ការណ៍ដែល ក្រុមគ្រួសារអធិរាជសំឡេងមាស ស៊ីន ស៊ីសាមុត ប្រកាសជាសាធារណៈបែបនេះ គឺបន្ទាប់ពីកាលពីថ្ងៃទី១៤ ខែមិថុនា ឆ្នាំ២០២៣ លោក បឺត សំរេច បានប្រកាសថាខ្លួនជាកូនប្រុសឥតខាន់ស្លានៃអធិរាជសំឡេងមាស ស៊ីន ស៊ីសាមុត។

កាលណោះ ក្រោយលោក បឺត សំរេច បានប្រកាសបែបនោះ គឺមានជនានុជនដ៏ច្រើនលើសលប់ដែលស្រឡាញ់ការពិត យុត្តិធម៌ បានចេញមកជាបន្តបន្ទាប់ ចូលរួមតាមដាន និងវិភាគហេតុការណ៍ ក្នុងគោលបំណងការពារភាព ស្អាតស្អំ សេចក្តីថ្លៃថ្នូរ និងកិត្តិយសរបស់អធិរាជសំឡេងមាស ស៊ីន ស៊ីសាមុត។

តាមរយៈលិខិតជំហរនៃក្រុមគ្រួសារលោក ស៊ីន ស៊ីសាមុត បានសរសេរក្នុងន័យច្រានចោលការប្រកាសរ​បស់លោក បឺត សំរេច ថា​ “សូមច្រានចោលទាំងស្រុងចំពោះការអះអាងគ្មានមូលដ្ឋានពិតប្រាកដ ភូតកុហក ប្រតិដ្ឋ កាត់កែច្នៃនិងបំភ្លៃការពិត ដែលបង្កើតដោយលោក បឺត សំរេច, លោកយាយ គឹម រឺ និងក្រុមការងារលោក បឺត សំរេចព្រមទាំងសាក្សីក្លែងក្លាយទាំងឡាយ។ សូមច្រានចោលនូវចេតនារបស់ជនទាំងឡាយណា ដែលអះអាងដោយគ្មានមូលដ្ឋានច្បាស់លាស់ ថាជាកូនឬកូនឥតខាន់ស្លានៃអធិរាជសំឡេងមាស នាថ្ងៃអនាគត”។

លិខិតដដែល ក៏បានទទូចឱ្យ ម្ចាស់ផេក ម្ចាស់ឆាណែល ឬអ្នកសារព័ត៌មាន បញ្ឈប់ និងចូលរួមសហការទប់ស្កាត់ការបង្ហូរព័ត៌មានមិនពិតគ្រប់រូបភាព ដើម្បីចូលរួមរក្សាតម្លៃរួមជាមនុស្សមានសីលធម៌។

តំណាងក្រុមគ្រួសារ លោក ស៊ីន ស៊ីសាមុត ក៏បាន អរគុណដល់បណ្តាញព័ត៌មាន មួយចំនួនដូចជា ក្រុមព្រះសុរិយា, និលោកសេង តារា អ្នកស្រាវជ្រាវ និងបណ្តាញព័ត៌មានជាច្រើនទៀត ដែលបានចំណាយពេលស្រាវជ្រាវ បកស្រាយ និងផ្សព្វផ្សាយបំភ្លឺការពិតជូនដល់ជនានុជន បានដឹងការពិតថា លោក ធឹប ភក្រលីន ហៅ បឺត សំរេច មិនមែនជាកូនឥតខាន់ស្លានៃអធិរាជសំឡេងមាស។

លិខិតដដែល ក៏បានកោតសរសើរចំពោះទឹកចិត្ត ស្មារតី និងឧត្តមគតិនៃពលរដ្ឋកម្ពុជាមួយចំនួនធំ ដែលនៅតែទទួលស្គាល់ភាពស្អាតស្អំ កិត្តិយស សេចក្តីថ្លៃថ្នូរ និងកិត្យានុភាពនៃ អធិរាជសំឡេងមាស ស៊ីន ស៊ីសាមុត ក្នុងឋានៈជាវីរៈសិល្បៈករផ្នែកសំនៀងពីរោះឯក និងជាមរតកសិល្បៈ ដ៏ថ្លៃថ្លាផូរផង់រួមតែមួយគត់នៃប្រជាជាតិខ្មែរគ្រប់ជំនាន់។ ជាពិសេស កោតសរសើរចំពោះឆន្ទៈ ដ៏រឹងមាំនៃពលរដ្ឋកម្ពុជា ដែលបាននិងកំពុងបន្តច្រានចោលរាល់ការផ្តល់សម្មតិកម្មក្លែងក្លាយនានា របស់ក្រុមលោក បឺត សំរេច ជាដរាប៕

ដោយ៖ង៉ិល ណារ៉ាត់

The post គ្រួសារអធិរាជសំឡេងមាស ៖ លោក បឺត សំរេច មិនមែនជាកូនឥតខាន់ស្លា របស់លោក ស៊ីន ស៊ីសាមុត ឡើយ appeared first on Kampuchea Thmey Daily.

តារាចម្រៀងលោក សុះ ម៉ាច បានបង្ហោះភ្ជាប់រូបភាពមួយសន្លឹកនៅព្រឹកនេះថា «ភាពអត់ធ្មត់​របស់ពួកយើង​មានកម្រិត​ពួកយើងមានក្រមសីលធម៌ សុជីវធម៌ សេចក្តីថ្លៃថ្នូរ។ឥឡូវនេះក្រុមគ្រួសារបងប្អូន​កូនក្មួយរៀបចំឯកសារ​តាមប្រព័ន្ធច្បាប់ ដើម្បីតបតវិញហើយក្រោយពីពិភាក្សាគ្នាច្រើនលើកច្រើនសារមកនេះ»។

លោក សុះ ម៉ាច បានបន្ថែមថាដូច្នេះថា អ្នកដែលពាក់ព័ន្ធ និងអ្នកដែលជេរប្រមាថ លោកម្តាយដែលជាឧត្តមភរិ យារបស់អធិរាជ ស៊ីន ស៊ីសាមុត អាចប្រឈមនិងមុខច្បាប់មិនខាន។ កម្មនរណាសាងអ្នកនោះនឹងទទួលហើយ។ ការជឿងប់ងល់ខ្វះការពិចារណាជាបញ្ហាមួយធ្វើឱ្យសង្គមអន់ថយ ព្រោះគ្មានបានផ្តល់ប្រយោជន៍បន្តិចសោះ ចូរកុំខ្វល់រឿងបុគ្គលពេកអី។

មហាជនជាច្រើនបានលើកឡើងថា នេះជាពេលវេលាល្អ ដែលការពិតត្រូវតែលាតត្រដាងដល់មហាជនអ្នកគាំទ្រ ខណ:វាំងននខ្មៅមិនទាន់ត្រូវបានបើកទម្លាយការពិតអូសបន្លាយអស់រយ:ពេលច្រើនខែមកហើយ។

សូមបញ្ជាក់ដែរថា តារាចម្រៀងលោក សុះ ម៉ាច កាលពីថ្មីៗក៏ចេញមកបញ្ជាក់ថាលោកនឹងបន្តការស្វែងរកការពិត និងយុត្តិធម៌ជូនក្រុមគ្រួសារលោកយាយខាវ ថងញ៉ុតក៏ដូច ជាវិញ្ញាណក្ខន្ធអធិរាជស៊ីន ស៊ីសាមុត ដែលនិងត្រូវបង្ហាញ​ក្នុងពេលឆាប់ៗខាងមុខ។

ការអះអាងរបស់លោក សុះ ម៉ាច នេះបន្ទាប់ពីលោកបានទម្លាយរឿងរ៉ាវមួយចំនួនពាក់ព័ន្ធលោក បឺត សំ រេច ដែលអះអាងថា ខ្លួនជាកូនលោកតា ស៊ីន ស៊ីសាមុត ខណ:លោក សុះ ម៉ាច បានបញ្ជាក់នាពេលថ្មីៗថា លោក បឺត សំរេច គឺមិនមែនជាកូនរបស់អធិរាជ ស៊ីន ស៊ីសាមុត ឡើយ។ ម្យ៉ាងទៀតរឿងដែលហួសចិត្តគឺ លោក បឺត សំរេច ថែម​ទាំង​កុហក់លោកថា កូនស្រីលោកតា ស៊ីន ស៊ីសាមុត បានតេទូរស័ព្ទទារលុយចំនួន២ម៉ឺនដុល្លារ ជាថ្នូរធ្វើតេស DNAទៀតផង៕

អត្ថបទ ៖ ចាន់រ៉ា

The post លោក សុះ ម៉ាច៖ អ្នកពាក់ព័ន្ធជេរប្រមាថភរិយា និងគ្រួសារអធិរាជ ស៊ីន ស៊ីសាមុត អាចប្រឈមមុខច្បាប់ appeared first on Kampuchea Thmey Daily.

