ការស្នើនេះក្នុងកិច្ចប្រជុំបង្កើតគណៈកម្មការដោះស្រាយកិច្ចការសាសនា ដើម្បីពង្រឹងធម៌វិន័យចំពោះព្រះសង្ឃដែលគង់នៅទូទាំងខេត្តសៀមរាប កាលពីរសៀលថ្ងៃទី ១៩ ខែឧសភា ឆ្នាំ ២០២៦ ថ្មីៗ នេះ។

នាឱកាសនោះ លោក លី សារី អភិបាលរងខេត្តសៀមរាប បានជំរុញឲ្យអាជ្ញាធរមូលដ្ឋាន សហការគ្នាយ៉ាងជិតស្និតជាមួយព្រះមន្រ្តីសង្ឃខេត្ត ស្រុក ព្រះចៅអធិការវត្ត ដោះស្រាយការមានទំនាស់ ការច្រណែន ផលប៉ះពាល់ដល់ប្រយោជន៍រួម និង ជះឥទ្ធិពលមិនល្អដល់វិស័យព្រះពុទ្ធសាសនា ដោយឈរលើស្មារតីព្រះវិន័យ និង ច្បាប់រដ្ឋ។

លោក លី សារី បន្តថា គណៈកម្មការដោះស្រាយកិច្ចការសាសនាក្នុងខេត្ត គឺជាយន្តការផ្លូវការរបស់រដ្ឋបាលថ្នាក់ក្រោមជាតិ ដែលធ្វើការសហការជាមួយមន្ទីរធម្មការ សាសនាខេត្ត និង សាលាគណខេត្ត ដើម្បីត្រួតពិនិត្យ សម្របសម្រួល និង ដោះស្រាយរាល់វិវាទ ឬ បញ្ហានានាកើតឡើងនៅក្នុងវិស័យសាសនា។ ចំពោះកិច្ចប្រជុំដោះស្រាយវិវាទក្នុងវត្តអារាម ដើម្បីធ្វើការសម្របសម្រួលជម្លោះរវាងព្រះសង្ឃ និង ព្រះសង្ឃ , ជម្លោះរវាងគ្រហស្ថ ជាមួយព្រះសង្ឃ ឬ បញ្ហាគ្រប់គ្រងបច្ច័យ និង ដីធ្លីវត្ត ព្រមទាំងពិនិត្យសកម្មភាពផ្សព្វផ្សាយសាសនាផ្សេងៗ ដើម្បីធានាថា អនុវត្តទៅតាមច្បាប់ និង មិនមានការបង្កការរើសអើង ឬ ប៉ះពាល់ដល់សន្តិសុខសង្គម។

ព្រះធម្មសិរី ជុំ គឹមឡេង ព្រះមេគណខេត្តសៀមរាប មានថេរដីកាថា វិស័យព្រះពុទ្ធសាសនា ព្រះសង្ឃបានដើរតួនាទីយ៉ាងសំខាន់ ចូលរួមយ៉ាងសកម្មជួយការងារផ្សេងៗ ជាមួយរាជរដ្ឋាភិបាល ក្នុងការកសាងប្រទេសជាតិមាតុភូមិ លើផ្នែកហេដ្ឋារចនាសម្ព័ន្ធ និង សង្គមជាច្រើន ដូចជា ជួយកសាងផ្លូវថ្នល់ ស្ពាន សាលារៀន វត្តអារាម មន្ទីរពេទ្យ និង ការងារសង្គមកិច្ច រួមមានការអប់រំ សីលធម៌ ចរិយាធម៌ គុណធម៌ សុជីវធម៌ដល់ពុទ្ធបរិស័ទ ជាពិសេសការបណ្តុះបណ្តាលធនធានមនុស្សជាដើម។

ព្រះធម្មសិរី ជុំ គឹមឡេង បានស្នើដល់ព្រះមន្ត្រីសង្ឃគ្រប់ឋានានុក្រម តាមដានការប្រើប្រាស់បណ្ដាញសង្គមរបស់ព្រះសង្ឃក្នុងខេត្ត គួរតែប្រើសម្រាប់ជាមធ្យោបាយអប់រំ មានសតិជាប្រចាំ ថាអ្វីគួរបង្ហោះ អ្វីមិនគួរបង្ហោះបង្ហាញ ជាពិសេសរឿងទំនាស់តិចតួចមិនគួរបង្ហោះហែកបង្ហាញនោះទេ។ ជាពិសេស ត្រូវជួយណែនាំភិក្ខុ សាមណេរក្រោមឱវាទ ពាក់ព័ន្ធការប្រើប្រាស់បណ្ដាញសង្គមក្នុងគោលបំណងអប់រំតែម្យ៉ាង ដូចជាលើកទឹកចិត្តមនុស្សឲ្យស្រឡាញ់ការអប់រំ និង បរិស្ថានជាដើម។ ជាធម្មតាអធិករណ៍ ឬ ទំនាស់ ជាផ្នែកមួយ នៃជីវិតមិនអាចជៀសផុត សំខាន់ត្រូវដោះស្រាយតាមព្រះវិន័យ តាមអធិករណ៍សមថៈ តាមបែបអហិង្សាដែលជាមាគ៌ាពុទ្ធសាសនា៕
អត្ថបទ ៖ គឿនវេត

The post អភិបាលរងខេត្តសៀមរាប ស្នើបណ្ដាវត្តទាំងអស់ គួរពង្រឹងធម៌វិន័យ រៀបចំវត្តអារាមឲ្យក្លាយជាទីជម្រក នៃសេចក្ដីសុខសម្រាប់មនុស្ស និង សត្វ appeared first on Kampuchea Thmey Daily.

ថ្លែង​ក្នុង​ពិធី​បិទ​សន្និបាត​ការងារ​ឆ្នាំ​២០២៥ នៅ​សាល​សន្និសីទ​ចតុម្មុខ​រសៀល​ថ្ងៃ​ទី​២៦ ខែ​កុម្ភៈ ឆ្នាំ​២០២៦ លោក​រដ្ឋមន្ត្រី ចាយ បូរិន មាន​ប្រសាសន៍​ថា អភិក្រម ស៣ ដែល​ដាក់​ចេញ​ដោយ​ក្រសួង​ធម្មការ​មាន ស្អាត ស្វាង និង​ស្ងប់ ដែល​ជា​​អភិក្រម​ក្នុង​ការ​ការ​កែ​ប្រែ​​គ្រប់​អារាម​សាសនា​ទាំង​អស់​ទៅ​ជា​កន្លែង​ទេសចរណ៍​សាសនា​​​​។ លោក​ក៏​ជំរុញ​ឱ្យ​មាន​ការ​ដាំ​ដើម​ឈើ និង​បន្លែ​នៅ​តាម​វត្ត​អារាម​នានា​ផងដែរ​។

