងសោភណ្ឌភាព វប្បធម៌ និងអរិយធម៌ របស់ដូនតាខ្មែរ ដែលបានបន្សល់ទុកដល់កូនខ្មែរ ជំនាន់ក្រោយ។ ការសាងសង់នេះ នឹងផ្តល់នូវសោភណ្ឌភាពកាន់តែស្រស់ស្អាតបន្ថែមមួយកម្រិតទៀត ដល់បរិវេណប្រាសាទ ផ្តល់ភាពងាយស្រួលក្នុងការធ្វើដំណើររបស់ភ្ញៀវទេសចរជាតិ និងអន្តរជាតិ ព្រមទាំងមានភាពទាញភ្ញៀវទេសចរឲ្យកាន់តែកើនឡើងច្រើនជាងមុនបន្ថែមទៀត។ ផ្លូវនេះ ក៏ជាការតភ្ជាប់កាន់តែងាយស្រួលដល់ប្រជាពលរដ្ឋរស់នៅភូមិអូរគ្រូកែ ទៅកាន់​ឃុំ​សំបូរ ដែលជាប្រយោជន៍ សម្រាប់ប្រជាពលរដ្ឋនៅមូលដ្ឋានប្រើប្រាស់ជាប្រចាំផងដែរ។

លោក ថោង ខុន បន្ថែមថា ការកកើតនៃសមិទ្ធផលទាំងអស់នេះ គឺដោយសារប្រទេសកម្ពុជារក្សាបាននូវស្ថេរភាពនយោបាយ ធ្វើឲ្យប្រទេសជាតិរក្សាបាននូវសុខសន្តិភាព និងការអភិវឌ្ឍគ្រប់វិស័យ ទាំងប្រព័ន្ធហេដ្ឋារចនាសម្ព័ន្ធ វិស័យអប់រំ កិច្ចការបរទេស ធ្វើឲ្យប្រទេសនៅក្នុងតំបន់អាស៊ាន និងប្រទេសផ្សេងទៀតនៅលើពិភោពលោកងាកមកចាប់អារម្មណ៍ វិនិយោគផ្នែកកសិកម្ម ឧស្សាហ៍កម្ម ពាណិជ្ជកម្មផងដែរ៕

អត្ថបទ៖ ឈាង មករា

The post ផ្លូវបរិវេណប្រាសាទសំបូរព្រៃគុក ប្រវែង ១ ៧៦០ ម៉ែត្រ ត្រូវបានបើកការដ្ឋានសាងសង់ជាផ្លូវ DBST appeared first on Kampuchea Thmey Daily.

លោក នួន ផារ័ត្នបានលើកឡើងថា រដ្ឋបាលខេត្តកំពង់ធំ បានចុះសិក្សា និងរៀបចំប្លង់គោលកែលម្អក្រុងស្ទឹងសែនឱ្យមានការផ្លាស់ប្ដូរមុខមាត់ថ្មី ក្លាយជាទីក្រុងមានសោភ័ណភាពបៃតង ស័ក្តិសមជាទីក្រុងទេសចរណ៍ស្អាត ទាក់ទាញភ្ញៀវជាតិ អន្តរជាតិ និងអ្នកវិនិយោគទុន ងាកមកចាប់អារម្មណ៍សក្ដានុពល និងភាពស្រស់ស្អាត នៅក្នុងទឹកដីខេត្ត។

