វិសាខា Archives - Kampuchea Thmey Daily

ព្រះខ័នរាជស្វាយរៀង ឬ វិសាខា ជាជើងឯកពានសម្តេចតេជោ ថ្ងៃអាទិត្យនេះ?

chean virakbot — Fri, 22 May 2026 02:27:04 +0000

តើនរណាជាម្ចាស់ជើងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ រវាងក្រុម ព្រះខ័នរាជស្វាយរៀង និង វិសាខា ដែលត្រូវឡើងសមរភូមិទីលានបៃតងនៃពហុកីឡដ្ឋានជាតិមរតកតេជោ នាថ្ងៃអាទិត្យ ទី២៤ ខែឧសភា ឆ្នាំ ២០២៦។

វិសាខា ជាក្រុមមួយដែលមិនទាន់ស្គាល់បរាជ័យឡើតរាល់ពេលពួកគេបានឡើងដល់វគ្គផ្តាច់ព្រ័ត្រ ៣ ដង នៃពានរង្វាន់សម្តេចតេជោ ហ៊ុន សែន គឺ លើកទី១ ឆ្នាំ ២០២០ ពួកគេបានឈ្នះ ណាហ្គាវើលដ៍ ២-០, លើកទី២ ឆ្នាំ ២០២១ បានឈ្នះ ព្រះខ័នរាជស្វាយរៀង ដោយប៉េណាល់ទី ៥-៤ បន្ទាប់ពីស្មើគ្នា ២-២ និងលើកទី៣ ឆ្នាំ ២០២២ បានឈ្នះ បឹងកេត ដោយលទ្ធផល ៤-៣ សម្រាប់ការប្រកួត ១២០នាទីពេញ។

ដូច្នេះ វិសាខា កាន់កំណត់ត្រាមិនដែលចាញ់ក្នុងវគ្គផ្តាច់ព្រ័ត្រ ហើយប្រសិនបើពួកគេឈ្នះជើងឯកនៅថ្ងៃអាទិត្យនេះ នឹងឡើងទៅឈរចំណាត់ថ្នាក់លេខ ២ ក្នុងនាមជាក្រុមឈ្នះជើងឯកច្រើនជាងគេ។

ព្រះខ័នរាជស្វាយរៀង កំពុងកាន់កំណត់ត្រា ២ សំខាន់ក្នុងពានរង្វាន់សម្តេចតេជោ ហ៊ុន សែន ។ ទី១ ពួកគេជាក្រុមដែលបានឡើងដល់វគ្គផ្តាច់ព្រ័ត្រច្រើនជាងគេបំផុតគឺចំនួន ១១ លើកគិតទាំង រដូវកាលឆ្នាំ ២០២៥-២៦នេះ។ ទី២ ពួកគេជាក្រុមដែលបានឈ្នះជើងឯកពានរង្វាន់សម្តេចតេជោ ច្រើនជាងគេពោលគឺចំនួន ៥ ដង គឺឆ្នាំ ២០១១ ២០១២ ២០១៥ ២០១៧ និង ២០២៣-២៤។

វិសាខា កំពុងស្ថិតនៅក្នុងទម្រង់ល្អក្រោមការដឹកនាំរបស់គ្រូបបង្វឹកលោក Scott Cooper សម្រាប់ ១០ ប្រកួតចុងក្រោយពោលគឺឈ្នះទាំងអស់។ ជាពិសេស ពួកគេមានពេលវេលាសម្រាកត្រៀមខ្លួនបានយូរជាង ព្រះខ័នរាជស្វាយរៀង។ ការប្រកួតចុងក្រោយរបស់ វិសាខា បានឈ្នះ គិរីវង់សុខសែនជ័យ កាលពីថ្ងៃសៅរ៍ ទី១៦ ខែឧសភា។

ចំណែក ព្រះខ័នរាជស្វាយរៀង ទើបតែប្រកួតឈ្នះ បឹងកេត ដោយលទ្ធផល ៣-២ កាលពីថ្ងៃពុធ ទី២០ ខែឧសភា ថ្មីៗនេះ ហើយពេលពេលរហូតដល់ ១២០នាទីថែមទៀត ដូច្នេះពួកគេមានការហត់នឿយច្រើន។

មុនឈានដល់វគ្គផ្តាច់ព្រ័ត្រ ព្រះខ័នរាជស្វាយរៀង បានឈ្នះ ក្រុមបាត់ដំបង យូណៃធីត ទាំងពីរជើង ១៧-៣ នៅវគ្គ ១៦ ក្រុមចុងក្រោយ និងឈ្នះគិរីវង់សុខសែនជ័យទាំងពីរជើង ៥-៣ នៅវគ្គ ៨ ក្រុមចុងក្រោយ ហើយឈ្នះ បឹងកេត ទាំងពីរ ៤-៣ ក្នុងវគ្គពាក់កណ្តាលផ្តាច់ព្រ័ត្រ។

