ព្រះរាជបន្ទូល៖ វត្តអារាមខ្មែរ កែប្រែជោគវាសនាមនុស្សក្រខ្សត់ឱ្យក្លាយជាមន្ត្រីជាន់ខ្ពស់បម្រើរដ្ឋ  

ព្រះករុណា ព្រះបាទ សម្ដេចព្រះបរមនាថ  នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា មានព្រះរាជបន្ទូលថា​ តាំងពីអតីតកាលមក វត្តអារាមខ្មែរ បានដើរតួនាទីយ៉ាងសំខាន់ ក្នុងការកែប្រែជោគវាសនាជនក្រខ្សត់ ឱ្យក្លាយទៅជាមន្ត្រីរាជការជាន់ខ្ពស់បម្រើប្រទេសជាតិ។ព្រះមហាក្សត្រ មានព្រះរាជបន្ទូលបែបនេះ នៅក្នុងព្រះរាជពិធីសម្ពោធមហាកុដិសម្ដេចព្រះសង្ឈរាជជួនណាត និងវិទ្យាស្ថានស្រាវជ្រាវ និងអភិរក្សសាស្ត្រាស្លឹករឹតខ្មែរ ព្រមទាំងសមិទ្ធផលនានា ក្នុងវត្តឧណ្ណាលោម នាព្រឹកថ្ងៃទី១៧ ខែកុម្ភៈ ឆ្នាំ២០២៥។

ព្រះមហាក្សត្រនៃព្រះរាជាណាចក្រកម្ពុជា  មានព្រះរាជបន្ទូលដូច្នេះ៖« តាំងតែពីអតីតកាល រហូតមកដល់បច្ចុប្បន្នកាល វត្តអារាមជួយផ្ដល់កន្លែងស្នាក់នៅ បួសរៀនសូត្រ ចំណេះដឹងទូទៅ ដល់អ្នកដែលមានការខ្វះខាត  ក្នុងចំណោមនោះ មានចំនួន បានក្លាយទៅជាថ្នាក់ដឹកនាំគ្រប់ជាន់ថ្នាក់ ក្នុងការបម្រើរដ្ឋ»។

តាមរយៈព្រះរាជពិធី ព្រះមហាក្សត្រ ចាត់ទុកវត្តឧណ្ណាលោម គឺជាទីបណ្ដុះនូវព្រះធម៌របស់ព្រះសម្មាសម្ពុទ្ធដ៏ល្អឯក ហើយជាទីកន្លែងដែល​ផ្ដល់កំណើតដល់វចនានុក្រមខ្មែរ​តាមរយៈការលះបង់ដ៏ធំធេងរបស់សម្ដេចព្រះសង្ឈរាជជួនណាត ពេញមួយព្រះជន្មរបស់ព្រះអង្គ។ ​

បើតាមសម្ដេចព្រះបរមនាថ នរោត្តម សីហមុនី តួនាទីដ៏លេចធ្លោរបស់វត្តអារាមព្រះពុទ្ធសាសនាបានក្លាយទៅជាចលករមួយ ដែលមិនអាចកាត់ផ្ដាច់ចេញបានរវាងដំណើរជីវិតប្រជាពលរដ្ឋខ្មែរប្រចាំថ្ងៃ  និងការអភិវឌ្ឍសង្គមជាតិ ដែលមានន័យថាវត្តអារាម ​និងសង្គមគឺតែមួយ។

លើសពីនេះទៅទៀត ព្រះករុណា ចាត់ទុកតួនាទីដ៏ពិសិដ្ឋរបស់វត្តអារាមព្រះពុទ្ធសាសនាខ្មែរ ថាបានរួមវិភាគទានដ៏សំខាន់ដល់សង្គមតាំងតែពីបុរាណកាលរហូតមកដល់បច្ចុប្បន្នកាលក្នុងតួនាទីសំខាន់ក្នុងការជម្រុញបណ្ដុះសីលធម៌ គុណធម៌ ដែលជាផ្នែកមួយនៃ​ពុទ្ធចរិយាសាស្ត្រ ធ្វើឱ្យសង្គមខ្មែរមានសុខដុមនីយកម្មទាំងសាសនានិងសង្គម និងជាទីកន្លែងអប់រំទាំងផ្លូវការផ្លូវចិត្ត កសាងធនធានមនុស្ស ឱ្យមានចំណេះដឹងគ្រប់បែបយ៉ាង និងជាឃ្លាំងសម្រាប់រក្សាទុកនូវបេតិវប្បធម៌ ប្រពៃណី ចំណេះដឹងដ៏សម្បូរបែប ដែលផ្ដល់គុណតម្លៃសម្រាប់ការសិក្សាស្រាវជ្រាវ មិនចេះរីងស្ងួតឡើយ។

