លោក ហៃ ធូរ៉ា Archives - Kampuchea Thmey Daily

ដំណាំកសិកម្មជាង ៥ ពាន់ហិកតា នៅខេត្តពោធិ៍សាត់រងផលប៉ះពាល់ពីជំនន់ទឹកភ្លៀង

Din Thary — Thu, 27 Nov 2025 02:23:56 +0000

ផលដំណាំកសិកម្មរបស់ប្រជាពលរដ្ឋជាង ៥ ពាន់ហិកតា (៥ ០៥៤) ស្ថិតនៅក្នុងស្រុកចំនួន ០៣ មានស្រុកភ្នំក្រវាញ ក្រុងពោធិ៍សាត់ និងស្រុកកណ្តៀង នាខេត្តពោធិ៍សាត់ រងផលប៉ះពាល់ និងខូចខាតពីជំនន់ទឹកភ្លៀង។ នេះបើតាមការបញ្ជាក់ពីលោក ហៃ ធូរ៉ា ប្រធានមន្ទីរកសិកម្មខេត្តពោធិ៍សាត់។

ថ្លែងប្រាប់ «កម្ពុជាថ្មី» នៅល្ងាចថ្ងៃទី២៦ ខែវិច្ឆិកា ឆ្នាំ២០២៥ នេះ លោក ហៃ ធូរ៉ា បានឱ្យដឹងថា ការងារបង្កបង្កើនផលដំណាំកសិកម្មរដូវវស្សាឆ្នាំ២០២៥ សម្រាប់ខេត្តពោធិ៍សាត់សម្រេចបានដំណាំស្រូវអនុវត្តសរុបចំនួន ១៦៧ ០៤៧ ហិកតា ស្មើនឹង ១២២,៨៣ % នៃផែនការចំនួន ១៣៦ ០០០ហិកតា និងផ្ទៃដីប្រមូលផលស្រូវ សរុបចំនួន ១៣២ ៣៨៦ ហិកតា ស្មើនឹង ៨៧,៨៦% នៃផ្ទៃដីប្រមូលផលសរុបចំនួន ១៦៣ ១១៩ ហិកតា។ ក្នុងនោះ ការងារបង្កបង្កើនផលដំណាំស្រូវរដូវប្រាំង ឆ្នាំ២០២៥-២០២៦ សម្រេចបានសរុបចំនួន ៣១ ២៦២ ហិកតា។

ជាក់ស្តែង ផលរំខានពីជំនន់ទឹកភ្លៀងនាពេលកន្លងមកដោយគិតត្រឹមថ្ងៃទី ២៦ ខែវិច្ឆិកា ឆ្នាំ២០២៥នេះ មានស្រុកចំនួន ០៣ ស្រុកភ្នំក្រវាញ ក្រុងពោធិ៍សាត់ និងស្រុកកណ្តៀង លើ ១៩ឃុំ/សង្កាត់ ១៣៩ ភូមិ ស្មើរ ៦ ៣៤៤ គ្រួសារ បានទទួលរងផលប៉ះពាល់ដល់ដំណាំស្រូវ (ស្រូវវស្សាជិតប្រមូលផល និងស្រូវប្រាំង) សរុបចំនួន ៥ ០៥៤ ហិកតា និងផ្ទៃដីដំណាំស្រូវខូចខាតសរុប ៩២២ ហិកតា លើ ១៥ឃុំ/សង្កាត់ ៧៦ ភូមិ (១ ៣០៦ គ្រួសារ)។

ទន្ទឹមនោះ ផ្ទៃដីសង្រ្គោះបានសរុប ៤ ១៣៣ ហិកតា និងផលប៉ះពាល់ដំណាំឧស្សាហកម្ម និងដំណាំសាកវប្បកម្ម សរុបចំនួន ៥១៣ ហិកតា ខូចខាតដំណាំរួមផ្សំសរុប ៤៣៥ ហិកតា។

