ព័ត៌មានជាតិ

ផ្លូវចូលរមណីយដ្ឋានទន្លេបាទី នឹងបញ្ចប់ឲ្យរួចមុនចូលឆ្នាំខ្មែរ

បានផុស

១ year មុន

នៅ

ថ្ងៃព្រហស្បតិ៍ ២ មីនា ២០២៣

ដោយ

ផ្លូវចូលរមណីយដ្ឋានទន្លេបាទីដែលបានផ្អាកមួយរយៈ ហើយទើបតែថ្មីៗនេះមានការបញ្ជូនគ្រឿងចក្រផ្តើមដំណើរការស្ថាបនាបន្តឡើងវិញ បើតាមអាជ្ញាធរខេត្តតាកែវអះអាងថាគ្រោងនឹងបញ្ចប់នៅមុនពិធីបុណ្យចូលឆ្នាំខ្មែរ។

ឆ្លើយតបសំនួររបស់កម្ពុជាថ្មីនៅក្នុងសន្និសីទនៅព្រឹកនេះ លោក អ៊ូច ភា អភិបាលនៃគណៈអភិបាលខេត្តតាកែវបានបញ្ជាក់ថា កន្លងទៅការកែលម្អផ្លូវចូលរមណីយដ្ឋានទន្លេបាទីជាគម្រោងរបស់ឯកជន ដែលក្រោយទទួលបានសិទ្ធិវិនិយោគនៅតំបន់ភ្នំតាម៉ៅ ក៏បានជួយស្ថាបនាផ្លូវដើម្បីផ្សារភ្ជាប់គម្រោងអភិវឌ្ឍរបស់ខ្លួន។ យ៉ាងណាក្រោយគម្រោងដកថយទៅវិញ ដំណើរការសាងសង់ក៏បានផ្អាកនៅមេម៉ាយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកអភិបាលខេត្តបញ្ជាក់ថា ដើម្បីសម្រួលកាត់បន្ថយការលំបាករបស់ពលរដ្ឋក្នុងការធ្វើដំណើរ ក្រុមហ៊ុនបានចាប់ផ្តើមបន្តស្ថាបនាផ្លូវចូលទៅរមណីយដ្ឋានទន្លេបាទីឡើងវិញ ហើយគ្រោងបញ្ចប់ឲ្យបាននៅមុនពិធីចូលឆ្នាំខ្មែរ។

យ៉ាងណាមិញបើតាមលោកអភិបាលខេត្ត ការស្ថាបនាបន្តនេះមានការកែសម្រួលខ្លះៗ តែនឹងបញ្ចប់តាមផែនការ។

ផ្លូវចូលរមណីយដ្ឋានទន្លេបាទីបានផ្អាកជាច្រើនខែ ខណៈកន្លែងខ្លះទើបតែបានឈូសឆាយ និងកន្លែងខ្លះទៀតបានចាក់បេតុងមួយចំហៀង។ បើតាមអ្នកភូមិប្រាប់កម្ពុជាថ្មី ការផ្អាកនេះក៏មិនដឹងមូលហេតុជាក់លាក់ គ្រាន់តែដឹងថាក្រោយក្រុមហ៊ុនឡេង ណាវ៉ាត់ត្រា ដកថយពីគម្រោងអភិវឌ្ឍដីឡូត៍នៅរមណីយដ្ឋានភ្នំតាម៉ៅ។

កន្លងទៅអាជ្ញាធរស្រុកបាទីបានជូនដំណឹងពីការស្ថាបនាផ្លូវខេត្តលេខ ១២០B ឆ្លងកាត់ភូមិទន្លេបាទី ភូមិថ្នល់ទក្សិណ ភូមិខ្នា និងភូមិត្បែង ឃុំក្រាំងធ្នង់ ដោយជួសជុលពង្រីកចាក់ក្រាលកៅស៊ូ (DBST) ប្រវែង ៤.៥៩០ម ចាប់ពីចន្លោះ គ.ម ០៦+០០០ ដល់ គ.ម ១៣+៩៥០។

ផ្លូវចូលរមណីយដ្ឋានទន្លេបាទីជាបណ្តាញផ្លូវដ៏សំខាន់មួយតភ្ជាប់ពីផ្លូវជាតិលេខ ២ ដល់ផ្លូវជាតិលេខ ៣ មានប្រវែងសរុបជាង ២០ គីឡូម៉ែត្រ។ បច្ចុប្បន្នផ្លូវនេះមានការប្រើប្រាស់និងដឹកជញ្ជូនច្រើន ហើយ៏មានរថយន្តធំៗបើកឆ្លងកាត់ជារៀងរាល់ថ្ងៃ ជាពិសេសរថយន្តដឹកសម្ភារៈទៅស្ថាបនាព្រលានយន្តហោះថ្មីនៅខេត្តកណ្តាល៕