លោក Pita Limjaroenrat Archives - Kampuchea Thmey Daily

បុរសម្នាក់ជាប់ទោសជាងកន្លះសតវត្សរ៍ ពាក់ព័ន្ធបង្ហោះសារប្រមាថស្តេចថៃ

Rann Reuy — Thu, 05 Sep 2024 04:10:05 +0000

ចៅក្រមតុលាការក្នុងខេត្តឈៀរ៉ៃ (Chiang Rai) ស្ថិតនៅភាគខាងជើងប្រទេសថៃ កាលថ្ងៃពុធទី៤ខែកញ្ញា បានកាត់ទោសដាក់គុកបុរសម្នាក់រយៈពេល៥៤ឆ្នាំនិង៦ខែ ពីបទប្រមាថព្រះមហាក្សត្រ។

បណ្តាញសង្គមហ្វេសប៊ុកនៃសារព័ត៌មាន Khaosod បានលើកឡើងថា «កំណត់ត្រាថ្មីនៃការផ្តន្ទាទោសដាក់ពន្ធនាគារសម្រាប់ជនល្មើសប្រមាថព្រះមហាក្សត្រ»។

លោក មង្គលវ័យ៣១ឆ្នាំត្រូវផ្តន្ទាទោសប្រមាថព្រះមហាក្សត្រថៃ ដោយជាប់ទោស៥៤ឆ្នាំនៅខេត្តឈៀរ៉ៃ។ Bangkok Post

យោងការលើកឡើងរបស់មេធាវីថៃដើម្បីសិទ្ធិមនុស្សនៅថ្ងៃពុធ សារព័ត៌មានខាងលើ បានផ្សាយថា តុលាការខេត្តឈៀងរ៉ៃសម្រេចផ្តន្ទាទោសដាក់ពន្ធនាគារចំនួន៥៤ឆ្នាំនិង៦ខែសម្រាប់ការបង្ហោះហ្វេសប៊ុក (FB) ចំនួនពីរក្នុងឆ្នាំ ២០២០ដែលបរិហារកេរ្តិ៍ព្រះមហាក្សត្រ និងបំពានច្បាប់ឧក្រិដ្ឋកម្មកុំព្យូទ័រ (និងច្បាប់ពាក់ព័ន្ធផ្សេងៗទៀត)។

ជនជាប់ចោទនោះត្រូវបានគេដឹងឈ្មោះថា មង្គល (Mongkol) ដោយមិនបានបញ្ជាក់ត្រកូល វ័យ៣១ឆ្នាំ មានមុខរបរជាអ្នកលក់សម្លៀកបំពាក់ បាននិយាយថា លោកមិនបានបង្ខូចកេរ្តិ៍ឈ្មោះ«រាជានិយម»ទេ ប៉ុន្តែលោកគ្រាន់តែបង្ហាញការជំទាស់របស់លោកនឹងព្រះមហាក្សត្រទាក់ទងនឹងនយោបាយ។ តុលាការបាននិយាយថា វាជាការបរិហារកេរ្តិ៍ ហើយពាក្យជេរប្រមាថត្រូវបានប្រើ។

ទោះបីយ៉ាងណាក៏ដោយ ទោសដែលបានផ្តន្ទារួច និងបូករួមគ្នាត្រូវបានកាត់បន្ថយមួយភាគបីឬពី៨១ឆ្នាំមកនៅត្រឹម៥៤ឆ្នាំ។

សារព័ត៌មានបាងកកប៉ុស្តិ៍ បានផ្សាយនៅថ្ងៃទី៤ខែកញ្ញា បានឱ្យដឹងថា យោងទិន្នន័យពី TLHR មនុស្សចំនួន១៩៥៤នាក់ត្រូវបានផ្តន្ទាទោសចំពោះការចូលរួមនយោបាយនិងការបញ្ចេញមតិចាប់តាំងពីការចាប់ផ្តើមនៃការតវ៉ាទាមទារសេរីភាពយុវជន ( Free Youth) ក្នុងខែកក្កដាឆ្នាំ២០២០ រហូតដល់ថ្ងៃទី៣១ខែកក្កដាឆ្នាំនេះ។ យ៉ាងហោចណាស់ ២៧២កំពុងប្រឈមការចោទប្រកាន់ប្រមាថព្រះមហាក្សត្រក្រោមមាត្រា១១២ និង ១៥២ ពាក់ព័ន្ធរាជបល្ល័ង្គ។