ក្នុងនោះ ស្រុកភ្នំក្រវាញ ផ្ទៃដីរងផលប៉ះពាល់ដំណាំស្រូវសរុបចំនួន ៣៣២ ហិកតា ហើយបានខូចខាតទាំងស្រុងចំនួន ១៣៥ ហិកតា និងប៉ះពាល់ដំណាំឧស្សាហកម្ម និងដំណាំសាកវប្បកម្ម សរុបចំនួន ៥១៣ ហិកតា មានដំឡូងមី ចំនួន ២៣៦ ហិកតា ពោត ៩៣ ហិកតា សណ្តែក ១២០ ហិកតា ល្ហុងចំនួន ១១ ហិកតា និងដំណាំផ្សេង ៥៣ ហិកតា ហើយខូចខាតដំណាំឧស្សាហកម្ម និងដំណាំរួមផ្សំផ្ទៃដីសរុប ៤៣៥ ហិកតា។

ដោយឡែក ក្រុងពោធិ៍សាត់ ផ្ទៃដីរងផលប៉ះពាល់ដំណាំស្រូវសរុបចំនួន ២ ២៥២ ហិកតា ស្រូវវស្សា ចំនួន ១ ៨៣៤ ហិកតា និងស្រូវប្រាំងចំនួន ៥១៣ ហិកតា ខូចខាតទាំងស្រុងសរុបប្រមាណ ២៩៩ ហិកតា ស្រូវវស្សា ១៦៣ ហិកតា និងស្រូវប្រាំង ១៣៦ ហិកតា។

ស្រុកកណ្តៀង ផ្ទៃដីរងផលប៉ះពាល់ដំណាំស្រូវសរុបចំនួន ២ ៤៧០ ហិកតា ស្រូវវស្សាចំនួន ១ ៩៥១ ហិកតា និងស្រូវប្រាំងចំនួន ៥១៩ ហិកតា) និងខូចខាតទាំងស្រុងសរុបប្រមាណ ៤៨៨ ហិកតា ក្នុងនោះស្រូវវស្សា ៣១៥ ហិកតា និងស្រូវប្រាំងចំនួន ១៧៣ ហិកតាផងដែរ។

ជាមួយគ្នានេះដែរ លោកប្រធានមន្ទីរក៏បានបន្ថែមដែរថា ដោយស្ថានភាពទឹកស្រកលឿនការខូចខាតក៏ថយចុះតាមនឹងដែរ ស្រែមួយចំនួនដែលលិចហើយទឹកស្រកលឿនក៏អាចប្រមូលផលបាន ក៏ប៉ុន្តែទោះជាយ៉ាងណាក៏ ទិន្នផលស្រូវវស្សាដែលរងផលប៉ះពាល់អាច ថយចុះ ទាំងបរិមាណផល និងគុណភាពផងដែរ៕

The post ដំណាំកសិកម្មជាង ៥ ពាន់ហិកតា នៅខេត្តពោធិ៍សាត់រងផលប៉ះពាល់ពីជំនន់ទឹកភ្លៀង appeared first on Kampuchea Thmey Daily.

ផលដំណាំពលរដ្ឋខេត្តពោធិ៍សាត់ ឆ្នាំនេះអាចកើនឡើង ព្រោះអាកាសធាតុអំណោយផល

Din Thary — Thu, 02 Oct 2025 06:42:46 +0000

លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ បានឱ្យ «កម្ពុជាថ្មី» ដឹងថា ឆ្នាំនេះ ផលដំណាំកសិកម្មរបស់ប្រជាពលរដ្ឋក្នុងខេត្ត អាចមានការកើនឡើង ដោយសារតែអាកាសធាតុមានលក្ខណៈអំណោយផលល្អ។

ពាក់ព័ន្ធទៅនិងផលដំណាំកសិកម្មក្នុងឆ្នាំនេះ លោក ហៃ ធូរ៉ា បានមានប្រសាសន៍ថា ដំណាំកសិកម្មរបស់ពលរដ្ឋអាចមានការកើនឡើង ព្រោះឆ្នាំនេះការដាំដុះមានការកើនឡើង ព្រមទាំងទិន្នផលក៏មានការកើនឡើងដែរ ហើយទឹកភ្លៀងអំណោយផលល្អ ដំណាំពុំសូវជួបប្រទះបញ្ហាជំងឺ និងសត្វល្អិតដូចឆ្នាំកន្លងមក ម្យ៉ាងទៀតការយល់ដឹងបច្ចេកទេស និងការអនុវត្តការប្រើប្រាស់ពូជ ជី ថ្នាំបានល្អប្រសើរ។