យ៉ាង​ណា​មិញ​បញ្ហា​នេះ ​កន្លង​មក​ក៏​មាន​មតិ​មួយ​ចំនួន​យល់​ថា​លោក បឺត សំរេច ស្រដៀង​នឹង​លោក​តា ស៊ីន ស៊ីសាមុត ចំណែក​ខ្លះ​ទៀត​ជំរុញ​ឱ្យ​មាន​ការ​ពិនិត្យ DNAផង​​ដែរ។

ទន្ទឹម​នេះ​ មាន​ការ​ទម្លាយ​ទៀត​ថា ​ឧកញ៉ា សៀង​ ណាំ មាន​បំណង​ស្រាយ​ចម្ងល់​មហាជន​ពាក់ព័ន្ធ​និង ​បឺត សំរេច ក្រៅ​ពី​ការ​ធ្វើ​តេស្ត​តាម​រយៈ​ វិទ្យា​សាស្ត្រDNA។ នេះ​បើ​តាម​ការ​បង្ហើប​របស់​លោក សុះ ម៉ាច។

នៅ​ក្នុង​សំណេរ​របស់​លោក សុះ ម៉ាច បាន​បញ្ជាក់​ថា ឧកញ៉ា​ សៀង ណាំ ជា​មន្ត្រី​ដ៏​ឆ្នើម​មួយ​រូប​ដែល​បាន​រួម​ចំណែក កសាង​ប្រទេស​ជាតិ ជា​ពិសេស​ទឹក​ដី​ខេត្ត​សៀមរាប។ កំឡុង​ពេល​យុទ្ធនា​ការ​បោះឆ្នោត​ចុង​បញ្ចប់​ថ្ងៃ​ទី​​២១ ខែ​កក្កដា​ នៅ​ស្រុក​ក្រឡាញ់ ខេត្ត​សៀមរាប លោក​បាន​ផ្ដល់​​ឱកាស​ឱ្យ​លោក ​និង បឺត សំរេច ជួប​ជា​​មួយ​គ្នា​។ វេលា ​២ថ្ងៃ​ ដែល​លោក​និង​ បឺត សំរេច ជួប​គ្នា​តាំង​ពី​ធ្វើ​ដំណើរ​រួម​គ្នា​ពី​ភ្នំពេញ​ ក៏​ដូច​ជា​ការ​ស្នាក់​​នៅ​ និង​ជួប​ជជែក​ជា​មួយ​ឧកញ៉ា គឺ​រូប​លោក​បាន​ដឹង​រឿង​រ៉ាវ​ច្រើន​ពី បឺត សំរេច ដែល​បាន​រៀប​រាប់។

តារា​ចម្រៀង​លោក សុះ ម៉ាច បញ្ជាក់​ទៀត​ថា ឧកញ៉ា សៀង ណាំ មាន​បំណង​ស្រាយ​ចម្ងល់​មហាជន​ពាក់ព័ន្ធ​ និង បឺត សំរេច ក្រៅ​ពី​ការ​ធ្វើ​តេស្ត​តាម​រយៈ​ វិទ្យា សាស្ត្រDNA ដែល​ត្រូវ​ចំណាយ​ថវិកា​ច្រើន (ខ្ទង់​ម៉ឺន ដុល្លារ) បើ​ទោះ​បី​ជា​មាន​ការ​យល់​ព្រម​ពី​ក្រុម​គ្រួសារ​លោក​ ស៊ីន ស៊ីសាមុត ក៏​ដោយ។

មិន​តែ​ប៉ុណ្ណោះ​ ឧកញ៉ា សៀង ណាំ ថា​លោក​សុខ​ចិត្ត​ចំណាយ ពេល​ជូន​ បឺត សំរេច ចុះ​ស្រាវ​ជ្រាវ​ដល់​​ទឹកដី​ឡាវ និង​ថៃ ជា​ទី​កន្លែង​ដែល​ម្ដាយ​ក៏​ដូច​ជា បឺត សំរេច ធ្លាប់​រស់​នៅ​ដើម្បី​បាន​ឯកសារ​ ក៏ដូច​ជា​ភស្តុតាង​ខ្លះ​​មកបញ្ជាក់​​ឱ្យ​ច្បាស់​ជូន​មហាជន​ឱ្យ​បាន​ជ្រាប​​ពី បឺត សំរេច និង​​អធិរាជ ស៊ីន ស៊ី​​សាមុត ជា​​ជាង​ការ​ចំណាយ​ថវិកា​ច្រើន​លើ​រឿង​នេះ​ដោយ​សារ​ បឺត សំរេច ពុំ​មាន​លទ្ធភាព។

ទន្ទឹម​នេះ លោក សុះ ម៉ាច បាន​ដាក់​ការ​រំពឹង​ថា​ «សង្ឃឹម​ថា​វាំងនន​នឹង​បើក​ឱ្យ​ឃើញ​​ការ​ពិត​ច្បាស់​ៗ​ក្នុង​ពេល​ខ្លី​ខាង​​មុខ​មិន​ខាន។ សូម​​មហាជន​មេត្តា​អធ្យាស្រ័យ​ដល់​ការ​​ជ្រាវ​របស់​ប្អូន សេង តារា ក៏​ដូច​​ជា វីរះ វ៉ារ៉ាឌី ផង។ ពួក​គាត់​គ្មាន​ចេតនា​អ្វី​ក្រៅ​ពី​ស្វែង​រក​ការ​ពិត ​និង​ការ​ស្រាយ​ចម្ងល់​ជូន​​មហាជន​ពាក់ព័ន្ធ​ និង​ជីវិត បឺត សំរេច បើ​គ្មាន​ពួក​គាត់​ខំ​ចំណាយ​ពេល​ជួប​សាក្សី​នា​​កន្លង​មក​នោះ ការ​ពិត​ក៏​ដូច​ជា​ពន្លឺ​ខ្លះ​ក៏​នឹង​ពិបាក​កើត​មាន​ដែរ»។

«អ្នក​ស្រាវជ្រាវ​ដែល​មាន​វិជ្ជាជីវៈ​ជួប​បញ្ហា ២ គឺ​គុណ​សម្បត្តិ និង​គុណ​វិបត្តិ​បើ​ស្រាវជ្រាវ​ជួប​មនុស្ស​ពិត​ព័ត៌មាន ក៏​ពិតបើ​ជួប​មនុស្ស​ស្រពិចស្រពិល​ព័ត៌មាន​ក៏​មិន​ច្បាស់​រង​ការ​វាយ​ប្រហារ​មិន​ខាន។ សង្ឃឹម​ថា​ប្រិយមិត្ត​មហាជន​លោក​នឹង​យល់។ រីឯ​សំណេរ​របស់​ខ្ញុំ​ក៏​គ្មាន​ចេតនា​ការពារ​នរណា​ម្នាក់​នោះ​ទេ ខ្ញុំ​ជា​មនុស្ស​ឈរ​តែ​ជំហរ​កណ្ដាល​ទេ»។ លោក សុះ ម៉ាច លើក​ឡើង​បន្ថែម។

សូម​ជម្រាប​ថា​ ដំណឹង​ដ៏​រសើប​ដែល​លោក បឺត សំរេច បាន​ទម្លាយ​រឿង​រ៉ាវ​កប់​ទុក​ក្នុង​ចិត្ត​ជា​យូរឆ្នាំ​មក​ហើយ​ ដោយ​អះអាង​ថា​ជា​កូន​ប្រុស​របស់​លោក​តា ស៊ីន ស៊ីសាមុត នោះ​កន្លង មក​បាន​ក្លាយ​ជា​ប្រធានបទ​យ៉ាង​ពេញ​និយម​សម្រាប់​មហាជន និង​អ្នក​ប្រើប្រាស់​បណ្ដាញ​សង្គម​ យក​មក​ជជែក​វែកញែក​រក​ការ​ពិត​ផង​ដែរ៕

អត្ថបទ៖ ចាន់រ៉ា

The post ឧកញ៉ា សៀង ណាំ មានបំណងស្រាយចម្ងល់មហាជនពាក់ព័ន្ធ បឺត សំរេច ក្រៅពីការធ្វើតេស្តDNA appeared first on Kampuchea Thmey Daily.