លោក​រដ្ឋមន្ត្រី​បាន​បញ្ជា​ទៅ​អគ្គនាយកដ្ឋាន​កិច្ចការ​សាសនា​ឱ្យ​ពង្រឹង​លើ​ការងារ​នេះ។

គួរ​ឱ្យ​ដឹង​ផង​ដែរ​ថា​ដើម្បី​ជំរុញ​លើក​កម្ពស់​ទេសចរណ៍​សាសនា​នៅ​កម្ពុជា ក្រសួង​ធម្មការ និង​សាសនា ទើប​តែ​ចុះ​អនុស្សរណៈ​នៃ​ការ​យោគយល់​គ្នា​ជាមួយ​ក្រសួង​ទេសចរណ៍​កាល​ពី​ចុង​ខែ​មករា កន្លង​ទៅ​ដើម្បី​ជំរុញ​កំណើន​ទេសចរណ៍​ផ្ទៃ​ក្នុង និង​ទាក់ទាញ​ភ្ញៀវ​ទេសចរ​អន្តរជាតិ​មក​ទស្សនា​កម្ពុជា​កាន់​តែ​ច្រើន​៕

អត្ថបទ​ដោយ ហ៊ុន សិរីវឌ្ឍន៍ ​​

The post រដ្ឋមន្ត្រី​ក្រសួង​ធម្មការ​ជំរុញ​ការ​ប្រែ​ក្លាយ​គ្រប់​វត្ត​អារាម​ទៅ​​ជា​កន្លែង​ទេសចរណ៍​សាសនា appeared first on Kampuchea Thmey Daily.

ក្នុង​សៀវភៅ​​វត្ត​អារាម​ក្នុង​ប្រទេស​កម្ពុជាដែលនិពន្ធ​ដោយ​​លោក​ស្រី ដានីញែល និង​លោក​ ដូមីនិក ហ្គេរេត៍ ​បាន​រំលេច​ពី​ទិដ្ឋភាព​ក្នុង​ការ​សាងសង់​វត្ត​អារាម​ក្នុង​ប្រទេស​កម្ពុជា ដែល​បង្កប់​តម្លៃ​ប្រវត្តិសាស្រ្ត​សម្រាប់​ការ​​សិក្សា​ស្វែង​យល់។

សៀវភៅ​ស្តី​ពីវត្ត​អារាម​នៅ​ប្រទេស​កម្ពុជា​ដែល​ស្រាវជ្រាវ​និពន្ធ​​លោក​ស្រី ដានីញែល និង​លោក​ ដូមីនិក ហ្គេរេត៍​បាន​លើក​ឡើង​ពី​ទិដ្ឋភាព​នៃ​ការ​សាងសង់​វត្តអារាម​ក្នុង​ប្រទេស​កម្ពុជា​តាម​ក្បួន​បុរាណ​។

វត្តរបស់ខ្មែរបុរាណ​​ត្រូវ​បាន​សាងសង់​នៅ​លើអ័ក្ស​នៃទិស​ខាង​លិចនិង​ខាងកើត អាច​មាន​ករណី​លើកលែង​ដែរតែ​កម្រ​ណាស់។ កាលដើម​ឡើយគេ​សង់វត្ត​នៅ​ទី​កន្លែង​ដែលគ្មានមនុស្ស​រស់នៅតែមិននៅឆ្ងាយពីភូមិ​ពេកទេ ហើយ​សព្វថ្ងៃ​អាច​មាន​លំនៅឋាន​ប្រជាពលរដ្ឋ​ហ៊ុមព័ទ្ធ​ជុំវិញ។ ជាទូទៅវត្តមាន​រាងជា​ចតុរ័ង្ស មាន​ទំហំ​ជាមធ្យម និង​មាន​ក្លោងទ្វារ​ច្រកចូល​នៅតាម​ជ្រុងទាំង ៤ កម្រ​មាន​ច្រក​ចូល​តែ ២ ណាស់។

នៅពេល​ដែលវត្តស្ថិត​នៅឆ្ងាយដាច់ស្រយាលខ្លាំងនៅតាមជនបទ ក្លោងទ្វារ​នីមួយៗ​នៅឆ្ងាយ​ដាច់​ពី​គ្នា​រាប់​គីឡូម៉ែត្រ គឺអាច​ស្ថិត​នៅជាប់​ផ្លូវជាតិឬ​ផ្លូវលំ ដើម្បីប្រាប់​ឈ្មោះនិង​ជា​ច្រក​ចូល​ទៅកាន់វត្ត។

នៅក្នុងបរិវេណវត្ត​មានអគារសក្ការ:ធំៗ​ពីរ គេហៅ​ថា​វិហារឬ​ព្រះវិហារ ដែល​មាន​រាងជាចតុរ័ង្ស សង់​នៅ​លើ​អ័ក្ស​ខាងលិច និង​ខាងកើត ដែល​មាន​រូបសំណាក​ព្រះពុទ្ធធំជាងគេបែរ​ព្រះ​ភក្ត្រ​ទៅ​ទិស​ខាងកើត។

សាលាឆាន់ គឺជាអគារ​ដ៏ធំមួយ​ទៀត​សម្រាប់​ព្រះសង្ឃ​ទទួលចង្ហាន់ និង​សម្រាប់​ការជួបជុំពុទ្ធបរិស័ទ​នៅ​ពេល​មាន​ពិធីបុណ្យ​សាសនា​ផ្សេងៗ។ កន្លែង​ស្នាក់នៅ​ហៅ​ថា កុដិ ជា​សំណង់​បន្ថែម​នៅក្នុង​វត្ត តែ​គេ​មិន​ដែល​សង់​កុដិ​នៅ​ភាគ​ខាងកើត​នៃ​វិហារដែល​ជាទីសក្ការ​នោះទេ។

គ្មាន​អគារណាមួយ ត្រូវ​សង់​ឱ្យ​បាំង​ព្រះនេត្ររបស់​ព្រះពុទ្ធរូបនោះទេ។ ប៉ុន្តែ​មាន​ដងទង់ធំៗ​ពីរ ដែល​មាន​អង្កត់​ផ្ចិតធំ​ល្មម ហើយ​ត្រូវ​បាន​សង់​នៅ​ទិស​ខាងកើត ដើម្បី​បង្ហាញ​ឱ្យ​ឃើញ​វត្ត​ពីចម្ងាយ។ (ហោត្រ័យ) នៅក្នុង​វត្ត​នីមួយៗ ទៅ​តាម​ទំហំ​និងធនធាន​របស់​ខ្លួន។ អាចមាន​សំណង់​អគារផ្សេង​ទៀត ដូចជា​សាល​សិក្សា សាលា​បាលី និង​បណ្ណាល័យ​ព្រះសង្ឃ បច្ឆា​សម្រាប់​បូជាសព ឬមេរុ​មាន​រោង​សម្រាប់​ដាក់​ទូកង​ទុក​សម្រាប់​ប្រើអំឡុង​ពិធីបុណ្យអុំទូក និងមាន​អាសនៈ​សម្រាប់ម្ចាស់ទឹក ម្ចាស់ដី មាន​រាង​ជា​អឌ្ឍគោល ឬ​រាង​ការ៉េ ចេតិយ​មានរាង​ដូចកណ្តឹង។