ជាក់ស្តែង ឆ្នាំនេះផ្ទៃដីដាំដុះ គិតមកដល់ថ្ងៃទី១៥ ខែកញ្ញា ឆ្នាំ២០២៥ នេះ ឃើញថាមានការកើនជាងឆ្នាំ២០២៤ ដូចជាដំណាំស្រូវអនុវត្តបាន ១៥៨ ៤២៧ ហិតា កើនជាង ១៩ ៨៤៤ ហ.ត ដំណាំរួមផ្សំ និងដំណាំឧស្សាហកម្មអនុវត្តបាន ៤៤ ៧៤២ ហិតា កើនេជាង ៧ ៩០៤ ហិតា។

លោកប្រធានមន្ទីរ ក៏បានបញ្ជាក់ដែរថា «ដូចគ្នានេះ ប្រសិនបើឆ្នាំនេះការដាំដុះមានការថយចុះ ហើយការចំណាយរបស់កសិករទៅលើធាតុចូលផ្សេងៗក៏ខ្ពស់ ព្រមជាមួយតម្លៃកសិផលដូចជាស្រូវឆ្នាំនេះមានការធ្លាក់ថ្លៃផងនោះ វានឹងប្រាកដអាចធ្វើឱ្យប៉ះពាល់ដល់ចំណូលគ្រួសារកសិករដែលពឹងផ្អែកលើការងារកសិកម្ម»។

ទោះជាយ៉ាងនេះក្តី លោក ហៃ ធូរ៉ា បានលើកឡើងថា ក្រសួងកសិកម្ម បានដាក់ចេញនូវគោលនយោបាយ និងវិធានការណ៍បន្ទាន់ក្នុងការអន្តរាគមន៍លើការសម្របសម្រួលឱ្យវិស័យឯកជនជួយប្រមូលទិញកសិផលរបស់ប្រជាពលរដ្ឋទាន់ពេលវេលា ចៀសវាងការកកស្ទះ និងធ្វើឱ្យខាតបង់ដល់ប្រជាកសិករ។ មិនតែប៉ុណ្ណោះ ក្រសួង ក៏ដូចជាមន្ទីរ ក៏បានជំរុញ និងផ្សព្វផ្សាយឱ្យប្រជាកសិករចងក្រងជាសហគមន៍កសិកម្មទំនើប ដើម្បីផលិតតាមស្តង់ដារមាត្រដ្ឋាន កាត់បន្ថយថ្លៃដើមផលិត អនុវត្តផលិតកម្មកសិកម្មតាមកិច្ចសន្យា (រកទីផ្សារមុនដាំដុះ) និងប្រភពទុនសម្រាប់ជាប្រាក់កម្ចីគាំទ្រផលិតកម្មកសិកម្មលើសហគមន៍ផងដែរ។

ក្រៅតែពីដំណាំយុទ្ធសាស្ត្រ លោក ប្រធានមន្ទីរ បានបន្ថែមថា ដំណាំផ្សេងៗក្នុងខេត្ត ក៏មានលក្ខណៈអំណោយផលល្អដែរ ដូចជា ដំណាំបន្លែសុវត្ថិភាព កសិករអាចមានឱកាសពង្រីកការដាំដុះនិងបានផ្គត់ផ្គង់ទីផ្សារក្នុង និងក្រៅស្រុក បានប្រមាណ ១០-២០ តោន ក្នុងមួយថ្ងៃ ហើយក៏មានដំណាំហូបផ្លែមួយចំនួនផងដែរ ដូចជា ចេក ទុរេន សាវម៉ាវ និងក្រូចពោធិ៍សាត់ ដែលកន្លងមករួមចំណែក្នុងការជំរុញកំណើនសេដ្ឋកិច្ចក្នុងខេត្ត និងទាក់ទាញទេសចរណ៍ផង៕

ដោយ៖ ឌិន ថារី

The post ផលដំណាំពលរដ្ឋខេត្តពោធិ៍សាត់ ឆ្នាំនេះអាចកើនឡើង ព្រោះអាកាសធាតុអំណោយផល appeared first on Kampuchea Thmey Daily.

