ពិធីនេះ រៀបចំឡើងក្នុងគោលបំណង រំឭកគុណបំណាច់របស់អតីតយុវជន និងដឹងគុណយ៉ាងជ្រាលជ្រៅចំពោះអតីតយុទ្ធជន និងនិវត្តជន​ ដែលបានលះបង់ពាក់លីសាច់ស្រស់ ឈាមស្រស់ និងកម្លាំងកាយចិត្ត ក្នុងបុព្វហេតុការពារឯករាជ្យ អធិបតេយ្យភាព បូរណភាពទឹកដី និងសុខសន្តិភាពជូនជាតិមាតុភូមិ និងប្រជាជនកម្ពុជា។

ក្នុងឱកាសនោះលោកស្រី គឹម ចន្នី អភិបាលរងខេត្តកែប និងជាអនុប្រធានសមាគមអតីតយុទ្ធជន និងនិវត្តជនកម្ពុជាខេត្តកែប បានអានរបាយការណ៍ស្តីពីសកម្មភាព និងលទ្ធផលការងាររបស់សមាគមអតីតយុទ្ធជន និងនិវត្តជនកម្ពុជាខេត្ត ដោយបានលើកឡើងអំពីការយកចិត្តទុកដាក់របស់ថ្នាក់ដឹកនាំខេត្ត និងស្ថាប័នពាក់ព័ន្ធក្នុងការគាំទ្រ និងដោះស្រាយជីវភាពរស់នៅរបស់បងប្អូនអតីតយុទ្ធជន និងនិវត្តជន តាមរយៈការផ្តល់អំណោយ សម្ភារៈប្រើប្រាស់ និងការគាំពារសង្គមផ្សេងៗ។

លោក សោម ពិសិដ្ឋ អភិបាលខេត្តកែប បានអាននូវសារលិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសអបអរសាទរខួបលើកទី១៩ ទិវាអតីតយុទ្ធជន និងនិវត្តជនកម្ពុជា ដោយបានគូសបញ្ជាក់អំពីការយកចិត្តទុកដាក់របស់រាជរដ្ឋាភិបាលចំពោះអតីតយុទ្ធជន និងនិវត្តជន ដែលបានធ្វើពលិកម្មយ៉ាងធំធេងក្នុងបុព្វហេតុការពារជាតិ និងការកសាងសុខសន្តិភាពសម្រាប់ប្រទេសកម្ពុជា។

លោក សោម ពិសិដ្ឋ បានថ្លែងបន្ថែមថា វីរភាព និងការលះបង់របស់បងប្អូនអតីតយុទ្ធជន គឺជាគំរូដ៏ថ្លៃថ្លានៃស្មារតីស្នេហាជាតិ និងភាពអង់អាចក្លាហាន ដែលបានចូលរួមចំណែកយ៉ាងសំខាន់ក្នុងការការពារបូរណភាពទឹកដី ការស្តារ និងកសាងប្រទេសឱ្យមានសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យដូចសព្វថ្ងៃ។

លោក សោម ពិសិដ្ឋ ក៏បានជំរុញដល់អាជ្ញាធរគ្រប់លំដាប់ថ្នាក់ មន្ទីរ អង្គភាពពាក់ព័ន្ធ និងសប្បុរសជន សូមបន្តយកចិត្តទុកដាក់គាំទ្រ និងជួយដោះស្រាយជីវភាពរស់នៅរបស់បងប្អូនអតីតយុទ្ធជន និងនិវត្តជន ឱ្យកាន់តែប្រសើរឡើងបន្ថែម ស្របតាមគោលនយោបាយរបស់រាជរដ្ឋាភិបាល ដេីម្បីចូលរួមចំណែកលើកកម្ពស់កម្រិតជីវភាព និងសុខមាលភាពរបស់បងប្អូនអតីតយុទ្ធជន​អោយកាន់តែមានភាពល្អប្រសេីរឡើងបន្ថែមទៀត៕

អត្ថបទ៖ សឹង រ៉ាត់

The post លោក សោម ពិសិដ្ឋ៖ វីរភាព និងការលះបង់របស់អតីតយុទ្ធជន គឺជាគំរូដ៏ថ្លៃថ្លានៃស្មារតីស្នេហាជាតិ និងភាពអង់អាចក្លាហាន appeared first on Kampuchea Thmey Daily.

