លោក ហ្វៃ សំអាង Archives - Kampuchea Thmey Daily

ផេកផ្លូវការ លោក ហ្វៃ សំអាង ត្រូវពួកជ្រុលនិយមថៃ report និងចេញមតិវាយប្រហារឈុតក្នុងរឿង “អប្សរាមហាអង្គរ”

Chan Sotheavy — Thu, 18 Sep 2025 08:29:12 +0000

ផលិតករភាពយន្តជើងចាស់ល្បីឈ្មោះលោក ហ្វៃ សំអាង ប្រកាសឱ្យដឹងថា ទំព័រហ្វេសប៊ុកផ្លូវការរបស់លោកពេលនេះត្រូវបានក្រុមចោរប្រវត្តិសាស្ត្រចូល report និងថែមទាំងបញ្ចេញមតិលេីសម្លៀកបំពាក់អប្សរាមហាអង្គរទៀតផង។

ទន្ទឹមគ្នានៃការប្រកាសនេះដែរ ផលិតករលោក ហ្វៃ សំអាង ក៏បានស្នើសុំមហាជនអ្នកគាំទ្រ និងបណ្តាសាធារសិល្ប:ឱ្យជួយសង្គ្រោះផេករបស់លោកពីការរីផតរបស់ក្រុមចោរសៀមវង្វេងប្រវត្តិសាស្ត្រផងដែរ។ ខណ:លោកចាត់ទុកថាជាទង្វើដ៏គួរឲ្យស្អប់ផ្អើមបំផុតដែលពួកចោរនេះវង្វេងនូវប្រវត្តិសាស្រ្តការពិតរបស់ខ្លួន។

លោក ហ្វៃ សំអាង បានឱ្យដឹងថា “សួស្ដីបងប្អូន! មិត្តភក្ដិទាំងអស់គ្នាពេលនេះផេកផ្លូវការរបស់ខ្ញុំ ត្រូវបានក្រុមចោរប្រវត្តិសាស្ត្រចូលមករីផតខមមិនលើសម្លៀកបំពាក់ អប្សរាមហាអង្គរ តេីខ្ញុំត្រូវធ្វើយ៉ាងម៉េច? សូមមេត្តាជួយខ្ញុំផង”។

តាមការកត់សម្គាល់ មិនមែនមានតែផលិតករភាពយន្តជើងចាស់រូបនេះនោះទេ ដែលត្រូវបានក្រុមចោរប្រវត្តិសាស្ត្រសៀមចូលរីផត ពោលគឺកន្លងមក ក៏មានអ្នកសិល្ប:និងបុគ្គលល្បីៗដែលមានផេកធំៗជាច្រើនក៏ត្រូវបានក្រុមពួកចោរវង្វេងប្រវត្តិសាស្ត្រចូលរីផតដូចគ្នា ៕ ចាន់រ៉ា

The post ផេកផ្លូវការ លោក ហ្វៃ សំអាង ត្រូវពួកជ្រុលនិយមថៃ report និងចេញមតិវាយប្រហារឈុតក្នុងរឿង “អប្សរាមហាអង្គរ” appeared first on Kampuchea Thmey Daily.

លោក ហ្វៃ សំអាង ប្រាប់តារាសម្តែងមួយចំនួនថា បេីមិនចេះគាំទ្រខ្លួនឯងផង កុំស្រែកហៅឱ្យគេគាំទ្រ

Chan Sotheavy — Sun, 27 Apr 2025 09:50:30 +0000

ផលិតករភាពយន្តដ៏ល្បីឈ្មោះរបស់កម្ពុជា លោក ហ្វៃ សំអាង បានបញ្ចេញទស្សន:ដោយលើកឡើងចំៗពាក់ព័ន្ធនឹងតារាសម្តែងមួយចំនួនថា ចរិតតួខ្មែរភាគច្រើនបេីខ្លួនឯងមិនគាំទ្រខ្លួនឯងផង កុំស្រែកហៅឱ្យប្រជាជនគាំទ្រនោះ។

ចំពោះការបញ្ចេញទស្សន:របស់ផលិតករជើងចាស់ខាងលើនេះ ដោយសារសង្កេតឃើញថា ថ្មីៗនេះមានអ្នកដឹកនាំសម្តែងក៏ដូចជាផលិតករខ្លះបានលើកឡើងពីបញ្ហានេះដែលបាននិងកំពុងកើតឡើងចំពោះតួសម្តែងខ្មែរមួយចំនួនដែលមានចរិតអំនួត កើតជំងឺតួឯកលើខ្លួនហួសហេតុ។

ជាក់ស្តែងក្រោយពីឃើញការបង្ហោះនៅលើផេករបស់លោក ផាត់ តារារ័ត្ន ស្ថាបនិកគ្រួសារតារាកម្ពុជាដែលបានលើកឡើងជុំវិញរឿងរ៉ាវដែលតួសម្តែង ដែលមិនព្រមសូម្បីតែចែករំលែករឿងដែលខ្លួនបានចូលរួមសម្តែង។

ស្របពេលនៃការបញ្ចេញសារលើកឡើងបែបនេះ ភ្លាមៗនោះដែរផលិតករភាពយន្តនិងជាអ្នកដឹកនាំល្បីឈ្មោះលោក ហ្វៃ សំអាង បានចូលទៅបញ្ចេញទស្សន:ថា “ចរិកតតួខ្មែរភាគច្រេីនប្អូន មិនចម្លែកទេកុំស្រែកដង្ហៅឲ្យប្រជាជនគាំទ្រ បេីខ្លួនឯងមិនគាំទ្រខ្លួនឯងផងនោះ? តួចរិតតួល្អនៅតែល្អ ដឹងនៅក្នុងចិត្ត”។ ទន្ទឹមគ្នានឹងការលើកឡើងនេះ ក៏មានមតិគាំទ្រថា រឿងខ្លួនឯងសម្តែងសោះ បើមិនគាំទ្រហើយចែករំលែកផង អ្នកណាទៅគាំទ្រនោះ។

ជាការកត់សម្គាល់ កន្លងមកក៏ធ្លាប់មានផលិតករនិងអ្នកដឹកនាំសម្តែងរឿងមួយចំនួន បានចេញមកទម្លាយ និងរិះគន់ជុំវិញរឿងរ៉ាវនៃចរិតមិនល្អរបស់តួមួយចំនួនជាបន្តបន្ទាប់មកហើយដែរ៕ អត្ថបទ៖ ចាន់រ៉ា

The post លោក ហ្វៃ សំអាង ប្រាប់តារាសម្តែងមួយចំនួនថា បេីមិនចេះគាំទ្រខ្លួនឯងផង កុំស្រែកហៅឱ្យគេគាំទ្រ appeared first on Kampuchea Thmey Daily.

