វិធានការពន្ធ Archives - Kampuchea Thmey Daily

PTT គ្រោងកាត់បន្ថយការចំណាយ ដោយសារបន្ទុកពន្ធរបស់ ត្រាំ

Huon Dina — Thu, 22 May 2025 02:34:45 +0000

កាសែតបាងកកប៉ុស្តិ៍ បានរាយការណ៍នៅថ្ងៃព្រហស្បតិ៍នេះថា ក្រុមហ៊ុនប្រេង និងឧស្ម័នជាតិថៃ PTT Plc គ្រោងទប់ទល់នឹងផលប៉ះពាល់នៃពន្ធរបស់សហរដ្ឋអាមេរិក និងការធ្លាក់ចុះនៃតម្លៃប្រេងពិភពលោក ដោយការកាត់បន្ថយការចំណាយ និងបង្កើនប្រសិទ្ធភាពប្រតិបត្តិការ ដើម្បីបង្កើនប្រាក់ចំណេញ។

ក្រុមហ៊ុននឹងចេញវិធានការថ្មី ដែលរួមមានផែនការចំនួន ៣ ៖ «Axis» គឺការកាត់បន្ថយការចំណាយ, «D1» គឺការចែករំលែកធនធាននៅក្នុងក្រុមហ៊ុន PTT Group និងកាត់បន្ថយកាកសំណល់, និង «Mission X» ការជំរុញប្រាក់ចំណេញ។

ក្រោមផែនការ Axis ក្រុមហ៊ុន PTT នឹងរក្សាសាច់ប្រាក់ឱ្យបានគ្រប់គ្រាន់នៅក្នុងដៃ ដោយកាត់បន្ថយការចំណាយចំនួន ១១ ប៊ីលានបាត/ឆ្នាំ ទៅលើក្រុមហ៊ុនបុត្រសម្ព័ន្ធនៅចន្លោះឆ្នាំ ២០២៥-២០២៩។ នេះបើតាមប្រធាន និងនាយកប្រតិបត្តិក្រុមហ៊ុន PTT លោក Kongkrapan Intarajang ។

ក្រោមផែនការ D1 ក្រុមហ៊ុនគ្រោងនឹងធ្វើសមាហរណកម្មទ្រព្យសម្បត្តិរូបវន្ត ក៏ដូចជាធនធានមនុស្ស ដើម្បីកាត់បន្ថយការចំណាយចំនួន ៣ ប៊ីលានបាត/ឆ្នាំ។ ចំណែកឯក្រុមហ៊ុន

លោក Kongkrapan បាននិយាយថា ចំពោះផែការ Mission X ក្រុមហ៊ុន PTT នឹងបង្កើនប្រសិទ្ធភាពប្រតិបត្តិការ និងបង្កើនប្រាក់ចំណូលប្រចាំឆ្នាំពីក្រុមហ៊ុនរបស់ខ្លួនទាំងអស់ដល់ ៣០ ប៊ីលានដុល្លារ ចន្លោះឆ្នាំ ២០២៥-២០២៧។

បើតាមអ្នកជំនាញ គោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ ធ្វើឱ្យតម្រូវការប្រេងចុះខ្សោយដោយសារតែភាពមិនអំណោយផលផ្នែកសេដ្ឋកិច្ច។ នេះអាចនឹងប៉ះពាល់ដល់ប្រាក់ចំណេញរបស់ក្រុមហ៊ុនប្រេង និងចម្រាញ់ប្រេង៕

The post PTT គ្រោងកាត់បន្ថយការចំណាយ ដោយសារបន្ទុកពន្ធរបស់ ត្រាំ appeared first on Kampuchea Thmey Daily.

ត្រាំ៖ សហភាពអឺរ៉ុបអាក្រក់ជាងចិន

Huon Dina — Tue, 13 May 2025 08:11:29 +0000

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃចន្ទថា សហភាពអឺរ៉ុប «អាក្រក់ជាង» ចិន ប៉ុន្មានម៉ោងបន្ទាប់ពីសហរដ្ឋអាមេរិក និងចិន ប្រកាសពីការព្រមព្រៀងគ្នាកាត់បន្ថយពន្ធខ្ពស់កប់ពពក ដើម្បីបន្ធូរបន្ថយភាពតានតឹងសង្រ្គាមពាណិជ្ជកម្ម។ នេះបើតាមការចុះផ្សាយរបស់សារព័ត៌មាន Politico។

លោកថ្លែងយ៉ាងដូច្នេះថា៖ «សហភាពអឺរ៉ុបអាក្រក់ជាងចិនច្រើនយ៉ាងណាស់។ ចាំមើលចុះ។ យើងមានសន្លឹកបៀរទាំងអស់ក្នុងដៃ។ ពួកគេធ្វើដាក់យើងអយុត្តិធម៌ណាស់»។

គេមើលឃើញថា ទោះបីជាមានការប៉ុនប៉ងក្នុងការចរចាពន្ធជាមួយសហរដ្ឋអាមេរិក និងសហភាពអឺរ៉ុបក្ដី ប៉ុន្តែគ្មានការព្រមព្រៀងណាមួយ បានសម្រេចឡើងនៅឡើយទេ។ លោកដាក់ពន្ធគយបដិការ ២០ ភាគរយ លើសហភាពអឺរ៉ុប មុនពេលផ្អាកការអនុវត្ត ៩០ ថ្ងៃ។

