សៀវភៅមហាសង្ក្រាន្តឆ្នាំម្សាញ់ បានសរសេរ ពីទំនាយថ្ងៃមហាសង្ក្រាន្ត ពោល គឺនៅថ្ងៃចូលឆ្នាំ ត្រូវនឹងថ្ងៃចន្ទ អ្នកកើតឆ្នាំម្សាញ់នឹងចាញ់សេនាបតី អ្នកធំ ឧកញ៉ា លោកជំទាវទាំងឡាយ។ ត្រង់ចំណុចនេះ សៀវភៅបានបញ្ជាក់ថា ចាញ់មានន័យថា ខូចបុណ្យស័ក្តិ អន់រាសី មានវិបត្តិ។ បន្ថែមពីនេះ សៀវភៅបញ្ជាក់ទៀតថា៖ “ភ្លៀងនឹងមានដើមឆ្នាំ ស្រូវអង្ករល្អណាស់ តែមនុស្សនៅជួបផលលំបាកឱ្យក្រែងប្រយ័ត្ន ក្សត្រ និងមន្ត្រី ជំទាវខុណ្ណាង ធ្វើអាក្រក់ធ្វើបាបនឹងកើតមានការតស៊ូរើបំរះ មនុស្សនឹងកើតជំងឺតម្កាត់ច្រើន”។

ក្រៅពីទំនាយថ្ងៃមហាសង្ក្រាន្ត ក៏មានទំនាយថ្ងៃវ័នបត ដែលត្រូវនឹងថ្ងៃអង្គារ ទំនាយថា ឆ្នាំនោះស្លា ម្លូ ស្រូវ អង្ករ ត្រី សាច់នឹងថ្លៃ អាមាត្រ មន្ត្រី នឹងខូចបុណ្យស័ក្តិ ឬត្រូវក្តៅក្រហាយចិត្តយ៉ាងច្រើន។ ចុងក្រោយ គឺ ទំនាយថ្ងៃឡើងស័ក ត្រូវនឹងថ្ងៃពុធ ទំនាយថា ឆ្នាំនោះ រាជបណ្ឌឹត បរោហិត អាចារ្យហោរា និងមានសេចក្តីសុខសម្រាន្តជាអនេក ប៉ុន្តែ មានដង្កូវ ក្រា ស៊ីស្រូវ។ នេះបើតាមសៀវភៅមហាសង្ក្រាន្តរបស់ បណ្ឌិត អ៉ឹម បុរិន្ទ។

សូមជម្រាបថា សម្រាប់ថ្ងៃចូលឆ្នាំ ឆ្នាំម្សាញ់នេះ ត្រូវនឹងថ្ងៃចន្ទ ទី១៤ ខែមេសា ឆ្នាំ២០២៥ វេលាម៉ោង ៤៖៤៨នាទីទៀបភ្លឺ ជាថ្ងៃចូលឆ្នាំ (វារៈមហាសង្ក្រាន្ត)។ ថ្ងៃអង្គារ ទី១៥ ខែមេសា ជាវារៈវន័បត។ ថ្ងៃពុធ ទី១៦ ខែមេសា ម៉ោង ៨៖២៧នាទី ៣៦វិនាទី ជាវារៈឡើងស័ក គម្រប់ជាសង្ក្រាន្ត ៣ថ្ងៃ ស្រេចបរិបូណ៌ចូលជាសកល ឆ្នាំម្សាញ់ សប្តស័ក មហាសករាជ ១៩៤៧ ចុល្លសករាជ ១៣៨៧ តទៅ។

ទេវាតាឆ្នាំម្សាញ់ ព្រះនាម គោរាគៈទេវី ជារាជបុត្រីទី២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនៅព្រះកាណ៌ដោយ សៀតផ្កាអង្គារបស្ស អភរណៈ កែវមុក្តា ភក្សាហារទ្រង់ តេលំ (ប្រេង) ព្រះហស្តស្តាំ ទ្រង់ ព្រះខ័ន្ធព្រហស្តឆ្វេងទ្រង់ ឈើច្រត់ ទ្រង់គង់ផ្ទំបិទព្រះនេត្រលើខ្នងស្តេចព្យាសៈ (ខ្លា) ជាយានពាហនៈ៕

The post ទំនាយតាមថ្ងៃសង្ក្រាន្តក្នុងឆ្នាំម្សាញ់៖ អ្នកធំ មន្រ្តី ឧកញ៉ា នឹងខូចបុណ្យស័ក្តិ appeared first on Kampuchea Thmey Daily.

ចន្ទគ្រាសទាំងស្រុង ត្រូវបានបាំងពន្លឺពេញដោយផែនដី។ ចំណែកឯជាយចន្ទគ្រាស គឺព្រះចន្ទត្រូវបានបាំងដោយផែនដីតែពាក់កណ្តាល។ ហេតុនេះ ព្រះចន្ទក្លាយជាមានពណ៌ក្រហម ព្រោះព្រះចន្ទ បានទទួលចំណាំងពន្លឺព្រះអាទិត្យដែលចាំងប៉ះនឹងបរិយាកាសជុំវិញនៃផែនដីដែលមានពណ៌ខៀវ។

ចំណែកសូរ្យគ្រាស គឺជាបាតុភូតធម្មជាតិមួយដែលអាចមើលឃើញពីផែនដី នៅពេលដែលដំណើរគោលចរនៃព្រះចន្ទឆ្លងកាត់ចន្លោះផែនដីនិងព្រះអាទិត្យ ហើយបានបាំងពន្លឺព្រះអាទិត្យ។

បើតាមឯកសាររបស់បណ្ឌិត អ៉ឹម បូរិន្ទ និងគណនាដោយលោកបណ្ឌិតផ្ទាល់ បានបង្ហាញថា នៅក្នុងឆ្នាំ២០២៥ មានបាតុភូតចន្ទគ្រាស២ដង និងសូរ្យគ្រាស២ដង នៅតាមតំបន់ផ្សេងៗក្នុងពិភពលោក ក្នុងនោះ កម្ពុជាក៏អាចមើលឃើញបាន ១ដង ដែរ ដូចជា៖

