លោក អ៊ូច ភា Archives - Kampuchea Thmey Daily

អភិបាលខេត្តតាកែវ អំពាវនាវឱ្យកសិករផ្អាកការធ្វើស្រូវប្រាំងលើកទី២ ព្រោះគ្មានទឹកគ្រប់គ្រាន់

Ken Malis — Mon, 15 Jan 2024 04:39:29 +0000

គណៈអភិបាលខេត្តតាកែវ អំពាវនាវដល់ប្រជាកសិករផ្អាកការធ្វើស្រូវរដូវប្រាំង លើកទី២ ចាប់ពីខែកុម្ភៈ ដល់ខែឧសភា ឆ្នាំ២០២៤ ដោយសារមិនមានប្រភពទឹកគ្រប់គ្រាន់។ លោកអភិបាលខេត្តអំពាវនាវបែបនេះ ក្នុងឱកាសដឹកនាំមន្រ្តីជំនាញ ចុះជួយបូមទឹកសង្រ្គោះដំណាំស្រូវប្រាំង លើកទី១ របស់ប្រជាពលរដ្ឋចំនួន ៥១៧ហិកតា ក្នុងភូមិសាស្រ្តស្រុកបាទី នាថ្ងៃ ទី១៤ ខែមករា ឆ្នាំ២០២៤។

រូបភាព៖ រដ្ឋបាលខេត្តតាកែវ

លោក អ៊ូច ភា អភិបាលខេត្តតាកែវ បានដឹកនាំមន្រ្តីជំនាញចុះពិនិត្យមើលស្ថានភាពជាក់ស្ដែងនៃស្ថានីយ៍បូមទឹក ហ៊ុន សែន ទី៧ ស្ថិតនៅភូមិព្រៃស្វា ឃុំពត់សរ និងផ្ដល់ប្រេងម៉ាស៊ូត ៣០០លីត្រ និងប្រេងបាតម៉ាស៊ីនប៉ូមទឹក ២៨លីត្រ ដើម្បីជួយបូមទឹកសង្រ្គោះដំណាំស្រូវប្រាំងលើកទី១ របស់ប្រជាពលរដ្ឋ លើផ្ទៃដីចំនួន៥១៧ហិកតា នៅក្នុងឃុំពត់សរ ស្រុកបាទី ខេត្តតាកែវ។

បន្ថែមពីនេះ លោកអភិបាលខេត្ត ក៏បានណែនាំដល់អាជ្ញាធរមូលដ្ឋាន ក៏ដូចជាប្រជាកសិករសុំឱ្យបង្កបង្កើនផលស្រូវរដូវប្រាំងតែមួយលើកនេះបានហើយ។ លោក ថា ប្រសិនបើនៅតែបង្កបង្កើនផលស្រូវរដូវប្រាំងលើកទី២ គឺអាជ្ញាធរមិនមានទឹកគ្រប់គ្រាន់សម្រាប់ជួយអន្តរាគមន៍ទៀតទេ ព្រោះកន្លងមក អាជ្ញាធរខេត្ត ស្រុក ឃុំ ភូមិ បានជូនដំណឹងម្ដងរួចមកហើយ ដោយសុំឱ្យប្រជាកសិករផ្អាកការធ្វើស្រូវរដូវប្រាំង លើកទី២ ចាប់ពីខែកុម្ភៈ ដល់ខែឧសភា ឆ្នាំ២០២៤ ព្រោះមិនមានប្រភពទឹកគ្រប់គ្រាន់។

រូបភាព៖ រដ្ឋបាលខេត្តតាកែវ

អភិបាលខេត្តដដែល ក៏បានបន្តដឹកនាំមន្រ្តីជំនាញ និងអាជ្ញាធរស្រុកបាទី និងប្រជាពលរដ្ឋ ចូលរួមស្ដារត្រកៀត ស្មៅត្រឹប នៅចំណុចស្ថានីយ៍បូមទឹក ហ៊ុន សែន ទី២២ និង២៣ ស្ថិតនៅភូមិទន្លេរបាទី ឃុំក្រាំងធ្នង់ សម្រួលចរន្តមុខទឹក ដើម្បីបង្ហូរចូលប្រឡាយទឹកមេ (ហនុមាន) ដែលមានលទ្ធភាពជួយស្រោចស្រព ឃុំក្រាំងធ្នង់ ឃុំកណ្ដឹង ឃុំត្រពាំងសាប ឃុំចំប៉ី ឃុំពារាម និងឃុំត្នោត ដែលមានផ្ទៃដីស្រូវប្រាំងលើកទី១ ចំនួន ១ ២៥០ហិកតា៕

រូបភាព៖ រដ្ឋបាលខេត្តតាកែវ

The post អភិបាលខេត្តតាកែវ អំពាវនាវឱ្យកសិករផ្អាកការធ្វើស្រូវប្រាំងលើកទី២ ព្រោះគ្មានទឹកគ្រប់គ្រាន់ appeared first on Kampuchea Thmey Daily.

