លោក មីន អ៊ុងឡាំង Archives - Kampuchea Thmey Daily

មេដឹកនាំចិន ប្រាប់មេដឹកនាំមីយ៉ាន់ម៉ា ឲ្យងាកទៅរកផ្លូវដែលត្រឹមត្រូវ និង មានការគាំទ្រពីប្រជាជន

Minea Neu — Wed, 17 Jun 2026 07:07:23 +0000

ប្រធានាធិបតីចិន លោក ស៊ី ជីនពីង បានប្រាប់មេដឹកនាំមីយ៉ាន់ម៉ាក្នុងទីក្រុងប៉េកាំង នៅថ្ងៃអង្គារ ថា ប្រទេសអាស៊ីអាគ្នេយ៍មួយនេះគួរតែស្វែងរកផ្លូវអភិវឌ្ឍន៍ដ៏ត្រឹមត្រូវ ដែលទទួលបានការគាំទ្រពីប្រជាជន។ នេះបើយោងតាមទីភ្នាក់ងារសារព័ត៌មាន Xinhua ផ្សាយនៅថ្ងៃទី១៦ ខែមិថុនា ឆ្នាំ២០២៦ ។

លោក ស៊ី បានទទួលប្រធានាធិបតីមីយ៉ាន់ម៉ា លោក មីន អ៊ុងឡាំង បន្ទាប់ពីស្វាគមន៍ជាផ្លូវការសម្រាប់មេដឹកនាំរូបនេះ នៅទីក្រុងប៉េកាំង។

លោក ស៊ី និង លោក មីន អ៊ុង លាំង នៅទីក្រុងប៉េកាំង។ រូបភាព៖ Reuters

លោក ស៊ី ប្រាប់ លោក មីន ថា៖ « ប្រទេសចិនដាក់ទំនាក់ទំនងជាមួយមីយ៉ាន់ម៉ាជាអាទិភាពក្នុងការទូតជិតខាង ហើយគាំទ្ររដ្ឋាភិបាលថ្មីរបស់មីយ៉ាន់ម៉ាក្នុងការសម្របសម្រួលការអភិវឌ្ឍ និងសន្តិសុខ ដើម្បីស្វែងរកផ្លូវអភិវឌ្ឍន៍ត្រឹមត្រូវ សមស្របនឹងលក្ខខណ្ឌជាតិ ហើយទទួលបានការគាំទ្រពីប្រជាជន»។

គួរបញ្ជាក់ថា លោក មីន អ៊ុងឡាំង បានគ្រប់គ្រងមីយ៉ាន់ម៉ាដោយផ្ទាល់ ចាប់តាំងពីឆ្នាំ២០២១ បន្ទាប់ពីផ្តួលរំលំរដ្ឋាភិបាលស៊ីវិលដែលឈ្នះការបោះឆ្នោតភ្លូកទឹកភ្លូកដីក្នុងកាលនោះ ធ្វើឱ្យមានជម្លោះជាមួយជនជាតិភាគតិច និង ការបែកបាក់ផ្ទៃក្នុងកាន់តែធ្ងន់ធ្ងរឡើងៗរហូតដល់ពេលនេះ។

លោក ស៊ី បាននិយាយបន្ថែមទៀតថា ច្រករបៀងសេដ្ឋកិច្ចចិន-មីយ៉ាន់ម៉ា នៅតែជាគម្រោងដ៏សំខាន់មួយក្រោមគំនិតផ្តួចផ្តើមខ្សែក្រវ៉ាត់ និងផ្លូវ (BRI) ដែលចិនបានប្រកាសដាក់ចេញតាំងពីឆ្នាំ២០១៣។

មេដឹកនាំទាំងពីរ បានពិភាក្សាអំពីការជំរុញគម្រោងហេដ្ឋារចនាសម្ព័ន្ធសំខាន់ៗ ខណៈក៏ធានាសុវត្ថិភាព និងស្ថិរភាពផងដែរ។

លោក ស៊ី បានលើកឡើងថា គម្រោងបែបនេះគួរតែជួយកែលម្អសេដ្ឋកិច្ច និងជីវភាពរស់នៅរបស់ប្រជាជនមីយ៉ាន់ម៉ា។ លោកបន្ថែមថា ប្រទេសចិនគាំទ្រយ៉ាងមុតមាំ ចំពោះមីយ៉ាន់ម៉ាក្នុងការការពារអធិបតេយ្យភាព និងបូរណភាពទឹកដី។

មេដឹកនាំមីយ៉ាន់ម៉ាដែលកើតចេញពីការគ្រប់គ្រងយោធា បានទៅដល់ប្រទេសចិនកាលពីថ្ងៃចន្ទ សម្រាប់ដំណើរទស្សនកិច្ចផ្លូវរដ្ឋរយៈពេលប្រាំថ្ងៃ តបតាមការអញ្ជើញរបស់ មេដឹកនាំចិន ដែលនេះជាដំណើរទស្សនកិច្ចលើកដំបូងរបស់លោកទៅកាន់ប្រទេសចិន ចាប់តាំងពីជ្រើសតាំងជាប្រធានាធិបតី។

ដំណើរទស្សនកិច្ចនេះកើតឡើង ចំពេលប្រទេសចិន និងមីយ៉ាន់ម៉ា កំពុងស្វែងរកការពង្រឹងកិច្ចសហប្រតិបត្តិការនយោបាយ និងសេដ្ឋកិច្ច៕

សម្រួល៖ ណឺ មិនា

The post មេដឹកនាំចិន ប្រាប់មេដឹកនាំមីយ៉ាន់ម៉ា ឲ្យងាកទៅរកផ្លូវដែលត្រឹមត្រូវ និង មានការគាំទ្រពីប្រជាជន appeared first on Kampuchea Thmey Daily.

