ទូរទស្សន៍ RT បានដកស្រង់សម្តី រដ្ឋមន្ត្រីក្រសួងការពារជាតិហូឡង់ លោកស្រី Dilan Yesilgoz-Zegerius ដែលថ្លែងនៅខាងក្រៅ កិច្ចប្រជុំកំពូលអង្គការណាតូ ក្នុងទីក្រុងអង់ការ៉ា នៃប្រទេសតួកគី កាលពីថ្ងៃអង្គារ ទី៧ ខែកក្កដា ឆ្នាំ២០២៦ ថា៖ «យើងមិនមានលទ្ធភាព ជួយអ៊ុយក្រែនទៀតទេ ពីព្រោះ យើងជួយជ្រោមជ្រែងច្រើនណាស់មកហើយ»។

ទន្ទឹមនោះ នៅពេលត្រូវបានអ្នកកាសែតសួរ អំពីថាតើ ប្រទេសហូឡង់ អាចផ្តល់គ្រាប់មីស៊ីល Patriot ដែលផលិតដោយអាមេរិក បន្ថែមទៀត ទៅឲ្យទីក្រុងកៀវ បានដែរឬទេ? លោកស្រី ឆ្លើយថា៖ «ដល់កំណត់ហើយ»។

រឿងនេះកើតឡើង ក្រោយពេលអ៊ុយក្រែន ប្រកាសខ្វះប្រព័ន្ធការពារដែនអាកាស ធ្វើឲ្យមីស៊ីលរុស្ស៊ី ជាង ២០គ្រាប់ ហោះបុកចូលទីក្រុងកៀវ សម្លាប់មនុស្ស ២៣នាក់។

តាមការបញ្ជាក់ពីកងទ័ពអាកាសអ៊ុយក្រែន នៅថ្ងៃអង្គារ ទី៧ ខែកក្កដា ឆ្នាំ២០២៦, ក្នុងវាយប្រហារកាលពីថ្ងៃអាទិត្យ មីស៊ីលបាលីស្ទិករុស្ស៊ី ចំនួន ២៣គ្រាប់ បានហោះចូលរដ្ឋធានីកៀវ ទាំងដែលគ្មានមីស៊ីលណាមួយ ត្រូវស្ទាក់ចាប់បានសោះ។

អ្នកនាំពាក្យកងទ័ពអាកាសអ៊ុយក្រែន លោក Yurii Ihnat ត្រូវបានដកស្រង់សម្តីដោយ BBC ដែលថ្លែងថា ការខ្វះខាតយ៉ាងធ្ងន់ធ្ងរ នៃប្រព័ន្ធស្ទាក់ចាប់ Patriot  ប្រភេទ PAC-2 និង PAC-3 បានធ្វើឲ្យរដ្ឋធានីកៀវ ធ្លាក់ក្នុងស្ថានភាពងាយរងគ្រោះទាំងស្រុង ចំពោះការវាយប្រហារ តាមផ្លូវអាកាសដោយគ្រាប់មីស៊ីលបាលីស្ទិក។

និយាយពីហូឡង់វិញ បើយោងតាមការប៉ាន់ប្រមាណរបស់សារព័ត៌មាន Bloomberg, ប្រទេសនេះ ដំបូងឡើយ បានចំណាយថវិកា ប្រហែល ១០.៤ ពាន់លានដុល្លារអាមេរិក លើជំនួយយោធាដល់អ៊ុយក្រែន ហើយ ប្តេជ្ញាផ្តល់បន្ថែមចំនួន ១១.៦ ពាន់លានអឺរ៉ូទៀត ប៉ុន្តែឥឡូវ ហូឡង់ បញ្ជាក់ច្បាស់ថា លែងមានថែមទៀតហើយ៕

អត្ថបទ៖ សុវណ្ណ

The post ហូឡង់ ប្រកាសលែងជួយអ៊ុយក្រែន ទៀតហើយ ក្នុងសង្គ្រាម ជាមួយរុស្ស៊ី appeared first on Kampuchea Thmey Daily.

តាមការបញ្ជាក់ពីកងទ័ពអាកាសអ៊ុយក្រែន នៅថ្ងៃអង្គារ ទី៧ ខែកក្កដា ឆ្នាំ២០២៦, ក្នុងវាយប្រហារកាលពីថ្ងៃអាទិត្យ មីស៊ីលបាលីស្ទិករុស្ស៊ី ចំនួន ២៣គ្រាប់ បានហោះចូលរដ្ឋធានីកៀវ ទាំងដែលគ្មានមីស៊ីលណាមួយ ត្រូវស្ទាក់ចាប់បានសោះ។

អ្នកនាំពាក្យកងទ័ពអាកាសអ៊ុយក្រែន លោក Yurii Ihnat ត្រូវបានដកស្រង់សម្តីដោយ BBC ដែលថ្លែងថា ការខ្វះខាតយ៉ាងធ្ងន់ធ្ងរ នៃប្រព័ន្ធស្ទាក់ចាប់ Patriot  ប្រភេទ PAC-2 និង PAC-3 បានធ្វើឲ្យរដ្ឋធានីកៀវ ធ្លាក់ក្នុងស្ថានភាពងាយរងគ្រោះទាំងស្រុង ចំពោះការវាយប្រហារ តាមផ្លូវអាកាសដោយគ្រាប់មីស៊ីលបាលីស្ទិក។