ហ្វេសប៊ុកមួយយកឈ្មោះនិងរូបអភិបាលខេត្តផ្ញើសារឆ្លើយឆ្លងស្នេហា

Dy Bunnara — Sun, 17 Dec 2023 08:31:35 +0000

មានហ្វេសប៊ុកមួយដែលមានឈ្មោះ Uoch Phear បានតាំងរូបថតអភិបាលខេត្តតាកែវ ផ្ញើសារឆ្លើងឆ្លងស្នេហាជាមួយនារីម្នាក់ហាក់បីដូចជាតាមចែចង់យកធ្វើជានារីកំណាន់។

ហ្វេសប៊ុកដែលមានរូបនិងឈ្មោះចៅហ្វាយខេត្តតាកែវបានធ្វើការផ្ញើសារឆ្លើយឆ្លងគ្នាផ្អែមល្ហែមជាមួយនារីម្នាក់តាមហ្វេសប៊ុក ដែលមានឈ្មោះ Pon Rachana និង ឈ្មោះ Ah Muy ដែលជាមនុស្សតែម្នាក់ប្រើហ្វេសប៊ុក ២។

ក្រោយបែកធ្លាយករណីខាងលើនេះភ្លាម រដ្ឋបាលខេត្តតាកែវបានចេញសេចក្តីជូនដំណឹងមួយភ្លាមៗដោយបានសង្កត់ធ្ងន់ថាជាហ្វេសប៊ុកក្លែងក្លាយបន្លំឈ្មោះ និងយករូបលោកអភិបាលខេត្តមកតាំងក្នុងគោលបំណងទុច្ចរិត។

ចំពោះករណីមហាជនរចាំមើលថា តើសមត្ថកិច្ចជំនាញពាក់ព័ន្ធនានាអាចស្វែងរកជនដែលក្លែងហ្វេសប៊ុកអភិបាលខេត្តតាកែវបានដែរឬទេ? ម្យ៉ាងទៀតតើសមត្ថកិច្ចមានដំណោះស្រាយយ៉ាងណាដែរជាមួយម្ចាស់គណនេយ្យហ្វេសប៊ុកដែលមានការឆ្លើយឆ្លងបែបស្នេហា ទាំងដែលមានឈ្មោះនិងរូបថតក្នុងហ្វេសប៊ុកស្រាប់៕

អត្ថបទ៖ វីរៈ

The post ហ្វេសប៊ុកមួយយកឈ្មោះនិងរូបអភិបាលខេត្តផ្ញើសារឆ្លើយឆ្លងស្នេហា appeared first on Kampuchea Thmey Daily.

ខេត្តតាកែវបញ្ចប់ការបោះបង្គោលព្រំដែនធំទាំង ៣៧ បង្គោល ជាមួយប្រទេសវៀតណាម

Dy Bunnara — Sat, 29 Apr 2023 05:45:07 +0000

ថ្លែងបញ្ជាក់នៅក្នុងសន្និសីទជោគជ័យរយៈពេល ៥ ឆ្នាំ របស់រដ្ឋបាលខេត្តតាកែវកាលពីថ្ងៃ ០២ មីនា ឆ្នាំ ២០២៣ លោក អ៊ូច ភា អភិបាលនៃគណៈអភិបាលខេត្តតាកែវបានឲ្យដឹងថា ខេត្តតាកែវបានបញ្ចប់ការបោះបង្គោលព្រំដែនធំចំនួន ៣៧ បង្គោលជាមួយប្រទេសវៀតណាម។

លោក អ៊ូច ភា អភិបាលនៃគណៈអភិបាលខេត្តតាកែវបានគូសបញ្ជាក់ថា ខេត្តតាកែវមានព្រំដែនជាប់ប្រទេសវៀតណាមប្រវែងសរុប ៧៣, ៦០០ គីឡូម៉ែត្រ។