EU សម្រេចដាក់ទណ្ឌកម្មមីយ៉ាន់ម៉ាមួយឆ្នាំទៀត និងបន្តផ្អាកគ្រប់ជំនួយហិរញ្ញវត្ថុ

Huon Dina — Tue, 28 Apr 2026 07:32:38 +0000

សហភាពអឺរ៉ុប (EU) កាលពីថ្ងៃចន្ទ (២៧ មេសា) បានសម្រេចបន្តដាក់ទណ្ឌកម្មប្រឆាំងមីយ៉ាន់ម៉ារហូតដល់ខែឧសភា ឆ្នាំ២០២៧ ដើម្បីរក្សាសម្ពាធលើមេដឹកនាំយោធារបស់ប្រទេសនេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

រដ្ឋមន្រ្តីក្រសួងការបរទេសថៃ លោក ស៊ីហាសាក់ ភួងកេតកែវ ជួបជាមួយប្រធានាធិបតីមីយ៉ាន់ម៉ា លោក មីន អ៊ុងឡាំង នៅទីក្រុងណាពិដោរ កាលពីថ្ងៃ ២២ មេសា ២០២៦។

ការសម្រេចរបស់ EU ធ្វើឡើងជាង ៥ ឆ្នាំ ក្រោយក្រុមយោធាបានធ្វើរដ្ឋប្រហារផ្ដួលរំលំរដ្ឋាភិបាលជាប់ឆ្នោតរបស់លោកស្រី អ៊ុង សានស៊ូជី នៅដើមឆ្នាំ ២០២១។

វិធានការរបស់ប្លុក រួមមានការបង្កកទ្រព្យសម្បត្តិ ការហាមឃាត់ការធ្វើដំណើរ និងការហាមឃាត់ការលក់/ផ្ដល់អាវុធ លើបុគ្គលចំនួន ១០៥ នាក់ និងអង្គភាពចំនួន ២២ នៅមីយ៉ាន់ម៉ា។ វិធានការដដែល ត្រូវបានដាក់ចេញជាលើកដំបូងក្រោយរដ្ឋប្រហារយោធាខែកុម្ភៈ ឆ្នាំ២០២១ និងការបង្ក្រាបជាបន្តបន្ទាប់របស់របបយោធាលើអ្នកប្រឆាំង។

ក្រុមប្រឹក្សា EU បាននិយាយក្នុងសេចក្ដីថ្លែងការណ៍កាលពីថ្ងៃចន្ទថា៖ «សហភាពអឺរ៉ុប សូមបញ្ជាក់ជាថ្មីនូវការថ្កោលទោសយ៉ាងខ្លាំងចំពោះសកម្មភាពរបស់យោធាមីយ៉ាន់ម៉ា ចាប់តាំងពីរដ្ឋប្រហារឆ្នាំ ២០២១»។ ក្រុមប្រឹក្សាបានលើកឡើងពីការបន្តរំលោភសិទ្ធិមនុស្សធ្ងន់ធ្ងរ និងការរឹតត្បិតយ៉ាងទូលំទូលាយលើសេរីភាពជាមូលដ្ឋាន។

ក្រុមប្រឹក្សាបានអំពាវនាវឱ្យបញ្ចប់អំពើហិង្សាទាំងអស់ និងការដោះលែងមនុស្សដែលត្រូវបានគេឃុំខ្លួនតាមអំពើចិត្ត។

គួរកត់សម្គាល់ផងដែរថា ការសម្រេចរបស់ EU ធ្វើឡើងផងដែរ ក្រោយពីមេដឹកនាំរដ្ឋប្រហារ លោក មីន អ៊ុងឡាំង ត្រូវបានជ្រើសរើសជាប្រធានាធិបតីមីយ៉ាន់ម៉ានៅដើមខែនេះ តាមរយៈការបោះឆ្នោតដែលលោកខាងលិចបានថ្កោលទោសថាជាការបោះឆ្នោតក្លែងបន្លំដើម្បីបន្តការគ្រប់គ្រងរបស់យោធា។

ក្រៅពីវិធានការទណ្ឌកម្ម EU បាននិយាយទៀតថា ខ្លួននៅតែបន្តដកហូតជំនួយហិរញ្ញវត្ថុដោយផ្ទាល់ទៅរដ្ឋាភិបាលមីយ៉ាន់ម៉ា និងផ្អាកគ្រប់ជំនួយទាំងអស់ ដែលគេអាចរាប់ចាត់ទុកថា ផ្ដល់ភាពស្របច្បាប់សម្រាប់ថ្នាក់ដឹកនាំយោធាមីយ៉ាន់ម៉ា។

បច្ចុប្បន្ន ភាពតានតឹងនយោបាយ និងអសន្តិសុខប្រដាប់អាវុធនៅតែមានមីយ៉ាន់ម៉ា។ អង្គការសហប្រជាជាតិបាននិយាយថា មានមនុស្សយ៉ាងហោចណាស់ ៣,៦ លាននាក់ បានផ្លាស់ទីលំនៅចាប់តាំងពីរដ្ឋប្រហារមក។ សមាគមជំនួយសម្រាប់អ្នកទោសនយោបាយឯណោះវិញ បានផ្ទៀងផ្ទាត់ការសម្លាប់មនុស្សជិត ៨ ០០០ នាក់ និងការចាប់ខ្លួនជិត ៣១ ០០០ នាក់ ដោយ ២២ ០០០ នាក់ក្នុងនោះ នៅតែបន្តជាប់ឃុំឃាំង មកទល់ពេលនេះ៕

The post EU សម្រេចដាក់ទណ្ឌកម្មមីយ៉ាន់ម៉ាមួយឆ្នាំទៀត និងបន្តផ្អាកគ្រប់ជំនួយហិរញ្ញវត្ថុ appeared first on Kampuchea Thmey Daily.