ចំពោះ វិសាខា វិញ បានឡើងវគ្គផ្តាច់ព្រ័ត្រ តាំងពីថ្ងៃទី២៩ ខែមេសា បន្ទាប់ពីឈ្នះ អាយអេសអាយ ដង្កោសែនជ័យ ៣-០ ក្នុងជើងទី១ និងជើងទី២ ឈ្នះ ៤-១ សរុបទាំងពីរជើងឈ្នះ ៧-១ ក្នុងវគ្គពាក់កណ្តាលផ្តាច់ព្រ័ត្រ។ វគ្គ ១៦ ក្រុមចុងក្រោយ ពួកគេបានឈ្នះ ក្រុមភ្នំពេញហ្គាឡាក់ស៊ី ទាំងពីរជើង ២២-០ និងវគ្គ ៨ ក្រុមចុងក្រោយ ឈ្នះ ណាហ្គាវើលដ៍ ទាំងពីរជើង ៦-២។

កុំភ្លេច ចូលរួមគាំទ្រ និងទស្សនាឲ្យបានច្រើនកុះករ នាល្ងាច ថ្ងៃអាទិត្យ ទី២៤ ខែឧសភា នេះនៅពហុកីឡដ្ឋានជាតិមរតកតេជោ ដែលមានអ្វីពិសេសច្រើនលើសពីការប្រកូតបាល់ទាត់ថែមទៀត៕

អត្ថបទ៖ វិរបុត្រ

The post ព្រះខ័នរាជស្វាយរៀង ឬ វិសាខា ជាជើងឯកពានសម្តេចតេជោ ថ្ងៃអាទិត្យនេះ? appeared first on Kampuchea Thmey Daily.

វិសាខា ប្រឈមអត់បានឡើង Top 6 បើនៅតែធ្វើមិនបានល្អ ខណៈ ប៉ះ ព្រះខ័នរាជស្វាយរៀង ថ្ងៃអាទិត្យនេះ

chean virakbot — Fri, 02 Jan 2026 02:22:47 +0000

ក្លិបបាល់ទាត់ វិសាខា ប្រឈមនឹងអត់បានចំណាត់ថ្នាក់កំពូលទាំង ៦ (Top 6) ប្រសិនបើនៅតែធ្វើមិនបានល្អក្នុងលីគបាល់ទាត់កំពូលកម្ពុជារដូវកាលនេះ។

ឆ្លងកាត់ ១៣ ប្រកួតកន្លងមក វិសាខា រកបាន ១៥ ពិន្ទុ កំពុងឈរលេខ ៧ តាមរយៈការឈ្នះតែ ៣ ប្រកួត ស្មើ ៦ ប្រកួត និងចាញ់ ៤ ប្រកួត។ បន្ទាប់ពីដូរគ្រូបង្វឹក និងដោះដូរកីឡាករជាច្រើននាក់ ពួកគេនៅតែមិនទទួលបានលទ្ធផលតាមការចង់បានឡើយ។ ជាពិសេសការប្រកួតចុងក្រោយ ពួកគេបានចាញ់ក្រុម អឹមអូអាយ កំពង់ដេវ៉ា ដោយលទ្ធផល ០-១ ហើយកីឡាករ ២ នាក់ទទួលបានកាតក្រហមថែមទៀត។

វិសាខា ត្រូវប្រឈមនឹងក្រុមខ្លាំង ព្រះខ័នរាជស្វាយរៀង នៅថ្ងៃអាទិត្យ ទី៤ ខែមករា ឆ្នាំ ២០២៦ នៅពហុកីឡដ្ឋានជាតិមរតកតេជោ។ ពួកគេត្រូវធ្វើការធ្ងន់មែនទែនជាមួយក្រុមខ្លាងដែលកំពុងមានមហិច្ឆតាក្នុងការបន្តឈរលើកំពូលតារាង។ ព្រះខ័នរាជស្វាយរៀង ត្រូវការពិន្ទុជាចាំបាច់ បន្ទាប់ពីចាញ់ បឹងកេត ហើយ វិសាខា ក៏ត្រូវការពិន្ទុជាចាំបាច់ដើម្បីឱកាសប្រជែងក្រុមកំពូលទាំង ៦។

ប្រសិន វិសាខា ធ្វើមិនបានល្អទៀតនោះ រឹតតែធ្វើឲ្យពួកគេមានឱកាសស្តួចស្តើងក្នុងការប្រជែងយកក្រុមលំដាប់កំពូលទាំង ៦ ដើម្បីប្រជើងឯកនៅជុំទី៣ ពីព្រោះពួកគេនៅជួបដៃគូខ្លាំងៗទៀតដូចជា បឹងកេត ភ្នំពេញក្រោន ណាហ្គាវើលដ៍ និងអង្គរថាយហ្គឺរ ជាដើម។