សម្ដីចុងក្រោយរបស់លោក ត្រាំ លើសហភាពអឺរ៉ុប ហាក់ខុសពីអ្វីដែលលោកបានថ្លែងកាលពីសប្ដាហ៍មុន ដោយសរសើរប្រធានគណៈកម្មការអឺរ៉ុបលោកស្រី Ursula von der Leyen ថាជាមនុស្ស «អស្ចារ្យ»។ លោកបន្ថែមថា លោកនឹងជួបលោកស្រីនាពេលឆាប់ៗនេះ។

ខណៈលោក ត្រាំ បានជួបជាមួយមេដឹកនាំនៃប្រទេសផ្សេងៗនៅអឺរ៉ុប នាពេលកន្លងមក លោកស្រី von der Leyen ឯណោះវិញ បានថ្លែងថា លោកស្រីនឹងជួបជាមួយ ត្រាំ ទាល់តែមាន «ការចរចាពាណិជ្ជកម្មច្បាស់លាស់ជាមួយគ្នា»៕

The post ត្រាំ៖ សហភាពអឺរ៉ុបអាក្រក់ជាងចិន appeared first on Kampuchea Thmey Daily.

Toyota ព្យាករពីការធ្លាក់ចុះ ៣៥ ភាគរយ នៃប្រាក់ចំណេញឆ្នាំនេះ ដោយសារពន្ធ ត្រាំ

Huon Dina — Thu, 08 May 2025 07:37:00 +0000

ក្រុមហ៊ុនផលិតរថយន្តជប៉ុន Toyota Motor បានព្យាករពីការធ្លាក់ចុះ ៣៥ ភាគរយ នៃប្រាក់ចំណេញសុទ្ធ សម្រាប់ឆ្នាំសារពើពន្ធបញ្ចប់ត្រឹមខែមីនា ឆ្នាំ ២០២៦ ដោយសារតែគោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ ជាចម្បង រួមជាមួយបញ្ហាផ្សេងៗទៀត។ នេះបើតាមការចុះផ្សាយរបស់ទីភ្នាក់ងារសារព័ត៌មាន AFP នៅថ្ងៃព្រហស្បតិ៍។

លោក ត្រាំ បានដាក់ពន្ធ ២៥ ភាគរយ លើរថយន្ត និងគ្រឿងបន្លាស់នាំចូលអាមេរិក ដែលផលិតក្រៅស្រុក ដែលធ្វើឱ្យប៉ះពាល់ខ្លាំងសម្រាប់ក្រុមហ៊ុនជប៉ុន ក៏ដូចជាអឺរ៉ុប ដែលមានសហរដ្ឋអាមេរិកជាទីផ្សារសម្រាប់ការនាំចេញសំខាន់។

Toyota ដែលជាក្រុមហ៊ុនលក់រថយន្តដាច់ជាងគេបំផុតលើពិភពលោក បានព្យាករថា សម្រាប់ឆ្នាំសារពើពន្ធបច្ចុប្បន្ន ដែលចាប់ផ្ដើមពីខែមេសាតទៅ ប្រាក់ចំណេញសុទ្ធរបស់ក្រុមហ៊ុននឹងធ្លាក់ចុះមកត្រឹម ៣,១ ទ្រីលានយ៉េន ឬ ២១,៦ ប៊ីលានដុល្លារ។

ក្រុមហ៊ុននិយាយក្នុងសេចក្ដីថ្លែងយ៉ាងដូច្នេះថា៖ «ការប៉ាន់ប្រមាណផលប៉ះពាល់នៃពន្ធអាមេរិកក្នុងខែមេសា និងឧសភា ឆ្នាំ ២០២៥ ត្រូវបានបញ្ចូលជាកត្តាបណ្តោះអាសន្ន»។

បើតាមរបាយការណ៍ Toyota បានកត់ត្រាប្រាក់ចំណេញសុទ្ធជិត ៤,៨ ទ្រីលានយ៉េន ក្នុងរយៈពេល ១២ ខែ គិតត្រឹមខែមីនា ឆ្នាំ ២០២៥ ដោយធ្លាក់ចុះ ៣,៦ ភាគរយ ធៀបនឹងឆ្នាំសារពើពន្ធមុន ប៉ុន្តែលើសពីការរំពឹងទុកនៅខែកុម្ភៈ។

ក្រុមហ៊ុន Toyota បានលក់រថយន្តចំនួន ១០,៨ លានគ្រឿងនៅទូទាំងពិភពលោកក្នុងឆ្នាំ ២០២៤ ដោយធ្វើឱ្យក្រុមហ៊ុនក្លាយជាអ្នកលក់រថយន្តដាច់បំផុតលើពិភពលោក ដោយទីផ្សារនៅអាមេរិក រួមចំណែកប្រមាណ ២,៣ គ្រឿង៕

The post Toyota ព្យាករពីការធ្លាក់ចុះ ៣៥ ភាគរយ នៃប្រាក់ចំណេញឆ្នាំនេះ ដោយសារពន្ធ ត្រាំ appeared first on Kampuchea Thmey Daily.