កម្ពុជាទទួលស្គាល់លោក មីន អ៊ុងឡាំង ជាប្រធានាធិបតី មីយ៉ាន់ម៉ា និងជូនពរលោកឱ្យទទួលបានជោគជ័យក្នុងការដឹកនាំប្រទេស

hun sirivadh — Sun, 12 Apr 2026 02:30:52 +0000

កម្ពុជាបានឱ្យប្រេសិតពិសេសទៅចូលរួមពិធីស្បថចូលកាន់តំណែងរបស់ប្រធានាធិបតីមីយ៉ាន់ម៉ាលោក មីន អ៊ុងឡាំង កាលពីថ្ងៃទី១០ ខែមេសា និងបានប្រគល់លិខិតអបអរសាទរមួយដល់ប្រធានាធិបតីថ្មីរបស់ប្រទេសនេះផងដែរ។

ប្រេសិតពិសេសកម្ពុជាដឹកនាំដោយឧត្ដមទីប្រឹក្សាផ្ទាល់ព្រះមហាក្សត្រលោក ចម ប្រសិទ្ធ បានទៅជួបនឹងពិភាក្សាគ្នាដោយផ្ទាល់ជាមួយលោក មីន អ៊ុងឡាំង ពីការគាំទ្រ និងទំនាក់ទំនងមិត្តភាពរវាងប្រទេសទាំងពីរផងដែរ។

ក្នុងជំនួបនោះលោក មីន អ៊ុងឡាំង បានលើកឡើងថា កម្ពុជា ជាប្រទេសជិតស្និទជាមួយមីយ៉ាន់ម៉ា ហើយប្រទេសទាំងពីរគួរមានកិច្ចសហប្រតិបត្តិការទ្វេភាគីបន្ថែមទៀត ខណៈលោកក៏បានអរគុណកម្ពុជាចំពោះជំនួយជួលដល់មីយ៉ាន់ម៉ានៅពេលជួបគ្រោះធម្មជាតិកន្លងមកផងដែរ។

ប្រេសិតពិសេសកម្ពុជាលោក ចម ប្រសិទ្ធ បានពាំនាំនូវការអបអរសាទររបស់ប្រមុខរដ្ឋស្ដីទីកម្ពុជា សម្ដេចតេជោ ហ៊ុន សែន ដោយបញ្ជាក់ថាមីយ៉ាន់ម៉ា នៅបន្តជាមិត្តល្អរបស់កម្ពុជា ហើយនឹងនៅតែបន្តគាំទ្រគ្នាទៅវិញទៅមក។

ក្រៅពីជួបជាមួយប្រធានាធិបតីមីយ៉ាន់ម៉ាថ្មី លោក ចម ប្រសិទ្ធ ក៏ជួបពិភាក្សាការងារជាំមួយលោក U Tin Maung Swe ដែលរដ្ឋមន្ត្រីការបរទេសថ្មីមីយ៉ាន់ម៉ានៅម៉ោង ១០យប់ផងដែរ។

គួរឱ្យដឹងផងដែរថា មេដឹកនាំយោធាមីយ៉ាន់ម៉ា លោក មីន អ៊ុងឡាំង បានក្លាយជាប្រធានាធិបតីស៊ីវិលក្រោយបានស្បថចូលកាន់តំណែងកាលពីថ្ងៃទៅ១០ ខែមេសា ឆ្នាំ២០២៦ បន្ទាប់ពីមានការបោះឆ្នោតដែលរងការរិះគន់ពីលោកខាងលិចកាលពីចុងឆ្នាំ២០២៥។ ក្នុងពេលសច្ចាប្រណិធានលោក មីន អ៊ុងឡាំង បានសន្យាថាលោក នឹងប្រឹងប្រែងឱ្យអស់ពីសមត្ថភាពដើម្បីបម្រើសាធារណរដ្ឋមីយ៉ាន់ម៉ា៕

អត្ថបទដោយ ហ៊ុន សិរីវឌ្ឍន៍

The post កម្ពុជាទទួលស្គាល់លោក មីន អ៊ុងឡាំង ជាប្រធានាធិបតី មីយ៉ាន់ម៉ា និងជូនពរលោកឱ្យទទួលបានជោគជ័យក្នុងការដឹកនាំប្រទេស appeared first on Kampuchea Thmey Daily.

