ព័ត៌មានជាតិ

ត្រឹមឆ្នាំ ២០២២ អត្រាភាពក្រីក្រពលរដ្ឋខេត្តកែបមានត្រឹម ២.៦១ ភាគរយ

បានផុស

៦ ខែ មុន

នៅ

ថ្ងៃពុធ ១៧ ឧសភា ២០២៣

ដោយ

ខេត្តកែប បានបង្ហាញពីជោគជ័យនៃយុទ្ធសាស្រ្តកាត់បន្ថយភាពក្រីក្រ តាមរយៈជំរុញការអភិវឌ្ឍសេដ្ឋកិច្ចដើម្បីលើកស្ទួយជីវភាពរបស់ពលរដ្ឋ។

នៅក្នុងសន្និសីទរបស់រដ្ឋបាលខេត្តកាលពីសប្តាហ៍មុននេះ លោក សោម ពិសិដ្ឋ អភិបាលនៃគណៈអភិបាលខេត្តកែបបានលើកពីកិច្ចប្រឹងប្រែងអភិវឌ្ឍខេត្តកែប ក្នុងនោះលោកក៏បង្ហាញពីជោគជ័យក្នុងការកាត់បន្ថយអត្រាភាពក្រីក្ររបស់ពលរដ្ឋក្នុងខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ពិសិដ្ឋ អះអាងថា គិតត្រឹមឆ្នាំ ២០២២ អត្រាក្រីក្ររបស់ពលរដ្ឋក្នុងខេត្តមានត្រឹម ២,៦១ ភាគរយ។

«ពីឆ្នាំ ២០១៦ មកឆ្នាំ ២០១៨ អត្រាភាពក្រីក្រមានជាង ១០% និងឆ្នាំ ២០១៨ មាន ៤, ៤៣% និងឆ្នាំ ២០២២ មានត្រឹម ២,៦១ %»។ ក្រៅពីបង្ហាញតួលេខនៃការធ្លាក់ចុះអត្រាភាពក្រីក្រ លោក សោម ពិសិដ្ឋអះអាងថា ខេត្តកែបមានអំណោយផលដល់វិស័យទេសចរណ៍ក្នុងនោះមានឆ្នេរសមុទ្រ មានកោះ មានព្រៃកោងកាងនិងសក្តានុពលធនធានធម្មជាតិដែលទាក់ទាញដល់អ្នកទេសចរ។

ចំនួនពលរដ្ឋនៅក្នុងខេត្តកែបមានជាង ២ ម៉ឺនគ្រួសារ ដែលសរុបចំនួនមនុស្សមានចំនួន ៤៤ ៥២៣ នាក់។ រាជរដ្ឋាភិបាលបានកំណត់គោលដៅយុទ្ធសាស្ត្រអភិវឌ្ឍទេសចរណ៍ខេត្តកែប ឱ្យក្លាយទៅជាគោលដៅទេសចរណ៍ធម្មជាតិ ស្ងប់ស្ងាត់ ប្រណីតកម្រិតខ្ពស់ ប្រកបដោយភាពទាក់ទាញ និងភាពប្រកួតប្រជែងនៅក្នុងតំបន់និងពិភពលោក។

លោក សោម ពិសិដ្ឋបានគូសបញ្ជាក់ថា ទូទាំងខេត្តលែងមានផ្ទះខ្ទមផ្ទះស្លឹកទៀតហើយ ខណៈរដ្ឋបាលខេត្តកំពុងយកចិត្តទុកដាក់លើអនាម័យដោយបញ្ចប់ការបន្ទោបង់ពាសវាលពាសកាលដោយជំរុញឲ្យគ្រប់ខ្នងផ្ទះមានបង្គន់ប្រើប្រាស់។

បើតាមរបាយការណ៍របស់រដ្ឋបាលខេត្ត ទំហំសេដ្ឋកិច្ចខេត្តកែបមានប្រមាណ ៥៤ លានដុល្លារស្មើ ០,២% នៃសេដ្ឋកិច្ចជាតិ ខណៈចំណូលសម្រាប់មនុស្សម្នាក់មានចំនួន ១២០៦ ដុល្លារអាមេរិក៕