និន្នាការប្រឆាំងអំណាចព្រះមហាក្សត្រថៃបានកើនឡើងក្នុងចំណោមយុវជនជំនាន់ក្រោយរបស់ថៃ ហើយកាលពីឆ្នាំ២០២៣ គណបក្សនយោបាយថៃចលនាឆ្ពោះទៅមុខ (MFP) ដែលប្រមូលផ្តុំដោយអ្នកនយោបាយវ័យក្មេង បានកំណត់គោលនយោបាយក្នុងការឃោសនារកសម្លេងឆ្នោត ដោយសន្យាធ្វើវិសោធនកម្មច្បាប់រដ្ឋធម្មនុញ្ញតពាក់ព័ន្ធព្រះរាជបល្ល័ង្គ ដោយបន្ថយអំណាចព្រះមហាក្សត្រ។

ការដាក់ចេញគោលនយោបាយនោះ បានធ្វើឱ្យគណបក្សនេះឈ្នះការបោះឆ្នោតកាលខែឧសភាឆ្នាំ២០២៣ ប៉ុន្តែបរាជ័យក្នុងការបង្កើតរដ្ឋាភិបាលចម្រុះ ហើយក៏ត្រូវប្រឈមការរំលាយបក្សវិញ ហើយថ្នាក់ដឹកនាំនៃបក្សនេះមួយចំនួន មានលោក ភិថា លឹមចារើនរ៉ាតជាដើមត្រូវជាប់បម្រាមធ្វើនយោបាយ១០ឆ្នាំ ដោយសារតែបំណងប៉ងបន្ថយអំណាចព្រះមហាក្សត្រ៕

ដោយ រ៉ាន់ រើយ

The post បុរសម្នាក់ជាប់ទោសជាងកន្លះសតវត្សរ៍ ពាក់ព័ន្ធបង្ហោះសារប្រមាថស្តេចថៃ appeared first on Kampuchea Thmey Daily.

បក្សលោក Pita ប្រឈមហានិភ័យរំលាយចោល ក្រោយចាញ់ក្ដីនៅតុលាការ

Bun sopheap — Thu, 01 Feb 2024 08:22:20 +0000

គណបក្សចលនាឆ្ពោះទៅមុខដឹកនាំដោយលោក Pita Limjaroenrat ដែលទទួលបានសំឡេងច្រើនជាងគេក្នុងការបោះឆ្នោតសកលកាលពីឆ្នាំមុន ប្រឈមនឹងហានិភ័យរំលាយចោល បន្ទាប់ពីតុលាការរកឃើញថា គណបក្សមួយនេះបានបំពានរដ្ឋធម្មនុញ្ញ ពាក់ព័ន្ធទៅនឹងច្បាប់ប្រមាថព្រះមហាក្សត្រថៃ ។ នេះបើយោងតាមចេញផ្សាយរបស់សារព័ត៌មាន BBC កាលពីថ្ងៃទី៣១ ខែមករាកន្លងទៅ ។

ប្រធានគណបក្សលោក Pita Limjaroenrat ដែលជាអ្នកនយោបាយវ័យក្មេងមានការអប់រំនៅសាកលវិទ្យាល័យ Harvard មានរឿងចម្រូងចម្រាសជាច្រើនពាក់ព័ន្ធនឹងរបបរាជានិយម ក៏ដូចជានៅក្នុងក្រុមចម្រុះដែលលោកជ្រើសរើសបាន ក្រោយឈ្នះសំឡេងភាគច្រើននៅក្នុងការបោះឆ្នោតឆ្នាំ ២០២៣ ។

តុលាការធម្មនុញ្ញនិយាយថា គណបក្សចលនាឆ្ពោះទៅមុខមិនស្ថិតនៅក្នុងជួររដ្ឋាភិបាលនោះទេ ដោយសារតែគោលនយោបាយធ្វើវិសោធនកម្មច្បាប់ស្តីពីការប្រមាថព្រះមហាក្សត្ររបស់បក្ស គឺរំលោភរដ្ឋធម្មនុញ្ញ ។ តុលាការធម្មនុញ្ញបានសម្រេចថា គណបក្សចលនាឆ្ពោះទៅមុខ និងមេដឹកនាំរបស់ខ្លួនបង្ហាញសកម្មភាពក្នុងន័យអំពាវនាវឲ្យមានការផ្ដួលរំលំរបបរាជាធិបតេយ្យរបស់ប្រទេសថៃ ដែលមានព្រះមហាក្សត្រជាប្រមុខរដ្ឋ ។