ម្ចាស់ចម្ការចំនួន ៣ នៅខេត្តពោធិ៍សាត់បានចុះបញ្ជីនាំចេញផ្លែទុរេនស្រស់ទៅចិន

Din Thary — Wed, 16 Jul 2025 10:25:00 +0000

ប្រធានមន្ទីរកសិកម្មខេត្តពោធិ៍សាត់ លោក ហៃ ធូរ៉ា បានឱ្យដឹងថា នៅក្នុងខេត្តពោធិ៍សាត់ មានម្ចាស់ចម្ការចំនួន ៣ ដែលបានចុះបញ្ជីកសិកម្មល្អនៅក្រសួងកសិកម្មសម្រាប់ធ្វើការនាំចេញផ្លែទុរេនស្រស់ទៅកាន់ទីផ្សារប្រទេសចិនដោយផ្ទាល់។

ថ្លែងប្រាប់«កម្ពុជាថ្មី» នៅរសៀលថ្ងៃទី១៦ ខែកក្កដា ឆ្នាំ២០២៥ លោកបានលើកឡើងថា មកទល់ពេលបច្ចុប្បន្ន នៅក្នុងខេត្តពោធិ៍សាត់ផ្ទាល់មានម្ចាស់ចម្ការចំនួន ៣ ដែលបានចុះបញ្ជីកសិកម្មល្អនៅក្រសួងកសិកម្មដើម្បីអាចនាំចេញផ្លែទុរេនស្រស់ទៅកាន់ទីផ្សារប្រទេសចិនបាន ហើយជាក់ស្តែងសព្វថ្ងៃនេះ មានម្ចាស់ចម្ការចំនួន ១០ បន្ថែមទៀតផងដែរ ដែលគ្រោងចុះបញ្ជីចម្ការនៅក្រសួងកសិកម្ម។

ជុំវិញការប្រកាសរបស់ក្រសួង ពាក់ព័ន្ធការអនុញ្ញាតរបស់គយចិន ដែលសម្រេចឱ្យកម្ពុជាអាចនាំចេញផ្លែទុរេនស្រស់ទៅកាន់ទីផ្សារចិននេះ លោក ហៃ ធូរ៉ា បានលើកឡើងថា តាមរយៈការប្រកាសឱ្យនាំចេញទៅកាន់ទីផ្សារចិននេះ គឺជារឿងល្អសម្រាប់ពលរដ្ឋ ព្រោះអាចជួយដោះស្រាយបញ្ហាការកត់ស្ទះកសិផលរបស់ប្រជាពលរដ្ឋយើង។ ជាក់ស្តែង នៅពេលកសិករដាំដុះអាចមានទីផ្សារល្អ នាំចេញផ្ទាល់ទៅកាន់ប្រទេសចិន ព្រោះកន្លងមកនៅក្នុងខេត្តពោធិ៍សាត់ គឺនាំចេញតាមក្រុមហ៊ុនដែលពួកគេនិងនាំចេញបន្តទៅកាន់ទីផ្សារចិន ដូច្នេះប្រសិនយើងអាចនាំចេញផ្ទាល់ដោយខ្លួនឯងបាន វាគឺជារឿងល្អ។

លោក ក៏បានបញ្ជាក់ដែរថា ពាក់ព័ន្ធការនាំចេញនេះទៀតសោត ក្រសួង និងមន្ទីរកសិកម្ម ធ្វើការណែនាំទៅលើតែបច្ចេកទេសនៅក្នុងការដាំដុះ និងថែទាំតែប៉ុណ្ណោះ ដោយឡែកខាងទីផ្សារ គឺខាងក្រសួងពាណិជ្ជកម្មជាអ្នករៀបចំ។ ក្នុងនោះចំពោះកសិកម្ម គឺធ្វើយ៉ាងណាកុំឱ្យកសិករប្រើប្រាស់ថ្នាំ ឬជីលើសកម្រិត ប៉ុន្តែអនុវត្តតាមស្តង់ដារកសិកម្មល្អ ដើម្បីឱ្យគុណភាព សុវត្ថិភាព ស្របតាមតម្រូវការនាំចេញដែលបានកំណត់ដោយគយចិន។