ក្រៅពីបណ្តាលឲ្យមានមនុស្សស្លាប់ហើយនោះ ចន្លោះប្រហោងទាំងនេះ បានក៏បណ្តាលឲ្យជនស៊ីវិល រាប់សិបនាក់ផ្សេងទៀត រងរបួស ផងដែរ ខណៈអគារស្នាក់នៅ ជាច្រើនខ្នង ត្រូវដួលរលំ។

យ៉ាងណា ទោះគ្មានសមត្ថភាពស្ទាប់ចាប់ មីស៊ីលបាលិស្ទិកបានមែន ប៉ុន្តែអ៊ុយក្រែន អះអាងពីការបាញ់ទប់ស្កាត់មីស៊ីលគ្រូស យ៉ាងច្រើនគ្រាប់ និងបាញ់ទម្លាក់ដ្រូន ៣២៦គ្រឿង ក្នុងចំណោម ៣៥១គ្រឿង អំឡុងការវាយប្រហារទ្រង់ទ្រាយធំ កាលពីចុងសប្តាហ៍។

ក្រោយការវាយប្រហារនោះភ្លាម ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានអំពាវនាវដល់សម្ព័ន្ធមិត្តទាំងឡាយ សុំឲ្យធ្វើការសម្រេចចិត្តយ៉ាងម៉ឺងម៉ាត់ អំឡុងកិច្ចប្រជុំកំពូលអង្គារណាតូ ដើម្បីផ្តល់ខែលការពារមីស៊ីលដល់ខ្លួន ព្រោះមិនអាចបណ្តែតបណ្តោយបានទៀតទេ។

សូមជម្រាបថា គិតត្រឹមដើមឆ្នាំ២០២៦ អ៊ុយក្រែនមានប្រព័ន្ធ Patriot ចន្លោះ ៦ ទៅ ៨ គ្រឿង។ ប្រព័ន្ធនេះ ប្រើប្រាស់គ្រាប់មីស៊ីលប្រភេទ PAC-3 ដើម្បីកម្ទេចមីស៊ីលបាលីស្ទិកល្បឿនលឿនរបស់រុស្ស៊ី ដូចជា Iskander-M និង Kinzhal។

អ៊ុយក្រែន ក៏មានប្រព័ន្ធមីស៊ីល SAMP/T  ផលិតដោយបារាំង-អ៊ីតាលី ១គ្រឿងផងដែរ ហើយបារាំង និងអ៊ីតាលី បានព្រមព្រៀងផ្គត់ផ្គង់ប្រព័ន្ធជំនាន់ថ្មី SAMP/T NG ចំនួន ៨ គ្រឿងបន្ថែមទៀត ដោយចាប់ផ្តើមចែកចាយបណ្តើរៗ ចាប់ពីឆ្នាំ២០២៦ នេះតទៅ ដើម្បីពង្រឹងសមត្ថភាពប្រឆាំងមីស៊ីលបាលីស្ទិក៕

អត្ថបទ៖ សុវណ្ណ

The post អ៊ុយក្រែន ប្រកាសខ្វះប្រព័ន្ធការពារដែនអាកាស ទើបធ្វើឲ្យមីស៊ីលរុស្ស៊ី ហោះបុកចូលទីក្រុងកៀវ សម្លាប់មនុស្ស ២៣នាក់ appeared first on Kampuchea Thmey Daily.

​​​​រយៈពេលចុង​ក្រោយ​នេះ ​​ដើម្បី​ពន្លឿន​ការ​ចរចា​ជាមួយ​រុស្ស៊ី ​រដ្ឋបាល​​របស់​​ប្រធានាធិ​បតី​ ដូណាល់ ត្រាំ របស់​សហរដ្ឋ​អាមេរិក បាន​បញ្ចេញ​​ផែនការ​​​​​​សន្តិភាព​​រវាង​​រុស្ស៊ី​និង​អ៊ុយក្រែន​​ដែល​មាន​​​២៨​ចំណុច​​ក្នុងដំណើរដែលគេជឿថា នឹង​បង្កើន​ការ​​​​ដាក់សម្ពាធ​​ឲ្យ​អ៊ុយក្រែន​​ទទួល​យក​​​​សម្រាប់​​​​​​ការកសាង​សន្តិភាព​ជាមួយរុស្ស៊ី។ ក្នុង​ផែនការ​​​​​សន្តិភាព​នោះ ​ចំណុច​ដែល​ចម្រូង​ចម្រាស​បំផុត​ គឹ​ការ​កាត់ដី​​​ឲ្យ​ភាគី​រុស្ស៊ី​​នៅតំបន់​ដុនបាស​ ដែលរុស្ស៊ី​​​គាំទ្រ​​ក្រុម​បំបែកខ្លួន​ប្រយុទ្ធ​តាំងពីឆ្នាំ​២០១៤​មកម្ល៉េះ​។

ជាការ​ឆ្លើយ​​តប​ចំពោះ​​​​ការលើក​ឡើង​ទាំងឡាយ ​ភាគី​​អ៊ុយក្រែន​បានធ្វើសេចក្តីថ្លែងការណ៍ខ្លាំងបំផុតរបស់ខ្លួន​ស្តីពីការចរចាសន្តិភាពដែលកំពុងបន្ត ដោយប្រកាសយ៉ាងម៉ឺងម៉ាត់ថា ខ្លួននឹងមិនប្រគល់ទឹកដីអធិបតេយ្យណាមួយឱ្យរុស្ស៊ីឡើយ ដោយមិនគិតពីសម្ពាធ ឬសំណើដែលបានបង្ហាញក្នុងអំឡុងពេលកិច្ចខិតខំប្រឹងប្រែងការទូតដែលកំពុងបន្ត​នោះ​ទេ​​។