គូប្រកួតរបស់ វិសាខា ដែលនៅសល់

Vs ព្រះខ័នរាជស្វាយរៀង ថ្ងៃទី៤ មករា ២០២៦
Vs គិរីវង់សុខសែនជ័យ ថ្ងៃទី១១ មករា ២០២៦
Vs អាយអេសយអាយ ដង្កោសែនជ័យ ថ្ងៃទី១៧ មករា ២០២៦
Vs ណាហ្គាវើលដ៍ ថ្ងៃទី២៥ មកករា ២០២៦
Vs អង្គរថាយហ្គឺរ ថ្ងៃទី៣១ មករា ២០២៦
Vs បឹងកេត ថ្ងៃទី៨ កុម្ភៈ ២០២៦
Vs ភ្នំពេញក្រោន ថ្ងៃទី២១ កុម្ភៈ ២០២៦

អត្ថបទ៖ វិរបុត្រ

The post វិសាខា ប្រឈមអត់បានឡើង Top 6 បើនៅតែធ្វើមិនបានល្អ ខណៈ ប៉ះ ព្រះខ័នរាជស្វាយរៀង ថ្ងៃអាទិត្យនេះ appeared first on Kampuchea Thmey Daily.

តើ វិសាខា អាចបញ្ចប់កំណត់ត្រា ៣-០ របស់ ព្រះខ័នរាជស្វាយរៀង បានទេថ្ងៃអាទិត្យនេះ?

chean virakbot — Wed, 10 Sep 2025 04:40:16 +0000

ការប្រកួតលីគបាល់ទាត់កំពូលកម្ពុជា បានវិលត្រឡប់មកវិញចុងសប្តាហ៍នេះ បន្ទាប់ពីឈប់សម្រាកក្នុងថ្ងៃ FIFA Day ហើយជំនួបរវាងម្ចាស់ផ្ទះ វិសាខា និង ព្រះខ័នរាជស្វាយរៀង ជាគូគួរឲ្យចាប់អារម្មណ៍ជាងគេ។

ក្រុមព្រះខ័នរាជស្វាយរៀង រដូវកាលនេះ

វិសាខា បើកទ្វារកីឡដ្ឋានព្រីនស៍របស់ខ្លួន វេលាម៉ោង ៦ ល្ងាច ថ្ងៃអាទិត្យ ទី១៤ ខែកញ្ញា ឆ្នាំ ២០២៥ ទទួលក្រុមខ្លាំង ព្រះខ័នរាជស្វាយរៀង សម្រាប់ការប្រកួតសប្តាហ៍ទី៤ នៃលីគបាល់ទាត់កំពូលកម្ពុជា។

នេះជាជំនួបធំគួរឲ្យចាប់អារម្មណ៍ប្រចាំសប្តាហ៍ ប៉ុន្តែបើក្រឡេកមើលស្ថិតិនៃការប្រកួតលីគរដូវកាលថ្មីនេះ វិសាខា មិនទាន់មានអ្វីគួរឲ្យភ្ញាក់ផ្អើលទេ។ សប្តាហ៍បើកឆាក វិសាខា បានចាញ់ កងយោធពលខេមរភូមិន្ទ ១-២ នៅស្តាតចាស់ ប៉ុន្តែរកបាន ៣ ពិន្ទុ តាមរយៈជ័យជម្នះ ៣-២ លើក្រុម ឡាយហ្វ ព្រះសីហនុ នៅដីរបស់ខ្លួនសម្រាប់សប្តាហ៍ទី២ ហើយស្មើ ១-១ ជាមួយ អឹមអូអាយ កំពង់ដេវ៉ា ក្នុងសប្តាហ៍ទី៣។

ក្រុមវិសាខា រដូវកាលនេះ

ដូច្នេះ វិសាខា មាន ៤ ពិន្ទុ កំពុងឈរលេខ ៤ នៃតារាងពិន្ទុ ប្រៀបធៀបនឹង ព្រះខ័នរាជស្វាយរៀង មាន ៩ ពិន្ទុ កំពុងឈរលើកំពូលតារាង។ ព្រះខ័នរាជស្វាយរៀង បានបង្កើតកំណត់ត្រាល្អឥតខ្ចោះដោយឈ្នះដៃគូដោយលទ្ធផល ៣-០ ចំនួន ៤ ប្រកួតជាប់គ្នាគឺ ៣ លើកក្នុងលីគកំពូលកម្ពុជា លើ ណាហ្គាវើលដ៍ អង្គរថាយហ្គឺរ និង បឹងកេត ហើយ ១ ទៀត លើ Shan United ក្នុងពាន ASEAN Club Championship។