កាលពីថ្ងៃទី០៥ ខែកក្កដា ឆ្នាំ២០២៥ កន្លងទៅនេះ អគ្គរដ្ឋបាលគយចិន (GACC) អាចសម្រេចចជាផ្លូវការអនុញ្ញាតឱ្យកម្ពុជានាំចេញផ្លែទុរេនស្រស់ទៅកាន់ប្រទេសចិន ក្នុងនោះ មានចម្ការទុរេនចំនួន ១២២ កន្លែង ត្រូវបានអនុញ្ញាតឱ្យនាំចេញផ្លែទុរេនស្រស់ពីកម្ពុជាទៅកាន់ប្រទេសចិនជាផ្លូវការ។ បន្ថែមពីនេះ ក៏នៅមានរោងចក្រវេចខ្ចប់ចំនួន ៣០ កន្លែង ដែលបានបំពេញតាមគោលការណ៍កសិកម្មល្អ (GAP) លក្ខខណ្ឌភូតគាមអនាម័យ និងស្តង់ដាសុវត្ថិភាពចំណីអាហាររបស់ប្រទេសចិន៕

ដោយ៖ ឌិន ថារី

The post ម្ចាស់ចម្ការចំនួន ៣ នៅខេត្តពោធិ៍សាត់បានចុះបញ្ជីនាំចេញផ្លែទុរេនស្រស់ទៅចិន appeared first on Kampuchea Thmey Daily.

គយចិន គ្រោងចុះមកសិក្សាគុណភាពទុរេនពោធិ៍សាត់នៅក្នុងខែមិថុនានេះ

Din Thary — Tue, 17 Jun 2025 09:26:00 +0000

លោក ហៃ ធូរា ប្រធានមន្ទីរកសិកម្មខេត្តពោធិ៍សាត់ បានឱ្យ «កម្ពុជាថ្មី» ដឹងថា គយចិន គ្រោងចុះមកសិក្សា និងពិនិត្យមើលពីគុណភាពទុរេន ការដាំដុះ និងចម្ការទុរេន នៅក្នុងស្រុកវាលវែង ខេត្តពោធិ៍សាត់ នៅក្នុងខែមិថុនា នេះ ដើម្បីធ្វើការនាំចេញ។

ទាក់ទងនឹងការប្រមូលផលទុរេននេះ លោកបានលើកឡើងថា ឈានចូលមកដល់សប្តាហ៍ទី៣ នៃខែឧសភានេះ នៅក្នុងខេត្តពោធិ៍សាត់ ការប្រមូលផលទើបតែបានប្រមាណ ១០-២០% ប៉ុណ្ណោះ ទៅតាមតំបន់នានា ដោយមានឃុំមួយចំនួនទុំលឿន និងមួយចំនួនទៀតក៏ចាប់ផ្តើមប្រមូលផលជាបណ្តើរៗហើយដែរ។

មួយវិញទៀតពាក់ព័ន្ធនិងការលក់ដូរ នៅពេលប្រមូលផលបានប្រជាកសិករលក់ដូរតែនៅក្នុងស្រុកតែប៉ុណ្ណោះ នៅមិនទាន់មានការប្រមូលផលលក់នាំចេញទៅទីផ្សារខាងក្រៅនៅឡើយទេ ទី១ ការប្រមូលផលនៅមិនទាន់មានភាពពេញលេញនៅឡើយ ហើយបើតាមការប៉ាន់ស្មាន ការប្រមូលផលល្អពេញរដូវនឹងអាចឈានមកដល់នៅដើម ឬចុងខែកក្កដា ខាងមុខនេះ។