នៅក្នុងបទសម្ភាសន៍ផ្តាច់មុខជាមួយ សារ​ព័ត៌មាន​ The Atlantic លោក Andriy Yermak ប្រធានក្រុម​អ្នកចរចារបស់អ៊ុយក្រែន និងជាប្រធានការិយាល័យរបស់ប្រធានាធិបតី Volodymyr Zelensky បាននិយាយថា សម្បទានទឹកដីគឺគ្មានដែនកំណត់ទាំងស្រុង។

លោកបានសង្កត់ធ្ងន់ថា ដរាបណាលោកហ្សេលេនស្គី​ នៅ​​តែ​ជាប្រធានាធិបតី អ៊ុយក្រែននឹងមិនយល់ព្រមចំពោះផែនការណាមួយដែលបង្ខំឱ្យអ៊ុយក្រែន​បោះបង់ចោលទឹកដីដែលត្រូវបានទទួលស្គាល់ជាអន្តរជាតិជាថ្នូរនឹងបទឈប់បាញ់ ឬកិច្ចព្រមព្រៀងសន្តិភាពនោះទេ។

លោក Yermak បានព្រមានថា ការទទួលយកកិច្ចព្រមព្រៀងបែបនេះនឹងមិននាំមកនូវសន្តិភាពពិតប្រាកដទេ ប៉ុន្តែជំនួស​មកវិញនូវការឈ្លានពានស្របច្បាប់។ លោកបានសង្កត់ធ្ងន់ថា អ៊ុយក្រែនបើកចំហចំពោះការចរចាពិតប្រាកដ ប៉ុន្តែនឹងមិនសម្របសម្រួលលើអធិបតេយ្យភាព ព្រំដែន ឬសិទ្ធិរបស់ពលរដ្ឋខ្លួនដែលរស់នៅក្រោមការកាន់កាប់របស់រុស្ស៊ីឡើយ។

ជំហរដ៏ម៉ឺងម៉ាត់នេះកើតឡើងនៅពេលដែលរុស្ស៊ីបន្តជំរុញឱ្យមានការទទួលស្គាល់ទឹកដីដែលជាផ្នែកមួយនៃការទាមទាររបស់ខ្លួនក្នុងការពិភាក្សាជុំវិញដំណោះស្រាយដ៏មានសក្តានុពលមួយ។ ទោះជាយ៉ាងនេះក្តី ថ្នាក់ដឹកនាំអ៊ុយក្រែន បាន​ទទូចថា សន្តិភាពមិនអាចបង្កើតបាននៅលើដីដែលត្រូវបានរឹបអូសដោយប្រើ​ប្រាស់​កងកម្លាំងនោះទេ​។

កិច្ចសម្ភាសន៍ក៏បានលើកឡើងពីជំហររបស់អ៊ុយក្រែនថា សន្តិភាពយូរអង្វែងណាមួយត្រូវតែរួមបញ្ចូលការដកកងកម្លាំងរុស្ស៊ី ការធានាសន្តិសុខរយៈពេលវែង និងការស្ដារឡើងវិញនូវបូរណភាពទឹកដីពេញលេញរបស់អ៊ុយក្រែន។

​​សង្គ្រាម​​រុស្ស៊ី​-អ៊ុយក្រែន បានអូសបន្លាយ​​ជិត​​៤ឆ្នាំ​ទៅហើយ ​ខណៈពេលដែលរដ្ឋបាល​​របស់​ប្រធានាធិបតី​ដូណាល់ ត្រាំ ខ្នះខ្នែង​​​ស្វែង​រកសន្តិភាព​​នៅ​អ៊ុយក្រែន ប៉ុន្តែ​​​​ការចរចា​ជាមួយភាគី​រុស្ស៊ី​បាន​​ស្ថិត​នៅ​ចំណុច​ជាប់គាំង បើទោះបីជា​​​​ ប្រធានាធិបតី​អាមេរិក​ លោក ដូណាល់ ត្រាំ បានជួបផ្ទាល់​ជាមួយ​លោក​ពូទីន​ កាល​ពីថ្ងៃទី​១៥ខែ​សីហា​ ដែល​គេជឿថា ភាគីទាំងពីរ​អាច​រកចំណុច​​​រួម​ដើម្បី​បន្ថយ​ភាព​តានតឹង​។​​ ចំណុច​សំខាន់​បំផុត​មួយ គឺ​ លោក​ពូទីន មិនព្រម​ឲ្យ​មានបទ​ឈប់​​សម្រាប់ការ​ចរចាឡើយ៕

The post ​មន្ត្រីជាន់​ខ្ពស់អ៊ុយក្រែន៖ គ្មាន​ការ​កាត់ដី​ជាថ្នូរ​​​កិច្ច​ព្រម​ព្រៀង​សន្តិភាព​ជាមួយរុស្ស៊ី​ទេ​​ appeared first on Kampuchea Thmey Daily.

