គ្រួសារអធិរាជសំឡេងមាស ៖ លោក បឺត សំរេច មិនមែនជាកូនឥតខាន់ស្លា របស់លោក ស៊ីន ស៊ីសាមុត ឡើយ

បុគ្គលឈ្មោះ បឺត សំរេច មិនមែនជាកូនឥតខាន់ស្លារបស់លោក ស៊ីន ស៊ីសាមុត ឡើយ។ នេះជាការប្រកាសនៅក្នុងលិខិតប្រកាសជំហរនៃក្រុមគ្រួសារអធិរាជសំឡេងមាស ស៊ីន ស៊ីសាមុត ចុះថ្ងៃទី១៨ ខែវិច្ឆិកា ឆ្នាំ២០២៣ ជាមួយនឹងហត្ថលេខា របស់ឈ្មោះស៊ីន សេដ្ឋសុជ្ឈតា, ឈ្មោះ ហ៊ី ឌីណារក្ស និងឈ្មោះ អ៊ុក រ៉ូហ្សាណូ។

ការណ៍ដែល ក្រុមគ្រួសារអធិរាជសំឡេងមាស ស៊ីន ស៊ីសាមុត ប្រកាសជាសាធារណៈបែបនេះ គឺបន្ទាប់ពីកាលពីថ្ងៃទី១៤ ខែមិថុនា ឆ្នាំ២០២៣ លោក បឺត សំរេច បានប្រកាសថាខ្លួនជាកូនប្រុសឥតខាន់ស្លានៃអធិរាជសំឡេងមាស ស៊ីន ស៊ីសាមុត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលណោះ ក្រោយលោក បឺត សំរេច បានប្រកាសបែបនោះ គឺមានជនានុជនដ៏ច្រើនលើសលប់ដែលស្រឡាញ់ការពិត យុត្តិធម៌ បានចេញមកជាបន្តបន្ទាប់ ចូលរួមតាមដាន និងវិភាគហេតុការណ៍ ក្នុងគោលបំណងការពារភាព ស្អាតស្អំ សេចក្តីថ្លៃថ្នូរ និងកិត្តិយសរបស់អធិរាជសំឡេងមាស ស៊ីន ស៊ីសាមុត។

តាមរយៈលិខិតជំហរនៃក្រុមគ្រួសារលោក ស៊ីន ស៊ីសាមុត បានសរសេរក្នុងន័យច្រានចោលការប្រកាសរ​បស់លោក បឺត សំរេច ថា​ “សូមច្រានចោលទាំងស្រុងចំពោះការអះអាងគ្មានមូលដ្ឋានពិតប្រាកដ ភូតកុហក ប្រតិដ្ឋ កាត់កែច្នៃនិងបំភ្លៃការពិត ដែលបង្កើតដោយលោក បឺត សំរេច, លោកយាយ គឹម រឺ និងក្រុមការងារលោក បឺត សំរេចព្រមទាំងសាក្សីក្លែងក្លាយទាំងឡាយ។ សូមច្រានចោលនូវចេតនារបស់ជនទាំងឡាយណា ដែលអះអាងដោយគ្មានមូលដ្ឋានច្បាស់លាស់ ថាជាកូនឬកូនឥតខាន់ស្លានៃអធិរាជសំឡេងមាស នាថ្ងៃអនាគត”។

លិខិតដដែល ក៏បានទទូចឱ្យ ម្ចាស់ផេក ម្ចាស់ឆាណែល ឬអ្នកសារព័ត៌មាន បញ្ឈប់ និងចូលរួមសហការទប់ស្កាត់ការបង្ហូរព័ត៌មានមិនពិតគ្រប់រូបភាព ដើម្បីចូលរួមរក្សាតម្លៃរួមជាមនុស្សមានសីលធម៌។

តំណាងក្រុមគ្រួសារ លោក ស៊ីន ស៊ីសាមុត ក៏បាន អរគុណដល់បណ្តាញព័ត៌មាន មួយចំនួនដូចជា ក្រុមព្រះសុរិយា, និលោកសេង តារា អ្នកស្រាវជ្រាវ និងបណ្តាញព័ត៌មានជាច្រើនទៀត ដែលបានចំណាយពេលស្រាវជ្រាវ បកស្រាយ និងផ្សព្វផ្សាយបំភ្លឺការពិតជូនដល់ជនានុជន បានដឹងការពិតថា លោក ធឹប ភក្រលីន ហៅ បឺត សំរេច មិនមែនជាកូនឥតខាន់ស្លានៃអធិរាជសំឡេងមាស។

លិខិតដដែល ក៏បានកោតសរសើរចំពោះទឹកចិត្ត ស្មារតី និងឧត្តមគតិនៃពលរដ្ឋកម្ពុជាមួយចំនួនធំ ដែលនៅតែទទួលស្គាល់ភាពស្អាតស្អំ កិត្តិយស សេចក្តីថ្លៃថ្នូរ និងកិត្យានុភាពនៃ អធិរាជសំឡេងមាស ស៊ីន ស៊ីសាមុត ក្នុងឋានៈជាវីរៈសិល្បៈករផ្នែកសំនៀងពីរោះឯក និងជាមរតកសិល្បៈ ដ៏ថ្លៃថ្លាផូរផង់រួមតែមួយគត់នៃប្រជាជាតិខ្មែរគ្រប់ជំនាន់។ ជាពិសេស កោតសរសើរចំពោះឆន្ទៈ ដ៏រឹងមាំនៃពលរដ្ឋកម្ពុជា ដែលបាននិងកំពុងបន្តច្រានចោលរាល់ការផ្តល់សម្មតិកម្មក្លែងក្លាយនានា របស់ក្រុមលោក បឺត សំរេច ជាដរាប៕

ដោយ៖ង៉ិល ណារ៉ាត់