ជាមួយគ្នានេះ លោក ហៃ ធូរា ក៏បានឱ្យដឹងដែរថា៖«ប្រជាកសិករនៅខាងស្រុកវាលវែងបានរៀបចំជាកន្លែងស្តុកទុកទុរេន និងប្រមូលទិញទុរេន ដោយបច្ចុប្បន្នបាននឹងកំពង់ទាក់ទងជាមួយទីផ្សារប្រទេសចិន នៅក្នុងការនាំចេញ ប៉ុន្តែជាក់ស្តែង យើងកំពុងរៀបចំហេដ្ឋារចនាសម្ព័ន្ធឃ្លាំង និងកន្លែងប្រមូលផ្តុំទុរេននានា ដោយខាងគយចិនអាចនឹងចុះមកនៅក្នុងខែមិថុនា នេះ ដើម្បីពិនិត្យមើលស្ថានភាពដំណាំទុរេន ចម្ការទុរេន និងការប្រមូលផលទុរេន ផងដែរ»។

សម្រាប់ការប្រមូលផលនេះទៀតសោត ប្រធានមន្ទីររូបនេះ បានឱ្យដឹងថា ជាទូទៅតម្លៃនាពេលបច្ចុប្បន្ននេះ គឺនៅចន្លោះពី ១ ម៉ឺន ៥ ពាន់រៀល ទៅ ២ ម៉ឺនរៀល ដែលកសិករលក់ចេញពីក្នុងចម្ការរបស់ពួកគេ។

លោកក៏បានបញ្ជាក់ផងដែរថា តាមសង្កេតរបស់លោក នៅតាមឃុំមួយចំនួនដែលមានទឹកភ្លៀងច្រើន ដូចជានៅឃុំអូរសោម ទុរេនមានការពន្យារពេលនៅក្នុងការប្រមូលផលដោយសារទឹកភ្លៀងច្រើនពេក។

ពាក់ព័ន្ធនឹងការប្រមូលផលទុរេននេះដែរ លោកប្រធានមន្ទីរបានបន្ថែមថា ឆ្នាំនេះ ទុរេនមានបញ្ហាប្រឈមខ្លះៗដែរពីកត្តាអាកាសធាតុដោយសារតែនៅដើមឆ្នាំមានភ្លៀងធាក់ច្រើនជាហេតុធ្វើឱ្យផ្កាមួយចំនួនជ្រុះ និងខូចខាតជាដើម។ ប៉ុន្តែ លោកនៅតែរំពឹងបានថា ឆ្នាំនេះការប្រមូលផលនឹងមិនមានបញ្ហានោះទេ ដោយសារតែដំណាំទុរេនក៏ដល់ពេលផ្លែផ្ការដូចគ្នាដែរ ដូច្នេះប្រសិនយើងគិតទៅទិន្នផលក៏អាចប្រហាក់ប្រហែលទៅនិងឆ្នាំមុនដែរ៕

The post គយចិន គ្រោងចុះមកសិក្សាគុណភាពទុរេនពោធិ៍សាត់នៅក្នុងខែមិថុនានេះ appeared first on Kampuchea Thmey Daily.

ទុរេនពោធិ៍សាត់ នៅមិនទាន់ទុំអាចប្រមូល ផលលក់នៅលើទីផ្សារបាននៅឡើយ

Din Thary — Tue, 20 May 2025 09:01:00 +0000

ប្រធានមន្ទីរកសិកម្ម ខេត្តពោធិ៍សាត់ លោក ហៃ ធូរ៉ា បានបញ្ជាក់ប្រាប់ «កម្ពុជាថ្មី» នៅថ្ងៃទី២០ ខែឧសភា ឆ្នាំ២០២៥ នេះ បច្ចុប្បន្ន ទុរេនពោធិ៍សាត់ គឺមិនទាន់ទុំអាចបេះប្រមូលផលលក់នៅលើទីផ្សារក្នុងស្រុកបាននៅឡើយនោះទេ។

