យ៉ាងណាមិញ ពន្ធ​លើ​ប្រទេស​ចិន ​នឹង​ត្រូវ​បាន​ដំឡើង​ដល់ ១២៥ ភាគរយ ពោលគឺកើនឡើងពី ១០៤ ភាគរយ។

លោក ត្រាំ បាន​សរសេរ​បង្ហោះនៅលើបណ្ដាញសង្គម Truth Social ថា៖ «ខ្ញុំ​បានអនុញ្ញាតឱ្យផ្អាក(ការអនុវត្តពន្ធ)រយៈពេល ៩០ ថ្ងៃ និងបន្ធូរបន្ថយពន្ធគយបដិការឱ្យ​ទាបខ្លាំង​មក​ត្រឹម ១០ ភាគរយ ក្នុងអំឡុង​ពេលនេះ​ ដោយ​នឹងចូលជាធរមាន​ភ្លាមៗ»។ ការសម្រេចចិត្តរបស់លោក ត្រាំ គឺ «​ផ្អែកលើការពិតដែលថាជាង ៧៥ ប្រទេស បានទាក់ទងទៅតំណាងរបស់សហរដ្ឋអាមេរិក…ដើម្បីចរចារកដំណោះស្រាយចំពោះបញ្ហា​ដែលកំពុងពិភាក្សា ទាក់ទងនឹងពាណិជ្ជកម្ម ឧបសគ្គពាណិជ្ជកម្ម ពន្ធគយ ការក្រឡុក​រូបិយប័ណ្ណ និងពន្ធមិនមែនរូបិយវត្ថុ និងការពិតដែលថាប្រទេសទាំងនោះ មិនបាន​សងសឹក​ប្រឆាំងសហរដ្ឋអាមេរិកក្នុងទម្រង់ណាមួយនោះទេ»។

នេះមាន​ន័យថា សម្រាប់គ្រប់ប្រទេសទាំងអស់(លើកលែងតែចិន​)ដែលជាប់ពន្ធគយបដិការ​លើសពី ១០ ភាគរយ នោះសហរដ្ឋអាមេរិក​នឹងទម្លាក់មកត្រឹម ១០ ភាគរយ រយៈពេល ៩០ ថ្ងៃ។ ១០ ភាគរយ គឺជាអត្រាពន្ធមូលដ្ឋាន ដែលលោក​ ត្រាំ ដាក់លើគ្រប់ប្រទេសទាំងអស់ និងចូលជាធរមាន​កាលពីថ្ងៃសោរ៍ចុងសប្ដាហ៍កន្លងទៅ។ ការពន្យាពេល និងទម្លាក់ពន្ធត្រឹម ១០ ភាគរយ ក៏អនុវត្តចំពោះកាណាដា និងម៉ិកស៊ិកផងដែរ។

លោក ត្រាំ បាននិយាយបន្ថែមថា លោកដំឡើងពន្ធលើការនាំចូលពីប្រទេសចិនដល់ ១២៥ ភាគរយ ដោយ​ចូលជាធរមាន​ភ្លាមៗ ដោយ​សារតែ «កង្វះការគោរព ដែលចិន​បាន​បង្ហាញទៅដល់ទីផ្សារពិភពលោក​»។

បើតាម​មន្រ្តីរដ្ឋបាល ត្រាំ សហរដ្ឋអាមេរិក​នឹង​ចរចាជាមួយ​ប្រទេស​ទាំងអស់ ដែល​បាន​ទាក់ទង​ទៅខ្លួន ក្នុងអំឡុងរយៈពេល​ ៩០ ថ្ងៃ នៃការផ្អាកពន្ធគយបដិការខ្ពស់។

គួរគូសបញ្ជាក់ថា ការវិវត្តយ៉ាងរហ័សចុង​ក្រោយនេះ កើតឡើងក្រោយ​រដ្ឋាភិបាលចិន​ បានប្រកាសដំឡើងពន្ធលើទំនិញចិន​ដល់ ៨៤ ភាគរយ ដើម្បីជាការឆ្លើយតបទៅនឹង​ការដំឡើងពន្ធដល់ ១០៤ ភាគរយ របស់លោក ត្រាំ ដែល​ចូលជាធរមានកាលពីថ្ងៃពុធ។ ចិន​ប្ដេជ្ញាថា ខ្លួន​នឹង​ប្រយុទ្ធប្រឆាំង​ដល់ទីបញ្ចប់ ទោះបីជានិយាយថា គ្មាននរណាឈ្នះក្នុងសង្រ្គាមពាណិជ្ជកម្មក៏ដោយ។

The post ត្រាំ ផ្អាកពន្ធគយបដិការ ៩០ ថ្ងៃ ប៉ុន្តែដំឡើងលើចិនដល់ ១២៥ ភាគរយ appeared first on Kampuchea Thmey Daily.

​នេះបង្ហាញពីភាពកាន់តែតានតឹង​នៃសង្រ្គាមពាណិជ្ជកម្មរវាងមហាយក្សអាមេរិក និងចិន​ ដែលជាមហាអំណាចសេដ្ឋកិច្ចកំពូលៗរបស់​ពិភព​លោក​។ ចិន​ ក៏ដូចជាប្រទេស​ដែលរងគ្រោះដោយ​ពន្ធគយបដិការ និងពន្ធផ្សេងៗទៀតរបស់លោក ត្រាំ បាន​ព្រមាន​នាពេលកន្លងមក​ថា គោលនយោបាយការពារនិយមរបស់​សហរដ្ឋអាមេរិក នឹង​ធ្វើឱ្យប៉ះពាល់ដល់​ភាគីពាក់ព័ន្ធទាំងអស់ ហើយធ្ងន់កទាំងសហរដ្ឋអាមេរិកខ្លួនឯងផ្ទាល់។

មែនទែនទៅ ចិនគឺជាប្រភពនាំចូលធំទី២របស់អាមេរិកកាលពីឆ្នាំមុន ដោយ​មាន​ទំនិញសរុបចំនួន ៤៣៩ ប៊ីលានដុល្លារ ទៅកាន់សហរដ្ឋអាមេរិក ខណៈ​សហរដ្ឋអាមេរិក បាននាំចេញទំនិញមានតម្លៃ ១៤៤ ​ប៊ីលានដុល្លារទៅកាន់ប្រទេសចិន។ អ្នកវិភាគមើលឃើញថា ការដាក់ពន្ធគយ​គ្នាទៅវិញទៅមក​ គំរាម​កំហែង​ដល់​ឧស្សាហកម្ម​ក្នុងស្រុករៀងៗខ្លួន ​ហើយនឹង​ឈាន​ដល់​ការ​បញ្ឈប់​ ឬកាត់បន្ថយការងារ​។

ការណ៍គួរឱ្យកត់សម្គាល់នោះ គឺផលប៉ះពាល់ជាអវិជ្ជមាន​ដល់ក្រុមហ៊ុនអាជីវកម្ម​នៃភាគីទាំងសងខាង​ ខណៈបណ្ដាក្រុមហ៊ុនសហរដ្ឋអាមេរិកភាគច្រើន ចង់ឱ្យអាមេរិកបន្ត ឬបង្កើនទំនាក់ទំនងជាមួយចិន​។ នេះបើតាម​លទ្ធផលស្ទង់មតិរបស់មូលនិធិសភាពាណិជ្ជកម្មសហរដ្ឋអាមេរិក ដែលចេញផ្សាយនាពេលថ្មីៗនេះ។

តើមាន​ក្រុមហ៊ុនសហរដ្ឋអាមេរិកប៉ុន្មាន កំពុងប្រតិបត្តិការនៅក្នុងប្រទេសចិន​? ហើយមានក្រុមហ៊ុនចិនប៉ុន្មាននៅអាមេរិកវិញ?