នៅក្នុង​ទីធ្លាវត្ត មានតុបតែង​ដោយរូបចម្លាក់​នានា​ធ្វើពីបេតុង ហើយ​មាន​លាបពណ៍​ភ្លឺ​ស្រស់​តំណាង​ទេវតា​ជា​ទីសក្ការៈ ឬតួអង្គ​នៅក្នុងរឿង​និទាន​ជាតក ឬ​សត្វ​ផ្សេងៗ​ទៀត។ សាលារៀន​ក្នុងភូមិ ក៏ត្រូវ​បាន​កសាង​ឡើង​នៅខាងក្នុងបរិវេណ​វត្តដែរនៅមុន​ឆ្នាំ១៩៧៥ តែ​ឥឡូវនេះ​គេ​ច្រើន​សង់​សាលា​ដាច់​ចេញ​ពីវត្ត។

ការដាក់ឈ្មោះវត្ត

ជាប្រពៃណី វត្តអារាម​ត្រូវបានគេ​ដាក់ឈ្មោះ​តាម​ភូមិ​ដែល​វត្តនោះស្ថិតនៅ។ ជួនកាល​ឈ្មោះត្រូវបាន​ជំនួសដោយពាក្យមួយផ្សេងទៀតយកពី​ធម្មជាតិដូចជា៖ សុរិយា ព្រៃ ភូមិ ភ្នំ អង្គ ថ្ម ខ្សាច់ ចម្ការ កោះ ជ្រោយ ទន្លេ ខ្ពប ពាម ព្រែក បឹង ត្រពាំង អន្លង់ អណ្ដូង ពោធិ៍ ឬ​ពោធិ៍ព្រឹក្ស អំពិល ឫស្សី ដួង ស្លា ស្វាយ ក្រូច ដំរី រមាស ក្រពើ ដែល​ឈ្មោះទាំងនេះ​អាចត្រូវបានគេបន្ថែមពាក្យ​​ឱ្យខុស​ពីវត្ដ​មួយ​ទៀតដែលមានឈ្មោះខាងដើមដូចគ្នា ដោយបើ​គុណនាម៖ តា ឬចាស់ ធំ ឬ​មហា តូច សុរភី ស ខ្មៅ ឯក រលើង ព្រះ ថ្មី ជ្រៅ។ ទិស៖ ខាងជើង ខាងកើត ខាងត្បូង ខាងលិច ឬ​ទីតាំងភូមិសាស្ត្រ៖ កណ្ដាល ក្បាល ជើង ក្នុង ក្រៅ គឺ​ជាវិធីបន្ថែម​ចំពោះវត្តដែលឈ្មោះខាងដើមដូចគ្នា។

វត្តអាចមានឈ្មោះមួយទៀត​ជាភាសាបាលី​មានអត្ថន័យក្នុងពុទ្ធសាសនា៖ មង្គល​សិរី មេត្រី ឬ​សាមគ្គី មូលី សិម្ពលី ឬរង្សី (ពន្លឺ) ឧត្តម (ស្អាតអស្ចារ្យ)។

ភាពសម្បូរបែបនៅក្នុងការដាក់ឈ្មោះនេះនៅតែមានជាន់គ្នាដែរ ដែល​ពេលខ្លះ​គេត្រូវប្រើ​ទីតាំង​ភូមិសាស្ត្របន្ថែម ដើម្បីបញ្ជាក់វត្តណាមួយឱ្យ​កាន់តែច្បាស់ ដោយត្រូវបន្ថែមឈ្មោះស្រុក និងឃុំ របស់វត្តនោះ។

និកាយ ចៅអធិការ អាចារ្យ

ពុទ្ធសាសនានៅកម្ពុជាមាន ២ និកាយ គឺមហានិកាយ និង​ធម្មយុត្តិកនិកាយ។ និកាយ​ចំណាស់​ជាងគេ​គឺ មហានិកាយ ដែលមានវត្តជាង ៩៥%។ និកាយនីមួយៗ ត្រូវបានដឹកនាំ​ដោយ​ថ្នាក់ដឹកនាំ​ជាន់​ខ្ពស់​នៃ​គណៈសង្ឃ​នៅ​រាជធានីភ្នំពេញ ហៅថា សម្តេចសង្ឃ៖ វត្តឧណ្ណាលោមសម្រាប់​មហានិកាយ និង​វត្តបទុមវតីរាជវរារាមសម្រាប់ធម្មយុត្តិកនិកាយ។

ព្រះសង្ឃនៅក្នុងវត្តអារាមនីមួយៗ ត្រូវស្ថិតនៅក្រោមការ​គ្រប់គ្រង​របស់​ចៅអធិការ ដែលត្រូវបាន​ជ្រើសតាំង​ដោយគណៈកម្មាធិការវត្ត ដែល​តំណាង​ឱ្យពុទ្ធបរិស័ទចំណុះជើងវត្ត។ ចៅអធិការអាច​ចូលរួម​គ្រប់គ្រង​ចាត់ចែងការងារផ្សេងៗ ក្នុងវិស័យសាសនានៅក្នុងវត្ត ជាពិសេស​ចំពោះ​បញ្ហា​វិន័យ​របស់ព្រះសង្ឃ និងសាមណេរ។

ការទទួលខុសត្រូវរដ្ឋបាលត្រូវបានប្រគល់ឱ្យទៅ​គណៈកម្មាធិការដឹកនាំដោយអាចារ្យមួយរូបឬ​ច្រើនរូប ដែលមានតួនាទី សំខាន់ក្នុងការរៀបចំពិធីបុណ្យផ្សេងៗ។

តួនាទីរបស់វត្តក្នុងសង្គម

វត្តអារាម មានតួនាទីសំខាន់​ខ្លាំងណាស់ ក្នុងជីវភាពរស់នៅរបស់​ប្រជាពលរដ្ឋក្នុងប្រទេសកម្ពុជា ប្រៀប​ដូចជា​ផ្ទះរួមមួយ។ ប្រជាពលរដ្ឋជួបជុំ ប្រមូលផ្ដុំគ្នានៅទីនោះមិនត្រឹមតែ​សម្រាប់​បុណ្យសាសនា ឬពិធីបុណ្យសពទេ​ ប៉ុន្តែសម្រាប់ពិធីបុណ្យជា​លក្ខណៈគ្រួសារគ្រប់ប្រភេទ។