ដំណឹង​ដ៏​រសើប​ដែល​លោក បឺត សំរេច បាន​ទម្លាយ​រឿង​កប់​ទុក​ក្នុង​ចិត្ត​ជា​យូរ​ឆ្នាំ​មក​ហើយ ដោយ​អះអាង​ថា​ជា​កូនប្រុស​របស់​លោកតា ស៊ិន ស៊ីសាមុត​ នោះ កន្លងមក​បាន​ក្លាយ​ជា​ប្រធានបទ ពេញ​និយម​សម្រាប់​មហាជន និង​អ្នកប្រើប្រាស់​បណ្ដាញ​សង្គម ជជែក​វែក​រក​ការពិត។ ក្នុង​នោះ​ក៏​មាន​មតិ​មួយ​ចំនួន​យល់​ថា លោក បឺត សំរេច ស្រដៀង​នឹង​លោកតា ស៊ិន ស៊ី សាមុត ចំណែក​ខ្លះ​ទៀត​ជំរុញ​ឲ្យ​មាន​ការ​ពិនិត្យ DNA ផង​ដែរ។

តាមរយៈ​រឿងរ៉ាវ​ដ៏​ភ្ញាក់ផ្អើល​នេះ​ដែរ ក្រឡេក​មក​មើល​តារា​ចម្រៀង​លោកគ្រូ នូ ស៊ឹប បាន​ថ្លែង​ប្រាប់​ឲ្យ​ដឹង​តាម​ទូរស័ព្ទ​ថា បន្ទាប់ពី​បាន​ដឹង​រឿងរ៉ាវ​លោក បឺត សំរេច ហៅ សាមុត ពីរ ចេញមុខ​អះអាង​ថា​ជា​កូន​បង្កើត​អធិរាជ​សំឡេង​មាស ស៊ីន ស៊ីសាមុត នោះ តាម​ការ​រៀបរាប់​របស់ សំរេច លោក​ជឿជាក់​ដល់​ទៅ ៨០ ភាគរយ រឿង​មួយ​នេះ​គឺជា​ការពិត។

បើ​តាម​ការ​បញ្ជាក់​របស់​តារា​ចម្រៀង​ជើងចាស់​លោក នូ ស៊ឹប បាន​និយាយ​ថា «លោក បឺត សំរេច បាន​ព្យាយាម​លាក់​រឿង​នេះ​អស់​រយៈពេល ៤៦ ឆ្នាំ ទៅ​ហើយ ព្រោះតែ​ខ្លួន​គិត​ថា​ជា​កូន​ឥត​ខាន់ស្លា កូន​លួចលាក់​របស់​លោកតា ស៊ីន ស៊ីសាមុត ហើយគ្នា​បាន​ដឹង​រឿង​នេះ​ពី​បងស្រី​ម្ដាយ​ដែល​ចិញ្ចឹម​លោក​តាំងពី​តូច ដែល​ការ​ចេញ​មុខ​របស់ បឺត សំរេច នា​ពេលនេះ គ្នា​ក៏​គ្មាន​ចង់បាន​អ្វី​ក្រៅពី​ចង់​ឲ្យ​ទស្សនិកជន​បាន​ដឹង​រឿង​ពិត​មួយ​នេះ​ដែរ»។

ជាមួយ​គ្នា​នេះ លោកគ្រូ នូ ស៊ឹប ក៏បាន​មើល​ឃើញ​ថា មាន​ហេតុផល​ចំនួន ៥ ចំណុច ដែល​អាច​បញ្ជាក់​ថា បឺត សំរេច គឺជា​កូន​លោកតា ស៊ីន ស៊ីសាមុត ដោយ​ក្នុង​នោះ​រួមមាន ៖ ១.ត្រេមុខ,២.បបូរ​មាត់ ,៣.ធ្មេញ ,ទី៤.ថ្ពាល់ និង ៥.ស្លឹកត្រចៀក ដែល​លោក​ថា ស្រដៀង​គ្នា​ទៅ​នឹង​លោក ស៊ិន ស៊ីសាមុត ផង​ដែរ។ ចំណែក​ឯ​សំឡេង​របស់ បឺត សំរេច វិញ លោកគ្រូ នូ ស៊ឹប យល់ថា គេ​ប្រើប្រាស់​ចុង​ដង្ហើម ប្រអប់​មាត់ និង​ដង្ហើម​ច្រៀង ត្រូវ​តាម​បច្ចេកទេស តែ​មិនមែន​ថា​កូន​ត្រូវ​តែ​មាន​សំឡេង​ដូច​ឪពុក​នោះ​ទេ។

គួរ​បញ្ជាក់​ថា ថ្មីៗ​នេះ អតីត​កីឡាករ​លោក បឺត សំរេច បាន​ទម្លាយ​យ៉ាង​ភ្ញាក់ផ្អើល​ថា រូបលោក​គឺជា​កូន​ប្រុស​បង្កើត​របស់​អធិរាជ​សំឡេង​មាស ស៊ិន ស៊ីសាមុត។ ដំណឹង​ភ្ញាក់ផ្អើល​នេះ ស្រប​ពេល​លោក ប៊ឺត សំរេច បាន​ចេញ​មុខ​បញ្ជាក់​នៅ​ក្នុង​កម្មវិធី​ចម្រៀង​គ្រួសារ​ខ្មែរ។

នៅ​ក្នុង​កិច្ច​សម្ភាសន៍​កម្មវិធី​ចម្រៀង​គ្រួសារ​ខ្មែរ លោក បឺត សំរេច បាន​និយាយ​ថា លោក​គឺជា​កូន​ប្រុស​បង្កើត​របស់​លោកតា ស៊ិន ស៊ីសាមុត ដែល​មាន​ម្ដាយ​ជា​អ្នក​របាំ​ព្រះរាជ​ទ្រព្យ​នា​សម័យ​មុន និង​ជា​គ្រូពេទ្យ​ប្រចាំ​នៅ​ខេត្ត​កំពង់ឆ្នាំង។ តាម​លោក បឺត សំរេច បាន​បញ្ជាក់​ថា លោក​បាន​ដឹង​រឿងរ៉ាវ​ខាង​លើ​នេះ​ឡើង​តាមរយៈ​ការ​រៀបរាប់​ប្រាប់​ពី​សំណាក់​ម្ដាយ​ចិញ្ចឹម​របស់​លោក​ដែល​និយាយ​អំពី​រឿង​នេះ​(កូនបង្កើត​លោកតា ស៊ិន ស៊ីសាមុត)៕

អត្ថបទ ៖ ចាន់រ៉ា

The post លោកគ្រូ នូ ស៊ឹប កត់សម្គាល់ ៥ ចំណុច បឺត សំរេច ជាកូនលោក ស៊ិន ស៊ីសាមុត ៨០ ភាគរយ appeared first on Kampuchea Thmey Daily.