ជុំវិញការបោះបង្គោលព្រំដែនក្នុងភូមិសាស្ត្រខេត្តតាកែវជាមួយប្រទេសវៀតណាម លោកអភិបាលខេត្តបញ្ជាក់ថា បានបញ្ចប់ការបោះបង្គោលធំៗចំនួន ៣៧ បង្គោល។ បច្ចុប្បន្នការងារសេសសល់នៅតែការបោះបង្គោលព្រំដែនបំពេញបន្ថែមមួយចំនួនតែប៉ុណ្ណោះ។

ស្នងការនគរបាលខេត្តតាកែវបានឲ្យដឹងថា ខេត្តតាកែវមានព្រំប្រទល់ជាប់ខេត្តចំនួនពីររបស់ប្រទេសវៀតណាមគឺខេត្តអានយ៉ាង និងគៀនយ៉ាងក្នុងប្រវែងព្រំដែនសរុប ៧៣,៦០០ គីឡូម៉ែត្រ។ ក្នុងនោះជាប់ខេត្តអានយ៉ាងមានប្រវែង ៦៧ គីឡូម៉ែត្រ និងខេត្តគៀនយ៉ាងប្រវែង ៦,៦០០ គីឡូម៉ែត្រ។

ខេត្តតាកែវគឺជាខេត្តមួយក្នុងចំណោមរាជធានី ខេត្តទាំង២៥ ស្ថិតនៅប៉ែកនិរតីមានចំងាយ ៧៧ គីឡូម៉ែត្រ តាមផ្លូវជាតិលេខ២ និង៨៧គីឡូម៉ែត្រ តាមផ្លូវជាតិលេខ៣ និងមានប្រវែង ៧៥គីឡូម៉ែត្រ តាមផ្លូវដែកពីរាជធានីភ្នំពេញ។

ខេត្តមានព្រំប្រទល់ខាងជើង និងខាងកើតជាប់ខេត្តកណ្តាល ខាងលិចជាប់ខេត្តកំពង់ស្ពឺ និងខេត្តកំពត និងខាងត្បូងខាងកើតជាប់សាធារណរដ្ឋសង្គមនិយមវៀតណាម។ ស្ថានភាពផ្ទៃដីមានលក្ខណៈវាលទំនាប និងដីខ្ពស់ជាប់ជួរភ្នំ មានផ្ទៃដីសរុប ៣.៦៨០,១៥គីឡូម៉ែត្រការ៉េ មាន ១០ ក្រុង ស្រុក ១០០ឃុំ សង្កាត់ និងភូមិ ១.១២១ភូមិ មានប្រជាពលរដ្ឋសរុបចំនួន ១.០៥៣.៩៩៧នាក់៕

The post ខេត្តតាកែវបញ្ចប់ការបោះបង្គោលព្រំដែនធំទាំង ៣៧ បង្គោល ជាមួយប្រទេសវៀតណាម appeared first on Kampuchea Thmey Daily.

លោក អ៊ូច ភា៖ អាជីវកម្មជីកត្បូងក្នុងខេត្តតាកែវ បានផ្អាកដំណើរការទាំងស្រុងហើយ

Din Thary — Fri, 03 Mar 2023 08:14:21 +0000

ការធ្វើអាជីវកម្មរុករកត្បួង បានកើតឡើងនៅតាមភូមិសាស្រ្តមួយចំនួននៅក្នុងទឹកដីខេត្តតាកែវ។ ប៉ុន្តែបើតាមការគូសបញ្ជាក់ដោយផ្ទាល់ពីលោក អ៊ូច ភា អភិបាលនៃគណៈអភិបាលខេត្តតាកែវ បច្ចុប្បន្នអាជីវកម្មជីកយកត្បូងនៅក្នុងខេត្តមិនមានទៀតទេ។

លោក អ៊ូច ភា អភិបាលខេត្តតាកែវ ឆ្លើយតបតាមសំណួរ«កម្ពុជាថ្មី» ក្នុងសន្និសីទសារព័ត៌មានស្តីពី ភាពជោគជ័យរយៈពេល ៥ ឆ្នាំ របស់រដ្ឋបាលខេត្តកាលពីម្សិលមិញនេះថា ពាក់ព័ន្ធនឹងអាជីវកម្មជីកត្បូងនៅក្នុងខេត្ត នាពេលកន្លងមកពិតជាធ្លាប់មាន ប៉ុន្តែរយៈពេលប្រមាណ ៤-៥ ឆ្នាំ ចុងក្រោយនេះ រដ្ឋបាលខេត្តមិនអនុញ្ញាតឱ្យធ្វើទៀតទេ ព្រោះការជីកត្បូងអាចធ្វើឲ្យរលាយឬបាត់បង់បន្តិចម្តង ដែលជាធនធានមិនងាយកើតឡើងវិញ។