ត្រាំ គ្រោងប្រកាសកិច្ចព្រមព្រៀងពាណិជ្ជកម្មជាមួយអង់គ្លេស ដំបូងគេបង្អស់ក្នុងសម័យពន្ធថ្មី

Huon Dina — Thu, 08 May 2025 03:29:12 +0000

កាសែតញូវយ៉កថែមស៍បានរាយការណ៍កាលពីថ្ងៃពុធ ដោយស្រង់សម្ដីប្រភពមិនបញ្ចេញឈ្មោះ ៣ រូបថា ប្រធានាធិបតីអាមេរិក លោក ដូណាល់ ត្រាំ គ្រោងនឹងប្រកាសកិច្ចព្រមព្រៀងពាណិជ្ជកម្មជាមួយចក្រភពអង់គ្លេស ដែលជាកិច្ចព្រមព្រៀងពាណិជ្ជកម្មសំខាន់ដំបូងគេបង្អស់ក្នុងសម័យពន្ធអាណត្តិថ្មី។ នេះបើតាមការចុះផ្សាយបន្តរបស់ទីភ្នាក់ងារសារព័ត៌មានរ៉យទ័រ។

សេចក្ដីរាយការណ៍នេះ ធ្វើឡើងក្រោយលោក ត្រាំ បានបង្ហោះនៅលើបណ្ដាញសង្គម Social Truth របស់លោកថា នឹងមានសន្និសីទសារព័ត៌មាននៅការិយាល័យពងក្រពើ អំពីកិច្ចព្រមព្រៀងពាណិជ្ជកម្មដ៏សំខាន់មួយនាថ្ងៃព្រហស្បតិ៍រវាងសហរដ្ឋអាមេរិក «ជាមួយអ្នកតំណាងនៃប្រទេសដ៏ធំ និងគួរឱ្យគោរពបំផុត» នៅម៉ោង ១០ ព្រឹក ម៉ោងនៅតំបន់ភាគខាងកើតអាមេរិក (៩ យប់នៅកម្ពុជា)។

លោក ត្រាំ បានបន្ថែមថា នោះនឹងក្លាយជាកិច្ចព្រមព្រៀងពាណិជ្ជកម្មជាមួយប្រទេសដទៃដំបូងបង្អស់ក្នុងចំណោមប្រទេសផ្សេងទៀត ប៉ុន្តែមិនបានផ្តល់ព័ត៌មានលម្អិតបន្ថែម រួមទាំងប្រទេសណាខ្លះនោះទេ។ ដាច់ដោយឡែកពីនេះ កាលពីសប្ដាហ៍មុន លោក ត្រាំ បាននិយាយថា មានលទ្ធភាពដែលអាមេរិកមានកិច្ចព្រមព្រៀងពាណិជ្ជកម្មជាមួយប្រទេសឥណ្ឌា កូរ៉េខាងត្បូង និងជប៉ុន។

ចំណែកឯមន្រ្តីសេតវិមាន ក៏មិនបានបកស្រាយយ៉ាងណាដែរចំពោះសេចក្ដីរាយការណ៍របស់កាសែតញូវយ៉កថែមស៍។ មន្ត្រីចក្រភពអង់គ្លេសម្នាក់ បាននិយាយកាលពីថ្ងៃអង្គារថា ប្រទេសទាំង២ បានចរចាគ្នាយ៉ាងល្អលើកិច្ចព្រមព្រៀងពាណិជ្ជកម្ម ដែលទំនងជារួមបញ្ចូលទាំងកូតាពន្ធទាបលើដែកថែប និងរថយន្ត។

គួរគូសបញ្ជាក់ថា មន្ត្រីកំពូលៗរបស់លោក ត្រាំ បានចូលរួមក្នុងកិច្ចចរចាជាមួយដៃគូពាណិជ្ជកម្មផ្សេងៗ ក្រោយប្រធានាធិបតីប្រកាសពន្ធមូលដ្ឋាន ១០ ភាគរយ និងពន្ធគយបដិការនៅដើមខែមេសា ហើយបានផ្អាកវាសិនរយៈពេល ៩០ ថ្ងៃ។

អង់គ្លេសជាប់ពន្ធមូលដ្ឋាន ប៉ុន្តែមិនជាប់ពន្ធគយបដិការខ្ពស់ជាងនេះនោះទេ ព្រោះប្រទេសនេះនាំចូលពីអាមេរិកច្រើនជាងការនាំចេញទៅ។ យ៉ាងណាមិញ អង់គ្លេសនៅតែជាប់ពន្ធត្រាំ លើរថយន្ត ដែកថែប និងអាលុយមីញ៉ូមនាំចូល៕

The post ត្រាំ គ្រោងប្រកាសកិច្ចព្រមព្រៀងពាណិជ្ជកម្មជាមួយអង់គ្លេស ដំបូងគេបង្អស់ក្នុងសម័យពន្ធថ្មី appeared first on Kampuchea Thmey Daily.