ដំណឹង​ដ៏​សែន​រីក​រាយ​នេះ បាន​កើត​ឡើង នា​រសៀល​ថ្ងៃទី៥ ខែកក្កដា ឆ្នាំ២០២៣នេះ ដោយ​លោកបឺត សំរេច បានអញ្ជើញ​ទៅទស្សនាផ្ទះពិត​ ផ្ទាល់​នៅទីតាំង​បុរី HM Lucky Home ផ្ទាល់តែម្ដង។

បើតាមប្រសាសន៍​របស់​ប្រធាន​រដ្ឋបាល HM Lucky Home បានឲ្យដឹងថា ក្រុមហ៊ុនបានប្រគល់ផ្ទះ គ្រែគេង ម៉ាស៊ីនត្រជាក់គ្រប់បន្ទប់ ព្រមទាំងធានារ៉ាប់រងលើ​ការ​រៀបចំពិធីឡើងគេហដ្ឋានជាផ្លូវ​ការ​ជូនលោកបឺត សំរេចថែមទៀតផង។

គួររំលឹកផងដែរ​ថា កាលពីថ្មីៗកន្លង​មក​នេះ ​បន្ទាប់​ពី​លោក បឺត សំរេច បាន​អះអាងថា ​ជា​កូន​ប្រុស​បង្កើត​អធិរាជ​សំឡេងមាស​លោកតា ស៊ិន ស៊ីសាមុត នោះ ក៏​មាន​ប្រជាជន​មួយ​ចំនួន​បាន​បញ្ចេញ​មតិ​រិះគន់ និង​ស្តី​បន្ទោសដល់លោក បឺត សំរេច ថា​បង្កើតព័ត៌មានចលាចលដល់សង្គម ព្រមទាំងឱ្យលោកទៅពិនិត្យ DNA ដើម្បីបញ្ជាក់ពីការពិតផងដែរ។

លោកក៏បានបញ្ជាក់ថា លោកនឹងធ្វើតេស្ត DNA និងផ្ញើសារជូនទៅអ្នកដែលចោទប្រកាន់លោកថា បានបំពុលសង្គមនោះ ឱ្យមកជួបលោកផ្ទាល់ ដើម្បីទៅធ្វើតេស្តឈាមរកការពិតទាំងអស់គ្នា។ លោកបន្ថែមទៀតថា បើ​សិន​​ជា​​ការ​ធ្វើតេស្តនេះ រកឃើញថាលោកពិតជាកូនបង្កើតរបស់លោក ស៊ិន ស៊ីសាមុត មែន​ឬ​មិនមែនក៏ដោយ ក៏សូម​ឱ្យ​ប្រើប្រាស់​ភាសា​សមរម្យ​បន្តិចទៅ ព្រោះ​លោកក៏ជាមនុស្សដែរ។

ពាក់ព័ន្ធនឹងការធ្វើតេស្ដDNA នេះ ភរិយាទី២របស់លោក ស៊ីន ស៊ីសាមុត គឺអ្នកស្រី ខាវ ថងញ៉ុត បដិសេធមិនព្រមឱ្យពិនិត្យឡើយ ព្រមទាំងបដិសេធមិនទទួលស្គាល់លោក បឺត សំរេច ជាកូនបង្កើតរបស់លោក ស៊ីន ស៊ីសាមុត ថែមទៀត៕

ដោយ ​៖ នាគព័ន្ធ

The post លោកបឺត សំរេច នឹង​ទទួល​បាន​វិឡាភ្លោះមួយខ្នង ពី​ក្រុមហ៊ុន​បុរី​ HM Lucky Home appeared first on Kampuchea Thmey Daily.

តាមរយ:ដំណឹងដែលលោក បឺត សំរេច ដាច់ចិត្តទម្លាយរឿងដែលកប់ទុកក្នុងចិត្តជាយូរឆ្នាំមកហើយដោយអះអាងថាជាកូនប្រុសរបស់លោកតា ស៊ិន ស៊ីសាមុត បានក្លាយជាប្រធានបទដ៏ពេញនិយមសម្រាប់មហាជននិងអ្នកប្រើប្រាស់បណ្តាញសង្គមជជែកវែករកការពិត។ ក្នុងនោះក៏មានមតិមួយចំនួនយល់ថា លោក បឺត សំរេច ស្រដៀង​នឹង​លោកតា ស៊ិន ស៊ីសាមុត ចំណែកខ្លះទៀតជំរុញឲ្យមានការពិនិត្យ DNA ផងដែរ។

ជាមួយគ្នានឹងដំណឹងដ៏ភ្ញាក់ផ្អើលនេះ ស្រាប់តែតារាកំប្លែងនាយពែកមីបានចេញមកលើកឡើងជាថ្មីនៅចំណុចមួយចំនួនពាក់ព័ន្ធលោក បឺត សំរេច។ នាយ ពែកមី បានមើលឃើញ ៤ ចំណុចដែលយល់ថា បឺត សំរេច ដូចអធិរាជសំឡេងមាស ស៊ិន ស៊ីសាមុត ប្រមាណ ៧០ ភាគរយគឺមានដូចជា, ភ្នែកដូចណាស់ ,មាត់ និង​កាយវិការ។

គួរបញ្ជាក់ថាថ្មីៗមុននេះអតីតកីឡាករលោកបឺត សំរេច បានទម្លាយយ៉ាងភ្ញាក់ផ្អើលថារូបលោកគឺជាកូនប្រុសបង្កើតរបស់អធិរាជសំឡេងមាស ស៊ិន ស៊ីសាមុត។ ដំណឹងភ្ញាក់ផ្អើលនេះស្របពេលដែលលោក ប៊ឺត សំរេច បានចេញមុខបញ្ជាក់នៅក្នុងកម្មវិធីចម្រៀងគ្រួសារខ្មែរ។

នៅក្នុងកិច្ចសម្ភាសន៍កម្មវិធីចម្រៀងគ្រួសារខ្មែរលោក បឺត សំរេច បាននិយាយថាលោកគឺជាកូនប្រុសបង្កើតរបស់លោក​តា ស៊ិន ស៊ីសាមុត ដែលមានម្តាយជាអ្នករបាំព្រះរាជទ្រព្យនាសម័យមុននិងជាគ្រូពេទ្យប្រចាំនៅខេត្តកំពង់ឆ្នាំង។ តាមលោក​បឺត សំរេច បានបញ្ជាក់ថាលោកបានដឹងរឿងរ៉ាវខាងលើនេះឡើងតាមរយ:ការរៀបរាប់ប្រាប់ពីសំណាក់ម្តាយចិញ្ចឹមរបស់លោកដែលនិយាយប្រាប់៕

អត្ថបទ៖ ចាន់រ៉ា

The post ៣ ចំណុច នាយ ពែកមី មើលឃើញ បឺត សំរេច ដូចអធិរាជសំឡេងមាស ស៊ិន ស៊ីសាមុត appeared first on Kampuchea Thmey Daily.