វត្តអារាម បាន​ប្រមូល​អំណោយ​របស់​ពុទ្ធបរិស័ទ​សម្រាប់​ការងារសប្បុរសធម៏។ ទទួល​អ្នកមាន​វិបត្តិ​ផ្លូវចិត្ត ឬអ្នកពិការរាងកាយ។ ជាកន្លែង​សម្រាប់​អ្នកដំណើរ​ដែល​ឆ្លងកាត់​អាចឈប់សម្រាក ហើយ​ក៏ផ្ដល់​ជម្រកដល់​អ្នកកាន់សីល ដែលបានសម្រេចចិត្តលះបង់អ្វីៗទាំងអស់ឬមួយផ្នែកនៃជីវិត ដើម្បី​ចូល​ទៅ​បម្រើព្រះសង្ឃ និងសាសនា ដូចជាស្ត្រីចាស់ៗ និងស្ត្រីមេម៉ាយ ដែល​ទៅរស់​នៅទីនោះ​ជាអចិន្ត្រៃយ៍។

ចាប់តាំងពីឆ្នាំ១៩៧៥ មក សាលារៀនមិនមែនជាផ្នែកនៃវត្តអារាមទៀត​ទេ នៅពេល​ដែលការ​បញ្ជូន​ក្មេង​ឱ្យទៅរៀននៅសាលា ត្រូវបានកំណត់ថាជា​កាតព្វកិច្ចដោយព្រះរាជក្រឹត្យឆ្នាំ១៩១១។

តួនាទីរបស់វត្តអារាមខុសគ្នាពីព្រះវិហារក្នុងគ្រិស្តសាសនា ដែលកសាងអគារឡើង​នៅកណ្តាល​ភូមិ​សម្រាប់​តែពិធីបុណ្យជាក់លាក់ណាមួយ​តែប៉ុណ្ណោះ។

ការសាងសង់វិហារថ្មីជាការធ្វើបុណ្យ

ការកសាងវត្តអារាម និង​ការសាងសង់​អគារផ្សេងៗ​ជាប្រចាំ​ជា​បែបពុទ្ធសាសនា​នៅក្នុង​ប្រទេស​កម្ពុជា ជាលទ្ធផលផ្ទាល់​នៃកំណើនប្រជាជន ហើយការផ្តល់ថវិកាត្រូវបានគេចាត់ទុកថាជាការ​ធ្វើបុណ្យ ជាពិសេស​ការ​កសាងអគារថ្មីណាមួយ។

ចាប់តាំងពីប្រទេសកម្ពុជាបានក្លាយជាប្រទេស​មួយ​ដែលកំពុង​អភិវឌ្ឍ​ពីចុងសតវត្សរ៍ទី ១៩ មក តម្រូវការ​សាងសង់​វត្តអារាមបានកើនឡើងជាប្រចាំ ហើយបាន​បន្តរហូត​ដល់ដើម​ទសវត្សរ៍ឆ្នាំ​១៩៧០។ បន្ទាប់​មកតម្រូវការនេះ​បានចាប់ផ្ដើមកើនឡើងវិញ​នៅដើមទសវត្សរ៍​ឆ្នាំ ១៩៩០ ដោយ​សារ​ហេតុផល​ដ៏​សំខាន់បំផុត​ពីការខ្វះទីកន្លែង​សម្រាប់ជាទីសក្ការបូជា​នៅក្នុងតំបន់ប្រជុំជន ដែល​ប្រជាពលរដ្ឋ​មាន​ការកើន​ឡើង។

មាន​កត្តាផ្សេង​ទៀតដែលនាំឱ្យមានការបង្កើតឬការកសាងឡើងវិញ ឧទាហរណ៍ការដួលរលំ​ទីសក្ការបូជា​ដែល​សាងសង់ជាប់នឹងច្រាំងទន្លេ។

ជំនឿដែលបានរីកសាយភាយយ៉ាងទូលំទូលាយក៏បានបញ្ជាក់ថា ការកសាងវិហារថ្មីៗ បាន​បុណ្យ​កុសល​ច្រើន​ជាងការផ្តល់ថវិកាជួសជុល​វិហារចាស់ៗ។ ដែលជាហេតុ​នាំឱ្យខ្វះការ​ថែទាំដល់​រចនាសម្ព័ន្ធ​របស់វិហារ និង​ធ្វើឱ្យមាន​ការបំផ្លាញ​កម្ទេចចោល​វិហារចាស់ៗ​ជាប្រចាំ។

តាមប្រពៃណីនៅសម័យ​ដែលវិហារសង់ពីឈើ គេច្រើនដាំដើមគគីរ​នៅជុំវិញវិហារដែល​ទើបនឹងសាងសង់ថ្មី ព្រោះ​គេយក​ដើមវា​ធ្វើសសរ តែត្រូវរង់ចាំប្រហែល ៧០ ឆ្នាំ ទើបអាចយកដើមគគីរនោះ មក​សង់​វិហារថ្មី​បាន។ ទំនៀមទម្លាប់​ការសាងសង់វិហារឡើងវិញជាប្រព័ន្ធនេះ អាចប្រាប់​យើង​ពីមូលហេតុ​ដែល​មាន​វិហារបុរាណនៅសេសសល់​មានចំនួនតិចតួចនៅកម្ពុជាសព្វថ្ងៃនេះ។

វាជារឿង​មួយ​ចម្លែក​ដែរ ដែល​នៅពេល​ប្រទេស​កម្ពុជាស្ថិតក្នុង​ភាព​ច្របូកច្របល់នា​ទសវត្សរ៍​ឆ្នាំ ១៩៧០ វិហារបុរាណមួយចំនួន​ត្រូវបានវាយ​កម្ទេចចោល​ ដែលមានចំនួនប្រហាក់ប្រហែលគ្នា​ដូច​កាល​នៅក្នុងអំឡុង​ឆ្នាំ ១៩៥០ ដល់​ឆ្នាំ ១៩៦០​ គឺ​នៅក្នុង​អំឡុង​ពេល​ដែល​មាន​ការពង្រីក​សេដ្ឋកិច្ច​របស់​ព្រះរាជាណាចក្រ​កម្ពុជា​។ ប៉ុន្តែ​ ទំនៀមទម្លាប់ប្រពៃណី​ក៏បាន​អភិរក្ស​​វិហារ​ខ្លះៗដែរ។ ការវាយកម្ទេចវិហារ​ចាស់​ចោល​ដើម្បីសាងសង់វិហារថ្មី អាចធ្វើ​ទៅបានតែក្នុង​ករណី​ដែលវិហារថ្មី​ត្រូវ​សាងសង់​នៅលើ​ទីតាំង​របស់​វិហារ​ចាស់ បើពុំនោះទេគេត្រូវតែ​ថែរក្សា​វិហារ​ចាស់​ឱ្យ​នៅដដែល​ដោយមិនចាំបាច់​ថែទាំ​ជួស​ជុល​ទេ។ វិហារបុរាណចំនួន ១៣ អាចស្ថិត​នៅ​បាន​រហូត​មកទល់​សព្វថ្ងៃនេះ ក៏​ដោយសារ​ក្បួន​ច្បាប់​ដែល​មាន​ចែងនៅក្នុងសៀវភៅនេះដែរ។