បើក្រឡេកមើលប្រវត្តិជួបគ្នា វិសាខា ជាក្រុមមួយដែលបានធ្វើឲ្យ ព្រះខ័នរាជស្វាយរៀង ជួបការលំបាក។ គិតពីឆ្នាំ ២០២៤ វិសាខា ធ្លាប់បានឈ្នះ ព្រះខ័នរាជស្វាយរៀង ២ លើកក្នុងចំណោម ការជួបគ្នា ៦ លើកចុងក្រោយ។

ប្រធានក្រុមទាំងពីរជួបគ្នារដូវកាលមុន

សរុបជួបគ្នា ២០ លើក ទាំងការប្រកួតក្នុងលីគ ពានសម្តេចតេជោ និងមិត្តភាព ព្រះខ័នរាជស្វាយរៀង បានឈ្នះ ៩ លើក ហើយ វិសាខា បានឈ្នះ ៨ លើក និងស្មើគ្នា ៣ លើក។ ព្រះខ័នរាជស្វាយរៀង ស៊ុតចូល ៣២ គ្រាប់ ខណៈ វិសាខា ស៊ុតចូល ២៤ គ្រាប់។

អ្វីដែលគួរឲ្យកត់សំគាល់ វិសាខា បានឈ្នះ ព្រះខ័នរាជស្វាយរៀង ក្នុងដីខ្លួនឯងតែ ៣ លើកប៉ុណ្ណោះ ប៉ុន្តែឈ្នះ ក្រៅដី រហូតដល់ ៥ លើក។ ចំណែក ព្រះខ័នរាជស្វាយរៀង បានឈ្នះក្នុងដីខ្លួនឯង ៥ លើក និងឈ្នះក្រៅដី ៤ លើក។

ក្រុមទាំងពីរប៉ះគ្នារដូវកាលមុន

អ្នកគាំទ្រចង់ឃើញថា តើ វិសាខា អាចបញ្ចប់កំណត់ត្រារបស់ ព្រះខ័នរាជស្វាយរៀង បានឬទេ? ឬមួយ ព្រះខ័នរាជស្វាយរៀង បន្តកំណត់ត្រាសម្រាប់ការឈ្នះលើដៃគូ ៣-០ ជាលើកទី៥? ចម្លើយគឺមានតែយប់ថ្ងៃអាទិត្យ ទី១៤ ខែកញ្ញានេះ នៅកីឡដ្ឋានព្រីនស៍៕

អត្ថបទ៖ វីរបុត្រ

The post តើ វិសាខា អាចបញ្ចប់កំណត់ត្រា ៣-០ របស់ ព្រះខ័នរាជស្វាយរៀង បានទេថ្ងៃអាទិត្យនេះ? appeared first on Kampuchea Thmey Daily.

វិសាខា អស់ឱកាសវគ្គផ្តាច់ព្រ័ត្រ ក្រោយចាញ់ Ho Chi Minh City ២-៣ ពានប៉ូលិសអន្តរជាតិ នៅវៀតណាម

chean virakbot — Fri, 29 Aug 2025 11:42:11 +0000

ក្រុមបាល់ទះ វិសាខា អស់ឱកាសបានឡើងទៅកាន់វគ្គផ្តាច់ព្រ័ត្រ ពានរង្វាន់ប៉ូលិសអន្តរជាតិ នៅប្រទេសវៀតណាម បន្ទាប់ពីចាញ់ក្រុមម្ចាស់ផ្ទះវៀតណាម Ho Chi Minh City Police នៅវគ្គពាក់កណ្តាលផ្តាច់ព្រ័ត្រ ដោយលទ្ធផល ២-៣ នៅថ្ងៃទី២៩ ខែសីហា ឆ្នាំ ២០២៥។

វិសាខា បាននាំមុខពីរសិតដំបូង គឺសិតទី១ ក្រុមវិសាខា បានយកឈ្នះដោយពិន្ទុ ២៥-១៥, សិតទី២បានយកឈ្នះដោយពិន្ទុ ២៥-២០ ប៉ុន្តែចាញ់ ៣សិតចុងក្រោយ គឺសិតទី៣ ចាញ់ ២១-២៥, សិតទី៤ ចាញ់ ២៣-២៥ និងសិតទី៥ ចាញ់ ១២-១៥។

២សិតដំបូង វិសាខា ធ្វើបានយ៉ាងល្អ ប៉ុន្តែចាប់ពីសិតទី៣ទៅ អ្នកប៉ះសេ សួន ចាន់ណារ៉ូ មានបញ្ហារបួសដែលធ្វើឲ្យការប្រកួតមិនល្អសម្រាប់៣សិតចុងក្រោយ៕

នៅវគ្គផ្តាច់ព្រ័ត្រ នៅថ្ងៃទី៣០ ខែសីហា ឆ្នាំ ២០២៥ វិសាខា នឹងត្រូវជួបក្រុមឥណ្ឌូណេស៊ី Jakarta Bhayangkara ឬ ក្រុមវៀតណាម The Cong-Tan Cang៕

អត្ថបទ៖ វីរបុត្រ

The post វិសាខា អស់ឱកាសវគ្គផ្តាច់ព្រ័ត្រ ក្រោយចាញ់ Ho Chi Minh City ២-៣ ពានប៉ូលិសអន្តរជាតិ នៅវៀតណាម appeared first on Kampuchea Thmey Daily.