បើតាមសារបង្ហោះនៅលើបណ្ដាញសង្គមហ្វេសប៊ុក នៅពេលថ្មីៗនេះ ឧកញ៉ា សៀង ណាំ បានសរសេរថា៖ «នៅរាត្រីថ្ងៃទី២៨ ខែមិថុនា ឆ្នាំ២០២៣ ក្មួយ បឺត សំរេច បានមកជួបខ្ញុំ និងភរិយា នៅផ្ទះទឹក សង្កាត់ក្របីរៀល ក្រុងសៀមរាប ខេត្តសៀមរាប។ ខ្ញុំបានជជែកសំណេះសំណាលជាមួយក្មួយ បឺត សំរេច តាំងពីម៉ោង៦ល្ងាចរហូតដល់ម៉ោង២:៣០នាទីទាបភ្លឺ ដោយបានដឹងរឿងរ៉ាវប្រវត្តិក្មួយ បឺត សំរេច ដែលដឹងតាមរយៈម្តាយចិញ្ចឹមប្រាប់កាលពីនៅក្មេង»។

ក្រោយស្ដាប់ការរៀបរាប់របស់លោក បឺត សំរេច និងមើលឃើញថា សព្វថ្ងៃ មានការខ្វះខាតក្នុងជីវភាពរស់នៅ ហើយមានម្តាយចិញ្ចឹមក៏ឈឺទៀតនោះ ឧកញ៉ា សៀង ណាំ ក៏ផ្ដល់ថវិកាចំនួន២ពាន់ដុល្លារដល់លោក បឺត សំរេច ថែមទៀតផង។ ជាមួយគ្នានេះដែរ លោក សៀង ណាំ ក៏បានភ្ជាប់មកនូវអត្ថបទដែលជាប្រវត្តិរបស់លោក បឺត សំរេច ផងដែរ។ ខាងក្រោមនេះ ជារឿងរ៉ាវនៃប្រវត្តិរបស់លោក បឺត សំរេច ដែលបានរៀបរាប់ប្រាប់ឧកញ៉ា សៀង ណាំ៖

ជីដូនបង្កើតក្មួយ បឺត សំរេច ឈ្មោះ គូ មានស្រុកកំណើតនៅស្រុកបរិបូរណ៍ ខេត្តកំពង់ឆ្នាំង បានជួបជីតាបង្កើតក្មួយ បឺត សំរេច ឈ្មោះ ហង់ ជាជនជាតិឡាវ។ លោកតា ហង់ និងលោកយាយ គូ មានកូនស្រីពីរនាក់ម្នាក់ឈ្មោះ ធីម រី និងម្នាក់ទៀតឈ្មោះ ធីម វិជ្ជរ៉ា ជាម្តាយបង្កើតរបស់ក្មួយ បឺត សំរេច។

ក្នុងវ័យក្មេង ធីម វិជ្ជរ៉ា បានទទួលការរៀនសូត្ររហូតបានក្លាយជាគ្រូពេទ្យនាខេត្តកំពង់ឆ្នាំង។ ដល់ដើមឆ្នាំ១៩៦០ ម្តាយក្មួយបឺត សំរេច បានប្រឡងជាប់បវរកញ្ញា ហើយបានស្វាមីជាអ្នកបើកយន្តហោះ និងបានកូនស្រី១ជាមួយគ្នា។ ពេលកូនស្រីមានអាយុ៤ឆ្នាំ ស្វាមីរបស់ម្តាយក្មួយបឺតសម្រេចក៏ទទួលមរណភាព ដោយរោគាពាធ។ ពេលនោះ ម្ដាយក្មួយ បឺត សំរេច ក្លាយជាស្រីមេម៉ាយ។  

មកដល់ដើមឆ្នាំ១៩៧០ ពេលកូនស្រីបានអាយុ៨ឆ្នាំ ម្ដាយក្មួយ បឺត សំរេច ក៏មានទំនាក់ទំនងស្នេហាជាមួយលោក ស៊ីន ស៊ីសាមុត រហូតមកដល់ខែឧសភា ឆ្នាំ១៩៧៣ ពេលម្តាយលោក បឺត សំរេច មានទម្ងន់ពរពោះ (ពពោះកំណើតលោក បឺត សំរេច) បាន២ខែ រឿងនេះក៏ផ្ទុះឡើង ដែលធ្វើឱ្យភរិយារបស់លោក ស៊ីន ស៊ីសាមុត ឈ្មោះ ឈឺន អង្គារ៉ា រករឿងលោក ស៊ីន ស៊ីសាមុត និងម្តាយក្មួយ បឺត សំរេច ជាខ្លាំង។

ដោយពិបាកទ្រាំក្នុងរឿងនេះ អ្នកស្រី ធីម វិជ្ជរ៉ា (ម្តាយក្មួយ បឺត សំរេច) បានចាកចេញពីរាជធានីភ្នំពេញទាំងពរពោះ ទៅរស់នៅជាមួយឪពុកម្តាយនៅផ្សារលើ ក្រុងកំពង់ឆ្នាំង ខេត្តកំពង់ឆ្នាំងវិញ។ ពេលមករស់នៅស្រុកកំណើតវិញ ម្ដាយលោក បឺត សំរេច បានលួចប្រាប់រឿងពរពោះកូនជាមួយលោក ស៊ីន ស៊ីសាមុត ទៅម្តាយ តែមិនប្រាប់ហ៊ានឪពុកទេ ហើយម្តាយក្មួយ បឺត សំរេច ក៏ចូលធ្វើពេទ្យដូចមុន។

លុះដល់ពពោះបាន៤ខែ ពោះកាន់តែធំទៅ ហើយខ្លាចខ្មាសគេផង ម្ដាយក្មួយ បឺត សំរេច ក៏ឈប់បម្រើការជាគ្រូពេទ្យ ដោយនៅសម្ងំនៅតែក្នុងផ្ទះ។ មិនយូរប៉ុន្មាន រឿងមានផ្ទៃពោះនេះ ក៏បានបែកធ្លាយដល់ឪពុក ខណៈពេលនោះ ម្តាយក្មួយ បឺត សំរេច ក៏មានគំនិតចង់រំលូតកូននេះចោល តែដោយហេតុថា ពោះធំពេក គាត់មិនហ៊ានរំលូត បែរជាចង់សម្លាប់ខ្លួនទៅវិញ។ ដោយខ្មាសអ្នកជិតខាងពេក ឪពុករបស់អ្នកស្រី ធីម វិជ្ជរ៉ា ក៏រត់ទៅនៅប្រទេសឡាវ ខណៈម្ដាយរបស់លោក បឺត សំរេច ត្រូវម្ដាយនាំទៅ រស់នៅខេត្តប៉ៃលិន ជាមួយបងស្រីឈ្មោះ ធីម រី។

កន្លងផុតទៅរយៈពេល៣ខែ ម្ដាយរបស់អ្នកស្រី ធីម វិជ្ជរ៉ា (ជីដូនលោក បឺត សម្រេច) បានមកប៉ៃលិនម្ដងទៀត ដើម្បីនិយាយជាមួយកូនស្រីច្បង ធីម រី (បងស្រីរបស់ម្តាយលោក បឺត សំរេច) ឱ្យទៅអង្វរលួងលោមឪពុកនៅប្រទេសឡាវ សុំឱ្យគាត់ត្រឡប់មករស់នៅជុំគ្នាវិញ ព្រោះកូនស្រី ធីម រី ពូកែនិយាយលួងលោមឪពុកបាន។ ពេលជួបកូនស្រីហើយ ជីដូនលោក បឺត សំរេច ក៏វិលមកកំពង់ឆ្នាំងវិញ។ លោកស្រី ធីម រី និងស្វាមី ព្រមទាំងម្តាយលោក បឺត សំរេច កំពុងពពោះ៧ខែ ក៏ធ្វើដំណើរទៅរកឪពុកនៅប្រទេសឡាវ។

ពេលជួបឪពុកហើយ ម្ដាយក្មួយ បឺត សំរេច ទៅថ្វាយបង្គំសុំការលើកលែងទោសពីឪពុក ហើយលោកស្រី ធីម រី ក៏សុំអង្វរឪពុក ហើយឪពុកក៏យល់ព្រមលើកលែងទោស ហើយព្រមវិលត្រលប់មករស់នៅជុំគ្នាជាមួយម្ដាយនៅខេត្តកំពង់ឆ្នាំងវិញ។ លោកស្រី ធីម រី និងស្វាមី ក៏មកប៉ៃលិនវិញ តែទុកម្តាយក្មួយ បឺត សំរេច ឱ្យរស់នៅជាមួយសាច់ញាតិខាងឪពុកនៅប្រទេសឡាវ។