«ធ្លាប់មានការវិនិយោគនៅក្នុងខេត្តពិតប្រាកដមែន ប៉ុន្តែខណៈពេលបរិបទនៃជំងឺកូវីដ១៩ បានរីករាលដាលបានធ្វើឱ្យសិប្បកម្មត្បូងផ្អាកដំណើរការទាំងស្រុង និងលែងមានតទៅទៀត គួបផ្សំនឹងបញ្ហាគ្មានទីផ្សារគ្រប់គ្រាន់»។

ទន្ទឹមនេះ ចំពោះតំបន់ដែលអាចមានត្បូង លោក អ៊ូច ភា ក៏បានគូសបញ្ជាក់ថា តំបន់ទាំងអស់នោះគឺមិនត្រូវបានអាជីវកម្មឯកជនណាមួយបានលួចទៅដំណើរការធ្វើអាជីវកម្មទៀតដែរ។

ប៉ុន្មានឆ្នាំមុននេះ មានការល្បីស្រុកមួយចំនួនក្នុងខេត្តតាកែវមានការរកឃើញត្បូង។ មានចម្ងាយជាង ៤០ គីឡូម៉ែត្រពីទីរួខេត្ត ស្រុកគីរីវង់ត្រូវបានអះអាងថាបានរកឃើញត្បូងដ៏មានតម្លៃ។

ជាក់ស្តែងនៅរមណីយដ្ឋានទឹកជ្រោះផ្អោក ស្ថិតនៅឃុំព្រះបាទជាន់ជុំ ស្រុកគីរីវង់ មានបងប្អូនអាជីវករបានដាក់លក់ត្បូងដែលរកឃើញក្នុងខេត្តតាកែវ ក្នុងទូរកញ្ចក់យ៉ាងច្រើនមានទាំងកែច្នៃរួចនិងមិនទាន់កែច្នៃ សម្រាប់ពលរដ្ឋនិងអ្នកទេសចរ។

ត្បូងដែលត្រូវបានរកឃើញដោយអ្នកស្រុកនិងដាក់លក់ដូរយ៉ាងចំហមានដូចជាប្រភេទត្បូងនឹល ត្បូងតូប៉ាស់ ត្បូងអាកូម៉ារីន ត្បូងស៊ីទ្រីន ហើយតម្លៃខុសៗគ្នាតាមប្រភេទនិងការកែច្នៃ៕

The post លោក អ៊ូច ភា៖ អាជីវកម្មជីកត្បូងក្នុងខេត្តតាកែវ បានផ្អាកដំណើរការទាំងស្រុងហើយ appeared first on Kampuchea Thmey Daily.

បឹងតាកែវ បញ្ចប់លើកទំនប់ក្រវាត់ការពារ ទប់ស្កាត់មិនឲ្យមានអ្នករំលោភកាន់កាប់

Dy Bunnara — Fri, 03 Mar 2023 02:58:08 +0000

បឹងតាកែវស្ថិតក្នុងក្រុងដូនកែវ ត្រូវបានអាជ្ញាធរបញ្ចប់ការសាងសង់ទំនប់ក្រវាត់ ដើម្បីការពារទប់ស្កាត់កុំឲ្យមានអ្នកទន្រ្ទានកាន់កាប់។

លោក អ៊ូច ភា អភិបាលនៃគណៈអភិបាលខេត្តតាកែវ

ថ្លែងប្រាប់បណ្តាញសារព័ត៌មានក្នុងសន្និសីទកាលពីម្សិលមិញនេះ លោក អ៊ូច ភា អភិបាលនៃគណៈអភិបាលខេត្តតាកែវបានបញ្ជាក់ថា ដោយសារបារម្ភខ្លាចថ្ងៃអនាគតបើសិនបឹងតាកែវកាន់តែរាក់ មនុស្សកាន់តែទន្ទ្រានបន្តិចម្តងៗអាចនាំឲ្យបាត់បង់ទំហំផ្ទៃបឹង។ ដូច្នេះដោយបានការគាំទ្រពីប្រមុខរដ្ឋាភិបាលតាមរយៈក្រសួងធនធានទឹក អាជ្ញាធរបានស្តារបឹងនិងកាយក្រវាត់ទំនប់ការពារកុំឲ្យមានអ្នកទន្ទ្រានតទៅទៀត។

