ព័ត៌មានជាតិ

គយចិន គ្រោងចុះមកសិក្សាគុណភាពទុរេនពោធិ៍សាត់នៅក្នុងខែមិថុនានេះ

បានផុស

១ year មុន

នៅ

ថ្ងៃអង្គារ ១៧ មិថុនា ២០២៥

ដោយ

លោក ហៃ ធូរា ប្រធានមន្ទីរកសិកម្មខេត្តពោធិ៍សាត់ បានឱ្យ «កម្ពុជាថ្មី» ដឹងថា គយចិន គ្រោងចុះមកសិក្សា និងពិនិត្យមើលពីគុណភាពទុរេន ការដាំដុះ និងចម្ការទុរេន នៅក្នុងស្រុកវាលវែង ខេត្តពោធិ៍សាត់ នៅក្នុងខែមិថុនា នេះ ដើម្បីធ្វើការនាំចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាក់ទងនឹងការប្រមូលផលទុរេននេះ លោកបានលើកឡើងថា ឈានចូលមកដល់សប្តាហ៍ទី៣ នៃខែឧសភានេះ នៅក្នុងខេត្តពោធិ៍សាត់ ការប្រមូលផលទើបតែបានប្រមាណ ១០-២០% ប៉ុណ្ណោះ ទៅតាមតំបន់នានា ដោយមានឃុំមួយចំនួនទុំលឿន និងមួយចំនួនទៀតក៏ចាប់ផ្តើមប្រមូលផលជាបណ្តើរៗហើយដែរ។

មួយវិញទៀតពាក់ព័ន្ធនិងការលក់ដូរ នៅពេលប្រមូលផលបានប្រជាកសិករលក់ដូរតែនៅក្នុងស្រុកតែប៉ុណ្ណោះ នៅមិនទាន់មានការប្រមូលផលលក់នាំចេញទៅទីផ្សារខាងក្រៅនៅឡើយទេ ទី១ ការប្រមូលផលនៅមិនទាន់មានភាពពេញលេញនៅឡើយ ហើយបើតាមការប៉ាន់ស្មាន ការប្រមូលផលល្អពេញរដូវនឹងអាចឈានមកដល់នៅដើម ឬចុងខែកក្កដា ខាងមុខនេះ។

ជាមួយគ្នានេះ លោក ហៃ ធូរា ក៏បានឱ្យដឹងដែរថា៖«ប្រជាកសិករនៅខាងស្រុកវាលវែងបានរៀបចំជាកន្លែងស្តុកទុកទុរេន និងប្រមូលទិញទុរេន ដោយបច្ចុប្បន្នបាននឹងកំពង់ទាក់ទងជាមួយទីផ្សារប្រទេសចិន នៅក្នុងការនាំចេញ ប៉ុន្តែជាក់ស្តែង យើងកំពុងរៀបចំហេដ្ឋារចនាសម្ព័ន្ធឃ្លាំង និងកន្លែងប្រមូលផ្តុំទុរេននានា ដោយខាងគយចិនអាចនឹងចុះមកនៅក្នុងខែមិថុនា នេះ ដើម្បីពិនិត្យមើលស្ថានភាពដំណាំទុរេន ចម្ការទុរេន និងការប្រមូលផលទុរេន ផងដែរ»។

សម្រាប់ការប្រមូលផលនេះទៀតសោត ប្រធានមន្ទីររូបនេះ បានឱ្យដឹងថា ជាទូទៅតម្លៃនាពេលបច្ចុប្បន្ននេះ គឺនៅចន្លោះពី ១ ម៉ឺន ៥ ពាន់រៀល ទៅ ២ ម៉ឺនរៀល ដែលកសិករលក់ចេញពីក្នុងចម្ការរបស់ពួកគេ។

លោកក៏បានបញ្ជាក់ផងដែរថា តាមសង្កេតរបស់លោក នៅតាមឃុំមួយចំនួនដែលមានទឹកភ្លៀងច្រើន ដូចជានៅឃុំអូរសោម ទុរេនមានការពន្យារពេលនៅក្នុងការប្រមូលផលដោយសារទឹកភ្លៀងច្រើនពេក។

ពាក់ព័ន្ធនឹងការប្រមូលផលទុរេននេះដែរ លោកប្រធានមន្ទីរបានបន្ថែមថា ឆ្នាំនេះ ទុរេនមានបញ្ហាប្រឈមខ្លះៗដែរពីកត្តាអាកាសធាតុដោយសារតែនៅដើមឆ្នាំមានភ្លៀងធាក់ច្រើនជាហេតុធ្វើឱ្យផ្កាមួយចំនួនជ្រុះ និងខូចខាតជាដើម។ ប៉ុន្តែ លោកនៅតែរំពឹងបានថា ឆ្នាំនេះការប្រមូលផលនឹងមិនមានបញ្ហានោះទេ ដោយសារតែដំណាំទុរេនក៏ដល់ពេលផ្លែផ្ការដូចគ្នាដែរ ដូច្នេះប្រសិនយើងគិតទៅទិន្នផលក៏អាចប្រហាក់ប្រហែលទៅនិងឆ្នាំមុនដែរ៕