លោក ហៃ ធូរ៉ា បានលើកឡើងថា៖«ទុរេនខេត្តពោធិ៍សាត់ដែលកសិករបានដាំដុះ នាពេលបច្ចុប្បន្នទើបតែចាប់ផ្តើមទុំបានមួយៗប៉ុណ្ណោះ នៅមិនទាន់ទុំច្រើន អាចប្រមូលផលលក់នៅលើទីផ្សារក្នុងស្រុកបាននៅឡើយទេ។ ក្នុងនោះដោយសារតែទុរេននៅមិនទាន់អាចប្រមូលផលបានដូច្នេះពាក់ព័ន្ធនឹងតម្លៃទុរេន យើងក៏នៅមិនទាន់អាចកំណត់បានដូចគ្នាដែរ ព្រោះទុរេនអាចនឹងប្រមូលផលលក់នៅលើទីផ្សារបាននៅកំឡុងពាក់កណ្ដាលខែមិថុនា ខាងមុខនេះ»។

បើតាមការបញ្ជាក់ពីលោកប្រធានមន្ទីរដដែល ចំពោះតម្លៃកាលពីឆ្នាំមុន លក់បោះដុំ ប្រភេទទុរេនមាន់ថង លក់តម្លៃប្រមាណ ១២ ០០០រៀល ទៅ ១៥ ០០០រៀល ក្នុងមួយគីឡូក្រាម។ ដោយឡែក ប្រភេទមាន់ថង ដូចគ្នា ប៉ុន្តែលក់តាមតូបទេសចរណ៍ លក់បានក្នុងតម្លៃចន្លោះពី ២៥ ០០០រៀល ទៅ ២៧ ០០០រៀល ក្នុងមួយគីឡូក្រាម។

ក្នុងនោះដែរ សម្រាប់ទីផ្សារនាំចេញវិញ ក៏មានក្រុមហ៊ុនចិន និងក្រុមហ៊ុនថៃ បានធ្វើការទំនាក់ទំនងសម្រាប់ការនាំចេញផងដែរ។

យោងតាម របាយការណ៍ស្ថិតិដំណាំ សាកវប្បកម្ម ឧស្សាហកម្ម និងអចិន្ត្រៃយ៍ ឆ្នាំ២០២៤ បានឱ្យដឹងថា ខេត្តពោធិ៍សាត់ មានផ្ទៃដីដាំដុះប្រមាណ ២ ០៦៣ហិតា ក្នុងនោះផ្ទៃដីប្រមូលផលមានប្រមាណ ១ ៦៨៣ហិតា ដែលអាចប្រមូលផលបាន ១៥ តោនក្នុងមួយហិតា និងទទួលបានបរិមាណផលសរុបប្រមាណ ២៥ ២៤៥ តោន៕

The post ទុរេនពោធិ៍សាត់ នៅមិនទាន់ទុំអាចប្រមូល ផលលក់នៅលើទីផ្សារបាននៅឡើយ appeared first on Kampuchea Thmey Daily.

ក្រូចពោធិ៍សាត់ នឹងចាប់ផ្តើមប្រមូលផលពេញដៃនៅចន្លោះ ២ ទៅ ៣ ខែខាងមុខ

Din Thary — Tue, 06 May 2025 08:03:00 +0000

លោក ហៃ ធូរ៉ា ប្រធានមន្ទីរកសិកម្មខេត្តពោធិ៍សាត់ បានឱ្យដឹងថា បច្ចុប្បន្នក្រូចពោធិ៍សាត់កសិករទើបតែចាប់ផ្តើមប្រមូលផលបានតិចតួចនៅឡើយ ដោយក្រូចអាចនិងចាប់ផ្តើមប្រមូលផលពេញដៃនៅចន្លោះរយៈពេល ២ ទៅ ៣ ខែខាងមុខ។

ថ្លែងមកកាន់ «កម្ពុជាថ្មី» លោក ហៃ ធូរ៉ា មានប្រសាសន៍ថា នៅក្នុងខែនេះការប្រមូលផលក្រូចពោធិ៍សាត់គឺមានចំនួនតិចតួចប៉ុណ្ណោះ មិនមានច្រើននោះទេ ព្រោះខែនេះជាខែភ្លៀង ការប្រមូលពេញដៃគឺអាចនៅចន្លោះពី ២ ទៅ ៣ ខែខាងមុខ។