អំឡុងខែកុម្ភៈ ឆ្នាំ១៩៧៤ ម្ដាយក្មួយ បឺត សំរេច បានឆ្លងទន្លេ កើតបានក្មួយ បឺត សំរេច។ ពេលនោះជីវភាពគាត់ខ្វះខាតណាស់ មានតែទឹកដោះគោខាប់ និងទឹកស្ករប៉ុណ្ណោះទុកឱ្យក្មួយ បឺត សំរេច ហូប។ ពេលក្មួយ បឺត សំរេច អាយុបានប្រហែលបួនខែ ម្តាយក្មួយ បឺត សំរេចទុកក្មួយ បឺត សំរេច ឱ្យនៅជាមួយបងប្អូនខាងឪពុកនៅក្នុងប្រទេសឡាវ ដោយគាត់ចុះទៅរកស៊ីនៅប្រទេសថៃ។ លុះដល់ពេលក្មួយ បឺត សំរេច អាយុបាន៧ខែ លោក ស៊ីនស៊ីសាមុត ជាឪពុក បានទៅខេត្តប៉ៃលិន រកលោកស្រី ធីម រី និងប្ដី ឱ្យជូនទៅជួបម្តាយក្មួយ បឺត សំរេច នៅប្រទេសឡាវ។

ម្តាយធំក្មួយ បឺត សំរេច ក៏ជូនលោក ស៊ីន ស៊ីសាមុត ទៅដល់ប្រទេសឡាវ តែមិនបានជួបម្តាយក្មួយ សំរេច ទេ ព្រោះគាត់ទៅរកស៊ីនៅប្រទេសថៃ ជួបតែក្មួយសម្រេច ជាកូនប៉ុណ្ណោះ។ ម្តាយធំក្មួយ សំរេច ក៏បានឱ្យបងប្អូនទៅតាមម្តាយក្មួយ សំរេច ពីប្រទេសថៃមក។

រយៈពេលពីរថ្ងៃ ទើបលោក ស៊ីន ស៊ីសាមុត បានជួបម្តាយក្មួយ បឺត សំរេច។ ពេលជួបគ្នាហើយ លោក ស៊ីន ស៊ីសាមុត អង្វរផងយំផង ឱ្យម្តាយក្មួយ បឺត សំរេច នាំកូនវិលត្រលប់មករស់នៅរាជធានីភ្នំពេញវិញ លោកនឹងទទួលខុសត្រូវចិញ្ចឹមបីបាច់ថែរក្សា ទាំងម្តាយទាំងកូនមិនឱ្យខ្វះខាតទ ហើយលោកធានានឹងបញ្ជូនពួកគាត់ឱ្យទៅនៅប្រទេសក្រៅទៀត ធ្វើយ៉ាងណាតែប្រពន្ធកូន ព្រមត្រឡប់ទៅវិញជាមួយលោក។

ទោះបីជា លោក ស៊ីន ស៊ីសាមុត យំអង្វរ និងបញ្ចុះបញ្ចូលឱ្យម្តាយធំក្មួយ បឺត សំរេច ជួយនិយាយលួងលោមយ៉ាងណា ក៏ម្តាយក្មួយ បឺត សំរេច មិនព្រមទៅវិញដែរ ដោយម្តាយក្មួយ បឺត សំរេច និយាយថា៖ «បងត្រឡប់ទៅវិញចុះ បងនៅភ្នំពេញក៏មានកូនដែរ ទុកកូននេះឱ្យខ្ញុំមើលថែចុះ»។

ដោយស្ដាប់ការអង្វរពីម្តាយក្មួយ បឺត សំរេច លោក ស៊ីន ស៊ីសាមុត ក៏ព្រមត្រលប់មករាជធានីភ្នំពេញវិញ។ មុនពេលរៀបចេញដំណើរទៅ លោក ស៊ីន ស៊ីសាមុត បានផ្តាំម្តាយក្មួយ បឺត សំរេច និងម្តាយធំក្មួយ បឺត សំរេច ថា៖ «ពេលក្មួយ បឺត សំរេច ធំឡើងកុំឱ្យចូលសិល្បៈដូចខ្ញុំ ឱ្យកូននេះខំរៀនសូត្រ ធ្វើពេទ្យ ប៉ូលីស និងទាហានក៏បានដែរ»។

លោក ស៊ីន ស៊ីសាមុត ត្រលប់មករាជធានីភ្នំពេញ បានមួយយប់ទេ ម្តាយក្មួយ បឺត សំរេច បានប្រគល់ក្មួយ បឺត សំរេច ឱ្យទៅម្តាយធំជួយចិញ្ចឹម ធើ្វជាកូនបង្កើត ហើយសុំជួយលាក់ប្រវត្តិក្មួយ បឺត សំរេច កុំឱ្យគេដឹង។ ម្តាយធំ និងប្ដី បាននាំក្មួយ បឺត សំរេច មករស់នៅខេត្តប៉ៃលិន ចំណែកឯម្ដាយក្មួយ បឺត សំរេច ត្រលប់ទៅរកស៊ីនៅប្រទេសថៃវិញ។

លោក បឺត សំរេច មករស់នៅខេត្តប៉ៃលិនជាមួយម្ដាយធំ បានតែ៩ខែ ខ្មែរក្រហមទទួលជ័យជំនះ នៅថ្ងៃ១៧ ខែមេសា ឆ្នាំ១៩៧៥ ដែលពេលនោះ ម្ដាយចិញ្ចឹម និងគ្រួសាររួមទាំងក្មួយ បឺត សំរេច នាំគ្នារត់ភៀសខ្លួនទៅនៅខេត្តត្រាត ប្រទេសថៃ។លុះដល់ឆ្នាំ១៩៨៤ ក្មួយ បឺត សំរេច មានអាយុ១០ឆ្នាំ ត្រូវបានឪពុកចិញ្ចឹមយកទៅឱ្យធ្វើការ មើលគោឱ្យគេ ហើយឪពុកចិញ្ចឹមក្មួយ បឺត សំរេច ធ្វើកុងត្រាមួយឆ្នាំម្តង ដោយយកប្រាក់ទាំងអស់គ្មានសល់ ប៉ុន្តែធ្វើការគេឱ្យហូបបាយ១ថ្ងៃបីពេល។

ដោយរងនូវការធ្វើទារុណកម្មពីឪពុកចិញ្ចឹមជាបន្តបន្ទាប់ ក្មួយ សំរេច ក៏លួចសួរទៅម្តាយចិញ្ចឹមដែលតែងតែស្រឡាញ់រូបគាត់ ហើយឧស្សាហ៍លួចលាក់របស់ហូបចុកទុកអោយគាត់ហូបជារឿយៗ។ ក្មួយ បឺត សំរេច ក៏សួរម្តាយចិញ្ចឹមថា៖ «ម៉ែ សព្វថ្ងៃមានតែម៉ែទេដែលស្រឡាញ់ខ្ញុំ តើខ្ញុំជាកូនបង្កើតរបស់ពុកម៉ែ ឬក៏ជាកូនរើសបានយកមកចិញ្ចឹម? បានពុកធ្វើបាបខ្ញុំខុសពីបងប្អូនដទៃទៀត ម៉ែប្រាប់ ខ្ញុំត្រង់ទៅមើល»។

ម្ដាយចិញ្ចឹមសម្រក់ទឹកភ្នែក ហើយយកដៃមកអង្អែលក្បាលក្មួយ បឺត សំរេច ដោយបានពោលថា៖ «ឪពុកឯង គឺលោក ស៊ីនស៊ីសាមុត អ្នកចម្រៀង តែគាត់ស្លាប់ហើយ ឯម្តាយឯងឈ្មោះ ធីម វិជ្ជរ៉ា ត្រូវជាប្អូនស្រីរបស់ម៉ែបង្កើត តែម៉ែឯងហាមមិនឱ្យ ម៉ែនិយាយប្រាប់កូនឯងទេ ដោយឃើញកូនឯងពិបាកវេទនាពេកបានម៉ែប្រាប់ »។