Shein និង Temu បង្កើនការផ្សព្វផ្សាយនៅអឺរ៉ុប ដោយសារពន្ធ ត្រាំ

Huon Dina — Tue, 06 May 2025 03:04:52 +0000

ក្រុមហ៊ុនវេទិកាពាណិជ្ជកម្មអេឡិចត្រូនិក Shein និង Temu ដែលលក់ទំនិញចេញពីប្រទេសចិន បានបង្កើនការចំណាយលើការផ្សព្វផ្សាយពាណិជ្ជកម្មឌីជីថលរបស់ខ្លួននៅអឺរ៉ុបកាលពីខែមេសា ដោយបង្ហាញពីការងាកចេញពីទីផ្សារសហរដ្ឋអាមេរិក ដោយសារតែគោលនយោបាយពន្ធកប់ពពករបស់ប្រធានាធិបតី ដូណាល់ ត្រាំ។ នេះបើតាមការចុះផ្សាយផ្ដាច់មុខរបស់ទីភ្នាក់ងារសារព័ត៌មានរ៉យទ័រ។

ទិន្នន័យពីក្រុមហ៊ុនស៊ើបការណ៍ទីផ្សារ Sensor Tower បានបង្ហាញថា ការចំណាយលើការផ្សាយពាណិជ្ជកម្មរបស់ Shein និង Temu បានកើនឡើងច្រើនជាងគេនៅប្រទេសបារាំង និងចក្រភពអង់គ្លេស បើធៀបនឹងបណ្តាប្រទេសនៅអឺរ៉ុបផ្សេងទៀត។

Shein បានបង្កើនការចំណាយ ៣៥ ភាគរយ នៅបារាំង និងចក្រភពអង់គ្លេស ខណៈ Temu ដែលជាបុត្រសម្ព័ន្តរបស់ក្រុមហ៊ុនចិន PDD Group បានបង្កើនការចំណាយ ៤០ ភាគរយ នៅបារាំង និង ២០ ភាគរយ នៅចក្រភពអង់គ្លេស។

ការបង្កើនការផ្សាយពាណិជ្ជកម្មនៅអឺរ៉ុប ដែលរួមមានបារាំង អាល្លឺម៉ង់ អ៊ីតាលី អេស្ប៉ាញ និងចក្រភពអង់គ្លេស ធ្វើឡើងចំពេលដែលក្រុមហ៊ុនលក់រាយទាំងនេះ ត្រូវប្រឈមមុខនឹងពន្ធខ្ពស់របស់ ត្រាំ ជាពិសេសមុខទំនិញមកពីប្រទេសចិន ដោយទម្លាក់ចោលនូវការលើកលែងពន្ធចំពោះមុខទំនិញក្រោម ៨០០ ដុល្លារ។

នាពេលកន្លងមក ការលើកលែងពន្ធលើទំនិញថោកៗរបស់អាមេរិក គឺជាកត្តាសំខាន់ដែលជំរុញនូវភាពរីកចម្រើនយ៉ាងឆាប់រហ័សរបស់ក្រុម Shein និង Temu ដែលលក់រ៉ូបតម្លៃត្រឹម ១២ ដុល្លារ និងគ្រឿងតុបតែងបន្សំត្រឹម ៥ ដុល្លារ នៅសហរដ្ឋអាមេរិក។

ក្រុមហ៊ុនដែលពឹងផ្អែកខ្លាំងលើទំនិញថោកៗពីប្រទេសចិនទាំង២ បានកាត់បន្ថយការផ្សាយពាណិជ្ជកម្មឌីជីថលនៅសហរដ្ឋអាមេរិកកាលពីខែមុន ពោលគឺមុនការលុបចោលការលើកលែងពន្ធលើទំនិញថោកៗរបស់អាមេរិក ចូលជាធរមាននៅថ្ងៃទី ២ ឧសភា។ ជាធម្មតា ការផ្សាយពាណិជ្ជកម្មឌីជីថលរាប់បញ្ជូលទាំងការផ្សាយនៅលើ Facebook, Instagram, TikTok, Snap, X និង YouTube៕

The post Shein និង Temu បង្កើនការផ្សព្វផ្សាយនៅអឺរ៉ុប ដោយសារពន្ធ ត្រាំ appeared first on Kampuchea Thmey Daily.

Nike និង Adidas ស្នើឱ្យ ត្រាំ លើកលែងពន្ធ ដោយខ្លាចត្រូវបិទទ្វារអាជីវកម្ម

Huon Dina — Mon, 05 May 2025 04:33:47 +0000

ក្រុមហ៊ុនផលិតស្បែកជើង និងសម្លៀកបំពាក់អន្តរជាតិធំៗ រួមទាំង Nike និង Adidas ដែលពឹងផ្អែកលើមជ្ឈមណ្ឌលផលិតកម្មនៅវៀតណាមសម្រាប់ការនាំចេញ កំពុងស្នើសុំប្រធានាធិបតីអាមេរិក លោក ដូណាល់ ត្រាំ ឱ្យលើកលែងពន្ធ ក្រោមក្ដីបារម្ភអំពីកំណើនថ្លៃដើមផលិត និងការបិទអាជីវកម្ម។ នេះបើតាមការចុះផ្សាយរបស់កាសែត The Investor កាលពីចុងសប្ដាហ៍មុន។

ក្នុងលិខិតស្នើសុំផ្ញើទៅកាន់សេតវិមានកាលពីសប្ដាហ៍មុន អង្គការអ្នកចែកចាយស្បែកជើង និងអ្នកលក់រាយរបស់អាមេរិក តំណាងឱ្យក្រុមហ៊ុនផលិតស្បែកជើងធំៗ បាននិយាយថា ពន្ធគយបដិការរបស់ ត្រាំ បង្កជា «ការគំរាមកំហែងអត្ថិភាព» ដល់ឧស្សាហកម្មស្បែកជើង។