លោកអភិបាលខេត្តបានបញ្ជាក់ថា គម្រោងកែលម្អនៅក្នុងក្រុងស្ទឹងសែននេះ មានការពង្រីកផ្លូវជាតិនៅក្នុងក្រុងស្ទឹងសែន ជាពីរគន្លង ចាប់ពីរង្វង់មូលតាក្រហម «ក» រហូតដល់ដាវដែកកំពង់ស្វាយ ផ្លូវបំបែកសៀមរាប-ព្រះវិហារ ឱ្យបានធំទូ លាយ​រៀបចំផ្លូវថ្មើរជើងនៅតាមដងស្ទឹងសែន រៀបចំផ្លូវក្រវ៉ាត់ក្រុង ដើម្បីការពារពីការជនលិចជំនន់ទឹកស្ទឹងសែន និងគម្រោងកែលម្អក្រុងស្ទឹងសែនជាច្រើនទៀត ត្រូវក្លាយជាក្រុងមួយដែលស្អាត សម្រួលការរស់នៅរបស់ប្រជាពលរដ្ឋ ការប្រកបអាជីវកម្ម ឱ្យកាន់តែប្រសើរឡើងថែមទៀត។

លោក នួន ផារ័ត្ន បានលើកទឹកចិត្តដល់បណ្ដាស្រុក ខិតខំចូលសិក្សារៀបចំប្លង់គោល ដើម្បីអភិវឌ្ឍនៅក្នុងស្រុករបស់ខ្លួន ឱ្យបានស្អាត និងមានរបៀបរៀបរយ មានសោភ័ណភាពល្អ មានសុវត្ថិភាពដល់បងប្អូនប្រជាពលរដ្ឋក្នុងមូលដ្ឋានផង​ដែរ៕

អត្ថបទ៖ ឈាង មករា

The post អាជ្ញាធរខេត្តកំពង់ធំកែ​លម្អទីក្រុង ដោយអនុវត្តន៍តាមប្លង់គោល លើគម្រោងធំៗនៅឆ្នាំ២០២៥ appeared first on Kampuchea Thmey Daily.

ពិធី​ប្រកាស​តែង​តាំង​នេះ​បាន​ធ្វើ​ឡើង​នា​ព្រឹក​ថ្ងៃ​ទី​១៥​ ​ខែ​ធ្នូ ឆ្នាំ​២០២៤​ ក្រោមអធិបតីភាព​ លោកឃួង ស្រេង ​សមាជិក​គណៈកម្មាធិការ ​កណ្តាល​គណបក្ស​ប្រជាជន​កម្ពុជា ​និង​ប្រធាន​គណៈកម្មាធិការ គណបក្ស​ប្រជាជន​កម្ពុជា​រាជ​ធានីភ្នំពេញ ​និង​លោក​បណ្ឌិត ជ្រួន ថេរ៉ាវ៉ាត ​សមាជិក គណៈ​កម្មាធិការ​កណ្តាល​គណបក្ស​ប្រជាជនកម្ពុជា​ អនុប្រធាន​យុវជន​គណបក្ស​ប្រជាជន​កម្ពុជា​ថ្នាក់​កណ្តាល ​និង​ជា​ប្រធានគណៈ​ប្រចាំ​ការ​គណៈអចិន្ត្រៃយ៍​យុវជនគណបក្ស​ថ្នាក់​កណ្តាល​ តំណាង​ដ៏​ខ្ពង់​ខ្ពស់​របស់ ​សម្តេចមហាបវរធិបតី ហ៊ុន ម៉ាណែត ​អនុប្រធាន​គណបក្សប្រជាជន​កម្ពុជា​ និង​ជា​ប្រធាន​យុវជន​គណបក្ស​ថ្នាក់​កណ្តាល ​នៅ​មន្ទីរ​គណបក្សប្រជាជន​កម្ពុជា​រាជធានីភ្នំពេញ​។​

លោក​ឃួង ស្រេង ​បាន​មាន​ប្រសាសន៍​លើក​ឡើង​ថា​​ ក្រុម​ការងារ​យុវជនគណបក្ស​ ជា​កម្លាំង​ស្នូល​មិន​អាច​ខ្វះ​បាន​ ​ដែល​ទាម​ទារ​​ឱ្យ​យុវជន​របស់​យើង​ពង្រឹង​ខ្លួន​បន្ថែម​ទៀត​ ស្រប​ទៅ​តាម​គោល​នយោបាយ​របស់គណបក្ស ​ដើម្បី​ជា​កម្លាំង​បន្ត​វេន​ដ៏​រឹង​មាំ​របស់​គណបក្ស។ ​

