ព័ត៌មានជាតិ

ផ្សារក្តាមខេត្តកែប ទទួលបានការសម្រេចវិនិយោគ អភិវឌ្ឍកែប្រែមុខមាត់ថ្មីឡើងវិញ

បានផុស

៦ ខែ មុន

នៅ

ថ្ងៃអង្គារ ២៨ មករា ២០២៥

ដោយ

ផ្សារក្តាមនៅខេត្តកែប បានទទួលបានការសម្រេចពីរដ្ឋាភិបាលក្នុងការអភិវឌ្ឍដើម្បីកែប្រែសោភណភាពថ្មីឡើងវិញ។

លោក សោម ពិសិដ្ឋ អភិបាលនៃគណៈអភិបាលខេត្តកែបបានបញ្ជាក់បន្ថែមពីគម្រោងអភិវឌ្ឍផ្សារក្តាមនៅខេត្តកែប ក្នុងបទសម្ភាសជាមួយក្រុមអ្នកសារព័ត៌មាន នៅក្នុងពិធីបើកការដ្ឋានសាងសង់ឆ្នេរតេជោសន្តិភាពខេត្តកែបកាលពីសប្តាហ៍មុននេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្តល់បទសម្ភាសន៍ដល់អ្នកសារព័ត៌មាន អភិបាលខេត្តកែបបានបញ្ជាក់ថា គម្រោងនេះបានទទួលការអនុម័តរួចរាល់ពីរដ្ឋាភិបាលក្នុងការផ្តល់សិទ្ធិដល់វិស័យឯកជន ដើម្បីរៀបចំកែប្រែមុខមាត់ផ្សារក្ដាមឲ្យមានសោភ័ណភាពស្រស់ស្អាត សណ្ដាប់ធ្នាប់ របៀបរៀបរយ និងអនាម័យបរិស្ថានល្អ។

«បច្ចុប្បន្នក្រុមហ៊ុនកំពុងរៀបចំផែនការមេ និងរៀបចំទីតាំង នៅសល់តែកិច្ចការមួយចំនួនតូចទៀតដែលនឹងបញ្ចប់នៅពេលខាងមុខ ខណៈអាជ្ញាធរខេត្តកំពុងជំរុញឲ្យវិនិយោគិនឲ្យអនុវត្តទៅតាមផែនការ»។ នេះបើតាមលោក សោម ពិសិដ្ឋ។

អភិបាលខេត្តបានបន្តទៀតថា គម្រោងអភិវឌ្ឍផ្សារក្តាម ក៏ដើរទន្ទឹមគ្នាគម្រោងអភិវឌ្ឍឆ្នេរតេជោសន្តិភាពកែប ដែលបានបើកការដ្ឋានសាងសង់ហើយគ្រោងបញ្ចប់ក្នុងរយៈពេល ២ ឆ្នាំទៀតនេះ។

ខេត្តកែបត្រូវបានរដ្ឋាភិបាល បានដាក់ចេញផែនការអភិវឌ្ឍជាគោលដៅទេសចរណ៍ធម្មជាតិ ស្ងប់ស្ងាត់ ប្រណីតកម្រិតខ្ពស់ ប្រកបដោយភាពទាក់ទាញ ខណៈខេត្តដែលមានឆ្នេរសមុទ្រប្រវែង ២៧ គីឡូម៉ែត្រ រដ្ឋាភិបាលក៏កំពុងអភិវឌ្ឍឆ្នេរប្រណិតកម្រិតខ្ពស់ថ្មីមានប្រវែង ២៧០០ ម៉ែត្រ ដើម្បីកែប្រែមុខមាត់ខេត្តជាប់សមុទ្រនេះ ជាគោលដៅទាក់ទាញទេសចរមកកម្សាន្តបន្ថែមទៀត៕

បន្តចុចអាន៖ ត្រឹមឆ្នាំ ២០២២ អត្រាភាពក្រីក្រពលរដ្ឋខេត្តកែបមានត្រឹម ២.៦១ ភាគរយ