គិតត្រឹមឆ្នាំ ២០២៤ មាន​ក្រុមហ៊ុនអាមេរិកជាង ៧៣ ០០០ បានបង្កើតអាជីវកម្មនៅក្នុងប្រទេសចិន​ជាមួយនឹងការវិនិយោគសរុបលើសពី ១,២ ​ទ្រីលានដុល្លារ ដែលគ្របដណ្តប់លើវិស័យដូចជាអេឡិចត្រូនិក និងទំនាក់ទំនង ការផលិតរថយន្ត ទំនិញប្រើប្រាស់ និងសេវាកម្មហិរញ្ញវត្ថុ។ នេះបើតាមការចុះផ្សាយរបស់កាសែតបក្សកុម្មុយនិស្តចិន​ People’s Daily កាលពីដើមឆ្នាំ ២០២៥។

កាសែតដដែល​បន្តថា អាជីវកម្មរបស់ក្រុមហ៊ុនអាមេរិកនៅចិន​ ផ្ដល់ប្រាក់ចំណេញដោយផ្ទាល់ ​និង​ផលប្រយោជន៍ដល់ប្រជាជននៃប្រទេសទាំង ២​។ ខណៈចិន​ជំរុញទំនើបកម្មរបស់ចិន ហើយសហរដ្ឋអាមេរិក​ធ្វើឱ្យសេដ្ឋកិច្ចរបស់ខ្លួនមានភាពរស់រវើក ​ប្រទេសទាំង២ត្រូវការកិច្ចសហប្រតិបត្តិការទ្វេភាគី។

យោងតាមទស្សនាវដ្តី China Briefing ឯណោះវិញ គិតត្រឹមឆ្នាំ ២០២២ ក្រុមហ៊ុនចិនប្រមាណ ៥ ០០០ កំពុងប្រតិបត្តិការនៅក្នុងសហរដ្ឋអាមេរិក ដែលគ្របដណ្ដប់លើ​ឧស្សាហកម្មផ្សេងៗ រួមទាំងបច្ចេកវិទ្យា ការផលិត ហិរញ្ញវត្ថុ និងអចលនទ្រព្យ។ ​យ៉ាងណាមិញ និន្នាការថ្មីៗបង្ហាញពីការធ្លាក់ចុះទាំងចំនួន និងកម្រិតសេដ្ឋកិច្ចរបស់ក្រុមហ៊ុនទាំងនេះ។

ក្រសួងពាណិជ្ជកម្មរបស់ប្រទេសចិនបានបង្ហាញថា ការវិនិយោគក្រៅប្រទេសទៅកាន់សហរដ្ឋអាមេរិករបស់ចិន​ បានធ្លាក់ចុះ ៥,២ ភាគរយ ​ក្នុងឆ្នាំ ២០២៣ ទោះបីជា​ការវិនិយោគទៅកាន់ប្រទេសផ្សេងទៀតទាំងអស់ បាន​កើនឡើង ៨,៧ ភាគរយ ក៏ដោយ​។ នេះបើតាមការចុះផ្សាយរបស់សារព័ត៌មាន​ Bloomberg កាលពីសប្ដាហ៍មុន ដែលស្រង់ព័ត៌មាន​ថា​ ក្រុមហ៊ុនចិនបានវិនិយោគ ៦,៩ ប៊ីលានដុល្លារនៅសហរដ្ឋអាមេរិក គិតតែក្នុងឆ្នាំ ២០២៣។ Bloomberg បានរាយការណ៍បន្តថា ​ចិនបានចាត់វិធានការដើម្បីរឹតបន្តឹងក្រុមហ៊ុនក្នុងស្រុក ពីការបណ្តាក់ទុននៅសហរដ្ឋអាមេរិក ដើម្បី​ជាវិធានការ​​ចរចាពាណិជ្ជកម្មមួយ ជាមួយ​លោក ត្រាំ។​

តើវិធានការពន្ធគយចុង​ក្រោយ នឹងប៉ះពាល់ដល់ក្រុមហ៊ុនទាំងសងខាង បែបណា?

ជាទូទៅវិធានការ​ពន្ធគយប៉ះពាល់ដល់ក្រុមហ៊ុនអាជីវកម្មក្នុងរបៀបផ្សេងៗ ដូចជា​ការបង្កើនថ្លៃដើម រំខានដល់ខ្សែច្រវ៉ាក់ផ្គត់ផ្គង់ ​និង​ការផ្លាស់ប្តូរយុទ្ធសាស្រ្តទីផ្សារ​ ខណៈការដំឡើងតម្លៃនាំចូលដោយសារពន្ធ នឹង​ប៉ះពាល់ដល់​ការប្រកួតប្រជែងជាដើម។

​ការវិវត្តចុង​ក្រោយ ​បង្កផល​អវិជ្ជមាន​ទាំងសម្រាប់ក្រុមហ៊ុនអាមេរិក​ក្នុងស្រុក និងនៅចិន​ផ្ទាល់។ ចំពោះក្រុមហ៊ុនក្នុងស្រុកដែលនាំចេញទៅចិន ​ត្រូវប្រឈមមុខ​នឹង​វិធានការសងសឹកពីរដ្ឋាភិបាល​ក្រុងប៉េកាំង​ ដែលកន្លងមក បាន​កំណត់គោលដៅខ្លាំង​ជាពិសេសលើ​ផលិតកម្មកសិកម្មអាមេរិក ដែលមាន​ចិន​ជាទីផ្សារនាំចេញកំពូល។

ខណៈចិន​ដាក់ពន្ធសងសឹក ៣៤ ភាគរយ លើគ្រប់មុខទំនិញ​អាមេរិក ទីភ្នាក់ងារសារព័ត៌មាន​រ៉យទ័រ​បាន​ផ្សាយ​នៅថ្ងៃពុធ (៩ មេសា) នេះថា ក្រុមហ៊ុនក្នុងស្រុកអាមេរិក​ដែល​ងាយរងគ្រោះជាងគេ គឺក្រុមហ៊ុនមកពីវិស័យអាកាសចរណ៍ (ក្រុមហ៊ុនផលិតយន្តហោះ) បន្ទះឈីប​ ឧបករណ៍កសិដ្ឋាន និងកសិកម្មជាពិសេស។ ការសងសឹករបស់ចិន នឹងផ្ដល់ប្រយោជន៍ទៅវិញ សម្រាប់ក្រុមហ៊ុនចិន​ក្នុងវិស័យទាំងនោះ។