លិខិតនេះ ត្រូវបានចុះហត្ថលេខាដោយម៉ាកស្បែកជើងជាច្រើន ចំនួន ៧៦ រួមមានក្រុមហ៊ុន Nike, Adidas, Skechers និង Under Armour ជាដើម។

លិខិតដដែលសរសេរយ៉ាងដូច្នេះថា៖ «ក្រុមហ៊ុនជាច្រើន ដែលផលិតស្បែកជើងមានតម្លៃសមរម្យសម្រាប់គ្រួសារមានប្រាក់ចំណូលទាប និងមធ្យម មិនអាចសម្របនឹងអត្រាពន្ធខ្ពស់នេះទេ ហើយក៏មិនអាចបង្កើនការចំណាយសម្រាប់អតិថិជនដែរ។ បើគ្មានការបន្ធូរបន្ថយពន្ធគយបដិការភ្លាមៗទេ ពួកគេនឹងបិទទ្វារ»។

គួរគូសបញ្ជាក់ថា ត្រាំ បានប្រកាសដាក់ពន្ធគយធ្ងន់ធ្ងរលើចិន និងប្រទេសនៅអាស៊ានរួមមានវៀតណាម ឥណ្ឌូណេស៊ី កម្ពុជា ដែលសុទ្ធសឹងតែជាប្រទេសផលិតស្បែកជើងសំខាន់សម្រាប់ក្រុមហ៊ុនអន្តរជាតិដូចជា Nike និង Adidas ជាដើម។ ក្រុមហ៊ុនទាំងនោះ មានសហរដ្ឋអាមេរិកគឺជាទីផ្សារដ៏សំខាន់មួយ៕

The post Nike និង Adidas ស្នើឱ្យ ត្រាំ លើកលែងពន្ធ ដោយខ្លាចត្រូវបិទទ្វារអាជីវកម្ម appeared first on Kampuchea Thmey Daily.

ចិនអះអាងថា អាមេរិកទាក់ទងទៅខ្លួនដើម្បីសុំចរចាពន្ធ

Huon Dina — Fri, 02 May 2025 02:02:23 +0000

ក្រសួងពាណិជ្ជកម្មចិន បានឱ្យដឹងនៅថ្ងៃសុក្រនេះថា សហរដ្ឋអាមេរិកបានទាក់ទងទៅប្រទេសចិនដើម្បីស្វែងរកការចរចាគ្នាជុំវិញសង្រ្គាមពាណិជ្ជកម្មពន្ធគយ ដែលបំផ្ទុះឡើងដោយប្រធានាធិបតីអាមេរិក លោក ដូណាល់ ត្រាំ ដោយបង្ហាញសញ្ញានៃការបន្ធូរបន្ថយភាពតានតឹង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ក្រសួងពាណិជ្ជកម្មចិន បាននិយាយក្នុងសេចក្តីថ្លែងការណ៍ថា សហរដ្ឋអាមេរិកគួរតែត្រៀមខ្លួន ដើម្បីចាត់វិធានការក្នុងការកែតម្រូវការអនុវត្ត «ខុស» និងលុបចោលពន្ធឯកតោភាគី ដោយបន្ថែមថា អាមេរិកត្រូវបង្ហាញ «ភាពស្មោះត្រង់» ក្នុងការចរចា។

ក្រសួងបានបន្តយ៉ាងដូច្នេះថា៖ «ការព្យាយាមប្រើការចរចាជាលេស ដើម្បីប្រើសម្រាប់ការបង្ខិតបង្ខំ និងការជំរិត នឹងមិនដំណើរការនោះទេ»។

គួរគូសបញ្ជាក់ថា មកទល់ពេលនេះ មិនទាន់មានការចរចាជាផ្លូវការកម្រិតខ្ពស់ណាមួយកើតឡើងរវាងសហរដ្ឋអាមេរិក និងចិននោះទេ ខណៈលោក ត្រាំ និងមន្រ្តីរបស់លោកបានបន្ទន់ជំហរដាក់ចិន ដើម្បីបើកផ្លូវសម្រាប់ការចរចា។

ចំណែកឯចិន ដែលព្រមានថាពន្ធមិនចំណេញភាគីណាមួយនោះ នាពេលកន្លងមក ក៏បានបន្ទន់ជំហរចរចាដូចគ្នា ប៉ុន្តែថាខ្លួនត្រៀមខ្លួនរួចរាល់ ក្នុងការឆ្លើយតបវិធានការបង្កើនភាពតានតឹងរបស់សហរដ្ឋអាមេរិក។ ត្រាំ ដាក់ពន្ធ ១៤៥ ភាគរយ លើទំនិញចិន ហើយចិនសងសឹកវិញ ជាមួយពន្ធ ១២៥ ភាគរយ ដោយទ្វេភាគីបានលើកលែងចំពោះទំនិញសំខាន់ៗមួយចំនួន។

កាលពីថ្ងៃពុធ លោក ត្រាំ បានសម្ដែងភាពជឿជាក់ អំពី «ឱកាសដ៏ល្អ» ដែលរដ្ឋបាលរបស់លោក អាចធ្វើកិច្ចព្រមព្រៀងជាមួយប្រទេសចិន ប៉ុន្មានម៉ោងក្រោយពីប្រធានាធិបតីចិន លោក ស៊ី ជីនពីង បានអំពាវនាវដល់មន្ត្រីចិន ឱ្យចាត់វិធានការសម្របខ្លួនទៅនឹងការប្រែប្រួលក្នុងបរិយាកាសអន្តរជាតិ ដោយមិនបាននិយាយច្បាស់ពីសហរដ្ឋអាមេរិកនោះទេ៕

The post ចិនអះអាងថា អាមេរិកទាក់ទងទៅខ្លួនដើម្បីសុំចរចាពន្ធ appeared first on Kampuchea Thmey Daily.

