កីឡា

តើ វិសាខា អាចបញ្ចប់កំណត់ត្រា ៣-០ របស់ ព្រះខ័នរាជស្វាយរៀង បានទេថ្ងៃអាទិត្យនេះ?

បានផុស

១០ ខែ មុន

នៅ

ថ្ងៃពុធ ១០ កញ្ញា ២០២៥

ដោយ

ការប្រកួតលីគបាល់ទាត់កំពូលកម្ពុជា បានវិលត្រឡប់មកវិញចុងសប្តាហ៍នេះ បន្ទាប់ពីឈប់សម្រាកក្នុងថ្ងៃ FIFA Day ហើយជំនួបរវាងម្ចាស់ផ្ទះ វិសាខា និង ព្រះខ័នរាជស្វាយរៀង ជាគូគួរឲ្យចាប់អារម្មណ៍ជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វិសាខា បើកទ្វារកីឡដ្ឋានព្រីនស៍របស់ខ្លួន វេលាម៉ោង ៦ ល្ងាច ថ្ងៃអាទិត្យ ទី១៤ ខែកញ្ញា ឆ្នាំ ២០២៥ ទទួលក្រុមខ្លាំង ព្រះខ័នរាជស្វាយរៀង សម្រាប់ការប្រកួតសប្តាហ៍ទី៤ នៃលីគបាល់ទាត់កំពូលកម្ពុជា។

នេះជាជំនួបធំគួរឲ្យចាប់អារម្មណ៍ប្រចាំសប្តាហ៍ ប៉ុន្តែបើក្រឡេកមើលស្ថិតិនៃការប្រកួតលីគរដូវកាលថ្មីនេះ វិសាខា មិនទាន់មានអ្វីគួរឲ្យភ្ញាក់ផ្អើលទេ។ សប្តាហ៍បើកឆាក វិសាខា បានចាញ់ កងយោធពលខេមរភូមិន្ទ ១-២ នៅស្តាតចាស់ ប៉ុន្តែរកបាន ៣ ពិន្ទុ តាមរយៈជ័យជម្នះ ៣-២ លើក្រុម ឡាយហ្វ ព្រះសីហនុ នៅដីរបស់ខ្លួនសម្រាប់សប្តាហ៍ទី២ ហើយស្មើ ១-១ ជាមួយ អឹមអូអាយ កំពង់ដេវ៉ា ក្នុងសប្តាហ៍ទី៣។

ដូច្នេះ វិសាខា មាន ៤ ពិន្ទុ កំពុងឈរលេខ ៤ នៃតារាងពិន្ទុ ប្រៀបធៀបនឹង ព្រះខ័នរាជស្វាយរៀង មាន ៩ ពិន្ទុ កំពុងឈរលើកំពូលតារាង។ ព្រះខ័នរាជស្វាយរៀង បានបង្កើតកំណត់ត្រាល្អឥតខ្ចោះដោយឈ្នះដៃគូដោយលទ្ធផល ៣-០ ចំនួន ៤ ប្រកួតជាប់គ្នាគឺ ៣ លើកក្នុងលីគកំពូលកម្ពុជា លើ ណាហ្គាវើលដ៍ អង្គរថាយហ្គឺរ និង បឹងកេត ហើយ ១ ទៀត លើ Shan United ក្នុងពាន ASEAN Club Championship។

បើក្រឡេកមើលប្រវត្តិជួបគ្នា វិសាខា ជាក្រុមមួយដែលបានធ្វើឲ្យ ព្រះខ័នរាជស្វាយរៀង ជួបការលំបាក។ គិតពីឆ្នាំ ២០២៤ វិសាខា ធ្លាប់បានឈ្នះ ព្រះខ័នរាជស្វាយរៀង ២ លើកក្នុងចំណោម ការជួបគ្នា ៦ លើកចុងក្រោយ។

សរុបជួបគ្នា ២០ លើក ទាំងការប្រកួតក្នុងលីគ ពានសម្តេចតេជោ និងមិត្តភាព ព្រះខ័នរាជស្វាយរៀង បានឈ្នះ ៩ លើក ហើយ វិសាខា បានឈ្នះ ៨ លើក និងស្មើគ្នា ៣ លើក។ ព្រះខ័នរាជស្វាយរៀង ស៊ុតចូល ៣២ គ្រាប់ ខណៈ វិសាខា ស៊ុតចូល ២៤ គ្រាប់។

អ្វីដែលគួរឲ្យកត់សំគាល់ វិសាខា បានឈ្នះ ព្រះខ័នរាជស្វាយរៀង ក្នុងដីខ្លួនឯងតែ ៣ លើកប៉ុណ្ណោះ ប៉ុន្តែឈ្នះ ក្រៅដី រហូតដល់ ៥ លើក។ ចំណែក ព្រះខ័នរាជស្វាយរៀង បានឈ្នះក្នុងដីខ្លួនឯង ៥ លើក និងឈ្នះក្រៅដី ៤ លើក។

អ្នកគាំទ្រចង់ឃើញថា តើ វិសាខា អាចបញ្ចប់កំណត់ត្រារបស់ ព្រះខ័នរាជស្វាយរៀង បានឬទេ? ឬមួយ ព្រះខ័នរាជស្វាយរៀង បន្តកំណត់ត្រាសម្រាប់ការឈ្នះលើដៃគូ ៣-០ ជាលើកទី៥? ចម្លើយគឺមានតែយប់ថ្ងៃអាទិត្យ ទី១៤ ខែកញ្ញានេះ នៅកីឡដ្ឋានព្រីនស៍៕

អត្ថបទ៖ វីរបុត្រ