មីន អ៊ុងឡាំង ថា យោធានឹងស្ថិតក្នុងឆាកនយោបាយ ដរាបណាក្រុមប្រដាប់អាវុធបាត់ខ្លួន

សាង ស្រីល័ក្ខ — Tue, 09 Dec 2025 07:36:35 +0000

ទោះបីជាការបោះឆ្នោតនាចុងខែធ្នូ ដែលក្រុមឧត្តមសេនីយ៍សង្ឃឹមថា នឹងផ្តល់ឲ្យរបបយោធានូវភាពស្របច្បាប់ក៏ដោយ ប៉ុន្តែមេដឹកនាំរបបសឹក លោក មីន អ៊ុងឡាំង មានប្រសាសន៍ថា យោធាមីយ៉ាន់ម៉ានឹងបន្តដើរតួនាទីនាំមុខគេក្នុងឆាកនយោបាយ រហូតដល់ក្រុមប្រដាប់អាវុធជនជាតិភាគតិច (EAOs) លែងមានវត្តមានទៀត។

លោក មីន អ៊ុងឡាំង ថ្លែងនៅក្នុងពិធីអបអរសាទរទិវាកងកម្លាំងប្រដាប់អាវុធ ក្នុងទីក្រុងណៃពិដោ (រូបភាព៖ Cincds)

ថ្លែងទៅកាន់មន្ត្រី ក្រុមគ្រួសារ និងសិស្សនិស្សិតនៅ Pyin Oo Lwin ដែលជាទីតាំងនៃសាលាយោធាជាន់ខ្ពស់របស់របបយោធាកាលពីថ្ងៃសៅរ៍ លោក មីន អ៊ុងឡាំង បាននិយាយថា យោធានឹងពិចារណាកាត់បន្ថយវត្តមានរបស់ខ្លួនបន្តិចម្តងៗ នៅក្នុងសភារហូតដល់ថ្ងៃដែលក្រុម EAOs បាត់ខ្លួន។

ក្នុងរយៈពេលប៉ុន្មានសប្តាហ៍ថ្មីៗនេះ មេដឹកនាំរដ្ឋប្រហាររូបនេះរវល់ចូលរួមពិធីប្រគល់សញ្ញាបត្រយោធា និងជួបជាមួយមន្ត្រីរាជការ និងមន្ត្រីប៉ូលិស ដោយប្រើប្រាស់ឱកាសនេះដើម្បីជំរុញអ្នកបោះឆ្នោតឲ្យគាំទ្របេក្ខជនដែលមានទស្សនៈការពារជាតិ និងអ្នកដែលមានសម្ព័ន្ធភាពជាមួយយោធា ដែលលោកបានពិពណ៌នាថាជា «ស្ថាប័នដ៏រឹងមាំបំផុត» របស់ប្រទេស។

មេដឹកនាំរបបសឹកមីយ៉ាន់ម៉ា ក៏បាននិយាយឡើងវិញនូវពាក្យដដែលៗរបស់លោកថា៖ ក្រុម EAOs និងកងកម្លាំងការពារប្រជាជនគួរតែទម្លាក់អាវុធរបស់ពួកគេ ចាប់តាំងពីការតស៊ូប្រដាប់អាវុធអស់រយៈពេលប្រាំពីរទសវត្សរ៍មកហើយ ដោយវាមិនបានបង្កើតលទ្ធផលអ្វីជាដំកំភួនឡើយ។ យ៉ាងណាក៏ដោយ លោកក៏មិនភ្លេចសង្កត់ធ្ងន់ថា យោធានឹងមិនចាកចេញពីនយោបាយឡើយ។

ដោយឡែក វរសេនីយ៍ឯក Naw Bu អ្នកនាំពាក្យកងទ័ពឯករាជ្យកាឈីន បានប្រាប់កាសែត The Irrawaddy ថា «សាររបស់លោកមីន អ៊ុងឡាំង សង្ខេបខ្លីៗទៅរឿងមួយគឺ ការរំសាយអាវុធ។ ដ្បិតថាលោកនិយាយអំពីសន្តិភាព ប៉ុន្តែវាតែងតែមានន័យថា ការប្រគល់អាវុធ ហើយប្រសិនបើយោធាកាត់បន្ថយតួនាទីរបស់ខ្លួននៅពេលដែលការតស៊ូបាត់ទៅវិញ នោះនយោបាយរបស់មីយ៉ាន់ម៉ានឹងមិនដែលមានប្រជាធិបតេយ្យឡើយ ពោលវាគ្រាន់តែជាមធ្យោបាយមួយដើម្បីពន្យាររបបផ្តាច់ការយោធាប៉ុណ្ណោះ»។

មិនតែប៉ុណ្ណោះ រដ្ឋធម្មនុញ្ញឆ្នាំ ២០០៨ ដែលព្រាងឡើងក្រោមរបបយោធាមុន បានគោរពដល់តួនាទីនាំមុខរបស់យោធាក្នុងនយោបាយជាតិ បញ្ជាក់ជាថ្មីនូវកាតព្វកិច្ចរបស់ខ្លួនក្នុងការការពារ «បុព្វហេតុជាតិសំខាន់ៗចំនួនបី» ហើយថែមទាំងផ្តល់សិទ្ធិដល់មេបញ្ជាការក្នុងការតែងតាំងសមាជិកសភាយោធា និងដណ្តើមអំណាចទៀតផង។

លោក មីន អ៊ុងឡាំង ផ្ទាល់បានលើកឡើងពីរដ្ឋធម្មនុញ្ញឆ្នាំ ២០០៨ ក្នុងការធ្វើរដ្ឋប្រហារ និងដណ្តើមអំណាចពីរដ្ឋាភិបាលដែលជាប់ឆ្នោតតាមបែបប្រជាធិបតេយ្យនៅឆ្នាំ ២០២១។ បុព្វហេតុជាតិសំខាន់ៗចំនួនបីគឺ៖ ការមិនរំលាយសហភាព, ការមិនរំលាយសាមគ្គីភាពជាតិ និងការរក្សាអធិបតេយ្យភាព៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

សហភាពអឺរ៉ុប ព្រមានអាមេរិក កុំឲ្យជ្រៀតជ្រែកកិច្ចការផ្ទៃក្នុងច្រើនពេក

The post មីន អ៊ុងឡាំង ថា យោធានឹងស្ថិតក្នុងឆាកនយោបាយ ដរាបណាក្រុមប្រដាប់អាវុធបាត់ខ្លួន appeared first on Kampuchea Thmey Daily.