កសិករអាមេរិកព្រួយបារម្ភ ដោយពន្ធ ត្រាំ បង្ក «វិបត្តិពេញទំហឹង» លើវិស័យកសិកម្ម

Huon Dina — Wed, 30 Apr 2025 06:39:42 +0000

ក្រុមពាណិជ្ជកម្មដ៏សំខាន់មួយរបស់អាមេរិក បានឱ្យដឹងថា ពន្ធគយរបស់ប្រធានាធិបតី ដូណាល់ ត្រាំ បានធ្វើឱ្យឧស្សាហកម្មកសិកម្មរបស់សហរដ្ឋអាមេរិក ធ្លាក់ចូលទៅក្នុង «វិបត្តិពេញទំហឹង» ខណៈការលុបចោលការបញ្ជាទិញទំនិញកសិកម្មរបស់ចិន បង្ខំឱ្យកសិករអាមេរិកបញ្ឈប់បុគ្គលិក ឬបិទអាជីវកម្មរបស់ខ្លួន។ នេះបើតាមការចុះផ្សាយរបស់កាសែតញូវយ៉កប៉ុស្តិ៍ និងបណ្ដាញទូរទស្សន៍ CNBC កាលពីថ្ងៃចន្ទ។

កសិករសណ្ដែកសៀងអាមេរិក នៅរដ្ឋ Missouri

លោក Peter Friedmann នាយកប្រតិបត្តិនៃសម្ព័ន្ធដឹកជញ្ជូនកសិកម្ម (AgTC) ដែលជាក្រុមពាណិជ្ជកម្មនាំចេញឈានមុខគេសម្រាប់កសិករអាមេរិក បានប្រាប់ CNBC ថា គេមិនអាចនិយាយថា ចំនួននៃការលុបចោលការបញ្ជាទិញរបស់ចិនជិតក្លាយជាវិបត្តិនោះទេ ព្រោះ «វាជាវិបត្តិពេញទំហឹងរួចទៅហើយ»។

យោងតាមទិន្នន័យ ដែលចេញផ្សាយដោយក្រសួងកសិកម្មសហរដ្ឋអាមេរិក (USDA) កាលពីថ្ងៃព្រហស្បតិ៍សប្ដាហ៍មុន ប្រទេសចិនបានលុបចោលការបញ្ជាទិញសាច់ជ្រូកដ៏ធំបំផុតរបស់ខ្លួនចាប់តាំងពីឆ្នាំ ២០២០ ក្នុងទំហំប្រមាណ ១២ ០០០ តោន។ ទន្ទឹមនឹងនេះ ទចិនបានកាត់បន្ថយការបញ្ជាទិញសណ្តែកសៀងអាមេរិករបស់ខ្លួនមកត្រឹម ១ ៨០០ តោន ក្នុងសប្តាហ៍ដែលបញ្ចប់នៅថ្ងៃទី ១៧ ខែមេសា ពោលគឺធ្លាក់ចុះប្រមាណ ៩៧ ភាគរយ ពីចំនួន ៧២ ៨០០ តោន នៅសប្ដាហ៍មុននោះ។

AgTC បាននិយាយថា ការខាតបង់ផ្នែកហិរញ្ញវត្ថុទ្រង់ទ្រាយធំ ក្លាយជាបញ្ហាប្រឈមរួមទៅហើយក្នុងចំណោមបណ្ដាក្រុមហ៊ុនជាសមាជិកនៃក្រុមពាណិជ្ជកម្មរបស់ខ្លួន។

អ្នកនាំចេញឈើ និងក្តារក្រដាស បានរាយការណ៍ប្រាប់ AgTC ថា ទំនិញចំនួន ៦ ៤០០ តោន ត្រូវបានលុបចោលការបញ្ជាទិញភ្លាមៗ ឬត្រូវជាប់គាំងក្នុងឃ្លាំង។ ទន្ទឹមនឹងនេះដែរ ប្រភេទទំនិញដដែលចំនួន ៩ ០០០ កំពុងដឹកជញ្ជូនទៅចិនដោយរំពឹងថាទៅដល់ថ្ងៃទី ១៣ ឧសភា ប៉ុន្តែបារម្ភថា អតិថិជនចិនអាចបដិសេធមិនទទួលយក ហើយត្រូវផ្លាស់ប្ដូរទៅកន្លែងផ្សេង ដែលអាចបង្កើនការចំណាយ។ ចំណែកឯក្រុមហ៊ុននាំចេញគ្រាប់ពូជស្មៅវិញ បានរាយការណ៍ថា អ្នកទិញចិនបានលុបចោលទំនិញដឹកតាមកប៉ាល់នេះចំនួន ៨ ជើង ទោះបីជាកប៉ាល់ត្រូវបានកក់រួចហើយក្ដី។