ក្រុមហ៊ុនអាមេរិក​ប្រតិបត្តិការនៅចិន​ ក៏កាន់តែរងផលប៉ះពាល់ធ្ងន់ធ្ងរ ជាពិសេសក្រុមហ៊ុនដែល​ធ្វើការនាំចេញទៅសហរដ្ឋអាមេរិក។ ជាឧទាហរណ៍ ក្រុមហ៊ុនបច្ចេកវិទ្យា Apple ពឹង​ផ្អែកខ្លាំង​លើផលិតកម្មទូរស័ព្ទ iPhone និងឧបករណ៍អេឡិចត្រូនិកផ្សេងទៀត​ក្នុងប្រទេសចិន​ ដែល​នេះ​នឹងធ្វើឱ្យ​មាន​ផលប៉ះពាល់ធ្ងន់ដល់ការផ្គត់ផ្គង់ និងការប្រកួតប្រជែង​នៅសហរដ្ឋ​អាមេរិក ដែលជាទីផ្សារធំរបស់ Apple។ ក្រុមហ៊ុនស្បែកជើង Nike ដែលពឹងផ្អែកខ្លាំង​លើផលិតកម្មធំនៅចិន និងក្រុមហ៊ុនលក់រាយ Walmart ដែលអាស្រ័យលើទំនិញប្រើប្រាស់ផលិតនៅចិន ក៏នឹង​ជួបប្រទះនូវបញ្ហា​ប្រឈមដូចគ្នា ​ដោយ​ពន្ធរបស់ ត្រាំ ​​នឹង​បង្កើនតម្លៃមុខទំនិញ​ពីក្រុមហ៊ុនទាំងនេះ​ សម្រាប់អ្នកប្រើប្រាស់អាមេរិក។ ​

​ពន្ធលើទំនិញ​នាំចូលពីបរទេស រួមទាំងចិន របស់​ ត្រាំ ក៏នឹង​បង្កើនបន្ទុកចំណាយផងដែរ សម្រាប់​ក្រុមហ៊ុនដែលត្រូវការវត្ថុធាតុដើម ឬ​គ្រឿងផលិតកម្មបន្ទាប់បន្សំពី​បរទេស​។ តួយ៉ាង ក្រុមហ៊ុន Tesla ផលិតរថយន្តលក់ក្នុងស្រុកអាមេរិកច្រើន ប៉ុន្តែត្រូវការគ្រឿងបន្លាស់រថយន្តពីបរទេស ដែលត្រូវជាប់ពន្ធ ២៥ ភាគរយ ក្រោមពន្ធលើរថយន្ត និងគ្រឿងបន្លាស់នាំចូល ដែល​ ត្រាំ ប្រកាសឡើងកាលពីចុងខែមីនា។

សូម្បីតែក្រុមហ៊ុនអាមេរិក ដែល​ដាក់ផលិតកម្ម ឬប្រតិបត្តិការ​នៅចិន សម្រាប់ទីផ្សារយក្ស​ក្នុងស្រុក​ចិន ក៏អាច​ទទួល​រង​នូវសម្ពាធ​ពីសង្រ្គាមពាណិជ្ជកម្មផងដែរ។ ជាទូទៅ លក្ខខណ្ឌបែបនេះ តែងតែ​បង្កើន​ទំនោរ​ជាតិនិយម ដែលបង្កការធ្វើពហិការផ្សេងៗលើ​ផលិតផល​ក្រុមហ៊ុនអាមេរិក​ (ជាឧទាហរណ៍ ការធ្វើពហិការប្រឆាំងក្រុមហ៊ុន Tesla ​នៅកាណាដា និងសហភាពអឺរ៉ុបជាដើម។ ការលក់ Tesla នៅចិន​ក៏ធ្លាក់ចុះផងដែរ នាដើមឆ្នាំនេះ)។ នេះមិនរាប់បញ្ចូលការណ៍ដែលថា​ ក្រុមហ៊ុនរបស់​អាមេរិកក្នុងស្រុកចិន​ ងាយនឹងរងចំណាត់ការណាមួយ​ពីរដ្ឋាភិបាល​ចិន​ផង។

កន្លងមក ចិន​បាន​បើកការស៊ើបអង្កេតប្រឆាំងការផ្ដាច់មុខលើក្រុមហ៊ុនអាមេរិក និងដាក់ក្រុមហ៊ុនបច្ចេកវិទ្យា​អាមេរិករាប់សិប ទៅក្នុងបញ្ជី​គ្រប់គ្រង​ការនាំចេញ។ ក្រៅពីនេះ ការរឹតត្បឹត​របស់ចិនលើរ៉ែកម្រនាំចេញទៅអាមេរិក ដើម្បីឆ្លើយតប​នឹង​វិធានការពន្ធរបស់ ត្រាំ ក៏បង្កឧបសគ្គដល់​ក្រុមហ៊ុនអាមេរិក ដែលមាន​ចិន​ជាប្រភព​ផ្គត់ផ្គង់ផងដែរ។ ទោះយ៉ាងណាក៏ដោយ កាលពីខែមីនា ប្រធានាធិបតី ស៊ី ជិនពីង បាន​ជួបប្រជុំជាមួយក្រុមហ៊ុនបរទេស និងអាមេរិកធំៗជាច្រើន ដោយផ្ដល់ពួកគេនូវការធានាផ្សេងៗ ចំពោះប្រតិបត្តិការនៅចិនថាជាកន្លែងសុវត្ថិភាព។

ចិនក៏នឹង​រងផលប៉ះពាល់ធ្ងន់ធ្ងរដូចគ្នា។ ដោយសារតែកម្សោយតម្រូវការក្នុងស្រុក និងបញ្ហាសេដ្ឋកិច្ច​មួយចំនួនទៀត​ ចិន​ត្រូវពឹង​ផ្អែកខ្លាំងលើការនាំចេញដើម្បីជំរុញកំណើនសេដ្ឋកិច្ច ហើយសហរដ្ឋអាមេរិក គឺជាទីផ្សារដ៏សំខាន់បំផុតមួយ​។

ទោះបីជា​ចិន​អាចធ្វើពិពិធកម្មទីផ្សារក៏ដោយ​ អ្នកជំនាញ​លើកឡើងថា ការដាក់ពន្ធធ្ងន់ធ្ងរលើចិន នឹងធ្វើឱ្យផលិតកម្មចុះខ្សោយ និងអាច​ឈានទៅដល់ការបញ្ចប់ ឬកាត់បន្ថយការងារ ចំពេលដែល​ការ​អត់ការងារធ្វើសម្រាប់យុវជនជាច្រើន​នៅចិន គឺជាបញ្ហា​រួចស្រាប់ទៅហើយ។