នៅថ្ងៃទី១៤ ខែមីនា ឆ្នាំ២០២៥ មានចន្ទគ្រាសកើតឡើងដែលអាចមើលឃើញនៅទ្វីបអឺរ៉ុប អាស៊ីភាគច្រើន អូស្រ្តាលីភាគច្រើន អាហ្វ្រិក អាមេរិកជើងឆៀងខាងត្បូង ប៉ាស៊ីហ្វិក អាត្លង់ទិក អាក់ទិក អង់តាក់ទិក ចាប់ពីម៉ោង ១២ និង១០នាទី បញ្ចប់វិញនូវម៉ោង ១៥និង ៤៨នាទី។ ចន្ទគ្រាសនេះ ឯកសារបញ្ជាក់ថា នៅកម្ពុជាមើលមិនឃើញឡើយ។

សម្រាប់ថ្ងៃទី២៩ ខែមីនា ឆ្នាំ២០២៥ សូរ្យគ្រាសនឹងកើតមានដោយអាចមើលឃើញនៅអឺរ៉ុប អាស៊ីខាងជើង អាហ្រ្វិកខាងជើង និងខាងលិច អាមេរិកខាងជើង និងខាងត្បូង អាត្លង់ទិក អាក់ទិក នៅម៉ោង ១៥ និង៥១នាទី ដល់ម៉ោង ១៩ និង៤៤នាទី។ សម្រាប់នៅកម្ពុជា គឺមើលមិនឃើញដូចគ្នា។

បាតុភូតមួយទៀត​គឺនៅថ្ងៃទី៧ ទី៨ ខែកញ្ញា ឆ្នាំ២០២៥ នឹងមានចន្ទគ្រាសកើតឡើង ដោយចាប់ផ្តើមពីម៉ោង ២៣ និង២៧នាទី បញ្ចប់នៅម៉ោង ០២ និង ៥៩នាទី ហើយក្នុងរាជធានីភ្នំពេញនៃប្រទេសកម្ពុជា គឺមើលឃើញជាទេ។ សម្រាប់បាតុភូតនេះ ក៏អាចមើលឃើញនៅអឺរ៉ុប អាស៊ី អូស្ត្រាលីខាងលិច និងខាងជើង អាមេរិក អាមេរិកខាងត្បូង ប៉ាស៊ីហ្វិក អាត្លង់ទិក មហាសមុទ្រឥណ្ឌា អាក់ទិក និងអង់តាក់ទិក។

បាតុភូតលើកទី៤ ក្នុងឆ្នាំ២០២៥ នៅថ្ងៃទី២២ ខែកញ្ញា ឆ្នាំ២០២៥ នឹងកើតមានសូរ្យគ្រាស ចាប់ពីម៉ោង ០២ និង៤៣នាទី ដល់ម៉ោង០៤ និង ៥៤នាទី។ សូរ្យគ្រាសនេះមិនអាចមើលឃើញនៅកម្ពុជាទេ តែអាចមើលឃើញនៅភាគខាងត្បូងនៃប្រទេសអូស្ត្រាលី ប៉ាស៊ីហ្វិក អាត្លង់ទិក អង់តាក់ទិក៕

The post បាតុភូតគ្រាសជាអ្វី? នៅក្នុងឆ្នាំ ២០២៥ បាតុភូតគ្រាសមាន ៤ដង ហើយកម្ពុជាក៏អាចមើលឃើញ១ដងដែរ appeared first on Kampuchea Thmey Daily.

ព្រឹទ្ធាចារ្យ អ៊ឹម បុរិន្ទ អនុប្រធាន អចិន្ត្រៃយ៍ នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ មានប្រសាសន៍ប្រាប់ “កម្ពុជាថ្មី” ថា ការទស្សន៍ទាយរបស់លោក គឺធ្វើតាមក្បួនខ្មែរពីបុរាណ ដោយបង្ហាញដួងជតា អ្នកកើតឆ្នាំទាំង១២ ក្នុងឆ្នាំរោងនេះ មាន ៣ថ្នាក់ គឺឆ្នាំរាសីឡើងខ្ពស់ ឡើងទាំងកិច្ចការងារ សុខភាព មុខរបររីកចម្រើនល្អ មានឆ្នាំ ជូត វត រកា។ ចំណែក អ្នកមានរាសីមធ្យម គឺឆ្នាំ ខាល មមី ម្សាញ់ កុរ និង អ្នករាសីមិនល្អមានឆ្នាំ ច រោង ថោះ មមែ ឆ្លូវ។

ព្រឹទ្ធាចារ្យ អ៊ឹម បុរិន្ទ មានប្រសាសន៍បន្តថា ទោះអ្នកកើតចំមិនរាសីល្អ ឬរាសីមិនសូវល្អក៏ដោយ គឺនៅស្ថិតលើការព្យាយាម ខិតខំប្រឹងប្រែងដែរ។ បើថារាសីល្អហើយ ប៉ុន្តែមិនធ្វើការងារ ក៏មិនអាចទទួលផល។ ចំណែកអ្នកឆ្នាំរាសីធ្លាក់ ក៏មិនត្រូវដេកដួលថា មិនធ្វើការងារ ឬបោះទុនធ្វើជំនួញដែរ គ្រាន់តែត្រូវប្រុងប្រយ័ត្ន ក្នុងការធ្វើការ ឬបោះទុន ទាំងឡាយឱ្យបានល្អិតល្អន់ នោះអាចប្រសើរហើយ។

ព្រឹទ្ធាចារ្យ អ៊ឹម បុរិន្ទ មានប្រសាសន៍បន្តថា៖ “ខ្ញុំសូមជម្រាបថា ក្បួនហោរា មិនមែននិយាយថា ល្អ ឬអាក្រក់គឺពិត ១០០% ទេ សំខាន់ពេលណារាសីយើងដាក់ យើងអាចកែ យើងអាចប្រុងប្រយ័ត្ន។ បើសិនក្បួនថា អាក្រក់ យើងនឹងទទួលផលអាក្រក់នោះ អ៊ីចឹងគេមិនបាច់ធ្វើក្បួនទេ ចាំថ្ងៃណាមកដល់ ចាំទទួលហ្មងទៅ តែមានក្បួនគឺដើម្បីយើងប្រុងប្រយ័ត្ន”។