«បើថាឥឡូវមានអ្នកចាក់ដីចូលបឹងគឺអត់មានទេ យើងការពារណាស់ ខិតខំស្តារកាយ រឿងលុបនេះដាច់ខាតហើយ តែបើនៅក្រៅទំនប់បឹងជាសិទ្ធិរបស់គេ»។ លោក អ៊ូច ភា អះអាង។

បឹងតាកែវជាផ្ទៃអាងស្តុកទឹកស្អាត សម្រាប់បម្រើផលប្រយោជន៍ដល់ប្រជាពលរដ្ឋរាប់ម៉ឺនគ្រួសារនៅក្នុងក្រុងដូនកែវ។ កន្លងទៅមានអ្នកបោះបង្គោលរំលោភយកផ្ទៃបឹង ធ្វើជាកម្មសិទ្ធិផ្ទាល់ខ្លួនយ៉ាងអនាធិបតេយ្យ។

បើតាមលោកអភិបាលខេត្ត ក្រោយអាជ្ញាធរបានបញ្ចប់ការលើកទំនប់ធ្វើក្រវាត់រួចរាល់ហើយនោះ ផ្ទៃបឹងតាកែវនឹងទទួលបានការពារទៅថ្ងៃអនាគត សម្រាប់បម្រើជាប្រយោជន៍សាធារណៈដល់ពលរដ្ឋទូទាំងខេត្ត៕

The post បឹងតាកែវ បញ្ចប់លើកទំនប់ក្រវាត់ការពារ ទប់ស្កាត់មិនឲ្យមានអ្នករំលោភកាន់កាប់ appeared first on Kampuchea Thmey Daily.

ខេត្តតាកែវ មានគ្រឹះស្ថានឧត្តមសិក្សា ៤ កន្លែង មិនពិបាកសិស្សចុះមករៀនដល់ភ្នំពេញ

Din Thary — Fri, 03 Mar 2023 02:14:11 +0000

ក្នុងសន្និសីទសារព័ត៌មានកាលពីម្សិលមិញនេះស្តីពី«ភាពជោគជ័យរយៈពេល ៥ឆ្នាំរបស់រដ្ឋបាលខេត្តតាកែវ» លោក អ៊ូច ភា អភិបាលនៃគណៈអភិបាលខេត្តតាកែវបានអះអាងថា ខេត្តតាកែវមានសាកលវិទ្យាល័យ និងវិទ្យាស្ថានសរុបចំនួន ៤ ដែលកំពុងដំណើរការបំពេញតម្រូវការសិក្សារបស់សិស្សានុសិស្ស។

លោក អ៊ូច ភា គូសបញ្ជាក់ថា ពាក់ព័ន្ធនឹងវិស័យអប់រំនាពេលកន្លងមក រដ្ឋបាលខេត្តគ្រប់លំដាប់ថ្នាក់ បានខិតខំប្រឹងប្រែងយ៉ាងខ្លាំងដើម្បីពង្រឹងគុណភាពដល់ការសិក្សា សុជីវធម៌ គុណធម៌ របស់សិស្សនៅតាមសាលានីមួយៗ ទាំងក្នុងសាលារដ្ឋ និងឯកជនផងដែរ ធ្វើយ៉ាងណាឱ្យសិស្សខិតខំប្រឹងប្រែងយកចិត្តទុកដាក់ក្នុងការរៀនសូត្រ។

ស្របពេលជាមួយគ្នានេះ លោក អ៊ូច ភា បានគូសបញ្ជាក់បន្ថែមថា អ្វីដែលគួរឱ្យគត់សម្គាល់នោះ ក្នុងចំណោមសិស្សដែលទទួលបាននិទ្ទេសល្អប្រសើរ ក្នុងឆ្នាំកន្លងមកឃើញថា សិស្សស្រីមានចំនួនកើនឡើងខ្ពស់ខុសពីពេលមុនៗ ដែលនេះអាចបានបញ្ជាក់ថា សិស្សស្រីមានសិទ្ធិអាចទទួលបានសិក្សារៀនសូត្របានច្រើនជាងមុន។ ហេតុដូចនេះ ដើម្បីអាចបម្រើដល់ការបន្តការសិក្សារបស់សិស្សពិសេសសម្រាប់សិស្សស្រី ខេត្តតាកែវក៏មានសាកលវិទ្យាល័យចំនួន ២ គឺសាកលវិទ្យាល័យអង្គរខេរាខេត្តតាកែវ និងសាកលវិទ្យាល័យបៀលប្រាយសាខាខេត្តតាកែវ ដែលកំពុងដំណើរការ។