អ្នកជំនាញបាន​គូសបញ្ជាក់ថា ក្រុមហ៊ុនរបស់​ចិន​ក្នុងវិស័យដូចជាអេឡិចត្រូនិក វាយនភណ្ឌ និងទំនិញប្រើប្រាស់ នឹង​ឡើងថ្លៃលើទីផ្សារអាមេរិក ដែលប៉ះពាល់ដល់តម្រូវការ និង​​ប្រាក់ចំណេញសម្រាប់ក្រុមហ៊ុនចិន។ ការណ៍នេះ ឆ្ពោះទៅការចុះខ្សោយនៃសកម្មភាពរោងចក្រ​ ចំពេលការប្រកួតប្រជែងនៅទីផ្សារនាំចេញអន្តរជាតិផ្សេងៗក៏កាន់តែ​ខ្លាំងឡើងៗ ​ក្នុងបរិបទ​ដែល​វិធានការការពារនិយមរបស់ ត្រាំ ផ្លាស់ប្ដូរលំនាំពាណិជ្ជកម្មសកល ពោលគឺខ្សែច្រវ៉ាក់ផ្គត់ផ្គង់សកល។​

ក្រុមហ៊ុនអាមេរិកសំខាន់ៗនៅចិន៖

ក្រុមហ៊ុនរបស់សហរដ្ឋអាមេរិកធំៗជាច្រើន​ដាក់ប្រតិបត្តិការនៅចិន ឬមាន​ទំនាក់ទំនងនៃខ្សែច្រវ៉ាក់ផ្គត់ផ្គង់ពីក្នុងប្រទេសចិន ដោយ​គ្របដណ្ដប់លើវិស័យជាច្រើន រាប់តាំងពីបច្ចេកវិទ្យា រហូតដល់រថយន្តយន្ត វាយនភណ្ឌ និងចំណីអាហារ។

• Apple: ក្រុមហ៊ុនបច្ចេកវិទ្យាអាមេរិក មួយនេះ​មាន​រោងចក្រផលិតកម្ម និងដំឡើង​ជាច្រើននៅក្នុងប្រទេសចិន រួមទាំងផលិតកម្មទូរស័ព្ទម៉ាក iPhone។ ក្រុមហ៊ុននេះមានអាមេរិកជា​ទីផ្សារនាំចេញសំខាន់ ខណៈចិន​ក៏ជាទីផ្សារយក្សសម្រាប់ខ្លួនផងដែរ។
• Tesla: ក្រុមហ៊ុនផលិតរថយន្តអគ្គិសនីរបស់លោក អេឡុន ម៉ាសក៍ Tesla មាន​រោងចក្រផលិត និងដំឡើង​ក្នុងស្រុកចិន ដែលមាន​សមត្ថភាពផលិតរថយន្ត​ប្រមាណ ៩៥០ ០០០ គ្រឿង ក្នុងឆ្នាំ ២០២៣។
• General Motors (GM): ប្រតិបត្តិការបណ្តាក់ទុនរួមគ្នាជាមួយក្រុមហ៊ុនចិន ជាច្រើន​ដូចជា SAIC Motor និង Wuling Motors ដោយ​ផលិតរថយន្តជាច្រើនប្រភេទ រួមទាំងរថយន្តអគ្គិសនីផងដែរ ភាគច្រើនសម្រាប់ទីផ្សារចិន។
• ក្រុមហ៊ុន Microsoft មានវត្តមានយ៉ាងសំខាន់នៅក្នុងប្រទេសចិន តាមរយៈសេវាកម្មសុសវ៉ែររបស់ខ្លួន រួមមានបច្ចេកវិទ្យាពពក​ ហ្គេម​ និងការលក់កម្មវិធី Windows និង Office ជាដើម​។ កម្មវិធី និងសេវាកម្មពពករបស់ Microsoft គឺផ្តោតជាចម្បងលើទីផ្សារពិភពលោក ​ភាគច្រើន​នៅ​សហរដ្ឋអាមេរិក អឺរ៉ុប និងតំបន់ផ្សេងៗទៀត។
• ​Nike: ក្រុមហ៊ុន​នេះ​មានប្រតិបត្តិការផលិតកម្ម និងលក់រាយយ៉ាងច្រើននៅ​ចិន។ ផលិតផលស្បែកជើង សម្លៀកបំពាក់ និងឧបករណ៍ជាច្រើន ត្រូវបានផលិតនៅក្នុងប្រទេសចិន ឬមានប្រភពមកពីអ្នកផ្គត់ផ្គង់ចិន។ ​Nike នាំចេញផលិតផលរបស់ខ្លួនទូទាំងពិភពលោក ដោយសហរដ្ឋអាមេរិក គឺជាទីផ្សារធំបំផុត។
• Starbucks មានហាងរាប់ពាន់នៅទូទាំងប្រទេសចិន ដែលធ្វើឱ្យចិន ក្លាយជាទីផ្សារដ៏ធំបំផុតមួយសម្រាប់ខ្សែច្រវ៉ាក់ផ្គត់ផ្គង់កាហ្វេ នៅខាងក្រៅសហរដ្ឋអាមេរិក។
• ក្រៅពីនេះ គឺឃើញមាន​ក្រុមហ៊ុនសំខាន់ៗជាច្រើនដូចជា Amazon, Intel, McDonald’s, Caterpillar, Johnson & Johnson និង Boeing ជាដើម​។

​ក្រុមហ៊ុនចិនសំខាន់ៗនៅសហរដ្ឋអាមេរិក​៖

ក្រុមហ៊ុនចិន មានប្រតិបត្តិការសំខាន់ៗនៅសហរដ្ឋអាមេរិក រាប់ចាប់ពីវិស័យបច្ចេកវិទ្យា និងពាណិជ្ជកម្មអេឡិចត្រូនិក រហូតដល់រថយន្ត ថាមពល និងគ្រឿងអេឡិចត្រូនិក។