ទន្ទឹមនោះ តុលាការបានបញ្ជាឲ្យគណបក្សចលនាឆ្ពោះទៅមុខ បញ្ឈប់រាល់សកម្មភាព ឬទស្សនៈតស៊ូមតិឲ្យលុបចោលច្បាប់ប្រមាថព្រះមហាក្សត្រ និងហាមឃាត់ការធ្វើវិសោធនកម្មច្បាប់នេះថែមទៀតផងដែរ ហើយនេះបង្ហាញថា គណបក្សរបស់លោក Pita អាចនឹងត្រូវបានរំលាយចោល និងអាចមានការហាមឃាត់មេដឹកនាំបក្សមិនឲ្យប្រឡូកក្នុងនយោបាយរយៈពេលជាច្រើនឆ្នាំ ។

ទោះយ៉ាងណា គណបក្សចលនាឆ្ពោះទៅមុខបានអះអាងថា វាជាតួនាទីស្របច្បាប់របស់សភាជាប់ឆ្នោត ដើម្បីពិនិត្យច្បាប់ ដែលជាផ្នែកនៃក្រមព្រហ្មទណ្ឌ ខណៈច្បាប់ស្តីពីការប្រមាថព្រះមហាក្សត្ររបស់ប្រទេសថៃត្រូវបានផ្លាស់ប្តូរចំនួន ២ លើករួចមកហើយ ប៉ុន្តែវានៅតែជាឧបករណ៍ដ៏មានឥទ្ធិពលមួយដើម្បីប្រឆាំងនឹងអ្នកនយោបាយ ហើយតាមរយៈការសម្រេចរបស់តុលាការនេះទៀតសោត ក៏កាន់តែធ្វើឲ្យច្បាប់ប្រមាថមហាក្សត្រមិនអាចប៉ះពាល់បាន ។

គួរបញ្ជាក់ថា ពាក់ព័ន្ធនឹងច្បាប់ប្រមាថមហាក្សត្រនេះដែរ កាលពីដើមខែនេះបុរសអាយុ ៣០ ឆ្នាំម្នាក់នៅទីក្រុងបាងកកត្រូវបានកាត់ទោសឲ្យជាប់ពន្ធនាគាររយៈពេល ៥០ ឆ្នាំពីបទរិះគន់របបរាជានិយមថៃ និងមានមនុស្សជាង ២៦០ នាក់ត្រូវបានចោទប្រកាន់ក្រោមច្បាប់នេះ ចាប់តាំងពីខែវិច្ឆិកា ឆ្នាំ២០២០ មក ៕

អត្ថបទ ៖ ប៊ុន សុភាព

The post បក្សលោក Pita ប្រឈមហានិភ័យរំលាយចោល ក្រោយចាញ់ក្ដីនៅតុលាការ appeared first on Kampuchea Thmey Daily.

លោក Pita ទទួលបានសិទ្ធិ ចូលប្រឡូកក្នុងឆាកនយោបាយឡើងវិញ

Sok Sovann — Wed, 24 Jan 2024 08:53:56 +0000

តាមការចុះផ្សាយរបស់ Thai PBS នៅថ្ងៃពុធទី២៤, តុលាការធម្មនុញ្ញថៃ បានសម្រេចថា អតីតមេដឹកនាំគណបក្សចលនាឆ្ពោះទៅមុខ លោក Pita Limjaroenrat គ្មានទោសឡើយ ចំពោះបទចោទប្រកាន់ដែលថា គាត់បានចូលរួមការបោះឆ្នោតឆ្នាំមុន ទាំងដែលខ្លួនកំពុងកាន់កាប់ភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយមួយ ដែលនេះមានន័យថា លោក Pita អាចរក្សាអាសនៈសភារបស់ខ្លួន ហើយសេចក្តីសម្រេចនេះ ក៏បើកផ្លូវឲ្យគាត់ វិលត្រលប់មកប្រឡូកក្នុងឆាកនយោបាយសាជាថ្មីផងដែរ បន្ទាប់ពីការហាមឃាត់មិនឲ្យបំពេញមុខងារនីតិបញ្ញត្តិ តាំងពីខែកក្កដាឆ្នាំមុនមក។

លោក Pita Limjaroenrat (រូបថត៖ AP)