សម្រាប់​ថ្ងៃ​នេះ ​លោក​សុខ ពេញវុធ ​សមាជិក​ គណៈអចិន្ត្រៃយ៍​គណៈកម្មាធិការ​គណបក្ស​ប្រជាជន​កម្ពុជា​រាជធានីភ្នំពេញ ​ត្រូវ​បាន​ប្រកាស​តែង​តាំង​ជា​ប្រធាន​ក្រុម​ការងារ​យុវជន​គណបក្ស​រាជធានី​ថ្មី​ ដើម្បី​បន្ត​នូវ​និរន្តរភាព​នៃ​ការងារ​ ដឹក​នាំ​អង្គការ​ចាត់​តាំង​យុវជនគណបក្ស​ថ្នាក់​រាជធានី ​បន្ទាប់​ពី​ ប្រធាន​ក្រុម​ការងារ​យុវជន​គណបក្ស​រាជធានី​ចាស់ ​គឺ​លោក នួន ផារ័ត្ន ទទួល​បាន​ការ​ផ្តល់​សេចក្តី​ទុក​ចិត្ត​ពី​សំណាក់​ថ្នាក់ ​ដឹក​នាំ​គណបក្ស ​ឱ្យ​ទទួល​តួនាទី ​ជា​ប្រធាន ​គណៈកម្មាធិការ​ គណបក្ស​ប្រជាជន​កម្ពុជា​ខេត្ត​កំពង់​ធំ ​កន្លង​ទៅ​នេះ​។

លោកឃួង ស្រេង ​ក្នុង​ឱកាស​នោះ​ ក៏​បាន​ធ្វើ​ការ​ផ្តាំ​ផ្ញើ​​លោកសុខ ពេញវុធ ដែល​បាន​តែង​តាំង​ថ្មី​នេះ ​ត្រូវ​បន្ត​រក្សា​សន្តិភាព​​​ឱ្យ​បាន​គង់​វង់​ ដើម្បី​អភិវឌ្ឍន៍​សេដ្ឋកិច្ច​ជាតិ​​ឱ្យ​រីក​ចំរើន​បន្ថែម​ទៀត​។​ គោរព​ស្រលាញ់​ប្រជាពលរដ្ឋ ​សាមគ្គីភាព​ផ្ទៃ​ក្នុង​​ឱ្យ​បាន​រឹង​មាំ ​បន្ត​ពិនិត្យ​តាម​ដាន​និង​ប្រឆាំង​រាល់​ការ​ឃោសនា​អគតិ​ពី​ក្រុម​ជ្រុល​និយម​ ចូល​រួម​ប្រយុទ្ធ​ប្រឆាំង​ព័ត៌មាន​ក្លែង​ក្លាយ​​និង​ទប់​ស្កាត់​ដាច់​ខាង​ចំពោះ​ចលនាបដិវត្តពណ៌។​យក​ចិត្ត​ទុក​ដាក់​ក្នុង​ការ​ពង្រឹង​ និង​ពង្រឹក​យុវជនបក្ស ​ដូច​ពាក្យ​ស្លោក​ថា​ ពង្រីក​ដល់​ណា ​ពង្រឹង​​ដល់​នោះ​។​