• Alibaba ប្រតិបត្តិការនៅសហរដ្ឋអាមេរិក តាមរយៈវេទិកាពាណិជ្ជកម្មអេឡិចត្រូនិក ដូចជា AliExpress ដែលអនុញ្ញាតឱ្យអ្នកប្រើប្រាស់អាមេរិកទិញផលិតផលដោយផ្ទាល់ពីក្រុមហ៊ុន​ផ្គត់ផ្គង់ចិន។ ​ក្រុមហ៊ុននេះ ប្រតិបត្តិការិយាល័យ និងមជ្ឈមណ្ឌលទិន្នន័យ រួមទាំងសេវាកម្មបច្ចេកវិទ្យាពពក​ នៅសហរដ្ឋអាមេរិក ​ខណៈផ្តោតលើការទាក់ទាញអាជីវកម្មខ្នាតតូចនៅសហរដ្ឋអាមេរិក និងអឺរ៉ុប។ នេះបើយោងតាមបណ្ដាញទូរទស្សន៍ ​​CNBC ។
• Lenovo គឺជាក្រុមហ៊ុនផលិតកុំព្យូទ័រផ្ទាល់ខ្លួនដ៏ធំបំផុតមួយនៅទូទាំងពិភពលោក ហើយមានវត្តមានយ៉ាងសំខាន់នៅក្នុងសហរដ្ឋអាមេរិក។ ក្រុមហ៊ុន​នេះ​នាំចេញផលិតផលរបស់ខ្លួនទៅទូទាំងពិភពលោក ដោយ​មាន​ចំណែកទីផ្សារដ៏រឹងមាំនៅ​សហរដ្ឋអាមេរិក អឺរ៉ុប និងអាស៊ី។
• BYD គឺជាក្រុមហ៊ុនផលិតរថយន្តអគ្គិសនីចិន ដែល​មានរោងចក្រផលិតរថយន្ត​ក្រុងនៅទីក្រុង Lancaster រដ្ឋកាលីហ្វ័រញ៉ា ដែលជារោងចក្ររថយន្ត​ក្រុងអគ្គិសនីធំជាងគេនៅអាមេរិកខាងជើង និងជារោងចក្ររថយន្តក្រុងដែលគ្រប់គ្រងដោយចិនដំបូងគេ នៅសហរដ្ឋអាមេរិក។
• TCL: ជាក្រុមហ៊ុនអេឡិចត្រូនិកដ៏ធំមួយនៅក្នុងប្រទេសចិន ដែលផលិតទូរទស្សន៍ ស្មាតហ្វូន និងឧបករណ៍ប្រើប្រាស់ក្នុងផ្ទះ។ ក្រុមហ៊ុននេះ​ មានវត្តមានលក់រាយដ៏រឹងមាំនៅ​សហរដ្ឋអាមេរិក ដោយលក់ទូរទស្សន៍ និងគ្រឿងអេឡិចត្រូនិចផ្សេងទៀតរបស់ខ្លួន តាមរយៈអ្នកលក់រាយធំៗនៅសហរដ្ឋអាមេរិក។
• ក្រៅពីនេះ មាន​ក្រុមហ៊ុនផ្សេងៗទៀត ដូចជាក្រុមហ៊ុនក្នុងវិស័យហ្គេមដូចជា Tencent និង​ក្រុមហ៊ុនបណ្ដាញសង្គម និងពាណិជ្ជកម្មអេឡិចត្រូនិក TikTok របស់ Bytedance និងក្រុមហ៊ុនផលិតដ្រូន Autel Robotics ជាដើម៕

The post តើមានក្រុមហ៊ុនអាមេរិកប៉ុន្មាននៅចិន និងក្រុមហ៊ុនចិនប៉ុន្មាននៅអាមេរិក? appeared first on Kampuchea Thmey Daily.

​លោក​ ហ្គូតទែរ៉េស ថ្លែងប្រាប់អ្នកយកព័ត៌មាន កាលពីថ្ងៃអង្គារ​យ៉ាងដូច្នេះថា៖ «សង្គ្រាមពាណិជ្ជកម្ម មានភាពអវិជ្ជមានខ្លាំង។ គ្មាននរណាម្នាក់ឈ្នះ​ក្នុង​សង្រ្គាមពាណិជ្ជកម្មនោះទេ។ ​គ្រប់គ្នាមានទំនោរនឹងចាញ់។ ហើយខ្ញុំព្រួយបារម្ភ ជាពិសេស​សម្រាប់ប្រទេសកំពុងអភិវឌ្ឍ​ដែលងាយរងគ្រោះបំផុត ដែលផលប៉ះពាល់នឹងកាន់តែ​ដំណំ»។

គួរគូស​បញ្ជាក់ថា ពន្ធគយបដិការអត្រាលើស ១០ ភាគរយ របស់លោក ត្រាំ បាន​ចូលជាធរមាននៅថ្ងៃពុធនេះ​។ សរុបមក ការនាំចូលទៅសហរដ្ឋអាមេរិក​ពីប្រទេសចំនួន ៥៩ ឥឡូវនេះ ត្រូវទទួលពន្ធខ្ពស់ចន្លោះពី ១១​-៥០ ភាគរយ និងដល់ ១០៤ ភាគរយ សម្រាប់ចិន។​ រាប់ទាំងពន្ធមូលដ្ឋាន ១០ ភាគរយ ដែលចូលជាធរមាន​កាលពីថ្ងៃសោរ៍ កញ្ចប់ពន្ធចុងក្រោយបានកំណត់គោលដៅលើប្រទេស និងដែនដី ១៨០ ជុំវិញពិភពលោក៕

The post ប្រមុខ UN៖ គ្មានអ្នកឈ្នះក្នុងសង្រ្គាមពាណិជ្ជកម្មទេ appeared first on Kampuchea Thmey Daily.

ការវិវត្តចុងក្រោយ​នេះ កើតឡើងចំថ្ងៃដែល​ពន្ធគយបដិការរបស់​លោក ត្រាំ កំណត់ថានឹង​ចូលជាធរមាន​ (៩ មេសា) ដោយ​ចិន​រង​នូវការដំឡើងពន្ធថ្មី​ ៣៤ ភាគរយ ពីលើ​អត្រា ២០ ភាគរយ ដែល​​មាន​ស្រាប់។ ចិន​បានសងសឹក​​វិញ ដោយ​ប្រកាសដំឡើងពន្ធគ្រប់មុខទំនិញអាមេរិក ៣៤ ភាគរយ ដូចគ្នា ដែលធ្វើឱ្យ​ ត្រាំ គំរាមដំឡើងពន្ធ ៥០ ភាគរយ បន្ថែមទៀតលើចិន​ ប្រសិន​បើ​មិនដកពន្ធនោះចេញទេ។ ប្រតិកម្មទៅនឹងការគំរាមកំហែងរបស់ ត្រាំ កាលពីថ្ងៃចន្ទ ចិន​ឯណោះវិញបាន​ហៅអាមេរិកថាអ្នកសម្លុតគេ ហើយ​ប្ដេជ្ញាថានឹង​ «ប្រយុទ្ធដល់ទីបញ្ចប់»។

លោកស្រី Leavitt បានប្រាប់អ្នកយកព័ត៌មានកាលពីថ្ងៃអង្គារថា៖ «បណ្តាប្រទេសដូចជា​ចិន ដែលបានជ្រើសរើសការ​សងសឹក និងព្យាយាមបន្ត​ធ្វើបាបកម្មករអាមេរិក កំពុង​ធ្វើខុសហើយ​។ ប្រធានាធិបតី ត្រាំ មានឆ្អឹងខ្នងដែក ហើយ​លោក​នឹងមិនបំបែកទេ»។

លោក​ស្រី​បាន​បន្ថែម​ថា​៖ «​​​ចិន​ចង់​ធ្វើ​កិច្ច​ព្រម​ព្រៀង​មួយ ពួកគេ​មិន​ដឹង​ពី​របៀប​ធ្វើ​វា​ទេ​​»។ លោកស្រី​បាន​បដិសេធ​​មិនផ្ដល់នូវលក្ខខណ្ឌ​ណា​ដែល​លោក ត្រាំ នឹង​ពិចារណា​ក្នុង​ការ​បញ្ចុះ​ពន្ធ​លើ​​ចិន។