ក្មួយ បឺត សំរេច សួរទៅម្តាយចិញ្ចឹមទៀតថា៖ «អញ្ចឹងម៉ែបង្កើតខ្ញុំ អត់ស្រឡាញ់ខ្ញុំទេ បានទុកខ្ញុំចោលរហូត ចុះឥលូវគាត់នៅឯណា?»។ ម្ដាយចិញ្ចឹមក្មួយ បឺត សំរេច ក៏ប្រាប់ថា៖ «ម្តាយឯងមានប្តីទៀតហើយមានកូនទៀត សព្វថ្ងៃធ្វើចម្ការនៅក្លងយ៉ៃ ខេត្តត្រាតយើងហ្នឹង»។ ដោយឃើញក្មួយ បឺត សំរេច ចង់ជួបម្តាយពេក ម្តាយចិញ្ចឹមក្មួយ បឺត សំរេច ក៏នាំក្មួយ បឺត សំរេច ជូនទៅជួបម្ដាយបង្កើតនៅក្លងយ៉ៃ។

ពេលកំពុងហូបបាយ ម្ដាយបង្កើតក្មួយ បឺត សំរេច អូសដៃម្ដាយចិញ្ចឹមទៅជជែកនៅឆ្ងាយពីកន្លែងហូបបាយ ហើយក្មួយបឺត សំរេច ក៏លឺសូរម្តាយបង្កើតនិយាយថា៖ «ម៉េចបានជាបងឯងយកវាឱ្យមកជួបខ្ញុំធ្វើអី? ប្រាប់ហើយថា កុំឱ្យវាស្គាល់ កុំឱ្យដឹង នៅតែយកវាមកទៀត»។ ម្ដាយចិញ្ចឹមក៏តបទៅវិញ៖ «នៅនោះប្តីបងវាយធ្វើបាបវាណាស់ ហើយវាយំពេកបងនិយាយការពិតប្រាប់វាទៅ »។

ម្ដាយចិញ្ចឹមក៏ទុកក្មួយ បឺត សំរេច នៅជាមួយម្តាយបង្កើត ហើយគាត់ក៏ត្រឡប់ទៅផ្ទះវិញ។ ក្មួយ បឺត សំរេច រស់នៅជាមួយម្តាយបង្កើត ត្រូវឪពុកចុងវៃទាត់ធាក់ធ្វើបាបជាងនៅជាមួយឪពុកចិញ្ចឹមទៀត។ រយៈពេល២ខែ ម្តាយបង្កើតអាណិតកូនពេកក៏ជូនកូនទៅរស់នៅជាមួយបងស្រីខ្លួន ដែលជាម្តាយចិញ្ចឹមវិញ។ ឪពុកចិញ្ចឹមក្មួយ បឺត សំរេច ក៏យកក្មួយបឺត សំរេច ទៅឱ្យនៅកន្លែងស៊ីឈ្នួលមើលគោដដែល។

កំឡុងពេលធ្វើការនៅថៃ ក្មួយ បឺត សំរេច បានពឹងមិត្តភក្តិដែលមានម៉ូតូកង់បីជួយជូនទៅរកម្តាយបង្កើតនៅខ្លងយ៉ៃ ហើយពេលទៅដល់ផ្ទះម្ដាយបង្កើត អ្នកជិតខាងប្រាប់ថា ម្ដាយយបង្កើតរបស់ក្មួយ បឺត សំរេច ស្លាប់យូរហើយ នៅតែសល់តែកូនស្រីៗរបស់គាត់បីនាក់ប៉ុណ្ណោះ។

ក្នុងអាយុ១៦ឆ្នាំ បឺត សំរេច ពេលព្រឹកទៅរៀនអក្សរ និងហាត់ប្រដាល់ ហើយក៏ឡើងប្រដាល់ម្ដងៗ។ អស់រយៈពេលបួនឆ្នាំកន្លងផុតទៅ ក្មួយ បឺត សំរេច ក៏សម្រេចចិត្តទៅធ្វើកម្មកររែងត្បូងនៅប៉ៃលិន ជាមួយមិត្តភក្តិ ដោយទុកអោយម្តាយចិញ្ចឹមរស់នៅកំពីងពួយ ជាមួយប្អូនតូចៗពីរនាក់។

កំឡុងពេលធ្វើជាកម្មកររែងត្បូងនៅប៉ៃលិន ក្មួយ បឺត សំរេច ឧស្សាហ៍ច្រៀង និងប្រាប់គេថា ជាកូនប៉ា សាមុត អ្នកចម្រៀងសំឡេងមាស តែគ្មានអ្នកណាគេជឿទេ គេតែងតែតបមកវិញថា «ម៉េចហែងចង់ល្បីមែន! ប្រឹងតែរែងត្បូងឱ្យគេទៅ»។ នៅពេលនោះ ដើម្បីរកលុយបន្ថែម ក្មួយ បឺត សំរេច ក៏ឆ្លៀតទៅវៃប្រដាល់នៅតាមវត្តជាយដែនខ្មែរថៃ។

ក្រោយមក បឺត សំរេច បានមកហាត់រៀននៅក្លិបប្រដាល់ឡុង សារ៉ាវ័ន ដោយ បឺត សំរេច ឧស្សាហ៍ឡើងប្រដាល់តាមស្ថានីយទូរទស្សន៍ ដូចជា ទូរទស្សន៍បុស្តិ៍លេខ៥ ទូរទស្សន៍បុស្តិ៍លេខ៣ និងទូរទស្សន៍ផ្សេងៗទៀត។ តែនៅឆ្នាំ២០០៤ ក្មួយ បឺត សម្រេច ក៏ជួបគ្រោះថ្នាក់ចរាចរណ៍បាក់ជើង មិនអាចឡើងប្រដាល់បានទៀតទេ ហើយនៅពេលជាជើង ទើប បឺត សំរេច ក៏ត្រលប់ទៅធ្វើជាកម្មករនៅកសិដ្ឋានចិញ្ចឹមសេះ នៅប៉ាតាយ៉ា ប្រទេសថៃ។ រហូតដល់នៅឆ្នាំ២០១១ ក្មួយ បឺត សំរេច ក៏បានរៀបការនៅប្រទេសថៃ ហើយមានកូន៣នាក់ ស្រី១ប្រុស២ តែជាអកុសល ពេលកូនប្រុសពៅ អាយុបាន៣ឆ្នាំ ប្រពន្ធរបស់ក្មួយ បឺត សំរេច រត់ចោលទៅយកប្តីថ្មី។

នៅថ្ងៃទី១០ ខែមិថុនា ឆ្នាំ២០២៣ ក្មួយ បឺត សំរេច បានទាក់ទងជាមួយលោក មាស ជីវ៉ា ដើម្បីសុំឡើងច្រៀងនៅកម្មវិធី ចម្រៀងគ្រួសារខ្មែរ។ លោក មាស ជីវ៉ា ក៏បានទាក់ទងទៅលោក អ៊ុក ណារី ហើយក៏អនុញ្ញាតឱ្យក្មួយ បឺត សំរេច ឡើងច្រៀងនៅថ្ងៃទី១៤ ខែមិថុនា ឆ្នាំ២០២៣។ លុះច្រៀងចប់ ក្មួយ បឺត សំរេច បានរៀបរាប់ប្រាប់មហាជនឱ្យដឹងថា ក្មួយ បឺត សំរេច ជាកូនលោក ស៊ីន ស៊ីសាមុត ធ្វើឱ្យលោក អ៊ុក ណារីម និងមហាជនមានការភ្ញាក់ផ្អើលចាប់ពីពេលនោះមក៕

The post ឧកញ៉ា សៀង ណាំ ចំណាយពេលជិត១០ម៉ោងស្ដាប់លោក បឺត សំរេច រៀបរាប់ប្រវត្តិគ្រួសារ appeared first on Kampuchea Thmey Daily.