កាលពី​រសៀល​ថ្ងៃ​ទី ៦ ខែ​មីនា ឆ្នាំ ២០២៥ ម្សិលមិញ​នេះ លោក សោម ពិសិដ្ឋ អភិបាល​ខេត្ត​កែប មាន​ប្រសាសន៍​ថា តាមរយៈ​ការ​សាងសង់​បាន​នូវ​ហេដ្ឋារចនាសម្ព័ន្ធ ពិសេស​ផ្លូវថ្នល់ បាន​និង​កំពុង​ប្រែក្លាយ​តំបន់​បង្ហូរ​ឈាម​ក្នុង​សម័យ​ខ្មែរក្រហម​មួយ​នេះ ទៅ​ជា​កន្លែង​កសិ-ទេសចរណ៍​មួយ​ដ៏​ស្រស់​បំព្រង​ទាក់ទាញ​របស់​ខេត្ត​កែប។ បន្ថែម​នោះ ដើម្បី​ផ្តល់​នូវ​ភាព​ងាយស្រួល​ជូន​អ្នកទេសចរ​ជាតិ​-​អន្តរជាតិ ចូល​ទៅ​ទស្សនា​នៅ​តំបន់​ភ្នំ​វល្លិ៍ មន្ទីរ​សាធារណការ និង​ដឹក​ជញ្ជូន​ខេត្ត​កែប បាន​បើក​ការដ្ឋាន​ផ្លូវ ១ ខ្សែ ប្រភេទ DBST ជាមួយ​នឹង​សំណង់​សិល្បៈការ្យ ប្រវែង ១ ៥០០ ម៉ែត្រ ស្ថិត​នៅ​ភូមិ​អន្ទង់ស ឃុំ​ពងទឹក ស្រុក​ដំណាក់​ចង្អើរ ខេត្ត​កែប។

លោក សោម ពិសិដ្ឋ បាន​បន្ត​ថា តំបន់​ភ្នំ​វល្លិ៍​នេះ ពីមុន​ជា​តំបន់​សមរភូមិ​ក្តៅ​ហែកហួរ​ដោយ​សង្គ្រាម បង្ក​ដោយ​កម្លាំង​ខ្មែរក្រហម ប៉ុន្តែ​ដោយ​ការ​លះបង់​នូវ​សាច់​ស្រស់​ឈាម​ស្រស់​របស់ សម្តេច​អគ្គ​មហា​សេនា​បតី​តេ​ជោ ហ៊ុន សែន អតីត​នាយករដ្ឋមន្ត្រី នៃ​ព្រះរាជាណាចក្រ​កម្ពុជា ប្រកាន់​យក​នូវ​គោល​នយោបាយ​ឈ្នះ​ឈ្នះ បាន​ធ្វើ​ឲ្យ​តំបន់​ភ្នំ​វ​ល្លិ៍​នេះ មាន​សុខ​សុវត្ថិភាព សន្តិភាព​ពេញលេញ សំបូរ​សប្បាយ ប្រជាពលរដ្ឋ​មាន​ជីវភាព​ធូរធារ និង​មាន​ការ​អភិវឌ្ឍ​ជា​បន្តបន្ទាប់។

លោក​បាន​បន្ត​ថា បច្ចុប្បន្ន រាជរដ្ឋាភិបាល នីតិកាល​ទី ៧ នៃ​រដ្ឋសភា ក្រោម​ការ​ដឹកនាំ​របស់ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា បាន​ដាក់​ចេញ​នូវ​ផែនការ​យុទ្ធសាស្ត្រ​បញ្ចកោណ ដំណាក់កាល​ទី ១ ដើម្បី​ធ្វើការ​កែទម្រង់ និង​អភិវឌ្ឍន៍​ប្រទេសជាតិ ក្នុង​នោះ​ដែរ ការ​អភិវឌ្ឍ​នូវ​ហេដ្ឋារចនាសម្ព័ន្ធ​ផ្លូវថ្នល់ ក៏​ជា​កិច្ច​ការងារ​ស្នូល​យុទ្ធសាស្ត្រ​ដ៏​សំខាន់ ដើម្បី​ឆ្លើយ​តប​ទៅ​នឹង​តម្រូវការ​អភិវឌ្ឍន៍​ខេត្ត​ទេសចរណ៍​តំបន់​ឆ្នេរ ដោយ​ធានា​ឲ្យ​បាន​នូវ​សណ្ដាប់ធ្នាប់ របៀប​រៀបរយ និង​លើក​កម្ពស់​សោភណភាព​ខេត្ត។

លោក​បញ្ជាក់​ថា ផ្លូវ ១ ខ្សែ ខាង​លើ​នេះ នៅ​ពេល​សាងសង់​រួច នឹង​ផ្ដល់​ប្រយោជន៍​ជូន​ប្រជាពលរដ្ឋ​ក្នុង​ការ​ធ្វើដំណើរ​ទៅកាន់​មន្ទីរពេទ្យ សាលារៀន និង​ការ​ដឹកជញ្ជូន​ដំណាំ​កសិកម្ម​ផ្សេងៗ ពិសេស​នោះ​គឺជា​ចំណង​ហេដ្ឋារចនាសម្ព័ន្ធ​មួយ​ដែល​ទាក់ទាញ​ភ្ញៀវ​ទេសចរ​ឲ្យ​ធ្វើ​ដំណើរ​មក​លេង​កម្សាន្ត​តំបន់​ទេសចរណ៍​ខេត្ត​កែប តំបន់​អេកូ​ទេសចរណ៍​ភ្នំ​វ​ល្លិ៍ និង​តំបន់​កសិ-ឧស្សាហកម្ម ដែល​មាន​សក្ដានុពល។ ជាមួយ​នេះ ផ្លូវ​នេះ បាន​ជួយ​ពង្រីក​មុខព្រួញ​វិស័យ​ដទៃ​ទៀត​ក្នុង​ការ​រួមចំណែក​អភិវឌ្ឍន៍​ខេត្ត​បន្ថែម​ផង​ដែរ។