ជាក់ស្តែង នៅក្នុងរង្វង់ខែកក្កដា ទៅ ខែសីហា ក្រូចនឹងអាចចាប់ផ្តើមប្រមូលផលបានច្រើន ក្នុងនោះ នៅចន្លោះខែកញ្ញា និងតុលា ក្រូចពោធិ៍សាត់នឹងកាន់តែមានរសជាតិឆ្ងាញ់ព្រោះជារដូវដាច់ទឹកភ្លៀង។

លោក បានអះអាងថា «ដំណាំក្រូចពោធិ៍សាត់ប្រសិនមានទឹកគ្រប់គ្រាន់ កសិករនឹងអាចប្រមូលផលផ្លែបានរហូត ហើយប្រសិនបើលក្ខខណ្ឌអាកាសធាតុអំណោយទៀត នោះផលក្រូចនិងអាចប្រមូលផលបានជាមធ្យមប្រមាណ ៣០តោន ក្នុងមួយហិតា»។

ជាដំណាំមួយដែលមានភាពអំណោយផលល្អលើទីផ្សារ លោក ហៃ ធូរ៉ា បានបន្ថែមថា «ក្រូចពោធិ៍សាត់នៅក្នុងទីផ្សារបច្ចុប្បន្នគឺនៅតែរក្សាបានតម្រូវការខ្ពស់ និងលក់បានតម្លៃសមរម្យ ដោយហេតុថា ឱ្យតែដល់រដូវប្រមូលផលម្តងៗក្រូចពោធិ៍សាត់សម្បូរអ្នកចូលចិត្តទទួលទាន ព្រោះវាមានរសជាតិផ្អែមឆ្ងាញ់ ទៅតាមប្រភេទក្រូចនីមួយៗ ដូចជាក្រូចទឹកឃ្មុំ និងក្រូចប្រភេទជូខ្លះលាយឡំគ្នា»។

សម្រាប់តម្លៃក្រូច ក៏មានទៅតាមប្រភេទក្រូចដែរ ដោយស្ថិតនៅក្នុងតម្លៃចន្លោះពី ២ ម៉ឺនរៀល ដល់ ៤ ម៉ឺន ឬ ៥ ម៉ឺនរៀល ក្នុងមួយផ្លូន ប៉ុន្តែប្រសិនឈ្មួញទិញមៅទាំងចម្ការ អាចស្ថិតក្នុងតម្លៃចន្លោះពី ២ ម៉ឺនរៀល ទៅ ៣ ម៉ឺនរៀល ក្នុងមួយផ្លូន។

លោក បានបន្ថែមថា ឆ្នាំនេះ ទិន្នផលក្រូចពោធិ៍សាត់នៅមិនទាន់មានបញ្ហាប្រឈមអ្វីនោះដែរ ព្រោះស្ថានភាពទឹកមានអំណោយផលល្អ ប៉ុន្តែក្រូចក៏និងអាចជួបប្រទះបញ្ហាជំងឺមួយចំនួនផងដែរ។

កាលពីឆ្នាំ២០២៤ កន្លងទៅនេះ ក្រូចពោធិ៍សាត់ប្រមូលសរុបបានប្រមាណ ជាង ១១ ម៉ឺនតោន (១១៨,៥២៧) ដែលដាំដុះនៅលើផ្ទៃដីសរុបជាង ៧ ពាន់ហិតា (៧ ៦១៧ហិតា) ក្នុងនោះផ្ទៃដីប្រមូលផលជាង ៥ ពាន់ហិតា (៥ ១០០) ប្រមូលផលបានជាង ២ពាន់តោន (២៣,២៤) ក្នុងមួយហិតា៕

The post ក្រូចពោធិ៍សាត់ នឹងចាប់ផ្តើមប្រមូលផលពេញដៃនៅចន្លោះ ២ ទៅ ៣ ខែខាងមុខ appeared first on Kampuchea Thmey Daily.