លោក ហ្វៃ សំអាង ៖ ក្នុងនាមជាកូនខ្មែរ ត្រូវតែជួយផ្សព្វផ្សាយគុន”ល្បុក្កតោ” ទៅកាន់ពិភពលោក

អ៊ិន ពិសី — Thu, 25 Jul 2024 07:37:46 +0000

ដើម្បីចូលរួមលើកស្ទួយក្បាច់គុនបុរាណខ្មែរគឺ”ល្បុក្កតោ” ផលិតករភាពយន្តដ៏ល្បីឈ្មោះរបស់ខ្មែរលោក ហ្វៃ សំអាង បានបំផុស និងអះអាងថា ក្នុងនាមជាកូនខ្មែរ លោកត្រូវតែជួយផ្សព្វផ្សាយបន្តទៅកាន់ពិភពលោក។

ផលិតករជើងចាស់លោក ហ្វៃ សំអាង បានបញ្ជាក់ថា តាមរយៈផ្ទាំងទស្សនីយភាព នៃរឿង”អប្សរាមហាអង្គរ” ដែលជាស្នាដៃនិពន្ធ និងដឹកនាំដោយផ្ទាល់របស់លោកគឺបានបញ្ចូលឈុតឆាក នៃក្បាច់គុនបុរាណខ្មែរ”ល្បុក្កតោ” នៅសាច់រឿងនេះផងដែរ។ លោកចាត់ទុកថា នេះក៏ជាការរួមចំណែកក្នុងការចូលរួមផ្សព្វផ្សាយឲ្យបានកាន់តែទូលំទូលាយពីសម្បត្តិបេតិកភណ្ឌពិភពលោកទៀតផង។

លោក ហ្វៃ សំអាង បានមានប្រសាសន៍ថា ក្បាច់គុន”ល្បុក្កតោ” ដែលបានចារិកនៅតាមជញ្ជាំងប្រាសាទ ហើយជាសម្បត្តិបេតិកភណ្ឌពិភពលោក បានយកមកបង្ហាញនៅក្នុងផ្ទាំងទស្សនីយភាព នៃរឿងអប្សរាមហាអង្គរ ក្រោមការខិតខំប្រឹងប្រែងហាត់ពត់លត់ដំពីតារាសម្ដែងពោរពេញទៅដោយទេពកោសល្យ និងការអត់ធ្មត់ព្យាយាមលះបង់ពេលវេលាគួរឲ្យកោតសរសើរ។

លោក ហ្វៃ សំអាង បានបន្តទៀតថា «យើងខ្ញុំ នឹងខិតខំប្រឹងប្រែងផ្សព្វផ្សាយពីតំបន់ទេសចរណ៍របស់ព្រះរាជាណាចក្រកម្ពុជាតាមរយៈរឿងអប្សរាមហាអង្គរដែលផលិតដោយផលិតកម្មហង្សមាសទៅកាន់ពិភពលោក»។

ជាមួយគ្នានេះ លោកក៏អរគុណក្រសួងវប្បធម៌ និងវិចិត្រសិល្បៈ អាជ្ញាធរអប្សរា ដែលបានជួយសម្រួលដល់កក្រុមការងារ ដើម្បីផ្ដិតយករូបភាពនៅតំបន់ប្រាសាទអង្គរ៕

អត្ថបទ ៖ ចាន់រ៉ា

The post លោក ហ្វៃ សំអាង ៖ ក្នុងនាមជាកូនខ្មែរ ត្រូវតែជួយផ្សព្វផ្សាយគុន”ល្បុក្កតោ” ទៅកាន់ពិភពលោក appeared first on Kampuchea Thmey Daily.

ផលិតករសរសើរ ទេព រិន្ទដារ៉ូ ប៉ះគ្នាជាថ្មីជាមួយដៃគូចាស់ អម្ពរ ទេវី ក្រោយបែកគ្នាយូរឆ្នាំ

អ៊ិន ពិសី — Sat, 21 Oct 2023 06:00:00 +0000

បើនិយាយពីលោក ទេព រិន្ទដារ៉ូ គឺជាតារាសម្តែងភាពយន្តជើងចាស់ដ៏ល្បីឈ្មោះ និងមានភាពលេចធ្លោលើវិថីសិល្បៈនាអំឡុងទសវត្សរ៍ឆ្នាំ ៨០ និង ៩០ រួមជំនាន់ជាមួយអ្នកនាង អម្ពរ ទេវី ដែលជាដៃគូសម្តែងដ៏ស័ក្ដិសមបំផុតនាសម័យនោះ។ ក្នុងនោះ ក៏មានតារាសម្តែងប្រុស-ស្រីល្បីៗមួយចំនួនទៀតរួមការងារសិល្បៈជាមួយលោកផងដែរ តួយ៉ាងដូចជាតារាស្រីអ្នកនាង នារីរ័ត្ន គន្ធា ជាដើម។

គិតរហូតមកទល់បច្ចុប្បន្ន សម្រាប់តារាសម្ដែងជើងចាស់លោក ទេព រិន្ទដារ៉ូ គឺបានប្រឡូកក្នុងវិស័យសិល្បៈមានរយៈពេលប្រមាណ ៣០ ឆ្នាំ ហើយ ខណៈប្រជាប្រិយភាព និងទីផ្សារសម្តែង នៅតែរក្សាបានការគាំទ្រខ្ពស់មិនមានការចុះថមថយឡើយ។ លោក ទេព រិន្ទដារ៉ូ ក៏ជាតួអង្គប្រុសមួយរូបធ្លាប់រួមសម្តែងភាពយន្ត និងកាយវិការបទចម្រៀងខារ៉ាអូខេជាច្រើនជាមួយអ្នកនាង អម្ពរ ទេវី ផងដែរ។