ដោយឡែក​បើ​តាម​របាយការណ៍​របស់ លោក ម៉ម ទូច ប្រធាន​មន្ទីរ​សាធារណការ និង​ដឹកជញ្ជូន​ខេត្ត​កែប បាន​ឲ្យ​ដឹង​ថា ការដ្ឋាន​ផ្លូវ​ខេត្ត​លេខ ១៣ ៣៣ ប្រវែង ១ ៥០០ ម៉ែត្រ​នេះ មាន​ទទឹង ចាក់​កៅស៊ូ ៧ ម៉ែត្រ ចិញ្ចើមថ្នល់​ជា​ដី​ល្បាយ​ថ្ម ប្រវែង ១,៥ ម៉ែត្រ​សងខាង រួម​ទាំង​សាងសង់​លូ​តាម​បណ្ដោយ​ផ្លូវ​មុខកាត់ ១ ម៉ែត្រ ចំនួន ១ ជួរ ប្រវែង ១៦ ម៉ែត្រ ចំនួន ៤ កន្លែង។

ចំពោះ​កំណាត់​ផ្លូវ​ខេត្ត​លេខ ១៣ ៣៣ មាន​ប្រវែង​សរុប ១១ គីឡូម៉ែត្រ បំបែក​ចាប់ពី​ផ្លូវជាតិ​លេខ ៣៣ ត្រង់​ចំណុច​គីឡូម៉ែត្រ លេខ ១២+២០០ ខាងកើត​វិទ្យាល័យ ហ៊ុន សែន ចំការ​ដូង និង​បញ្ចប់​នៅ​ត្រង់​ចំណុច​ភូមិ​ចំការ​ចេក​ខេត្ត​កែប និង​ត​ភ្ជាប់​ទៅ​នឹង​ឃុំ​ដំណាក់​កន្ទួត​ខាង​ត្បូង​ស្រុក​កំពង់ត្រាច ខេត្ត​កំពត៕

អត្ថបទ ៖ សឹង រ៉ាត់

The post ភ្នំវល្លិ៍ ជាតំបន់បង្ហូរឈាមសម័យសង្គ្រាម កំពុងក្លាយជាទីឋានកសិ-ទេសចរណ៍ ដ៏ស្រស់ស្អាត នាសម័យសន្តិភាព appeared first on Kampuchea Thmey Daily.

លោក​ សោម ពិសិដ្ឋ ​បាន​លើក​ឡើង​ថា ខេត្ត​កែប​មាន​ស្មៅ​សមុទ្រ​ជិត ៣​ ពាន់​ហិកតា ដែល​ជាកន្លែង​ក្តាមពងកូន​​ជ្រក​និង​ស៊ី​​ជា​ចំណី។

ខណៈដែល​ក្តាម​ខេត្ត​កែប​ជា​អាហារ​សមុទ្រ​ ​ដែល​ទេសចរ​ភាគច្រើន​មិន​អាចរំលង​បាន ​អភិបាល​ខេត្ត​កែប​ក៏​បាន​បញ្ជាក់ពីការ​បង្កើត​​ធនាគារ​ក្តាម ដែល​បាន​រួមចំណែក​​ក្នុង​ការបង្កើន​ការផ្កត់ផ្កង់​​បរិមាណ​ក្តាម សម្រាប់​បំពេញតម្រូវ​ការ​​ប្រចាំថ្ងៃ។

បើតាមលោកអភិបាល​ខេត្ត​ ធនគារ​ក្តាម​​ជា​កន្លែង​ស្តុក​ក្តាម​ពង។ នៅ​ពេល​​ដែល​​សហគមន៍​នេសាទ​បាន​​​ក្តាម​ពង​ តម្រូវ​ឱ្យ​យក​មក​រក្សា​ទុក​នៅក្នុង​​ធនាគារ​ក្តាម (បែរ) ដើម្បីជម្រុះ​ទម្លាក់ពងមុន​លែង​ចូល​សមុទ្រ​វិញ​៕

The post អភិបាល​ខេត្តកែប៖ ក្តាម​សេះ​ខេត្ត​កែប​មាន​រសជាតិ​​ឆ្ងាញ់ ដោយសារ​មាន​ស្មៅ​សមុទ្រ​ជា​ចំណី​ពិសេស appeared first on Kampuchea Thmey Daily.