លោក​បណ្ឌិត ​ជ្រួន ថេរ៉ាវ៉ាត ​បាន​មាន​ប្រសាសន៍​លើក​ឡើង​ថា​​ រាជធានីភ្នំពេញ​ មាន​យុវជន​គណបក្ស​ដ៏​រឹង​មាំ ​ដោយ​បង្កើត​បាន​​ក្រុម​ការងារ​យុវជន​គណបក្ស​ថ្នាក់ ​រាជធានី ខណ្ឌទាំង១៤ សង្កាត់ ទាំង១០៥ រហូត​ដល់​ចំនួន ៣១,៥៦៧រូប ដែល​ក្រុម​ការងារ​យុវជន​គណបក្ស​ទាំង​នេះ​ត្រូវ​បាន​បែង​ចែក តួនាទី ភារកិច្ច​រៀងៗខ្លួន ដើម្បី​​​ឱ្យ​បក្សមានភាពរឹងមាំ។​បើ​អង្គការ​ចាត់​តាំង​ដ៏​រឹង​មាំ​ នោះ​គណបក្សប្រជាជនកម្ពុជាក៏រឺងមាំដែរ។​២៦ឆ្នាំនេះ យើងបានបណ្តុះបណ្តាលយុវជនជាច្រើន ដោយ​សារ​កម្ពុជាមានសន្តិភាពពេញលេញ។គុណភាពយុវជនបក្សជាគុណសម្បត្តិ ដែល​នាំ​​ឱ្យ​គណបក្សប្រជាជនកម្ពុជាទទួលបានជ័យជំនៈ។

លោក​បណ្ឌិត ជ្រួន ថេរ៉ាវ៉ាត បានបន្តទៀតថា៖ អំពើល្អរបស់មន្ត្រីបក្សនិងការអនុវត្តនៅអភិក្រម “ឆ្លុះ​កញ្ចក់ ងូតទឹក ដុសក្អែល ព្យាបាល និងវះកាត់” បានធ្វើ​​ឱ្យ​គណបក្សប្រជាជន​កម្ពុជា​ឈ្នះ​ក្នុង​ការ​បោះ​ឆ្នោត​រហូតមក។

លោក​សុខ ​ពេញវុធ ក្នុង​ឱកាស​នោះ​ដែរ​ ក៏​បាន​ធ្វើ​ការ​ប្តេជ្ញា​ចិត្ត​ពង្រឹង​សាមគ្គីភាព​ផ្ទៃ​ក្នុង​​ឱ្យ​​បាន​ល្អ​ ប្តេជ្ញា​ពង្រឹង​ និង​ពង្រឹកយុវជនបក្ស​​ឱ្យ​បាន​ជា​ប្រចាំ ​ពង្រឹង​ និង​ពង្រីក​ភាព​ជា​ដៃ​គូ​ជាមួយ​អង្គការ យុវជនក្រៅប្រព័ន្ធនិងសង្គមស៊ីវិល ដើម្បីអភិវឌ្ឍន៍យុវជនអោយកាន់តែប្រសើរឡើង៕

អត្ថបទ៖ ស្រីរ័ត្ន

The post ​លោកសុខ​ ពេញវុធ​ ត្រូវ​បាន​ប្រកាស​តែង​តាំង​ជា​ប្រធាន​ក្រុមការងារយុវជន​គណបក្ស​រាជធានី​ភ្នំពេញ​ជំនួស​លោក នួន ផារ័ត្ន appeared first on Kampuchea Thmey Daily.

លោកអភិបាលខេត្តកំពង់ធំ​ ថែមទាំងបានណែនាំដល់មន្ត្រីជំនាញចុះសិក្សាអំពីស្ថានភាពភូមិសាស្ត្រទឹកក្នុងខេត្តកំពង់ធំ ឱ្យបានច្បាស់លាស់ ដើម្បីត្រៀមរៀបចំផែនការការពារ ទប់ស្កាត់បញ្ហាគ្រោះជំនន់ទឹកភ្លៀង និងមានវិធានការជួយសង្គ្រោះប្រជាពលរដ្ឋបានទាន់ពេលវេលា នៅពេលជំនន់ទឹកភ្លៀង។ ការណែនាំរបស់អភិបាលខេត្តនេះ លើកឡើងនៅក្នុងកិច្ចប្រជុំការគ្រប់គ្រងគ្រោះមន្តរាយណ៍ក្នុងខេត្តកំពង់ធំ នាព្រឹកថ្ងៃទី១៩ ខែកក្កដា ឆ្នាំ២០២៤ នៅសាលប្រជុំសាលាខេត្តកំពង់ធំ។