តុលាការសម្រេចថា iTV លែងជាអាជីវកម្មប្រព័ន្ធផ្សព្វផ្សាយទៀតហើយ ដូច្នេះការកាន់កាប់ភាគហ៊ុនរបស់ Pita នៅក្នុងក្រុមហ៊ុននេះ មិនបំពានរដ្ឋធម្មនុញ្ញ និងច្បាប់បោះឆ្នោតទេ។

សូមបញ្ជាក់ជាថ្មី ជម្លោះនយោបាយប្រឆាំងលោក Pita ដែលជាបេក្ខជននាយករដ្ឋមន្ត្រីនៃគណបក្ស ចលនាឆ្ពោះទៅមុខ បានចាប់ផ្តើមឡើងក្នុងខែឧសភាឆ្នាំមុន នៅពេលគណៈកម្មាធិការរៀបចំការបោះឆ្នោត ដាក់ការចោទប្រកាន់គាត់ពីបទកាន់កាប់ភាគហ៊ុនចំនួន៤២០០០ហ៊ុននៅក្នុងក្រុមហ៊ុន iTV Plc ដែលត្រូវបានចុះបញ្ជីជាអាជីវកម្មប្រព័ន្ធផ្សព្វផ្សាយ។

មាត្រា ៩៨ នៃរដ្ឋធម្មនុញ្ញថៃចែងថា ម្ចាស់ឬម្ចាស់ភាគហ៊ុននៃកាសែត ឬអាជីវកម្មប្រព័ន្ធផ្សព្វផ្សាយផ្សេងទៀត គឺត្រូវបានហាមឃាត់មិនឈរឈ្មោះជាបេក្ខជនក្នុងការបោះឆ្នោតឡើយ។

ក្រោយមក EC បានបញ្ជូនសំណុំរឿងនេះទៅតុលាការធម្មនុញ្ញ ហើយក៏សម្រេចឲ្យព្យួរលោក Pita ពីសភាជាបណ្តោះអាសន្ន តែម្តង។ ព្រោះតែការជាប់គាំងនយោបាយរាប់ខែនេះហើយ ទើបធ្វើឲ្យប្រទេសថៃ សម្រេចជ្រើសរើសនាយករដ្ឋមន្ត្រីថ្មី ដោយតំណែងបានធ្លាក់ទៅលើលោក សេដ្ឋា ថាវីស៊ីន មកពីគណបក្សភឿថៃ៕

អត្ថបទ៖ សុខ សុវណ្ណ

ចុចអាន៖ លោក Pita ទទួលបានតំណែងថ្មីក្នុងបក្សចលនាឆ្ពោះទៅមុខ

The post លោក Pita ទទួលបានសិទ្ធិ ចូលប្រឡូកក្នុងឆាកនយោបាយឡើងវិញ appeared first on Kampuchea Thmey Daily.

លេចវត្តមានលោក Pita នៅផលិតកម្ម YG Entertainment

សាង ស្រីល័ក្ខ — Thu, 07 Dec 2023 09:54:22 +0000

លោក Pita Limjaroenrat និងជាមេដឹកនាំគណបក្សចលនាឆ្ពោះទៅមុខ បានទៅបំពេញទស្សនកិច្ចនៅប្រទេសកូរ៉េខាងត្បូង កាលពីថ្ងៃទី៤-៧ ខែធ្នូ ខណៈដែលលោកបង្ហាញវត្តមាននៅផលិតកម្ម YG Entertainment យ៉ាងភ្ញាក់ផ្អើល។

អ្នកនយោបាយថៃរូបនេះបានទៅទស្សនាកន្លែងផ្សេងៗ រួមទាំងសាជីវកម្ម និងសាកលវិទ្យាល័យ រួមទាំងក្រុមហ៊ុនកម្សាន្តយក្សមួយគឺ YG Entertainment ។ ក្នុងពេលជាមួយគ្នានោះដែរ លោកបានឈាងទភៅទស្សនកិច្ចអគារ YG ព្រមទាំងថតរូបនៅពីមុខអេក្រង់ LED ដ៏ធំដែលបង្ហាញពី BLACKPINK និង BABYMONSTER ក៏ដូចជាព្រឹត្តិបត្រឆ្នុកផ្សេងៗ។

នៅពីក្រោយខ្នងរបស់លោកបានបង្ហាញឲ្យឃើញអេក្រង់ធំៗដាក់ថា “BABYMONSTER” នៅផ្នែកខាងលើ មុននឹងរាយបញ្ជីឈ្មោះបទចម្រៀងរបស់ក្រុមនេះអាចនឹងចេញនៅឆ្នាំ២០២៤ខាងមុខ។