សាច់ជ្រូកសុទ្ធរបស់អាមេរិក

នៅឯកិច្ចប្រជុំភាគីពាក់ព័ន្ធនាពេលថ្មីៗនេះ នៅទីស្នាក់ការកណ្តាលកំពង់ផែ Oakland ទាក់ទងនឹងផលប៉ះពាល់ពន្ធគយ នាយកប្រតិបត្តិកំពង់ផែ Oakland លោក Kristi McKenney បានព្រមានថាការធ្លាក់ចុះនៃបរិមាណទំនិញរបស់កំពង់ផែដោយសារពន្ធ ជាចុងក្រោយអាចប៉ះពាល់ដល់ស្ថិរភាពការងារ និងសុខភាពសេដ្ឋកិច្ចក្នុងតំបន់។

លោក McKenney បានលើកឡើងពីពន្ធសងសឹកលើផលិតផលកសិកម្មរបស់សហរដ្ឋអាមេរិក ក៏ដូចជាទំនិញផលិត។ ទំនិញទាំង២មុខ ស្ថិតក្នុងចំណោមទំនិញនាំចេញដ៏សំខាន់ដែលឆ្លងកាត់កំពង់ផែ Oakland ។ ការនាំចេញរួមមាន ត្រីអាល់ម៉ុន សាច់គោ សាច់ជ្រូក ទឹកដោះគោ និងវត្ថុធាតុដើមកែច្នៃ ដែលភាគច្រើនឆ្ពោះទៅទីផ្សារនៅអាស៊ី។ អ្វីដែលសំខាន់ ចិនជាប់ចំណាត់ថ្នាក់ជាដៃគូពាណិជ្ជកម្មនាំចូលកំពូលរបស់កំពង់ផែ និងជាដៃគូនាំចេញទី៣ ដោយរួមចំណែក ២៩ ភាគរយ នៃទំហំពាណិជ្ជកម្មសរុបរបស់កំពង់ផែ Oakland ។

ក្នុងសង្រ្គាមពាណិជ្ជកម្ម សហរដ្ឋអាមេរិកបានដាក់ពន្ធជាបន្តបន្ទាប់លើទំនិញចិន សរុបប្រមាណ ១៤៥ ភាគរយ។ ដើមឡើយ ចិនបានកំណត់គោលដៅពន្ធតែលើទំនិញវិស័យកសិកម្មរបស់អាមេរិកប៉ុណ្ណោះ ប៉ុន្តែក្រោយមកបានសងសឹកលលើវិធានការរបស់ ត្រាំ ដោយដំឡើងពន្ធ ១២៥ ភាគរយ លើទំនិញស្ទើរគ្រប់មុខរបស់អាមេរិក។

ដោយសារតែសង្រ្គាមពន្ធនេះ អ្នកនាំចេញកសិផលអាមេរិកបានព្រមាននាពេលកន្លងមកថា គ្មានទីផ្សារផ្សេងទៀត ដែលអាចជំនួសតម្រូវការរបស់ចិនបានយ៉ាងឆាប់រហ័ស ឬអាចស្រូបយកបរិមាណទំនិញកសិកម្មដូចចិននោះទេ។

កម្មករចំណាកស្រុកកំពុងបេះផ្លែស្ត្របឺរីនៅកសិដ្ឋានមួយក្នុងរដ្ឋ California

យោងតាម USDA ចិនជាទីផ្សារទំនិញកសិកម្មរបស់សហរដ្ឋអាមេរិក ក្នុងទំហំនៃការនាំចេញប្រមាណ ២៧ ប៊ីលានដុល្លារកាលពីឆ្នាំមុន ដែលនេះបង្ហាញថា ការខាតបង់នឹងមានលក្ខណៈធ្ងន់ធ្ងរសម្រាប់កសិករអាមេរិក។

យោងតាមលោក Friedmann បានឱ្យដឹងថា កសិករអាមេរិកនៅទូទាំងប្រទេសកំពុងស្ថិតក្នុងវិបត្តិរួចទៅហើយ ដោយរាប់តាំងកសិករមូរចំបើង រហូតដល់អ្នកដាំកប្បាស និងឈើខ្លាំង ក៏ដូចជាក្រុមហ៊ុននាំចេញផ្លែឈើ និងគ្រាប់ធញ្ញជាតិ។

ខ្លាំងបំផុតគឺថា កសិករសណ្តែកសៀងអាមេរិក នឹងបាត់បង់ទីផ្សារចិន ដ៏សំខាន់។ យោងតាម USDA ចិនគឺជាអ្នកទិញសណ្តែកសៀងលំដាប់កំពូលរបស់ពិភពលោក ដោយបាននាំចូលសណ្ដែកសៀងពីអាមេរិកក្នុងតម្លៃជិត ១៣ ប៊ីលានដុល្លារកាលពីឆ្នាំមុន។