វិសាខា ឈរលើកំពូលតារាង ឡើងវគ្គ ៤ ក្រុម ក្រោយឈ្នះក្រុមប៉ូលិសឡាវ ៣-០

chean virakbot — Wed, 27 Aug 2025 08:09:48 +0000

ក្រុមបាល់ទះ វិសាខា តំណាងឲ្យក្រសួងមហាផ្ទៃ នៃព្រះរាជាណាចក្រកម្ពុជា បានឡើងទៅកាន់វគ្គពាក់កណ្តាលផ្តាច់ព្រ័ត្រ បន្ទាប់ពីបានយកឈ្នះក្រុមបាល់ទះប៉ូលិសឡាវ (Lao Ministry of Public Security) ដោយលទ្ធផល ៣-០ សម្រាប់ការប្រកួតកីឡាបាល់ទះពានប៉ូលិសអន្តរជាតិ នៅប្រទេសវៀតណាម។

សម្រាប់ការប្រកួតនេះ ក្រុមវិសាខា មិនពិបាកយកឈ្នះលើក្រុមឡាវឡើយ ដោយបានយកឈ្នះក្នុងលទ្ធផល ៣-០។ សិតទី១ វិសាខា បានយកឈ្នះដោយពិន្ទុដាច់ឆ្ងាយ ២៥-១២ ប៉ុន្តែនៅសិតទី២ រាងពិបាកបន្តិចដោយបានឈ្នះក្នុងលទ្ធផល ២៥-២២ និងសិតទី៣ គ្រូដាក់កីឡាករកម្រិត B សុទ្ធឲ្យលេងដោយបានយកឈ្នះដោយពិន្ទុ ២៥- ២០។

នេះជាជ័យជម្នះលើកទី២ បន្ទាប់ពីបានឈ្នះការប្រកួតលើកទី១លើក្រុមរបស់ម្ចាស់ផ្ទះវៀតណាម The Cong-Tan Cang ដោយលទ្ធផល ៣-១ កាលពីម្សិលមិញ ទី២៦ ខែសីហា ឆ្នាំ ២០២៥។ ដូច្នេះ វិសាខា ឈ្នះទាំងពីរប្រកួត រកបាន៦ពិន្ទុ ឈរលើកំពូលតារាងពូល A និងបានឡើងទៅកាន់វគ្គពាក់កណ្តាលផ្តាច់ព្រ័ត្រ។

នៅថ្ងៃទី២៨ ខែសីហា ក្រុមវិសាខា គ្មានការប្រកួតទេ ប៉ុន្តែក្រុមផ្សេងត្រូវប្រកួតបញ្ចប់វគ្គសន្សំពិន្ទុក្នុងពូល A និង B។ នៅថ្ងៃទី២៩ ខែសីហា ទើប វិសាខា មានការប្រកួតវគ្គពាក់កណ្តាលផ្តាច់ព្រ័ត្រ៕

អត្ថបទ៖ វីរបុត្រ

The post វិសាខា ឈរលើកំពូលតារាង ឡើងវគ្គ ៤ ក្រុម ក្រោយឈ្នះក្រុមប៉ូលិសឡាវ ៣-០ appeared first on Kampuchea Thmey Daily.

ថ្ងៃបើកឆាក វិសាខា ឈ្នះ ក្រុមវៀតណាម Cong-Tan Cang ៣-១ ពានប៉ូលិសអន្តរជាតិ

chean virakbot — Tue, 26 Aug 2025 09:02:22 +0000

ក្រុមបាល់ទះ វិសាខា ទទួលបានជ័យជម្នះដោយលទ្ធផល ៣-១ លើក្រុមរបស់វៀតណាម The Cong-Tan Cang សម្រាប់ការប្រកួតទី១ ពានប៉ូលិសអន្តរជាតិ International Police Cup ថ្ងៃទី២៦ ខែសីហា ឆ្នាំ ២០២៥ នៅប្រទេសវៀតណាម។

សិតទី១ ក្រុមវិសាខា បានយកឈ្នះ ដោយពិន្ទុ ២៨-២៦, សិតទី២ បានយកឈ្នះដោយពិន្ទុ ២៥-២៣។ នៅសិតទី៣ ក្រុម វៀតណាម បានឈ្នះដោយពិន្ទុ ២៦-២៤ បានយកឈ្នះដោយពិន្ទុ ប៉ុន្តែសិតទី៤ វិសាខា បានយកឈ្នះ ២៥-២១។

