ព័ត៌មានជាតិ

ភ្នំវល្លិ៍ ជាតំបន់បង្ហូរឈាមសម័យសង្គ្រាម កំពុងក្លាយជាទីឋានកសិ-ទេសចរណ៍ ដ៏ស្រស់ស្អាត នាសម័យសន្តិភាព

បានផុស

១ year មុន

នៅ

ថ្ងៃសុក្រ ៧ មីនា ២០២៥

ដោយ

ភ្នំវល្លិ៍ ដែលជាតំបន់បង្ហូរឈាមក្នុងសម័យសង្គ្រាម បាននិងកំពុងក្លាយជាទីឋានកសិ-ទេសចរណ៍ ដ៏ស្រស់ស្អាត និង ទាក់ទាញ នាសម័យសន្តិភាពបច្ចុប្បន្ន។

កាលពីរសៀលថ្ងៃទី ៦ ខែមីនា ឆ្នាំ ២០២៥ ម្សិលមិញនេះ លោក សោម ពិសិដ្ឋ អភិបាលខេត្តកែប មានប្រសាសន៍ថា តាមរយៈការសាងសង់បាននូវហេដ្ឋារចនាសម្ព័ន្ធ ពិសេសផ្លូវថ្នល់ បាននិងកំពុងប្រែក្លាយតំបន់បង្ហូរឈាមក្នុងសម័យខ្មែរក្រហមមួយនេះ ទៅជាកន្លែងកសិ-ទេសចរណ៍មួយដ៏ស្រស់បំព្រងទាក់ទាញរបស់ខេត្តកែប។ បន្ថែមនោះ ដើម្បីផ្តល់នូវភាពងាយស្រួលជូនអ្នកទេសចរជាតិ-អន្តរជាតិ ចូលទៅទស្សនានៅតំបន់ភ្នំវល្លិ៍ មន្ទីរសាធារណការ និងដឹកជញ្ជូនខេត្តកែប បានបើកការដ្ឋានផ្លូវ ១ ខ្សែ ប្រភេទ DBST ជាមួយនឹងសំណង់សិល្បៈការ្យ ប្រវែង ១ ៥០០ ម៉ែត្រ ស្ថិតនៅភូមិអន្ទង់ស ឃុំពងទឹក ស្រុកដំណាក់ចង្អើរ ខេត្តកែប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ពិសិដ្ឋ បានបន្តថា តំបន់ភ្នំវល្លិ៍នេះ ពីមុនជាតំបន់សមរភូមិក្តៅហែកហួរដោយសង្គ្រាម បង្កដោយកម្លាំងខ្មែរក្រហម ប៉ុន្តែដោយការលះបង់នូវសាច់ស្រស់ឈាមស្រស់របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា ប្រកាន់យកនូវគោលនយោបាយឈ្នះឈ្នះ បានធ្វើឲ្យតំបន់ភ្នំវល្លិ៍នេះ មានសុខសុវត្ថិភាព សន្តិភាពពេញលេញ សំបូរសប្បាយ ប្រជាពលរដ្ឋមានជីវភាពធូរធារ និងមានការអភិវឌ្ឍជាបន្តបន្ទាប់។

លោកបានបន្តថា បច្ចុប្បន្ន រាជរដ្ឋាភិបាល នីតិកាលទី ៧ នៃរដ្ឋសភា ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញនូវផែនការយុទ្ធសាស្ត្របញ្ចកោណ ដំណាក់កាលទី ១ ដើម្បីធ្វើការកែទម្រង់ និងអភិវឌ្ឍន៍ប្រទេសជាតិ ក្នុងនោះដែរ ការអភិវឌ្ឍនូវហេដ្ឋារចនាសម្ព័ន្ធផ្លូវថ្នល់ ក៏ជាកិច្ចការងារស្នូលយុទ្ធសាស្ត្រដ៏សំខាន់ ដើម្បីឆ្លើយតបទៅនឹងតម្រូវការអភិវឌ្ឍន៍ខេត្តទេសចរណ៍តំបន់ឆ្នេរ ដោយធានាឲ្យបាននូវសណ្ដាប់ធ្នាប់ របៀបរៀបរយ និងលើកកម្ពស់សោភណភាពខេត្ត។

លោកបញ្ជាក់ថា ផ្លូវ ១ ខ្សែ ខាងលើនេះ នៅពេលសាងសង់រួច នឹងផ្ដល់ប្រយោជន៍ជូនប្រជាពលរដ្ឋក្នុងការធ្វើដំណើរទៅកាន់មន្ទីរពេទ្យ សាលារៀន និងការដឹកជញ្ជូនដំណាំកសិកម្មផ្សេងៗ ពិសេសនោះគឺជាចំណងហេដ្ឋារចនាសម្ព័ន្ធមួយដែលទាក់ទាញភ្ញៀវទេសចរឲ្យធ្វើដំណើរមកលេងកម្សាន្តតំបន់ទេសចរណ៍ខេត្តកែប តំបន់អេកូទេសចរណ៍ភ្នំវល្លិ៍ និងតំបន់កសិ-ឧស្សាហកម្ម ដែលមានសក្ដានុពល។ ជាមួយនេះ ផ្លូវនេះ បានជួយពង្រីកមុខព្រួញវិស័យដទៃទៀតក្នុងការរួមចំណែកអភិវឌ្ឍន៍ខេត្តបន្ថែមផងដែរ។

ដោយឡែកបើតាមរបាយការណ៍របស់ លោក ម៉ម ទូច ប្រធានមន្ទីរសាធារណការ និងដឹកជញ្ជូនខេត្តកែប បានឲ្យដឹងថា ការដ្ឋានផ្លូវខេត្តលេខ ១៣ ៣៣ ប្រវែង ១ ៥០០ ម៉ែត្រនេះ មានទទឹង ចាក់កៅស៊ូ ៧ ម៉ែត្រ ចិញ្ចើមថ្នល់ជាដីល្បាយថ្ម ប្រវែង ១,៥ ម៉ែត្រសងខាង រួមទាំងសាងសង់លូតាមបណ្ដោយផ្លូវមុខកាត់ ១ ម៉ែត្រ ចំនួន ១ ជួរ ប្រវែង ១៦ ម៉ែត្រ ចំនួន ៤ កន្លែង។

ចំពោះកំណាត់ផ្លូវខេត្តលេខ ១៣ ៣៣ មានប្រវែងសរុប ១១ គីឡូម៉ែត្រ បំបែកចាប់ពីផ្លូវជាតិលេខ ៣៣ ត្រង់ចំណុចគីឡូម៉ែត្រ លេខ ១២+២០០ ខាងកើតវិទ្យាល័យ ហ៊ុន សែន ចំការដូង និងបញ្ចប់នៅត្រង់ចំណុចភូមិចំការចេកខេត្តកែប និងតភ្ជាប់ទៅនឹងឃុំដំណាក់កន្ទួតខាងត្បូងស្រុកកំពង់ត្រាច ខេត្តកំពត៕

អត្ថបទ ៖ សឹង រ៉ាត់