ខេត្ត​កែប​ជា​ខេត្ត​គោលដៅខេត្ត​ជាប់​សមុទ្រ​​ដ៏​ទាក់ទាញ​មួយ ខណៈ​ដែល​ខេត្ត​ដ៏​តូច​ច្រឡឹង​នេះ​​មាន​ឆ្នេរ​សមុទ្រ​ជាប់​ដីគោក​ប្រវែង ២៧ គីឡូម៉ែត្រ លាត​សន្ធឹង​ទៅដល់ព្រំប្រទល់ព្រែកចាក​ខេត្តកំពត។ ។

​លោក សោម ពិសិដ្ឋ​ បាន​ឲ្យ​ដឹង​ថា បច្ចុប្បន្ននេះ​ ខេត្ត​កែប​មានឆ្នេរ​កម្សាន្ត​ចំនួន​ ៣ កន្លែង​ មាន​​ប្រវែងយ៉ាង​តិចណាស់ ៦ ០០០ ម៉ែត្រ ខណៈ​​កន្លងទៅមានឆ្នេរកម្សាន្ត​តែមួយ​កន្លែង​មានប្រវែង​ត្រឹមតែ ៥០០ ម៉ែត្រ សម្រាប់​ទេសចរ​មក​កម្សាន្ត​។

ឆ្នេរ​កម្សាន្ត​ទាំង ៣ កន្លែង​នៅក្នុង​ខេត្ត​កែប ​ដែលភ្ញៀវ​ទេសចរ​អាចមកអង្គុយ​សម្រាក​លំហែ​ ស្រូបយក​ខ្យល់អាកាស​បរិសុទ្ធ​ ញាំ​អាហារ លេង​ទឹក​ជាដើម មាន​ឆ្នេរ​ស្រី​ស ដែល​មាន​ប្រវែង​ជាង ៥០០ ម៉ែត្រ ឆ្នេរ​អង្កោល​ដែល​មាន​ប្រវែង​​ជាង ៣ ០០០ ម៉ែត្រ និង​ឆ្នេរ​តេជោ​សន្តិភាព​កែប ដែល​កំពុង​អភិវឌ្ឍ​ជា​ឆ្នេរ​ប្រណិត​កម្រិត​ខ្ពស់​មាន​ប្រវែង ២ ៧០០ ម៉ែត្រ។

ខេត្តកែបគឺជាខេត្តក្នុងតំបន់ឆ្នេរ ដែលមានលក្ខខណ្ឌ​អំណោយផល និងសក្តានុពល​ពីធម្មជាតិសម្រាប់​ការអភិវឌ្ឍវិស័យ​ទេសចរណ៍ ជាពិសេស ទេសចរណ៍​ធម្មជាតិ និង​ទេសចរណ៍​វប្បធម៌​ជាដើម។

បើ​តាម​​គណៈកម្មាធិការ​ជាតិ​គ្រប់គ្រង​ និង​អភិវឌ្ឍ​តំបន់​ឆ្នេរ​សមុទ្រ​កម្ពុជា ឆ្នេរ​សមុទ្រ​ខេត្ត​កែប​ចែក​ចេញ​ជា ៥ ប្រភេទក្នុង​នោះ​មាន៖

-ឆ្នេរខ្សាច់ ប្រវែង​ប្រមាណ ២,២២ គីឡូម៉ែត្រ មានចំនួន ៦ ទីតាំង
-ឆ្នេរ​ថ្ម ប្រវែងប្រមាណ ១១,៤២ គីឡូម៉ែត្រ មានចំនួន ៦ ទីតាំង
-ឆ្នេរ​ភក់ ប្រវែងប្រមាណ ៦,៧៦ គីឡូម៉ែត្រ មានចំនួន ៣ ទីតាំង
-ឆ្នេរ​ព្រៃកោងកាង ប្រវែងប្រមាណ ៦,៣៣ គីឡូម៉ែត្រ មានចំនួន ១០ ទីតាំង
-ឆ្នេរ​ផ្សេងៗ ប្រវែង​ប្រមាណ ០,៤០ គីឡូម៉ែត្រ មានចំនួន ១១ ទីតាំង។

រាជរដ្ឋាភិបាល​បាន​រៀបចំ​ប្លង់​គោល​ចក្ខុវិស័យ​ឆ្នាំ ២០៣០ រៀបចំ​និងអភិវឌ្ឍ “ក្រុងកែប​ជា​ទីក្រុង​ទំនើប​ មាន​ខ្យល់​អាកាស​ធម្មជាតិ​បរិសុទ្ធ សម្រាប់​ការ​ស្នាក់​នៅ ប្រកប​ការងារ និង ទេសចរណ៍ ​ជា​បុរី​លំនៅឋាន​ស្ងប់ស្ងាត់ ដែល​មាន​ហេដ្ឋារចនាសម្ព័ន្ធ​ សេវាកម្ម និង​គុណភាព​បរិស្ថាន​រស់នៅ​បៃតង​ធម្មជាតិ​ល្អ​ប្រណីត ប្រកប​ដោយ​សុភមង្គល​ និងជាតំបន់​​ឆ្នេរសមុទ្រ​ដែល​ស្អាត​បំផុត​លើ​សកលលោក ​ដែល​ភ្ញៀវ​ទេសចរ​ជាតិ និង​អន្តរជាតិ​អាច​មក​សម្រាក​លម្លែ​កម្សាន្ត​គ្រប់​រដូវកាល៕

The post ខេត្ត​កែប​មាន​ឆ្នេរ​​កម្សាន្ត​យ៉ាង​ហោច​ណាស់ ៣ កន្លែង សម្រាប់​ភ្ញៀវ​ទេសចរ​សម្រាក​លំហែ appeared first on Kampuchea Thmey Daily.