ក្រោយបែកគ្នាពីការសម្តែងជិត ២០ ឆ្នាំ កន្លងទៅ ដោយសារតែអ្នកនាង អម្ពរ ទេវី ចេញទៅរស់នៅសហរដ្ឋអាមេរិកសាងសុភមង្គលជាមួយស្វាមី និងកូននោះ ស្រាប់តែថ្មីៗនេះ អ្នកទាំងពីរក៏មានឱកាសវិលត្រឡប់មករកការសម្តែងជាថ្មីជាមួយគ្នានៅក្នុងភាពយន្តបុរាណរឿង«អប្សរាមហាអង្គរ» ដែលដឹកនាំដោយផលិតករល្បីឈ្មោះលោក ហ្វៃ សំអាង។ ក្នុងការវិលមកជួបគ្នាឡើងវិញក្រោយបែកគ្នាជិត ២០ ឆ្នាំ មកនេះ ទាំងអ្នកនាង អម្ពរ ទេវី និងលោក ទេព រិន្ទដារ៉ូ ឃើញថា ហាក់មានអារម្មណ៍រំភើបដូចគ្នា ព្រោះតែបានជួបគ្នាឡើងវិញសម្រាប់ការសម្តែងនៅលើទឹកដីប្រទេសកំណើតកម្ពុជា។

ផលិតករល្បីឈ្មោះលោក ហ្វៃ សំអាង បង្ហោះរូបភាពជាមួយខ្លឹមសារដោយបានលើកឡើងថា «នេះគឺជាឈុតឆាកស្នេហារបស់បណ្ឌិត ខីណាព្រាហ្មណ៍ និង អ្នកអង្គម្ចាស់ស្ត្រី កាមល បន្ទាប់ពីបែកបាក់គ្នាអស់រយៈពេល ១៩ ឆ្នាំ ព្រះហទយៈស្នេហ៍ត្រូវបានរុះរោយដោយជនទីបីចូលមកធ្វើជានាងឯក»។

លោក ហ្វៃ សំអាង បានបន្តថា «កំពូលតារាសម្ដែងដែលមានទេពកោសល្យខ្ពស់មិនចេះរីងស្ងួត ទាំងការសម្ដែង ព្រមទាំងចរិយាសម្បត្តិនៅពេលធ្វើការងារគួរឲ្យគោរពស្រលាញ់ពីមនុស្សនៅជុំវិញខ្លួនអប្សរាមហាអង្គរ»៕

អត្ថបទ ៖ ចាន់រ៉ា

The post ផលិតករសរសើរ ទេព រិន្ទដារ៉ូ ប៉ះគ្នាជាថ្មីជាមួយដៃគូចាស់ អម្ពរ ទេវី ក្រោយបែកគ្នាយូរឆ្នាំ appeared first on Kampuchea Thmey Daily.

លោក ហ្វៃ សំអាង បកស្រាយលើកដំបូង៖ ការប្ដូរអ្នកច្រៀងថ្មីបទ “ទុក្ខស្រីប្ដីព្រាត់” ជាការសម្រេចរបស់ សម្ដេចតេជោ

KC Virak — Tue, 07 Feb 2023 08:16:34 +0000

ភាពយន្តចម្រៀង “ទុក្ខស្រីប្តីព្រាត់” ជាស្នាដៃនិពន្ធរបស់ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ត្រូវបានផលិតឡើងវិញ ដោយច្រៀងដោយ អ្នកនាង មាស សុខសោភា។ ការណ៍នេះធ្វើឱ្យ លោកស្រី ម៉េង កែវពេជ្ជតា អ្នកច្រៀងបទនេះដំបូង មិនពេញចិត្តចំពោះការមិនយកលោកស្រីច្រៀងឡើងវិញ ក៏ដូចជាមិនដាក់ឈ្មោះរបស់លោកស្រី នៅតាម ផ្ទាំងផ្សព្វផ្សាយ ជាដើម។ រហូតមានការលើកឡើងថា ការផ្លាស់ប្ដូរនេះ ជាការរៀបចំ លោកស្រី ចន ច័ន្ទលក្ខិណា ប្រធានសមាគមសិល្បករខ្មែរ និងជាផលិតករផលិតភាពយន្តចម្រៀងនេះ ខណៈអ្នកទាំងពីររូបធ្លាប់មានទំនាស់ជាមួយគ្នា។

កន្លងមក មិនធ្លាប់មានការបកស្រាយអ្វីពីការផ្លាស់ប្ដូរអ្នកច្រៀងនេះទេ ប៉ុន្តែពេលនេះ លោក ហ្វៃ សំអាង បានបកស្រាយជាលើកទី១ថា ការផ្លាសប្ដូរអ្នកច្រៀងថ្មី បទ “ទុក្ខស្រីប្ដីព្រាត់” ជាការសម្រេចរបស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

លោក ហ្វៃ សំអាង ជាទីប្រឹក្សាផ្ទាល់សម្ដេចអគ្គមហាសេនបតីតេជោ មានឋានៈស្មើ អនុរដ្ឋលេខាធិការ និងជាអ្នកដឹកនាំសម្ដែង ភាពយន្តចម្រៀង “ទុក្ខស្រីប្តីព្រាត់” ផងនោះ បានឱ្យ “កម្ពុជាថ្មី” ដឹងថា លោកធ្លាប់រួមការងារជាមួយ លោកស្រី ម៉េង កែវពេជ្ជតា តាំងពីគាត់អាយុ ១៥ឆ្នាំ ហើយលោកពេញចិត្តសំនៀងរបស់គាត់ណាស់ ដោយស្នាដៃចម្រៀងនិពន្ធជាច្រើន លោកបានផ្ដល់ជូនលោកស្រី ម៉េង កែវពេជ្ជតា ច្រៀង ហើយមានភាពល្បីល្បាញជាច្រើន។