នៅថ្ងៃទី២៧ ខែសីហា ស្អែកវេលាម៉ោង២រសៀល ក្រុម វិសាខា បន្តការប្រកួតជាមួយក្រុមបាល់ទះនៃក្រសួងសន្តិសុខសាធារណៈរបស់ប្រទេសឡាវ។ ក្រុមវិសាខា ស្ថិតនៅពូល A ដែលមាន ៣ ក្រុមគឺ ក្រុមរបស់វៀតណាម និងក្រុមរបស់ ឡាវ។ ចំណែកពូល B មានក្រុមម្ចាស់ផ្ទះវៀតណាម ២ និង១ក្រុមទៀតមកពីប្រទេសឥណ្ឌូណេស៊ី៕

The post ថ្ងៃបើកឆាក វិសាខា ឈ្នះ ក្រុមវៀតណាម Cong-Tan Cang ៣-១ ពានប៉ូលិសអន្តរជាតិ appeared first on Kampuchea Thmey Daily.

គ្រូថ្មីរបស់ វិសាខា មើលការប្រកួតលីគកម្ពុជា ជាង៥០ លើក ទើបមកដឹកនាំក្លិបកម្ពុជា

chean virakbot — Sat, 28 Jun 2025 00:23:00 +0000

លោក Gerard Jones គ្រូបង្គោលថ្មីរបស់ក្លិបបាល់ទាត់ វិសាខា បានតាមដានយ៉ាងយកចិត្តទុកដាក់ពីការប្រកួតនៅក្នុងលីគបាល់ទាត់កំពូលកម្ពុជា មុនពេលលោកសម្រេចចិត្តចូលមកដឹកនាំក្លិបវិសាខា។

លោក ហុក សុចិត្រា និងលោក Gerard Jones

នៅក្នុងបទសម្ភាស ក្រោយចប់ពិធីចាប់ឆ្នោតលីគកម្ពុជារដូវកាលថ្មី លោក Gerard Jones បានរៀបរាប់ថា ៖«លីគបាល់ទាត់កម្ពុជាមានកម្រិតស្តង់ដាល្អ។ ខ្ញុំពិតជាចាប់អារម្មណ៍ខ្លាំងមែនទែន។ តាមពិតទៅ ខ្ញុំបានមើលច្រើនណាស់កាលពីឆ្នាំមុន។ ខ្ញុំមានរបៀបផ្ទាល់ខ្លួនរបស់ខ្ញុំដោយបានបានមើលការប្រកួត ៥៥ លើក។ វាជាការប្រកួតដ៏ច្រើន ជាពិសេសខ្ញុំផ្តោតលើការប្រកួតរបស់ វិសាខា»។

បន្ទាប់ពីចូលខ្លួនមកដឹកនាំក្លិប វិសាខា បុរសញ្ជាតិអង់គ្លេសវ័យ ៣៥ ឆ្នាំ ចាត់ទុកថា ខ្លួនមានសំណាងដែលមានក្រុមការងារដ៏ល្អរបស់ក្លិបនៅជាមួយលោក ហើយឆ្នាំនេះសង្ឃឹមនឹងមានអ្វីកាន់តែពិសេសសម្រាប់ក្លិប។ លោកពិតជាចាប់អារម្មណ៍ខ្លាំងអំពីថ្នាក់ដឹកនាំ និងហេដ្ឋារចនាសម្ព័ន្ធរបស់ក្លិប។

លោក Gerard Jones ផ្តល់បទសម្ភាស

លោកបានលើកឡើងថា ៖«ក្លិបកំពុងអភិវឌ្ឍថ្នាលយុវជនដ៏អស្ចារ្យ។ យើងមានកីឡាករវ័យក្មេងល្អ។ ខ្ញុំពិតជាចាប់អារម្មណ៍កីឡាករវ័យក្មេងរបស់កម្ពុជា។ ជាក្លិបដែលមានកម្រិតស្តង់ដា។ អ្នកគាំទ្រនឹងបានឃើញផែនការច្រើនទៀតរបស់វិសាខា»។

នៅពេលសួរថា អ្វីជាផែនការរបស់លោកសម្រាប់ការដឹកនាំវិសាខានៅរដូវកាលទីមួយ? លោកឆ្លើយថា ឈ្នះជើងឯកលីគគឺជាគោលដៅ និងទទួលបានកៅអីលេងពានរង្វាន់អន្តរជាតិ។

លោកបន្តថា វាពិតជាមិនគួរឲ្យជឿ ក្លិបព្រះខ័នរាជស្វាយរៀងតំណាងក្លិបបាល់ទាត់កម្ពុជាឈានដល់វគ្គផ្តាច់ព្រ័ត្រ ពានរង្វាន់ AFC Challenge League។ លោកបានទៅទស្សនា ថ្ងៃប្រកួតវគ្គផ្តាច់ព្រ័ត្រដែលមានមនុស្សទៅមើលផ្ទាល់ច្រើនស្ទើរមិនគួរឲ្យជឿ។ ក្លិបភ្នំពេញក្រោន និង វិសាខា ក៏បានរួមចំណែកនៅក្នុងពានរង្វាន់អន្តរជាតិនេះដែរកន្លងមក។