លោក​ សោម ពិសិដ្ឋ​ អភិបាល​នៃ​គណៈ​អភិបាល​ខេត្ត​កែប​បាន​ថ្លែង​ថា ជា​ទស្សនវិស័យ​របស់​រដ្ឋបាល​ខេត្ត​គឺ​ជំរុញ​យ៉ាង​ណា​ឲ្យ​ភ្ញៀវ​ទេសចរ​ជាតិ​និង​អន្តរជាតិ ស្នាក់នៅ​ឲ្យ​បាន​យ៉ាង​ហោច​ណាស់​មួយ​យប់ តាម​រយៈ​ការ​បង្កើត​និង​រៀបចំ​គោលដៅ​ទេសចរ​ថ្មីៗ​បន្ថែម​ទៀត។

​ផែនការ​​​ទាក់ទាញ​ទេសចរមកកម្សាន្ត​​ក្នុង​ខេត្ត​ មក​ដើរ​កម្សាន្ត​និង​ស្នាក់​នៅ​ឲ្យ​បាន​យូរ​ដូចជា ការ​រៀបចំ​គោលដៅ​ទេសចរ​នៅ​តាម​បណ្តា​កោះ ការ​អភិវឌ្ឍនៅ​តាម​ឆ្នេរ តំបន់​ភ្នំ និង​តាម​រមណីយដ្ឋាន​ទេសចរ​ផ្សេង​ទៀត។

បើ​តាម​លោក សោម ពិសិដ្ឋ​ ដើម្បី​លើកទឹកចិត្ត​ឲ្យ​ភ្ញៀវ​ទេសចរ​បន្ត​ស្នាក់នៅ​ឲ្យ​បាន​យូរ​ អាជ្ញាធរ​ក៏​នឹង​រៀបចំ​ជា​កញ្ចប់​ដល់​ភ្ញៀវទេសចរ​។

«ការ​រៀបចំ​កញ្ចប់​ទេសចរ​នេះ តើ​ការ​ស្នាក់នៅ​របស់​ភ្ញៀវ​ទេសចរ​នៅ​ក្នុង​ខេត្ត​កែប​អាច​ធ្វើ​អ្វី​ខ្លះ​ ឬ​ត្រឹម​មក​ទទួល​បាយ​តាម​មាត់​ឆ្នេរ តាម​ដង​ផ្លូវ។ ភ្ញៀវ​ទេសចរ​អាច​ទៅ​កម្សាន្ត​នៅ​តាម​កោះ ជិះ​ទូក​ស្ទូចត្រី ជិះ​ខ្សែរ៉ក មុជ​ទឹក​មើល​ផ្កា​ថ្ម ដែល​យ៉ាង​ហោច​ណាស់​អាច​ឲ្យ​ភ្ញៀវ​ស្នាក់នៅ​បាន​មួយ​យប់​ដែរ»។

ពាក់ព័ន្ធ​ការ​ចំណាយ​របស់​ភ្ញៀវ​ទេសចរ​មក​កម្សាន្ត​ក្នុង​ខេត្ត​កែប លោក សោម ពិសិដ្ឋ បាន​បញ្ជាក់​ថា មិន​ទាន់​មានការ​សិក្សា​ជាក់​លាក់​នោះ​ទេ ប៉ុន្តែ​អ្វី​ដែល​ទេសចរ​មក​កម្សាន្ត​ខេត្ត​កែប​ភាគច្រើន​បច្ចុប្បន្ន​ត្រឹម​តែ​មក​ហូប​ចុក និងដើរ​កម្សាន្ត​​តិចតួច​តាមឆ្នេរ​។

កែប​បាន​ក្លាយ​ជា​ផ្ទះ​ស្នាក់នៅ​ទី​ពីរ​របស់​សាធារណជន​ទាំង​ទេសចរ​ជាតិ​និង​អន្តរជាតិ។ ​បើ​តាម​ការ​សិក្សា​ពី​អ្នក​ជំនាញ​ កែប​ជា​ទីឋាន​សម្រាប់​ទេសចរ​ដែល​ត្រូវ​ការ​បរិយាកាស​ធម្មជាតិ​ ជាមួយ​ខ្យល់​អុកស៊ីហ្សែន​ដែល​អាច​ជួយ​ព្យាបាល​ដល់​សួត​និង​ដង្ហើម​បាន​យ៉ាង​ល្អ៕

The post អាជ្ញាធរ​ខេត្ត​កែប រៀបចំ​ផែនការជំរុញភ្ញៀវទេសចរស្នាក់នៅកម្សាន្ត​ឲ្យបានយូរថ្ងៃ appeared first on Kampuchea Thmey Daily.