តាមការ​ចេញ​ផ្សាយ​របស់​រ៉យទ័រ នេះជាលើកទីមួយហើយ ដែល​សាធារណរដ្ឋប្រជាធិបតេយ្យប្រជាមានិត​កូរ៉េ (ឬ​ហៅខ្លី​ថា​កូរ៉េ​ខាងជើង) បាន​បញ្ជូនមន្ត្រី​ជាន់​ខ្ពស់​ពីទីក្រុងព្យុងយ៉ាង ដើម្បីថ្លែងសុន្ទរកថានៅ​ក្នុងកិច្ចប្រជុំប្រចាំឆ្នាំរបស់មេដឹកនាំពិភពលោកសម្រាប់មហាសន្និបាត​អង្គការ​សហប្រជាជាតិ ចាប់តាំងពីរដ្ឋមន្ត្រីការបរទេសរបស់ប្រទេសនេះបានធ្វើដំណើរទៅចូល​រួម​ថ្លែង​សុន្ទរកថា​ចុងក្រោយ​​នៅ​ទីក្រុងញូវយ៉កក្នុងឆ្នាំ២០១៨​​។

លោក Kim បានថា៖​«ការដាក់​ការរំសាយអាវុធនុយក្លេអ៊ែរ» លើកូរ៉េខាងជើង គឺស្មើនឹងការទាមទារឱ្យវាចុះចាញ់អធិបតេយ្យភាព និងសិទ្ធិក្នុងការរស់នៅ និងរំលោភលើរដ្ឋធម្មនុញ្ញ។ ​យើង​នឹង​មិន​បោះបង់​អធិបតេយ្យភាព បោះបង់​សិទ្ធិ​រស់រានមានជីវិត និង​បំពាន​រដ្ឋធម្មនុញ្ញ​ឡើយ​»​។

លោកបាននិយាយថា “ដោយសារ​​​ការ​ទប់ស្កាត់សង្រ្គាម​ជាក់ស្តែង​ដែល​​ជំរុញ​​របស់រដ្ឋរបស់យើងនៅក្នុងសមាមាត្រដោយផ្ទាល់ទៅនឹងការគំរាមកំហែងនៃការឈ្លានពានរបស់សហរដ្ឋអាមេរិក និងសម្ព័ន្ធមិត្តរបស់គេ​​ ឆន្ទៈរបស់រដ្ឋសត្រូវក្នុងការបង្កសង្គ្រាមត្រូវបាន​ទប់​ស្កាត់​​​ពេញលេញ​​ ហើយតុល្យភាពនៃអំណាចនៅលើឧបទ្វីបកូរ៉េត្រូវបានធានា»​។

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីខែមុនថា លោកចង់ជួបមេដឹកនាំកូរ៉េខាងជើង លោក គីម ជុងអ៊ុន​ ជាថ្មី​ទៀត​​នៅឆ្នាំនេះ។ ចាប់តាំងពីការឡើងកាន់តំណែងនៅខែមករារបស់ប្រធានាធិបតី ដូណាល់ ត្រាំ ​ប្រធានាធិបតី​កូរ៉េ​​ខាងជើង លោក គីម ជុងអ៊ុន បានព្រងើយកន្តើយនឹងការអំពាវនាវម្តងហើយម្តងទៀតរបស់លោក ​​ត្រាំ ចង់​​បង្កើត​ឡើង​ឡើងវិញនូវទំនាក់ទំនងការទូតផ្ទាល់ដែលគាត់បានបន្តក្នុងអំឡុងពេលអាណត្តិ ២០១៧-២០២១ របស់គាត់ ដែលមិនមានកិច្ចព្រមព្រៀងដើម្បីបញ្ឈប់កម្មវិធីនុយក្លេអ៊ែររបស់កូរ៉េខាងជើង​នោះ​ទេ​​។

​​ក្រោយ​សង្គ្រាម​​​​ផ្ទុះ​នៅ​​​ប្រទេសអ៊ុយក្រែន​​កាល​​​ដើមឆ្នាំ​២០២២ ​ដោយ​សារតែ​​​​ប្រធានាធិបតី​​រុស្ស៊ី​​លោក វ៉្លាឌីមៀរ ពូទីន បាន​សម្រេ​ច​​​ចិត្តឲ្យ​បើក​ប្រតិបត្តិការ​​យោធា​​ពិសេស​ចូល​លុកលុយ​អ៊ុយក្រែន ពិភពលោក​​​​បាន​ងាក​ទៅ​រក​ការ​រត់ប្រណាំង​សព្វាវុធ​​​វិញ ដោយ​បញ្ច​ប់កិច្ច​ខិតខំ​ប្រឹងប្រែង​​​ជាច្រើនទសវត្សរ៍​ដើម្បី​រំសាយ​​អាវុធ​ ជាពិសេស​អាវុធ​មហាប្រល័យ​​នុយក្លេអ៊ែរ៕

រ៉ាន់ រើយ​

The post ​កូរ៉េខាងជើង​ថា ការ​បោះ​បង់​កម្មវិធី​នុយក្លេអ៊ែរ ​​ជា​ការ​ចុះ​ចាញ់​ appeared first on Kampuchea Thmey Daily.

​ប្រទេសហ្វាំងឡង់​ដែល​ទើប​ក្លាយ​ជា​សមាជិក​របស់​អង្គការ​ណាតូក្នុង​ឆ្នាំ​២០២៣ ក្រោយ​​រុស្ស៊ី​​លើក​ទ័ព​ចូលឈ្លាន​ពានអ៊ុយក្រែន ដោយ​ផ្លាស់ប្តូរ​ពី​ជំហរ​អព្យាក្រិត្យ​រាប់សិប​​ទសវត្សរ៍ បាន​ផ្លាស់ប្តូរ​គោល​ជំហរ​ទៅ​រក​ការ​ការពារ​ខ្លួន និង​ការ​ត្រៀម​ខ្លួន​ចំពោះសង្គ្រាមដែល​អាច​កើត​មាន​ឡើង​។