លោក Gerard Jones និងតំណាងក្លិប កងយោធពលខេមរភូមិន្ទ

«ខ្ញុំគិតថា នេះជាជោគជ័យកំពុងបន្ត។ នៅឆ្នាំក្រោយ យើងនឹងទទួលបានកៅអីបន្ថែមទៀត។ ក្នុងនោះ វិសាខា ក៏នឹងមានដែរ។ យើងនឹងបន្តលើកកម្ពស់ស្តង់ដាលីគ។ ខ្ញុំគិតថា បាល់ទាត់កម្ពុជាកំពុងស្ថិតនៅក្នុងចំណាត់ថ្នាក់មានគុណភាពដែលនឹងចេះតែបន្តកើនឡើងខ្ពស់ជាលំដាប់»។ លោក Gerard Jones បានសង្កត់ធ្ងន់។

លោក Gerard Jones មានបទពិសោធច្រើនរាប់ចាប់តាំងពីតួនាទីជាគ្រូឧទ្ទេស ជំនួយការគ្រូបង្វឹក និងគ្រូបង្គោល ពីឆ្នាំ២០១១ រហូតដល់ឆ្នាំ២០២៥។ ពីឆ្នាំ២០១៨ ដល់ ២០២៤ លោកជាគ្រូឧទ្ទេសរបស់សហព័ន្ធកីឡាបាល់ទាត់អាមេរិក និងជានាយកបណ្តុះបណ្តាលគ្រូបង្វឹកក្លិប Sporting Kansas City ពីឆ្នាំ២០២២ ដល់ ២០២៥៕

អត្ថបទ៖ វីរបុត្រ

The post គ្រូថ្មីរបស់ វិសាខា មើលការប្រកួតលីគកម្ពុជា ជាង៥០ លើក ទើបមកដឹកនាំក្លិបកម្ពុជា appeared first on Kampuchea Thmey Daily.

វិសាខា តាមជិតទាន់ពិន្ទុ ភ្នំពេញក្រោន ខណៈគម្លាត៥ពិន្ទុពីក្រុមកំពូលតារាង

chean virakbot — Mon, 07 Apr 2025 01:14:59 +0000

ក្លិបបាល់ទាត់ វិសាខា បានបន្តកំណត់ត្រាមិនចាញ់ក្រោមការដឹកនាំរបស់លោកគ្រូបង្វឹក Akeep Tunji Ayoyinka បន្ទាប់ពីបានយកឈ្នះម្ចាស់ផ្ទះ អង្គរថាយហ្គឺរ ដោយលទ្ធផល ៣-២ ក្នុងសប្តាហ៍ទី២៧ នៃលីគកំពូលកម្ពុជា រដូវកាល២០២៤-២៥។

តាមរយៈជ័យជម្នះនេះ វិសាខា មាន៥៩ពិន្ទុ ដែលតាមពីក្រោយ១ពិន្ទុប៉ុណ្ណោះ ពីក្រុមចំណាត់ថ្នាក់លេខ២ ភ្នំពេញក្រោន ដែលមាន៦០ពិន្ទុ ហើយតាមពីក្រោយ៥ពិន្ទុទៅនឹងក្រុមចំណាត់ថ្នាក់លេខ១ ព្រះខ័នរាជស្វាយរៀង ដែលមាន៦៤ពិន្ទុ។ ការតាមជិតទាន់ពិន្ទុភ្នំពេញក្រោននេះ បន្ទាប់ពីភ្នំពេញក្រោន បានចាញ់ក្រុម ព្រះខ័នរាជស្វាយរៀង ដោយលទ្ធផល ០-២ កាលពីថ្ងៃសៅរ៍ ទី៥ ខែមេសា ឆ្នាំ២០២៥។

ក្រុមចំណាត់ថ្នាក់លេខ១ លេខ២ និងលេខ៣ មានឱកាសឈ្នះជើងឯកដូចគ្នា ប៉ុន្តែក្រុមការពារតំណែងជើងឯកឆ្នាំចាស់ ព្រះខ័នរាជស្វាយរៀង មានភាគរយច្រើនជាងដោយសារមានពិន្ទុនាំមុខច្រើនជាងគេ។ សម្រាប់ការប្រកួតជើងទី១ វគ្គក្រុមលំដាប់កំពូលទាំង៦បានបញ្ចប់ហើយ ដូច្នេះក្រុមនីមួយៗនៅសល់តែ៥ប្រកួតតែប៉ុណ្ណោះនឹងបញ្ចប់លីគរដូវកាលនេះ។