វីដេអូឃ្លីបលោក បឺត សំរេច ច្រៀងជាច្រើន ត្រូវបានផុសផ្សាយនិងចែករំលែកតៗគ្នា នៅលើបណ្តាញទំនាក់ទំនងសង្គម
ដោយសារ​តែមហាជន កោតសរសើរ​នឹង​ទឹកដម​សំនៀង​​របស់លោក និងខ្លះបញ្ចេញឃ្លីប​ចម្រៀងចាស់ៗ​របស់អធិរាជសំឡេងមាស និងផ្ទៀងផ្ទាត់ជាមួយសំនៀងដើម​របស់លោកទៀតផង ដោយបង្ហាញការភ្ញាក់ផ្អើលថា សឹងតែដូចម្ចាស់ដើមទៅហើយ។

តាមការលើកឡើងរបស់ លោក ជុំ កុសល ទីប្រឹក្សាសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា និងជារដ្ឋលេខាធិការ​ក្រសួងព័ត៌មាន លោក បឺត សំរេច ពិតជាច្រៀងបានពីរោះ ហើយអាចច្រៀងបទលោក សុិន សុីសាមុត បាន និងពីរោះម្យ៉ាងម្នាក់។ លោកបង្ហាញការយល់ឃើញ ចំពោះរឿងរ៉ាវដែលជជែកវែក​ញែកគ្នាដ៏ក្តៅគគុកនេះដែរថា មិនគួរស្តី បន្ទោស​ចំពោះ លោក​​ បឺត សំរេច ឡើយ ព្រោះគាត់គ្រាន់​តែ​បាន​ដឹង​រឿងរ៉ាវ​តាមម្តាយ​ចិញ្ចឹម​ និយាយប្រាប់ប៉ុណ្ណោះ។ បើទោះនោះ​​ជាការពិត​ឬមិនពិត រដ្ឋលេខាធិការក្រសួងព័ត៌មានរូបនេះ ក៏ស្នើ​ឱ្យ​សាធារណជនពិចារណាលើ​កត្តា​សំខាន់មួយ ប្រសិន​បើយល់ថា​ គាត់មានសំឡេងច្រៀងល្អ គួរតែជួយផ្តល់កម្លាំងចិត្តដល់គាត់ ដើម្បីឱ្យ​គាត់ខិត​ខំ​អភិវឌ្ឍ សមត្ថភាព ដើម្បី​ទទួល​បាន​ជោគជ័យ​លើ​វិស័យ​ចម្រៀង។

ទន្ទឹមនេះ លោកក៏បានសំណូមពរ​ដល់សាធារណជន គួរផ្តោតសំខាន់លើសមត្ថភាពនៃការច្រៀងរបស់គាត់ ជាជាង​វែក​ញែ​កថា​ ជាកូនឬមិនមែនកូន។​ ជុំវិញរឿងរ៉ាវនេះ លោកយល់ឃើញថា បើទោះបីជាមានអ្នកចេញមក អះអាងថា ធ្លាប់ជាមិត្តស្និទ្ធស្នាលជាមួយលោក ស៊ិន ស៊ីសាមុត ក៏ដោយ ក៏បុគ្គលនោះមិនប្រាកដថាអាចដឹងអាថ៌កំបាំង លោកបានអស់ដែរ ព្រោះអាថ៌កំបាំងរបស់លោក គ្មាននរណាម្នាក់ដឹងអស់ក្រៅពីខ្លួនលោកទេ។

ជាមួយគ្នានេះ លោក កុក រស់ ប្រធាននាយកដ្ឋានសៀវភៅ និងការអាន តាមរយៈការបង្ហោះវីដេអូឃ្លីបខ្លី ជាចម្រៀងដែល​លោក បឺត សំរេច បានច្រៀង ភ្ជាប់ជាមួយនឹងខ្លឹមសារថា “ប្រិយមិត្តស្តាប់ទៅមើល ដូចអធិរាជសំឡេងមាសប៉ុន្មានភាគរយដែរ? រកអ្នកស្នងមរតកអធិរាជសំឡេងមាសបានហើយ ចាប់ពីពេលនេះតទៅ ប្អូន បឺត សំរេច នឹងក្លាយជាដុំពេជ្រ​ដ៏​មាន​តម្លៃ សម្រាប់​បន្តវេនបំពេសោតិន្ទ្រិយារម្មណ៍​ប្រជាពលរដ្ឋខ្មែរទូទាំងនគរ”។

ក្រៅពីនេះ សូម្បីតែលោក វីរៈ វ៉ារ៉ានី ប្រធានក្រុមដំណើរខ្មែរ ដែលជា​អ្នក​ស្រាវជ្រាវប្រវត្តិតារាជើងចាស់ខ្មែរ ក៏បានលើក សរសើរ​ពីសំឡេងនៃការច្រៀងរបស់លោក បឺត​ សំរេច ផងដែរ ដោយអះអាងថា លោកមិននឹងស្មានសោះ ដែលលោក បឺត សំរេច អាចច្រៀងបានពីរោះបែបនេះ ទាំងដែលមិនមែនជាសិល្បករ។

តាមរយៈវីដេអូខ្លី ៣១វិនាទី ដែលបានផុសផ្សាយនៅលើផេកឈ្មោះ គង្គ ប៊ុនឈឿន លោក បឺត សំរេច រៀបរាប់ថា
នៅថ្ងៃខាងមុខនេះ លោកនឹងច្រៀងបទចម្រៀង ជូនអ្នកស្រី តាត គឺមលន ភរិយារបស់​កវីនិពន្ធ គង្គ ប៊ុនឈឿន ដែលនឹងមានផ្សាយនៅលើឆានែលយូធូប កវី គង្គ ប៊ុនឈឿន។​

ក្នុងបទសម្ភាសមួយតាមទូរស័ព្ទជាមួយថ្មីៗ អ្នកស្រី តាត គឹមលន បានឱ្យដឹងថា គាត់គ្រាន់​តែ​ចង់​ជួយ​ លោក បឺត សំរេច​​ ឱ្យ​ច្រៀង​បទ​ស្នាដៃតែងនិពន្ធ លោក គង្គ ប៊ុនឈឿន​ ​ដើម្បីជាការតេស្តសមត្ថភាពផង និងចង់ឱ្យ​សាធារណជន​បានដឹងផងថា បុរសដែលអះអាងជាកូនបង្កើតលោក សុិន សុីសាមុត រូបនេះ អាច​ច្រៀង​បាន​ ឬ​ច្រៀង​ពីរោះ​ដូច​ជាឪពុកឬ​ទេ​។ ម៉្យាងវិញទៀត នេះក៏ជាការ​ជួយ​លើក​ទឹក​ចិត្ត និង​ផ្ដល់​កម្លាំង​ចិត្តដល់អ្នកមានសមត្ថភាពផងដែរ។​

យោងតាមការបញ្ជាក់ ​កាលលោក គង្គ ប៊ុនឈឿន នៅរស់រានមានជីវិត លោកបាននិពន្ធ​ចម្រៀងថ្មីចំនួន ១០បទ ដែល​បទ​ទាំងនោះ សុទ្ធសឹងពុំ​ទាន់​បាន​យក​ទៅ​ផលិត​ឬ​ច្រៀង​ឡើយ។ ឯការ​ផលិត​បទ​ចម្រៀង​ថ្មីឱ្យលោក បឺត សំរេច​ ច្រៀង ពុំ​ទាន់​អាច​ចាប់ផ្តើម​បានទេ​បច្ចុប្បន្ននេះ ក៏ព្រោះ​តែ​ណោតភ្លេង​ទាំងនោះ កវីនិពន្ធ គង្គ ប៊ុនឈឿន និពន្ធ​​តាម​បែប​​​បារាំង​ ដូច្នេះ​​ត្រូវ​ប្រើ​ពេល​បក​​ប្រែ​​ណោត​​​​នោះ​ មក​តាម​បែប​ខ្មែរ​ជា​មុន​សិន​៕

The post ទោះបញ្ជាក់​ការ​ពិត​មិន​ទាន់បាន តែមតិច្រើនលើក​​សរសើរ លោក បឺត សំរេច មាន​សំឡេង​ល្អ គួរលើក​ទឹក​ចិត្ត appeared first on Kampuchea Thmey Daily.