បន្ថែមពីនេះ ក៏មាននូវវិទ្យាស្ថានចំនួន ២ គឺវិទ្យាស្ថានតេជោ សែន ភូមិភាគ និងវិទ្យាស្ថានសន្ត ប៉ូល ក៏កំពុងដំណើរ បម្រើដល់ការសិក្សាជំនាញវិជ្ជាជីវៈផ្សេងៗ។

លោក ញឹម យុទ្ធា អនុប្រធានមន្ទីរអប់រំ យុវជន និងកីឡា ខេត្តតាកែវ បានគូសបញ្ជាក់ឱ្យដឹងបន្ថែមពីវិស័យអប់រំថា នាពេលបច្ចុប្បន្ននេះ ខេត្តតាកែវមានវិទ្យាល័យនិងអនុវិទ្យាល័យសរុប ១១៩ កន្លែង សាលាបឋមសិក្សា ៣៨២ កន្លែង ព្រមទាំងមត្តេយ្យសិក្សា ៤៦៨សាលា មានសិស្សសរុបប្រមាណជាង ២០ម៉ឺននាក់។ ហើយ ក្នុងរយៈពេល ៥កន្លងមក វិស័យអប់រំ វិស័យអប់រំ នៅខេត្ត មានការរីកចម្រើនគួរឱ្យកត់សម្គាល់ ជាពិសេសក្នុងឆ្នាំសិក្សា ២០២១-២០២២ សិស្សទទួលបានសិស្សនិទ្ទេស A មានរហូតដល់ ៧០នាក់។

បើតាមមន្ទីរអប់រំយុវជននិងកីឡា ខេត្តតាកែវ ក្នុងរយៈពេល ៥ឆ្នាំ ចំពោះសិស្សដែលប្រឡងជាប់និទ្ទេស A ទូទាំងខេត្តមានចំនួន ២២១ នាក់ ដែលនេះ ពិតជាបានជួយលើកមុខមាត់ខេត្ត ព្រមទាំងជាកិត្តិយសស្នាដៃចំពោះការខិតខំប្រឹងប្រែងរបស់លោកគ្រូអ្នកគ្រូគ្រប់កម្រិតថ្នាក់។

ដោយ៖ ថារី

The post ខេត្តតាកែវ មានគ្រឹះស្ថានឧត្តមសិក្សា ៤ កន្លែង មិនពិបាកសិស្សចុះមករៀនដល់ភ្នំពេញ appeared first on Kampuchea Thmey Daily.

តាមផ្លូវជាតិលេខ ២ ប្រជុំជនផ្សារសំរោងយ៉ោងរៀបចំបង្គោលភ្លើងបំភ្លឺ ងាយស្រួលធ្វើដំណើរយប់ព្រលប់

Dy Bunnara — Thu, 02 Mar 2023 09:30:02 +0000

តំបន់ប្រជុំជនផ្សារសំរោងយ៉ោងតាមផ្លូវជាតិលេខ ២ ក្នុងខេត្តតាកែវ បានរៀបចំដំឡើងបង្គោលភ្លើងបំភ្លឺតាមផ្លូវជាតិ ដែលបានជួយលើកសោភណភាព ក៏ដូចជាសម្រួលការគ្រប់គ្រងសន្តិសុខក្នុងមូលដ្ឋាន។

លោក អ៊ូច ភា អភិបាលនៃគណៈអភិបាលខេត្តតាកែវបានបញ្ជាក់ថា បង្គោលភ្លើងបំភ្លឺនេះជាគម្រោងរបស់ក្រសួងសាធារណការនិងដឹកជញ្ជូន ដែលបានរៀបចំនៅក្នុងតំបន់ប្រជុំជនតាមផ្លូវជាតិក្នុងខេត្ត។

លោកអភិបាលខេត្តបន្តថា ក្រៅពីនៅតំបន់ប្រជុំជនផ្សារសំរោងយ៉ោងតាមផ្លូវជាតិលេខ ២ ក៏បានរៀបចំដំឡើងបង្គោលភ្លើងបំភ្លឺនៅផ្សារអង់តាសោមតាមផ្លូវជាតិលេខ ៣ និងនៅក្នុងក្រុងដូនកែវខេត្តតាកែវ។