តាមសេចក្តីជូនដំណឹងរបស់រដ្ឋបាលខេត្តកំពង់ធំ កាលពីថ្ងៃទី១៨ ខែកក្កដា ឆ្នាំ២០២៤ បានឱ្យដឹងថា ផ្អែកលើស្ថានភាពបច្ចុប្បន្នកម្រិតទឹកស្ទឹងសែននៅស្ថានីយកំពង់ធំមានកម្ពស់១២,៩៣ម៉ែត្រ ដែលសង្កេតឃើញថា មានការកើនឡើងជាបន្តបន្ទាប់តាមរយៈជំនន់ទឹកភ្លៀង ខណៈកម្រិតទឹកដែលត្រូវប្រកាសអាសន្នស្ថិតនៅកម្ពស់១៣,៥០ម៉ែត្រ។ បើតាមការបញ្ជាក់បន្ថែមរបស់រដ្ឋលេខាធិការក្រសួងធនធានទឹក និងឧតុនិយម លោក ចាន់ស៊ីណាត ដែលបានចុះពិនិត្យស្ថានភាពទឹកអាងស្ទឹងសែន ក្នុងភូមិសាស្ត្រខេត្តកំពង់ធំ បានបញ្ជាក់ថា ស្ថានភាពទឹកស្ទឹងសែនក្នុងភូមិសាស្ត្រខេត្តកំពង់ធំ កំពុងហក់ឡើងខ្លាំង ជាពិសេសត្រង់ចំណុចការដ្ឋានទំនប់អាងទឹកកំពង់គោ ក្នុងឃុំកំពង់គោ ស្រុកកំពង់ស្វាយ។

ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ អាជ្ញាធរខេត្តកំពង់ធំ បានរម្លឹកប្រជាពលរដ្ឋក្នុងខេត្ត ពិសេសពលរដ្ឋដែលរស់នៅតាមបណ្តោយដងស្ទឹងសែន និងតំបន់ងាយរងគ្រោះ មេត្តាបង្កើនការប្រុងប្រយ័ត្នខ្ពស់ ដោយហាមកូនចៅតូចៗកុំឱ្យចុះលេងទឹក និងត្រូវត្រៀមរៀបចំទុកដាក់នូវសម្ភារ និងឯកសារសំខាន់ៗឱ្យបានត្រឹមត្រូវ។

ទន្ទឹមនេះ អាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ ក្នុងការត្រៀមរៀបចំផែនការអន្តរាគមន៍ និងត្រៀមរៀបចំទីទួលសុវត្ថិភាពឱ្យបានសមរម្យក្នុងការជម្លៀសប្រជាពលរដ្ឋ នៅពេលដែលមានគ្រោះមហន្តរាយទឹកជំនន់មកដល់។ម្យ៉ាងវិញទៀត ត្រូវផ្សព្វផ្សាយណែនាំឱ្យប្រជាពលរដ្ឋយកចិត្តទុកដាក់លើសុខភាពអនាម័យ ដើម្បីជៀសវាងជំងឺឆ្លងផ្សេងៗ៕

The post ខណៈកម្ពស់ទឹកស្ទឹងសែនជិតដល់ចំណុចប្រកាសអាសន្ន អភិបាលខេត្ត អំពាវនាវពលរដ្ឋឱ្យបង្កើនការប្រុងប្រយ័ត្ន appeared first on Kampuchea Thmey Daily.