​​ទូរទស្សន៍ហ្វាំងឡង់ YLE news បានរាយការណ៍​កាលថ្ងៃ​​សៅរ៍ ឲ្យ​ដឹងថា ​​ការ​ប្រកាស​ដកខ្លួន​ដោយ​ជូនដំណឹង​ទៅ​កាន់​អង្គការ​សហប្រជាជាតិ​​របស់​ប្រទេសហ្វាំងឡង់នេះ​ នឹងចូលជាធរមាននៅខែមករាក្រោយនេះ។ ​ប្រទេស​ហ្វាំងឡង់​បាន​​ចុះ​​ហត្ថលេខា​ចូល​​សន្ធិសញ្ញាអូតាវ៉ា​ក្នុងឆ្នាំ​២០១២ ដែល​សន្ធិសញ្ញា​នេះមាន​គោល​ដៅ​ ហាមឃាត់ការប្រើប្រាស់ ការស្តុកទុក ការផលិត និងការផ្ទេរគ្រាប់មីនប្រឆាំងមនុស្ស។

ទោះជាយ៉ាងណាក៏ដោយ ទីក្រុង Helsinki បានចាប់ផ្តើមរៀបចំដើម្បីចាកចេញពីអនុសញ្ញានៅដើមឆ្នាំនេះ ដោយដើរតាម​គន្លងនៃប្រទេសជិតខាងដូចជា អេស្តូនី (Estonia) ​ប្រទេស​ឡេតូនី (Latvia) ប្រទេសលីទុយអានី (Lithuania) និង ប្រទេសប៉ូឡូញ (Poland) ដែលសុទ្ធតែមានព្រំប្រទល់ជាប់នឹងប្រទេសរុស្ស៊ី។

ក្រសួង​ការ​បរទេស​​​​ហ្វាំងឡង់​ បាននិយាយថា ៖«ការសម្រេចចិត្តដកខ្លួនចេញពីអនុសញ្ញាគឺផ្អែកលើតម្រូវការការពារជាតិរបស់ប្រទេសហ្វាំងឡង់នៅក្នុងបរិយាកាសសន្តិសុខដែលកាន់តែយ៉ាប់យ៉ឺន»។

ក្រសួង​​​ការបរទេស​ហ្វាំង​ឡង់ បាន​បន្ថែមថា៖«ការដកខ្លួនចេញពីអនុសញ្ញានេះ នឹងអាចឱ្យប្រទេសហ្វាំងឡង់ដាក់ឱ្យប្រើប្រាស់ឡើងវិញនូវគ្រាប់មីនប្រឆាំងមនុស្ស ដល់កម្រិតនៃមធ្យោបាយការពារដែលមានរបស់ខ្លួន»​។

ទោះបីជាមានការដកថយក៏ដោយ ក៏ហ្វាំងឡង់បាននិយាយថា ខ្លួននៅតែប្តេជ្ញាចិត្តចំពោះគោលដៅមនុស្សធម៌នៃសន្ធិសញ្ញា ហើយនឹងបន្តគាំទ្រដល់កិច្ចខិតខំប្រឹងប្រែងដោះមីនជាសកល។

សភាហ្វាំងឡង់បានអនុម័តសំណើររបស់រដ្ឋាភិបាលក្នុងការចាកចេញពីសន្ធិសញ្ញាកាលពីខែមិថុនាដោយសំឡេង ១៥៧​ទល់​សំឡេ​ងប្រឆាំង​១៨ ។

ប្រធានាធិបតី Alexander Stubb បានទទួលស្គាល់ការរិះគន់ចំពោះការសម្រេចចិត្តនេះ ប៉ុន្តែបានការពារវិធានការនេះជាការចាំបាច់សម្រាប់សន្តិសុខជាតិ។ លោកបាននិយាយថា «ហ្វាំងឡង់មិនប្រឈមមុខនឹងការគំរាមកំហែងផ្នែកយោធាភ្លាមៗនោះទេ ប៉ុន្តែការផ្លាស់ប្តូរនៅក្នុងបរិយាកាសប្រតិបត្តិការទាមទារឱ្យយើងពង្រឹងការការពាររបស់យើង»​។

លោកបានបន្ថែមថា៖«យើងមានព្រំដែនដ៏វែងជាមួយរុស្ស៊ី ដែលមិនមែនជាភាគីនៃកិច្ចព្រមព្រៀងអូតាវ៉ា។ យើងបានមើលឃើញពីរបៀបដែលរុស្ស៊ីធ្វើសង្រ្គាមនៅថ្ងៃនេះ» ដោយសំដៅទៅលើជម្លោះដែលកំពុងបន្តនៅក្នុងប្រទេសអ៊ុយក្រែន និងភាពតានតឹងក្នុងតំបន់កាន់តែទូលំទូលាយ។

ហ្វាំងឡង់មានព្រំដែនវែងជាងគេជាមួយរុស្ស៊ីនៃប្រទេសណាតូដែលលាតសន្ធឹង ១៣០០គីឡូម៉ែត្រ។

នៅឆ្នាំ ១៩៣៩-១៩៤០ ហ្វាំងឡង់បានប្រយុទ្ធនិងចាញ់សង្រ្គាមបីខែប្រឆាំងនឹងសហភាពសូវៀតដែលបានបញ្ជូនកងកម្លាំង​របស់ខ្លួនឆ្លងកាត់ព្រំដែនហ្វាំងឡង់នៅដើមសង្រ្គាមលោកលើកទីពីរ៕​

រ៉ាន់ រើយ​

The post ​ហ្វាំង​​ឡង់​​ដក​ខ្លួន​ពី​​សន្ធិសញ្ញា​គ្រាប់មីន​​ ធ្វើ​តាមប្រទេស​៤ទៀត​​ដោយ​ត្រៀម​ខ្លួន​សម្រាប់​សង្គ្រាម​​​ appeared first on Kampuchea Thmey Daily.