គួរគូស​បញ្ជាក់ថា​ នេះ​គឺជា​ការវិវត្តចុងក្រោយ ពាក់ព័ន្ធនឹង​វិធានការពន្ធគយបដិការរបស់លោក ត្រាំ ដែលធ្វើឱ្យ​​សង្រ្គាមពាណិជ្ជកម្ម​ពិភព​លោកកាន់តែតានតឹងទៅៗ និងបង្កក្ដីបារម្ភអំពីវិបត្តិសេដ្ឋកិច្ចសកល ជុំវិញ​ការណ៍ដែលថា ពន្ធនឹងធ្វើឱ្យ​ពាណិជ្ជកម្មសកលធ្លាក់ចុះ ហើយប៉ះពាល់ដល់កំណើនសេដ្ឋកិច្ច ខណៈបង្កើនសម្ពាធអតិផរណានៅស្រុកអាមេរិក ដែលអាក្រក់សម្រាប់អំណាចទិញជាដើម។

ចិនគឺជាប្រភពនាំចូលធំទី២របស់អាមេរិកកាលពីឆ្នាំមុន ដោយ​មាន​ទំនិញសរុបចំនួន ៤៣៩ ប៊ីលានដុល្លារ ទៅកាន់សហរដ្ឋអាមេរិក ខណៈ​សហរដ្ឋអាមេរិក បាននាំចេញទំនិញមានតម្លៃ ១៤៤ ​ប៊ីលានដុល្លារទៅកាន់ប្រទេសចិន។ ការដាក់ពន្ធគយ​គ្នាទៅវិញទៅមក​ គំរាម​កំហែង​ដល់​ឧស្សាហកម្ម​ក្នុងស្រុករៀងៗខ្លួន ​ហើយនឹង​ឈាន​ដល់​ការ​បញ្ឈប់​ ឬកាត់បន្ថយការងារជាដើម​៕ ​

The post សេតវិមាន​៖ ត្រាំគ្រោង​ប្រកាសដំឡើងពន្ធលើចិន ដល់ ១០៤ ភាគរយ appeared first on Kampuchea Thmey Daily.

ក្នុងបរិបទ​នៃភាពកាន់តែតានតឹងនៃសង្រ្គាមពាណិជ្ជកម្មពិភព​លោក ការគំរាមជាថ្មីរបស់​លោក ត្រាំ ធ្វើឡើង ខណៈដែល​ទីផ្សារហិរញ្ញវត្ថុជុំវិញ​ពិភព​លោក​ធ្លាក់ចុះខ្លាំងរាប់តាំងពីសប្ដាហ៍មុនមក​ នៅពេល​វិនិយោគិន​ព្រួយបារម្ភពីវិបត្តិសេដ្ឋកិច្ចសកល ដោយសារតែ​វិធានការពន្ធគយ ដែលបង្កការលក់ភាគហ៊ុនចេញ​ទ្រង់ទ្រាយធំ​។

លោក ត្រាំ និយាយថា​ លោក​នឹង​ដាក់ពន្ធ ៥០ ភាគរយ​ បន្ថែមលើគ្រប់មុខទំនិញនាំចូលពីចិន លុះត្រាតែប្រទេស​នេះដកពន្ធសងសឹក​របស់​ខ្លួនចេញ ដោយ​​អាច​ធ្វើឱ្យ​អត្រាពន្ធលើចិន​សរុប កើនដល់ ១០៤ ភាគរយ។ លោក ត្រាំ ប្ដេជ្ញាទុកពេលឱ្យចិន ត្រឹមថ្ងៃអង្គារនេះ​ ពោលគឺ ១ ថ្ងៃមុនពន្ធគយបដិការរបស់​លោកនឹងចូលជាធរមាននៅថ្ងៃពុធ​។

ប្រតិកម្មទៅនឹង​​ការវិវត្តចុង​ក្រោយ​ ​អ្នកនាំពាក្យស្ថានទូតចិនប្រចាំសហរដ្ឋអាមេរិក​ លោក Liu Pengyu បាននិយាយថា ការគំរាមកំហែងរបស់លោក ត្រាំ គឺជា «ចលនាធម្មតានៃលទ្ធិឯកតោភាគីនិយម ការការពារនិយម និងការគំរាមកំហែងផ្នែកសេដ្ឋកិច្ច»។

លោក​ Liu Pengyu បាន​បន្ថែម​ថា​៖ «​យើង​បាន​សង្កត់​ធ្ងន់​​ច្រើនដងហើយ​ថា ​ការ​ដាក់​សម្ពាធ​ ឬ​ការ​គំរាម​កំហែង​ដល់​ប្រទេស​ចិន ​មិន​មែន​ជា​វិធី​ត្រឹមត្រូវ​ក្នុង​ការ​ចូលរួម​ជាមួយ​យើង​នោះ​ទេ។ ចិននឹងការពារយ៉ាងម៉ឺងម៉ាត់នូវសិទ្ធិ និងផលប្រយោជន៍ស្របច្បាប់របស់ខ្លួន»។

ក្នុងបរិបទពន្ធគយបដិការផងដែរ​ គណៈកម្មការអឺរ៉ុបឯណោះវិញ បានស្នើ​ពន្ធសងសឹក​ ២៥ ភាគរយ ​លើទំនិញជាច្រើនរបស់សហរដ្ឋអាមេរិក រួមទាំងសណ្តែកសៀង គ្រាប់ធញ្ញជាតិ និងសាច់ក្រក។ នេះបើយោងតាមឯកសារ​ ដែល​រ៉យទ័រ​បាន​ឃើញ​។

​ទោះជាយ៉ាងណាក៏ដោយ​ មន្ត្រីរបស់​សហភាពអឺរ៉ុប​បាននិយាយថា ពួកគេបានត្រៀមខ្លួនរួចជាស្រេចដើម្បីចរចាកិច្ចព្រមព្រៀង «សូន្យសម្រាប់សូន្យ» ​ជាមួយរដ្ឋបាលរបស់លោក ​ត្រាំ សម្រាប់មុខទំនិញ​មួយ​ចំនួន​ ជាពិសេសទំនិញ​ឧស្សាហកម្ម​។ នេះ​​សំដៅលើការដកពន្ធលើទំនិញ​អាមេរិកត្រឹម ០ ប្រសិន​បើអាមេរិក ធ្វើដូចគ្នា។

ងាក​ចេញពីនេះ ផ្សារភាគហ៊ុនទូទាំងសកលបាន​ធ្លាក់ចុះ​ខ្លាំង​ក្រោយ​លោក ត្រាំ ប្រកាសពន្ធគយបដិការកាលពីព្រឹកថ្ងៃព្រហស្បតិ៍ (​ថ្ងៃពុធនៅវ៉ាស៊ីនតោន ឌីស៊ី) សប្ដាហ៍មុន ដោយ​បង្កការខាតបង់សរុប​ប្រមាណ ១០ ទ្រីលាន​ដុល្លារ ដែល​នេះ​ជំរុញ​ដោយ​ក្ដីបារម្ភពីផលប៉ះពាល់លើសេដ្ឋកិច្ចជុំវិញ​ពន្ធគយ​។