ព្រឹទ្ធាចារ្យ អ៊ឹម បុរិន្ទ មានប្រសាសន៍ថា បើអ្នកកើតឆ្នាំរាសីមិនល្អ គឺអាចបញ្ចៀសគ្រោះដោយធ្វើពិធីកាត់គោះ បំបាត់គ្រោះ ឬលើករាសី ដោយអាចធ្វើពិធីរំដោះគ្រោះនេះជាមួយព្រះសង្ឃ ឬគ្រូអាចារ្យដែលមានជំនាញ ឬគេអាចដាក់បាត្រព្រះសង្ឃឱ្យបានញឹកញាប់ សុំឱ្យម្ដាយឪពុកស្រោចទឹក និងខំធ្វើល្អ អាចពន្លែងសត្វជាដើម។

ព្រឹទ្ធាចារ្យ អ៊ឹម បុរិន្ទ មានប្រសាសន៍បន្តថា៖ “គ្រោះដែលកើតឡើង អាស្រ័យលើម្ចាស់កម្មពៀរ មានកម្មពៀរជាមួយអ្នកណា នៅពេលណា ហើយពេលបច្ចុប្បន្ននេះ អាចគ្រោះនោះមកទាន់ ឬមិនទាន់ ក៏អាស្រ័យអំពើយើងធ្វើដែរ។ បើយើងធ្វើល្អរហូត គ្រោះទាំងឡាយ ឬកម្មពៀរទាំងឡាយនោះ មិនអាចមកជួបយើងបានដែរ”។

ព្រឹទ្ធាចារ្យ អ៊ឹម បុរិន្ទ បានផ្ដាំថា សូមអស់ប្រជាពលរដ្ឋប្រុសស្រីផងទាំងឡាយ ខំលះបង់ចិត្តអាក្រក់អន្យតិរ្ថីយ ជាចិត្តអប្រីយ៍ជាប់ដោយគំនុំគុំគួនព្យាបាទ ឈ្នានីស ដែលកើតមានក្នុងឆ្នាំចាស់ឱ្យជ្រះស្រឡះ តាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និង បញ្ញា ធ្វើបុណ្យទានតាមប្រពៃណី រក្សាសីលប្រាំឱ្យបានជាប់ជានិច្ច នោះទេវតានឹងឱ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ។

គួរបញ្ជាក់ថា ឆ្នាំថ្មីឆ្នាំរោងនេះ សង្ក្រាន្តនឹងចូលនៅថ្ងៃសៅរ៍ ៥កើត ខែចេត្រ ពទ្ធសករាជ ២៥៦៧ ត្រូវនឹងថ្ងៃទី១៣ ខែមេសា គ្រិស្តសករាជ ២០២៤ វេលាម៉ោង ២២ និង ២៤នាទី។ ទេវធីតាមួយព្រះអង្គជាមគ្គនាយិកា ព្រះនាម មហោធរទេវី ជារាជបុត្រីទី៧ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌ខៀវ លម្អនៅព្រះកាណ៌ដោយសៀត ផ្កាត្រកៀត អភរណៈ និលរតន៍ (ត្បូងពណ៌ខៀវ ឬ ត្បូងកណ្ដៀង) ភក្សាហារទ្រង់ សាច់ទ្រាយ ព្រះហស្តស្តាំទ្រង់ កងចក្រ ព្រហស្តឆ្វេងទ្រង់ត្រីសូល៍ ទ្រង់គង់ផ្ទំបើកព្រះនេត្រនៅលើខ្នងស្តេចមយូរា (ក្ងោក) ជាយានពាហនៈ៕

អត្ថបទ៖ ច័ន្ទ វីរៈ

The post ឆ្នាំរោងនេះ តើឆ្នាំណារាសីឡើង បើឆ្នាំរាសីចុះ គួរបញ្ចៀសគ្រោះដូចម្ដេចកុំឱ្យចំណាយច្រើន? appeared first on Kampuchea Thmey Daily.

ចំពោះ ថ្ងៃមហាសង្ក្រាន្ត ចូលឆ្នាំ ប៉ះចំថ្ងៃសៅរ៍ ព្រឹទ្ធាចារ្យ អ៊ឹម បុរិន្ទ បានឱ្យដឹងទំនាយតាមក្បួនថា ឆ្នាំនេះនឹងបណ្តាលហេតុ ឱ្យមានអន្តរាយកើតឡើងនៅកណ្តាលទីក្រុង កណ្តាលប្រទេស ពុំនោះសោត នឹងមានភ្លើង សាហាវ ចោរព្រៃចិត្តកាច និងមានជំងឺតម្កាត់ធ្ងន់ធ្ងរជាទីបំផុត។ ដែនដីនឹងស្ងួតហួតហែង មនុស្សទាំងឡាយនឹងឈឺថ្កាត់ស្លាប់ ទឹកនឹងមិនប្រណី ក្រពើនឹងខាំស៊ីមនុស្សគ្រប់តំបន់ មនុស្ស ទាំងឡាយនឹងកើតទុក្ខក្តៅក្រហាយចិត្ត នឹងកើតចោរខ្មួយមនុស្សអាក្រក់។ នឹងកើតកលិយុគ ព្រោះអ្នកធំ។ សត្វព្រៃនឹងស្លាបជាច្រើនអនេក។ ភ្លៀងមាននៅដើមឆ្នាំកណ្តាល និងចុងឆ្នាំមាន ភ្លៀងតិច។ សត្វស្វាខ្មៅ ស្វាត្រាស នឹងឈឺស្លាប់ច្រើន។ មនុស្សនឹងកើតពិសដំបៅដ៏កាចសាហាវ ក្នុងដែនដី។ រន្ទះនឹងមានច្រើន កណ្តុរនឹងកាត់ស្រូវ។ ការកើតទុក្ខគួរឱ្យខ្លាចរហូតដល់ចុងឆ្នាំ។