ប្រធានាធិបតី​រុស្ស៊ី​ លោក វ៉ា្លឌីមៀរ ពូទីន​ បាន​បណ្តេញចេញ​កាល​ថ្ងៃ​ទី​៦​​​​ខែ​​​កក្កដា និងត្រូវ​បាន​ផ្សព្វផ្សាយ​ពី​ការ​បណ្តេញរដ្ឋមន្ត្រី​ដឹកជញ្ជូន​នៅ​ថ្ងៃទី ៧ខែកក្កដា ហើយ ក៏​ជា​ថ្ងៃ​ដែល​ដំណឹង​នៃការ​ធ្វើ​អត្តឃាត​​​នៃ​ថ្នាក់​ដឹនាំ​កំពូល​របស់​រុស្ស៊ី​​ ក្នុងពេលដែល​​​​លោក វ្ល៉ាឌីមៀរ ពូទីន មានរឿងអាស្រូវ​ក្នុងការ​លើ​​ក​ទ័ព​ចូលឈ្លានពាន​អ៊ុយក្រែន​​អស់​រយៈពេលជាង​​៣ឆ្នាំ​កន្លង​ទៅ​។

ការ​ផ្សាយ​របស់​កាសែត Izvestia ដែល​ត្រូវ​បាន​ដកស្រង់​ផ្សាយ​បន្ត​ដោយ​សារ​ព័ត៌មានអ៊ុយក្រែន The Kyiv Independent នៅល្ងាចនេះ​ ឲ្យ​ដឹងថា​ ការបណ្តេញរដ្ឋមន្ត្រី​ដឹកជញ្ជួន​ លោក​ Starovoit បានកើតឡើងបន្ទាប់ពីជើងហោះហើរជិត ៥០០​ត្រូវបានផ្អាកនៅអាកាសយានដ្ឋានរុស្ស៊ីសំខាន់ៗកាលពីថ្ងៃទី ៥-៦​ខែកក្កដា ដោយសារតែការគំរាមកំហែងផ្នែកសន្តិសុខពីការវាយប្រហារដោយយន្តហោះគ្មានមនុស្សបើករបស់អ៊ុយក្រែន។

នៅថ្ងៃបន្ទាប់ ការផ្ទុះនៅលើកប៉ាល់ Eco Wizard នៅឯកំពង់ផែ Ust-Luga ក្នុងតំបន់ Leningrad បានបង្កឱ្យមានការលេចធ្លាយអាម៉ូញាក់ ដែលបន្ថែមដល់វិបត្តិដែលគ្របដណ្តប់លើវិស័យដឹកជញ្ជូនរបស់រុស្ស៊ី។

ប្រធានាធិបតីរុស្ស៊ីលោក វ៉្លាឌីមៀរ ពូទីន ​នៅ​ថ្ងៃ​ចន្ទ​ទី​៦​ខែ​កក្កដា​នេះ បាន​ចេញ​ក្រឹត្យ​​បណ្តេញ​រដ្ឋមន្ត្រីដឹកជញ្ជូន Roman Starovoit ដោយបញ្ចប់អាណត្តិរបស់គាត់ដែល​ទើប​ចាប់ផ្តើម​​កាល​​ពី​ខែ​​ខែឧសភា​ឆ្នាំ​២០២៤ ប៉ុន្តែ​ក្នុង​ក្រឹត្យ​ដែល​ត្រូវបាន​ផ្សព្វផ្សាយ​បឋម បាន​បរាជ័យ​ក្នុងការ​បញ្ជាក់​ហេតុផលផ្លូវការ​ណា​មួយ​​ទេ​ សម្រាប់ការបញ្ចប់​តំណែងនេះ​​។

លោក Starovoit ធ្លាប់​បម្រើការ​ជា​ប្រធាន​ទីភ្នាក់ងារ​ផ្លូវ​រដ្ឋ​​របស់​រុស្ស៊ី​​អស់​រយៈពេល​៦​ឆ្នាំ​ ហើយ​មុន​នោះ​ក៏​ជា​អភិបាល​តំបន់ Kursk អស់​រយៈពេល​៥​ឆ្នាំ​ផង​ដែរ។ ប៉ុន្មានខែបន្ទាប់​ទៅ​កាន់​តួនាទី​ជា​ប្រមុខ​ក្រសួង​​ដឹក​ជញ្ជូន កងទ័ពអ៊ុយក្រែនបាន​វាយ​សម្រុក​ចូល​ដល់​​​ទីក្រុង Kursk ដែល​នេះ​ជា​​ការ​វាយលុក​ដ៏​គួរ​ឲ្យ​ភ្ញាក់ផ្អើល និង​​ធំបំផុតរបស់​ក្រុង​កៀវ​ចូលទៅក្នុងទឹកដីរុស្ស៊ី ចាប់តាំងពីសង្គ្រាម​ផ្ទុះ​ឡើង​នៅឆ្នាំ​២០២២។