គួរជ្រាបដែរថា ជុំវិញតួនាទីវត្តអារាមក្នុងការផ្ដល់ជម្រកដល់កូនអ្នកស្រែចម្ការបានស្នាក់នៅ បួសរៀនសូត្ររហូតក្លាយជាថ្នាក់ដឹកនាំជាន់ខ្ពស់បម្រើរដ្ឋ គឺមានជារូបសម្ដេចតេជោ ហ៊៊ុន សែន ជាអំណេះអំណាង។ សម្ដេចតេជោ ហ៊ុន សែន កាលពីកុមារភាព​ ពោលគឺនៅក្នុងឆ្នាំ ១៩៦៤ ចាកចេញពីភូមិកំណើត នៅស្រុកស្ទឹងត្រង់ ខេត្តកំពង់ចាម មករស់នៅក្នុងវត្តនាគវ័ន្ត នាទីក្រុងភ្នំពេញ ដើម្បីបន្តការសិក្សានៅវិទ្យាល័យឥន្ទ្រៈទេវី។ តាមរយៈវត្តអារាមនេះ សម្ដេចតេជោ អាចបានសិក្សាមានចំណេះដឹង មានស្មារតីស្រឡាញ់ជាតិ ​ចូលរួម​ក្នុង​ចលនា​តស៊ូ ប្រឆាំង​នឹង​ពួក​ចក្រពត្តិនិយម ដើម្បី​រំដោះ​កម្ពុជា ពី​ភ្លើងសង្គ្រាម ក្រោម​ការអំពាវនាវរ​បស់​ព្រះមហាក្សត្រ ព្រះបាទ នរោត្តម​សីហនុ​ និងរំដោះកម្ពុជា​ចេញពីរបបប្រល័យពូជសាសន៍ប៉ុលពត នាំសន្តិភាពពិតប្រាកដជូនកម្ពុជា នៅឆ្នាំ១៩៩៨ និងអភិវឌ្ឍន៍​ប្រទេសជាតិឱ្យរីកចម្រើនរហូតមកដល់បច្ចុប្បន្ន។

ក្នុងឱកាសនៃព្រះរាជពិធី ព្រះមហាក្សត្រ ក៏បានអរគុណ និងកោតសរសើរជាទីបំផុតចំពោះសម្ដេចអគ្គមហាសេនាបតី ប្រធានព្រឹទ្ធសភា និងជាប្រធានក្រុមឧត្ដមប្រឹក្សាព្រះមហាក្សត្រ ដែលជាស្ថាបនិកដ៏អស្ចារ្យ ប៉ិនប្រសប់ និងឈ្លាសវៃ ក្នុងការធ្វើឱ្យព្រះពុទ្ធសាសនាខ្មែរ និងវត្តអារាម រស់ឡើងវិញដូចសព្វថ្ងៃដែលនាំឱ្យមានស្ថិរភាពសង្គម សន្តិភាព ក្រោមបាវចនា ជាតិ សាសនា ព្រះមហាក្សត្រ។

ជាមួយគ្នានេះ សម្ដេចនរោត្តម សីហមុនី ទ្រង់មានព្រះរាជបន្ទូលទៀតថា ក្នុងពេលបច្ចុប្បន្ននេះ រាជរដ្ឋាភិបាលកម្ពុជា អាណត្តិទី៧ ដឹកនាំដោយសម្ដេចមហាបវរធិបតី ហ៊ុន ម៉ាណែត មានភាពឈ្លាសវៃ​ មានគោលនយោបាយសមស្រប ទទួលបានការរីកចម្រើន និងស្ថិរភាពសង្គមល្អប្រសើរ  មិនអាចឱ្យមានបុគ្គលណាមួយប្រមាថ ឬប្រទូស្តរាយចំពោះព្រះពុទ្ធសាសនានៅក្នុងសម័យកាលសន្តិភាពនេះបានឡើយ៕

ដោយ៖ ង៉ិល ណារ៉ាត់