លោក ហ្វៃ សំអាង មានប្រសាសន៍បន្តថា៖ “ដល់បទ “ទុក្ខស្រីប្ដីព្រាត់” ដែលជាចម្រៀងរឿងពិតរបស់ សម្ដេចតេជោ ហ៊ុន សែន និងសម្ដេច កិត្តិព្រឹទ្ធបណ្ឌិត លោកទាំងទ្វេបានឱ្យផលិតឡើងវិញជាភាពយន្តចម្រៀង។ ខ្ញុំចង់វែកញែករឿងហ្នឹងបន្តិចទៅដល់អ្នកគាំទ្រ ក្មួយស្រី ម៉េង កែវពេជ្ជតា ដែលកន្លងមកមានរឿងប្រទាំងប្រទើសតាមបណ្ដាញសង្គម ហើយខ្ញុំក៏អត់មានទៅបកស្រាយអីដែរ ព្រោះមានការងារច្រើន តែក្នុងឱកាសជួប “កម្ពុជាថ្មី” ពេលនេះ ខ្ញុំសូមបកស្រាយបន្តិច។ ករណីយើងទៅ Cover (ច្រៀងឡើងវិញ) ខណៈម្ចាស់សំនៀងដើមនៅរស់ សំណួរសួរថា មានដាក់ ឈ្មោះម្ចាស់សំនៀមដើម ឬអត់? បើដាក់ គឺជាការត្រឹមត្រូវ គឺយើងគោរពរៀមច្បង”។

លោក ហ្វៃ សំអាង បានរំលឹកថា កាលឆ្នាំ២០០០ ផលិតកម្ម ហង្សមាស បានផលិតខារ៉ាអូខេចម្រៀង បទ “ទុក្ខស្រីប្ដីព្រាត់” ឡើងវិញ ច្រៀងដោយ លោកស្រី ម៉េង កែវពេជ្ជតា ដដែល។ ប៉ុន្តែនៅពេលផលិតម្ដងទៀតថ្មីនេះ គឺត្រូវយកអ្នកចម្រៀងថ្មី និងតួសម្ដែងថ្មីថត ដើម្បីឱ្យស្នាដៃផលិតថ្មីទាំងអស់។

លោក ហ្វៃ សំអាង បញ្ជាក់បន្ថែមថា៖ “យើងមានការឆ្លងឯកភាព ពីសម្ដេចតេជោ ដោយយើងលើកយក អ្នកចម្រៀងចុងក្រោយ ២រូប ហើយលោក (សម្ដេចតេជោ ហ៊ុន សែន) អនុញ្ញាតសម្រេចយកសំឡេង ក្មួយស្រី មាស សុខសោភា។ ខ្ញុំយល់ណាស់ ខ្ញុំក៏បានដាក់សំនៀងដើម លោកស្រី ម៉េង កែវពេជ្ជតា ដែលមានន័យរក្សាសិទ្ធិ ផ្ដល់តម្លៃគ្រប់គ្រាន់”។

លោក ហ្វៃ សំអាង លើកឡើងថា បច្ចុប្បន្នសម្រាប់អ្នកយកចម្រៀងគេច្រៀងឡើងវិញ កុំភ្លេចដាក់ឈ្មោះ ម្ចាស់សំនៀងដើម។ តែបើបទចម្រៀងហ្នឹងជារបស់ក្រុមហ៊ុនណាចំណាយផលិត គឺត្រូវសុំអនុញ្ញាតពីម្ចាស់ក្រុមហ៊ុនសិន មិនមែនសុំពីអ្នកចម្រៀងទេ ព្រោះការរក្សាសិទ្ធិគឺ ក្រុមហ៊ុន ដោយអ្នកនិពន្ធ។

លោក ហ្វៃ សំអាង បញ្ជាក់ថា៖ “ដូចក្រុមហ៊ុនរបស់ខ្ញុំអ៊ីចឹង ហើយខ្ញុំក៏ជាអ្នកនិពន្ធ ដូចនេះ [អ្នកចង់ច្រៀងឡើងវិញ] ត្រូវមកទាក់ទងសុំខ្ញុំសិន។ នេះជាចំណុចដែលត្រូវផ្ដល់តម្លៃដល់ម្ចាស់ដើម ឯម្ចាស់ដើម ត្រូវសប្បាយចិត្ត មិនមែនខឹងទេ ពីព្រោះក្មេងៗជំនាន់ក្រោយ គេស្រឡាញ់ ទើបគេច្រៀងឡើងវិញ ហើយត្រូវរក្សាសិទ្ធិម្ចាស់ដើម។ ហើយមួយទៀត ក្នុងមេឡូឌីដើមរបស់គេ យើងអត់ត្រូវទៅកែរបស់គេទេ ពាក្យពេចន៍ប៉ារ៉ូលដែលគេនិពន្ធមក យើងអត់ត្រូវទៅកែឱ្យខុសនូវមួយពាក្យណាដែរ ត្រូវរក្សាច្បាប់ដើមទាំងអស់”។

លោក ហ្វៃ សំអាង លើកឡើងថា មានមហាជន និងតារាច្រៀងជំនាន់ក្រោយជាច្រើន បានយកចម្រៀងលោកទៅច្រៀងឡើងវិញ ហើយបានកែពាក្យពេចន៍ច្រើនណាស់ តែលោកអត់និយាយប្រកាន់ខឹង គ្រាន់តែលោកហួសចិត្ត ហើយអាណិតទៅវិញ។

គួររំលឹកថា ភាពយន្តចម្រៀង “ទុក្ខស្រីប្តីព្រាត់” ជាស្នាដៃនិពន្ធរបស់ សម្ដេចតេជោ ហ៊ុន សែន នាយករដ្ឋមន្ត្រី កម្ពុជា ត្រូវបានផលិតឡើងវិញ និងបានដាក់សម្ពោធជាផ្លូវការ កាលពីថ្ងៃទី៧ ខែមករា ឆ្នាំ២០២៣ នៅសាលសន្និសីទចតុមុខ រាជធានីភ្នំពេញ ក្រោមអធិបតីភាព លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ។ ភាយយន្តចម្រៀងនេះ ត្រូវបានផ្សាយផ្ទាល់ តាមបណ្ដាស្ថានីយ៍ទូរទស្សន៍ ព្រមទាំងមានការចែករំលែកជាច្រើនតាមបណ្ដាញសង្គម៕

អត្ថបទ៖ ច័ន្ទ វីរៈ

The post លោក ហ្វៃ សំអាង បកស្រាយលើកដំបូង៖ ការប្ដូរអ្នកច្រៀងថ្មីបទ “ទុក្ខស្រីប្ដីព្រាត់” ជាការសម្រេចរបស់ សម្ដេចតេជោ appeared first on Kampuchea Thmey Daily.