សន្ទស្សន៍ផ្សារ​ភាគហ៊ុន S&P 500 បានធ្លាក់ចុះច្រើនជាង ១០ ភាគរយ​ ​សម្រាប់ការជួញដូរនៅ២វគ្គចុងក្រោយ​ កាលពីសប្ដាហ៍មុន ​ពោលគឺអាក្រក់បំផុតរបស់ខ្លួនចាប់តាំងពីសង្គ្រាមលោកលើកទី ២ ធៀបនឹងការធ្លាក់ឆ្នាំ ១៩៨៧ វិបត្តិហិរញ្ញវត្ថុឆ្នាំ ២០០៨ និងវិបត្តិកូវីដឆ្នាំ ២០២០។ ​កាលពីថ្ងៃចន្ទ ​សន្ទស្សន៍ផ្សារ​ភាគហ៊ុនដដែល​ បាន​ធ្លាក់ចុះ ​០,២៣ ភាគរយ ពេលបញ្ចប់ការជួញដូរ​។

ផ្សារភាគហ៊ុនអឺរ៉ុបវិញក៏ធ្លាក់ចុះផងដែរ ដោយសន្ទស្សន៍ផ្សារ​ភាគហ៊ុន STOXX 600 បានធ្លាក់ចុះ ៤,៥ ភាគរយ ពេលបិទបញ្ចប់ការជួញដូរកាលពីថ្ងៃចន្ទ ដែលទាបបំផុតរាប់តាំងពីខែមករា ឆ្នាំ ២០២៤។ នៅអាស៊ីក៏ដូចគ្នា សន្ទស្សន៍ផ្សារហ៊ុនជប៉ុន Nikkei 225 ​បាន​ធ្លាក់ចុះ ៧,៩ ភាគរយ ពេលបិទនៅថ្ងៃចន្ទ ខណៈសន្ទស្សន៍​ Hang Seng របស់ក្រុងហុងកុង ធ្លាក់ចុះជាង ១៣ ភាគរយ ដែលជាអត្រាធ្ងន់ធ្ងរ​បំផុត រាប់តាំងពីឆ្នាំ ១៩៩៧។ ​សម្រាប់ចិនដីគោក សន្ទស្សន៍ផ្សារហ៊ុន Shanghai Composite បាន​ធ្លាក់ចុះប្រមាណ ៧,៣ ភាគរយ។

អ្នកវិភាគលើកឡើងថា ការធ្លាក់ចុះ​នៃផ្សារភាគហ៊ុនទូទាំងសកលបែប​នេះ ​បណ្ដាលមក​ពីការព្រួយបារម្ភពីលទ្ធភាព​នៃវិបត្តិសេដ្ឋកិច្ចពិភព​លោក​ ជាពិសេស​នៅសហរដ្ឋអាមេរិក ខណៈពន្ធបដិការរបស់​លោក ត្រាំ នឹងធ្វើឱ្យពាណិជ្ជកម្មសកលធ្លាក់ចុះ ការបិទរោងចក្រ និងការបាត់បង់ការងារ ក៏ដូចជាបង្កើនសម្ពាធ​អតិផរណានៅសហរដ្ឋអាមេរិក៕

The post ត្រាំ គំរាមដាក់ពន្ធ ៥០%លើចិនបន្ថែមទៀត ខណៈផ្សារភាគហ៊ុនសកលបន្តធ្លាក់ចុះ appeared first on Kampuchea Thmey Daily.

តម្លៃប្រេងឆៅនាពេលអនាគត ម៉ាក​ Brent បានធ្លាក់ចុះ ២,២៨ ដុល្លារ ឬ ៣,៥ ភាគរយ ដោយ​ជួញដូរ​នៅតម្លៃ ៦៣,៣០ ដុល្លារ/បារ៉ែល នៅព្រឹកថ្ងៃចន្ទនេះ ខណៈ​តម្លៃប្រេង​ឆៅនា​ពេល​អនាគត​របស់អាមេរិក ម៉ាក​ West Texas Intermediate​ (WTI) បានធ្លាក់ចុះ ២,២០ ដុល្លារ ឬ ៣,៦ ភាគរយ ដោយ​ជួញដូរ​នៅត្រឹម ៥៩,៧៩ ដុល្លារ/បារ៉ែល​។​ នេះ​បង្ហាញ​ថា​ តម្លៃប្រេងទាំង២​ បាន​ធ្លាក់ចុះដល់កម្រិតទាប​បំផុតរាប់តាំងពីខែមេសា ឆ្នាំ ២០២១។ ​

តម្លៃប្រេង បានធ្លាក់ចុះ ៧ ភាគរយ កាលពីថ្ងៃសុក្រ នៅពេល​ចិនបានប្រកាសដំឡើងពន្ធសងសឹក​លើទំនិញរបស់សហរដ្ឋអាមេរិក ដែល​ធ្វើឱ្យភាពតានតឹង​នៃសង្រ្គាមពាណិជ្ជកម្មកើនឡើង​។ ពេញ​មួយសប្ដាហ៍មុន តម្លៃប្រេងម៉ាក ​Brent បានធ្លាក់ចុះ ១០,៩ ភាគរយ ខណៈ ​WTI បានធ្លាក់ចុះ ១០,៦ ភាគរយ​ ។

អ្នកជំនាញ​គូសបញ្ជាក់ថា ការធ្លាក់ចុះ​នៃតម្លៃប្រេង​បង្កឡើង​ពីក្ដីបារម្ភដែលថា គោលនយោបាយពន្ធគយ​ថ្មីៗនេះ នឹង​ធ្វើឱ្យសេដ្ឋកិច្ចពិភព​លោក​ចុះខ្សោយ​ ​និង​ផែនការបង្កើនផលិតកម្មប្រេងឡើងវិញ​របស់​អង្គការ​នៃប្រទេស​នាំចេញប្រេង​កាត និងសម្ព័ន្ធមិត្ត (OPEC+)។

មែនទែនទៅ​ ការនាំចូលប្រេង ឧស្ម័ន និងផលិតផលចម្រាញ់ ទទួល​បាន​​ការលើកលែងពីពន្ធ​ថ្មីៗ​របស់លោក ត្រាំ។ ប៉ុន្តែ គោលនយោបាយទាំងមូលអាចបង្កឱ្យមានអតិផរណា កំណើនសេដ្ឋកិច្ចយឺតយ៉ាវ​ និងធ្វើឱ្យជម្លោះពាណិជ្ជកម្មកាន់តែ​តានតឹង​ទៅៗ​ ដោយ​នេះដាក់សម្ពាធ​លើ​តម្លៃប្រេង៕

The post តម្លៃប្រេង​ធ្លាក់ចុះទាបបំផុតក្នុងរយៈពេល ៤ ឆ្នាំ ជុំវិញកង្វល់សេដ្ឋកិច្ច ដោយសារ ពន្ធ ត្រាំ appeared first on Kampuchea Thmey Daily.

