ព័ត៌មានអន្ដរជាតិ

អាមេរិកទំនងបង្កើនសម្ពាធទណ្ឌកម្មលើរុស្ស៊ី ក្រោយទាញអ៊ុយក្រែនចូលកិច្ចព្រមព្រៀងរ៉ែ

បានផុស

៤២ វិនាទី មុន

នៅ

ថ្ងៃសៅរ៍ ៣ ឧសភា ២០២៥

ដោយ

ក្រោយសម្រេចបាននូវកិច្ចព្រមព្រៀងរ៉ែដ៏សំខាន់ជាមួយអ៊ុយក្រែន ដែលសហរដ្ឋអាមេរិកចង់បានចាប់តាំងពីចូលកាន់អំណាច ក្រោមរដ្ឋបាលប្រធានាធិបតី ដូណាល់ ត្រាំ មានសេចក្តីរាយការណ៍ថា សហរដ្ឋអាមេរិកហាក់បង្ហាញសញ្ញាបង្កើនសម្ពាធដល់រុស្ស៊ី តាមរយៈការដាក់ទណ្ឌកម្មបន្ថែម ដែលជាផ្នែកមួយដាក់សម្ពាធជាថ្មីដល់វិមានក្រឹមឡាំង ឲ្យសុខចិត្តចូលតុចរចាដើម្បីរកដំណោះស្រាយបញ្ចប់សង្គ្រាម។

ប្រធានាធិបតី សហរដ្ឋអាមេរិកលោក ដូណាល់ ត្រាំ។ White House

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានរ៉យទ័រ បានរាយការណ៍ដោយដកស្រង់ប្រភពថា សហរដ្ឋអាមេរិកបានដាក់ទណ្ឌកម្មថ្មីប្រឆាំងនឹងរុស្សីក្នុងន័យបង្កើនសម្ពាធលើទីក្រុងមូស្គូក្នុងដំណាក់កាលនៃកិច្ចចរចាដើម្បីបញ្ចប់ជម្លោះនៅអ៊ុយក្រែន។

រដ្ឋបាលសហរដ្ឋអាមេរិកនិងអ៊ុយក្រែន បានចុះហត្ថលេខាតលើកិច្ចព្រមព្រៀងរ៉ែជាមួយអ៊ុយក្រែននៅថ្ងៃទី៣០ខែមេសា ចំថ្ងៃទី១០០នៃការឡើងកាន់អំណាចរបស់លោក ដូណាល់ ត្រាំ ដែលបានសន្យាក្នុងពេលឡើងកាន់អំណាចដំបូងថា នឹងនាំដំណោះស្រាយបញ្ចប់សង្គ្រាមនៅអ៊ុយក្រែនក្នុងរយៈពេល១០០ថ្ងៃ។

រដ្ឋមន្ត្រីរតនាគារសហរដ្ឋអាមេរិក និង រដ្ឋមន្ត្រីក្រសួងហិរញ្ញវត្ថុអ៊ុយក្រែនចុះហត្ថលេខាលើកិច្ចព្រមព្រៀងរ៉ែ។ Reuters

ប៉ុន្តែកិច្ចព្រមព្រៀងរវាងសហរដ្ឋអាមេរិក និងអ៊ុយក្រែនដែលសម្រេចបានចុងក្រោយនេះ បានបង្កការខឹងសម្បារដល់វិមានក្រឹមឡាំងនិងបង្ហាញការប្រតិកម្មដោយប្រុងប្រយ័ត្ន បន្ទាប់ពីការចរចាមិនជោគជ័យជាមួយសហរដ្ឋអាមេរិកក្នុងដំណើរស្វែងរកដំណោះស្រាយសង្គ្រាមនៅអ៊ុយក្រែន។

តាមសេចក្តីរាយការណ៍ គោលដៅនៃការដាក់ទណ្ឌកម្មថ្មីរបស់សហរដ្ឋអាមេរិកគឺមានសក្តានុពលសំដៅលើក្រុមហ៊ុនថាមពលយក្សរុស្ស៊ី Gazprom ដែលគ្រប់គ្រងដោយរដ្ឋ និងក្រុមហ៊ុនធំៗដែលពាក់ព័ន្ធនឹងធនធានធម្មជាតិ និងវិស័យធនាគារ។

រ៉យទ័រ បានរាយការណ៍ថា ទោះបីជាយ៉ាងណាក៏ដោយ វាមិនច្បាស់ទេថា តើប្រធានាធិបតីអាមេរិក លោក ដូណាល់ ត្រាំ នឹងចុះហត្ថលេខាលើកញ្ចប់ទណ្ឌកម្មថ្មីនេះឬយ៉ាងណា នោះទេ ព្រោះកន្លងមក សហរដ្ឋអាមេរិកហាក់បង្ហាញជំហរទន់ភ្លន់ក្នុងការធ្វើការងារជាមួយរុស្ស៊ី ដោយចង់ឲ្យរុស្ស៊ីងាកទៅកាន់តុចរចាជាមួយអ៊ុយក្រែន ដោយទទួលយកបទឈប់បាញ់រយៈពេល៣០ថ្ងៃជាមួយអ៊ុយក្រែន។

រដ្ឋមន្ត្រីការបរទេសអាមេរិក លោក Marco Rubio ធ្លាប់បាននិយាយថា អាមេរិកមិនដាក់ទណ្ឌកម្មថ្មីលើរុស្ស៊ីទេ ព្រោះមិនចង់បង្កគ្រោះថ្នាក់ដល់កិច្ចចរចាដោះស្រាយជម្លោះ។ នៅថ្ងៃទី ២៤ខែមេសា ប្រធានាធិបតី ត្រាំ បាននិយាយថា លោកចង់ផ្តល់ចម្លើយក្នុងមួយសប្តាហ៍ នៅពេលដែលត្រូវបានសួរអំពីលទ្ធភាពនៃសកម្មភាពដាក់ទណ្ឌកម្មបន្ថែមទៀតប្រឆាំងនឹងប្រទេសរុស្ស៊ី៕

ដោយ រ៉ាន់ រើយ