លោកអភិបាលខេត្តបន្ថែមថា ការរៀបចំបង្គោលភ្លើងបំភ្លឺតាមផ្លូវជាតិសំខាន់ៗនៅក្នុងតំបន់ប្រជុំជន ក្រៅពីបង្កើនសោភណភាពបង្កលក្ខណៈងាយស្រួលសម្រាប់ពលរដ្ឋធ្វើដំណើរយប់ព្រលប់ ក៏ជួយពង្រឹងការពារសន្តិសុខប្រជាពលរដ្ឋនៅតាមមូលដ្ឋានផងដែរ៕

The post តាមផ្លូវជាតិលេខ ២ ប្រជុំជនផ្សារសំរោងយ៉ោងរៀបចំបង្គោលភ្លើងបំភ្លឺ ងាយស្រួលធ្វើដំណើរយប់ព្រលប់ appeared first on Kampuchea Thmey Daily.

ផ្លូវចូលរមណីយដ្ឋានទន្លេបាទី នឹងបញ្ចប់ឲ្យរួចមុនចូលឆ្នាំខ្មែរ

Dy Bunnara — Thu, 02 Mar 2023 07:52:03 +0000

ផ្លូវចូលរមណីយដ្ឋានទន្លេបាទីដែលបានផ្អាកមួយរយៈ ហើយទើបតែថ្មីៗនេះមានការបញ្ជូនគ្រឿងចក្រផ្តើមដំណើរការស្ថាបនាបន្តឡើងវិញ បើតាមអាជ្ញាធរខេត្តតាកែវអះអាងថាគ្រោងនឹងបញ្ចប់នៅមុនពិធីបុណ្យចូលឆ្នាំខ្មែរ។

ឆ្លើយតបសំនួររបស់កម្ពុជាថ្មីនៅក្នុងសន្និសីទនៅព្រឹកនេះ លោក អ៊ូច ភា អភិបាលនៃគណៈអភិបាលខេត្តតាកែវបានបញ្ជាក់ថា កន្លងទៅការកែលម្អផ្លូវចូលរមណីយដ្ឋានទន្លេបាទីជាគម្រោងរបស់ឯកជន ដែលក្រោយទទួលបានសិទ្ធិវិនិយោគនៅតំបន់ភ្នំតាម៉ៅ ក៏បានជួយស្ថាបនាផ្លូវដើម្បីផ្សារភ្ជាប់គម្រោងអភិវឌ្ឍរបស់ខ្លួន។ យ៉ាងណាក្រោយគម្រោងដកថយទៅវិញ ដំណើរការសាងសង់ក៏បានផ្អាកនៅមេម៉ាយ។

លោកអភិបាលខេត្តបញ្ជាក់ថា ដើម្បីសម្រួលកាត់បន្ថយការលំបាករបស់ពលរដ្ឋក្នុងការធ្វើដំណើរ ក្រុមហ៊ុនបានចាប់ផ្តើមបន្តស្ថាបនាផ្លូវចូលទៅរមណីយដ្ឋានទន្លេបាទីឡើងវិញ ហើយគ្រោងបញ្ចប់ឲ្យបាននៅមុនពិធីចូលឆ្នាំខ្មែរ។

យ៉ាងណាមិញបើតាមលោកអភិបាលខេត្ត ការស្ថាបនាបន្តនេះមានការកែសម្រួលខ្លះៗ តែនឹងបញ្ចប់តាមផែនការ។

ផ្លូវចូលរមណីយដ្ឋានទន្លេបាទីបានផ្អាកជាច្រើនខែ ខណៈកន្លែងខ្លះទើបតែបានឈូសឆាយ និងកន្លែងខ្លះទៀតបានចាក់បេតុងមួយចំហៀង។ បើតាមអ្នកភូមិប្រាប់កម្ពុជាថ្មី ការផ្អាកនេះក៏មិនដឹងមូលហេតុជាក់លាក់ គ្រាន់តែដឹងថាក្រោយក្រុមហ៊ុនឡេង ណាវ៉ាត់ត្រា ដកថយពីគម្រោងអភិវឌ្ឍដីឡូត៍នៅរមណីយដ្ឋានភ្នំតាម៉ៅ។

កន្លងទៅអាជ្ញាធរស្រុកបាទីបានជូនដំណឹងពីការស្ថាបនាផ្លូវខេត្តលេខ ១២០B ឆ្លងកាត់ភូមិទន្លេបាទី ភូមិថ្នល់ទក្សិណ ភូមិខ្នា និងភូមិត្បែង ឃុំក្រាំងធ្នង់ ដោយជួសជុលពង្រីកចាក់ក្រាលកៅស៊ូ (DBST) ប្រវែង ៤.៥៩០ម ចាប់ពីចន្លោះ គ.ម ០៦+០០០ ដល់ គ.ម ១៣+៩៥០។