នៅក្នុង​ប្រទេសកម្ពុជា វិហារ​ណា​ដែលមានអាយុ​លើសពី ៦០ ឆ្នាំ គឺជា​វិហារបុរាណ គឺ​បណ្តា​វិហារ​ទាំងឡាយ​ណា​ដែលត្រូវបាន​សាងសង់មុន​ទសវត្សរ៍ឆ្នាំ ១៩៧០។ ដូច​នេះហើយក្បាច់​រចនា​ផ្ទាំង​គំនូរ​លើ​ជញ្ជាំង ជា​មរតក​ដែលស័ក្តិសម​នឹងទទួលស្គាល់​ព្រមទាំងថែរក្សា​ឱ្យបានល្អ៕

The post តោះ! ស្វែង​យល់​ពី​ដំណើរការ​សាងសង់​វត្ត​អារាមក្នុង​ប្រទេស​កម្ពុជា​ពីបុរាណដល់សម័យទំនើប appeared first on Kampuchea Thmey Daily.

ព្រះ​មង្គល​ចរិយា​ឧ​ត្ត​ម សាង សម្បត្តិ ព្រះ​សូត្រ​ស្តាំ វត្ត​តិ​ក្ខ​ប្ប​ញ្ញោ មាន​សង្ឃដីកា​ថា ការ​យក​ចិត្ត​ទុក​ដាក់​របស់​គណៈកម្មាធិការ​វត្ត គឺជា​កត្តា​សំខាន់​ក្នុង​ការ​កសាង​ទំនុក​ចិត្ត និង​ធានា​សុខភាព​សាធារណៈ។ ព្រម​ជាមួយ​នេះ ក៏​មាន​ការ​រៀបចំ​កន្លែង​រាប់បាត្រ​ដោយ​មាន​របៀបរៀបរយ , កន្លែង​ពូន​ធំ​ក​អង្ករ និង​កន្លែង​ទទួល​បច្ច័យ​មូលនិធិ​សម្រាប់​ជួយ​កងទ័ព​ជួរមុខ និង​ជនភៀសសឹក​ផង​ដែរ។

លោក ហុង សុ​តិ​ទ្យា ប្រជាពលរដ្ឋ​ដែល​បាន​មក​វត្ត​តិ​ក្ខ​ប្ប​ញ្ញោ បាន​បង្ហាញ​អារម្មណ៍​កោតសរសើរ និង​សប្បាយចិត្ត​ចំពោះ​ការ​រៀបចំ​របៀប​នេះ។

លោក​បាន​ឲ្យ​ដឹង​ថា ការ​រក្សា​អនាម័យ​លើ​ចង្ហាន់ ម្ហូបចំណី​អាហារ មិន​ត្រឹមតែ​ធានា​សុវត្ថិភាព​ដល់​ព្រះសង្ឃ និង​ពុទ្ធបរិស័ទ​ប៉ុណ្ណោះ​ទេ ប៉ុន្តែ​អាច​ជា​គំរូ​ឲ្យ​វត្ត​ផ្សេងៗ ក្នុង​ប្រទេស អនុវត្ត​ផង​ដែរ។

ដោយឡែក កញ្ញា មុនីនាថ ពលរដ្ឋ​មួយ​រូប​មក​វត្ត​ខាងលើ បាន​និយាយ​ថា កញ្ញា មាន​ក្តី​សុខចិត្ត​ណាស់​ដែល​បាន​ឃើញ​វត្ត​យកចិត្តទុកដាក់​បែបនេះ។ វា​ជា​ការ​ពិតប្រាកដ​ដែល​ធ្វើ​ឲ្យ​ពួកគាត់​មាន​ទំនុក​ចិត្ត និង​សប្បាយ​ចិត្ត​ក្នុង​ការ​ចូលរួម​ធ្វើបុណ្យ។

ជាមួយ​នឹង​ការ​បង្ហាញ​ការ​យកចិត្តទុកដាក់​លើ​សុវត្ថិភាព​អាហារ និង​សុខភាព​សាធារណៈ វត្ត«តិ​ក្ខ​ប្ប​ញ្ញោ» ក៏បាន​បង្ហាញ​ពី​ការ​ចូលរួម​ក្នុង​ការ​កសាង​សង្គម ដោយ​រៀបចំ​កន្លែង​ទទួល​បច្ច័យ ដើម្បី​គាំទ្រ​កងទ័ព និង​ជួយ​ដល់​ជនរងគ្រោះ​ផង​ដែរ៕

អត្ថបទ ៖ សំណាង

The post វត្ត«តិក្ខប្បញ្ញោ» រៀបចំចង្ហាន់មានអនាម័យ ធានាសុវត្ថិភាពចំណីអាហារដល់ព្រះសង្ឃ និងពុទ្ធបរិស័ទ appeared first on Kampuchea Thmey Daily.

​សារ​ព័ត៌មានថៃ The Nation ​បាន​រាយការណ៍ថា តួលេខ​នេះ​ត្រូវ​បាន​ចេញ​ផ្សាយ​ដោយ​ធនាគារ​ថៃ ​(​BoT) និង​ការិយាល័យ​ព្រះពុទ្ធសាសនា​ជាតិ (NOB) ស្របពេលដែល​​​ប្រទេសថៃ​ផ្ទុះ​រឿង​អាស្រូវ​ផ្លូវ​​ភេទ​​រវាង​​មន្ត្រីសង្ឃ​ជាន់​ខ្ពស់​ ​ដោយ​រួម​ទាំង​​​ចៅអធិការ​​​​វត្តល្បី​ៗ​ជាច្រើន និង​ស្ត្រី​​ល្បី​តាមអនឡាញ ដោយ​មាន​វីដេអូ​​​​អាសអាភាស​រាប់ម៉ឺន​​​បាន​បែក​ធ្លាយ។

ហិរញ្ញវត្ថុ​តាមវត្តអារាម​បានស្ថិតនៅក្រោមការតាមដាន​ត្រួតពិនិត្យជាសាធារណៈ បន្ទាប់ពីមានសេចក្តីរាយការណ៍ថា ព្រះសង្ឃជាន់ខ្ពស់មួយចំនួនបានជាប់ពាក់ព័ន្ធក្នុងរឿងអាស្រូវផ្លូវភេទជាមួយស្ត្រីម្នាក់ដែលត្រូវបានគេកំណត់ថាជាកីឡាវាយកូន​ហ្គោល។