តារាសម្ដែងជើងចាស់ នារី រ័ត្នគន្ធា ត្រៀមជួបទស្សនិកជនក្នុងរឿងថ្មី បន្ទាប់ពីបាត់មុខ ២០ឆ្នាំ

KC Virak — Thu, 20 Oct 2022 23:30:00 +0000

បន្ទាប់ពីសម្ដែងជាតួនាងទាវ ក្នុងកម្រងវីដេអូចម្រៀង ខារ៉ាអូខេ រឿង ទុំទាវ កំឡុងឆ្នាំ ២០០០ មក តារាសម្ដែងតួស្លូតបូតទន់ភ្លន់ និងទឹកភ្នែក លោកស្រី នារី រ័ត្នគន្ធា បានបាត់ស្រមោលពីវិស័យសិល្បៈ។ នៅមុននេះ អ្នកដឹកនាំសម្ដែងរឿង បានឱ្យដឹងថា លោកស្រី នារី រ័ត្នគន្ធា នឹងមានវត្តមានជាថ្មី ក្នុងខ្សែភាពយន្តភាគខ្នាតធំ។

លោក ហ្វៃ សំអាង អ្នកដឹកនាំសម្ដែង បានឱ្យដឹងថា តួសម្ដែង នាងទាវ នៅក្នុងខ្សែរឿងចម្រៀង ខារ៉ាអូខេរបស់ផលិតកម្ម ហង្សមាស តារាសម្ដែងបែបស្រគត់ស្រគំ មនោសញ្ចេតនាទឹកភ្នែក គឺលោកស្រី នារី រត្ន័គន្ធា ដែលបានឃ្លាតឆ្ងាយពីការសម្ដែងជិតម្ភៃឆ្នាំមកហើយ គាត់នឹងមានវត្តមាននៅក្នុងខ្សែ ភាពយន្តភាគខ្នាតធំ រឿង “អប្សរាមហាអង្គរ”។

លោក ហ្វៃ សំអាង លើកឡើងបន្តថា លោកស្រី នារី រ័ត្នគន្ធា នឹងសម្ដែងជាតួអង្គដែលមានឈ្មោះថា ជម្ពូ ជាស្ត្រីដែលមានចំណេះដឹងខាងមេផ្ទះ មានរបៀបរៀបរយអប់រំមនុស្សនៅជុំវិញខ្លួន។ ជាស្ត្រីរក្សាភាពក្រមុំព្រហ្មចារិនី រហូតដល់អាយុជាងហាសិបឆ្នាំ បានខាបបេះដូងលោកសេដ្ឋី ម៉ៅស្វិតឈ្មោះ បរិបូណ៌ ដែលសម្ដែងដោយនាយក្រឹម ឱ្យលង់ស្នេហ៍យ៉ាងរោលរាល។

អ្នកដឹកនាំល្បីឈ្មោះរូបនេះ បញ្ជាក់ថា ដោយទឹកចិត្ត និងបេះដូងពេញប្រៀបទៅដោយការស្រឡាញ់សិល្បៈ ទេីបលោកស្រី នារី រ័ត្នគន្ធា លះបង់ពេលវេលាហោះហេីរពីសហរដ្ឋអាមេរិកទទួលការសម្ដែងរឿងនេះ។

គួរបញ្ជាក់ថា អ្នកនាង នារី រ័ត្នគន្ធា គឺជាអតីតតារាសម្តែងជំនាន់ឆ្នាំ ៨០-៩០ ដ៏ល្បីល្បាញមួយរូប ដែលអ្នកនាងត្រូវបានអ្នកគាំទ្រចាត់ទុកជាតារាទឹកភ្នែក និយមដើរតួកម្សត់ ដែលដៃគូស័ក្តិសមរបស់អ្នកនាងនោះគឺលោក ច័ន្ទ រិទ្ធមេធានី និង តារាប្រុសល្បីៗមួយចំនួនទៀត។ អ្នកនាងធ្លាប់បានសាងស្នាដៃក្នុងរឿងជាច្រើនដូចជា “កំលោះឆ្នាំ ៩១” “បុប្ផាភ្នំពេញ” រឿង “ផ្លូវបែកជាបី” “មរណមាតា” ជាដើម។

ក្រោយពីចាកឆ្ងាយពីវិស័យសិល្បៈ នៅក្នុងកំឡុងឆ្នាំ ២០០១ លោកស្រី នារី រ័ត្នគន្ធា បានចេញទៅរស់នៅសហរដ្ឋអាមេរិក បន្ទាប់ពីបានអាពាហ៍ពិពាហ៍ជាមួយស្វាមីឈ្មោះ ផល្លី ជាទាហានធ្វើការលើកប៉ាល់។ បច្ចុប្បន្ន លោកស្រី និងស្វាមី រួមទាំងកូនៗទាំងពីរ កំពុងរស់នៅក្នុងរដ្ឋអាយលែន និងមានមុខរបរបើកហាងមួយយីហោ “នារី រ័ត្នគន្ធា New Collection” មានលក់សំលៀកបំពាក់ខ្មែរ និងវត្ថុបុរាណខ្មែរ៕

អត្ថបទ៖ ច័ន្ទ វីរៈ

The post តារាសម្ដែងជើងចាស់ នារី រ័ត្នគន្ធា ត្រៀមជួបទស្សនិកជនក្នុងរឿងថ្មី បន្ទាប់ពីបាត់មុខ ២០ឆ្នាំ appeared first on Kampuchea Thmey Daily.

លោក ហ្វៃ សំអាង បានជួប បានដឹងពីការឈឺចាប់ ការស្អប់ របស់សម្ដេចតេជោ ហ៊ុន សែន

KC Virak — Thu, 29 Sep 2022 05:13:21 +0000

ភាពយន្តចម្រៀងប្រវត្តិរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា គឺបទ “ជីវិតក្មេងវត្ត” បានធ្វើឱ្យមហាជនចាប់អារម្មណ៍ជាខ្លាំង មិនត្រឹមតែប្លង់ បច្ចេកទេសថត សកម្មភាពសម្ដែង ទិដ្ឋភាពកាលពីអតីតកាល ជាង៥០ឆ្នាំមុនជាដើម។ ពិសេសឈុតឆាកមួយ កាលពីសម្ដេចតេជោសិក្សាថ្នាក់វិទ្យាល័យ ហើយត្រូវបានកូនមន្ត្រីមើលងាយជាដើមនោះ មានការងឿងឆ្ងល់ថា តើជារឿងពិត ឬអ្នកនិពន្ធប្រឌិតបន្ថែម?