រហូតដល់ពេលនេះ លោក Ayoyinka បានដឹកនាំវិសាខា ចំនួន៧ប្រកួតហើយក្នុងលីគ គឺឈ្នះទាំងអស់ ក្នុងនោះឈ្នះ គិរីវង់សុខសែនជ័យ ២-១, ឈ្នះ បឹងកេត ២-០, ឈ្នះ ភ្នំពេញក្រោន ២-១, ឈ្នះ ណាហ្គាវើលដ៍ ១-០, ឈ្នះព្រះខ័នរាជស្វាយរៀង ២-១, ឈ្នះ បឹងកេត ៣-១ និងឈ្នះអង្គរថាយហ្គឺរ ៣-១។ និយាយរួម ក្រុមលំដាប់កំពូលទាំង៦សុទ្ធតែចាញ់វិសាខាទាំងអស់នារយៈពេលចុងក្រោយ៕

អត្ថបទ៖ វីរបុត្រ

The post វិសាខា តាមជិតទាន់ពិន្ទុ ភ្នំពេញក្រោន ខណៈគម្លាត៥ពិន្ទុពីក្រុមកំពូលតារាង appeared first on Kampuchea Thmey Daily.

វិសាខា Archives - Kampuchea Thmey Daily

ព្រះ​ខ័ន​រាជ​ស្វាយរៀង ឬ វិសាខា ជា​ជើង​ឯក​ពាន​សម្តេច​តេជោ ថ្ងៃអាទិត្យ​នេះ?

វិសាខា ប្រឈម​អត់​បាន​ឡើង Top 6 បើ​នៅ​តែ​ធ្វើ​មិន​បាន​ល្អ ​ខណៈ​ ប៉ះ ព្រះ​ខ័ន​រាជ​ស្វាយរៀង ថ្ងៃ​អាទិត្យ​នេះ

តើ​ វិសាខា អាច​បញ្ចប់​កំណត់​ត្រា ៣-០ របស់ ព្រះ​ខ័ន​រាជ​ស្វាយរៀង បានទេ​ថ្ងៃ​អាទិត្យ​នេះ?

វិសាខា អស់​ឱកាស​វគ្គ​ផ្តាច់​ព្រ័ត្រ ក្រោយ​ចាញ់​ Ho Chi Minh City ២-៣ ពាន​ប៉ូលិសអន្តរជាតិ នៅ​វៀតណាម

វិសាខា ឈរលើ​កំពូល​តារាង ឡើង​វគ្គ ៤ ក្រុម​ ក្រោយ​ឈ្នះ​ក្រុមប៉ូលិសឡាវ ៣-០

ថ្ងៃ​បើក​ឆាក វិសាខា ឈ្នះ ក្រុម​វៀតណាម Cong-Tan Cang ៣-១ ពាន​ប៉ូលិសអន្តរជាតិ

គ្រូ​ថ្មីរបស់ ​វិសាខា មើល​ការ​ប្រកួត​លីគ​កម្ពុជា ជាង​៥០​ លើក ទើប​​មកដឹក​នាំ​ក្លិប​កម្ពុជា

វិសាខា តាមជិត​ទាន់​ពិន្ទុ ភ្នំពេញក្រោន ខណៈ​គម្លាត​៥​ពិន្ទុ​ពី​ក្រុម​កំពូល​តារាង

ព្រះខ័នរាជស្វាយរៀង ឬ វិសាខា ជាជើងឯកពានសម្តេចតេជោ ថ្ងៃអាទិត្យនេះ?

វិសាខា ប្រឈមអត់បានឡើង Top 6 បើនៅតែធ្វើមិនបានល្អ ខណៈ ប៉ះ ព្រះខ័នរាជស្វាយរៀង ថ្ងៃអាទិត្យនេះ

តើ វិសាខា អាចបញ្ចប់កំណត់ត្រា ៣-០ របស់ ព្រះខ័នរាជស្វាយរៀង បានទេថ្ងៃអាទិត្យនេះ?

វិសាខា អស់ឱកាសវគ្គផ្តាច់ព្រ័ត្រ ក្រោយចាញ់ Ho Chi Minh City ២-៣ ពានប៉ូលិសអន្តរជាតិ នៅវៀតណាម

វិសាខា ឈរលើកំពូលតារាង ឡើងវគ្គ ៤ ក្រុម ក្រោយឈ្នះក្រុមប៉ូលិសឡាវ ៣-០

ថ្ងៃបើកឆាក វិសាខា ឈ្នះ ក្រុមវៀតណាម Cong-Tan Cang ៣-១ ពានប៉ូលិសអន្តរជាតិ

គ្រូថ្មីរបស់ វិសាខា មើលការប្រកួតលីគកម្ពុជា ជាង៥០ លើក ទើបមកដឹកនាំក្លិបកម្ពុជា

វិសាខា តាមជិតទាន់ពិន្ទុ ភ្នំពេញក្រោន ខណៈគម្លាត៥ពិន្ទុពីក្រុមកំពូលតារាង