ប្រមុខយោធាមីយ៉ាន់ម៉ានឹងធ្វើទស្សនកិច្ចទៅប្រទេសចិនចូលរួមកិច្ចប្រជុំកំពូល SCO មុនការបោះឆ្នោត

Bun sopheap — Thu, 28 Aug 2025 08:39:50 +0000

យោងតាមការចេញផ្សាយរបស់ទីភ្នាក់ងារព័ត៌មាន Reuters ប្រមុខយោធាមីយ៉ាន់ម៉ា ឧត្តមសេនីយ មីនអ៊ុងឡាំង (Min Aung Hlaing) នឹងធ្វើដំណើរទៅកាន់ប្រទេសចិន ដើម្បីចូលរួមកិច្ចប្រជុំកំពូលរបស់អង្គការសហប្រតិបត្តិការសៀងហៃ (SCO) នៅទីក្រុងTianjin នៅថ្ងៃអាទិត្យនេះ។

ប្រមុខយោធាមីយ៉ាន់ម៉ាលោក មីន អ៊ុងឡាំង

ដំណើរទស្សនកិច្ចនេះធ្វើឡើងប៉ុន្មានខែមុនការបោះឆ្នោតដែលបានគ្រោងទុករបស់ប្រទេសមីយ៉ាន់ម៉ានៅថ្ងៃទី ២៨ ខែធ្នូ ដែលជាលើកទីមួយចាប់តាំងពីយោធាបានដណ្តើមអំណាចនៅក្នុងរដ្ឋប្រហារឆ្នាំ ២០២១ ទម្លាក់រដ្ឋាភិបាលជាប់ឆ្នោតរបស់លោកស្រី Aung San Suu Kyi និងបានធ្វើឲ្យប្រទេសធ្លាក់ចូលទៅក្នុងសង្រ្គាមស៊ីវិល។

យោងតាមទូរទស្សន៍ Myawaddy ដែលគ្រប់គ្រងដោយយោធា លោក មីន អ៊ុងឡាំង ចូលរួមតាមការអញ្ជើញរបស់ប្រធានាធិបតីចិន ស៊ី ជីនពីង។ បន្ថែមពីលើការចូលរួមក្នុងកិច្ចប្រជុំកំពូលនេះ លោកត្រូវបានគេរំពឹងថានឹងជួបលោក ស៊ីនិងមេដឹកនាំក្នុងតំបន់ផ្សេងទៀត ក៏ដូចជាជួបពិភាក្សាជាមួយមន្ត្រីចិន និងធ្វើទស្សនកិច្ចនៅផ្នែកផ្សេងទៀតនៃប្រទេសចិន។

លោក មីន អ៊ុងឡាំង និង លោក ស៊ី ជីនពីង ក្នុងប្រទេសមីយ៉ាន់ម៉ាកាលពីឆ្នាំ២០២០។

ទីក្រុងប៉េកាំងគឺជាមហាអំណាចមួយក្នុងចំណោមមហាអំណាចមួយចំនួនដែលគាំទ្រដោយបើកចំហចំពោះផែនការរបស់របបសឹកចមពោះការបោះឆ្នោត ទោះបីជាមានការតស៊ូប្រដាប់អាវុធពីកងកម្លាំងគាំទ្រលទ្ធិប្រជាធិបតេយ្យ និងក្រុមជនជាតិភាគតិចដែលគ្រប់គ្រងផ្នែកធំនៃទឹកដីរបស់មីយ៉ាន់ម៉ាក៏ដោយ។ ដំណាក់កាលដំបូងនៃការបោះឆ្នោតត្រូវបានកំណត់ដើម្បីគ្របដណ្តប់ជាង ៣០០ មណ្ឌលបោះឆ្នោត រួមទាំងតំបន់ដែលនៅតែមានការបាញ់ប្រហារមួយចំនួន នាំឲ្យមានការចោទជាសំណួរអំពីសន្តិសុខ និងភាពស្របច្បាប់ក្នុងការបោះឆ្នោតនេះ។

ការចូលរួមរបស់យោធាជាមួយប្រទេសចិនបានបង្ហាញពីសារៈសំខាន់ជាយុទ្ធសាស្ត្រនៃការគាំទ្ររបស់ទីក្រុងប៉េកាំង នៅពេលដែលមីយ៉ាន់ម៉ាប្រឈមនឹងភាពឯកោ និងសម្ពាធកាន់តែខ្លាំងឡើងពីរដ្ឋាភិបាលលោកខាងលិច ដែលបានបរិហារការបោះឆ្នោតនាពេលខាងមុខថាមិនសេរី និងយុត្តិធម៌។ សម្រាប់លោក មីន អ៊ុងឡាំង ដំណើរទស្សនកិច្ចនេះគូសបញ្ជាក់ពីការព្យាយាមរបស់លោកក្នុងការទទួលបានការទទួលស្គាល់ពីអន្តរជាតិ និងពង្រឹងជំហរផុយស្រួយរបស់របបសឹកមុនការបោះឆ្នោត៕

អត្ថបទ៖ ប៊ុន សុភាព

The post ប្រមុខយោធាមីយ៉ាន់ម៉ានឹងធ្វើទស្សនកិច្ចទៅប្រទេសចិនចូលរួមកិច្ចប្រជុំកំពូល SCO មុនការបោះឆ្នោត appeared first on Kampuchea Thmey Daily.