លោក សោម ពិសិដ្ឋ អភិបាល​នៃ​គណៈ​អភិបាល​ខេត្ត​កែប​បាន​បញ្ជាក់​បន្ថែម​​ពី​គម្រោង​អភិវឌ្ឍ​ផ្សារ​ក្តាមនៅ​ខេត្តកែប ក្នុង​បទ​សម្ភាស​ជាមួយ​ក្រុម​អ្នក​សារព័ត៌មាន ​នៅ​ក្នុង​ពិធី​បើក​ការដ្ឋាន​សាងសង់​ឆ្នេរ​តេជោ​សន្តិភាព​ខេត្ត​កែប​កាល​ពី​សប្តាហ៍​មុន​នេះ។

​

ផ្តល់​បទ​សម្ភាសន៍​ដល់​អ្នក​សារព័ត៌មាន អភិបាល​ខេត្ត​កែប​បាន​បញ្ជាក់ថា គម្រោង​នេះបាន​ទទួល​ការ​អនុម័ត​រួច​រាល់​ពី​រដ្ឋាភិបាល​ក្នុង​ការ​ផ្តល់​សិទ្ធិ​ដល់​វិស័យ​ឯកជន ដើម្បី​រៀបចំ​កែប្រែ​មុខមាត់​ផ្សារ​ក្ដាម​ឲ្យ​មាន​សោភ័ណភាព​ស្រស់​ស្អាត សណ្ដាប់ធ្នាប់ របៀបរៀបរយ និង​អនាម័យ​បរិស្ថាន​ល្អ។

​«បច្ចុប្បន្ន​ក្រុម​ហ៊ុន​កំពុង​រៀបចំ​ផែនការ​មេ និង​រៀបចំ​ទីតាំង នៅ​សល់​តែ​កិច្ចការ​មួយ​ចំនួន​តូច​ទៀត​ដែល​នឹង​បញ្ចប់​នៅ​ពេល​​ខាងមុខ ខណៈ​អាជ្ញាធរ​ខេត្ត​កំពុង​ជំរុញ​ឲ្យ​វិនិយោគិន​ឲ្យ​អនុវត្ត​ទៅ​តាម​ផែនការ»។ នេះបើតាមលោក សោម ពិសិដ្ឋ។

​អភិបាល​ខេត្តបានបន្តទៀត​ថា គម្រោង​អភិវឌ្ឍ​ផ្សារ​ក្តាម​ ក៏ដើរ​​ទន្ទឹម​គ្នា​គម្រោង​អភិវឌ្ឍ​ឆ្នេរ​តេជោ​សន្តិភាព​កែប ដែល​បាន​បើក​ការដ្ឋាន​សាងសង់ហើយ​គ្រោង​បញ្ចប់​ក្នុង​រយៈពេល ២ ឆ្នាំ​ទៀត​នេះ។

​

ខេត្ត​កែប​ត្រូវ​បាន​រដ្ឋាភិបាល​ បាន​ដាក់​ចេញ​ផែនការ​អភិវឌ្ឍ​ជា​គោលដៅ​ទេសចរណ៍​ធម្មជាតិ ស្ងប់ស្ងាត់ ប្រណីត​កម្រិតខ្ពស់ ប្រកប​ដោយ​ភាព​ទាក់ទាញ ខណៈ​ខេត្ត​ដែលមានឆ្នេរ​សមុទ្រ​​ប្រវែង​ ២៧ គីឡូម៉ែត្រ រដ្ឋាភិបាល​ក៏កំពុង​អភិវឌ្ឍ​ឆ្នេរ​ប្រណិត​​កម្រិតខ្ពស់​ថ្មី​មានប្រវែង ២៧០០ ម៉ែត្រ ដើម្បី​កែប្រែមុខមាត់​ខេត្ត​ជាប់​សមុទ្រ​នេះ ជាគោលដៅ​ទាក់ទាញ​ទេសចរ​មក​កម្សាន្ត​​បន្ថែម​ទៀត៕

បន្ត​ចុចអាន៖ ត្រឹម​ឆ្នាំ ២០២២​ អត្រា​ភាព​ក្រីក្រ​ពលរដ្ឋ​ខេត្ត​កែប​មាន​ត្រឹម ២.៦១ ភាគរយ

The post ផ្សារ​ក្តាម​ខេត្តកែប ទទួល​បាន​ការ​សម្រេច​វិនិយោគ​​ អភិវឌ្ឍ​​កែប្រែ​មុខមាត់​ថ្មី​ឡើង​វិញ appeared first on Kampuchea Thmey Daily.