១ SHUT UP

២ STUCK IN THE MESS

៣ LOVE ON MY HEART

៤ REALLY LIKE YOU

៥ FALLING IN LOVE

៦ LIKE THAT

៧ WE ARE BABYMONSTER

យ៉ាងណាមិញ អ្នកគាំទ្រ K-Pop គិតថា ធាតុលេខដែលបានរាយបញ្ជីក្រោមចំណងជើង “BABYMONSTER” ទំនងជាបញ្ជីបទសម្រាប់អាល់ប៊ុមពេញទី១ របស់ក្រុមដែលរំពឹងថានឹងចេញក្នុងពេលណាមួយនៅឆ្នាំ ២០២៤។

ទោះយ៉ាងណាក៏ដោយ បន្ទាប់ពីលោក Pita ចែករំលែករូបថតរបស់លោកនៅ YG លើ Instagram ផ្ទាល់ខ្លួន លោកបានបានទទួលការចាប់អារម្មណ៍ពីអ្នកគាំទ្រ K-Pop ។ អ្នកនិយមលេងអ៊ីនធឺណិតមួយចំនួនបានបញ្ចេញមតិឆ្លើយតបថា “តើអ្នកណាដែលថតរូបនោះប្រហែលជាបុគ្គលិក YG មែនទេ?”, តាមពិតជាមេដឹកនាំរបស់គណបក្សចលនាឆ្ពោះទៅមុខរបស់ប្រទេសថៃសោះ”៕

ប្រែសម្រួល៖ សាង ស្រីល័ក្ខ

ចុចអាន៖Jisoo បង្ហោះអបអរ ក្រោយ YG ប្រកាសបន្តកុងត្រាថ្មីរបស់ BLACKPINK

The post លេចវត្តមានលោក Pita នៅផលិតកម្ម YG Entertainment appeared first on Kampuchea Thmey Daily.

អង្គរក្សតាមការពារលោក Pita នៅអាមេរិក តាមពិតគឺជាតារាសម្ដែងមួយរូប

សាង ស្រីល័ក្ខ — Fri, 27 Oct 2023 08:50:28 +0000

មហាជនជាច្រើនបានដឹងរួចមកហើយថា លោក Pita Limjaroenrat មេដឹកនាំគណបក្សឆ្ពោះទៅមុខ បានធ្វើដំណើរទៅកាន់ទីក្រុងញូវយ៉ក សហរដ្ឋអាមេរិក ដើម្បីចូលរួមពិធីអាហារពេលល្ងាច 2023 TIME 100 Next ក្នុងឱកាសដែលត្រូវបានជ្រើសរើសជាអ្នកដឹកនាំម្នាក់ក្នុងចំណោម ១០០ នាក់ដែល ង្កើតការផ្លាស់ប្តូរ, អ្នកមានឥទ្ធិពលនៃអនាគត។

ក្នុងព្រិត្តិការណ៍នេះ ក៏មានបុរសវ័យក្មេងមានរូបរាងសង្ហា បានបានដើរតួជាអង្គរក្សការពារលោក Pita ធ្វើឲ្យអ្នកទស្សនាពោលសរសើរពីរូបរាងដ៏សង្ហាថាតើលោកជានរណា?

តាមពិតទៅបុរសវ័យក្មេងរូបនេះមានឈ្មោះ Tul Pakorn Thanasrivanitchai ជាតារាសម្ដែងប្រុសមួយរូបក្នុងប្រទេសថៃ។ ហើយកាលដែលរូបលោកធ្វើជាអង្គរក្សឲ្យមេដឹកនាំចលនាឆ្ពោះទៅមុខ គឺដោយសារតែលោកយល់ព្រមស័គ្រ្មចិត្ត និងពេញចិត្តស្រលាញ់ទឹកចិត្តលោក Pita។