ចំណែក ថ្ងៃវ័នបត ត្រូវនឹងថ្ងៃអាទិត្យ និងថ្ងៃចន្ទ ព្រឹទ្ធាចារ្យ អ៊ឹម បុរិន្ទ បានឱ្យដឹងទំនាយថា ឆ្នាំនោះធ្វើស្រែមិនសូវ បានផល ព្រោះគ្មានភ្លៀងដើមស្រូវ នឹងងាប់ខ្ទេចខ្ទី នឹងបានឮភាសាផ្សេង (បរទេសចូលស្រុក) ព្រះមហាក្សត្រនឹងក្តៅក្រហាយចិត្ត។ អំបិលឡើងថ្ងៃ ជំទាវខុនណាងទាំងឡាយ នឹងក្តៅក្រហាយចិត្ត ក្នុងស្រុករមែងមានជំងឺតម្កាត់ច្រើន។

រីឯ ថ្ងៃឡើងស័ក ចំថ្ងៃអង្គារ ព្រឹទ្ធាចារ្យ អ៊ឹម បុរិន្ទ បានឱ្យដឹងទំនាយថា ឆ្នាំនេះអាមាត្យនាហ្មឺន សព្វមុខមន្ត្រីនឹងរស់នៅត្រជាក់ត្រជុំជាសុខស្រួល ទោះបីជាតស៊ូប្រយុទ្ធជាមួយសត្រូវបច្ចាមិត្រ ក្នុងគ្រប់ទិសទី ក៏នឹងមានជ័យជំនះគ្រប់វេលា ភ្លៀងឱ្យដោយអន្លើ នឹងមានកើតកលិយុគ នៅក្នុងព្រះនគរ។

ទំនាយខាងលើគឺទស្សន៍ទាយតាមក្បួន ទោះយ៉ាងណា ព្រឹទ្ធាចារ្យ អ៊ឹម បុរិន្ទ បានផ្ដាំថា សូមអស់ប្រជាពលរដ្ឋប្រុសស្រីផងទាំងឡាយ ខំលះបង់ចិត្តអាក្រក់អន្យតិរ្ថីយ ជាចិត្តអប្រីយ៍ជាប់ដោយគំនុំគុំគួនព្យាបាទ ឈ្នានីស ដែលកើតមានក្នុងឆ្នាំចាស់ឱ្យជ្រះស្រឡះ តាំងចិត្តប្រព្រឹត្តល្អប្រកបដោយ មេត្តា ករុណា មុទិតា ឧបេក្ខា និង បញ្ញា ធ្វើបុណ្យទានតាមប្រពៃណី រក្សាសីលប្រាំឱ្យបានជាប់ជានិច្ច នោះទេវតានឹងឱ្យពរសព្ទសាធុការ លោកអ្នកនឹងមានសិរីសួស្តី សុភមង្គល វិបុលសុខគ្រប់ប្រការតាំងពីឆ្នាំថ្មីនេះតរៀងទៅ៕

The post ចូលឆ្នាំរោង ៤ថ្ងៃ មានទំនាយអ្វីគួរឱ្យចាប់អារម្មណ៍ គួរឱ្យប្រយ័ត្នប្រុងប្រៀបទុកខ្លះ? appeared first on Kampuchea Thmey Daily.

១. នៅថ្ងៃចន្ទ ១រោច ខែផល្គុន ឆ្នាំថោះ បញ្ចស័ក ចុល្លសករាជ១៣៨៥ ត្រូវនឹងថ្ងៃទី២៥ ខែមីនា ឆ្នាំ២០២៤ មានចន្ទគ្រាស ជាស្រមោលព្រាលៗ (Penumbral Eclipse of the Moon) មើល ឃើញភាគច្រើននៅទ្វីបអឺរ៉ុប អាស៊ីខាងជើង/ខាងកើត ភាគច្រើននៃអូស្ត្រាលី ភាគច្រើននៃទ្វីប អាហ្វ្រិក អាមេរិកខាងជើង/ត្បូង ប៉ាស៊ីហ្វិកអាត្លង់ទិក អាក់ទិក អង់តាក់ទិក។ ចាប់ផ្តើមពីម៉ោង ១១ និង ៥១នាទី ហើយបញ្ចប់នៅម៉ោង ១៦ និង ៣៥នាទី។ នៅភ្នំពេញ និងកម្ពុជាយើងមើលមិនឃើញទេ។

២. នៅរាត្រីថ្ងៃចន្ទ ១៥រោច ខែផល្គុន ឆ្នាំថោះ បញ្ចស័ក ចុល្លសករាជ១៣៨៥ ត្រូវនឹង ថ្ងៃទី០៨ ខែមេសា ឆ្នាំ២០២៤ មានសូរ្យគ្រាសជាសារពើត្រាស (Total Eclipse of the Sun) មើលឃើញ នៅអឺរ៉ុបខាងលិច អាមេរិកខាងជើង/ខាងត្បូង ប៉ាស៊ីហ្វិក អាត្លង់ទិក អាក់ទិក។ ចាប់ផ្តើមពី ម៉ោង ២២ និង ៤២នាទី នៃថ្ងៃទី០៨ ខែមេសា ហើយបញ្ចប់នៅម៉ោង ២ និង ៥៥នាទី រំលងអាធ្រាត (ថ្ងៃ ០៩ ខែមេសា)។ នៅភ្នំពេញមើលមិនឃើញនោះទេ។

៣. នៅថ្ងៃពុធ ១រោច ខែភទ្របទ ឆ្នាំរោង ឆស័ក ចុល្លសករាជ១៣៨៦ ត្រូវនឹង ថ្ងៃទី១៨ ខែ កញ្ញា ឆ្នាំ២០២៤ មានចន្ទគ្រាសជាអឌ្ឍគ្រាស (Partial eclipse of the Moon) មើលឃើញនៅអឺរ៉ុប ភាគច្រើននៃអាស៊ី អាហ្វ្រិកា អាមេរិកខាងជើង អាមេរិកខាងត្បូង ប៉ាស៊ីហ្វិក អាត្លង់ទិក មហា សមុទ្រឥណ្ឌា អាក់ទិក អង់តាក់ទិក។ ចាប់ផ្តើមពីម៉ោង ៧ និង ៣៩នាទី ហើយបញ្ចប់នៅម៉ោង ០ និង ១៧នាទី។ នៅក្នុងតំបន់ភ្នំពេញ នៃកម្ពុជាយើងមើលមិនឃើញជាទេ។