លោក សោម ពិសិដ្ឋ អភិបាល​ខេត្ត​កែប​បាន​គូស​បញ្ជាក់​ថា រឿង​តម្លៃ​ម្ហូប​​អាហារ​​នេះ​​ ​កើតឡើង​ពី​ការ​ឆ្លៀត​ឱកាស​​របស់​អាជីវករ​មួយ​ចំនួន ហើយ​ក៏​មាន​ពាក់ព័ន្ធ​ជន​ឆ្លៀត​ឱកាស​មួយ​ចំនួន​ពី​ខាង​ក្រៅ​ផង​ដែរ។

លោក​លើកឡើងយ៉ាងដូច្នេះ​​ថា «ពិតជា​មាន​អាជីវករ​ខ្លះ​​បាន​ឆ្លៀតឱកាស ដើម្បី​កេងប្រវ័ញ្ច​ពីភ្ញៀវទេសចរ ប៉ុន្តែ​ក៏​មានពាក់ព័ន្ធ​​អាជីវករ​ចល័ត​ពី​ខាងក្រៅ​ដែល​លក់​​កួកជេ​ម្ហូប នៅក្នុង​ឱកាសថ្ងៃឈប់​សម្រាក​ឬ​មាន​​បុណ្យ​ទាន​ដែល​មាន​ទេសចរ​បុក​មក​លេង​ច្រើន»។

បន្ថែមពីការ​ពន្យល់​ហេតុផលខាងលើ លោក​អភិបាល​ខេត្តក៏​បាន​ស្នើ​ឲ្យ​អ្នកទេសចរ​គួរ​​ជជែក​ពី​តម្លៃ​ឲ្យបាន​​មុន ចរចា​គ្នា​ចៀសវាង​​កើតមាន​​បញ្ហា​ ខណៈ​ដែល​លោក​មើល​ឃើញ​ជាទូទៅ​ថា នៅតំបន់​ទេសចរណ៍​ចៀសមិន​ផុតទេ តម្លៃ​អាច​ថ្លៃបន្តិច​។

លោក​អះអាង​ថា គ្រឿង​សមុទ្រ​នៅខេត្តកែប​ភាគ​ច្រើន​រក​បាន​ដោយ​ធម្មជាតិមិន​សូវ​​នាំ​ចូល​ទេ ហើយ​​ថ្ងៃបុណ្យទាន​កាល​ណា​​​មាន​តម្រូវការខ្ពស់ ​ធ្វើឲ្យទំនិញ​ឡើង​ថ្លៃ។

យ៉ាងណាមិញ បើតាមលោកអភិបាល​ខេត្ត​ អាជ្ញាធរ​ក៏​បាន​រៀបចំ​យន្តការ​ត្រួត​ពិនិត្យ ដោយ​មាន​ការ​ចូលរួម​ពី​អ្នក​ពាក់ព័ន្ធ​ដើម្បី​តាម​ដាន​ត្រួត​ពិនិត្យ​ជា​ប្រចាំ លើការ​​គ្រប់គ្រង​តម្លៃម្ហូប​អាហារ​ឲ្យ​បាន​សមរម្យ ​ដើម្បី​ការពារ​​ផល​ប្រយោជន៍​ទាំង​​អាជីវករ​លក់ដូរ​ផង​ និងទេសចរ​​មក​កម្សាន្ត​ផង​៕

The post រឿងអាជីវករលក់​ម្ហូបកាប់ថ្លៃនៅខេត្តកែប អភិបាល​​ខេត្តលើកមូលហេតុ​បន្ថែម និង​វិធានការ​ដោះស្រាយ appeared first on Kampuchea Thmey Daily.

គម្រោង​អភិវឌ្ឍ​​រមណីយដ្ឋាន​ឆ្នេរ​ខ្សាច់​កម្សាន្ត​សាធារណៈ​កម្រិត​ខ្ពស់ «ឆ្នេរតេជោសន្តិភាពកែប» ​ធ្វើ​ឡើង​ក្រោម​ទម្រង់នៃកិច្ចសន្យាអភិវឌ្ឍន៍​រួម​គ្នា​រវាង​រដ្ឋ និង​ឯកជន ក្នុង​គោលដៅ​កែលម្អ និង​បង្កើត​ឆ្នេរ​ខ្សាច់​កម្សាន្ត​សាធារណៈ​ដ៏​ប្រណិត​សម្រាប់​​បម្រើ​ការ​កម្សាន្ត​របស់​ភ្ញៀវ​ទេសចរ​ជាតិ​និង​អន្តរជាតិ​មក​ទស្សនា​ខេត្ត​កែប។ នេះ​បើ​តាម​លោក សោម ពិសិដ្ឋ អភិបាល​នៃ​គណៈ​អភិបាល​ខេត្ត​កែប ផ្តល់បទ​​សម្ភាសន៍​ដល់​អ្នក​សារព័ត៌មាន ក្នុង​ឱកាស​ចូលរួម​បើក​ការដ្ឋាន​សាងសង់ «ឆ្នេរ​តេជោ​សន្តិភាព​កែប»។