ទន្ទឹមនោះទៀតដែរ លើគណនីផ្ទាល់ខ្លួនរបស់លោកបានសរសេរសារយ៉ាងវែងអន្លាយថា “ម្សិលមិញ ខ្ញុំមានកិត្តិយសដ៏ខ្ពង់ខ្ពស់ក្នុងការអង្គុយជាមួយលោក Pita ដែលមានឥទ្ធិពលក្នុងការស្តារឡើងវិញនូវជំនឿ និងក្តីសង្ឃឹមនៃជំនាន់ថ្មីរបស់ខ្ញុំ និងប្រទេសថៃ។ អរគុណសម្រាប់ការអនុញ្ញាតឲ្យខ្ញុំតំណាងឲ្យនិស្សិតថៃមកពីសាកលវិទ្យាល័យ Columbia ហើយបានជជែកខ្លីជាមួយអ្នក។ ពេលវេលាដែលយើងមានគឺខ្លីដោយសារកាលវិភាគដ៏ច្រើន។ អ្នកពិតជាធ្វើឲ្យខ្ញុំចាប់អារម្មណ៍យ៉ាងខ្លាំងជាមួយនឹងទស្សនវិស័យ ប្រាជ្ញា និងភាពសាមញ្ញរបស់អ្នក។ ខ្ញុំសង្ឃឹមថា យើងនឹងមានឱកាសម្តងទៀតនៅពេលក្រោយ”។

យ៉ាងណាមិញ Tul Phaakorn ត្រូវគេដឹងថាលោកកើតនៅថ្ងៃទី ០៨ខែតុលា ឆ្នាំ ១៩៩២ គឺជាកូនប្រុសរបស់លោក Somkiat Thanasriwanitchai ដែលជាអ្នកស្នងមរតកពីក្រុមក្រុមហ៊ុន វិស្វកម្មថៃវ៉ាត់ អ្នកផ្តល់សេវាវិស្វកម្មសំណង់ស៊ីវិលដ៏ធំមួយ និងសាស្រ្តាចារ្យ Jenjira Thirawat ដែលជាអ្នកស្នងមរតកជំនាន់ទីពីរនៃទីលានវាយកូនហ្គោលដ៏ល្បីល្បាញនៅក្នុងប្រទេស។

រូបលោកផ្ទាល់ មានការសម្តែងជាច្រើននៅក្នុងឧស្សាហកម្មកម្សាន្ត រួមទាំងរឿងភាគ ភាពយន្ត តន្ត្រី និងធ្វើជាពិធីករក្នុងកម្មវិធីផ្សេងៗ។ ទើបតែបានបញ្ចប់ថ្នាក់អនុបណ្ឌិតពីសាកលវិទ្យាល័យ Columbia ដែលជាសាកលវិទ្យាល័យមួយក្នុងចំណោមសាកលវិទ្យាល័យ Ivy League (Master of Science in Real Estate Development, Graduate School of Architecture, Planning and Preservation) និងបរិញ្ញាបត្រ, មហាវិទ្យាល័យស្ថាបត្យកម្ម សាកលវិទ្យាល័យ Chulalongkorn (បរិញ្ញាបត្រស្ថាបត្យកម្ម កិត្តិយសថ្នាក់ទី ២)៕

ប្រែសម្រួល៖ សាង ស្រីល័ក្ខ

ចុចអាន៖ សម្ដែងម្ដង៣តួក្នុងរឿង “បុព្វេសន្និវាស” តារាស្រី Bella បានតម្លៃខ្លួនប៉ុន្មាន?

The post អង្គរក្សតាមការពារលោក Pita នៅអាមេរិក តាមពិតគឺជាតារាសម្ដែងមួយរូប appeared first on Kampuchea Thmey Daily.

លោក Pita ទទួលបានតំណែងថ្មីក្នុងបក្សចលនាឆ្ពោះទៅមុខ

Sok Chivon — Mon, 25 Sep 2023 06:36:27 +0000

លោក Pita Limjaroenrat ត្រូវបានតែងតាំងជាទីប្រឹក្សារបស់លោក Chaithawat Tulaton ដែលជាប្រធានគណបក្សចលនាឆ្ពោះទៅមុខថ្មី ខណៈការតែងតាំងនេះកើតមានឡើងត្រឹមតែ ១ សប្ដាហ៍ប៉ុណ្ណោះ បន្ទាប់ពីលោក Pita លាលែងពីតំណែងជាប្រធានបក្ស ។

ទន្ទឹមនោះ ក្រៅពីការតែងតាំងលោក Pita ជាទីប្រឹក្សារបស់ប្រធានគណបក្សថ្មីហើយ ក្រុមប្រឹក្សាប្រតិបត្តិថ្មីរបស់គណបក្សក៏បានសម្រេចជ្រើសតាំងលោក Apichat Sirisoontorn ឲ្យបំពេញតួនាទីជាអគ្គលេខាធិការបក្ស ខណៈកាលពីមុនតំណែងនេះគឺកាន់ដោយលោក Chaithawat ។