៤. នៅក្នុងរាត្រីថ្ងៃពុធ ១៥រោច ខែភទ្របទ ឆ្នាំរោង ឆស័ក ចុល្លសករាជ១៣៨៦ ត្រូវនឹងថ្ងៃ ទី០២ ខែតុលា ឆ្នាំ២០២៤ មានសូរ្យគ្រាសជារូបចិញ្ចៀន (Annular Eclipse of the Sun) មើលឃើញ នៅភាគខាងត្បូង នៃអាមេរិកខាងជើង ភាគច្រើន នៃអាមេរិកខាងត្បូង ប៉ាស៊ីហ្វិក អាត្លង់ទិក អង់តាក់ទិកា។ ចាប់ផ្តើមពីម៉ោង ២២ម៉ ៤៣នាទី នៃរាត្រីថ្ងៃទី០២ ខែតុលា ហើយបញ្ចប់នៅវេលា ម៉ោង ៣ និង ៣៧នាទី រំលងអាធ្រាតឈានចូល ថ្ងៃទី០៣ ខែតុលា។ នៅក្នុងរាជធានីភ្នំពេញ នៃកម្ពុជា យើងមើលមិនឃើញជាទេ។

គួរបញ្ជាក់ថា តាមរយៈ តាមសៀវភៅ មហាសង្ក្រាន្ត ឆ្នាំរោង ឆស័ក របស់ ព្រឹទ្ធាចារ្យ អ៊ឹម បុរិន្ទ បានបង្ហាញ និងឃើញជាក់ស្ដែងថា គ្រាសចំនួន ២បាន កន្លងផុតទៅហើយ ដោយនៅសល់ ចន្ទគ្រាស និង សូរ្យគ្រាស ២ទៀត នឹងកើតឡើង។ ដូចនេះមានតែរង់ចាំតាមដានព័ត៌មានសាកលបន្ត តើនឹងមានមែន ឬយ៉ាងណា បើទោះកម្ពុជា មើលមិនឃើញក្ដី៕

The post សៀវភៅមហាសង្ក្រាន្តខ្មែរ បង្ហាញថា ឆ្នាំ២០២៤ មានគ្រាស ៤ ដង ដោយនៅសល់ ២ ដងទៀត appeared first on Kampuchea Thmey Daily.

លុះចប់ពិធីបុណ្យចូលឆ្នាំ គេនាំគ្នាសុំដង្វាយទាំងនោះ មកបរិភោគវិញជាធម្មតា ហើយគិតថា ខ្លួនបានបរិភោគអាហារពីទេវតា នឹងនាំខ្លួនឱ្យខិតខំធ្វើបុណ្យសាងសេចក្ដីល្អនាំសុខចម្រើន។ យ៉ាងណាក្ដី បើមហាសង្ក្រាន្តចំថ្ងៃវេនទេវធីតាដែលសោយ លោហិត (ឈាម) ឬ សាច់ទ្រាយ នោះ ដូចទេវធីតាឆ្នាំថ្មី ឆ្នាំ២០២៤ នេះក្ដី គេមិនដែលរៀបចំដង្វាយជា ឈាម សាច់ ឬគ្រឿងចម្អាបទាំងនេះដែរ។

ព្រឹទ្ធាចារ្យ អ៊ឹម បុរិន្ទ អនុប្រធាន អចិន្ត្រៃយ៍ នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ និងជាអ្នកចងក្រងសៀវភៅ មហាសង្ក្រាន្ត ជាយូរមកហើយនោះ មានប្រសាសន៍ប្រាប់ “កម្ពុជាថ្មី” ថា ភាពជាទេវតា គឺអស់មន្ទិល លោភៈ មោហៈ ទោសៈ មិនមានសោយអាហារអ្វីដូចមនុស្សលោកទេ។ ការណ៍ដែលថា ទេវតាស្លៀកពាក់ ឬសោយភក្សាហារ បែបនេះបែបនោះ គឺជាតម្រាចំណាំសម្រាប់ក្បួនទស្សន៍ទាយបុរាណ ដោយសម្គាល់ថា អាចមានរឿងហេតុការណ៍អ្វីកើតឡើង និងឱ្យប្រុងប្រយ័ត្ន។

ព្រឹទ្ធាចារ្យ អ៊ឹម បុរិន្ទ ចំពោះរណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះ មួយសម្រាប់តាំងគ្រឿងពលីការផ្សេងៗ។ ត្រូវរៀបក្រាលសំពត់ពណ៌ស ហើយរៀបចំនូវគ្រឿងសក្ការបូជាទេវតាមានជាអាទិ៍ បាយសី ៩ ថ្នាក់មួយគូ បាយសី ៧ ថ្នាក់មួយគូ បាយសី ៥ ថ្នាក់មួយគូ បាយសី ៣ ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ ទៀន៥ ធូប៥ លាច៥ ផ្កា៥ ដាក់លើជើងពានមួយគូ ចេកនួនចេកណាំវ៉ា ដាក់លើជើងពានមួយគូ ផ្លែឈើ ១១ មុខ រៀបដាក់ជើងពាន ១១គូ ដូងឡៅមួយគូ ទឹក ស្អាតពីរកែវ។ ស្រេចហើយនៅវេលាម៉ោងដែលទេវតាចុះមក ត្រូវជួបប្រជុំក្រុមគ្រួសារដើម្បីថ្វាយបង្គំព្រះ នមស្សការព្រះរតនៈត្រ័យសមាទានសីល ហើយតាំងចិត្តឱ្យបានស្អាតបរិសុទ្ធជ្រះស្រឡះនូវមន្ទិលទាំងពួង តម្កល់ចិត្តរំពឹង គិតទៅលើព្រះពុទ្ធ ព្រះធម៌ ព្រះសង្ឃជាទីពឹងទីរឭក លុះចប់ពិធីទទួលទេវតា។