លោក នួន ផារ័ត្ន អភិបាលខេត្តកំពង់ធំ បានណែនាំដល់មន្ទីរកសិកម្ម រុក្ខាប្រមាញ់ និងនេសាទខេត្ត សហការជាមួយរដ្ឋបាលព្រៃឈើ ឱ្យសិក្សាលើដីដែលបានដកហូតពីជនខិលខូចបានកាប់ទន្រ្ទានយកដីរដ្ឋដោយខុសច្បាប់ មកដាំដុះកូនឈើឡើងវិញ និងការពារឱ្យបានល្អ ដោយមិនមានការទន្ទ្រានថ្មីទៀតនោះទេ។

តែយ៉ាងណា ក្នុងឱកាសដឹកនាំកិច្ចប្រជុំប្រចាំខែរបស់គណៈបញ្ជាការឯកភាពរដ្ឋបាលខេត្តកំពង់ធំ នាព្រឹកថ្ងៃទី១៦ ខែកក្កដា ឆ្នាំ២០២៤ លោក នួន ផារ័ត្ន អភិបាលខេត្តកំពង់ធំ និងជាប្រធានគណៈបញ្ជាការឯកភាពរដ្ឋបាលខេត្ត បានអរគុណដល់កងកម្លាំងសមត្ថកិច្ច និងមន្ត្រីជំនាញទាំងអស់ ដែលឈរជើងនៅទីបញ្ជាការស្រាលទាំង ១៤គោលដៅ នៅដែនជម្រកសត្វព្រៃ ព្រៃសហគមន៍ និងតំបន់វាលក្រោម (តំបន់៣) ក្នុងប្រតិបត្តិការបង្ក្រាប និងទប់ស្កាត់ការពារធនធានធម្មជាតិ ក្នុងភូមិសាស្ត្រខេត្តកំពង់ធំនាពេលកន្លងមក ទទួលបានលទ្ធផលយ៉ាងមានប្រសិទ្ធិភាព។

លោកអភិបាលខេត្ត បានជំរុញឱ្យកម្លាំងសមត្ថកិច្ច និងមន្ត្រីជំនាញបន្តនិរន្តរភាពការងារនេះឱ្យបានល្អប្រសើថែមទៀត ដែលជាមួយគ្នានេះ ក្នុងនាមជាអភិបាលខេត្តកំពង់ធំ លោក នួន ផារ័ត្ន ក៏បានជួយឧត្ថម្ភដល់កម្លាំងដែលឈរជើងប្រចាំការទីបញ្ជាការស្រាលទាំង ១៤គោលដៅនូវគ្រឿងឧបភោគបរិភោគ និងម៉ូតូសម្រាប់ប្រតិបត្តិការផងដែរ។

បន្ថែមពីការណែនាំលើកិច្ចការទប់ស្កាត់ការទន្ទ្រានដីរដ្ឋនេះដែរ លោក នួន ផារ័ត្ន ក៏បានក្រើនរំលឹកដល់គណៈបញ្ជាការឯកភាពរដ្ឋបាលក្រុង ស្រុក និងកងកម្លាំងប្រដាប់វុធទាំងបីប្រភេទឱ្យបន្តនិរន្តភាពការងារដែលធ្លាប់បានអនុវត្តកន្លងមកឱ្យល្អប្រសើរថែមទៀត ព្រមទាំងការបង្ក្រាប និងទប់ស្កាត់ល្បែងស៊ីសងគ្រប់ប្រភេទ បញ្ហាគ្រឿងញៀន ការរឹតបណ្តឹងសុវត្ថិភាពចរាចរណ៍ផ្លូវគោគ ត្រួតពិនិត្យគ្រឿងស្រវឹង អាវុធជាតិផ្ទុះ បញ្ជាក្មេងទំនើង តាមរយៈការអប់រំ និងអនុវត្តច្បាប់ឱ្យបានត្រឹមត្រូវ៕

The post ដីដែលដកហូតពីការទន្ទ្រាន ត្រូវបានអភិបាលខេត្តកំពង់ធំ ណែនាំឱ្យដាំកូនឈើឡើងវិញ appeared first on Kampuchea Thmey Daily.