លោក Pita បាននិយាយថា “ការបោះឆ្នោតរបស់ក្រុមប្រឹក្សាប្រតិបត្តិដើម្បីជ្រើសរើសសមាសភាពថ្មីនេះ គឺជាការរៀបចំរចនាសម្ព័ន្ធឡើងវិញរបស់បក្សចលនាឆ្ពោះទៅមុខ ក្នុងគោលបំណងធ្វើឲ្យគណបក្សកាន់តែរីកចម្រើនបន្ថែមទៀត និងត្រៀមខ្លួនសម្រាប់ការការពារគ្រោះថ្នាក់នយោបាយណាមួយផងដែរ” ។

លោកបានបញ្ជាក់ជាថ្មីថា ការលាលែងពីតំណែងជាមេដឹកនាំបក្ស គឺចាំបាច់ដើម្បីត្រួសត្រាយផ្លូវឲ្យសមាជិកសភាដែលនៅមានសំឡេងក្នុងសភា ធ្វើជាមេដឹកនាំក្រុមប្រឆាំង ហើយលោកនឹងបន្តធ្វើការឲ្យបក្សចលនាឆ្ពោះទៅមុខ ទោះបីជាគាត់មិនមែនជាប្រធានគណបក្សទៀតក៏ដោយ ។

គួរបញ្ជាក់ថា លោក Pita បានលាលែងពីតំណែងជាប្រធានបក្សចលនាឆ្ពោះទៅមុខកាលពីថ្ងៃទី១៥ ខែកញ្ញា បន្ទាប់ពីមិនអាចបង្កើតរដ្ឋាភិបាលថ្មីបាន និងមិនអាចក្លាយជានាយករដ្ឋមន្ត្រីទី ៣០ របស់ថៃផង ។ ម្យ៉ាងទៀតក៏ដោយសារតែលោក Pita ត្រូវបានព្យួរពីសមាជិកភាពសភាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ឧបនាយករដ្ឋមន្ត្រី ថៃ ប្រាប់ពីតំណែងដែលលោក ថាក់ស៊ីន អាចកាន់កាប់ក្នុងជួររដ្ឋាភិបាលថ្មី

The post លោក Pita ទទួលបានតំណែងថ្មីក្នុងបក្សចលនាឆ្ពោះទៅមុខ appeared first on Kampuchea Thmey Daily.

បុរសម្នាក់ អាចចូលអង្គុយកៅអីលោក Pita ជាមេបក្ស ចលនាឆ្ពោះទៅមុខ

Sok Sovann — Wed, 20 Sep 2023 23:25:00 +0000

ប្រភពមួយបានទម្លាយថា លោក Chaithawat Tulaton ទំនងក្លាយជាមេដឹកនាំបន្ទាប់របស់គណបក្សចលនាឆ្ពោះទៅមុខ ខណៈបច្ចុប្បន្នលោកកាន់តំណែងជាអគ្គលេខាធិការស្តីទីបក្ស ។

លោក Chaithawat Tulaton (រូបថត៖ Bangkok Post)

ព័ត៌មាននេះកើតឡើង បន្ទាប់ពីលោក Pita Limjaroenrat បានប្រកាសលាលែងពីតំណែងជាមេបក្សកាលពីថ្ងៃសុក្រ ទី១៥ ខែកញ្ញា ។

ប្រភពដដែលបន្តថា គណបក្សជិតឈានដល់ការសម្រេចចិត្តលើសមាសភាពដែលនឹងចូលកាន់តំណែងគណៈកម្មាធិការប្រតិបត្តិហើយ មុនកិច្ចប្រជុំនៅថ្ងៃសៅរ៍ ទី២៣ ខែកញ្ញាខាងមុខនេះ ។

លោក Pita Limjaroenrat (រូបថត៖ News on air)

ចំណែកអ្នកដែលមានលទ្ធភាពខ្ពស់ក្នុងការតែងតាំងឲ្យចូលកាន់តំណែង ក្នុងគណៈកម្មាធិការប្រតិបត្តិបក្សចលនាឆ្ពោះទៅមុខមានដូចជាលោក Chaithawat ជាមេបក្ស, សមាជិកគណៈកម្មាធិការប្រតិបត្តិស្តីទីភាគខាងជើងលោក Apichart Sirisunthorn ជាអគ្គលេខាធិការបក្ស និងសមាជិកសភា Parit Wacharasindhu ជាអ្នកនាំពាក្យគណបក្ស។