ព្រឹទ្ធាចារ្យ អ៊ឹម បុរិន្ទ បញ្ជាក់ថា ចំពោះបាយសី ៩ថ្នាក់ ៧ថ្នាក់ គឺជាទំនៀមមានចែងនៅក្នុងសៀវភៅព្រះរាជពិធីទ្វាទសមាស និងមានអនុវត្តនៅព្រះបរមរាជវាំង ប៉ុន្តែចំពោះប្រជារាស្ត្រ គួរធ្វើត្រឹម ៥ថ្នាក់ចុះមក ឬរៀបត្រឹមគ្រឿងសក្ការបូជាដែលមាន ទៀនប្រាំធូបប្រាំ ស្លាធម៌កូនចេកមួយគូ ក៏ល្មមសមគួរដែរ។ ចំពោះផ្លែឈើសម្រាប់ប្រជារាស្ត្រ គួររៀបឱ្យបានត្រឹម ៣ ឬ ៥មុខ ក៏ជាការប្រសើរ គឺរៀបទៅតាមធនធានរបស់ខ្លួន។ នៅគ្រប់ដង្វាយទាំងអស់ត្រូវដាក់ ផ្កាម្លិះភួងពីលើគ្រប់ដង្វាយ នៅលើជើងពាន និងលើបាយសីត្រូវដោតទៀន ហើយដុតបំភ្លឺ។

គួរបញ្ជាក់ថា ឆ្នាំថ្មីឆ្នាំរោងនេះ សង្ក្រាន្តនឹងចូលនៅថ្ងៃសៅរ៍ ៥កើត ខែចេត្រ ពទ្ធសករាជ ២៥៦៧ ត្រូវនឹងថ្ងៃទី១៣ ខែមេសា គ្រិស្តសករាជ ២០២៤ វេលាម៉ោង ២២ និង ២៤នាទី។ ទេវធីតាមួយព្រះអង្គជាមគ្គនាយិកា ព្រះនាម មហោធរទេវី ជារាជបុត្រីទី៧ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌ខៀវ លម្អនៅព្រះកាណ៌ដោយសៀត ផ្កាត្រកៀត អភរណៈ និលរតន៍ (ត្បូងពណ៌ខៀវ ឬ ត្បូងកណ្ដៀង) ភក្សាហារទ្រង់ សាច់ទ្រាយ ព្រះហស្តស្តាំទ្រង់ កងចក្រ ព្រហស្តឆ្វេងទ្រង់ត្រីសូល៍ ទ្រង់គង់ផ្ទំបើកព្រះនេត្រនៅលើខ្នងស្តេចមយូរា (ក្ងោក) ជាយានពាហនៈ។

អត្ថបទ៖ ច័ន្ទ វីរៈ

The post រណ្ដាប់ទទួលទេវតា មិនត្រូវការគ្រឿងចម្អាប appeared first on Kampuchea Thmey Daily.

ព្រឹទ្ធាចារ្យ អ៊ឹម បុរិន្ទ អនុប្រធាន អចិន្ត្រៃយ៍ នៃគណៈកម្មការស្រាវជ្រាវវិជ្ជាហោរាសាស្ត្រ និងប្រពៃណីទំនៀមទម្លាប់ខ្មែរ និងជាអ្នកចងក្រងសៀវភៅ មហាសង្ក្រាន្ត ជាយូរមកហើយនោះ មានប្រសាសន៍ប្រាប់ “កម្ពុជាថ្មី” ថា ការតែងព្រះកាយ ភក្សាហារ (ចំណីអាហារ) របស់ទេវតា ជាដើមនោះ តាមបុរាណ លោកគ្រាន់តែចង់បញ្ជាក់ ឬជាប្រស្នា ដើម្បីទស្សន៍ទាយអំពីជោគវាសនាប្រទេសជាតិ ជម្ពូទ្វីប (ភពផែនដី) មិនមែនសំដៅថា ទេវតាត្រូវសោយអាហារ ឬសាច់ទ្រាយ ទេ។

ព្រឹទ្ធចារ្យ អ៊ឹម បុរិន្ទ មានប្រសាសន៍បញ្ជាក់បន្ថែមថា៖ “បើយើងនិយាយពីសត្វទ្រាយ គឺជាសត្វព្រៃមួយប្រភេទ ស្រដៀង និងតូចជាងឈ្លូស តែមិនមែនទេវតាសោយទេ គ្រាន់តែសត្វទ្រាយតំណាងឱ្យពពួកសត្វព្រៃ។ អ៊ីចឹងយើងអាចគិតថា នៅពេលទេវតាសោយសាច់ទ្រាយ មានន័យថា នៅប្រទេសយើង និងជម្ពូទ្វីបអាចការពារសត្វព្រៃ ដោយសារទេវតាទទួលយកសត្វទ្រាយ សត្វព្រៃហ្នឹងហើយ។ អ៊ីចឹង នៅក្នុងប្រទេសយើងក្ដី នឹងមានការអភិរក្សសត្វព្រៃ ប្រសើររាល់ឆ្នាំកន្លងទៀត”។

ព្រឹទ្ធចារ្យ អ៊ឹម បុរិន្ទ មានប្រសាសន៍បន្តថា៖ “ចំពោះព័ត៌មានដែលនិយាយថា ទេវតាសោយសាច់គោងៀតអីនេះ ជាការនិយាយកំប្លែង ដោយគិតថា ហើយសត្វទ្រាយជាសត្វព្រៃត្រូវអភិរក្ស ហើយសត្វគោស្រដៀងសត្វទ្រាយ ក៏មានមនុស្សមួយចំនួនថា ដាក់គោងៀតថ្វាយទេតា។ ក៏ការនិយាយលេងក្លាយជាការពិត ហើយមានសារព័ត៌មានខ្លះចុះផ្សាយទៅទៀត ប៉ុន្តែមិនមែនទេ សត្វទ្រាយ គ្រាន់តែជាតំណាង នៃការព្យាករណ៍ប្រចាំឆ្នាំនីមួយៗ”។