“កម្ពុជាថ្មី” បានជួបសម្ភាស អ្នកដឹកនាំសម្ដែងផ្ទាល់ ដើម្បីជជីកសួរលម្អិតបន្ថែម។

លោក ហ្វៃ សំអាង អ្នកនិពន្ធ និងជាអ្នកដឹកនាំសម្ដែង បានមានប្រសាសន៍ថា ចំពោះប្រវត្តិរបស់សម្ដេចជោ នាយករដ្ឋមន្ត្រី ថ្វីដ្បិតតែលោកបានសិក្សាស្រាវជ្រាវតាមឯកសាររបស់លោកសម្ដេចតេជោ ក៏ដូចជាស្រាវជ្រាវតាមសៀវភៅដែលអ្នកនិពន្ធបានសរសេរហើយក្ដី ក៏លោកនៅត្រូវជម្រាបសួរសម្ដេចតេជោបន្ថែម ដ្បិតឈុតខ្លះអត់មានលម្អិត អត់បញ្ជាក់ពេលវេលា ថ្ងៃខែ តួអង្គ និងសម្ដីតួអង្គនោះទេ។

លោក ហ្វៃ សំអាង បញ្ជាក់ថា៖ “សម្រាប់ខ្ញុំ ខ្ញុំធ្វើភាពយន្ត ត្រូវមានរូបភាពមកបង្ហាញទស្សនិកជន, នេះជាការលំបាក។ អ៊ីចឹង ខ្ញុំត្រូវការជួបលោក (សម្ដេចតេជោ) ផ្ទាល់ ដើម្បីលោកបានផ្ដល់អនុសាសន៍ល្អៗសម្រាប់ខ្ញុំ នូវអ្វីដែលខ្ញុំឆ្ងល់ នូវអ្វីដែលខ្ញុំចង់ដឹងនូវឈុតឆាកសំខាន់ៗក្នុងរឿង ដែលខ្ញុំត្រូវជ្រើសរើសយកមកថតហ្នឹង”។

អ្នកនិពន្ធ និងដឹកនាំសម្ដែងរូបនេះ បញ្ជាក់បន្ថែមថា ដូចករណីជាពេលសម្ដេចតេជោកាលនៅពីក្មេងបានអញ្ជើញទៅកម្មវិធីខួបកំណើត យើងត្រូវឆ្ងល់ថាមានអ្នកណាខ្លះ ដើម្បីយើងរំលេច ពាក្យពេចន៍អ្វីខ្លះដែលយើងត្រូវប្រើនៅក្នុងឈុតនោះ។ ដូចជា ឃ្លា អ្នកបានខ្ពង់ខ្ពស់ហើយ ម្ដេចឡើយអ្នកមើលងាយអ្នកទាប អ្នកមានប៉ុន្តែក្រ អ្នករូបល្អ ប៉ុន្តែអាក្រក់ សុទ្ធតែជាអត្តន័យល្អៗរបស់សម្ដេច។

លោក ហ្វៃ សំអាង មានប្រសាសន៍ថា៖ “នៅពេលនោះ លោកជាកូនកសិករមកពីជនបទ។ ខ្ញុំក៏ជាកូនអ្នកជនបទមករៀននៅរាជធានីដែរ អ៊ីចឹងយើងដឹង អ្នកជនបទបែបណាក្នុងកែវភ្នែកអ្នកទីក្រុង អ្នកទីក្រុងខ្លះមានការរើសអើង។ អ៊ីចឹងហើយ យើងត្រូវផ្ដិតយកកន្លែងហ្នឹងមកបង្ហាញ ព្រោះវាជាសារសំខាន់សម្រាប់មនុស្សទូទៅដែរ។ បើយើងបានខ្ពង់ខ្ពស់ហើយ យើងកុំមើលងាយអ្នកទាបជាងយើង”។

លោក ហ្វៃ សំអាង មានប្រសាសន៍បន្តថា៖ “យើងក្រ ក្រតែទ្រព្យទេ តែយើងមាន គឺមានទឹកចិត្ត មានសុជីវធម៌ មានគុណធម៌ នេះជាចំណុចសំខាន់នៅក្នុងជីវិត។ សម្ដេចលោកស្អប់ណាស់ ការរើសអើងប្រកាន់វណ្ណៈ! អ៊ីចឹងបានក្នុងសាច់រឿងដែលលោកធ្លាប់ជួប ធ្លាប់ឈឺចាប់ យើងបានយកមកបង្ហាញក្នុងភាពយន្ត”។

លោក ហ្វៃ សំអាង បានឱ្យដឹងថា ភាពយន្តបញ្ជាក់តថភាពនៅក្នុងសង្គម ហើយបើមានជីវិតពិតប្រាកដយកមកថត យកមកដឹកនាំសម្ដែង គឺធ្វើឱ្យលោកកាន់តែពុះកញ្ជ្រល ធ្វើឱ្យលោកពេញចិត្តស្រាវជ្រាវ ពេញចិត្តដឹកនាំ ឱ្យខ្សែភាពយន្តនោះកាន់តែល្អ។

គួរបញ្ជាក់ថា ចម្រៀង “ជីវិតក្មេងវត្ត” ជាស្នាដៃនិពន្ធ របស់សម្ដេចតេជោ ហ៊ុន សែន នៅឆ្នាំ ១៩៩៦ សំនៀង ដើមលោក យិន សារិន និងច្រៀងឡើងវិញដោយលោក ជិន វឌ្ឍនា។ ភាពយន្តចម្រៀង “ជីវិតក្មេងវត្ត” ថ្មីនេះ មានរយៈពេលជាង ៣០ នាទី ប្រើពេលថត និងកាត់តជិតមួយឆ្នាំ និងចំណាយអស់ទឹកប្រាក់ប្រមាណ ១២ ម៉ឺនដុល្លារ។ ផលិតករ ៣ រូបគឺ លោកស្រី ចន ច័ន្ទលក្ខិណា ឧកញ៉ា ហេង ឡុង និង ឧកញ៉ា អ៊ឹង លីហេង។