លោក Vitaly Savelyev ដែលធ្លាប់​​ជា​រដ្ឋមន្ត្រី​ដឹក​ជញ្ជូន​មុន​លោក Starovoit​ ត្រូវ​បាន​ប្ដូរ​ឲ្យ​ទៅ​កាន់​​តំណែង​​ជាឧបនាយករដ្ឋមន្ត្រី។ យ៉ាង​ណា​មិញ មុខ​តំណែង​ថ្មី ឬ​​ចំណាត់
ការ​បែប​ណា​ចំពោះ​លោក Starovoit នៅ​មិន​ទាន់​ដឹង​ច្បាស់​នៅ​ឡើយ​ទេ។

យោងតាមកាសែត​រុស្ស៊ី Vedomosti អ្នកជំនួស​តំណែង​របស់​លោក Starovoit អាចជាអនុរដ្ឋមន្ត្រី​ដឹក​ជញ្ជូន Andrei Nikitin ដែលធ្លាប់ជាអភិបាលនៃតំបន់ Novgorod៕

រ៉ាន់ រើយ​

The post រដ្ឋមន្ត្រី​ដឹកជញ្ជួន​រុស្ស៊ី​ដែលពូទីន​ ទើប​បណ្តេញចេញ​ពីតំណែង​ បាញ់​សម្លាប់​ខ្លួនឯង​​ appeared first on Kampuchea Thmey Daily.

​​ទីភ្នាក់ងារ​ព័ត៌មាន​​​រុស្ស៊ី TASS បាន​រាយ​ការ​ណ៍ថា​ អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova ថា ប្រទេសរុស្ស៊ីនឹងបញ្ជូន​​កំណត់​ទូត​​តវ៉ាទៅកាន់ប្រទេសស៊ុយអែត បន្ទាប់ពីការវាយប្រហារដោយយន្តហោះគ្មានមនុស្សបើកលើស្ថាន​ទូត​រុស្ស៊ី​នៅ​ក្នុងប្រទេសស៊ុយអែត។ ​

លោកស្រី Maria Zakharova និយាយថា៖«​ទីក្រុងស្តុកខុម នឹងទទួលបានកំណត់ត្រានៃការតវ៉ា។ ស៊ុយអែតត្រូវតែទប់ទល់​នឹងភាពជ្រុលនិយមរបស់ខ្លួន គ្រប់គ្រងស្ថានការណ៍ និងគោរពយ៉ាងតឹងរឹងនូវអនុសញ្ញាទីក្រុងវីយែន»​។

ស្ថានទូត​រុស្ស៊ី​​ប្រចាំ​​នៅទីក្រុងស្តុកខុម (Stockholm) ​ត្រូវ​រាយការណ៍​​ថា​ នៅថ្ងៃទី ២៥​ ខែឧសភា ខ្លួន​ត្រូវបានវាយប្រហារដោយយន្តហោះគ្មានមនុស្សបើក ដែលបានទម្លាក់​​ធុង​​ដែលមានថ្នាំពណ៌​នៅជិតច្រកចូលអគារ ដែល​​​រឿង​នេះ​បាន​បង្ក​ការ​ព្រួយបារម្ភ​ដល់​បញ្ហាអ​សន្តិសុខ​ដែល​កំពុង​មាន​និន្នាការ​កើន​ឡើង​​​​។

​ប្រទេសស៊ុយអែត​បាន​បោះបង់​​​ជំហរ​គោល​នយោ​បាយ​ការបរទេស​​​ស្ថិតនៅជាអព្យាក្រឹត្យ​ មិន​ចូលបក្សសម្ព័ន្ធ​ ដោយ​​​ដាក់​ពាក្យចូល​ជាសមាជិក​របស់​អង្គការ​​ប្រដាប់​អាវុធ​ណាតូកាល​ពីឆ្នាំ​២០២២ ពោល​គឺ​ក្រោយ​ប៉ុន្មានខែ​បន្ទាប់​ពីរុស្ស៊ី​លើក​ទ័ព​​លុកលុយ​ចូលប្រទេសអ៊ុយក្រែន​កាល​ពី​​ខែ​កុម្ភៈឆ្នាំ​២០២២​។ ​

​​ប្រទេស​ស៊ុយអែត​ក៏បាន​ក្លាយ​សមាជិក​​ពេញសិទ្ធិរបស់​អង្គការ​ណាតូ កាល​ខែ​មីនា​ឆ្នាំ​២០២៤ បន្ទាប់​ពី​ការខិតខំប្រឹងប្រែង​ផ្នែក​ការទូត​​​ជាច្រើន​ ជាពិសេស​ត្រូវ​​ដោះស្រាយការ​ជំទាស់​របស់​ប្រទេស​តួកគីដែល​ប្រឆាំង​និង​ចោទ​ប្រកាន់​ស៊ុយអែត​ជុំវិញ​ការ​គាំទ្រ​​​ក្រុម​​តស៊ូ​នៅប្រទេសស៊ីរី​ដែលតួកគី​ចោទ​ថា​ជាភេរវករ​។ ​ប្រទេសហុងគ្រី​ ក៏បាន​ពន្យារ​ពេលយូរ​ជាង​គេ​ក្នុងការ​ផ្តល់សច្ចាប័ន​ឲ្យស៊ុយអែត​ចូលជាសមាជិក​របស់​ណាតូ ដោយសារ​តែ​​សម្ព័ន្ធ​ភាព​ជិត​ស្និទ្ធ​របស់​នាយករដ្ឋមន្ត្រី​ ហុងគ្រី លោក Viktor Orban និង​ប្រធានាធិបតី​ រុស្ស៊ី លោក វ្ល៉ាឌីមៀរ ពូទីន​៕​

ដោយ រ៉ាន់ រើយ​

The post ​ក្រសួង​​ការបរទេស​រុស្ស៊ី​តវ៉ា​ទៅ​​ស៊ុយអែត ក្រោយ​ស្ថានទូតខ្លួន​​​រងការវាយប្រហារ​ ​ appeared first on Kampuchea Thmey Daily.