តាមសេចក្តីរាយការណ៍​ ប៉ូលិស ​បាន​បញ្ជាក់​ថា អតីត​ព្រះសង្ឃ​ដែល​បានចាប់ផ្សឹក​ក្រោយ​រឿង​អាស្រូវ​បាន​​បង្ក​ឲ្យ​ផ្ទុះ​ការ​តាមដានយ៉ាងខ្លាំងលើ​បណ្តាញ​ផ្សព្វផ្សាយ អាច​ប្រឈម​មុខ​នឹង​ការ​ស៊ើប​អង្កេត​ពី​បទ​កេង​បន្លំ​ថវិកា​​វត្តអារាម​ដើម្បី​បង់​ប្រាក់​ដល់​ស្ត្រី។

យោងតាមបទប្បញ្ញត្តិរបស់ ការិយាល័យ​ពុទ្ធសាសនា (NOB)​ ព្រះសង្ឃ ឬ​ចៅអធិការ​វត្ត ត្រូវបានហាមឃាត់មិនឱ្យប្រើប្រាស់មូលនិធិវត្ត​សម្រាប់គោលបំណងផ្ទាល់ខ្លួន។ ច្បាប់ចែងថា ថវិកា​របស់វត្តអារាម ត្រូវតែរក្សាទុកក្នុងសម្រាប់​វត្ត​អារាម ហើយការដកប្រាក់ ឬការចំណាយទាំងអស់ត្រូវតែគោរពតាមបទប្បញ្ញត្តិដែលបានបង្កើតឡើង។

ការ​ចំណាយ​ត្រូវ​បាន​អនុញ្ញាត​សម្រាប់​តែ​គោល​បំណងកសាង​វត្ត​ប៉ុណ្ណោះ​ ជា​ផ្លូវ​ការ​ដូច​ជា​ការ​ជួស​ជុល​ព្រះវិហារ​ ការ​អប់រំ​ព្រះសង្ឃ​វ័យ​ក្មេង​ និង​សកម្មភាព​សាសនា។

ដើម្បីជាប្រយោជន៍ដល់តម្លាភាព អាចារ្យអាចតែងតាំងគណៈកម្មការគ្រប់គ្រងដើម្បីជួយធ្វើការសម្រេចចិត្តផ្នែកហិរញ្ញវត្ថុ។

នៅពេលដែល NOB ទទួលបានពាក្យបណ្តឹង ខ្លួន​មានសិទ្ធិអំណាចក្នុងការស៊ើបអង្កេតលើថវិកា គណនី និងការចំណាយរបស់វត្តអារាម​ដែលមានបញ្ហា៕​

The post ​ក្រោយ​ផ្ទុះរឿងអាស្រូវ​ផ្លូវភេទ​​ គណនីធនាគារ​​វត្តអារាម​ជិត​៤ម៉ឺនមាន​ប្រាក់​ជាង​១២ពាន់​លានដុល្លារ​​ ត្រូវបង្កក​ appeared first on Kampuchea Thmey Daily.

ព្រះមហាក្សត្រនៃព្រះរាជាណាចក្រកម្ពុជា  មានព្រះរាជបន្ទូលដូច្នេះ៖« តាំងតែពីអតីតកាល រហូតមកដល់បច្ចុប្បន្នកាល វត្តអារាមជួយផ្ដល់កន្លែងស្នាក់នៅ បួសរៀនសូត្រ ចំណេះដឹងទូទៅ ដល់អ្នកដែលមានការខ្វះខាត  ក្នុងចំណោមនោះ មានចំនួន បានក្លាយទៅជាថ្នាក់ដឹកនាំគ្រប់ជាន់ថ្នាក់ ក្នុងការបម្រើរដ្ឋ»។

តាមរយៈព្រះរាជពិធី ព្រះមហាក្សត្រ ចាត់ទុកវត្តឧណ្ណាលោម គឺជាទីបណ្ដុះនូវព្រះធម៌របស់ព្រះសម្មាសម្ពុទ្ធដ៏ល្អឯក ហើយជាទីកន្លែងដែល​ផ្ដល់កំណើតដល់វចនានុក្រមខ្មែរ​តាមរយៈការលះបង់ដ៏ធំធេងរបស់សម្ដេចព្រះសង្ឈរាជជួនណាត ពេញមួយព្រះជន្មរបស់ព្រះអង្គ។ ​

បើតាមសម្ដេចព្រះបរមនាថ នរោត្តម សីហមុនី តួនាទីដ៏លេចធ្លោរបស់វត្តអារាមព្រះពុទ្ធសាសនាបានក្លាយទៅជាចលករមួយ ដែលមិនអាចកាត់ផ្ដាច់ចេញបានរវាងដំណើរជីវិតប្រជាពលរដ្ឋខ្មែរប្រចាំថ្ងៃ  និងការអភិវឌ្ឍសង្គមជាតិ ដែលមានន័យថាវត្តអារាម ​និងសង្គមគឺតែមួយ។

លើសពីនេះទៅទៀត ព្រះករុណា ចាត់ទុកតួនាទីដ៏ពិសិដ្ឋរបស់វត្តអារាមព្រះពុទ្ធសាសនាខ្មែរ ថាបានរួមវិភាគទានដ៏សំខាន់ដល់សង្គមតាំងតែពីបុរាណកាលរហូតមកដល់បច្ចុប្បន្នកាលក្នុងតួនាទីសំខាន់ក្នុងការជម្រុញបណ្ដុះសីលធម៌ គុណធម៌ ដែលជាផ្នែកមួយនៃ​ពុទ្ធចរិយាសាស្ត្រ ធ្វើឱ្យសង្គមខ្មែរមានសុខដុមនីយកម្មទាំងសាសនានិងសង្គម និងជាទីកន្លែងអប់រំទាំងផ្លូវការផ្លូវចិត្ត កសាងធនធានមនុស្ស ឱ្យមានចំណេះដឹងគ្រប់បែបយ៉ាង និងជាឃ្លាំងសម្រាប់រក្សាទុកនូវបេតិវប្បធម៌ ប្រពៃណី ចំណេះដឹងដ៏សម្បូរបែប ដែលផ្ដល់គុណតម្លៃសម្រាប់ការសិក្សាស្រាវជ្រាវ មិនចេះរីងស្ងួតឡើយ។

