ប្រមុខ UN៖ គ្មានអ្នកឈ្នះក្នុងសង្រ្គាមពាណិជ្ជកម្មទេ

អគ្គលេខាធិការនៃអង្គការសហប្រជាជាតិ (UN) លោក អង់តូនីញ៉ូ ហ្គូតទែរ៉េស (Antonio Guterres) បានថ្លែងថា គ្មាននរណាឈ្នះ​ក្នុងសង្រ្គាមពាណិជ្ជកម្មនោះទេ​ ហើយបណ្តាប្រទេសក្រីក្រ នឹងត្រូវទទួលរងផលវិបាកជាងគេ​ ​ខណៈ​ប្រធានាធិបតីអាមេរិក លោក ដូណាល់ ត្រាំ រក្សាជំហរយ៉ាងម៉ឺងម៉ាត់ជុំវិញគោលនយោបាយពន្ធគយបដិការ​របស់ខ្លួន។ ​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​លោក​ ហ្គូតទែរ៉េស ថ្លែងប្រាប់អ្នកយកព័ត៌មាន កាលពីថ្ងៃអង្គារ​យ៉ាងដូច្នេះថា៖ «សង្គ្រាមពាណិជ្ជកម្ម មានភាពអវិជ្ជមានខ្លាំង។ គ្មាននរណាម្នាក់ឈ្នះ​ក្នុង​សង្រ្គាមពាណិជ្ជកម្មនោះទេ។ ​គ្រប់គ្នាមានទំនោរនឹងចាញ់។ ហើយខ្ញុំព្រួយបារម្ភ ជាពិសេស​សម្រាប់ប្រទេសកំពុងអភិវឌ្ឍ​ដែលងាយរងគ្រោះបំផុត ដែលផលប៉ះពាល់នឹងកាន់តែ​ដំណំ»។

គួរគូស​បញ្ជាក់ថា ពន្ធគយបដិការអត្រាលើស ១០ ភាគរយ របស់លោក ត្រាំ បាន​ចូលជាធរមាននៅថ្ងៃពុធនេះ​។ សរុបមក ការនាំចូលទៅសហរដ្ឋអាមេរិក​ពីប្រទេសចំនួន ៥៩ ឥឡូវនេះ ត្រូវទទួលពន្ធខ្ពស់ចន្លោះពី ១១​-៥០ ភាគរយ និងដល់ ១០៤ ភាគរយ សម្រាប់ចិន។​ រាប់ទាំងពន្ធមូលដ្ឋាន ១០ ភាគរយ ដែលចូលជាធរមាន​កាលពីថ្ងៃសោរ៍ កញ្ចប់ពន្ធចុងក្រោយបានកំណត់គោលដៅលើប្រទេស និងដែនដី ១៨០ ជុំវិញពិភពលោក៕