ការ​អភិវឌ្ឍ​ឆ្នេរ​ប្រណិត​កម្រិត​ខ្ពស់​​នៅ​ខេត្ត​កែប គ្រោង​ប្រើប្រាស់​រយៈពេល ២ ឆ្នាំលើ​ឆ្នេរ​ប្រវែង ២៧០០ ម៉ែត្រ។​ បើ​តាម​លោក​អភិបាល​ខេត្ត តាម​គម្រូ​ប្លង់​មេ ឆ្នេរ​កម្សាន្ត​ខេត្ត​កែប​ដែល​​បើក​ការដ្ឋាន​សាងសង់​នៅ​ពេល​នេះ​ ចាត់​ទុក​ជា​គម្រោង​អភិវឌ្ឍ​ឆ្នេរ​ដ៏​ប្រណិត​ដំបូង​គេ​ក្នុង​ប្រទេស​កម្ពុជា។ តាម​រយៈ​គម្រោង​អភិវឌ្ឍ​ឆ្នេរ​កម្សាន្ត​ថ្មី​នេះ នឹង​ជួយ​លើក​កម្ពស់​មុខមាត់​ខេត្ត​កែប ក៏​ដូចជា​ទាក់ទាញ​ទេសចរ​មក​កម្សាន្ត​ខេត្ត​កែប​កាន់តែ​ច្រើន​ថែម​ទៀត។

យ៉ាងណា ពាក់ព័ន្ធ​គម្រោង​អភិវឌ្ឍ​ឆ្នេរ​កម្សាន្ត​ថ្មី​នៅ​ខេត្ត​កែប​ អភិបាល​ខេត្តកែប​មិន​បាន​បង្ហើប​តម្លៃ​នៃ​ការ​ចំណាយ​ដោយ​លោក​​គ្រាន់​តែ​បញ្ជាក់ថា​ថវិកា​យក​មក​អភិវឌ្ឍ​ឆ្នេរ​ប្រណិត​នេះ បាន​មក​ពី​​ម្ចាស់​ក្បាល​ដី​ចូលរួម​ជាមួយ​រដ្ឋ​ដោយ​​មិន​មាន​ការ​វិនិយោគ​ពី​វិស័យ​ឯកជន​ណា​នោះ​ទេ។

បើ​តាម​​ប្លង់មេ គម្រោង​​​អភិវឌ្ឍន៍រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់នៅ​ខេត្ត​កែប​ មាន​ប្រវែង ២ ៧០០ ម៉ែត្រ ចាប់ពីផ្សារ​ក្ដាមទៅដល់ព្រៃកោងកាង ស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប ក្នុងនោះ​ការ​សាងសង់​ឆ្នេរខ្សាច់កម្សាន្តសាធារណៈកម្រិតខ្ពស់​នេះ មានទទឹងយ៉ាងតិចប្រវែង ៣០ ម៉ែត្រ។ ក្នុង​គម្រោង​ក៏​មាន​ការ​សាងសង់​សួនច្បារសាធារណៈ ​និង​ការ​ដាំដើមឈើ​នៅលើ​ដីចំណីឆ្នេរសមុទ្រ​មាន​ទទឹង​ ៥០ ម៉ែត្រ។

គម្រោង​អភិវឌ្ឍឆ្នេរ​នេះ មានការ​ស្ថាបនា​​វិថី និងអនុវិថីចូលឆ្នេរសមុទ្រចំនួន ៥ ខ្សែ ​រួមមាន​ការ​រៀបចំ​ផ្លូវ​ថ្មើរជើង ផ្លូវថ្មើរ​ជើង​សម្រាប់​ជនមានពិការភ្នែក ផ្លូវជិះកង់ និងរង្វង់មូលគយគន់ទេសភាពចំនួន ២ កន្លែង។ រង្វង់មូលទី១ មានអង្កត់ផ្ចិតប្រវែង ៩៩ ម៉ែត្រស្ថិតនៅចុងវិថីចូលឆ្នេរសមុទ្រទី១ ដែល​គ្រោង​តម្កល់នូវរូបចម្លាក់លោកយាយជំទាវម៉ៅក្នុងទម្រង់មេទ័ពជាញជ័យ។ រីឯរង្វង់មូលទី ២ មាន​អង្កត់ផ្ចិត​ប្រវែង ៩៩ ម៉ែត្រ ស្ថិតនៅចុងវិថីចូលឆ្នេរសមុទ្រទី២ គ្រោងរក្សាទុក​ជាលម្អសាធារណៈ​សម្រាប់ប្រារព្ធពិធីបុណ្យនិងពិព័រណ៍នានា។

គម្រោង​អភិវឌ្ឍ​ឆ្នេរ​​ខ្សាច់កម្សាន្តសាធារណៈកម្រិតខ្ពស់នៅ​ខេត្ត​កែប​ តាម​ផែនការ​នឹង​បញ្ចប់​នៅ​ឆ្នាំ ២០២៧៕

The post ឆ្នេរ​ប្រណិត​ដំបូង​គេ​នៅ​ខេត្ត​កែប ​ចាប់ផ្តើម​​​បើក​ការដ្ឋាន​សាងសង់​ គ្រោង​ប្រើប្រាស់​ពេល​ពីរ​ឆ្នាំ​បញ្ចប់​​គម្រោង​អភិវឌ្ឍ appeared first on Kampuchea Thmey Daily.