គួរជ្រាបដែរថា ជុំវិញតួនាទីវត្តអារាមក្នុងការផ្ដល់ជម្រកដល់កូនអ្នកស្រែចម្ការបានស្នាក់នៅ បួសរៀនសូត្ររហូតក្លាយជាថ្នាក់ដឹកនាំជាន់ខ្ពស់បម្រើរដ្ឋ គឺមានជារូបសម្ដេចតេជោ ហ៊៊ុន សែន ជាអំណេះអំណាង។ សម្ដេចតេជោ ហ៊ុន សែន កាលពីកុមារភាព​ ពោលគឺនៅក្នុងឆ្នាំ ១៩៦៤ ចាកចេញពីភូមិកំណើត នៅស្រុកស្ទឹងត្រង់ ខេត្តកំពង់ចាម មករស់នៅក្នុងវត្តនាគវ័ន្ត នាទីក្រុងភ្នំពេញ ដើម្បីបន្តការសិក្សានៅវិទ្យាល័យឥន្ទ្រៈទេវី។ តាមរយៈវត្តអារាមនេះ សម្ដេចតេជោ អាចបានសិក្សាមានចំណេះដឹង មានស្មារតីស្រឡាញ់ជាតិ ​ចូលរួម​ក្នុង​ចលនា​តស៊ូ ប្រឆាំង​នឹង​ពួក​ចក្រពត្តិនិយម ដើម្បី​រំដោះ​កម្ពុជា ពី​ភ្លើងសង្គ្រាម ក្រោម​ការអំពាវនាវរ​បស់​ព្រះមហាក្សត្រ ព្រះបាទ នរោត្តម​សីហនុ​ និងរំដោះកម្ពុជា​ចេញពីរបបប្រល័យពូជសាសន៍ប៉ុលពត នាំសន្តិភាពពិតប្រាកដជូនកម្ពុជា នៅឆ្នាំ១៩៩៨ និងអភិវឌ្ឍន៍​ប្រទេសជាតិឱ្យរីកចម្រើនរហូតមកដល់បច្ចុប្បន្ន។

ក្នុងឱកាសនៃព្រះរាជពិធី ព្រះមហាក្សត្រ ក៏បានអរគុណ និងកោតសរសើរជាទីបំផុតចំពោះសម្ដេចអគ្គមហាសេនាបតី ប្រធានព្រឹទ្ធសភា និងជាប្រធានក្រុមឧត្ដមប្រឹក្សាព្រះមហាក្សត្រ ដែលជាស្ថាបនិកដ៏អស្ចារ្យ ប៉ិនប្រសប់ និងឈ្លាសវៃ ក្នុងការធ្វើឱ្យព្រះពុទ្ធសាសនាខ្មែរ និងវត្តអារាម រស់ឡើងវិញដូចសព្វថ្ងៃដែលនាំឱ្យមានស្ថិរភាពសង្គម សន្តិភាព ក្រោមបាវចនា ជាតិ សាសនា ព្រះមហាក្សត្រ។

ជាមួយគ្នានេះ សម្ដេចនរោត្តម សីហមុនី ទ្រង់មានព្រះរាជបន្ទូលទៀតថា ក្នុងពេលបច្ចុប្បន្ននេះ រាជរដ្ឋាភិបាលកម្ពុជា អាណត្តិទី៧ ដឹកនាំដោយសម្ដេចមហាបវរធិបតី ហ៊ុន ម៉ាណែត មានភាពឈ្លាសវៃ​ មានគោលនយោបាយសមស្រប ទទួលបានការរីកចម្រើន និងស្ថិរភាពសង្គមល្អប្រសើរ  មិនអាចឱ្យមានបុគ្គលណាមួយប្រមាថ ឬប្រទូស្តរាយចំពោះព្រះពុទ្ធសាសនានៅក្នុងសម័យកាលសន្តិភាពនេះបានឡើយ៕

ដោយ៖ ង៉ិល ណារ៉ាត់

The post ព្រះរាជបន្ទូល៖ វត្តអារាមខ្មែរ កែប្រែជោគវាសនាមនុស្សក្រខ្សត់ឱ្យក្លាយជាមន្ត្រីជាន់ខ្ពស់បម្រើរដ្ឋ   appeared first on Kampuchea Thmey Daily.

លោកតា ទុំ សំអៀន អាយុ៦៤ឆ្នាំ ជាគណៈកម្មការអាចារ្យវត្ត និងជាចាស់ទុំរស់នៅតំបន់នោះតាំងពីជំនាន់ដើមមក បានរៀបរាប់ថា ប្រវត្តិដំបូងឡើយមុននឹងកសាងវត្តមណ្ឌជលសារមហាសែនជ័យនេះឡើង មានលោកតាម្នាក់ឈ្មោះលោកតា កាំ ផាន ដែលជាម្ចាស់ស្រុកនៅសម័យនោះ ហើយបានកសាងវត្តនេះឡើងក្នុងអំឡុងឆ្នាំ១៩៥២។ គាត់បានទៅនិមន្តព្រះសង្ឃនៅឯប្រទេសឡាវចំនួន៤អង្គ ដើម្បីប្រសិទ្ធីសាងសង់ ហើយបានដាក់ឈ្មោះវត្តនោះដំបូងថា ទេពចន្ទីគិរីរង្សី ដើម្បីទុកឱ្យពុទ្ធបរិស័ទគោរពប្រតិបត្តិ។

គាត់បានរៀបរាប់បន្តថា ដំបូងឡើយ វត្តនេះសាងសង់ឡើងមានតែកុដិមួយប៉ុណ្ណោះ ហើយមកដល់សម័យសង្គ្រាម ក៏បានបែកបាក់ស្ទើរទាំងស្រុង។ លុះមកដល់ឆ្នាំ២០០៤ ទើបបានស្ថាបនាសាងសង់ឡើងវិញបណ្តើរៗមកដល់ពេលបច្ចុប្បន្ននេះ។ លោកតា ទុំ សំអៀន បានអះអាងថា លោកតា កាំ ផាន ដែលជាផ្តួចផ្តើមវត្តនេះឡើង ធ្លាប់មានស្នាដៃដ៏ធំធេងដោយធ្លាប់បានទាក់បានដំរីសមួយក្បាល មានភ្លុកម្ខាងយកទៅតាមខេត្តរតនគិរីទៅថ្វាយព្រះមហាក្សត្រខ្មែរ ព្រះបាទ នរោត្តម សីហនុ ព្រះបរមរតនកោដ្ឋ។ ពេលនោះ ទ្រង់​បានសព្វព្រះរាជហរទ័យយ៉ាងខ្លាំង ហើយបានព្រះប្រទានមេដាយមាសជូនលោកតា កាំ ផាន ជាការតបស្នង និងអនុញ្ញាតឱ្យលោកតាអាចដើរហើរទៅគ្រប់ទិសទីក្នុងប្រទេស ដោយមិនមានការព្រួយបារម្ភឡើយ។ ក្នុងសម័យនោះ ធ្វើឱ្យប្រជាពលរដ្ឋក្នុងតំបន់ មានការកោតស្ញប់ស្ញែងពីស្នាដៃដ៏ធំធេងរបស់គាត់ណាស់។ សាក្សីដែលដឹងឮរៀងគាត់ទាក់បានដំរីសនេះ ខ្លះនៅរស់ក្នុងភូមិដល់ពេលបច្ចុប្បន្ននៅឡើយ។