ពាក់ព័ន្ធនឹងបញ្ហានេះដែរមេបក្សថ្មី និងអ្នកនាំពាក្យ គ្រោងនឹងថ្លែងសុន្ទរកថាក្នុងអំឡុងព្រឹត្តិការណ៍របស់គណបក្ស នៅកីឡដ្ឋានថៃ-ជប៉ុន ក្នុងសង្កាត់ Din Daeng ទីក្រុងបាងកក នាថ្ងៃអាទិត្យ ទី២៤ ខែកញ្ញា។

គួរម្លឹកឡើងវិញថា លោក Pita បានប្រកាសពីការសម្រេចចិត្តលាលែងតំណែងជាមេបក្សចលនាឆ្ពោះមុខ ក្រោយពិគ្រោះជាមួយគណៈកម្មាធិការរដ្ឋបាលរបស់គណបក្ស និងសមាជិកសភា ខណៈការលាលែងនេះដែរក៏កើតមានឡើង ចំពេលនាយករដ្ឋមន្ត្រីថ្មីនិងគណៈរដ្ឋមន្ត្រី ចាប់ផ្តើមការងារជាផ្លូវការ ក្រោយថ្លែងការណ៍អំពីគោលនយោបាយនៅក្នុងសភា៕

ប្រែសម្រួល៖ Vann Vann

ប្រភព៖ Nation

ចុចអាន៖ លោក Pita លាលែងពីតំណែង មេដឹកនាំគណបក្សចលនាឆ្ពោះទៅមុខ

The post បុរសម្នាក់ អាចចូលអង្គុយកៅអីលោក Pita ជាមេបក្ស ចលនាឆ្ពោះទៅមុខ appeared first on Kampuchea Thmey Daily.

លោក Pita លាលែងពីតំណែង មេដឹកនាំគណបក្សចលនាឆ្ពោះទៅមុខ

Sok Sovann — Fri, 15 Sep 2023 06:46:54 +0000

លោក Pita Limjaroenrat បានសម្រេចចិត្តចុះចេញពីតំណែង ជាមេដឹកនាំគណបក្សចលនាឆ្ពោះទៅមុខ ដោយបើកផ្លូវឲ្យគណៈកម្មាធិការរបស់ខ្លួន ជ្រើសរើសអ្នកជំនួសគាត់។

លោក Pita Limjaroenrat (រូបថត៖ AFP)

តាមការបង្ហោះលើ Facebook របស់ខ្លួននៅថ្ងៃសុក្រទី១៥ខែកញ្ញា, ការសម្រេចចិត្តនេះ ធ្វើឡើងបន្ទាប់ពីការពិគ្រោះជាមួយគណៈកម្មាធិការរដ្ឋបាលរបស់គណបក្សនិងសមាជិកសភា។

ការលាលែងពីតំណែងរបស់គាត់ ក៏កើតឡើងផងដែរ ចំពេលនាយករដ្ឋមន្ត្រីថ្មីនិងគណៈរដ្ឋមន្ត្រី ចាប់ផ្តើមការងារជាផ្លូវការ ក្រោយថ្លែងការណ៍អំពីគោលនយោបាយនៅក្នុងសភា។

លោក Pita Limjaroenrat (រូបថត៖ AFP)

លោក Pita បានដឹកនាំគណបក្សចលនាឆ្ពោះទៅមុខ ទទួលជ័យជម្នះក្នុងការបោះឆ្នោត ក្រោយប្រជាពលរដ្ឋ មិនពេញចិត្តចំពោះការគ្រប់គ្រងដោយយោធា រយៈពេលជិតមួយទសវត្សរ៍។

ទោះបីជាយ៉ាងណាក៏ដោយ ប្លុកអភិរក្សនិយមនៅក្នុងសភា បានរារាំងគាត់មិនឲ្យក្លាយជានាយករដ្ឋមន្ត្រី ហើយក្រោយមកត្រូវបានព្យួរជាសមាជិកសភា។

បន្ទាប់មកទៀត គណបក្សចលនាឆ្ពោះទៅមុខ បានចាកចេញពីភាពជាដៃគូចម្រុះ ជាមួយគណបក្សភឿថៃ ហើយភឿថៃ បានបន្តបង្កើតរដ្ឋាភិបាលចម្រុះជាមួយគណបក្សគាំទ្រយោធា៕