ព្រឹទ្ធចារ្យ អ៊ឹម បុរិន្ទ បានឱ្យដឹងថា ឆ្នាំថ្មីឆ្នាំរោងនេះ សង្ក្រាន្តនឹងចូលនៅថ្ងៃសៅរ៍ ៥កើត ខែចេត្រ ពទ្ធសករាជ ២៥៦៧ ត្រូវនឹងថ្ងៃទី១៣ ខែមេសា គ្រិស្តសករាជ ២០២៤ វេលាម៉ោង ២២ និង ២៤នាទី។ ទេវធីតាមួយព្រះអង្គជាមគ្គនាយិកា ព្រះនាម មហោធរទេវី ជារាជបុត្រីទី៧ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌ខៀវ លម្អនៅព្រះកាណ៌ដោយសៀត ផ្កាត្រកៀត អភរណៈ និលរតន៍ (ត្បូងពណ៌ខៀវ ឬ ត្បូងកណ្ដៀង) ភក្សាហារទ្រង់ សាច់ទ្រាយ ព្រះហស្តស្តាំទ្រង់ កងចក្រ ព្រហស្តឆ្វេងទ្រង់ត្រីសូល៍ ទ្រង់គង់ផ្ទំបើកព្រះនេត្រនៅលើខ្នងស្តេចមយូរា (ក្ងោក) ជាយានពាហនៈ។

ចំពោះរណ្តាប់ទទួលទេវតាតាមទំនៀមពីបុរាណរៀងរហូតមក ត្រូវរៀបរានទទួលទេវតានៅខាងមុខផ្ទះ មួយសម្រាប់តាំងគ្រឿងពលីការផ្សេងៗ។ ត្រូវរៀបក្រាលសំពត់ពណ៌ស ហើយរៀបចំនូវគ្រឿងសក្ការបូជាទេវតាមានជាអាទិ៍ បាយសី ៩ ថ្នាក់មួយគូ បាយសី ៧ ថ្នាក់មួយគូ បាយសី ៥ ថ្នាក់មួយគូ បាយសី ៣ ថ្នាក់មួយគូ បាយសីប៉ាឆាមមួយគូ ស្លាធម៌មួយគូ ទឹកអប់មួយគូ ទៀន៥ ធូប៥ លាច៥ ផ្កា៥ ដាក់លើជើងពានមួយគូ ចេកនួនចេកណាំវ៉ា ដាក់លើជើងពានមួយគូ ផ្លែឈើ ១១ មុខ រៀបដាក់ជើងពាន ១១គូ ដូងឡៅមួយគូ ទឹក ស្អាតពីរកែវ។ ស្រេចហើយនៅវេលាម៉ោងដែលទេវតាចុះមក ត្រូវជួបប្រជុំក្រុមគ្រួសារដើម្បីថ្វាយបង្គំព្រះ នមស្សការព្រះរតនៈត្រ័យសមាទានសីល ហើយតាំងចិត្តឱ្យបានស្អាតបរិសុទ្ធជ្រះស្រឡះនូវមន្ទិលទាំងពួង តម្កល់ចិត្តរំពឹង គិតទៅលើព្រះពុទ្ធ ព្រះធម៌ ព្រះសង្ឃជាទីពឹងទីរឭក លុះចប់ពិធីទទួលទេវតា។

ចំពោះបាយសី ៩ថ្នាក់ ៧ថ្នាក់ ជាទំនៀមមានចែងនៅក្នុងសៀវភៅព្រះរាជពិធីទ្វាទសមាស និងមានអនុវត្តនៅព្រះបរមរាជវាំង ប៉ុន្តែចំពោះប្រជារាស្ត្រ គួរធ្វើត្រឹម ៥ថ្នាក់ចុះមក ឬរៀបត្រឹមគ្រឿងសក្ការបូជាដែលមាន ទៀនប្រាំធូបប្រាំ ស្លាធម៌កូនចេកមួយគូ ក៏ល្មមសមគួរដែរ។ ចំពោះផ្លែឈើសម្រាប់ប្រជារាស្ត្រ គួររៀបឱ្យបានត្រឹម ៣ ឬ ៥មុខ ក៏ជាការប្រសើរ គឺរៀបទៅតាមធនធានរបស់ខ្លួន។ នៅគ្រប់ដង្វាយទាំងអស់ត្រូវដាក់ ផ្កាម្លិះភួងពីលើគ្រប់ដង្វាយ នៅលើជើងពាន និងលើបាយសីត្រូវដោតទៀន ហើយដុតបំភ្លឺ៕

អត្ថបទ៖ ច័ន្ទ វីរៈ

The post ទំនាយ ភក្សាហារ ទេវតាឆ្នាំថ្មី ទេវតាមិនសោយ សាច់ ឬ គោងៀត ទេ appeared first on Kampuchea Thmey Daily.

ឆ្នាំជូត លោកអ្នកនឹងមានវត្ថុគ្រប់យ៉ាង សមតាមសេចក្ដីប្រាថ្នា ការងារនឹងរៀបរយ មានមង្គលគ្រប់យ៉ាង លាភផលពូនបន្ថែមឡើង។ បើជាមនុស្សស្រី នឹងមានកិត្តិយសឈ្មោះសំឡេង បើជាមនុស្សប្រុសនឹងមានឧបស័គ្គ មានរឿងស្មុគ្រស្មាញចិត្ត មានការឈ្លោះវិវាទ។

ឆ្នាំឆ្លូវ មានរឿងនឹកគិតមិនដល់ រឿងយានជំនិះឧប្បត្តិហេតុ ឈឺថ្កាត់មានរបួសស្នាម អស់ប្រាក់មាស ហាមពាក្យធានា នឹងមានរឿងអបមង្គលដែលនឹកស្មានមិនដល់ ឈឺថ្កាត់ បុណ្យសព ខូចខាតបាត់បង់ប្រាក់កាស ហាមទៅចូលរួមបុណ្យសព ហាមទៅសួរសុខទុក្ខអ្នកជំងឺ។