ក៏ប៉ុន្តែ បើតាមឯកសាររបស់មន្ទីរធម្មការ និងសាសនា ខេត្តមណ្ឌលគិរី គឺវត្តមណ្ឌលជលសាមហាសែនជ័យនេះ ឈ្មោះដើមហៅថា វត្តទេពចន្ទីគិរីរង្សី ត្រូវបានកសាងឡើងក្នុងឆ្នាំ១៩៥២ ផ្ដួចផ្ដើមបង្កើតឡើងដោយលោក ទេព ចន្ទី ចៅហ្វាយខេត្តក្រចេះជំនាន់នោះដោយមានព្រះភិក្ខុ ប៊ូ ជនជាតិឡាវ ជាព្រះចៅអធិការវត្តកសាងបានព្រះវិហារមួយ។ ក្រោយមកកសាងបានកុដិមួយខ្នងដោយភិក្ខុ បេត ជនជាតិខ្មែរ។ ក្រោយមកទៀតដល់ឆ្នាំ១៩៧០ ប្រទេសមានសង្គ្រាម ធ្វើឱ្យអារាមនេះខ្ទាំខ្ទេចស្ទើរទាំងស្រុងនៅសល់តែខឿនព្រះវិហារតែប៉ុណ្ណោះ ហើយមិនមានការរីកចម្រើនអ្វីនោះឡើយ ព្រោះប្រជាជននៅតំបន់នោះ ភាគច្រើនសុទ្ធសឹងតែជាយោធា។ម្យ៉ាងទៀត នៅតំបន់នោះសម្បូរទៅដោយព្រៃក្រាស់ ស្ថានភាពផ្លូវក៏លំបាក។

ប្រធានមន្ទីររធម្មការ និងសាសនា ខេត្តមណ្ឌលគិរី លោក ទូច រស្មី បានអះអាងឱ្យដឹងថា មកដល់ឆ្នាំ២០០៤ វត្តអារាមមួយនេះ ត្រូវបានបង្កើតឡើងវិញបន្ទាប់ពីប្រទេសជាតិទទួលបានសុខសន្តិភាពពេញលេញ។ ពុទ្ធបរិស័ទចំណុះជើងវត្ត បាននាំគ្នាកសាងឡើងវិញ បានកុដិមួយខ្នង និងព្រះភិក្ខុ ខឿន គង់នៅដោយប្រើឈ្មោះវត្តទេពចន្ទីគិរីរង្សីដដែល។ រហូតមកដល់ឆ្នាំ២០០៧ លោក ញ៉ែម វ៉ាននី ស្នងការនគបាលខេត្តមណ្ឌគិរីជំនាន់នោះ និងសហការី បានផ្ដួចផ្ដើមកសាងបានសាឡុំមួយខ្នងធ្វើអំពីឈើប្រក់ស័ង្កសីនិងបានកសាងសមិទ្ធផលផ្សេងៗមួយចំនួនទៀត។ លោកស្នងការខេត្ត បានរួមមតិគ្នាជាមួយគណៈកម្មការអាចារ្យវត្ត ចៅអធិការ បានកែឈ្មោះវត្តនោះមកជាវត្តមណ្ឌលជលសាមហាសែនជ័យវិញ ដោយហេតុថាវត្តនេះមានឈ្មោះមណ្ឌលជលសារមហាសែនជ័យ ព្រោះតែនៅក្នុងឃុំនេះស្ថិតនៅតាមជួរដងទន្លេសម្បូរទៅដោយភោគផលធម្មជាតិ ដែលហៅថាទន្លេស្រែពក ខេត្តមណ្ឌលគិរី។ ដូច្នេះ ទើបដាក់ឈ្មោះវត្តនេះរហូតដល់សព្វថ្ងៃ។

អាចារ្យគណៈកម្មការ និងចៅអធិការវត្តមណ្ឌលជលសារមហាសែនជ័យ បានអំពាវនាវដល់ប្រជាពលរដ្ឋទាំងអស់ សូមជួយថែរក្សាវត្តនេះឱ្យបានគង់វង្សយូរអង្វែង និងជួយកសាងសមិទ្ធផលផ្សេងៗបន្ថែមទៀត ព្រោះវត្តនេះ មានប្រវត្តិដ៏យូរលង់ណាស់មកហើយ ហើយ កសាងដោយអ្នកមានស្នាដៃអាចទាក់ដំរីសមួយក្បាលជូនព្រះមហាក្សត្រខ្មែរ៕

ដោយ ៖រៀម សុខហេង

The post «មណ្ឌលជលសារមហាសែនជ័យ» វត្តដែលកសាងឡើងដំបូងគេនៅខេត្តមណ្ឌលគិរី អ្នកកសាងមានប្រវត្តិមិនធម្មតាឡើយ appeared first on Kampuchea Thmey Daily.

មិនថា ថ្ងៃឈប់សម្រាកបុណ្យ ឬថ្ងៃឈប់សម្រាកសៅរ៍-អាទិត្យទេ តែងមានមហាជន មកធ្វើការគោរពសក្ការៈ បន់ស្រន់ សុំសេចក្ដីសុខ ពឹងលើជំនឿដ៏ស័ក្ដិសិទិ្ធ តាមបែបបទព្រះពុទ្ធសាសនា ពិសេសអ្នកទេសចរទាំងឡាយ ​ឬប្រជាជនគ្រប់ទិសទី តែងតែមកទស្សនាកម្សាន្តលេង និងនាំយកបាយទឹកមកធ្វើបុណ្យប្រគេនព្រះសង្ឃតាមទំនៀមទម្លាប់របស់ខ្មែរ។

រមណីយដ្ឋានវត្តភ្នំខ្លែង ស្ថិតនៅក្នុងភូមិភ្នំខ្លែង​ ឃុំព្រៃស្លឹក ស្រុកទ្រាំង ប៉ែកខាងត្បូងនៃខេត្តតាកែវ មានចម្ងាយ១២ គីឡូម៉ែត្រ ពីទីរួមខេត្ត​តាកែវ​ តាមបណ្តោយផ្លូវជាតិលេខ២ ដែលកកើតឡើងតាំងពីឆ្នាំ ១៧៥៣ មកម្លេះ៕

អត្ថបទ៖ វីរៈ

The post វត្តភ្នំខ្លែង ក្រៅពីកន្លែងកម្សាន្តបែបវប្បធម៌ ក៏ជាទីសក្ការៈបន់ស្រន់ដ៏ស័ក្ដិសិទិ្ធផងដែរ appeared first on Kampuchea Thmey Daily.