មីយ៉ាន់ម៉ា បញ្ចប់ការដាក់ប្រទេសក្នុងគ្រាអាសន្ននិងត្រៀមរៀបចំការបោះឆ្នោត

Bun sopheap — Fri, 01 Aug 2025 03:27:43 +0000

របបយោធាមីយ៉ាន់ម៉ាបានបញ្ចប់ជាផ្លូវការនូវការដាក់ប្រទេសក្នុងគ្រាអាសន្នដែលបានដាក់ជាលើកដំបូងតាំងពីរដ្ឋប្រហារឆ្នាំ២០២១ និងបានប្រកាសពីការរៀបចំរចនាសម្ព័ន្ធរដ្ឋបាលឡើងវិញក្នុងការរៀបចំសម្រាប់ការបោះឆ្នោតនៅក្នុងខែធ្នូខាងមុខ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០១ ខែសីហា។

ឧត្តមសេនីយឯក មីន អ៊ុងឡាំង(Min Aung Hlaing) ដែលបានដឹកនាំរដ្ឋប្រហារ។ (រូបភាព៖ Reuters)

ឧត្តមសេនីយឯក មីន អ៊ុងឡាំង(Min Aung Hlaing) ដែលបានដឹកនាំរដ្ឋប្រហារឆ្នាំ ២០២១ បានលាលែងពីតំណែងជានាយករដ្ឋមន្ត្រី ប៉ុន្តែនៅតែកាន់អំណាចជាប្រធានាធិបតីស្តីទី។ ឥឡូវនេះលោកក៏ដឹកនាំក្រុមថ្មីមួយដែលមានឈ្មោះថា គណៈកម្មការសន្តិសុខ និងសន្តិភាពរដ្ឋ ដែលនឹងត្រួតពិនិត្យការបោះឆ្នោតនាពេលខាងមុខ។ ស្ថាប័នគ្រប់គ្រងចាស់របស់យោធា គឺក្រុមប្រឹក្សារដ្ឋបាលរដ្ឋ ត្រូវបានរំលាយ ហើយអំណាចរបស់វាត្រូវបានប្រគល់ឱ្យក្រុមដែលគ្រប់គ្រងដោយយោធាមួយទៀត គឺក្រុមប្រឹក្សាការពារជាតិ និងសន្តិសុខ។

ទោះបីជាយ៉ាងណាក៏ដោយ ការបោះឆ្នោតនឹងប្រឈមមុខនឹងបញ្ហាប្រឈមធ្ងន់ធ្ងរ រួមទាំងសង្រ្គាមស៊ីវិលទូទាំងប្រទេស និងការបដិសេធយ៉ាងទូលំទូលាយដោយកងកម្លាំងគាំទ្រលទ្ធិប្រជាធិបតេយ្យ ដែលចាត់ទុកថាដំណើរការបោះឆ្នោតនេះមិនស្របច្បាប់។

ការបោះឆ្នោតរបស់មីយ៉ាន់ម៉ាកាលពីឆ្នាំ២០២០។ (រូបភាព៖ Reuters)

លើសពីនេះទោះបីជាមានការសន្យាថាការបោះឆ្នោតនឹងប្រព្រឹត្តទៅក្នុងរយៈពេលប្រាំមួយខែនៃការបញ្ចប់គ្រាអាសន្នក៏ដោយ ក៏អ្នករិះគន់និយាយថាលក្ខខណ្ឌមិនសមរម្យសម្រាប់ការបោះឆ្នោតដោយសេរី និងយុត្តិធម៌នោះទេ។ មេដឹកនាំបក្សប្រឆាំងភាគច្រើនជាប់គុក ប្រព័ន្ធផ្សព្វផ្សាយត្រូវបានគៀបសង្កត់ ហើយតំបន់ជម្លោះនៅតែមិនមានស្ថិរភាព។ យោធានៅតែបន្តប្រយុទ្ធជាមួយក្រុមតស៊ូប្រដាប់អាវុធ ហើយគ្រាអាសន្ន ឬច្បាប់អាជ្ញាសឹកត្រូវបានដាក់ឡើងវិញនៅក្នុងតំបន់ចំនួន៦៣ ឯណោះ។

ក្រុមប្រឆាំង រួមទាំងរដ្ឋាភិបាលរួបរួមជាតិ (NUG)និងអង្គការប្រដាប់អាវុធជនជាតិភាគតិច បានប្តេជ្ញាបង្អាក់ការបោះឆ្នោតដែលពួកគេហៅថាក្លែងក្លាយ និងបដិសេធរាល់ការប៉ុនប៉ងដើម្បីធ្វើឱ្យការគ្រប់គ្រងយោធាក្លាយជាស្របច្បាប់៕

អត្ថបទ៖ ប៊ុន សុភាព

The post មីយ៉ាន់ម៉ា បញ្ចប់ការដាក់ប្រទេសក្នុងគ្រាអាសន្ននិងត្រៀមរៀបចំការបោះឆ្នោត appeared first on Kampuchea Thmey Daily.