សារព័ត៌មានរ៉យទ័រ បានរាយការណ៍ដោយដកស្រង់ប្រភពថា សហរដ្ឋអាមេរិកបានដាក់ទណ្ឌកម្មថ្មីប្រឆាំងនឹងរុស្សីក្នុងន័យបង្កើនសម្ពាធលើទីក្រុងមូស្គូក្នុងដំណាក់កាលនៃកិច្ចចរចាដើម្បីបញ្ចប់ជម្លោះនៅអ៊ុយក្រែន។

​​រដ្ឋបាល​សហរដ្ឋអាមេរិក​និង​អ៊ុយក្រែន​ បាន​ចុះ​ហត្ថលេខា​​ត​​លើ​​កិច្ច​ព្រម​ព្រៀង​រ៉ែ​​ជាមួយ​អ៊ុយក្រែន​នៅ​ថ្ងៃទី​៣០ខែ​​​មេសា ចំថ្ងៃ​ទី​១០០​នៃ​ការ​ឡើង​កាន់​អំណាច​​របស់​លោក ដូណាល់ ត្រាំ ដែល​បាន​សន្យា​​​ក្នុងពេល​ឡើង​កាន់​អំណាច​ដំបូង​ថា នឹង​នាំ​​ដំណោះស្រាយ​បញ្ចប់សង្គ្រាម​នៅអ៊ុយក្រែន​ក្នុង​រយៈពេល​១០០​ថ្ងៃ។

​​ប៉ុន្តែ​កិច្ច​ព្រម​ព្រៀង​រវាង​សហរដ្ឋអាមេរិក និង​អ៊ុយក្រែន​​ដែលសម្រេច​បាន​ចុង​ក្រោយ​នេះ បាន​បង្ក​ការ​ខឹង​សម្បារ​ដល់​វិមាន​ក្រឹម​ឡាំង​និងបង្ហាញ​ការ​ប្រតិកម្ម​ដោយ​ប្រុង​ប្រយ័ត្ន​ បន្ទាប់​ពី​ការ​ចរចា​មិន​ជោគជ័យ​​ជាមួយសហរដ្ឋអាមេរិក​ក្នុង​ដំណើរ​ស្វែងរកដំណោះស្រាយ​សង្គ្រាម​​នៅ​អ៊ុយក្រែន​។

​តាមសេចក្តី​រាយការណ៍ គោលដៅ​នៃការ​ដាក់​ទណ្ឌកម្ម​ថ្មី​របស់​សហរដ្ឋអាមេរិក​គឺ​មានសក្តានុពល​សំដៅ​លើ​ក្រុមហ៊ុនថាមពលយក្សរុស្ស៊ី Gazprom ដែលគ្រប់គ្រងដោយរដ្ឋ និងក្រុមហ៊ុនធំៗដែលពាក់ព័ន្ធនឹងធនធានធម្មជាតិ និងវិស័យធនាគារ។

រ៉យទ័រ​ បានរាយការណ៍ថា ទោះបីជាយ៉ាងណាក៏ដោយ វាមិនច្បាស់ទេថា តើប្រធានាធិបតីអាមេរិក លោក ដូណាល់ ត្រាំ​ នឹងចុះហត្ថលេខាលើកញ្ចប់​ទណ្ឌកម្ម​ថ្មី​នេះឬយ៉ាងណា នោះទេ ព្រោះ​កន្លង​មក​ សហរដ្ឋអាមេរិក​ហាក់​បង្ហាញ​​​ជំហរទន់ភ្លន់​ក្នុង​ការ​​​ធ្វើការងារជាមួយរុស្ស៊ី ដោយ​ចង់ឲ្យ​រុស្ស៊ី​ងាក​ទៅ​កាន់តុចរចា​​ជាមួយអ៊ុយក្រែន ដោយ​ទទួលយក​​បទឈប់បាញ់​រយៈពេល​៣០ថ្ងៃ​ជាមួយអ៊ុយក្រែន​។​

រដ្ឋមន្ត្រីការបរទេសអាមេរិក លោក Marco Rubio ធ្លាប់បាននិយាយថា អាមេរិកមិនដាក់ទណ្ឌកម្មថ្មីលើរុស្ស៊ីទេ ព្រោះមិនចង់បង្កគ្រោះថ្នាក់ដល់កិច្ចចរចាដោះស្រាយជម្លោះ។ នៅថ្ងៃទី ២៤ខែមេសា ប្រធានាធិបតី​ ត្រាំ បាននិយាយថា លោកចង់ផ្តល់ចម្លើយក្នុងមួយសប្តាហ៍ នៅពេលដែលត្រូវបានសួរអំពីលទ្ធភាពនៃសកម្មភាពដាក់ទណ្ឌកម្មបន្ថែមទៀតប្រឆាំងនឹងប្រទេសរុស្ស៊ី៕​

ដោយ រ៉ាន់ រើយ​

The post អាមេរិក​ទំនង​បង្កើន​សម្ពាធ​ទណ្ឌកម្ម​លើរុស្ស៊ី ក្រោយ​ទាញ​អ៊ុយក្រែន​ចូលកិច្ច​ព្រម​ព្រៀងរ៉ែ​ appeared first on Kampuchea Thmey Daily.