ការណ៍គួរឱ្យកត់សម្គាល់នោះ គឺថា ទោះបីជាសហរដ្ឋអាមេរិកជាអ្នកផ្គត់ផ្គង់ទំនិញកសិកម្មដ៏ធំមួយក្ដី លោក Zhao Chenxin មន្ត្រីជាន់ខ្ពស់ចិននៅគណៈកម្មការអភិវឌ្ឍន៍ និងកំណែទម្រង់ បាននិយាយកាលពីថ្ងៃចន្ទថា ចិននៅតែធម្មតាទោះបីគ្មានការផ្គត់ផ្គង់ពីអាមេរិក នូវគ្រាប់ធញ្ញជាតិដូចជាសណ្តែកសៀង ពោត និងពោត ក៏ដោយ ព្រោះចិនអាចរកអ្នកផ្គត់ផ្គង់ជំនួសបាន «យ៉ាងងាយស្រួល ហើយការផ្គត់ផ្គង់នៅលើទីផ្សារអន្តរជាតិមានគ្រប់ណាស់ទៅហើយ»។ កន្លងមក មានសេចក្ដីរាយការណ៍ថា ជំនួសឱ្យអាមេរិក ចិនបានងាកទៅរកការផ្គត់ផ្គង់ទំនិញកសិកម្មមួយចំនួន ពីបណ្ដាប្រទេសនៅអាមេរិកខាងត្បូង ដូចជាប្រេស៊ីលជាដើម។

ប្រធានាធិបតីអាមេរិក លោក ដូណាល់ ត្រាំ និងប្រធានាធិបតីចិន លោក ស៊ី ជីនពីង

លោក Friedmann បាននិយាយថា អ្នកដើរទិញអីវ៉ាន់អាមេរិក ប្រហែលជានឹងឃើញពីលំហូរជាបណ្តោះអាសន្ននៃទំនិញថោកៗជាងរាល់ដងតាមផ្សារទំនើប ប៉ុន្តែនោះគឺជាសញ្ញាដែលថា កសិករអាមេរិកឈប់រកស៊ី ហើយដាក់ទំនិញលើទីផ្សារលើសពីតម្រូវការដោយសារតែគ្មានជម្រើសនាំចេញ។

គេមើលឃើញថា វិធានការពន្ធរបស់សហរដ្ឋអាមេរិកបានបង្កការប្រឆាំងទ្រង់ទ្រាយធំៗពីភាគីផ្សេងៗ ជាពិសេសអ្នកក្នុងវិស័យកសិកម្ម ដែលរងហានិភ័យនៃការកំណត់គោលដៅសងសឹកខ្លាំងជាងគេ។

យោងតាមការចុះផ្សាយរបស់វិទ្យុសាធារណៈជាតិអាមេរិក (NPR) រដ្ឋបាល ត្រាំ នៅអាណត្តិមុន បានចំណាយប្រាក់ ២៨ ប៊ីលានដុល្លារ ដើម្បីជួញដល់កសិករដោយសារតែការសងសឹករបស់ចិន។ ប៉ុន្តែពេលបច្ចុប្បន្ន អត្រាពន្ធគយគឺខ្ពស់ជាងកាលនោះ ហើយវាមិនទាន់ច្បាស់ ថាតើវានឹងបន្តទៅមុខក្នុងរយៈពេលប៉ុន្មាននោះទេ។ កសិករអាមេរិកលើកឡើងថា ការជួញរបស់ ត្រាំ អាចជួយបានក្នុងរយៈពេលខ្លី ប៉ុន្តែផលប៉ះពាល់នៃពន្ធបន្តក្នុងរយៈពេលវែង ដោយធ្វើឱ្យពួកគេបាត់បង់ទីផ្សារ។

កាលពីដើមខែមេសា ពោលគឺបន្ទាប់ពីលោក ត្រាំ ប្រកាសពន្ធគយបដិការ សហព័ន្ធការិយាល័យកសិកម្មអាមេរិក ដែលជាក្រុមតំណាងកសិករឈានមុខគេ បាននិយាយថា ពន្ធគយគំរាមកំហែងដល់ការប្រកួតប្រជែងរបស់កសិករអាមេរិក ហើយអាចបណ្តាលឱ្យខូចខាតរយៈពេលវែង ដោយវាបំផ្លាញចំណែកទីផ្សារ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោក Zippy Duvall ប្រធានសហព័ន្ធដដែល បាននិយាយក្នុងសេចក្តីថ្លែងការណ៍ថា៖ «យើងមានគោលដៅរួមជាមួយរដ្ឋបាល(ត្រាំ) ក្នុងការកម្រិតទីផ្សារជាមួយដៃគូអន្តរជាតិរបស់យើង ប៉ុន្តែការដំឡើងពន្ធបានគំរាមកំហែងដល់និរន្តរភាពសេដ្ឋកិច្ចរបស់កសិករ»។

ចំណែកឯសហភាពកសិករជាតិអាមេរិកវិញ ក៏បានរិះគន់ផែនការពន្ធផងដែរ ដោយនិយាយថា វាធ្វើឲ្យកសិករប្រឈមនឹងហានិភ័យ ពេលមានភាពតានតឹងសេដ្ឋកិច្ច ដោយបង្កការបាត់បង់កសិដ្ឋានបែបគ្រួសារកាន់តែច្រើន ធ្វើឱ្យសេដ្ឋកិច្ចជនបទចុះខ្សោយ ហើយចុងក្រោយជំរុញឱ្យការចំណាយ និងកម្រិតជម្រើសផលិតផលសម្រាប់អ្នកប្រើប្រាស់នៅហាងលក់គ្រឿងទេស៕

The post កសិករអាមេរិកព្រួយបារម្ភ ដោយពន្ធ ត្រាំ បង្ក «វិបត្តិពេញទំហឹង» លើវិស័យកសិកម្ម appeared first on Kampuchea Thmey Daily.