នយោបាយ

កម្ពុជាទទួលស្គាល់លោក មីន អ៊ុងឡាំង ជាប្រធានាធិបតី មីយ៉ាន់ម៉ា និងជូនពរលោកឱ្យទទួលបានជោគជ័យក្នុងការដឹកនាំប្រទេស

បានផុស

៣ ខែ មុន

នៅ

ថ្ងៃអាទិត្យ ១២ មេសា ២០២៦

ដោយ

កម្ពុជាបានឱ្យប្រេសិតពិសេសទៅចូលរួមពិធីស្បថចូលកាន់តំណែងរបស់ប្រធានាធិបតីមីយ៉ាន់ម៉ាលោក មីន អ៊ុងឡាំង កាលពីថ្ងៃទី១០ ខែមេសា និងបានប្រគល់លិខិតអបអរសាទរមួយដល់ប្រធានាធិបតីថ្មីរបស់ប្រទេសនេះផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រេសិតពិសេសកម្ពុជាដឹកនាំដោយឧត្ដមទីប្រឹក្សាផ្ទាល់ព្រះមហាក្សត្រលោក ចម ប្រសិទ្ធ បានទៅជួបនឹងពិភាក្សាគ្នាដោយផ្ទាល់ជាមួយលោក មីន អ៊ុងឡាំង ពីការគាំទ្រ និងទំនាក់ទំនងមិត្តភាពរវាងប្រទេសទាំងពីរផងដែរ។

ក្នុងជំនួបនោះលោក មីន អ៊ុងឡាំង បានលើកឡើងថា កម្ពុជា ជាប្រទេសជិតស្និទជាមួយមីយ៉ាន់ម៉ា ហើយប្រទេសទាំងពីរគួរមានកិច្ចសហប្រតិបត្តិការទ្វេភាគីបន្ថែមទៀត ខណៈលោកក៏បានអរគុណកម្ពុជាចំពោះជំនួយជួលដល់មីយ៉ាន់ម៉ានៅពេលជួបគ្រោះធម្មជាតិកន្លងមកផងដែរ។

ប្រេសិតពិសេសកម្ពុជាលោក ចម ប្រសិទ្ធ បានពាំនាំនូវការអបអរសាទររបស់ប្រមុខរដ្ឋស្ដីទីកម្ពុជា សម្ដេចតេជោ ហ៊ុន សែន ដោយបញ្ជាក់ថាមីយ៉ាន់ម៉ា នៅបន្តជាមិត្តល្អរបស់កម្ពុជា ហើយនឹងនៅតែបន្តគាំទ្រគ្នាទៅវិញទៅមក។

ក្រៅពីជួបជាមួយប្រធានាធិបតីមីយ៉ាន់ម៉ាថ្មី លោក ចម ប្រសិទ្ធ ក៏ជួបពិភាក្សាការងារជាំមួយលោក U Tin Maung Swe ដែលរដ្ឋមន្ត្រីការបរទេសថ្មីមីយ៉ាន់ម៉ានៅម៉ោង ១០យប់ផងដែរ។

គួរឱ្យដឹងផងដែរថា មេដឹកនាំយោធាមីយ៉ាន់ម៉ា លោក មីន អ៊ុងឡាំង បានក្លាយជាប្រធានាធិបតីស៊ីវិលក្រោយបានស្បថចូលកាន់តំណែងកាលពីថ្ងៃទៅ១០ ខែមេសា ឆ្នាំ២០២៦ បន្ទាប់ពីមានការបោះឆ្នោតដែលរងការរិះគន់ពីលោកខាងលិចកាលពីចុងឆ្នាំ២០២៥។ ក្នុងពេលសច្ចាប្រណិធានលោក មីន អ៊ុងឡាំង បានសន្យាថាលោក នឹងប្រឹងប្រែងឱ្យអស់ពីសមត្ថភាពដើម្បីបម្រើសាធារណរដ្ឋមីយ៉ាន់ម៉ា៕