មេដឹកនាំយោធាមីយ៉ាន់ម៉ា បង្ហាញខ្លួនក្នុងពិធីគោរពវិញ្ញាណក្ខន្ធឪពុកលោកស្រី អ៊ុងសាន ស៊ូជី

Bun sopheap — Sat, 19 Jul 2025 09:05:28 +0000

យោងតាមការចេញផ្សាយរបស់ Euro News មេដឹកនាំយោធាមីយ៉ាន់ម៉ា ឧត្តមសេនីយ មីន អ៊ុងឡាំង( Min Aung Hlaing )បានបង្ហាញខ្លួនជាសាធារណៈដ៏កម្រនៅថ្ងៃទី ១៩ ខែកក្កដា ដើម្បីចូលរួមក្នុងពិធីទិវាទុក្ករបុគ្គល(Martyrs’ Day) នៅទីក្រុង Yangon ។

មេដឹកនាំយោធាមីយ៉ាន់ម៉ា ឧត្តមសេនីយ មីន អ៊ុងឡាំង (រូបភាព៖ Reuters)

ពិធីនេះផ្តល់កិត្តិយសដល់ឧត្តមសេនីយ៍ អ៊ុងសាន (Aung San) ជាវីរៈបុរសជាតិ និងជាឪពុករបស់លោកស្រី អ៊ុងសាន ស៊ូជី (Aung San Suu Kyi) ដែលបច្ចុប្បន្នកំពុងជាប់ពន្ធនាគារ។ អ្នកស្រី ស៊ូជី ដែលបច្ចុប្បន្នកំពុងជាប់ពន្ធនាគាររយៈពេល ២៧ ឆ្នាំពីបទចោទប្រកាន់នយោបាយ បានខកខានព្រឹត្តិការណ៍នេះរយៈពេល ៥ ឆ្នាំជាប់គ្នា។

នេះជាលើកទីមួយហើយដែលលោក មីន អ៊ុងឡាំង បានចូលរួមក្នុងពិធីនេះចាប់តាំងពីយោធាបានកាន់កាប់ប្រទេសក្នុងឆ្នាំ ២០២១។ ពិធីទិវាទុក្ករបុគ្គល(Martyrs’ Day) គឺរំលឹកដល់ការស្លាប់ក្នុងឆ្នាំ ១៩៤៧ របស់លោក Aung San និងសហការីរបស់គាត់ នៅប៉ុន្មានខែមុនពេលប្រទេសមីយ៉ាន់ម៉ាទទួលបានឯករាជ្យពីចក្រភពអង់គ្លេស។

យោធាមីយ៉ាន់ម៉ាមីន អ៊ុងឡាំង គោរពវិញ្ញាណក្ខន្ធឪពុកលោកស្រី អ៊ុងសាន ស៊ូជី។ (រូបភាព៖ AP)

ពិធីនៅឆ្នាំនេះបានប្រារព្ធឡើងចំពេលមានការតស៊ូកាន់តែខ្លាំងឡើងចំពោះការគ្រប់គ្រងរបបយោធា ជម្លោះប្រដាប់អាវុធដែលកំពុងបន្ត និងនៅមុនការបោះឆ្នោតដែលគ្រោងទុកនៅចុងឆ្នាំនេះ ដែលត្រូវបានគេមើលឃើញយ៉ាងទូលំទូលាយថាជាការធ្វើឱ្យការគ្រប់គ្រងរបស់យោធាស្របច្បាប់។

យោងតាមក្រុមសិទ្ធិមនុស្សបានឱ្យដឹងថា មនុស្សជាង ៧,០០០ នាក់ត្រូវបានសម្លាប់ និងជិត ៣០,០០០ នាក់ត្រូវបានចាប់ខ្លួនចាប់តាំងពីការធ្វើរដ្ឋប្រហារនេះ បើយោងតាមក្រុមសិទ្ធិមនុស្ស បើទោះបីជារបបយោធាមិនទទួលស្គាល់ចំនួនទាំងនេះក៏ដោយ៕

ឧត្តមសេនីយ៍ អ៊ុងសាន ជាវីរៈបុរសជាតិ និងជាឪពុករបស់លោកស្រី អ៊ុងសាន ស៊ូជី(រូបភាព៖ AP)

ទង់ជាតិមីយ៉ាន់ម៉ាបង្ហូតពាក់កណ្ដាល ដើម្បីប្រារព្ធខួបលើកទី៧៨នៃការធ្វើឃាតឧត្តមសេនីយAung San ឪពុករបស់លោកស្រី Aung San Suu Kyi នៅទីក្រុង Yangon។ (រូបភាព៖ AP)

អត្ថបទ៖ ប៊ុន សុភាព

The post មេដឹកនាំយោធាមីយ៉ាន់ម៉ា បង្ហាញខ្លួនក្នុងពិធីគោរពវិញ្ញាណក្ខន្ធឪពុកលោកស្រី អ៊ុងសាន ស៊ូជី appeared first on Kampuchea Thmey Daily.

ទាហានយោធាមីយ៉ាន់ម៉ា៦២នាក់បាក់ទ័ព រត់ចូលទឹកដីថៃ មានទាំងរបួសនិងស្លាប់ច្រើនទៀត

Rann Reuy — Sat, 24 May 2025 08:34:45 +0000

ទាហានរដ្ឋាភិបាលរបបសឹកមីយ៉ាន់ម៉ាចំនួន ៦២នាក់បានបាក់ទ័ពរត់ភៀសខ្លួនចូលទឹកដីថៃ ពីក្រុមតស៊ូជនជាតិការ៉ែន Karen នៅជាប់ព្រំដែនថៃ។ យោងបណ្តាញសង្គមសារព័ត៌មានថៃ Khaosod