ក្នុងការហៅទូរស័ព្ទនោះ ក៏ចូលរួមផងដែរដោយ​​នាយក​រដ្ឋមន្ត្រីវៀតណាម លោក​ Pham Minh Chính ប្រធាន​ការិយាល័យ​មជ្ឈិមបក្ស លោក Lê Hoài Trung និង​ឧបនាយករដ្ឋមន្ត្រីវៀតណាម​ លោក​ Hồ Đức Phớc។

បើតាម​ការចុះផ្សាយរបស់​កាសែត Viet Nam News ក្នុងកិច្ចសន្ទនានោះ មេដឹកនាំទាំងប្រទេសទាំង ២ បានអះអាងជាថ្មីនូវការប្តេជ្ញាចិត្តក្នុងការពង្រឹងកិច្ចសហប្រតិបត្តិការទ្វេភាគី ដើម្បីផលប្រយោជន៍នៃប្រទេសទាំង២​ និងការរួមចំណែកដល់សន្តិភាព ស្ថិរភាព និងការអភិវឌ្ឍន៍ក្នុងតំបន់ និងពិភពលោក។ ពួកគេបានចែករំលែកការវាយតម្លៃថា ទំនាក់ទំនងវៀតណាម-សហរដ្ឋ​អាមេរិក បាននិងកំពុងរីកចម្រើនលើគ្រប់វិស័យ។

ស្តីពីទំនាក់ទំនងពាណិជ្ជកម្ម មេដឹកនាំទាំង ២ បានពិភាក្សាអំពីវិធានការនានា ដើម្បីសម្រួលបន្ថែមទៀតដល់ពាណិជ្ជកម្មទ្វេភាគី។ លោក​ Tô Lâm បានសង្កត់ធ្ងន់លើឆន្ទៈរបស់វៀតណាមក្នុងការចរចាជាមួយអាមេរិក ដើម្បីកាត់បន្ថយពន្ធលើការនាំចេញរបស់អាមេរិកមក​កាន់វៀតណាម មកត្រឹម 0 ភាគរយ​ ហើយបានស្នើឱ្យអាមេរិកធ្វើដូចគ្នា សម្រាប់ការនាំចេញរបស់វៀតណាមទៅកាន់សហរដ្ឋអាមេរិក។

លោកក៏បានគូសបញ្ជាក់ផងដែរ​ថា វៀតណាមព្យាយាមបង្កើនការនាំចូលពីអាមេរិក ហើយលើកទឹកចិត្ត និងបង្កើតលក្ខខណ្ឌអំណោយផលសម្រាប់ធុរកិច្ចអាមេរិក ក្នុងការវិនិយោគនៅវៀតណាមបន្ថែមទៀត។

លោក ត្រាំ ឯណោះវិញ​បាន​ហៅការហៅទូរស័ព្ទជាមួយ​មេដឹកនាំវៀតណាម ថា​ប្រកបដោយ​ផ្លែផ្កា ដោយ​ថាភាគីទាំង​យល់ស្របគ្នា​ក្នុងការចរចា​។

គួរគូស​បញ្ជាក់ថា កិច្ចសន្ទនារបស់​មេដឹកនាំនៃបណ្ដា​ប្រទេសទាំង ២ ធ្វើឡើង ក្រោយលោក ត្រាំ បាន​ប្រកាសពន្ធឆ្លើយតបឱ្យស្មើគ្នា​លើបណ្ដាប្រទេស និងតំបន់ ១៨០ ទូទាំងពិភព​លោក​ រួមទាំង ៤៦ ភាគរយ លើទំនិញ​វៀតណាម ដែល​មាន​អតិរេកពាណិជ្ជកម្មប្រមាណ ១២៣,៥ ប៊ីលាន​ដុល្លារ កាលពីឆ្នាំមុន​៕

The post វៀតណាមចង់បញ្ចុះពន្ធលើទំនិញ​អាមេរិកដល់ ០% ជាការចរចាជាមួយ​ ត្រាំ appeared first on Kampuchea Thmey Daily.

ក្នុង​ការវិវត្តដែល​បង្ហាញពីភាព​កាន់តែតានតឹងនៃសង្រ្គាម​ពាណិជ្ជកម្មពិភព​លោក​នេះ វិធានការពន្ធរបស់ចិន​នឹងចូលជាធរមាន​នៅថ្ងៃទី ១០ មេសា ពោលគឺ ១ ថ្ងៃ ក្រោ​យពន្ធឆ្លើយតបឱ្យស្មើគ្នារបស់​ លោក ត្រាំ កំណត់ថានឹង​ចូលជាធរមាន​។

គណៈកម្មការពន្ធរបស់ក្រុមប្រឹក្សារដ្ឋចិន បាននិយាយក្នុងសេចក្តីថ្លែងការណ៍មួយ ដោយប្រកាសអំពីពន្ធសងសឹករបស់ខ្លួនថា៖ «ការអនុវត្តរបស់សហរដ្ឋអាមេរិកនេះ មិនស្របតាមច្បាប់ពាណិជ្ជកម្មអន្តរជាតិ ធ្វើឱ្យប៉ះពាល់យ៉ាងធ្ងន់ធ្ងរដល់សិទ្ធិ និងផលប្រយោជន៍ស្របច្បាប់របស់ប្រទេសចិន ហើយជាការអនុវត្តការគំរាមកំហែងឯកតោភាគីធម្មតា»។

គួរគូស​បញ្ជាក់ថា រាប់ទាំងពន្ធចុងក្រោ​យដែល លោក ត្រាំ បាន​ប្រកាសឡើង​ អត្រាពន្ធរបស់អាមេរិក​លើទំនិញ​គ្រប់មុខដែល​នាំចូល​ពី​ចិន បាន​កើនដល់ ៥៤ ភាគរយ។ ពន្ធគយចុងក្រោយបំផុតរបស់អាមេរិកលើទំនិញចិន គឺខ្ពស់ជាងអ្វីដែលអ្នកវិភាគជាច្រើនបានរំពឹងទុក ហើយអាចផ្លាស់ប្តូរជាមូលដ្ឋាននៃទំនាក់ទំនង និងពាណិជ្ជកម្មជិតពាក់កណ្ដាល​ទ្រីលាន​ដុល្លារ នៃប្រទេស​ទាំង​២​ ដែល​ជាដៃគូសេដ្ឋកិច្ចអស់រយៈពេល​ជាច្រើនទសវត្សរ៍មកហើយ​។

កន្លងមក​ ចិនតែងតែប្រកាសការឆ្លើយតប​របស់​ខ្លួន ហើយហៅសកម្មភាព​របស់​សហរដ្ឋអាមេរិក​ ថារំលោភលើ​សន្តិសុខសណ្ដាប់ធ្នាប់ពាណិជ្ជកម្មសកលដែលស្រប​តាម​ច្បាប់។ ការឆ្លើយតប​របស់​ចិន​កន្លងមក រួមមាន​ទាំងការកំណត់គោលដៅពន្ធលើទំនិញ​កសិកម្មចិន​ ទប់ស្កាត់ការនាំចេញរ៉ែកម្រទៅសហរដ្ឋអាមេរិក​ និង​ការស៊ើបអង្កេតក្រុមហ៊ុនអាមេរិក​នៅក្នុងស្រុកចិន​ជុំវិញប្រតិបត្តិការ​ផ្ដាច់មុខជាដើម៕

The post ចិនសងសឹក ដោយ​ដាក់ពន្ធ ៣៤ ភាគរយ លើទំនិញ​អាមេរិក​គ្រប់មុខ appeared first on Kampuchea Thmey Daily.