ក្នុងនោះ អ្នកឧកញ៉ា ឡេង ណាវ៉ាត្រា ឧបត្ថម្ភបច្ចេកទេសថត និងសម្ភារៈបម្រើឱ្យការផលិត។ តួអង្គសម្តែងមានដូចជា អ្នកគ្រូ ឌី សាវ៉េត កញ្ញា ឌួង សូរីដា លោក ឈឹម សក្កដា លោក ប៉ាន់ មាឌូ កញ្ញ នីតា វររង្ស លោក ម៉េង ប៊ុនឡូ លោក ពៅ ពិសិដ្ឋ អ្នកនាង លី ម៉ារីណា និងមានតួអង្គជាច្រើនទៀត៕

អត្ថបទ៖ ច័ន្ទ វីរៈ

The post លោក ហ្វៃ សំអាង បានជួប បានដឹងពីការឈឺចាប់ ការស្អប់ របស់សម្ដេចតេជោ ហ៊ុន សែន appeared first on Kampuchea Thmey Daily.

មូលហេតុ ភាពយន្តចម្រៀង “ជីវិតក្មេងវត្ត” ចំណាយពេលផលិតជិត ១ ឆ្នាំ

KC Virak — Thu, 29 Sep 2022 00:42:52 +0000

ភាពយន្តចម្រៀងប្រវត្តិសាស្ត្រ “ជីវិតក្មេងវត្ត” ត្រូវបានដាក់សម្ពោធផ្សព្វផ្សាយជាសាធារណៈ នៅថ្ងៃទី២៨ ខែកញ្ញា ឆ្នាំ២០២២នេះ។ ខ្សែភាពយន្តចម្រៀងនេះ ត្រូវបាន សមាគមសិល្បករខ្មែរ ចំណាយថវិកាអស់ជាង ១២ ម៉ឺនដុល្លារ និងប្រើពេលផលិតអស់ជិត មួយឆ្នាំ។

លោក ហ្វៃ សំអាង អ្នកដឹកនាំសម្ដែង ខ្សែភាពយន្តចម្រៀង “ជីវិតក្មេងវត្ត មានប្រសាសន៍ប្រាប់ “កម្ពុជាថ្មី” ថា លោកសប្បាយរីករាយដែលបានដឹកនាំសម្ដែង ខ្សែភាពយន្តចម្រៀង “ជីវិតក្មេងវត្ត” ជាលើកទី២ ខណៈកាលពី ២២ ឆ្នាំមុន លោកបានការដឹកនាំសម្ដែងចម្រៀងនេះម្ដងរួចមកហើយ។ លោកបន្ថែមថា កាលពីមុន អ្នកដឹកនាំសម្ដែងចម្រៀងខារ៉ាអូខេ អាចផលិត បាន ៣ បទ ក្នុង ១ថ្ងៃ ប៉ុន្តែក្នុងសម័យនេះ ចំពោះវណ្ណកម្មភាពយន្តចម្រៀងនេះ គឺប្រើពេលជិតមួយឆ្នាំ។

លោក ហ្វៃ សំអាង បញ្ជាក់ថា៖ “ភាពយន្តចម្រៀងមានរយៈពេល ៣០ នាទី ប៉ុន្តែយើងប្រើពេលជិត មួយឆ្នាំ។ និយាយទៅ យើងចេញថត នៅខែមករា ឆ្នាំ២០២២នេះ រហូតបើកសម្ពោធនៅថ្ងៃនេះ មានរយៈពេលជិត ៩ខែ។ ប៉ុន្តែបើយើងរាប់តាំងពីរើសតួសម្ដែង រើសទីតាំងថត និងកិច្ចការផ្សេងៗទៀតនោះ មានរយៈពេលជិតមួយឆ្នាំ”។

លោក ហ្វៃ សំអាង បានឱ្យដឹងបន្តថា ការផលិតខ្សែភាពយន្តចម្រៀង “ជីវិតក្មេងវត្ត” នេះ ជួបបញ្ហាលំបាកបន្ថែមមួយចំនួនទាក់ទងនឹងទីតាំងសាច់រឿងជាក់ស្ដែង ដែលមកដល់បច្ចុប្បន្ន ទីតាំងទាំងនោះមានការអភិវឌ្ឍខុសប្លែងគ្នាខ្លាំង។

លោក ហ្វៃ សំអាង មានប្រសាសន៍បន្តថា៖ “សាច់រឿងត្រូវផ្ដិតរូបភាពនៅ វត្តនាគវន្ត វិទ្យាល័យឥន្ទ្រទេវី ដោយសារបច្ចុប្បន្នមានការអភិវឌ្ឍ អ៊ីចឹងវត្តនាគវន្តបានប្រែប្រួល កុដិពីដើមដែលលោក (សម្ដេចតេជោ) ជាកុដិឈើ ប៉ុន្តែបច្ចុប្បន្ន គឺជាកុដិថ្មអស់ហើយ យើងអត់អាចផ្ដិតទិដ្ឋភាពនៅទីនោះ ដូចកាលពី ២២ ឆ្នាំមុនទេ។ អ៊ីចឹង យើងត្រូវស្វែងរកទីអារាមណា នៅតាមទីជនបទដែលមានកុដិ មានទិដ្ឋភាពប្រហាក់ប្រហែលនឹងវត្តនាគវ័ន្ត កាលពីឆ្នាំ១៩៦៥”។

លោក ហ្វែ សំអាង មានប្រសាសន៍បន្តថា៖ “រឿងសំខាន់ខ្លាំងនោះ គឺជុំវិញវិទ្យាល័យ ឥន្ទ្រទេវី មានការអភិវឌ្ឍ មានអគារខ្ពស់ៗ ខុនដូខ្ពស់ៗ។ ពេលយើងចាប់ប្លង់ទៅ គឺខុសសម័យកាលពេលលោក (សម្ដេចតេជោ) មកសិក្សា។ អ៊ីចឹងយើងត្រូវប្រើបច្ចេកទេសក្រាហ្វិកកុំព្យូទ័រដើម្បីលុបដោយលំបាក ដែលយើងប្រើពេលយូរ”។