រូបភាពយោធាមីយ៉ាន់ម៉ាបាក់ទ័ពរត់ចូលទឹកដីថៃ។ Khaosod

ទាហានរបស់របបសឹកមីយ៉ាន់ម៉ានទាំងនោះ ត្រូវបានអនុញ្ញាតឱ្យឆ្លងចូលទៅផ្នែកខាងព្រំដែនទឹកដីថៃ ដើម្បីស្វែងរកជនភៀសខ្លួន ហើយត្រូវបានដកហូតអាវុធកាលពីថ្ងៃសៅរ៍។ ឧប្បត្តិហេតុនេះបានកើតឡើងបន្ទាប់ពីបន្ទាយយោធារបស់ពួកគេនៅជិតព្រំដែនថៃក្នុងស្រុក Phop Phra ខេត្ត Tak នៅទឹកដីមីយ៉ាន់ម៉ា ត្រូវបានកងកម្លាំងសហភាពរួបរួមជាតិការ៉ែន (KNU) និង កងទ័ពរំដោះជាតិការ៉េន (KNLA)កាន់កាប់។

ក្នុងចំណោមទាហានទាំង ៦២នាក់ មានរបួស១១នាក់ របួសធ្ងន់៤នាក់ ។ ពួកគេបាននិយាយថា មនុស្ស១៨នាក់ក្នុងចំណោមកងកម្លាំងរបស់ពួកគេត្រូវបានគេសម្លាប់។

សហភាពជាតិការ៉ែន (KNU) និងសម្ព័ន្ធមិត្តរបស់ខ្លួន តាមសេចក្តីរាយការណ៍ បានរឹបអូសយកមូលដ្ឋានយោធាមួយ នៅជិតព្រំដែនថៃ ក្នុងរដ្ឋការ៉ែនកាលពី៤ថ្ងៃមុនផងដែរ។ យោងសារព័ត៌ាមាន មីយ៉ាន់ម៉ា irrawaddy ដែលបានផ្សាយកាលថ្ងៃទី២០ឧសភា។

កងទ័ពរំដោះជាតិ Karen (KNLA) ដែលជាស្លាបប្រដាប់អាវុធរបស់ KNU និងសម្ព័ន្ធមិត្តរបស់ខ្លួនបានដណ្តើមយកមូលដ្ឋាន Maw Phoe Kay នៅ Paingkyon ស្រុក Hpa-an កាលពីថ្ងៃចន្ទសប្តាហ៍នេះ។

KNLA បានប្រាប់ប្រព័ន្ធផ្សព្វផ្សាយ Karen ថា ទាហានរបបនេះបានបោះបង់ចោលបន្ទាយ ហើយប្រព័ន្ធផ្សព្វផ្សាយថៃបានរាយការណ៍ថាទាហាន ២៧នាក់បានឆ្លងទន្លេ Moei ចូលទៅក្នុងប្រទេសថៃ៕

ដោយ រ៉ាន់ រើយ

ការង្រមូលផ្តុំទាហានបាក់ទ័ពរបស់មីយ៉ាន់ម៉ានៅទឹកដីថៃនៅថ្ងៃសៅរ៍នេះ។ Khaosod

The post ទាហានយោធាមីយ៉ាន់ម៉ា៦២នាក់បាក់ទ័ព រត់ចូលទឹកដីថៃ មានទាំងរបួសនិងស្លាប់ច្រើនទៀត appeared first on Kampuchea Thmey Daily.

លោក មីន អ៊ុងឡាំង Archives - Kampuchea Thmey Daily

EU សម្រេចដាក់ទណ្ឌកម្មមីយ៉ាន់ម៉ាមួយឆ្នាំ​ទៀត ​​និង​បន្តផ្អាកគ្រប់ជំនួយហិរញ្ញវត្ថុ

មីន អ៊ុងឡាំង ថា យោធានឹងស្ថិតក្នុងឆាកនយោបាយ ដរាបណាក្រុមប្រដាប់អាវុធបាត់ខ្លួន

ប្រមុខ​យោធា​មី​យ៉ាន់​ម៉ា​នឹង​ធ្វើ​ទស្សនកិច្ច​ទៅ​ប្រទេស​ចិន​ចូលរួមកិច្ចប្រជុំ​កំពូល SCO មុន​ការបោះឆ្នោត​

មីយ៉ាន់ម៉ា បញ្ចប់ការដាក់ប្រទេសក្នុងគ្រាអាសន្ននិងត្រៀមរៀបចំការបោះឆ្នោត

មេដឹកនាំ​យោធា​មី​យ៉ាន់​ម៉ា បង្ហាញ​ខ្លួន​ក្នុង​ពិធី​គោរព​វិញ្ញាណក្ខន្ធ​ឪពុក​លោកស្រី អ៊ុងសាន ស៊ូជី

​ទាហាន​​យោធា​មីយ៉ាន់ម៉ា​៦២​នាក់បាក់​ទ័ព​​ រត់ចូល​ទឹកដីថៃ​​ ​មានទាំង​របួស​និងស្លាប់ច្រើន​​ទៀត​

EU សម្រេចដាក់ទណ្ឌកម្មមីយ៉ាន់ម៉ាមួយឆ្នាំទៀត និងបន្តផ្អាកគ្រប់ជំនួយហិរញ្ញវត្ថុ

ប្រមុខយោធាមីយ៉ាន់ម៉ានឹងធ្វើទស្សនកិច្ចទៅប្រទេសចិនចូលរួមកិច្ចប្រជុំកំពូល SCO មុនការបោះឆ្នោត

មេដឹកនាំយោធាមីយ៉ាន់ម៉ា បង្ហាញខ្លួនក្នុងពិធីគោរពវិញ្ញាណក្ខន្ធឪពុកលោកស្រី អ៊ុងសាន ស៊ូជី

ទាហានយោធាមីយ៉ាន់ម៉ា៦២នាក់បាក់ទ័ព រត់ចូលទឹកដីថៃ មានទាំងរបួសនិងស្លាប់ច្រើនទៀត