ឆ្នាំខាល នឹងមានរោគភ័យឈឺថ្កាត់មកសួរសុខទុក្ខ មានសេចក្ដីស្មុគស្មាញក្នុងចិត្ត បាត់បងមាសប្រាក់។ ប្រុសនឹងមានឈ្មោះសំឡេង មានយសបណ្ដាសក្ដិ លាភផលប្រាក់មាសចូលមកយ៉ាងច្រើន ការធ្វើដំណើរឆ្ងាយបានលាភ ជាស្ត្រីនឹងមានការឈ្លោះវិវាទ។

ឆ្នាំថោះ មានទោស មានភ័យ កិច្ចការមានឧបសគ្គធ្វើការមង្គលក៏មានឧបសគ្គមិនរៀបរយ។

ឆ្នាំរោង ប្រុសនឹងមានឈ្មោះសំឡេង ឡើងយសបណ្ដាសក្តិ លាភផលមាសប្រាក់ចូលមកជាច្រើន ធ្វើដំណើរឆ្ងាយនឹងមានលាភ។ ស្រ្តីនឹងមានការឈ្លោះវិវាទ មានមាត់មានកនឹងមានរោគភ័យឈឺថ្កាត់មកសួរសុខទុក្ខ មានសេចក្ដីស្មុគ្រស្មាញពិបាកចិត្តនឹងមានការបាត់បង់ប្រាក់កាស។

ឆ្នាំម្សាញ់ នឹងមានរឿងអបមង្គលដែលនឹកស្មានមិនដល់ ឈឺថ្កាត់ បុណ្យសព បាត់បង់ប្រាក់កាស ហាមទៅចូលរួមបុណ្យសព ហាមទៅសួរសុខទុក្ខអ្នកជំងឺ មានរឿងរ៉ាវនឹកស្មានមិនដល់ រឿងយានជំនីះ មានការឈឺថ្កាត់ មានរបួសស្នាម ឧប្បតិ្តហេតុ ហាមពាក្យធានា។

ឆ្នាំមមី ស្ត្រីនឹងមានឈ្មោះសំឡេង ប្រុសនឹងមានឧបសគ្គមានរឿងរ៉ាងស្មុគ្រស្មាញក្នុងចិត្ត មានមាត់មានក មានការឈ្លោះវិវាទ មានវត្ថុគ្រប់យ៉ាងសមសេចក្ដីប្រាថ្នា ការងារនឹងរៀបរយ មានមង្គលគ្រប់យ៉ាង មានលាភផលពូនបន្ថែមឡើង។

ឆ្នាំមមែ ប្រយ័ត្នភ័យពីមនុស្សដទៃ មានរឿងត្រូវចោទប្រកាន់ ឡើងរោងឡើងសាលា ជាប់គុក ខូចខាតទុននឹងមានទោស បាត់បង់បុគ្គលាករ (ភាពជាបុគ្គលិក Personal) ឈាមនឹងធ្លាក់ចេញពីខ្លួន បញ្ហាទាក់ទងនឹងរថយន្ត ឈឺថ្កាត់ មានរឿងមិនល្អកើតឡើង។

ឆ្នាំវក មានចោរភ័យចូលផ្ទះ មិនសក្ដិសមក្នុងការចុះទុនរួមភាគហ៊ុន។ បើជាស្ត្រីនឹងមានអ្នកឧបត្ថម្ភគាំទ្រដែលល្អ នឹងមានរឿងជាមង្គលផ្សេងៗជាច្រើន ល្អជាពិសេសសម្រេចក្នុងការងារ ការធ្វើដំណើរឆ្ងាយល្អ។

ឆ្នាំរកា មានរឿងសោកសៅ ការងារ ផ្ទះសម្បែង កូនចៅ មានឧបសគ្គ ហាមជួសជុលផ្ទះ។

ឆ្នាំច មានរឿងជាមង្គលផ្សេងៗជាច្រើន លេចធ្លោល្អវិសេស សម្រេចក្នុងការងារធ្វើដំណើរឆ្ងាយល្អ នឹងមានចោរភ័យចូលផ្ទះ មិនសក្ដិសមដែលនឹងចុះទុន បើជាស្ត្រីនឹងមានអ្នកឧបត្ថម្ភដែលល្អ។

ឆ្នាំកុរ នឹងមានទោសបាត់បង់បុគ្គលាករ ឈាមនឹងហូរចេញពីខ្លួន បញ្ហាទាក់ទងនឹងរថយន្ត ឈឺថ្កាត់ មានរឿងមិនល្អកើតឡើង ប្រយ័ត្នភ័យពីអ្នកដទៃ មានរឿងត្រូវចោទប្រកាន់ ឡើងរោងឡើងសាលា ជាប់គុក ខាតទុន។

បណ្ឌិត អុឹម បុរិន្ទ បញ្ជាក់បន្ថែមថា សម្រាប់អ្នកកើត ឆ្នាំជូត ឆ្នាំថោះ ឆ្នាំរោង ឆ្នាំមមី និងឆ្នាំរកា មានល្អខ្លះ មានអាក្រក់ខ្លះ ឆ្នាំទាំង៥នេះឆុងគ្នាជាមួយឆ្នាំថោះ ដូច្នេះការល្អក៏មិនបរិបូណ៍។ ដើម្បីបានល្អប្រសើរ ត្រូវកាត់ឆុងលើករាសី ទើបជាការប្រសើរ។ លេខទូរសព្ទរបស់លោក ០១២ ៩៦៨ ៣៥៦, ០១០ ៩៦៨ ៣៥៦, ០៦៧ ៦៥៥ ៤៦៥ ៕

The post ជោគជតាឆ្នាំទាំង១២ ប្រចាំឆ្នាំថោះ តាមតម្រាហោរាសាស្ត្រចិន ពី បណ្ឌិត អ៊ឹម បុរិន្ទ appeared first on Kampuchea Thmey Daily.