លោកស្រី ចន ច័ន្ទលក្ខិណា ប្រធានសមាគមសិល្បករខ្មែរ បានឱ្យដឹងថា ខ្សែភាពយន្តចម្រៀង “ជីវិតក្មេងវត្ត” មានរយៈពេល ៣១ នាទី ដែលមានអត្ថន័យ អត្ថរស និងខ្លឹមសារគ្រប់គ្រាន់ស្របតាមសាច់រឿងពិតរបស់សម្ដេចតេជោ។ លោកស្រី បញ្ជាក់ថា ភាពយន្តចម្រៀងនេះ ត្រូវផលិតឡើងដោយយកចិត្តទុកដាក់ និងសម្រិតសម្រាំងបំផុតពីគណៈគ្រប់គ្រងភាពយន្តដែលប្រើពេលថត និងកាត់តជិតមួយឆ្នាំ និងចំណាយអស់ទឹកប្រាក់ប្រមាណ ១២ ម៉ឺនដុល្លារ។

លោកស្រី ចន ច័ន្ទលក្ខិណា លើកឡើងបន្តថា៖ “ក្រុមផលិតបានជួបនូវឧបសគ្គមួយចំនួន ដូចជាការស្វែងរកទីតាំងថត ស្ថានភាពអាកាសធាតុក្ដៅ ភ្លៀង ស្ថានភាពធ្វើដំណើរ និងបញ្ហាមួយចំនួនទៀត ប៉ុន្តែក្រុមផលិតបានពួតដៃគ្នាធ្វើកិច្ចការងារប្រកបដោយជោគជ័យ។ តួយ៉ាងទីតាំងលក្ខណៈបុរាណ មួយចំនួនត្រូវបានអភិវឌ្ឍកែប្រែមុខមាត់ថ្មីដោយសារម្លប់សន្តិភាពក្រោមការដឹកនាំដ៏ឆ្លៀសររបស់សម្តេចពុក ម្ល៉ោះហើយយើងមានការលំបាកក្នុងការស្វែងរកទីតាំងថត ប៉ុន្តែយើងខ្ញុំជាកូនជាចៅសប្បាយចិត្តពេលឃើញ ប្រទេសយើងមានការរីកចម្រើន”។

គួរបញ្ជាក់ថា ចម្រៀង “ជីវិតក្មេងវត្ត” ជាស្នាដៃនិពន្ធ របស់សម្ដេចតេជោ ហ៊ុន សែន នៅឆ្នាំ ១៩៩៦ សំនៀង ដើមលោក យិន សារិន និងច្រៀងឡើងវិញដោយលោក ជិន វឌ្ឍនា។ ភាពយន្តចម្រៀង “ជីវិតក្មេងវត្ត” មានផលិតករ ៣ រូបគឺ លោកស្រី ចន ច័ន្ទលក្ខិណា ឧកញ៉ា ហេង ឡុង និង ឧកញ៉ា អ៊ឹង លីហេង។ ក្នុងនោះ អ្នកឧកញ៉ា ឡេង ណាវ៉ាត្រា បានឧបត្ថម្ភបច្ចេកទេសថត និងសម្ភារៈបម្រើឱ្យការផលិត។ តួអង្គសម្តែងមានដូចជា អ្នកគ្រូ ឌី សាវ៉េត កញ្ញា ឌួង សូរីដា លោក ឈឹម សក្កដា លោក ប៉ាន់ មាឌូ កញ្ញ នីតា វររង្ស លោក ម៉េង ប៊ុនឡូ លោក ពៅ ពិសិដ្ឋ អ្នកនាង លី ម៉ារីណា និងមានតួអង្គជាច្រើនទៀត៕

អត្ថបទ៖ ច័ន្ទ វីរៈ

The post មូលហេតុ ភាពយន្តចម្រៀង “ជីវិតក្មេងវត្ត” ចំណាយពេលផលិតជិត ១ ឆ្នាំ appeared first on Kampuchea Thmey Daily.

លោក ហ្វៃ សំអាង Archives - Kampuchea Thmey Daily

ផេកផ្លូវ​ការ លោក ហ្វៃ សំអាង ត្រូវពួកជ្រុលនិយមថៃ report និងចេញមតិវាយប្រហារឈុតក្នុងរឿង “អប្សរា​មហាអង្គរ”

លោក ហ្វៃ សំអាង ប្រាប់តារាសម្តែងមួយចំនួនថា បេីមិនចេះគាំទ្រខ្លួនឯងផង កុំស្រែកហៅឱ្យគេគាំទ្រ​

លោក ហ្វៃ សំអាង ៖ ក្នុងនាមជាកូនខ្មែរ ត្រូវតែជួយផ្សព្វផ្សាយគុន”ល្បុក្កតោ” ទៅកាន់ពិភពលោក

ផលិតករសរសើរ ទេព រិន្ទដារ៉ូ ប៉ះគ្នាជាថ្មីជាមួយដៃគូចាស់ អម្ពរ ទេវី ក្រោយបែកគ្នាយូរឆ្នាំ

តារាសម្ដែងជើងចាស់ នារី រ័ត្នគន្ធា ត្រៀមជួបទស្សនិកជនក្នុងរឿងថ្មី បន្ទាប់ពីបាត់មុខ ២០ឆ្នាំ

លោក ហ្វៃ សំអាង បានជួប បានដឹងពីការឈឺចាប់ ការស្អប់ របស់សម្ដេចតេជោ ហ៊ុន សែន

មូលហេតុ ភាពយន្តចម្រៀង “ជីវិតក្មេងវត្ត” ចំណាយពេលផលិតជិត ១ ឆ្នាំ

ផេកផ្លូវការ លោក ហ្វៃ សំអាង ត្រូវពួកជ្រុលនិយមថៃ report និងចេញមតិវាយប្រហារឈុតក្នុងរឿង “អប្សរាមហាអង្គរ”

លោក ហ្វៃ សំអាង ប្រាប់តារាសម្តែងមួយចំនួនថា បេីមិនចេះគាំទ្រខ្លួនឯងផង កុំស្រែកហៅឱ្យគេគាំទ្រ