ផ្លូវចូលរមណីយដ្ឋានទន្លេបាទីជាបណ្តាញផ្លូវដ៏សំខាន់មួយតភ្ជាប់ពីផ្លូវជាតិលេខ ២ ដល់ផ្លូវជាតិលេខ ៣ មានប្រវែងសរុបជាង ២០ គីឡូម៉ែត្រ។ បច្ចុប្បន្នផ្លូវនេះមានការប្រើប្រាស់និងដឹកជញ្ជូនច្រើន ហើយ៏មានរថយន្តធំៗបើកឆ្លងកាត់ជារៀងរាល់ថ្ងៃ ជាពិសេសរថយន្តដឹកសម្ភារៈទៅស្ថាបនាព្រលានយន្តហោះថ្មីនៅខេត្តកណ្តាល៕

The post ផ្លូវចូលរមណីយដ្ឋានទន្លេបាទី នឹងបញ្ចប់ឲ្យរួចមុនចូលឆ្នាំខ្មែរ appeared first on Kampuchea Thmey Daily.

លោក អ៊ូច ភា Archives - Kampuchea Thmey Daily

អភិបាលខេត្តតាកែវ អំពាវនាវឱ្យកសិករផ្អាកការធ្វើស្រូវប្រាំងលើកទី២ ព្រោះគ្មានទឹកគ្រប់គ្រាន់

ហ្វេសប៊ុកមួយយកឈ្មោះនិងរូបអភិបាលខេត្តផ្ញើសារឆ្លើយឆ្លងស្នេហា

ខេត្ត​តាកែវ​បញ្ចប់​ការ​​បោះ​បង្គោល​ព្រំដែន​ធំ​ទាំង ៣៧ បង្គោល​ ជាមួយប្រទេស​​វៀតណាម

លោក​ អ៊ូច​ ភា៖ អាជីវកម្ម​ជីក​ត្បូងក្នុង​ខេត្ត​តាកែវ​ បាន​ផ្អាក​​ដំណើរ​ការ​ទាំង​ស្រុង​ហើយ​

បឹង​តាកែវ បញ្ចប់​លើក​​ទំនប់ក្រវាត់​​ការពារ​ ទប់ស្កាត់​មិន​ឲ្យ​មាន​អ្នក​រំលោភ​កាន់កាប់

ខេត្ត​តាកែវ​ មាន​គ្រឹះស្ថាន​​ឧត្តមសិក្សា​ ៤ កន្លែង មិន​ពិបាក​សិស្ស​ចុះ​មក​រៀន​ដល់​ភ្នំពេញ

តាមផ្លូវជាតិលេខ ២ ប្រជុំជន​ផ្សារ​សំរោងយ៉ោង​រៀបចំ​បង្គោល​ភ្លើង​បំភ្លឺ ងាយស្រួល​ធ្វើ​ដំណើរ​​យប់​ព្រលប់

ផ្លូវ​ចូល​រមណីយដ្ឋាន​ទន្លេ​បាទី ​នឹង​បញ្ចប់​​ឲ្យ​រួច​មុន​ចូល​ឆ្នាំ​ខ្មែរ

ខេត្តតាកែវបញ្ចប់ការបោះបង្គោលព្រំដែនធំទាំង ៣៧ បង្គោល ជាមួយប្រទេសវៀតណាម

លោក អ៊ូច ភា៖ អាជីវកម្មជីកត្បូងក្នុងខេត្តតាកែវ បានផ្អាកដំណើរការទាំងស្រុងហើយ

បឹងតាកែវ បញ្ចប់លើកទំនប់ក្រវាត់ការពារ ទប់ស្កាត់មិនឲ្យមានអ្នករំលោភកាន់កាប់

ខេត្តតាកែវ មានគ្រឹះស្ថានឧត្តមសិក្សា ៤ កន្លែង មិនពិបាកសិស្សចុះមករៀនដល់ភ្នំពេញ

តាមផ្លូវជាតិលេខ ២ ប្រជុំជនផ្សារសំរោងយ៉ោងរៀបចំបង្គោលភ្លើងបំភ្លឺ ងាយស្រួលធ្វើដំណើរយប់ព្រលប់

ផ្លូវចូលរមណីយដ្ឋានទន្លេបាទី នឹងបញ្ចប់ឲ្យរួចមុនចូលឆ្នាំខ្មែរ